පුවත්

රටම ආන්දෝලනයට ලක් කරමින්, ඉතා සූක්ෂමව බලය අරඹයා කළ කුමන්ත්‍රණ වලින් එකක් ලෙස වෛද්‍ය සාෆි ෂහබ්ඩීන් විසින් සිංහල බෞද්ධ මව්වරු 4000ක් වඳ කිරීමේ පුවතක් රට පුරා ලැව් ගිණ්නක් සේ ඇවිලී ගියේ ප්‍රධාන මුද්‍රිත මාධ්‍යක් විසින් " තව්හිත් ජමාත් දොස්තර සිංහල බෞද්ධ මව්වරු 4000ක් වඳ කරලා" යන පුවත සමගිනි.

දේශපාලකයන් හා පූජ්‍ය පක්ෂයත් නාළ තැලූ බවට චෝදනා කළා මතකද..?

ඉතා සැලසුම් සහගතවත් සූක්ෂමවත් ක්‍රියාත්මක වූ මේ මහා කේදවාචකය සමස්ත ශ්‍රී ලංකාවේ ආර්තික,සාමාජීය හා දේශපාලනික තත්වයන්ට සිදුකළ බරපතල හානිය කිසිදා නිවැරැදි නොකළ හැකි භයානක ප්‍රතිඵල ගෙනදුන්නකි.

පාර්ලිමේන්තු මංත්‍රී විමල් වීරවංස, පා: ම: පූජ්‍ය අතුරලියේ රතන හිමි, වෛද්‍ය මහාචාර්ය චන්න ජයසුමන ඇතුලු පිරිස් විසින් විද්‍යුත් මාධ්‍ය,මුද්‍රිත මාධ්‍ය හා සමාජ මාධ්‍ය හරහා දිගින් දිගටම කරුණු විකෘති කරමින් සමාජ ස්තරයන් තුළ දැඩි වෛරීය හා ජාතිවාදී හැඟීම් ඇවිස්සෙන අයුරින් ක්‍රියාත්මක වෙමින් රට තුළ ගර්භාෂ යුද්ධය ක්‍රියාත්මක වනබවත් වහාම එය නැවැත්වීමට පවතින පාලනය පෙරලා දමා නව පාලනයක් ඇතිකළ යුතු බවට කරුණු වාර්ථා කරමින් රිසිසේ ක්‍රියා කළ අතර, අවම මාධ්‍ය සදාචාරයක් හෝ නොමැතිව බලපෙරලියට උඩගෙඩි දෙමින් ජඩ මාධ්‍යද ඉතා අපූරුවට කොන්ත්‍රාත්තු ක්‍රියාත්මක කෙරිණ.

තවද කිසිඳු සාධාරණ පරීක්ෂණයකට පෙරාතුව ජාතීන් අතර දැවැන්ත අර්බුදයක් නිර්මාණය කළ මෙම ගැටලුව පිළිබඳ අතැඹුලක් සේ කරුණු දැක්වූ දේශපාලකයන් පූජකයන් හා පොහොට්ටු පාක්ෂිකයන් සිදුකළ අනර්ථය අදවන විටත් බිඳුණු කැඩපතක ප්‍රතිභිම්භයක් සේ සමාජගතව ඇත.

කැලඹෙන සමාජයට සත්‍ය වටහාදුන් එංගලන්තයේ ශ්‍රී ලාංකික වෛද්‍ය වරයාට මහාචාර්ය චන්නගෙන් දෝස්මුරයක්…..!

සියල්ලෝ මනුෂ්‍යන් වන සමාජයක එක් ජාතියක් විසින් තවත් ජාතියක වර්ගයා බෝ වීමට භෞතිකව යම් හානියක් සිදුකරන්නේ නම් එය වෛද්‍ය විද්‍යාත්මකව මෙන්ම සමාජ විද්‍යාත්මකවද අතිශය දරුණු අමානුෂික වරදකි..

එනිසාවෙන් කැලැඹී ගිණි ගනිමින් තිබී ශ්‍රී ලාංකික සමාජය තුළ පැතිරෙන දුර්මතය නිවැරැදි කරනට එංගලන්තෙ මිල්ටන්සි කේන්ස් විශ්වවිද්‍යාල රෝහලේ සේවය නියුතු වෛද්‍ය පියල් පෙරේරා විසින් තම වෘත්තීය දිවියේ වසර 25ක අත්දැකීම් සමගින් දීර්ඝ විස්තරාත්මක ලිපියක් තම මුහුණු හරහා සමාජගත කරමින් විද්‍යාත්මක විග්‍රහයක් සිදුකර තිබුන අතර ඊට එදිරිව වෛද්‍ය මහාචාර්ය චන්න ජයසුමන විසින් සංගීතවේදී ඉරාජ් වීරරත්න හා එක්ව වෛද්‍ය පියල් පෙරේරා කිසිඳු වෘත්තීය සුදුසුකම්ක් නැති "ගොබ්බයෙක්" බවට වීඩියෝවක් සමාජගත කරමින් නැවතත් වටයකින් ඇතිවූ දුර්මතය තීවෘ කරමින් සමාජය පුරා වෛද්‍ය සාෆිටත් මුස්ලිම් සමාජයටත් වෛරය වැපිරවීය.

එමෙන්ම වෛද්‍ය පියල් පෙරේරා විසින් කිසිදා නොහඳුනන වෛද්‍ය සාෆිට එරෙහිව සිදුකළ අමානුෂික අපහාසාත්මක තර්ජන හා චෝදනා වෙනුවෙන් තම වෘත්තීය ක්ෂේත්‍රයේ ගෞරවය පිණිස පෙනීසිටීම වෙනුවෙන් දැඩි සමාජ දෝෂ දර්ශනයයටද ලක්විය.

වෛද්‍ය සාෆිට හිඟ වැටුප් ගෙවයි එදිරි වූ සමාජය නිහඬයි……!

අද දින සමාජ මාධ්‍ය පුරා වෛද්‍ය සාෆි ෂහබ්ඩීන් හට මේවන තුරු අයවිය යුතු හිඟ වැටුප් රුපියල් 2675816.48ක මුදලේ චෙක් පත සංසරණය විය. එමෙන්ම එම මුදල් වෛද්‍ය සාෆි ෂහබ්ඩීන් විසින් උද්ගත අධික බෙහෙත් හිඟය උදෙසා අත්‍යාවශ්‍ය බෙහෙත් මෙරට ජනතාව වෙනුවෙන් මිළදී ගැනීම සඳහා රජයටම පරිත්‍යාග කරන්නට තරම් සැබෑ දේශප්‍රේමී ශ්‍රී ලාංකිකයකු ලෙස උසස් මනසකින් යුතුව ක්‍රියාත්මක වී ඇති මොහොතක අප විසින් එංගලන්තයේ සේවයේ නියුතු වෛද්‍ය පියල් පෙරේරා දුරකථනයෙන් සම්බන්ධ කරගත් අතර ඔහු වෛද්‍ය සාෆි වෙනුවෙන් පෙනී සිටීම හා වර්තමාන තත්වය පිළිබඳ අදහස් දක්වන ලෙස ඉල්ලා සිටි අතර ඔහු දැක්වූ අදහස් මෙසේය..

මම වෛද්‍ය සාෆි ෂහබ්ඩීන් පෞද්ගලික හඳුනන්නෙ නැහ.
කිසිම දිනක ඔහු සජීවීව දැකලත් නැහැ. ඒත් 2019 මැයි මාසෙ 25 මම මගේ ෆේස්බුක් ගිණුම හරහා දීර්ඝ ලිපියකින් සමාජගත කරන්න උත්සාහ කලේ වෛද්‍ය වෘත්තියේ සැබෑ ගෞරවය ආරක්ශා වියයුතු නිසාත් මේ ප්‍රශ්නය නිසා අපට සිටින විශේෂඥ මුස්ලිම් වෛද්‍යවරුන් රැසකගේ සේවට අපට අහිමි වේවි කියන බියත් එක්ක.. ඒක සමාජයට මහත් අපරාධයක් .ඒ අය ඒ වනවිටත් සමාජයෙන් එල්ලවන පීඩනය නිසා රට හැරයමින් සිටියෙ…
අනික තමයි සිසේරියන් සැත්කමක් තනිව වෛද්‍ය වරයෙකුට කළ නොහැකියි. අපි කණ්ඩායමක් විදියට ශල්‍යාගාරයෙ වැඩ කරන්නෙ…

ඔබට, මහාචාර්ය වෛද්‍ය චන්න ජයසුමන විසින් දැඩි විවේචනාත්මක ප්‍රහාරයක් සමාජමාධ්‍ය හරහා දියත්කරනව ඒ ගැන මොකද කියන්න තියෙන්නෙ..?

ඇත්තටම මම පෙනී හිටියෙ සත්‍ය වෙනුවෙන්.. ඒ මොහොතෙ පවතින පාලනය පෙරලා දමන්න වගේම පෞද්ගලික ඉලක්ක වෙනුවෙන් වෛද්‍ය වෘත්තීය පාවිච්චි කරපු වෛද්‍යවරු විශේෂඥ වෛද්‍යවරු රැසක් හිටිය. ඔවුන් තදින්ම පෙනීහිටියෙ වෛද්‍ය සාෆි කිසිඳු පරීක්ෂණයකින් තොරව උල තියන ආකාරයට.. ඒ කියන මහාචාර්ය වරයාට මම අනුකම්පා කරනව.. සත්‍ය කියන්නෙ සත්‍ය, මම කිසිම මොහොතක මගේ පැවැත්ම හෝ මගේ පවුලේ පැවැත්ම වෙනුවෙන් වෘත්තීය අවභාවිතා නොකරනව වගේම, කෙතරම් අවාසි උනත් සත්‍ය වෙනුවෙන් පමණක් පෙනී සිටින රටට ඇත්තටම ආදරේ පුද්ගලයෙක්.
ඒ නිසා තමයි මහාචාර්ය රනිල් ජයවර්ධන විසින් අමාත්‍ය ප්‍රසන්න රනතුංග පරීක්ෂා කිරීම ප්‍රතික්ෂේප කළ මොහොතෙ ඒ වෙනුවෙන් මගේ ඍජු අදහස සමාජ මාධ්‍යට මුදා හැරියෙ.

අවසාන වශයෙන් ඔබට සමාජයට කීමට ඇත්තෙ කුමක්ද..?

ඇත්තටම සමාජයට කියන්න තියෙන්නෙ මීටවඩා වගකීම් සහගතව හැසිරෙන්න.. දැනුවත් උගත් අය පටු වාසිවලට තමන්ගෙ වෘත්තීය ගෞරවය කෙලෙසගන්න එපා.. අපි මේ රටේ අහිංසක මිනිස්සුන්ගෙ බදු මුදලෙන් ඉගෙනගත් අය. ඇත්තටම වෛද්‍ය සාෆිගෙ පවුලට ඒ දරුවන්ට සිදුවුනේ කිසිදා ප්‍රතිපූර්ණය කළ නොහැකි සමාජ අසාධාරණයක්, ඒ වගේම ඔහු විසින් ඒ මුදල් ඔහුට එරෙහිවූ සමාජය සුවපත් කරන්න පරිත්‍යාග කළ එකට කෘතඥ වෙන ගමන් මේ ජාතික අපරාධයට හවුල් වූවන්ට මාධ්‍ය ආයතන වලට තරාතිරම නොබලා නීතිය ක්‍රියාත්මක කරන ලෙසත් ය.

සුමුදු මද්දුමආරච්චි,
මිලානෝ,
ඉතාලිය.

රාජ්‍ය මාධ්‍ය ආයතනවලට නව සභාපතිවරුන් ප්‍රමුඛ අධ්‍යක්ෂ මණ්ඩල සාමාජිකයන් පත්කර ඇත .

ජනමාධ්‍ය අමාත්‍ය බන්දුල ගුණවර්ධන විසින් අද(13) ජනමාධ්‍ය අමාත්‍යාංශයේදී පත්වීම් ලිපි ප්‍රදානය කර ඇත.

ඒ අනුව අදාළ පත්වීම් මෙසේය .

ඉන්දියාවෙන් ලංකාවට ලබා දීමට පොරොන්දු වූ යූරියා පොහොර නැව ජූලි10 හෝ 11 කොළඹ වරායට පැමිණීමට නියමිත බව කෘෂිකර්ම වනජීවී සහ වන සම්පත් අමාත්‍ය මහින්ද අමරවීර පවසයි .

යූරියා මෙට්‍රික් ටොන් 65000ක් රැඟත් එම නෞකාව ජුනි 28 වැනිදා ඕමානයෙන් පිටත් වීමට නියමිත බව අමාත්‍ය මහින්ද අමරවීර සඳහන් කරන අතර , ජුලි 15වැනිදා සිට අදාල පොහොර ගොවීන් වෙත බෙදා දීමට හැකි වන බවත් සඳහන් කරයි.

අදාල යූරියා තොගය පොහොර ලේකම් කාර්යාලය, කොමර්ෂල් පොහොර සමාගම සහ ලංකා පොහොර සමාගම හරහා ගොවිජන සේවා මධ්‍යස්ථාන වලට බෙදා දෙන අතර ගොවිජන සේවා මධ්‍යස්ථාන මගින් කිලෝ 50ක පොහොර මිටියක් රුපියල් දස දහසකට අලෙවි කිරීමට කටයුතු කරන බවද අමාත්‍යවරයා පවසයි .

යල කන්නයේ වී හා බඩඉරිඟු ගොවීන් සඳහා මෙම පොහොර ලබා දෙන බවද අමාත්‍යවරයා සඳහන් කළේය.

පාර්ලිමේන්තුවේ පැවති කෘෂිකර්ම උපදේශක කාරක සභාවේ දී මන්ත්‍රීවරුන් ඇසූ ප්‍රශ්නයකට පිළිතුරු දෙමින් කෘෂිකර්ම අමාත්‍යවරයා පැවසූයේ ඉන්දියාවේ ප්‍රයෝජනය සඳහා ඇනවුම් කර තිබූ මෙම පොහොර නැව පසුව ලංකාවට ලබාදීමට ඉන්දීය රජය තීරණය කළ බවයි.

ශ්‍රී ලංකාවට අසීරු අවස්ථාවක ඉන්දියාව ගත් එම තීරණය සම්බන්ධයෙන් කෘතඥතාවය පළ කළ යුතු බව ද කෘෂිකර්ම අමාත්‍යවරයා වැඩිදුරටත් සඳහන් කළේය.

ඉන්දීය යූරියා වලට අනුරගෙන් බාල්දියක් !

කෙසේ වුවත් ඉන්දියාවෙන් මෙරටට ආනයනය කිරීමට යන ඩොලර් මිලියන 55ක යූරියා මෙට්‍රික් ටොන් 65000 ක ප්‍රමාණය ප්‍රමිතියෙන් බාල තත්වයේ ඒවා බව ජනතා විමුක්ති පෙරමුණේ නායක අනුර දිසානායක සඳහන් කරයි.

එම පොහොර මෙරට ප්‍රමිතියට අනුකූල නොවන බවත් ඒවා මෙරට වගාවට නුසුදුසු බවත් ඔහු පවසයි .

නමුත් මෙම නොගැළපෙන පොහොර සංයුතිය පිළිබඳ කාරණයට විශේෂ කැබිනට් අනුමැතියක් ලබා ගැනීමේ සූදානමක් ඇති බවද මන්ත්‍රීවරයා සඳහන් කර ඇත .

මෙසේ ආනයනය කරන පොහොර පැළ ගොයම යෙදුවහොත් මුල් කුණු වෙන බව කෘෂි විශේෂඥයන් තමන් සමග පැවසූ බවත් ජවිපෙ නායක අනුර කුමාර දිසානායක වැඩිදුරටත් සඳහන් කර ඇත .

?ටෙන්ඩර් ක්‍රියාවලියට ලිට්‍රෝ විරුද්ධයි? බිලියන ගණන් කොමිස් යන සමාගමක් සමග යළිත් ගිවිසුම්!

?තාමත් රු.2500 ක් ගෑස් එකකින් පාඩුයි, ලිට්‍රෝ බංකොලොත් !

ඊයේ (12) දිනයේ ලිට්රෝ ආයතනයේ සේවක පිරිසක් විසින් සංවිධානය කරනු ලැබූ මාධ්‍ය හමුවකදී එහි ප්‍රචාරණ කලමනාකරු වන පියල් කොළඹහෙට්ටිගේ ප්‍රකාශ කර සිටියේ ආයතනය පාලනය කළ සභාපතිවරුන්ගෙ අදූරදර්ශී කලමනාකාරීත්වය හේතුවෙන් ලිට්රෝ සමාගම අදවන විට බංකොලොත් තත්ත්වයට පත්ව ඇති බවයි.

වැඩි කල යුතුව තිබූ ගෑස් මිල වැඩි නොකර සිටීම නිසා මේ වන විට කිලෝග්රෑම් 12.5 ගෘහස්ත ගෑස් සිලින්ඩරයකින් ආයතනයට වන පාඩුව රුපියල් 2500 ක් පමණ වන බව ඔහු වැඩි දුරටත් ප්‍රකාශ කර සිටියේය.

දැන් පවතින මිල රුපියල් 4,875ක් බැවින් ඔහුට අනුව එහි මිල රු.7,375 ක් විය යුතුය. ඔහු ප්‍රකාශ කරන අයුරින් ලිට්රෝ සමාගමෙහි අධ්‍යක්ෂවරුන් ඇතුළු සේවකයින් කිහිපවරක්ම පෙර සිටි සභාපතිවරයෙක් වන තෙෂාර ජයසිංහ හට මේ පිළිබඳව ඉල්ලීම් සිදු කළද ඔහු විසින් එයට අවශ්‍ය පියවර නොගනිමින් ජනතාව අතර ප්‍රසිද්ධ වීම උදෙසා මිල සංශෝධනයක් නොකළ බවත් ඔහු ප්‍රකාශ කරන ලදි.

ඕමාන් ට්‍රේඩින් තරහ කරගත්ත එක ලොකුම වරද !

ආසියානු කලාපයේ හොඳම ගෑස් සැපයුම්කරු වන ඕමාන් ට්‍රේඩින් ගෑස් සමාගම සමග ගිවිසුම දීර්ඝ නොකර ටෙන්ඩර් පටිපාටියකට ගොස් ඔවුන්ව අමනාප කරගත් නිසා මෙම ගෑස් අර්බුදය හටගෙන ඇති බව කියා සිටි පියල් කොළඹහෙට්ටිගේ, "අපට ඇත්තේ ඩොලර් අර්බුධයක් නොව, කලමනාකාරීත්වයේ ප්‍රශ්නයක්" බව ප්‍රකාශ කර සිටියේ ය.

එබැවින් පළපුරුදු අත්දැකීම් බහුල නායකත්වයක් අවශ්‍ය බව ප්‍රකාශ කළ ඔහු කියා සිටියේ "අපට දැනගන්නට ලැබුණා ගරු අගමැතිතුමාගේ සහ සාගල රත්නායක මැතිතුමාගේ ආශිර්වාදයෙන් පෙර සිටි මුදිත පීරිස් මහතා ලිට්රෝ සභාපති ලෙස පත්කිරීමට නියමිත බව, එය එසේ නම් අපි ඉතා කැමැත්තෙන් ඔහුගේ ආගමනය අපේක්ෂාවෙන් සිටිනවා" ලෙසය.

පියල්ගේ ප්‍රකාශයෙන් ලිට්‍රෝ අභ්‍යන්තර ගැටුමක්.. ලිට්‍රෝ සුරකිමු මාධ්‍ය හමුව වර්ජනය කරයි !

ලිට්රෝ ආයතනයේ අභ්‍යන්තර ආරංචි මාර්ගයන්ට අනුව මෙම මාධ්‍ය හමුව පියල් කොළඹහෙට්ටිගේ කැඳවා ඇත්තේ එහි අසුන් ගත් අනෙක් සේවකයින් හට තමන් මෙවන් අදහසක් ප්‍රකාශ කරන බව නොදන්වා ය.

එසේම එය ලිට්රෝ අලෙවි හා ප්‍රවර්ධන අධ්‍යක්ෂ ජනක පතිරත්නගේ වුවමනාව මත, හිටපු කළමනාකරණ අධ්‍යක්ෂවරයෙකු යළි ලිට්රෝ මුල් පුටුවට ගෙන ඒමට වත්මන් ආණ්ඩුවට බල කිරීමේ අභ්‍යන්තර සාකච්ඡාවක ප්‍රතිඵලයක් ලෙස දියත් වූවක් ලෙසයි අප දැනුවත් වූයේ. ඊයේ දිනය ඉරිදා දිනයක් වන අතර, අලෙවි අංශයේ නිලධාරිනියකගේ විශ්‍රාම යාමේ උත්සවයට සහභාගී වූ නිලධාරීන් පිරිසක් මේ කිසිත් නොදැන මාධ්‍ය හමුවේ අසුන් ගෙන ඇති අතර මාධ්‍ය හමුවෙන් පසු පියල් කොළඹහෙට්ටිගේ ප්‍රකාශ කළ කරුණු නිසා එතැන සිටි නිලධාරීන් අතර මතභේදාත්මක උණුසුම් තත්ත්වයක් හටගත් බව එහි සේවකයෙක් අප වෙත පැවසීය.

ලිට්‍රෝ ආයතනයේ ගැටලු වලදී එළි බසින ලිට්‍රෝ සුරකිමු සංවිධානයද මෙම මාධ්‍ය හමුව වර්ජනය කර ඇති අතර එහි සභාපති නලින් සමන්තගෙන් පැමිණි ප්‍රතිචාරය නම් ලිට්‍රෝ සුරකිමු සංවිධානය ලෙස කිසිදු මාධ්‍ය හමුවක් සිදු නොකළ බැවින් මාධ්‍ය තුළ එලෙස සඳහන් වුවවොත් එයට නීතිමය පියවර ගන්නා ලෙසයි.

ගෑස් ටෙන්ඩරය තායිලන්ත සමාගමකට.. ඕමාන් සමාගමට වඩා ඩොලර් 34ක් අඩුයි !

ලිට්රෝ ගෑස් සමාගම 2020 සිට 2022 මුල් කාර්තුව දක්වා ගෑස් ආනයනය සඳහා ගිවිසුම් ගතව තිබුණේ ඕමාන් ට්‍රේඩින් සමාගම සමගයි.

කෙසේ නමුත් එම ගිවිසුම හරහා රුපියල් බිලියන 10 ක් පමණ කොමිස් ලෙස කිසිවෙකුගේ ගිණුමට බැරවෙන බවත්, එක ගෑස් මෙට්‍රික් ටොන් එකක් ඩොලර් 50ක් පමණ අඩුවෙන් ලබාගත හැකි කලාපීය සමාගම් පවතින බවත් හිටපු සභාපතිවරයෙකු වන තෙශාර ජයසිංහ විසින් ප්‍රසිද්ධ මාධ්‍ය හමුවක් කැඳවා ප්‍රකාශ කරන ලද්දේ ඔහු සභාපති ධූරයේ සිටියදීමය.

මේ හේතුවෙන් ඔහු ඕමාන් ට්‍රේඩින් ගෑස් ගිවිසුම දීර්ඝ නොකළ අතර ගෑස් ආනයනය සඳහා විවෘත ටෙන්ඩර් කැඳවීමක් සිදු කර ඇත. ටෙන්ඩර් ක්‍රියාවලිය අවසන්වීමට මත්තෙන් තෙශාර ජයසිංහ ලිට්රෝ සභාපතිධූරයෙන් ඉල්ලා අස්වූයේ ගෑස් ආනයනය කිරීමේ ගිවිසුම් වලදී තමාට ඉහළ දේශපාලන අධිකාරියෙන් එන දැඩි බලපෑම් මත ඔහු ඉල්ලා අස්වන බව සඳහන් කර ජනාධිපතිතුමා වෙත ලිපියක් යොමු කරය.

ඉන් අනතුරුව විජිත හේරත් සභාපති ලෙස පත්වූ අතර, පෙර පැවති ටෙන්ඩර් පටිපාටිය අවසන් වී අඩුම ලංසුව ලෙස තායිලන්ත සමාගමක් වන සියාම් ගෑස් සමාගම ඉදිරිපත් වූ අතර එහි වරාය හා රක්ෂණ ගාස්තු ලෙස මිල ලබාදී ඇත්තේ ඩොලර් 95කි. සුවිශේෂී කාරණය වන්නේ එම ලංසු තැබීම් වලදී පෙර පැවති ඕමාන් ගෑස් සමාගමේ වරාය හා රක්ෂණ ගාස්තු ලෙස මිල ඩොලර් 129ක් ලෙස ලංසු තබා ඇත. එනම් තෙෂාර ජයසිංහගේ මාෆියා ප්‍රකාශය ඇත්තක් කරමින් ඩොලර් 34ක් අඩුවෙන් ගෑස් ගිවිසුම සඳහා ලන්සු ඉදිරිපත් වී ඇති අතර එයට කැබිනට් අනුමැතිය හිමිවූ බව ද පසුගියදා මාධ්‍යයය සඳහන් කෙරුණි.

අඩු මිල ටෙන්ඩරයට ලිට්රෝ විරුද්ධයි, කලින් තිබ්බ ඕමාන් ගෑස් එක හොඳම සැපයුම්කරු!

නමුත් එකවරම ලිට්රෝ නව සභාපති ලෙස පත්වූ විජිත හේරත් පසුගිය සිකුරාදා දින සිය ධූරයෙන් ඉල්ලා අස්වූයේ ගෑස් ගිවිසුම සම්බන්ධව ඇති වූ මතභේදාත්මක තත්ත්වයක් හමුවේ බව අපට දැනගැනීමට ලැබුණි.

එහිදී අඩු මිලට ලංසු ලැබූ සියාම් ගෑස් තායිලන්ත සමාගම ඉවත් කර ඩොලර් 34 ක් වැඩි මිලට ලන්සු තැබූ පෙර පැවති ඕමාන් සමාගම සමගම ගිවිසුමට එළඹෙන ලෙස ඔහුට ඉහළින් දැඩි බලපෑමක් එල්ල වී ඇති බව අභ්යන්තර ආරංචි මාර්ග පවසයි. ඉහළ දේශපාලන අධිකාරිය පමණක් නොව ලිට්රෝ සමාගමේ ඉහළ අධ්‍යක්ෂවරුන්ගේ කූඨ කුමන්ත්‍රණයක ප්‍රතිඵලයක් ලෙස මෙලෙස ඕමාන් ගෑස් සමාගමටම ගිවිසුම ලබාදීමට පියවර ගෙන ඇති බවයි වාර්තා වන්නෙ.

එසේ නම්, පියල් කොළඹහෙට්ටිගේ මෙම මාධ්‍ය හමුවේ පවසන අයුරින්, ආසියානු කලාපයේ හොඳම ගෑස් ලබාදීමේ සමාගම ලෙස ඔහුම හඳුන්වන ඕමාන් ට්‍රේඩින් සමාගම හරහා ලංකාවට ගෑස් ලබාගැනීම සඳහා ටෙන්ඩර් ක්‍රියාවලියක් අවශ්‍ය නොවේද? ටෙන්ඩර් ක්‍රියාවලිය හරහා ඔවුන්ව අමනාප කරගත්තා යන ඔහුගෙ බරපතල ප්‍රකාශය සහ අත්සන් කිරීමට නියමිතව ඇති අනීතික ඕමාන් ගෑස් ගිවිසුම අතර සම්බන්ධයක් නොමැතිද? නියමිත ටෙන්ඩර් පටිපාටියට නෛතිකව ගෑස් ගිවිසුම අත්සන් කිරීමට උත්සහ කළ සභාපතිවරුන් දෙපළක්ව ඔහු විවේචනය කිරීම උභතෝකොටික වන අතර මේ සියල්ල පිටුපස සිටින අදිසි හස්තය අප හඳුනාගත යුතුය.

කෙසේ නමුත් ඩොලර් 34ක් මිල වැඩි ඕමාන් ගෑස් සමාගම හරහා ගිවිසුම්ගත වීමට සියලු පිඹුරුපත් සකස් කර ඇති බවත්, එයට ඉදිරි දින කිහිපය තුළ කැබිනට් අනුමැතිය හිමිවීමෙන් අනතුරුව, පත් කරනු ලබන නව සභාපතිවරයා හරහා මෙම ගිවිසුම අත්සන් කෙරෙන බවත් විශ්වාස කටයුතු ආරංචි මාර්ග සඳහන් කරයි.

විශේෂ ලියුම්කරු

ගෝඨාභය ජනාධිපති කරන්න සැලකිය යුතු මතයක් හදන්න මැදිහත් වුණු සංවිධානයක් තමයි වියත්මග කියන්නේ. විශේෂයෙන් සම්ප්‍රදායික දේශපාලනය එපා කියන්නත්, සම්ප්‍රදායික දේශපාලනයේ නොහිටි ගෝඨාභය ගෙනත් විනයගරුක, වියත් මතය අනුව මෙහෙයවන ආණ්ඩුවක් හදන්න තමයි ඒ කාලේ වියත්මග යෝජනා කළේ. ඇත්තම කිව්වොත්, කැළණියේ නයි නාඩගම ගාණටම වියත්මගත් මේ රටේ මධ්‍යම පංතියේ මොළ හේදුවා.

ඒත් ඉතින් දැන් නම්, වියත්මගේ උදවිය ගෝඨාභයට කියන්නේ , " රැවටුණු තරම් - ඔබ හින්දා මං " කියලා. විශේෂයෙන් වියත්මග කැඳවුම්කරු ආචාර්ය නාලක ගොඩහේවා මේ වෙනකොට සෘජුවම ගෝඨාට චෝදනා කෙරනවා. පසුගියදා අන්තර්ජාල නාලිකාවක් සමඟ පැවැත්වුණු සාකච්ඡාව අවස්ථාවේ , ජනාධිපති ගෝඨාභය රාජපක්ෂ විසින් තමා ඇතුළු වියත්මග දැඩි රැවටීමකට ලක් කළ බවත් රට ගොඩනැඟීමට තම දායකත්වය ලබා නොගත් බවත් ආචාර්ය නාලක ගොඩහේවා චෝදනා කරනවා.

වියත්මගේ ආරම්භක සාමාජිකයකු වන ආචාර්ය ගොඩහේවා කියනවා, මේ වන විට රට ෆේල් හෙයින් රටේ නායකත්වය ද ෆේල් බව පිළිගැනීමට සිදුවන බව.

ජනාධිපතිවරණයට පෙර ගෝඨාභය රාජපක්ෂගේ ආර්ථික වැඩපිළිවෙළ සැකසූ තමන්ට, අනතුරුව ආර්ථිකය හැසිරවීමේ බලය ලබා දුන්නේ නම් රටේ ආර්ථිකය බිඳ වැටීමට කිසිසේත් ඉඩ නොතබන බවත් ඔහු සඳහන් කරනවා.

ඒ විතරක් නෙවෙයි, ඉදිරියේ දී දූෂණයෙන් වංචාවෙන් පවුල් පාලනයෙන් තොර නව දේශපාලන ගමනක් වෙනුවෙන්, ඩලස් අලහප්පෙරුම ප්‍රමුඛ කණ්ඩායමට තම සහාය හිමි වන බවත් ආචාර්ය ගොඩහේවා මෙහිදී ප්‍රකාශ කරනවා.

ඒ වගේම තමයි ඒ සතියෙම නාලක ගොඩහේවා තවත් youtube එකකට ඒ සතියෙම තවත් සාකච්ඡාවක් ලබාදෙනවා. ඒ සරෝජ් සමඟ සංදේශය නාලිකාවට.,

එතනදීත් ගොඩහේවා ජනාධිපතිට කුඩු වෙන්න දෙනවා. ගොඩහේවා කියනවා, අසාර්ථක පාලකයෙකු වන ගෝඨාභය රාජපක්ෂ බලයට පත්කිරීමට දායකවීම ගැන පැහැදිලිවම කණගාටු වන අතර තමන් දැනටමත් ඒ පිළිබඳව ජනතාවගෙන් සමාව ඉල්ලා තිබෙන බව. ඒ වගේම තමයි, බලයට පත්වන අවස්ථාවේ ජනතාවට දුන් පොරොන්දු ඉටුකිරීමට අපොහොසත්වීම ගැන ජනාධිපතිවරයා ජාතියෙන් සමාව ගත යුතු බවත් පවසනවා.

දේශපාලන වාර්තාකරු

රටට කළ අපරාධය සම්බන්ධයෙන් මුදල් හිටපු අමාත්‍ය බැසිල් රාජපක්ෂ සිරගත කළ යුතු බව අපේ ජන බල පක්ෂයේ පාර්ලිමේන්තු මන්ත්‍රී අතුරලියේ රතන හිමි පවසති.

" රට බංකොළොත් නම් උත්තරය බංකොලොත් විය යුතුද"යන මැයෙන් විපක්ෂයේ ස්වාධීන පක්ෂ නායකයන්ගේ සහභාගිත්වයෙන් කොළඹදී ඊයේ(12) පැවැත්වූණු සම්මන්ත්‍රණයකදී රතන හිමි මේ බව සඳහන් කර ඇත .

පවුල් දේශපාලනය මෙහෙයවපු මිනිහා අද රටින් තමන්ගේ ගම්බිම් බලා ගොස් ඇති බවත් එවැනි දේවල් කරපු මිනිහකුට මෙහෙම රට යන්න පුළුවන් දැයි ප්‍රශ්න කරන බවත් රතන හිමි එහිදී අවධාරණය කර ඇත .

තවද බැසිල් රාජපක්ෂ ට දැන් කිසිම වගකීමක් නැති බවත් ඔහු මාධ්‍ය සාකච්ඡාවක් පවත්වා සිනාසී ගෙදර ගිය බවත් අද ඔහු ගැන කිසිදු සාකච්ඡාවක් රටේ නැති බවත් රතන හිමි වැඩිදුරටත් සඳහන් කර ඇත .

මේ වන විටත් මෙරට විසින් ඉන්ධන ලබාගනු ලබන මූලාශ්‍ර වෙතින් ඉන්ධන සපයා ගැනීමට දුෂ්කර වුවහොත් ඉදිරියේදී රුසියාවෙන් ඉන්ධන ලබා ගැනීමට සිදු විය හැකි බව අග්‍රාමාත්‍ය රනිල් වික්‍රමසිංහ සඳහන් කරයි.

අග්‍රාමාත්‍යවරයා මේ බව සඳහන් කර සිටියේ විදෙස් පුවත් ඒජන්සි සමඟ සාකච්ඡාවකට එක්වෙමින් ය.

රට තුළ පවතින දැඩි ඉන්ධන අර්බුදය හේතුවෙන් මෙම පියවරට යා යුතුව ඇතැයිද එහිදී අග්‍රාමාත්‍යවරයා පවසා ඇත .

එසේම ඇතැම් පාර්ශ්ව ගුවන් යානා සිදුවීම පදනම් කරගෙන ලංකාව සහ රුසියාව අතර රාජතාන්ත්‍රික අර්බුදයක් ඇති බව ප්‍රචාරය කළත් එවැනි අර්බුදයක් නොමැති බවත් ඔහු එහිදී පවසා ඇත .

රුසියානු රජය විසින් මෙරටට තිරිඟු පිරිනමා ඇතැයි ද එහිදී ඔහු පවසා තිබේ.

ජනදුක ගැන දරුණු තැවීමක් තියෙනවා !

තවද වත්මන් ආර්ථික අර්බුදය හමුවේ ලාංකික ජාතිය දුක් විඳින අයුරු දැකීම පුරවැසියකු සහ අගමැතිවරයකු වශයෙන් තමාට දරුණු ලෙස දැනෙන බවත් අග්‍රාමාත්‍ය රනිල් වික්‍රමසිංහ එහිදී පවසා ඇත .

තමා මීට පෙර ආණ්ඩු නියෝජනය කරද්දී මිනිසුන්ට ආහාර වේල් තුනක් ලබා දී ඔවුන්ගේ ආදායම වැඩි කර ඇති බව කී අග්‍රාමාත්‍යවරයා නැවතත් පෙර තත්ත්වය ඇති කිරීමට උත්සාහ ගනිමින් සිටින බවත් සඳහන් කර ඇත .

මෙවැනි දෙයක් ශ්‍රී ලංකාවේ කිසි දිනෙක දැක නැති බවත් කිසිදා එසේ වනු ඇතැයි නොසිතූ බවත් අග්‍රාමාත්‍යවරයා වැඩිදුරටත් සඳහන් කර තිබේ.

අමාරු කාල තිබුණත් ඉන්ධන නැති, ආහාර නැතිව දුක් විඳින ලාංකික මිනිසුන් තමා මීට පෙර දැක නොතිබූ බව ද අග්‍රාමාත්‍යවරයා සඳහන් කර ඇත .

මෙරට ලබාගෙන ඇති රාජ්‍ය ණය සම්බන්ධයෙන් ජාතික විගණන කාර්‍යාලය විශේෂ විගණනයක් සිදුකිරීමට නියමිත බව
විගණකාධිපති, චූලන්ත වික්‍රමරත්න සඳහන් කර ඇත .

ඔහු පවසන ආකාරයට , 2019 සහ 2021 අතර වසර තුනක කාල සීමාවේ ලබාගෙන ඇති රාජ්‍ය ණය පිළිබඳව මෙම විශේෂ විගණනයේදි අවධානය යොමු කෙරෙනු ඇත .

ලබන මාසය තුළ එම විශේෂ විගණන වාර්තාව පාර්ලිමේන්තුවට ඉදිරිපත් කිරිමට බලාපොරොත්තුවන බවත් ඔහු පවසයි .

එසේම අදාල ණය ලබාගෙන ඇති ක්‍රමවේදය,මෙරට ආදායම් වියදම් තත්ත්වය ඇතුළු කරුණු කෙරෙහි මෙහිදි වැඩි අවධානයක් යොමු කරන බවත් විගණකාධිපති පවසා ඇත .

ඉදිරියට පාරිභෝගිකයන් ඉන්ධන හල් වල ලියාපදිංචි කර සතිපතා සලාක ක්‍රමයට ඉන්ධන නිකුත් කිරීමට සිදුවෙන බව විදුලිබල සහ බලශක්ති අමාත්‍ය කාංචන විජේසේකර පවසයි .

අමාත්‍යවරයා සඳහන් කර ඇති ආකාරයට ජූලි පළමු සතියේ සිට එම ක්‍රමය ක්‍රියාත්මක වීමට නියමිතව ඇත.

මූල්‍ය තත්ත්වය ශක්තිමත් කිරීමටත් පැය 24 පුරාවට විදුලිය යථා තත්ත්වයට පත් කිරීමට ස්ථාවර ඉන්ධන සැපයීමකටත් හැකිවන තෙක් පාරිභෝගිකයින් පිරවුම්හල ලියාපදිංචි කර ඔවුන්ට සහතික සතිපතා කෝටාවක් ලබාදෙන බව එහිදී අමාත්‍යවරයා සඳහන් කර ඇත .

පැය 4ක විදුලිබල සැපයුම වෙනුවෙන් ඩීසල්, දැවි තෙල් හා නැප්තා සඳහා අමතරව ඩොලර් මිලියන 100ක් අමතරව වැය වන බව ද අමාත්‍යවරයා පැවසුවේ ය.

එසේම අමාත්‍යවරයා පවසන්නේ , ගෑස් හිඟය හේතුවෙන් විදුලිය හා භුමිතෙල් සඳහා ඉල්ලුම ඉහළ ගොස් ඇති බවයි.

මාස 4 කට පෙර ඩොලර් මිලියන 200 ක් තිබූ මාසික ඉන්ධන වියදම මේ වනවිට ඩොලර් මිලියන 750 දක්වා ඉහළ ගොස් ඇතැයි ද අමාත්‍ය කංචන විජේසේකර පවසයි.

මත්තල ජාත්‍යන්තර ගුවන්තොටුපළ මාසයකට රුපියල් කෝටියකට වැඩි පාඩුවක් ලබන බව වරාය නාවික සහ ගුවන් සේවා අමාත්‍ය නිමල් සිරිපාල ද සිල්වා පවසයි .

එසේම මත්තල ගුවන් තොටුපොළ කිසිවිටෙක නොවිකුණන බවත් , එනමුත් ගුවන්තොටුපොළ ප්‍රතිව්‍යූහගත කර හොඳ ආයෝජකයකු සමග සාමූහික ගිවිසුමකට පැමිණ රජයේ සහ පෞද්ගලික ඒකාබද්ධ ව්‍යාපාරයක් ලෙස ලාභ ලබන තත්වයට පත්කර ගැනීමට කටයුතු කරගෙන යන බවත් අමාත්‍යවරයා පවසා ඇත .

විෂය භාර අමාත්‍යවරයා මේ බව සඳහන් කර ඇත්තේ , මත්තල ජාත්‍යන්තර ගුවන් තොටුපොළේ නිරීක්ෂණ චාරිකාවකට සහභාගී වෙමින් වන අතර ඒ අවස්ථාව සඳහා අමාත්‍ය මහින්ද අමරවීර ද එක්ව සිටිය්‍ර්හ.

අද වනවිට කිසිදු ගුවන් යානයක් නොපැමිණෙන මෙම ගුවන් තොටුපොළට සේවකයන් පන්සිය හතළිස් පස් දෙනෙකු (545)අනියුක්ත කර සිටින බවත් සමහර සේවකයන් කොළඹ සිට මත්තලට බස් රථයකින් දිනපතා ප්‍රවාහනය කෙරෙන බවත් මෙහිදී තොරතුරු අනාවරණයවී ඇත.

මත්තල ගුවන්තොටුපොළ අද නඩත්තු කරන්නේ කටුනායක ගුවන්තොටුපොළ උපයන මුදලින් බව මෙහිදී පැවසූ නිමල් සිරිපාල ද සිල්වා අමාත්‍යවරයා මත්තල ගුවන්තොටුපොළ ඉදි කිරීමට චීනයෙන් ලබාගත් ඇමරිකානු ඩොලර් කෝටි 21 ක ණය මුදලේ වාරික ගෙවීමට ඇති බවද ප්‍රකාශ කළේය.

කෝටිපති ව්‍යාපාරික ධම්මික පෙරේරා මහකාගේ නිවස ඉදිරිපිට අද (12) පෙරවරුවේ විරෝධතා ව්‍යාපාරයක් පැවැත්විණ.

ඒ ධම්මික පෙරේරා මේ වනවිට බැසිල් රාජපක්ෂගේ ඉල්ලා අස්වීම හේතුවෙන් පුරප්පාඩු වූ පාර්ලිමේන්තු මන්ත්‍රී ධූරයට නම්කර ඇති නිසාය.

එහිදී විරෝධතාකරුවන් ,

කැසිනො රජා අපට එපා – කුණු ධම්මික අපට එපා“,

 “කැසිනෝ රජා පාර්ලිමේන්තුවේ ද?“

“කුණු ගෙනාපු ධම්මිකයා – රටට කෙළපු පණ්ඩිතයා,“

“ඔබ ඔබේ බදු ගෙවන්න ,“

“ශ්‍රී ලංකාව කැසිනෝ සූදුපලක් නොවේ, අපේ අනාගතය සමග සූදු නොකෙලින්න“ යන අදහස් සහිත විරෝධතා පුවරු සහිතව මෙම විරෝධතාවයෙහි නිරත වෙමින් සිටිනු දකින්නට ලැබිණ .

මේ වන විට ධම්මික පෙරේරා වෙනුවෙන් බලගතු අමාත්‍යංශයක් ජනාධිපති විසින් නම්කර තිබීම ප්‍රසිද්ධ රහසකි.

ගෝල්ෆේස් අරගලකරුවන්ට පහරදීමෙන් පසුව රටපුරා ඇතිවුණු කළහාකාරී සිදුවීම් 857ක් සම්බන්ධයෙන් සැකපිට 2725 ක් අද වන විට අත්අඩංගුවට ගෙන ඇති බව වාර්තා වෙයි .

පොලිස් මාධ්‍ය ප්‍රකාශක කාර්‍යාලය පවසන්නේ , එම සැකරුවන්ගෙන් 1083 දෙනෙක් මේ වන විටත් රක්ෂිත බන්ධනාගාරගත කර ඇති බවත් සෙසු සැකකරුවන් පොලිස් සහ අධිකරණ ඇප මත මුදාහැර ඇති බවයි .

අද උදෑසනින් අවසන් වූ පැය 24 තුළ පමණක් ඒ සම්බන්ධයෙන් සැකකරුවන් 21 දෙනෙක් අත්අඩංගුවට ගෙන ඇති බවද මාධ්‍ය ප්‍රකාශක කාර්යාලය පවසයි .

මන්නාරම සුළං විදුලි බලාගාර ව්‍යාපෘතිය ටෙන්ඩර් කැඳවීමකින් තොරව ඉන්දියානු අදානි සමාගමට දෙන්න තීරණය කළේ ඇයි ද යන්න පිළිබඳව පසුගිය ( 10) වනදා පාර්ලිමේන්තු කෝප් කමිටුව හමුවේ විදුලි බල මණ්ඩලයේ සභාපති එම්.එම්.සී. ෆර්ඩිනැන්ඩු සිදුකළ ප්‍රකාශය නැවත ඉල්ලා අස්කරගෙන ඇත.

එහිදී ලංවීම සභාපතිවරයා පවසා සිටියේ ඉන්දීය අගමැති නරේන්ද්‍ර මෝදි කළ බලපෑමක් අනුව ජනාධිපතිවරයා මෙම ව්‍යාපෘතිය අදානි සමාගමට ලබාදෙන්නැයි පැවසූ බවයි.

කෙසේ වෙතත් අදාළ ප්‍රකාශයෙන් පැය 24 ක් ගතවන්නට පෙර ඊයේ (11) ලංකා විදුලිබල මණ්ඩල සභාපති එම්. එම්. සී. ෆර්ඩිනැන්ඩු පැවසුවේ, තමන් කෝප් කමිටුව හමුවේ 10 වෙනිදා කළ ප්‍රකාශය ඉල්ලා අස්කර ගෙන ඇත .

ඒ අවස්ථාවේ පැවති අධික පීඩනයත්, විදුලි බල පනත් කෙටුම්පත පාර්ලිමේන්තුවට ඉදිරිපත් කිරීමට අදාළව කාර්ය බහුලවීම නිසා නිසි ලෙස ආහාර පවා නොගෙන වෙහෙස වීමත් හේතුවෙන් ඇතිව තිබූ මානසික තත්ත්වයත් මත මෙම ප්‍රකාශය තමන් අතින් සිදුවී ඇති බවත් එම්.එම්.සී. ෆර්ඩිනැන්ඩු පවසා ඇත .

පෙර දින තමන් කෝප් කමිටුව හමුවේ කළ ප්‍රකාශය ඉල්ලා අස්කර ගන්නේ ජනාධිපතිතුමාගෙන් හෝ විෂය භාර අමාත්‍යවරයාගෙන් හෝ ඉන්දියානු තානාපති කාර්යාලයෙන් සිදුවූ බලපෑමක් නිසා නොවන බවත් ඔහු පවසයි .

සභාපතිවරයාගේ ඉල්ලා අස්කර ගැනීමට පෙර ජනාධිපතිවරයා ට්වීට් පණිවිඩයක් නිකුත් කරමින් කියා සිටියේ මන්නාරම සුළං බල ව්‍යාපෘතිය කිසියම් නිශ්චිත පුද්ගලයකුට හෝ ආයතනයකට ප්‍රදානය කිරීමට නියම කළ බවට කෝප් කමිටුවේදී විදුලිබල මණ්ඩල සභාපතිවරයා කළ ප්‍රකාශය තමන් තරයේ ප්‍රතික්ෂේප කරන බවයි.

අදාළ ට්වීටර් සටහන පහත දැක්වෙයි .

මේ වන විට පොදුජන පෙරමුණේ ඉතිරිව සිටින මන්ත්‍රීන් 117 දෙනාගෙන් 49 දෙනකු ගේ සහය ඇතුව හිටපු අමාත්‍ය , පාර්ලිමේන්තු මන්ත්‍රී ඩලස් අලහප්පෙරුම ගේ නායකත්වයෙන් නව දේශපාලන බලවේගයක් නිර්මාණය කරමින් සිටින බව දේශපාලන ආරංචි මාර්ග පවසයි .

“හැකියාවට සහ නිර්මාණශීලීත්වයට මුල්තැන දෙමු; දූෂණය, අන්තවාදය සහ පවුල්වාදය පිටු දකිමු” යන්න නව දේශපාලන බලවේගය සිය තේමා පාඨය ලෙස තෝරාගෙන ඇති බව ද දේශපාලන ආරංචි මාර්ග පවසයි .

එසේම නව සන්ධානයේ ලාංඡනය පිළිබඳ තවමත් අවසන් තීරණයකට එළඹ නොමැති අතර එහි වර්ණය බොහෝ විට කහ වර්ණය විය හැකි බවත් සඳහන් වෙයි.

දේශපාලන ආරංචි මාර්ග වැඩිදුරටත් සඳහන් කරන ආකාරයට ඉදිරියේ දී එන ඕනෑම මැතිවරණයකට මුහුණ දීමට හැකිවන පරිදි ගොඩනගන නව සන්ධානය සමග ප්‍රධාන දේශපාලන පක්ෂවල ක්‍රියාකාරීන් රැසක් එක්වීමට නියමිතව ඇත.

ඒ අනුව මෙය මෑත දේශපාලන ඉතිහාසයේ පුළුල්තම සන්ධානය විය හැකි බවත් දේශපාලන ආරංචි මාර්ග පවසයි .

වඩාත් විශේෂ කාරණය ලෙස දේශපාලන ආරංචි මාර්ග පවසන්නේ මේ නව සන්ධානය සඳහා රාජපක්ෂ පවුලේ කිසිවකු හතර මායිමේ වද්දා නොගත්තට ඒකමිතික තීන්දුවක් ගෙන ඇති බවයි.

මුව ආවරණ අනිවාර්ය නීතිය ඉවත් කිරීම සම්බන්ධයෙන් සෞඛ්‍ය සේවා අධ්‍යක්ෂවරයා විසින් ගන්නා ලද තීරණය මුඛ ආවරණ පැළඳීම අවශ්‍ය නොවන බවට කළ නිවේදනය මෙම අවස්ථාවේදී නුසුදුසු මෙන්ම කාලෝචිත නොවන බව විශේෂඥ වෛද්‍යවරුන්ගේ සංගමය පවසයි .

මේ බව සඳහන් කරමින් එම සංගමය විසින් නිකුත් කර ඇති අතර එම නිවේදනය පහත දැක්වෙයි .

සෞඛ්‍ය ක්ෂේත්‍රයේ ඇති අර්බුද හමුවේ මුඛ ආවරණ පැලදීම අනවශ්‍ය ද?

2022 ජුනි මස 10 වැනිදා සිට එළිමහන් හා ගෘහස්ථ ස්ථානවලදී මුහුණු ආවරණ පැළඳීම තවදුරටත් අනිවාර්ය නොවන බවට සෞඛ්‍ය සේවා අධ්‍යක්ෂ ජනරාල්වරයා විසින් හදිසියේ නිකුත් කරන ලද නිවේදනය පිළිබඳ විශේෂඥ වෛද්‍යවරුන්ගේ සංගමය ලෙස අපි විමතියට පත් වීමු.

එමෙන්ම සෞඛ්‍ය කාර්ය මණ්ඩලය මෙන්ම රෝගීන්ද රෝහල් තුළදී මුඛ ආවරණ පැළඳීම තවදුරටත් අවශ්‍ය දැයි මෙම නිවේදනය මගින් පැහැදිලි කර නොමැත.

දැනට පවතින ආර්ථික අර්බුදය හමුවේ රට තුළ ඇති ඖෂධ සහ අනෙකුත් සෞඛ්‍ය පහසුකම්වල ඇති අඩුපාඩු අපට රහසක් නොවේ. එමෙන්ම වෛද්‍ය ප්‍රතිකාර අවශ්‍ය වන ස්වසන ආබාධ සහ තවත් රෝගාබාධ විශාල ප්‍රමාණයක් පැතිරීම මුඛය සහ නාසය හරහා සිදු වන බව බොහෝ දෙනා දන්නා කරුණකි. මෙලෙස රෝගී වන සෑම පුද්ගලයකු විසින්ම ප්‍රතිකාර සඳහා සිදුවන වියදම් වැඩි කරන අතරම රැකියාවට නොපැමිණීම මගින් ආර්ථික අර්බුදය තවදුරටත් වර්ධනය වීමට අනුබල දීමක්ද එමගින් සිදු කරනු ලබයි. එමනිසා මුඛ ආවරණ පැළඳීම අවශ්‍ය නොවන බවට කළ නිවේදනය මෙම අවස්ථාවේදී නුසුදුසු මෙන්ම කාලෝචිත නොවන බව අපට හැගේ.

මේ අනුව විශේෂඥ වෛද්‍යවරුන්ගේ සංගමය ලෙස අප මහජනතාවට දන්වා සිටින්නේ විශේෂයෙන්ම රාජ්‍ය මෙන්ම පුද්ගලික අංශයද රෝගී ප්‍රතිකාර සැපයීම පිළිබඳ යම් අර්බුදයක සිටින මේ අවස්ථාවේ, අප විසින් සෞඛ්‍යයාත්මක ලෙස දැනට අනුගමනය කරන මුඛ ආවරණ පැළඳීමේ පුරුද්ද, විශේෂයෙන්ම ගෘහස්ථ රැස්වීම්වලදී තවදුරටත් අනුගමනය කරන ලෙසටයි. එමෙන්ම වයෝවෘද්ධ මෙන්ම සංකූලතා ඇති පුද්ගලයින් අනවශ්‍ය ලෙස ස්වසන රෝග වලට භාජන වීම වැළැක්වීම සඳහා සෞඛ්‍ය බලධාරීන් විසින් සෞඛ්‍ය ආයතන තුළ දී මුඛ ආවරණ පැලදීම තව දුරටත් අවශ්‍ය බවට තීරණය කළ යුතු බව අපි අවධාරණය කරමු.

වැදගත් කරුණක් ලෙස මෙහිදී අප දකින්නේ මුඛ ආවරණයක් පැළඳීම ඉතා සුළු සෞඛ්‍යමය පුරුද්දක් වුවද එමගින් පොදු මහජනතාවගේ සෞඛ්‍යයට සිදුවන විශාල මෙහෙය අප විසින් අමතක නොකළ යුතු බවයි.

විශේෂඥ වෛද්‍යවරුන්ගේ සංගමය

මුදල් අමාත්‍යාංශයේ ලේකම් එම්.සිරිවර්ධන ඊයේ (10) ඉන්දීය EXIM බැංකුව සමඟ ඩොලර් ණය මාර්ගයක් ලබා ගැනීමේ ගිවිසුමකට අත්සන් තැබීය.

එම ගිවිසුම සදහා ඉන්දීය රජය වෙනුවෙන් ඉන්දීය EXIM බැංකුවේ සාමාන්‍යධිකාරි නිර්මිත් නරේන්ද්‍ර වෙඩ් අත්සන් තබන ලදි.

යල වගා කන්නයේ ක්ෂණික යූරියා පොහොර ඉල්ලුම සපුරාලීම සඳහා මෙට්‍රික් ටොන් 65,000 ක යූරියා පොහොර ආනයනය කිරීම සඳහා ශ්‍රී ලංකා රජය ඉන්දීය රජයෙන් ණය පහසුකම් ඉල්ලා සිටියේය.

එම ඉල්ලීමට ප්‍රතිචාර වශයෙන්, ඉන්දියාවෙන් යූරියා පොහොර මිලදී ගැනීම සඳහා ඩොලර් මිලියන 55 ක ඩොලර් ණය මාර්ගයක් පිරිනැමීමට ඉන්දීය රජය එකඟ විය.

ගිවිසුම අත්සන් කිරීම අවස්ථාවට අග්‍රාමාත්‍ය රනිල් වික්‍රමසිංහ මහතා සහ ශ්‍රී ලංකාවේ ඉන්දීය මහ කොමසාරිස් එච්.ඊ. ගෝපාල් බග්ලේ ද සහාභගි විය . එමෙන්ම කෳෂිකර්ම අමාත්‍ය මහින්ද අමරවීර මේ අවස්ථාව සඳහා එක්ව සිටියේය.

රට අත්‍යාවශ්‍ය ආහාර ද්‍රව්‍යවල උග්‍ර හිඟයකට මුහුණ දී සිටින බැවින් ජනතාවගේ ආහාර සුරක්ෂිතතාව තහවුරු කිරීම තම ප්‍රමුඛතාවය බව අග්‍රාමාත්‍යවරයා මීට පෙර පෙන්වාදී තිබිණ . මෙම ණය පහසුකම ඉදිරි යල කන්නය සඳහා යූරියා ලබා ගැනීම සහතික කිරීමට උපකාරී වනු ඇති බව අග්‍රාමාත්‍ය මාධ්‍ය ඒකකය නිකුත්කළ නිවේදනයක සඳහන් වෙයි.

ධම්මික පෙරේරා ගේ වත්කම් බැරකම් ප්‍රකාශ ලබා ගැනීම සම්බන්ධයෙන් ප්‍රශ්න කර ශ්‍රී ලංකා මානව හිමිකම් කේන්ද්‍රය ඊයේ (10) විසින් මැතිවරණ කොමිසම වෙත ලිපියක් යොමුකර ඇත .

මානව හිමිකම් කේන්ද්‍රයේ විධායක අධ්‍යක්ෂ රජිත් කීර්ති තෙන්නකෝන් යොමුකළ එම ලිපිය මගින් සිහිපත් කර ඇත්තේ , 2015 සහ 2020 මහා මැතිවරණ දෙකේ දී ම, නාම යෝජනා සමඟ වත්කම් බැරකම් ප්‍රකාශ ලබා නොදුන් කිසිදු අපේක්ෂකයෙකුට ඡන්ද අපේක්ෂක හැඳුනුම්පත ලබානොදුන් අතර, අනෙකුත් වරප්‍රසාද සියල්ල අහිමි කරනු ලැබූ බවය.

එසේම පාර්ලිමේන්තු මැතිවරණ පනත යටතේ ඉදිරිපත් වන අපේකෂකයෙකු, ජාතික ලැයිස්තු අපේක්ෂකයෙකු නාම යෝජනා බාරදීමෙන් පසුව ඔහුගේ වත්කම් බැරකම් ප්‍රකාශ මැතිවරණ කොමිසම වෙත ඉදිරිපත් කළ යුතු බවය.

මේ සම්බන්ධයෙන් කරුණු විමසමින් මැතිවරණ කොමිසම වෙත යොමුකළ සම්පූර්ණ ලිපිය පහත දැක්වෙයි .

 සභාපති,
මැතිවරණ කොමිෂන් සභාව,
සරණ පාර, රාජගිරිය.

මහත්මාණෙනි,

නවක මන්ත්‍රීවරුන්ගේ වත්කම් බැරකම් ප්‍රකාශ ලබා ගැනීම - ධම්මික පෙරේරා මහතා

ප්‍රකට ව්‍යාපාරික ධම්මික පෙරේරා මහතා ගේ නම පොදුජන එක්සත් පෙරමුණේ ජාතික ලැයිස්තු මන්ත්‍රීවරයෙකු ලෙස යෝජනා කොට ඔබ වෙත එවා ඇති බව ජනමාධ්‍ය මගින් වාර්තා කර ඇත.

පාර්ලිමේන්තු මැතිවරණ පනත යටතේ ඉදිරිපත් වන අපේකෂකයෙකු, ජාතික ලැයිස්තු අපේක්ෂකයෙකු නාම යෝජනා බාරදීමෙන් පසුව ඔහුගේ වත්කම් බැරකම් ප්‍රකාශ මැතිවරණ කොමිසම වෙත ඉදිරිපත් කළ යුතුය.

2015 සහ 2020 මහා මැතිවරණ දෙකේ දී ම, නාම යෝජනා සමඟ වත්කම් බැරකම් ප්‍රකාශ ලබා නොදුන් කිසිදු අපේක්ෂකයෙකුට ඡන්ද අපේක්ෂක හැඳුනුම්පත ලබානොදුන් අතර, අනෙකුත් වරප්‍රසාද සියල්ල අහිමි කරනු ලැබීය.

ඉහත මැතිවරණ දෙකේ දී ම, වත්කම් බැරකම් ප්‍රකාශ ලබා නොදුන් කිසිදු පුද්ගලයෙකු ගේ නම් මන්ත්‍රීවරයෙකු ලෙස ගැසට් කිරීම හෝ පාර්ලිමේන්තුවේ අසුන් ගැනීම හෝ සිදු වූවේ ද නැත.

එවකට, මැතිවරණ කොමිසමේ නීති අධ්‍යක්ෂවරයා ලෙස ඔය විසින් ම ලබා දුන් උපදෙස් මත මැතිවරණ කොමිසම සහ අධ්‍යක්ෂ ජෙනරාල්වරයා ඉහත තීරණය ගත් බව මාගේ විශ්වාසය යි.

එබැවින්, ඔබගේ පූර්වගාමීන් ගේ කාර්ය පටිපාටිය මෙවර ද ඔබ විසින් අනුගමනය කරනු ඇතැයි විශ්වාස කරමි.

තව ද, සියළුම අපේක්ෂකයින්ගේ වත්කම් බැරකම් ප්‍රකාශ ලබ දෙන බවට පසුගිය මැතිවරණයේ දී ශ්‍රී ලංකා පොදුජන පෙරමුණ නිවේදනයක් නිකුත් කර ඇත. එම පක්ෂයේ සමාජිකයෙකු ලෙස ජාතික ලැයිස්තු මන්ත්‍රීවරයෙකු ලෙස නිවේදනය කිරීමට පෙර ඒම කරුණු සම්පූර්ණ කිරීම මැතිවරණ කොමිසම සතු වගකීමකි.

ඉහත පූර්වාදර්ශය හා ව්‍යවහාරයන් මත ධම්මික පෙරේරා මහතා (හෝ වෙනත් අයෙකු) ගේ නම පාර්ලිමේන්තු මන්ත්‍රීවරයෙකු ලෙස නිවේදනය කිරීමට පෙර ඔහුගේ වත්කම් බැරකම් ප්‍රකාශ ලැබී ඇති බව තහවුරු කර ගන්නා මෙන් කාරුණිකව ඉල්ලමි.

මැතිවරණ පනතේ විධි විධාන අනුව ද, 2015, 2020 මහා මැතිවරණ දෙකෙහිම ද වත්කම් බැරකම් ප්‍රකාශ සම්බන්ධයෙන් ඔබ ඉහත ආකාරයෙන් කටයුතු කර ඇති බව ද සිහිගන්වමි.
මෙයට විශ්වාසී,

රජිත් කීර්ති තෙන්නකෝන්
ශ්‍රී ලංකා මානව හිමිකම් කේන්ද්‍රය

පිටපත
1. ලේකම්/මැතිවරණ කොමිෂන් සභාව
2. මැතිවරණ කොමසාරි ජෙනරාල් - ඔබ දෙදෙනාම මැතිවරණ දෙපාර්තමේන්තුව/කොමිෂන් සභාවේ පළපුරුදු නිලධාරීන් ලෙස කටයුතු කරමින් ඉහත නීතිය අකුරටම ක්‍රියාත්මක කළ නිලධාරීන් වෙති.

එහි කිසිදු ව්‍යතිරේකයක් ඉදිරියේ දී සිදු නොකරනු ඇතැයි අපේක්ෂා කරමි.

පාර්ලිමේන්තු මන්ත්‍රීවරයකු ඝාතනය කිරීම ඇතුළුව ගිනි තැබීම්, දේපළ හානි කිරීම සහ ප්‍රචණ්ඩ ක්‍රියා අනුමත කරමින් කතා කළ ශානක්‍ය රාසමාණික්කම් මන්ත්‍රීවරයා සම්බන්ධයෙන් තමන් කණගාටු වන බවත් ඔහු එම ප්‍රකාශය සතියක් තුළ , කණගාටුව ප්‍රකාශ කර ඉල්ලා අස්කරගත යුතු බවත් අග්‍රාමාත්‍ය රනිල් වික්‍රමසිංහ පවසයි .

එසේ නොමැති නම් අදාළ මන්ත්‍රීවරයා සම්බන්ධයෙන් කතානායක විසින් කරුණු විමසා, අදාළ කොමිටියට යොමුකර පාර්ලිමේන්තුව වෙත වාර්තාවක් ලබාදිය යුතු බවත් අග්‍රාමාත්‍යවරයා පැවසීය .

අග්‍රාමාත්‍යවරයා මේ අදහස් දක්වා සිටියේ පසුගියදා ඝාතනය වූ අමරකීර්ති අතුකෝරළ මන්ත්‍රීවරයා සම්බන්ධයෙන් ශෝක ප්‍රකාශ අවස්ථාවේ ය.

ලක්ෂ්මන් කදිරගාමර් ඝාතනය අවස්ථාවේ පාර්ලිමේන්තුවේ සියලු පක්ෂ එය විවේචනය කළ බවත් , ඊට එරෙහි වූයේ LTTE ය පමණක් බවත් මෙහිදී අග්‍රාමාත්‍යවරයා සිහිපත් කර සිටියේ ය. එහිදී ඔහු පෙන්වා දුන්නේ , පාර්ලිමේන්තුව අභ්‍යන්තරයේ මෙවැනි අවස්ථා වල කිසිවිටෙකත් ප්‍රතිවිරුද්ධ අදහස් දක්වා නොමැති බවය.

බ්‍රිතාන්‍යයේ දී මෑතකදී සිදුවූ මන්ත්‍රී ඝාතන 2ක් හමුවේ බ්‍රිතාන්‍ය පාර්ලිමේන්තුව ඒ කෙරෙහි අවධානය යොමුකර සිටියේ පාර්ලිමේන්තු ක්‍රමයට එල්ලවූ ප්‍රහාරයක් ලෙස මිස මන්ත්‍රීවරුන් මුහුණ දුන් පෞද්ගලික ප්‍රහාරයක් ලෙස නොවන බවත් අග්‍රාමාත්‍යවරයා පෙන්වා දුන්නේ ය.

අමරකීර්ති අතුකෝරළ යනු නිහඬ චරිතයක් බව සිහිපත් කළ අග්‍රාමාත්‍යවරයා ඔහු ආණ්ඩුවේ නිසා ඝාතනය වූවා නම් කුමාර වෙල්ගම මන්ත්‍රීවරයා ප්‍රහාරයට ලක්වූයේ ඇයි යනුවෙන් ද ප්‍රශ්න කළේය.

කුමාර වෙල්ගම මන්ත්‍රීවරයා ගෝඨාභය රාජපක්ෂ ට ගෙදර යන්න කියූ පළමු වැන්නා බවත්, දැඩි ගෝඨාභය විරෝධී වෙල්ගම මන්ත්‍රීවරයා ප්‍රහාරයට ලක්වීම අදාළ ප්‍රදේශයේ පිරිසකගේ නොව පිටින් පැමිණි පිරිසකගේ මැදිහත්වීමක් තුළ සිදුවූවක් බවත් අග්‍රාමාත්‍යවරයා පැවසීය .

ඒ බව මේ වන විට විමර්ශනවලදි අනාවරණය වී ඇති බවත් අග්‍රාමාත්‍ය රනිල් වික්‍රමසිංහ පාර්ලිමේන්තුවේදී පැවසීය . එසේම එම තත්ත්වය රට පුරා සිදුවූ ගිනි තැබීම්, දේපළ හානි සහ ප්‍රචණ්ඩ ක්‍රියා සම්බන්ධයෙන් ද අනාවරණය වී ඇති බවත් පැවසීය .

මේ අතර ශානක්‍ය රාසමාණික්කම් මන්ත්‍රීවරයා මැයි 20 සිදුකළ අදහස් දැක්වීම හැන්සාඩ් වාර්තාවෙන් උපුටා දක්වමින් අග්‍රාමාත්‍ය රනිල් වික්‍රමසිංහ බරපතළ ලෙස එම අදහස් සම්බන්ධයෙන් විරෝධය දැක්වීය .

එහිදී ඔහු විමසා සිටියේ "20 වන ව්‍යවස්ථා සංශෝධනයට ජන්දය දීම, 2020 -21 අයවැය සඳහා ජන්දය දීම ප්‍රචණ්ඩත්වයට මුහුණදීමට සිදුවීමක් නම් , එයින් අදහස් වන්නේ , ප්‍රතිවිරුද්ධ අදහසක් දැරීම, ප්‍රචණ්ඩත්වයට මුහුණදීමට සිදුවන්නක්ද යනුවෙනි.

එබැවින් අග්‍රාමාත්‍යවරයා ගේ තර්කය වූයේ විපක්ෂ නායක ඇතුළු සියලු පාර්ලිමේන්තු මන්ත්‍රීවරුන් ප්‍රචණ්ඩත්වය ප්‍රතිකේෂ්ප කර , ඒ සම්බන්ධයෙන් විරුද්ධව අදහස් දක්වා තිබියදී රාසමාණික්කම් සිදුකළ ප්‍රකාශය සම්බන්ධයෙන් කණගාටු වන බවයි.

එසේම ගෝල්ෆේස් ප්‍රහාරයේ සිට දියත් වූ සියලු ප්‍රචණ්ඩ ක්‍රියා සම්බන්ධයෙන් ස්වාධීන පරීක්ෂණයක් සිදුවිය යුතුව ඇති බවත් ඔහු අවධාරණය කර සිටියේ ය.

මෙහිදී අග්‍රාමාත්‍යවරයා දැක්වූ අදහස් පහත වීඩියෝවේ.

අනතුරුව නැවතත් සභාව ඇමතූ අග්‍රාමාත්‍යවරයා සිය උදෑසන අදහස් දැක්වීම සුමන්තිරන් මන්ත්‍රීවරයා විසින් වෙනත් තැනක සිදුකර ඇති විවේචනයක් ගැනත් අනාවරණය සිටියේය .

ඒ පාර්ලිමේන්තුවේදී රීති ප්‍රශ්නයක් යොමුකරමිනි.

වඩාත් විශේෂ සිදුවීම නම් අග්‍රාමාත්‍යවරයා ගේ මේ කරුණු දැක්වූ අවස්ථා දෙකෙහිදීම වෙනත් කිසිදු මන්ත්‍රීවරයෙක් ඊට බාධා නොකිරීම ය.

අග්‍රාමාත්‍ය රනිල් වික්‍රමසිංහ ගේ රීති ප්‍රශ්නය ඇතුළත් ප්‍රකාශය පහත වීඩියෝ වේ දැක්වෙයි .