පුවත්

ජනාධිපති රනිල් වික්‍රමසිංහ  සහ ඉන්දීය විදේශ කටයුතු අමාත්‍ය ආචාර්ය සුබ්‍රමනියම් ජයිශංකර් අතර හමුවක් සිදු ව තිබෙයි.

ඒ ඕස්ට්‍රේලියාවේ පර්ත් නුවර දීයි.

එහිදී දැනට ක්‍රියාත්මක ද්වීපාර්ශ්වික ව්‍යාපෘතිවල ප්‍රගතිය පිළිබඳ අවධානය යොමු කරමින් සාකච්ඡා සිදු කර ඇති බව වාර්තා වෙයි.

රට පත්ව ඇති බරපතළ ආර්ථික අර්බුදයට පිළියම් කිරීම වෙනුවෙන් පටු දේශපාලන ක්‍රියා පසෙකලා සැවොම එක්සත් වියයුතු බව එක්සත් ජාතික පක්ෂයේ කොළඹ දිස්ත්‍රික් නායක , හිටපු මුදල් අමාත්‍ය රවී කරුණානායක පවසයි .

නව වැනි පාර්ලිමේන්තුවේ පස් වැනි සැසිවාරය විවෘත කරමින් ජනාධිපති රනිල් වික්‍රමසිංහ පෙන්වා දුන් ආකාරයට රට ගොඩනගන වැඩපිළිවෙළ මඟහැර සිටීමට සමගි ජනබලවේගය පක්ෂය හෝ ජනතා විමුක්ති පෙරමුණ ට කිසිදු සාධාරණ හේතුවක් නොමැති බවද හිටපු අමාත්‍යවරයා සඳහන් කළේය.

පැවති තත්ත්වයට සාපේක්ෂව මේ වන විට රට යම් ආර්ථික ප්‍රගතියක් ලබා ඇති නමුත් , අවධානම මුළුමනින්ම පහවගොස් නොමැති බව පෙන්වාදුන් හිටපු අමාත්‍යවරයා, ගනු ලබන එක් වැරදි තීන්දුවක් හේතුවෙන් රට නැවතත් 2022 දී ඇතිවූ තත්ත්වයට වඩා දරුණු ආර්ථික කඩාවැටීමකට ලක්වීමේ අවධානම ඇති බවත් එබැවින් මේ මොහොත අත්හදා බැලීම් සිදුකිරීමට අවස්ථාවක් නොවන බවත් අවධාරණය කර සිටියේය.

එක්සත් ජාතික පක්ෂයේ කොළඹ දිස්ත්‍රික් නායක , හිටපු මුදල් අමාත්‍ය රවී කරුණානායක මේ බව සඳහන් කර සිටියේ අද (08) කොළඹ දී මාධ්‍ය වෙත අදහස් දක්වමින් ය.

එහිදී හිටපු මුදල් අමාත්‍යවරයා වැඩිදුරටත් මෙසේද පැවසීය .

මේක ජනාධිපති රනිල් වික්‍රමසිංහ ට හෝ වෙනත් නායකයකුට තනියම විසඳිය හැකි අර්බුදයක් නොවෙයි. මේ රට ආර්ථික වශයෙන් අර්බුදයට ගිය සෑම අවස්ථාවකදීම , රට ඒ තත්ත්වයෙන් මුදවාගත් පක්ෂය වුනේ එක්සත් ජාතික පක්ෂය යි. මේ රට ගමන් කළයුතු මග අපි දිගටම නිවැරදි ලෙස පෙන්වා දුන්නා. ඒ අවස්ථා වලදී අපට විවිධ විවේචන එල්ල කළා. 2015 වසරේ ආණ්ඩුව පිහිටවූ විගස අපි සිදුකළේ රාජ්‍ය ආදායම ඉහළ නැංවීමට අවශ්‍ය ක්‍රියාමාර්ග ගැනීමයි. රජයේ අත්‍යවශ්‍ය වියදම්, සංවර්ධන කටයුතු, සහනාධාර සහ ණය ගෙවීම වෙනුවෙන් මේ රාජ්‍ය ආදායම ශක්තිමත්ව තිබීම අත්‍යවශ්‍යයි. රාජ්‍ය ආදායම් දුර්වල වූ පළමු මොහොතේම ආර්ථිකය කඩා වැටීම සිදුවෙනවා. එය අනිවාර්යයක්. අන්න ඒ තත්ත්වය තමයි 2020 දී ආරම්භ වී 2022 වන විට මහා ආර්ථික කඩාවැටීමක් දක්වා වර්ධනය වුණේ.

දැන් ජනාධිපති රනිල් වික්‍රමසිංහ මහතා රාජ්‍ය ආදායම් ඉහළ නංවා ගනිමින්, ඒ වෙනුවෙන් ප්‍රමුඛ අවධානයක් ලබාදෙමින් සහ අත්‍යවශ්‍ය ප්‍රතිසංස්කරණ පසුගිය සමයේ කඩා වැටුණු ආර්ථිකය යළි ගොඩගනිමින් සිටිනවා. ඒ හමුවේ දකින්නට තිබෙන දෙයක් තමයි, මේ සිස්ටම් චේන්ජ් ගැන කතාකරන උදවිය ප්‍රතිසංස්කරණ වලට දැඩි භියක්, නැත්නම් භීතියක් දැක්වීම. ඒ වගේම ඔවුන් එය දේශපාලන සටන් පාඨ බවට පත්කර ගන්නා ලාබ උත්සාහයක නිරතව සිටිනවා. මෙතැනදී පැහැදිළිව අහන්න ඕන ප්‍රශ්නය තමයි, ප්‍රතිසංස්කරණ සිදුනොකර සිස්ටම් චේන්ජ් කරන්නේ කොහොමද යන්න.

මගේ අදහස නම් රට පත්ව ඇති බරපතළ ආර්ථික අර්බුදයට පිළියම් කිරීම වෙනුවෙන් පටු දේශපාලන දෘෂ්ටිවාදය පසෙකලා සැවොම එක්සත් වියයුතු බවයි. මොකද මේක ජනාධිපතිතුමාට තනිවම සිදුකළ හැකි දෙයක් නොවෙයි. එක්සත් ජාතික පක්ෂය ආණ්ඩු බලය ලැබූ අවස්ථා වලදී ආර්ථික ප්‍රතිපත්තිය ගෝලීය ප්‍රවණතාවන්ට ගැළපෙන ආකාරයට යාවත්කාලීන කිරීමට උත්සාහ කළා. ඒ වෙනුවෙන් අවශ්‍ය පියවර ගත්තා. නමුත් ඒ සඳහා පැමිණි බාධා අතිවිශාලයි. විවිධ අවලාද නැගුවා. අපිට පෞද්ගලිකව පවා සාවද්‍ය චෝදනා එල්ල කළා. ඒවා අපේ දේශපාලන කටයුතු වලට ඉතාම නරක ලෙස බලපෑවා. නමුත් අපි අපේ ප්‍රතිපත්ති වෙනස් කළේ නෑ.

ඊයේ (07) නව වැනි පාර්ලිමේන්තුවේ පස් වැනි සැසිවාරය විවෘත කරමින් සිය ප්‍රතිපත්ති ප්‍රකාශය ඉදිරිපත් කරමින් ජනාධිපති රනිල් වික්‍රමසිංහ ලස්සන අදහසක් ගෙන හැර දැක්වූවා. එය ඉතාම තීරණාත්මක ප්‍රකාශයක්. ඒ තමයි ආකාරයට රට ගොඩනගන වැඩපිළිවෙළ මඟහැර සිටීමට සමගි ජනබලවේගය පක්ෂය හෝ ජනතා විමුක්ති පෙරමුණ ට කිසිදු සාධාරණ හේතුවක් නොමැති බව. දැන් බලන්න සජබ ඇතුළේ ඉන්නේ ඉතිහාසයේ එක්තරා මොහොතක හරි හෝ වැරදි දේශපාලන තීන්දුවක් ගෙන එක්සත් ජාතික පක්ෂයෙන් ඉවත්වූ පිරිසක්. ඒ අතර බහුතරය එජාපය හරහා දේශපාලන බෞතීස්මය ලැබූවන්. මතවාදීමය වශයෙන් ඔවුන් සිටින්නේ එක්සත් ජාතික පක්ෂයේ මතවාදය ඇතුලේ. මේ තීරණාත්මක මොහොතේ මේ රට නගන වැඩපිළිවෙල සාර්ථක කරගන්න සහාය දීමට ඔවුන්ට මොකක්ද තිබෙන බාධාව. ඒ බාධාව හරියට තේරුම් ගත්තොත්, ඒ බාධාව ජයගන්න තරම් ධෛර්යයක් ඇතිකර ගත්තොත්, රට දරුණු ආර්ථික අර්බුදයෙන් ගොඩගෙන සංවර්ධිත රටක් බවට පත්කිරීමේ කර්තව්‍යයේ කොටස් කරුවන් බවට පත්වීමට ඔවුන්ට අවස්ථාව ලැබෙනවා.

ඒ වගේම තමයි ජනතා විමුක්ති පෙරමුණටත් දැන් මේ වැඩපිළිවෙළ සමඟ එක්ව කටයුතු කිරීමට බාධාවක් නෑ. බොහෝ කරුණු වලින් ඔවුන් ජාතික ජනබලවේගය සමඟ අපේ අදහස් සමඟ සමපාත වෙමින් සිටිනවා. මේ වෙනකොට ජවිපෙ නායක ප්‍රමුඛ කණ්ඩායමක් ඉන්දියාවේ ආරාධනය ඇතිව එහි නිල සංචාරයක නිරතව සිටිනවා. ජවිපෙ අතීත දේශපාලන භාවිතය මුළුමනින්ම තිබුණේ දැඩි ඉන්දීය විරෝධී පිළිවෙතක. ඉන්දීය ව්‍යාප්තවාදය කියලා ඔවුන් වෙනමම පන්තියක් පවා වෙන් කරලා තිබුණේ . පසුව ඒ පන්තිය ඉවත් කළත් ඉන්දීය විරෝධය දිගටම තිබුනා. ඔබට මතක ඇති පසුගිය සමයේ එට්කා වෙළෙඳ ගිවිසුමේ සිට කොළඹ නැගෙනහිර ජැටිය සංවර්ධනය කිරීමට පැවරීමට සූදානම් වූ අවස්ථාවේ වගේම මෙරටට පැමිණි ඉන්දීය ආයෝජන සම්බන්ධයෙන් ජවිපෙ දැක්වූ විරෝධය. දැන් ඔවුන් ඉන්දියාවට ගිහින් ඉන්දියාව සමග වෙළෙඳ ගිවිසුම් අත්සන් කරන්න බෑ කියනවද ? ඉන්දීය ආයෝජන වලට මෙරට විවෘත කිරීම අපරාධයක් බව කියනවද ? අදානිට ලංකාවට එන්න දෙන්නේ නෑ කියනවද ? ඉන්දියාව සමග ගනුදෙනු කළොත් චීනය අවුල් වෙයි කියලා , ඉන්දීය සබඳතා ප්‍රතික්ෂේප කරනවද ? දැන් බලන්න මිල්කෝ එක අමුල් එකට දෙන්න යනවා කියලා මහා විරෝධතා මැව්වට ලස්සනට අමුල් එකේ නිරීක්ෂණ චාරිකා යන අපූරුව. දැන් එහෙ ගිහින් කියනවද අපේ මිල්කෝ එකට වැඩේ දෙන්න නේද හැදුවේ , හතර මායිමක එන්න හිතන්න එපා කියලා . ඒ වගේම තමයි හෙට IMF සමග සාකච්ඡා කළොත් කියනවද අපේ කොන්දේසි වලට වැඩ කරමු, නැත්නම් හකුළගෙන යන්න කියලා . ණය හිමියන් සමග සාකච්ඡා කළොත් කියනවද අවධානම නොදැනද ණය දුන්නේ ? තවත් ණය දෙනවා නම් දෙන්න ,පුළුවන් වෙලාවක තමයි අපි ණය ගෙවන්නේ කියලා . ඔය දේශපාලන වේදිකාවේ

දැන් බලන්න අපේ ප්‍රධාන විරිද්ධවාදීන් වූ රාජපක්ෂ කඳවුරේ පොදුජන පෙරමුණේ කොපමණ පිරිසක් මේ වන විට ජනාධිපති රනිල් වික්‍රමසිංහ සමඟ හරි හරියට ආණ්ඩුව කරගෙන යන අපූරුව. ඒ වැඩපිළිවෙළ මෙතෙක් පොදුජන පෙරමුණ දියත්කළ ප්‍රතිපත්තියම නොවෙයි. නමුත් මෙය තමයි නිවැරදි ප්‍රතිපත්තිය. නිවැරදි දේ වෙනුවෙන් ක්‍රියාත්මක වෙන්න කවුරුත් පසුබෑමට අවශ්‍ය නෑ. තවදුරටත් පැරණි දේශපාලන උපාය උපක්‍රම අනුගමනය කිරීම කියන්නේ ඉතිහාසයේ ශාපයට ලක්වීමට හොඳ සුදුසුකමක් බව අපි කවුරුත් තේරුම් ගන්න අවශ්‍යයි.

ඒ වගේම මේ රටේ ජනතාව එක දෙයක් හොඳින් අවධාරණයට ගන්න අවශ්‍යයි. ඒ තමයි, 2022 දී පැවති තත්ත්වයට සාපේක්ෂව රටේ ආර්ථිකය ප්‍රගතියක් අත්කරගෙන තිබෙනවා. නමුත් අවධානම මුළුමනින්ම පහවගොස් නෑ. අපි තවමත් ඉන්නේ ගිනි කන්ද උඩ. ගනුලබන එක් වැරදි තීන්දුවක් හොඳටම ඇති අප යටින් තිබෙන ගිනි කන්ද සක්‍රීය වෙන්න. එවැනි තත්ත්වයක් ඇති වුවහොත් 2022 දී පවතී තත්ත්වයට වඩා දරුණු ආර්ථික අවධානමකට අප රට ලක්වෙනවා. ඒ නිසා මේ මොහොත කියන්නේ අත්හදා බැලීම් කරන්න උත්සාහ කරන තත්ත්වයක් නෙවෙයි. මැතිවරණ කිට්ටු නිසා ලස්සන කතා කියන්න පුළුවන්. මාර සටන් පාඨ ගේන්න පුළුවන්. නමුත් ප්‍රතිපත්තිය දෙස බලන්න. ඒ නිසා තමයි ජනාධිපති රනිල් වික්‍රමසිංහ මහතා පැහැදිළිව කිව්වේ, මේ ගෙන යන වැඩපිළිවෙළට විකල්ප තිබෙනවා නම් ඉදිරිපත් කරන්න කියලා. IMF සමඟ වුවත් ඒ විකල්ප යෝජනා ගැන සාකච්ඡා කිරීමට අවස්ථාව සලසා දෙන්නම් කියලා. මේ ඔබේ දරුවන්ගේ අනාගතය. මේ සමඟ සෙල්ලම් කරන්න එපා. වගකීම් සහගතව තීන්දු තීරණ ගන්න. වචන වලට අහුවෙන්න එපා. වචන වලින් හදපු රටවල් නෑ. නිවැරදි ප්‍රතිපත්ති මත දියත්කළ වැඩපිළිවෙලක් ගැන මිස වචන විශ්වාස කරලා , රෑ වැටුණු වලේ දවල් වැටෙන්න එපා.

ඉන්දියා පදනමේ සහ ඔස්ට්‍රේලියානු රජයේ ආරාධනයකට අනුව ජනාධිපති රනිල් වික්‍රමසිංහ ඔස්ට්‍රේලියාවේ සංචාරයට එක්ව සිටින අතර හත්වන ඉන්දීය සාගර සමුළුව අද (පෙබ. 9) සහ හෙට (පෙබ. 10) ඔස්ට්‍රේලියාවේ පර්ත් නුවරදී පැවැත්වීමට නියමිත ය.

“ස්ථාවර සහ තිරසර ඉන්දියානු සාගරයක් කරා” යන තේමාව යටතේ පැවැත්වෙන මෙවර සමුළුවේ ප්‍රධාන දේශනය ජනාධිපතිවරයා සිදු කිරීමට නියමිත බව ජනාධිපති මාධ්‍ය ඒකකය නිවේදනයක් නිකුත් කරමින් සඳහන් කර තිබේ.

මේ අතර, ජනාධිපතිවරයා සහ බටහිර ඔස්ට්‍රේලියාවේ අග්‍රාමාත්‍ය රොජර් කුක් අතර හමුවක් ද ඉන්දීය සාගර සමුළුවට සමගාමීව අද පර්ත් නුවරදී සිදුවී තිබිණි.

ජනාධිපති මාධ්‍ය ඒකකය සඳහන් කර ඇත්තේ, ශ්‍රී ලංකාව සහ බටහිර ඔස්ට්‍රේලියාව අතර පුනර්ජනනීය බලශක්තිය, කෘෂිකර්මාන්ත යන ක්ෂේත්‍රයන්ට අදාළ සහයෝගීතාව ඉහළ නංවා ගැනීම මෙන් ම ශ්‍රී ලංකාව සහ පර්ත් නුවර අතර ඍජු ගුවන් සේවා සබඳතා වර්ධනය කර ගැනීම සම්බන්ධයෙන් ද අග්‍රාමාත්‍ය රොජර් කුක් මෙහිදී සිය කැමැත්ත පළ කර ඇති බව ය.

පුනර්ජනනීය බලශක්ති ක්ෂේත්‍රයේ පවතින විභවයන් පිළිබඳ විස්තර කරමින් ශ්‍රී ලංකාව සිය පුනර්ජනනීය බලශක්ති ක්ෂේත්‍රය සංවර්ධනය කිරීමේ ක්‍රියාවලියක නිරත වෙමින් සිටින බව ජනාධිපති රනිල් වික්‍රමසිංහ ප්‍රකාශ කර තිබේ.

ජනාධිපති මාධ්‍ය ඒකකය සඳහන් කළේ, ශ්‍රී ලංකාවේ කෘෂිකාර්මික නවීකරණ වැඩපිළිවෙළ පිළිබඳව කරුණු පැහැදිලි කළ ජනාධිපතිවරයා මෙම ක්ෂේත්‍රයේ ආයෝජන දිරිමත් කරන ලෙස බටහිර ඔස්ට්‍රේලියානු අග්‍රාමාත්‍යවරයා වෙත ආරාධනා කළ බව ය.

ශ්‍රී ලංකාවේ සංචාරයක නිරතව පවතින ආයෝජන අවස්ථා පිළිබඳ සොයා බලන ලෙස ද ජනාධිපති රනිල් වික්‍රමසිංහ මෙහිදී බටහිර ඔස්ට්‍රේලියා ප්‍රාන්තයේ අග්‍රාමාත්‍ය රොජර් කුක් මහතාට ඇරයුම් කළ බව ජනාධිපති ඒකකය වැඩිදුරට ත් සඳහන් කළේ ය.

ශ්‍රී ලංකා පිතිකරුවෙකු එක් දින ඉනිමකදී රැස් කළ ඉහළම ලකුණු සංඛ්‍යාව සඳහා වසර 24කට පෙර සනත් ජයසූරිය පිහිටුවා තිබූ වාර්තාව බිඳ දැමීමට පැතුම් නිස්සංක අද (09) සමත් විය.

ඒ, ඇෆ්ගනිස්ථානය සමග පැවැත්වෙන පළමු එක් දින ක්‍රිකට් තරගයේදීයි.

පල්ලෙකැලේ ජාත්‍යන්තර ක්‍රිකට් ක්‍රීඩාංගණයේ පැවැත්වෙන තරගයේ කාසියේ වාසිය හිමිකර ගත් ඇෆ්ගනිස්ථාන නායක හෂ්මතුල්ලා ශහිදී පළමුවෙන් පන්දු යැවීමට තීරණය කළේ ය.

ශ්‍රී ලංකා ඉනිම ආරම්භ කළේ, අවිශ්ක ප්‍රනාන්දු සහ පැතුම් නිස්සංකයි.

කලකට පසුව ශ්‍රී ලංකා ආරම්භක පිතිකරු යුගලයක සාර්ථක ලකුණු සබඳතාවක් දැක ගැනීමේ අවස්ථාව ක්‍රීඩා ලෝලීන්ට අද හිමි විය.

අවිශ්ක අද වාර්තා කළේ, 6 වැනි එක් දින අර්ධ ශතකයයි.

ඔවුන් දෙදෙනා පළමු කඩුල්ලට ලකුණු 182ක දැවැන්ත ලකුණු පුවරුවක් ගොඩනැගුවේ ය.

ඒ, ඇෆ්ගනිස්ථානයට එරෙහිව එක් දින තරගයකදී ශ්‍රී ලංකා ආරම්භක පිතිකරුවන් දෙදෙනෙක් ගොඩනැගූ ඉහළම ලකුණු සබඳතාවය සඳහා වන වාර්තාව ද පිහිටුවමිනි.

නායක කුසල් මෙන්ඩිස් ලකුණු 16යි.

නොදැවී ලකුණු 210ක් රැස් කළ පැතුම් නිස්සංක අද වාර්තා අතරට එක් වූයේ එක් දින ද්විත්ව ශතකයක් රැස් කළ පළමු ශ්‍රී ලාංකික ක්‍රීඩකයා ලෙසිනි.

ඒ අනුව සනත් ජයසූරිය ඉන්දියාවට එරෙහිව ලකුණු 189ක් රැස් කරමින් එක්දින ඉනිමක වැඩිම ලකුණු සංඛ්‍යාවක් රැස් කළ ශ්‍රී ලංකා පිතිකරු ලෙස 2000 වසරේදී පිහිටුවා තිබූ වාර්තාව අද බිඳ වැටුණි.

තරගයේ පළමුවෙන් පන්දුවට පහර දුන් ශ්‍රී ලංකා කණ්ඩායම කඩුලු 3ක් දැවී ලකුණු 381ක් රැස් කළේ ය.

ලකුණු 382ක ඉලක්කයක් හඹා යන ඇෆ්ගනිස්ථානය පන්දුවාර 2ක් අවසානයේදී කඩුල්ලක් දැවී ලකුණු 6ක් රැස් කරගෙන සිටියේ ය.

රජයේ මුදල් පිළිබඳ කාරක සභාවේ සභාපති ධුරය සදහා පාර්ලිමේන්තු මන්ත්‍රී ආචාර්ය හර්ෂ ද සිල්වා  යළි පත් කර තිබේ.

තේරීම් කාරක සභාව විසින් නව සභාවාරය සදහා රජයේ මුදල් පිළිබඳ කාරක සභාවට සාමාජික මන්ත්‍රීවරයන් පත් කිරීම සිදුවූ අතර එහිදී සභාපතිවරයා ලෙස ආචාර්ය හර්ෂ ද සිල්වා  පත්කර ඇත.

මෙසේ පත්කළ සාමාජික මන්ත්‍රීවරයන්ගේ නම් ගරු කථානායකවරයා විසින් අද (09) පාර්ලිමේන්තුවට නිවේදනය කළේය.

ඒ අනුව ශෙහාන් සේමසිංහ, සීතා අරඹේපොල, (ආචාර්ය) සුරේන් රාඝවන්, අනුප පස්කුවල්, ජොන්ස්ටන් ප්‍රනාන්දු, නීතිඥ රවුෆ් හකීම්, වජිර අබේවර්ධන, ගරු විජිත හේරත්, මහින්දානන්ද අලුත්ගමගේ, දුමින්ද දිසානායක, නීතිඥ චන්දිම වීරක්කොඩි, ගරු (ආචාර්ය) නාලක ගොඩහේවා, (ආචාර්ය) හර්ෂ ද සිල්වා, නිමල් ලාන්සා, එම්. ඒ. සුමන්තිරන්, (වෛද්‍ය) කවින්ද හේෂාන් ජයවර්ධන, මයන්ත දිසානායක , හර්ෂණ රාජකරුණා, යූ. කේ. සුමිත් උඩුකුඹුර, (ආචාර්ය) මේජර් ප්‍රදීප් උඳුගොඩ, ගරු ඉසුරු දොඩන්ගොඩ, නීතිඥ ප්‍රේම්නාත් සී. දොලවත්ත, ගරු නීතිඥ මධුර විතානගේ සහ එම්. ඩබ්ලිව්. ඩී. සහන් ප්‍රදීප් විතාන යන මන්ත්‍රීවරයන් මුදල් පිළිබඳ කාරක සභාවේ සේවය කිරීම සඳහා පත් කොට තිබේ.

පාන් සඳහා වූ ගැසට් පත්‍රය නිකුත් කිරීමෙන් පසු පාරිභෝගික කටයුතු පිළිබඳ අධිකාරිය පෙබරවාරි 05 වන දා දිවයින පුරා වැටලීම් ආරම්භ කළ අතර ඊයේ (පෙබ. 8) දක්වා බේකරි සහ වෙළෙඳ සල් පරීක්ෂා කිරිමේදී නියමිත බර ප්‍රමාණය මෙන් ම මිල ප්‍රදර්ශනය නොකළ බේකරි 232ක් පමණ වැටලීම් සිදු කළ බව පාරිභෝගික කටයුතු පිළිබඳ අධිකාරිය පවසයි.

අද (පෙබ. 9) මාධ්‍ය නිවේදනයක් නිකුත් කරමින් පාරිභෝගික කටයුතු පිළිබඳ අධිකාරිය මේ බව සඳහන් කළේ ය.

එම නිවේදනයේ සඳහන් කර ඇත්තේ, නියමිත බර ප්‍රමාණය මෙන් ම මිල ප්‍රදර්ශනය නොකළ බේකරි සහ වෙළෙඳ සල්වලට ඉදිරියේදී නඩු පැවරීමට කටයුතු කරන බව ත් පාරිභෝගික කටයුතු පිළිබඳ අධිකාරියේ නිලධාරින් දිවයින පුරා වැටලීම් අඛණ්ඩව සිදු කරන බව ත් ය.

පාරිභෝගිකයන් හට යම් පැමිණිල්ලක් ඇතොත් ඒ සඳහා පාරිභෝගික කටයුතු පිළිබඳ අධිකාරියේ ක්ෂණික ඇමතුම් අංකය වන 1977ට ලබා දිය හැකි බව එම නිවේදනයේ වැඩිදුරට ත් සඳහන් කර තිබේ.

ලෝක බැංකුවේ කලාපීය උප සභාපති මාර්ටින් රේසර්ගේ ප්‍රධානත්වයෙන් යුත් දූත පිරිසක් පසුගිය සතියේ විදුලිබල හා බලශක්ති අමාත්‍යාංශයට පැමිණි සාකච්ඡාවකට සහභාගි වී තිබේ.

දැනට ක්‍රියාත්මක වන විදුලිබල මණ්ඩලයේ ප්‍රතිව්‍යුහගත කිරීම, ඉන්දියාව සමග විදුලිබල පද්ධති ඒකාබද්ධ කිරීම , පුනර්ජනනීය බලශක්ති සංකලන ව්‍යුහය නිර්මාණය කිරීම , බලශක්ති කාර්යක්ෂමතාව සහ අක්වෙරළ සුලං විදුලිබල උත්පාදනය වැනි වැඩසටහන් සඳහා ලෝක බැංකුව සහය හා මාර්ගෝපදේශකත්වය සපයනු ලැබේ.

විදුලිබල සහ බලශක්ති අමාත්‍යංශයට ලබාදෙන සහයෝගය සම්බන්ධයෙන් ලෝක බැංකු දූත පිරිසට අමාත්‍යවරයා සිය ස්තුතිය පලකල අතර විදුලිබල මණ්ඩලයේ ප්‍රතිව්‍යුහගත කිරීමේ මාර්ග සිතියම කඩිනම් කිරීමට, ශක්තිමත් කිරීමට සහ වැඩිදියුණු කිරීමට ගතහැකි පියවර ගැන මෙන්ම පුනර්ජනනීය බලශක්ති සංකලනය හා බලශක්ති කාර්යක්ෂමතාව වෙනුවෙන් යටිතල පහසුකම් නිර්මාණය සම්බන්ධයෙන් තව දුරටත් සහය ලබා ගැනීම වෙනුවෙන් ඔවුන් සමග සාකච්ඡා කර ඇත.

ලෝක බැංකුවේ මෙරට අධ්‍යක්ෂ ෆාරිස් හැඩඩ් සර්වොස්, යටිතල පහසුකම් පිලිබද කලාපීය අධ්‍යක්ෂ පන්කජ් ගුප්තා, ලෝක බැංකු මෙරට කළමණාකාර චියෝ කන්ඩා, ජාත්‍යන්තර මුල්‍ය සමාගමේ මෙරට කළමනාකරු අලෙජන්ඩ්‍රො අල්වාරිස්, ලෝක බැංකු පුහුණු කළමණාකාරු සයිමන් ස්ටෝල්ප්, කලාපීය සම්බන්ධීකාරක සස්චා ඩ්ජුමිනා, සහ ජේෂ්ඨ බලශක්ති විශේෂඥජාරි වේය්නාන් මේ හමුවට එක්විය.

පාර්ලිමේන්තුවේ නව සැසිවාරය ආරම්භ කිරීමේදී සමගි ජන බලවේගය විසින් පාර්ලිමේන්තුව වර්ජනය කළත් , සරත් ෆොන්සේකා, රාජිත සේනාරත්න , කුමාර වෙල්ගම, AHM ෆවුසි, ඉෂාක් රහුමාන්, එච්. එම්. එම්. හාරිස්, ෆයිසාල් කාසිම් , වඩුවේල් සුරේෂ් වගේ පිරිසක් එම තීරණයෙන් ප්‍රතික්ෂේප කරමින් සභා ගැබේ රැදී හිටියා.

නැගිටලා ගිය අය වගේම වැඩිවෙලා හිටපු අයත් තම තමන්ගේ ස්ථාවරේ පැහැදිලි කරමින් හිටු කියලා මේ වෙනකොට වොයිස්කට් දෙන්න පටන් අරන්..

'' රනිල් වික්‍රමසිංහ විසින් සිදු කරමින් ඉන්නේ තමන් නියෝජනය කරන කණ්ඩායමේ වැඩපිළිවෙළ බව සමගි ජන බලවේග පාර්ලිමේන්තු මන්ත්‍රී රාජිත සේනාරත්න කියනවා.

අද වන විට ශ්‍රී ලංකා පොදුජන පෙරමුණ සිටින්නේද තමන් නියෝජනය කරන වැඩපිළිවෙළ තුළ බව රාජිත කියනවා. එම වැඩපිළිවෙළ ඉදිරිපත් කරන්නේ සජිත් ප්‍රේමදාස ද ? රනිල් වික්‍රමසිංහ ද ? කියන එක සුළු කාරණාවක් කියලයි රාජිත කියන්නේ..

රාජාසන කතාව අවසන් කිරීමෙන් පස්සේ ජනාධිපතිවරයා , හිටපු ජනාධිපති මහින්ද රාජපක්ෂ සමග තේ පැන් සාදයට සහභාගී වෙලා තිබුනා. ඒ තේ පැන් සංග්‍රහයට ආණ්ඩු පක්ෂ මන්ත්‍රීවරු සහභාගී වූ නමුත්, විපක්ෂ මන්ත්‍රීවරු පැමිණ සිටි ආකාරයක් දැකගන්නට ලැබුණේ නෑ .

ඒ තේ පැන් සංග්‍රහයෙන් පස්සේ ජනාධිපති රනිල් කෙලින්ම ගිහින් තිබුනේ, පාර්ලිමේන්තුව ඇතුලේ තියන ජනාධිපති කාර්‍යාලය ට. ජනාධිපතිගේ පස්සෙන් සජබ සභාපති සරත් ෆොන්සේකාත් ඇවිත්.. දෙන්නා තනියම පැය භාගයක් විතර කතා කර කර ඉඳලා . ඒ දෙන්නා මොනවා කතාකර ගත්තද කියල දැනගන්න නෑ ..

කොහොම වුනත් සජබේ සමහරු නම් කියන්නේ, ෆොන්සේකා පෞද්ගලික උවමනාවකට ජනාධිපති හම්බවෙන්න ගිහින් කියලා .

ඒ කතාවේ ඇත්ත බොරු මොනවා වුනත්, ඊයේ හවස විපක්ෂයේ කණ්ඩායම් අතරේ තවත් අවුලක් ඇතිවෙලා.

ජනාධිපතිවරයා 7 වෙනිදා පාර්ලිමේන්තුවට ඉදිරිපත් කරපු ආණ්ඩුවේ ප්‍රතිපත්ති ප්‍රකාශය පිළිබඳ සභාව කල් තැබීමේ විවාදය අද (8 ) සහ හෙට (09) යන දෙදින තුළ පැවැත්වීමට නියමිතයි.

ජනාධිපතිගේ කතාව අහගෙන සභාගැබට වෙලා හිටපු කිසිම මන්ත්‍රී කෙනෙකුට මේ විවාදේ දී, සජබ වේලාවෙන් ඉඩක් දෙන්න එපා කියලා , විපක්ෂයේ ප්‍රධාන සංවිධායක කිරිඇල්ල දැනුම්දීමක් කරලා. ඒ කියන්නේ රාජිත, ෆොන්සේකා, චම්පික, වෙල්ගම වගේ මන්ත්‍රී ලට කතාකරන්න වෙලාව දෙන්න එපා කියලා.

ඔය කතාව ආරංචි වෙලා චම්පිකට මළ පැනලා. '' ඔය සජිත් මහත්තයට කියන්න අපි එයාගේ තාත්තත් එක්කත් හැප්පිච්ච මිනිස්සු.. එදා ලොකු ප්‍රේමදාසට බයවෙච්ච නැති අපි, පොඩි ප්‍රේමදාසට කොහොමත් බය නෑ . කතාකරන්න ඕන නම් පාර්ලිමේන්තුවේ දොරවල් කඩාගෙන හරි ඇවිත් කතාකරන හැටි දන්නවා. ඒ නිසා එයාට වැඩිය දඟලන්න එපා කියන්න. '' - චම්පික ඔය විදියට කිරිඇල්ලගේ කන පිරෙන්න දීලා ඇරලා කියලයි ආරංචි.

කොහොම නමුත් නායකයකු ලෙස සජිත් ගේ දුර්වලතා එන්න එන්නම කැපී පේන්න අරගෙන. කිහිපදෙනෙක් එකතු වෙලා සැර දේශපාලන ගේමක් ගහලා, සජිත්ව පක්ෂ නායකයෙක් කළාට මොකද , ඒ හදලා දුන්න තැන රැකගන්න සජිත් අසමත්ව ඇති බව මේ හරහා පෙන්නුම් කරනවා.

• දේශපාලන වාර්තාකරු

ජාතික ජනබලවේගයේ නායකයන් ඉන්දීය නායකයන් හමුවට ගියේ ජනාධිපති රනිල් වික්‍රමසිංහ විසින් ජාතික ජනබලවේගයේ මොල සෝදන ලද නිසා බව අමාත්‍ය නිමල් සිරිපාද සිල්වා පැවසීය .

ඉන්දීය ව්‍යාප්තවාදය ගැන දේශන පැවත් වූ අය අද ෆුල් සූට් ඇඳගෙන ඉන්දීය නායකයන් හමුවීම ගැන සතුටු බවද අමාත්‍යවරයා සඳහන් කළේය.

අමාත්‍ය නිමල් සිරිපාල ද සිල්වා මේ බව සඳහන් කර සිටියේ අද (08) පාර්ලිමේන්තුවේදී අදහස් දක්වමින් ය.

ඉන්දියාවේ අදානි හා අම්බානි ව්‍යාපාරිකයන් මෙරට ආයෝජනය කිරීමට ඒමේදී ඔවුන් එය විවේචන කළ ආකාරයද සිහිපත් වන බවද අමාත්‍යවරයා එහිදී වැඩිදුරටත් සඳහන් කර සිටියේ ය.

යාත්‍රාවලට ඉන්ධන පිරවීමේ කටයුතු (bunkering system) යළි ආරම්භ කිරීම හරහා ඉන්ධන මෙට්‍රික් ටොන් 5,200ක් අලෙවි කිරීමෙන් ඩොලර් මිලියන 03ක් උපයා ගැනීමට හැකි වූ බව විදුලිබල හා බලශක්ති රාජ්‍ය අමාත්‍ය ඩී. වී. චානක පැවසීය.

බලශක්ති අවශ්‍යතාව වෙනුවෙන් ඩොලර් මිලියන 200ක වටිනා අතිරික්තයක් පවත්වාගෙන යන බව ද රාජ්‍ය අමාත්‍යවරයා සඳහන් කළේය.

විදුලිබල හා බලශක්ති රාජ්‍ය අමාත්‍ය ඩී. වී. චානක මේ බව සඳහන් කර සිටියේ 'ස්ථාවර රටකට සැවොම එක මඟකට' මැයෙන් අද (08) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක් වෙමිනි.

එහිදී වැඩිදුරටත් අදහස් දැක්වූ විදුලිබල හා බලශක්ති රාජ්‍ය අමාත්‍ය ඩී. වී. චානක මෙසේ ද පැවසීය.

පැවති අසීරු ආර්ථික අර්බුදය හමුවේ ක්‍රමානුකූලව රට නැඟිටිමින් සිටින අවස්ථාවක අප මේ වන විට පසුවනවා. අප සියලු දෙනාම තෙල් පෝලිම්වල සිටි අවධියක් තිබුණා. සියලු දෙනාගේ කැපවීමෙන් අද වන විට ස්ථාවර තෙල් සැපයුමක් පවත්වාගෙන යාමට හැකිව තිබෙනවා. මෑත ඉතිහාසයේ පැවති විශාලම තෙල් සංචිත ප්‍රමාණයක් අප මේ වන විට රඳවා තබාගෙන සිටිනවා. ඛනිජ තෙල් නීතිගත සංස්ථාවේ ඩොලර්වලින් ඉතිරියක් පවත්වාගෙන යාමට ද අපට හැකි වී තිබෙනවා.

බලශක්ති අවශ්‍යතාව වෙනුවෙන් ඩොලර් මිලියන 200ක් වටිනා අතිරික්තයක් පවත්වාගෙන යන අතර සතියකට අවශ්‍ය ඩොලර් ප්‍රමාණය එම සතිය තුළම ලබා ගැනීමටත් කටයුතු කරමින් සිටිනවා. අද වන විට ඔටෝ ඩීසල් මෙට්‍රික් ටොන් 130,791ක්, පෙට්‍රල් 92 ඔක්ටේන් මෙට්‍රික් ටොන් 83,275ක්, සුපර් ඩීසල් මෙට්‍රික් ටොන් 8313ක්, පෙට්‍රල් 95 ඔක්ටේන් මෙට්‍රික් ටොන් 11,196ක්, ගුවන් යානා සඳහා භාවිත කරන JET A1 මෙට්‍රික් ටොන් 17,274ක් සහ විදුලි නිෂ්පාදනයට අවශ්‍ය තෙල් (FO) මෙට්‍රික් ටොන් 75,410ක් වශයෙන් පවත්වාගෙන යනවා.

ඒ වගේම ටෙන්ඩර් පටිපාටියට අනුව ඉදිරි මාස 06කට අවශ්‍ය තෙල් ලබාගැනීම සඳහා දීර්ඝ කාලීන ගිවිසුම්වලට එළඹී තිබෙනවා. එමඟින් අපට බලශක්ති සුරක්ෂිතතාව පවත්වාගෙන යාමට හැකියාව ලැබී තිබෙනවා.

දෙසැම්බර් මාසයේ සිට අප්‍රේල් මස මැද භාගය වන තෙක් ලෝක වෙළඳ පොළේ ඉන්ධන මිල ඉහළ යාම සාමාන්‍ය තත්ත්වය වී තිබෙනවා. ඊට හේතුව වන්නේ යුරෝපයට සීත සෘතුව පැවතීමත් සමඟ තෙල් භාවිතය අධික වීමයි. එම කාලය තුළ ඉල්ලුම වැඩිවීමත් සමඟ මිලෙහි ඉහළ යාම සෑම වර්ෂයේම සිදු වන්නක් බව කිව යුතුයි. ඒ අනුව සීත සෘතුවේ අවසානයත් සමඟ මාර්තු මාසයෙන් පසුව තෙල් මිලෙහි අඩුවීමක් අපට බලාපොරොත්තු වන්න පුළුවන්. එහි වාසිය පාරිභෝගිකයාට ලබාදීමට කටයුතු කරනවා.

ඒ වගේම 2022 වර්ෂයට පෙර සෑම වසරේම ප්‍රමාද ගාස්තු ගෙවීම සිදු කළා. නමුත් 2023 වසරේ අප නව ක්‍රමයක් හඳුන්වා දීමට කටයුතු කළා. නැව් වරායට පැමිණි මොහොතේම ගබඩා කිරීමට කටයුතු කළා. අනතුරුව අප සතුව පවතින ඩොලර් ගෙවීමෙන් පසු තෙල් මිලදී ගැනීම සිදුකළා. එම ක්‍රමය හරහා වසර 15 කට පසු එක් රුපියලක් වත් ප්‍රමාද ගාස්තු ලෙස ගෙවීමක් අප සිදු කලේ නැහැ.

එමෙන්ම ඛනිජ තෙල් සංස්ථාව මේ දක්වා ඉන්ධන මිල දී ගැනීම සිදු කළේ සාමාන්‍ය ක්‍රමවේදයට අනුව ටෙන්ඩර් කැඳවීමෙනුයි. නමුත් අප විසින් ඉදිරියේ දී ටෙන්ඩර් කැඳවීම සඳහා වෙන්දේසි ක්‍රමයක් හඳුන්වා දීමට කටයුතු කරනවා. එහි කටයුතු මේ වන විට 95% ක් පමණ අවසන් කිරීමට ද අපට හැකියාව ලැබී තිබෙනවා. තෙල් ගබඩා පර්යන්තය මඟින් ඊට අවශ්‍ය තාක්ෂණික ඥානය අපට ලබාදීම සිදු කරනවා.

ලෝකයේ පවතින නව තාක්ෂණික ක්‍රමවේදයන් ලංකාවට හඳුන්වාදීමත් සමඟ තවදුරටත් ඉන්ධන මිල අඩුකර ගැනීමට හැකියාව ලැබෙනු ඇතැයි අප විශ්වාස කරනවා.

ඒ වගේම වසර 02කට පසුව 2024 වසරේ දී යාත්‍රාවලට ඉන්ධන පිරවීමේ කටයුතු අප (bunkering system) ආරම්භ කළා. එමඟින් මෙට්‍රික් ටොන් 5,200ක් ඉන්ධන නෞකා සඳහා අලෙවි කිරීමෙන් ඩොලර් මිලියන 03ක් උපයා ගැනීමට හැකිවුණා. එමෙන්ම යාත්‍රාවලට ඩීසල් පිරවීමේ කටයුතු ද ඉතාමත් කෙටි කාලයකින් අරම්භ කිරීමට අපේක්ෂා කරනවා.

මෙගා වොට් 100ක ධාරිතාවයකින් යුත් සියඹලාණ්ඩුව බිම්ගත සූර්ය පැනල මගින් විදුලිය උත්පාදනය කිරීමේ පුනර්ජනනීය බලශක්ති ව්‍යපෘතිය වෙනුවෙන් වූ විදුලිය මිලදී ගැනීමේ ගිවිසුම අත්සන් කිරීම රිවිදනවි පෞද්ගලික සමාගම සහ විදුලිබල මණ්ඩලය අතර අද (08) සිදු කළේය.

මෙම ව්‍යපෘතිය සඳහා ලංසු කැඳවීම විදුලිබල මණ්ඩලය විසින් 2022 වර්ෂයේ සැප්තැම්බර් මස සිදු කරන ලැබූ අතර 2023 වර්ෂයේ තාක්ෂණික සහ මුල්‍ය කටයුතු අධ්‍යනය කර 2023 වර්ෂයේ අවසන අඩුම ලංසුව ඉදිරිපත් කරන ලද සමාගමට ප්‍රධානය කරනු ලැබුණි. 

එම සමාගම මගින්ම එහි සම්ප්‍රේෂණ යටිතල පහසුකම් කිලෝ මීටර් 27.5ක් සංවර්ධනය කෙරේ. 

රිවිදනවී සමාගම කොටස්කරුවන් වන ලක්දනවි සමාගම, වින්ඩ් ෆොස් සමාගම සහ සිංගප්පුරුවේ බ්ලු සිර්කල් පෞද්ගලික සමාගම ඒකාබද්ධව සැදුම්ලත් සමාගමක් වේ. 

මෙම ව්‍යාපෘතියේ ආයෝජනය ඇමෙරිකානු ඩොලර් මිලියන 132ක් පමණ වේ. 

මේ වනවිට රටපුරා මදුරු කීට ඝණත්වය පහළ ගොස් ඇතැයි සෞඛ්‍ය කීට විද්‍යා නිලධාරීන්ගේ සංගමයේ සභාපති නජිත් සුමනසේන  පවසයි.

පසුගිය වසරේ දිවයිනේ බොහෝ ප්‍රදේශවල බිටෝ දර්ශක අගය 20 - 25 අගයක් දක්වා ඉහළ ගිය අතර මේ වනවිට එම අගය 10 - 15 දක්වා පහත වැටී ඇති බව ඔහු පවසයි.

කෙසේ වෙතත් කාලගුණයෙහි පවතින ක්ෂණික වෙනස් වීම් හමුවේ බිටෝ ඝණත්වය නැවත ඉහළ යා හැකි බව ද නජිත් සුමනසේන  පැවසීය.

ශ්‍රී ලංකාවෙන් හමුවූ විශාලතම සෙල් ලිපිය පිළිබඳව මූලික වාර්තාවක් ඒ සම්බන්ධයෙන් පත්කළ විශේෂ කමිටුව විසින් අද (08) එළිදැක්වීම රජයේ ප්‍රවෘත්ති දෙපාර්තමේන්තුවේ දී සිදුවිය.

මෙම සෙල්ලිපිය කිස්තුපූර්ව දෙවන සියවසේ මුල් භාගයට හෝ ඊට පෙර සමයකට අයත් එකක් බවට තීරණය කළ බව එම මාධ්‍ය හමුවට එක්වූ ශ්‍රී ජයවර්ධනපුර විශ්ව විද්‍යාලයේ පුරාවිද්‍යා අධ්‍යයන අංශයේ මහාචාර්ය කරුණාසේන හෙට්ටිආරච්චි  පැවසීය.

සෙල්ලිපියේ බ්‍රාහ්මීය අක්ෂර පේළි 10ක් සහ ඇති බවත් මෙරට ඉතිහාසයේ මෙතෙක් ශිලා ලේඛනවල දැකගත නොහැකි අතිශය දුර්ලභ සංකේත 6ක් හාමුවී ඇති බවත් මහාචාර්යවරයා සඳහන් කළේය.

එසේම අදාළ ශිලා ලේඛනයේ සැළකිය යුතු ප්‍රමාණයක් ගෙවී ගොස් ඇති බවත් එය සමස්ථ ලේඛනයෙන් ප්‍රතිශතයක් ලෙස සියයට 60ක් පමණ වන බවත් මහාචාර්යවරයා වැඩිදුරටත් සඳහන් කළේය.

ඒ අනුව ඉතිරි සියයට 40කට කොටස අතරින් හඳුනාගෙන ඇති අක්ෂර පේළි අනුව දළ අර්ථයක් සකස්කරගැනීමට හැකි වූ බවද මහාචාර්යවරයා වැඩිදුරටත් සඳහන් කළේය.

එහි බ්‍රාහ්මීය අකුරු 24ක් උපයෝගී කරගනිමින් සකස් කර ඇති අතර මුළු ශිලා ලිපියේම අකුරු 1000කට ආසන්න ප්‍රමාණයක් තිබී ඇත.

භික්ෂූන් වහන්සේලාට ජලය අත්‍යවශ්‍ය වන බැවින් එම කඳු මුදුනට ජලය සැපයීමක් ගැනද එම ශිලා ලේඛනයේ සටහන්ව ඇති බව මහාචාර්යවරයා පැවසීය.

මේ අතර ස්වාමීන් වහන්සේලාට ලෙනක් පූජා කිරීම ගැනත් දාගැබක් කරවා පූජා කිරීම පිළිබඳවත් මෙම සෙල් ලිපියේ සඳහන් ව ඇති බව මහාචාර්ය කරුණාසේන හෙට්ටිආරච්චි මහතා සඳහන් කළේය.

2023 වසරේ ජූලි මස 10 වනදා මෙම සෙල්ලිපිය හඳුනාගනු ලැබීය.

ආබාධිත, වැඩිහිටි සහ වකුගඩු දීමනාව ජනවාරි මස සිට බලපැවැත්වෙන පරිදි ඉහළ නංවන බව මුදල් රාජ්‍ය අමාත්‍ය ෂෙහාන් සේමසිංහ  පවසයි.

ඒ අනුව රුපියල් 5,000ක්ව පැවැති ආබාධිත සහ වකුගඩු දීමනාව රුපියල් 7,500ක් දක්වා ද, රුපියල් 2,000ක්ව පැවැති වැඩිහිටි දීමනාව රුපියල් 3,000 දක්වා ද ඉහළ නංවන බව රාජ්‍ය අමාත්‍යවරයා සඳහන් කළේය.

මේ අතර දැනට අස්වැසුම ප්‍රතිලාභී පවුල් තුළ සිටින ආබාධිත, වැඩිහිටි සහ වකුගඩු දීමනා ලැබීමට සුදුස්සන් මෙම වසරේ පළමු කාර්තුව තුළ හඳුනාගැනීමට නියමිත අතර ඉන් පසු ඔවුන්ට ද මෙම වැඩිකළ දීමනාව අප්‍රේල් මස 01 සිට ලබාදීමට නියමිතය.

මේ අතර මාර්තු මස 31 අවසන් වීමට නියමිතව තිබූ අස්වැසුම ප්‍රතිලාභ යටතේ අවදානමට ලක් වූ සහ සංක්‍රාන්තික කාණ්ඩයේ ගෙවීම් දෙසැම්බර් මස 31 දක්වා සිදුකරන බව රාජ්‍ය අමාත්‍යවරයා පැවසුවේය.

දැනට සංක්‍රාන්තික කාණ්ඩය සඳහා රුපියල් 2,500ක් ද අවදානමට ලක් වූ කාණ්ඩය සඳහා රුපියල් 5,000ක දීමනාවක් හිමි වන අතර ඉදිරියේදී එම කාණ්ඩ දෙක එක්කොට පවුල් ලක්ෂ 8ක පිරිස එකම අවදානමට ලක් වූ කාණ්ඩය සේ සලකා රුපියල් 5,000ක දීමනාවක් ලබාදෙන බව රාජ්‍ය අමාත්‍යවරයා වැඩිදුරටත් ස ඳහන් කළේය.

ජනාධිපති රනිල් වික්‍රමසිංහ  නිල සංචාරයක් සඳහා ඔස්ට්‍රේලියාව බලා පිටත්ව ගොස් තිබේ.

ඔස්ට්‍රේලියාවේ පර්ත් නුවර දී පැවැත්වෙන 7 වැනි ඉන්දියානු සාගර සමුළුවේ ප්‍රධාන දේශනය සිදුකිරීමට ජනාධිපතිවරයා අද (08) අලුයම ඔස්ට්‍රේලියාව බලා පිටත්ව ගිය බව ජනාධිපති මාධ්‍ය අංශය නිවේදනය කළේය.

ඉන්දියානු සාගර සමුළුව හෙට (09) සහ අනිද්දා (10) යන දෙදින තුළ ඔස්ට්‍ර්ලියාවේ පර්ත් නුවර දී පැවැත්වේ.

ඉන්දීය පදනමේ සහ ඔස්ට්‍රේලියානු රජයේ නිල ආරාධනයකට අනුව ජනාධිපති රනිල් වික්‍රමසිංහ මහතා මෙම සංචාරයට එක්වනු ඇති බව ජනාධිපති මාධ්‍ය අංශය සඳහන් කළේය.

සංචාරය අතරතුර ශ්‍රී ලංකාවට ලබාගත හැකි ආයෝජන අවස්ථා පිළිබඳව ද ජනාධිපතිවරයා විසින් සොයා බැලීමට නියමිතය.

නව වැනි පාර්ලිමේන්තුවේ පස්වැනි සැසිවාරයේ සමාරම්භක අවස්ථාව දේශපාලන වාසියක් කරගන්නට විපක්ෂ නායක සජිත් ප්‍රේමදාස දැරූ ප්‍රයත්නය අසාර්ථක වූ බව දේශපාලන ආරංචි මාර්ග පවසයි .

එම ආරංචි මාර්ග සඳහන් කරන ආකාරයට නව වැනි පාර්ලිමේන්තුවේ පස්වැනි සැසිවාරය ජනාධිපති රනිල් වික්‍රමසිංහ ගේ ප්‍රධානත්වයෙන් අද (07) පෙරවරු 10.30ට ආරම්භ වූ අතර එහිදී විපක්ෂ නායක සජිත් ප්‍රේමදාස සැලසුම් කර ඇත්තේ ජනාධිපතිවරයා ප්‍රතිපත්ති ප්‍රකාශය ඉදිරිපත් කිරීමට සැරසෙන විට එම අවස්ථාව වර්ජනය කර විපක්ෂයම පාර්ලිමේන්තු සභා ගර්භයෙන් පිටතට ගැනීමට ය.

ඒ වෙනුවෙන් ඔහු ඊයේ (06) සූම් තාක්ෂණය ඔස්සේ සමගි ජනබලවේගය සන්ධානයේ සාකච්ඡාවක් කැඳවා අදහස් දක්වා ඇති නමුත් ඊට අපේක්ෂා කළ ආකාරයේ ප්‍රතිචාරයක් ලැබී නැත.

විශේෂයෙන් සමගි ජනබලවේගය සන්ධානය නියෝජනය කරන පක්ෂ නායකයන් , සුලු පක්ෂ නායකයන් ඒ සම්බන්ධයෙන් ධනාත්මක ප්‍රතිචාරයක් දක්වා නොමැත.

එහිදී අදාළ යෝජනාව සම්බන්ධයෙන් අද (07) උදෑසන වැඩිදුරටත් සාකච්ඡා කිරීමට යෝජනා කර එම සූම් සාකච්ඡාව අවසන් කර ඇත .

අනතුරුව අද උදෑසන එකී සාකච්ඡාව ආරම්භ කර ඇතත් එම අවස්ථාව සඳහා සජබ ඇතැම් ජ්‍යෙෂ්ඨයන් ද සහභාගි ව නැති අතර , තවත් පිරිසක් පාර්ලිමේන්තු පැමිණ නොමැති බවත් පෙනීගොස් ඇත.

කෙසේ වුවත් ජනාධිපති රනිල් වික්‍රමසිංහ සිය ප්‍රතිපත්ති ප්‍රකාශය පාර්ලිමේන්තුවේදී ඉදිරිපත් කළ අවස්ථාවේ පැමිණ සිටි සජබ සන්ධානයේ මන්ත්‍රීවරුන් පිරිසෙන් කොටසක් සමග පාර්ලිමේන්තු සභා ගර්භයෙන් පිටතට යාමට විපක්ෂ නායක කටයුතු කර ඇත .

නමුත් සමගි ජන බලවේගයෙන් පාර්ලිමේන්තුවට තේරී පත්වූ මන්ත්‍රීවරුන් වන රාජිත සේනාරත්න, සරත් ෆොන්සේකා, පාඨලී චම්පික රණවක, ඉෂාක් රහුමාන් සහ කුමාර වෙල්ගම යන මන්ත්‍රීවරුන් ජනපතිගේ කතාවට සවන් දෙමින් මැතිසබයේ රැඳී සිට ඇත.

මේ සම්බන්ධයෙන් අදහස් දක්වමින් ඇතැම් මන්ත්‍රීවරුන් පවසා ඇත්තේ තම නායකයාගේ කුරුමානම වැරදුණු බවය. එසේම පක්ෂ අභ්‍යන්තරයේ තිබෙන සජිත් විරෝධය අනාවරණය වූ බවය.

මේ ආකාරයට විපක්ෂ නායක ගේ වැරදුණු කුරුමානම මධ්‍යයේ වුවත් ජනපති රනිල් වික්‍රමසිංහ ඉදිරිපත් කළ ආණ්ඩුවේ ප්‍රතිපත්ති ප්‍රකාශය පිළිබඳ සභාව කල් තැබීමේ විවාදය හෙට (08) සහ අනිද්දා (09) දෙදින තුළ පැවැත්වීමට නියමිතය.

ජනතා විමුක්ති පෙරමුණේ සහ ජාතික ජනබලවේගය පක්ෂයේ නායක අනුර කුමාර දිසානායක මන්ත්‍රීවරයා ගේ ඉන්දීය සංචාරයෙන් පසුව ඉන්දියානු ආයෝජන සඳහා එම පක්ෂ සිය එකඟතාව පළ කරනු ඇති බවට විශ්වාස කරන බව පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ පවසයි .

පසුගිය සමයේ ජවිපෙ දැක්වු ඉන්දීය විරෝධි ප්‍රතිපත්තිය හේතුවෙන් මෙරටට ආයෝජන ගණනාවක් අහිමි වු බව කී මන්ත්‍රීවරයා සාම්පුර් බලාගාරය ඊට නිදසුනක් බවද සඳහන් කරයි.

නාමල් රාජපක්ෂ මන්ත්‍රීවරයා මේ බව සඳහන් කර සිටියේ , පොදුජන පෙරමුණ විසින් සංවිධානය කරනු ලබන "සද් ජන රළ " රැස්වීම් මාලාවේ සමාරම්භක රැස්වීම අමතමිනි .

එම රැස්වීම ඊයේ (06) උදෑසන පොලොන්නරුව ගිරිතලේ ප්‍රදේශයේදී පැවැත්විණ.

අතීතයේ දී ඉන්දියානු ව්‍යප්තවාදය ගැන ජවිපෙ අද වන විට ඉන්දියානු සංචාර ගැන උදම් අනමින් සිටින බව ද මන්ත්‍රීවරයා එහිදී සඳහන් කළේය .

එහිදී නාමල් රාජපක්ෂ මන්ත්‍රීවරයා මෙසේද පැවසීය .

“ඉස්සර පන්ති පහේ ඉන්දියානු ව්‍යාප්තවාදය ගැන කතා කරපු ජවිපෙ, අද ඉන්දියානු සංචාරයක් ගිහින් උදම් අනමින් ඒ ගැන කතා කරනවා. එනිසා ජනතා විමුක්ති පෙරමුණ මේ ඉන්දියානු සංචාරයෙන් පස්සෙ මේ රටට එන ආයෝජනවලට එකගත්වය පල කරයි කියලා හිතනවා.”

මෙම අවස්ථාව සඳහා පොදුජන පෙරමුණේ ප්‍රධාන ලේකම් සාගර කාරියවසම්, තිස්ස කුට්ටිආරච්චි, ඩී.වී.චානක, ඉන්දික අනුරුද්ධ, තේනුක විදානගමේ, ජගත් සමරවික්‍රම, චින්තක මායාදුන්න ඇතුළු පොලොන්නරුව දිස්ත්‍රීක්කයේ පොදුජන පෙරමුණේ ක්‍රියාකාරීන් පිරිසක් සහභාගි වී සිටියහ.

ඉන්දියාවේ වුවමනාව, අප පත්ව සිටින තීව්‍ර ආර්ථික අර්බුදය යොදාගෙන එට්කා ගිවිසුම ද අත්සන් කරවාගෙන ශ්‍රී ලංකාව තුළ තම දේශපාලන සහ ආර්ථික ආධිපත්‍ය පතුරුවාලීම බවත් ඊට අද ශ්‍රී ලංකාවේ බොහෝ දේශපාලන පක්‍ෂ ගැතිකම් කරන හෙයින් ඔවුන් ද මෙම සැබෑ අනතුර පෙන්වා නොදෙන බවත් ජාතික නිදහස් පෙරමුණේ නායක, පාර්ලිමේන්තු මන්ත්‍රී විමල් වීරවංශ පෙන්වා දෙයි.

“ඉන්දියානු ව්‍යාප්තවාදය” ලංකාවට උගන්වනු ලැබූ දේශපාලන පක්‍ෂය ද අද නිහඬව සිටින්නේ, මේ ශ්‍රී ලංකාව අත්පත් කර ගැනීමේ ඉන්දියානු ක්‍රියාන්විතයේ ඔවුන් ද ඉතා ප්‍රබල සාමාජිකන් නිසා බවට වීරවංශ මන්ත්‍රීවරයා චෝදනා කරයි.

මන්ත්‍රීවරයා මේ බව සඳහන් කර සිටියේ පිටකෝට්ටේ පිහිටි ජාතික නිදහස් පෙරමුණේ ප්‍රධාන කාර්යාලයේදී පැවැති මාධ්‍ය හමුවකදී අදහස් දක්වමින් ය.

එහිදී වැඩිදුරටත් අදහස් දැක්වූ විමල් වීරවංශ මන්ත්‍රීවරයා මෙසේ ද සඳහන් කළේය.

“මේ වන විට ලංකාව සහ ඉන්දියාව අතර එට්කා ගිවිසුම අත්සන් කිරීම සඳහා කඩිනම් සාකච්ඡා සිදුවෙමින් පවතිනවා. ජනාධිපතිවරයා කැබිනට් පත්‍රිකාවක් මගින් විවිධ රටවල් අතර දේශපාලන-ආර්ථික ගිවිසුම් අත්සන් තැබීම් පිළිබඳ නිලධාරියෙකු පත් කිරීමට හා ඒ වෙනුවෙන් කාර්යාලයක් පිහිටුවීමට පියවර ගෙන තිබෙනවා. දැන් ඒ ඉහත කී නිලධාරියා සහ ඉන්දියානු නියෝජිතයන් අතර එට්කා පිළිබඳ සාකච්ඡා ඇරඹිලා තිබෙනවා. අපට වාර්තා වන ආකාරයට ඉතාම කඩිනමින් ශ්‍රී ලංකා සහ ඉන්දියාව අතර එට්කා ගිවිසුම අත්සන් කිරීමට නියමිතව තිබෙනවා.