පුවත්

කොළඹ කොටුවේ සිට බදුල්ල දක්වා “දුන්හිඳ ඔඩිසි” නමින් අතිසුඛෝපභෝගී ශීඝ්‍රගාමී දුම්රියක් හෙට (අප්‍රේල් 05) සිට ධාවනය කෙරෙන බව දුම්රිය නියෝජ්‍ය සාමාන්‍යාධිකාරී ගමනා ගමන එන්.ජේ. ඉඳිපොළ පවසයි.

මෙම දුම්රිය අද සිට දවසක් හැර දවසක් සිකුරාදා, ඉරිදා, අඟහරුවාදා දිනවල පෙරවරු 6:30ට කොළඹ කොටුවෙනුත්, සෙනසුරාදා, සඳුදා හා බදදා දිනවල බදුල්ලෙනුත් පිටත්වේ.

1924 අප්‍රේල් 05 වන දින බ්‍රිතාන්‍යයන් බදුල්ල දක්වා දුම්රියක් ධාවනය කර හෙට දිනට වසර සියයක් පිරීම නිමිත්තෙන් මෙම අතිවිශේෂ දුම්රිය ධාවනය කෙරන අතර, ප්‍රවාහන, මහාමාර්ග හා ජනමාධ්‍ය ඇමති ආචාර්ය බන්දුල ගුණවර්ධනගේ උපදෙස් පරිදි මෙම දුම්රිය සේවය ක්‍රියාත්මක කෙරේ.

මෙය සිහිපත් කරමින් නව මුද්දරයක් සහිත මුල් දින කවරයක් ද තැපැල් දෙපාර්තමේන්තුව විසින් හෙට දින නිකුත් කෙරෙනු ඇත.

කොළඹ කොටුවේ සිට බදුල්ල දක්වා ධාවනය කෙරෙන මෙම දුම්රියේ ගමන් ගන්නා දේශීය හා විදේශීය සංචාරකයින්ට, නැරඹීම හා ඡායාරූප ගැනීම සඳහා දර්ශනීය ස්ථාන 10ක සුළු වේලාවක් නතර කෙරෙනු ඇත.

මෙම දුම්රියේ 1 වන පන්තියේ ප්‍රවේශ පත්‍රයක් සඳහා රුපියල් 8000ක් ද, දෙවන පන්තිය සඳහා රුපියල් 6,000ක් ද තුන්වන පන්තිය සඳහා රුපියල් 5,000ක් අය කෙරෙන අතර පිටත්වීම හා පැමිණීම සඳහා අවස්ථා දෙකට ම අදාළ ප්‍රවේශ පත්‍රයක් සඳහා රුපියල් 12,000ක මුදලක් අය කෙරේ.

ඉන්ටර්නෙට් ඔස්සේ මෙහි ආසන වෙන්කර ගැනීමේ පහසුකම් පවතී.

මෙයට අමතරව බණ්ඩාරවෙල, දෙමෝදර අතර නැරඹුම් මැදිරි සහිත”ගැලැක්සෝ” නමින් නව දුම්රියක් ධාවනය කෙරෙන අතර එහි ගමන්වාර දෙකට රුපියල් 6,000ක මුදලක් අය කෙරේ.

මෙම දුම්රිය නැරඹුම් මැදිරි දෙකකින්, ලීවලින් තනන ලද නැරඹුම් මැදිරියකින් හා බෝජනාගාරයකින් සමන්විත වේ.

ජනප්‍රිය සිනමා රංගන ශිල්පිණි දමිතා අබේරත්න හා ඇගේ සැමියා පොලිස් අපරාධ පරීක්ෂණ දෙපාර්තමේන්තුව විසින් අද (04 ) අත්අඩංගුවට ගෙන තිබේ.

ඒ කොටුව මහේස්ත්‍රාත් අධිකරණයට ඉදිරියේ පෙනී සිටීමෙන් අනතුරුවය.

පුද්ගලයකු විදේශගත කරන බව පවසමින් රුපියල් ලක්ෂ තිහක මුදලක් ලබාගෙන සිදුකළ බව කියන මුදල් වංචාවක් සම්බන්ධයෙන් මෙම අත්අඩංගුවට සිදු කර ඇත.

අත්අඩංගුවට ගැනීමට පෙර ඇය මාධ්‍ය වෙත අදහස් දක්වමින් කියා සිටියේ ,

‘මම හැංගුනේ නැහැ. මේ රටේ හැංගෙන්න පුළුවන් චරිතයක් නෙමෙයි මේ දමිතා. දමිතා කියන්නේ 69 ලක්ෂයක් ඡන්දෙ ගත්තු ඒ කාලකන්නි ක්‍රමයට එරෙහිව අරගල කරපු ගැහැණියක්. මම අද අධිකරණයට භාර වෙනවා. මමත් අවුරුදු සමරනවා හිරගෙදර’ යනුවෙනි .

කෙසේ වුවත් මීට පෙර අදාළ චෝදනාව සම්බන්ධයෙන් අපරාධ පරීක්ෂණ දෙපාර්තමේන්තුව විසින් දමිතා අබේරත්න සහ ඇගේ සැමියා ව අත්අඩංගුවට ගැනීම සඳහා උත්සාහ කළ ද දින කිහිපයක් තිස්සේම එම දෙදෙනා නිවසින් බැහැරව වෙනත් ස්ථානයක සැගවී සිට තිබින.

එසේම ඇය හා සැමියාට රටින් පිටවීම තහනම් කරමින් වාරණ නියෝගයක්ද නිකුත් කර තිබිණ.

අද ඔවුන් දෙදෙනා අත්අඩංගුවට ගනුලැබූ අවස්ථාවේ ලක් මෑණිට සිදුවූයේ කුමක්ද කියා මාධ්‍යවේදීන් ප්‍රශ්න කළ විට ඊට ප්‍රතිචාර දක්වමින් දමිතා පවසා සිටියේ , ලක්මෑණි දිනුම් බවත් , රට සජිත් ප්‍රේමදාස ජයගන්නා බවත් ය.

හිටපු ජනාධිපති මෛත්‍රීපාල සිරිසේන ශ්‍රී ලංකා නිදහස් පක්ෂයේ සභාපති ධුරයේ කටයුතු කිරීම වළක්වාලමින් අද (04) අතුරු තහනම් නියෝගයක් නිකුත් කර ඇත.

කොළඹ දිසා අධිකරණය විසින් මෙම අතුරු තහනම් නියෝගය නිකුත් කර ඇත්තේ හිටපු ජනාධිපතිනි චන්ද්‍රිකා කුමාරතුංග විසින් යොමු කරන ලද පෙත්සමක් සලකා බලමිනි.

මේ අතර චන්ද්‍රිකා බණ්ඩාරනායක හිතවාදීන් ලෙස සැලකෙන මහින්ද අමරවීර, ලසන්ත අලගියවන්න හා දුමින්ද දිසානායක ඇතුළු පිරිසක් අද ශ්‍රීලනිප මූලස්ථානය වෙත ගොස් එහි සිට මාධ්‍ය හමුවක් ද පැවැත්වූහ .

එහිදී ඔවුන් චෝදනා කර සිටියේ හිටපු ජනාධිපති මෛත්‍රිපාල සිරිසේන නායකත්වය දැරූ කාලය තුළ ශ්‍රී ලංකා නිදහස් පක්ෂය අති විශාල පසුබෑමකට ලක් වූ බවත් ඔහු ඊට වගකිව යුතු බවත් පවසමින්ය .

වසර තුනකට පසු මෙම වසරේ දී 4000ක පමණ පිරිසක් ගුරු වෘත්තියට බඳවා ගැනීමට රජය කටයුතු කර ඇති බවත්, රටේ ආර්ථිකය ශක්තිමත් වීමත් සමඟ ඉදිරි වසර වන විට ගුරු පුරප්පාඩු පිරවීම වෙනුවෙන් වැඩි මුදලක් වෙන් කිරීමට කටයුතු කරන බවත් ජනාධිපති රනිල් වික්‍රමසිංහ පැවසීය.

ජනාධිපති රනිල් වික්‍රමසිංහ මේ බව සඳහන් කර සිටියේ අරලියගහ මන්දිරයේ දී අද (03) පැවති බස්නාහිර පළාත් උපාධිධාරී ගුරු පත්වීම් ප්‍රදානෝත්සවය අමතමිනි.

උපාධිධාරී ගුරුවරුන් 2320කට පත්වීම් ලබා දීම මෙහිදී සිදු කෙරුණු අතර ජනාධිපතිවරයා සංකේතාත්මකව පත්වීම් ප්‍රදානයට එක් විය.

අනතුරුව පැවති උත්සව සභාව අමතමින් ජනාධිපති රනිල් වික්‍රමසිංහ සඳහන් කළේ චරිතවත් ගුණගරුක අනාගත පරපුරක් බිහි කිරීමේ වගකීම ගුරුවරයාට පැවරෙන බවයි.

ගෞරවණීය වෘත්තියක් වූ ගුරු වෘත්තියේ ගෞරවය කෙළසා ගැනීමට කිසිවිටෙකත් කටයුතු නොකළ යුතු බව පැවසු ජනාධිපතිවරයා ගුරුවරුන් නිරතුරුව විෂය දැනුමෙන් යාවත්කාලීන වීමේ වැදගත්කම ද පෙන්වා දුන්නේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය .

ගුරුවරුන් ලෙස ඔබ බාරගන්නේ පංතිකාමරයක් නොවෙයි. ඔබ භාරගන්නේ එම පන්ති කාමරයේ සිටින සිසු සිසුවියන්ගේ අනාගතයයි. අවුරුදු 05 සිට අවුරුදු 19 වන තෙක් ශිෂ්‍ය ශිෂ්‍යාවන් කාලය ගත කරන්නේ ඔබ සමගයි. ඒ නිසා ඔවුන්ට ගෙදරින් ලැබෙන මගපෙන්වීම වගේම පාසලින් ලැබෙන මගපෙන්වීමත් ඉතා වැදගත් වෙනවා. ඒ වගකීම ඉෂ්ට කළයුත්තේ ඔබයි. ඔබට තිබෙන්නේ සිසුන්ට විෂය දැනුම ලබාදීම පමණක් නොවෙයි. මේ සිසු සිසුවියන්ගේ ජීවිතය හැඩ ගැස්වීමද සිදු කළයුත්තේ ඔබයි.

අද අන්තර්ජාලයෙන් ද විෂය දැනුම ලබාගත හැකියි. නමුත් දරුවන්ගේ චරිත ගොඩනැගීම ඒ හරහා සිදු කළ නොහැකියි. අප සියලුදෙනාගේ ජීවිත ගොඩනගා ගැනීමේදී දෙමාපියන්ගෙන් ලැබුණු මගපෙන්වීම වගේම ගුරුවරුන්ගේ ලැබුණු මගපෙන්වීමත් ඉතා වැදගත් වුණා. ගුරු වෘත්තිය ඉහළ වෘත්තියක් ලෙස සළකනු ලබන්නේ ඒ නිසයි. එම ගෞරවය ආරක්ෂා කර ගන්නා ලෙස මම ඔබ සියලුදෙනාගෙන් ඉල්ලනවා.

ඒ වගේම ගුරුවරුන් ලෙස ඔබේ දැනුම ඉතා වැදගත් වෙනවා. අද තිබෙන්නේ දිනෙන් දින දැනුම නවීකරණය වන සමාජක්. එසේ නම් ගුරුවරුන්ට තම විෂය දැනුම වැඩි කර නොගෙන කටයුතු කිරීමට අතීතයේ දී හැකි වුවත් අද එලෙස කිරීමට හැකියාවක් නැහැ. තව වසර 10කින්, 20කින් පමණ ඔබේ දැනුම ප්‍රමාණවත් ද කියා සිතා බලන්න. ඒ නිසා තමන්ගේ විෂය දැනුම ඉහළ නංවා ගැනීමට ගුරුවරුන් සෑම අවස්ථාවකම කටයුතු කළයුතුයි.

අද ගුරුවරුන් 2300ක් බඳවා ගැනීමට කටයුතු කර තිබෙනවා. තව 700කට පත්වීම් ලබාදීමට තිබෙනවා. පුරප්පාඩු අනුව තවත් ගුරුවරුන් 1000ක් පමණ බඳවා ගැනීමට සැලසුම් කර තිබෙනවා. ඒ අනුව මෙම වසරේ ගුරු වෘත්තීයට 4000ක් පමණ බඳවාගෙන තිබෙනවා. වසර තුන හතරකින් පසුව තමයි මෙම බඳවා ගැනීම් සිදු කිරීමට හැකියාව ලැබුණේ. කොවිඩ් වසංගතය වගේම ආර්ථික කඩා වැටීම හමුවේ මේ සියලු බඳවා ගැනීම් නැවතී තිබුණා.

රටේ ආර්ථික වර්ධන වේගය සෘන අගයකට පත්ව තිබුණා. නමුත් රජය ගෙන ගිය නිවැරදි ආර්ථික කළමනාකරණය හේතුවෙන් අද රුපියලේ වටිනාකම ඉහළ ගොස් තිබෙනවා. ඒ අනුව ආර්ථිකය ශක්තිමත් වී තිබෙනවා. ඒ නිසා අද මෙම බඳවා ගැනීම් සිදු කිරීමට අපට අවස්ථාව ලැබී තිබෙනවා.

පසුගිය වසරේ ඩොලරයට සාපේක්ෂව රුපියලේ අගය 370ක් බවට පත්ව තිබුණා. අද වන විට ඩොලරයට සාපේක්ෂව රුපියල 300ක අගයක පවතින අතර එය ඉදිරියේදී 280ක් දක්වා පහළ ගෙන ඒමට බලාපොරොත්තු වෙනවා. එවිට ජනතාවගේ අතට ලැබෙන මුදල ශක්තිමත් වෙනවා.

අද ආණ්ඩුවේ වැඩකටයුතු සඳහා මුදල් සොයාගත යුතුව තිබෙනවා. අද අපි ගමන් කරන්නේ දුෂ්කර මාර්ගයක වුවද ඉදිරියේ දී ආර්ථික දියුණුවක් ඇති කර ගැනීමට හැකියාව ලැබෙනවා. අපට මේ කාලයේ රාජ්‍ය සේවකයන්ගේ වැටුප් වැඩි කිරීමට මෙන්ම දීමනා වැඩි කිරීමට හැකියාව ලැබුණා. ඒ වගේම අස්වැසුම ප්‍රතිලාභ තුන් ගුණයකින් වැඩි කිරීමට මෙන්ම සිංහල අවුරුදු සමයේ වී වලට හොඳ මිලක් ලබාදීමට හැකියාව ලැබුණා. ඒ වගේම ආර්ථිකයේ ඇති වන දියුණුව සමඟ ලබන වසර වන විට ගුරුවරුන් බඳවා ගැනීම සඳහා මීට වඩා වැඩි මුදලක් අමාත්‍යාංශයට ලබාදීමට අප කටයුතු කරනවා.

තමන් ඕනෑම ආකාරයක විවාදයක් සඳහා සූදානම් බව විපක්ෂ නායක සජිත් ප්‍රේමදාස පැවසීය.

ජන හමුවකදී ඔහු මේ බව ප්‍රකාශ කර ඇත.

මේ මොහොත වන විට රටේ ප්‍රශ්න ගැන විවාදයක් අවශ්‍ය බවට සමාජයේ කතාවක් යන බවත් එවැනි විවාදයක් සිදු විය යුතු බවට තමා පිළිගන්නා බවද ඔහු එහිදී වැඩිදුරටත් සඳහන් කර ඇත.

විවාද පැවැත්වීම ප්‍රජාතන්ත්‍රවාදී සමාජයක උසස් ගුණාංගයක් බැවින් තමා ඕනෑම විවාදයකට සූදානම් බවද විපක්ෂ නායකවරයා පවසා තිබේ.

විපක්ෂ නායක මේ ප්‍රකාශය සිදුකර ඇත්තේ , සජබ මන්ත්‍රීවරුන් විසින් අවස්ථා කිහිපයක්ම ආර්ථිකය සම්බන්ධයෙන් විවාදයක් කිරීමට ජාතික ජනබලවේගය පක්ෂය ට අභියෝග කිරීමත් ඊට ජාතික ජනබලවේගය පක්ෂයේ විධායක සභික සුනිල් හඳුන්නෙත්ති දැක්වූ ප්‍රතිචාරයට, ප්‍රතිචාර දැක්වීමක් වශයෙනි .

සජබ පාර්ශ්වය ආර්ථිකය සම්බන්ධයෙන් වන වැඩ පිළිවෙල පිළිබඳව තම පක්ෂයේ ආර්ථික කමිටුව සහ ජාතික ජනබලවේගයේ ආර්ථික කමිටුව අතර විවාදයක් වෙනුවෙන් අභියෝග කළ අතර ඊට ජාජබ විධායක සභාව නියෝජනය කරන සුනිල් හඳුන්නෙත්ති ප්‍රතිචාර දැක්වීය.

එහිදී ඔහු සඳහන් කර සිටියේ ජාජබ ආර්ථික කමිටුව සජබ අභියෝගය බාරගන්න සූදානම් බවත් කෙසේ වුවත් පක්ෂ නායකයන් දෙදෙනා අතර විවාදයක් පැවැත්වීම වඩා වැදගත් වන බවත් ය.

සජබ ආරංචි මාර්ග සඳහන් කරන්නේ එම ප්‍රතිචාරය පිළිගනිමින් සජබ නායක මෙම ප්‍රකාශය සිදුකළ බවය.

රටට හිතකර තරගකාරී ආයෝජන අවස්ථා ඇති කරමින් ශක්තිමත් ආර්ථිකයක් බිහිකරීමට කටයුතු කරන බව ජනාධිපති රනිල් වික්‍රමසිංහ ප්‍රකාශ කළේය.

ශ්‍රී ලංකාවේ ආර්ථිකය නංවාලීම සඳහා ආයෝජන මණ්ඩලය යටතේ ඇති සමාගම් සිදු කළ සුවිශේෂී කාර්යභාරය වෙනුවෙන් සිය කෘතඥතාව පිරිනමන බව ද ජනාධිපතිවරයා කියා සිටියේය.

ජනාධිපති රනිල් වික්‍රමසිංහ මේ බව සඳහන් කර සිටියේ ජනාධිපති කාර්යාලයේදී ඊයේ (02) පැවැති ආයෝජන මණ්ඩල සම්මාන උළෙල අමතමිනි.

ආයෝජන මණ්ඩලයේ 45 වැනි සංවත්සරය නිමිත්තෙන් පළමු වරට මෙම සම්මාන උළෙල සංවිධානය කර තිබු අතර ඍජු විදේශ ආයෝජන සහ අපනයන කාර්ය සාධනය සඳහා සිදු කර ඇති දායකත්වය වෙනුවෙන් ආයෝජන මණ්ඩලය යටතේ පවතින සමාගම් වෙත සම්මාන 30 ක් පිරිනැමීම ජනාධිපතිවරයා අතින් සිදු වූ අතර දිගුකාලයක් පුරා ක්‍රියාකාරිව පැවැති සමාගම් සඳහා ද විශේෂ ඇගයීමක් සිදු කෙරිණ.

මීට අමතරව, පුද්ගල මට්ටමින් ශ්‍රී ලංකා ආර්ථිකයට ලබාදුන් සුවිශේෂී දායකත්වය මත පදනම් වූ නව සම්මාන කාණ්ඩයක් යටතේ බ්‍රැන්ඩික්ස් සමූහ ව්‍යාපාරයේ ප්‍රධාන විධායක නිලධාරී අෂ්රෝෆ් ඕමාර්, මාස් හෝල්ඩිංග්ස්හි සම නිර්මාතෘ හා සභාපති දේශමාන්‍ය මහේෂ් අමලීන් සහ සෙයිල් ලංකා යාත්‍රා සමූහ ව්‍යාපාරයේ සභාපති පියරේ ප්‍රින්ජර්ස් යන මහත්වරුන් වෙත සම්මාන ත්‍රිත්වයක් ප්‍රදානය කිරීමද ජනාධිපති රනිල් වික්‍රමසිංහ අතින් සිදුවිය.

ආයෝජන මණ්ඩලයේ සභාපති දිනේෂ් වීරක්කොඩි මහතා විසින් 1981 වසරේ බියගම ආයෝජන කලාපය විවෘත කිරීමේ අවස්ථාවේදී ලබාගත් ඡායාරූපයක්, සමරු තිළිණයක් ලෙස මෙහිදී ජනාධිපතිවරයා වෙත පිළිගැන්වීය.

අනතුරුව ජනාධිපති රනිල් වික්‍රමසිංහ සම්මානලාභීන් සමඟ සමූහ ඡායාරූපයකට ද එක් විය.

පාස්කු ප්‍රහාරය සම්බන්ධයෙන් කළ ප්‍රකාශයට අදාළව නැවත හෙට (04) දිනයේ අධිකරණය හමුවේ ප්‍රකාශයක් ලබාදීමේ අවශ්‍යතාවයක් නොමැති බව හිටපු ජනාධිපති මෛත්‍රීපාල සිරිසේන අධිකරණයට දැනුම්දී ඇති බව වාර්තා වෙයි .

වාර්තා වන ආකාරයට හිටපු ජනාධිපතිවරයා සිය නීතිඥවරු මාර්ගයෙන් මෝසමක් ගොනු කරමින් මාලිගාකන්ද මහෙස්ත්‍රාත් අධිකරණය වෙත මේ බව දැනුම්දී ඇත.

පාස්කු ප්‍රහාරය සම්බන්ධයෙන් කළ ප්‍රකාශයට අදාළව මේවනවිටත් තමන් අපරාධ පරීක්ෂණ දෙපාර්තමේන්තුව හමුවේ දීර්ඝ ප්‍රකාශයක් ලබාදී ඇති බව පෙන්වාදෙමින් හිටපු ජනාධිපති මෛත්‍රීපාල සිරිසේන මෙම කරුණු දැක්වීම සිදුකර තිබෙන බවත් වාර්තා වෙයි .

කොළඹ කලාපයේ පිහිටි මුස්ලිම් පාසල්වල තිබෙන ගැටළු පිළිබඳ සොයා බලා ඒවාට කඩිනම් විසඳුම් ලබා දෙන ලෙස ජනාධිපති රනිල් වික්‍රමසිංහ මහතා අදාළ නිලධාරීන්ට උපදෙස් දුන්නේය.

ජනාධිපති රනිල් වික්‍රමසිංහ මෙම උපදෙස් ලබා දුන්නේ කොළඹ කලාපයේ මුස්ලිම් පාසල් මුහුණ දී තිබෙන ගැටළු පිළිබඳ ජනාධිපති කාර්යාලයේ දී ඊයේ (02) පැවැති සාකච්ඡාවට එක් වෙමිනි.

විදේශ කටයුතු අමාත්‍ය ජනාධිපති නීතීඥ අලි සබ්‍රි ඇතුළු පාසල් විදුහල්පතිවරුන් සහ මුස්ලිම් ප්‍රජාව නියෝජනය කරන සංවිධාන කිහිපයක නියෝජිතයින් මෙම සාකච්ඡාවට එක්ව සිටී අතර කොළඹ කලාපයේ මුස්ලිම් පාසල් මුහුණ දී තිබෙන අභියෝග පිළිබඳව එහිදී ඔවුන් ජනාධිපතිවරයාව දැනුවත් කළහ.

ගුරු පුරප්පාඩු, පන්ති කාමර හිඟය සහ ඉඩ පහසුකම් ප්‍රමාණවත් නොවීම, ඉස්ලාම් දහම සිංහලෙන් ඉගැන්වීමේ දුෂ්කරතා සහ මුස්ලිම් ප්‍රජාව බහුතරයක් වෙසෙන ප්‍රදේශවල මුස්ලිම් පාසල් නොමැතිකම වැනි ගැටළු පිළිබඳ ‍මෙහිදී අවධානය යොමු කෙරිණි.

ආසන්න වශයෙන් මුස්ලිම් සිසුන් 40,000 ක් පමණ සිංහල මාධ්‍යයෙන් අධ්‍යාපනය ලබන අතර සිංහල භාෂාවෙන් ඉස්ලාම් දහම ඉගැන්වීමේ නිපුණතාවක් සහිත ගුරුවරුන්ගේ හිඟය පියවීම පිළිබඳවද සාකච්ඡා කෙරිණි.

තවද, කොළඹ මුස්ලිම් පාසල් 19ක ආසන්න වශයෙන් ගුරුවරුන් 200 ක පමණ හිඟයක් පවතින බව විදුහල්පතිවරුන් සහ සංවිධාන නියෝජිතයෝ පෙන්වා දුන් අතර, එහිදී ජනාධිපතිවරයා අධ්‍යාපන අමාත්‍යාංශ නිලධාරීන්ට උපදෙස් ලබා දුන්නේ අදාළ ගුරු පුරුප්පාඩු සපුරාලීම සඳහා සුදුසුකම් ලත් ගුරුවරුන් හඳුනාගෙන අවශ්‍ය පත්වීම් සිදු කරන ‍ලෙසයි.

මීට අමතරව, කොළඹ දිස්ත්‍රික්කයේ ඇතැම් ප්‍රදේශවල මුස්ලිම් පාසල් නොමැතිකම හේතුවෙන් මුස්ලිම් ජාතික සිසුන්ට අධ්‍යාපන කටයුතුවල නිරත වීමට නොහැකි වීම කෙරෙහිද අවධානය යොමු විය. ඉඩකඩ ප්‍රමාණවත් නොමැති පාසල් සුදුසු ස්ථාන වෙත ගොනයාම සඳහා විකල්ප සොයා බලන ලෙස මෙහිදී ජනාධිපතිවරයා නාගරික සංවර්ධන අධිකාරියේ නිලධාරීන්ට උපදෙස් දුන්නේය.
ගොඩනැගිලි හිඟයට පිළියම් යෙදීම සඳහා පරිත්‍යාගශීලීන්ගේ ආධාර මත නව පාසල් ගොඩනැගිලි ඉදිකිරීමට ඇති බාධා මඟහරවා ගැනීම පිළිබඳවද මෙහිදී අවධානය යොමු විය.

සාකච්ඡාවේදී මතු වූ කරුණු පිළිබඳ වැඩිදුරටත් සොයා බලා වාර්තා කරන ලෙස අධ්‍යාපන අමාත්‍යාංශයේ සහ නාගරික සංවර්ධන අධිකාරියේ නිලධාරීන්ට උපදෙස් ලබාදුන් ජනාධිපතිවරයා මුස්ලිම් පාසල් මුහුණ දෙන අභියෝග පිළිබඳ තවදුරටත් සමාලෝචනය කිරීම සඳහා මෙම මස අවසානයේදී යළි සාකච්ඡාවක් කැඳවන බවද සඳහන් කළේය.

උසස් පෙළ සමත් සිසුන් සඳහා වෘත්තීය පුහුණු වැඩසටහන් ආරම්භ කිරීමේ වැදගත්කම ජනාධිපතිවරයා පෙන්වා දුන්නේය.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානි සාගල රත්නායක, බස්නාහිර පළාත් ආණ්ඩුකාර මාර්ෂල් ඔෆ් ද එයාර් රොෂාන් ගුණතිලක, ජනාධිපති ලේකම් සමන් ඒකනායක, අධ්‍යාපන අමාත්‍යාංශයේ ලේකම් තිලකා ජයසුන්දර යන මහත්ම මහත්මීහු බස්නාහිර පළාත් අධ්‍යාපන නිලධාරීන්, නාගරික සංවර්ධන හා නිවාස අමාත්‍යාංශයේ නියෝජිතයින්, නාගරික සංවර්ධන අධිකාරියේ නිලධාරීන්, පාසල් විදුහල්පතිවරුන්, පාසල් සංවර්ධන කමිටු සාමාජිකයින්, මුස්ලිම් සංවිධාන නියෝජිතයින් ඇතුළු පිරිසක් මෙම සාකච්ඡාවට එක්ව සිටියහ.

පැවති ගෝඨාභය රාජපක්ෂ රජය සමයේ කොවිඩ්-19 වසංගත තත්ත්වය හමුවේ ක්‍රියාත්මකකළ මළසිරුරු ආදාහනය කිරීමේ අනිවාර්ය ප්‍රතිපත්තිය සම්බන්ධයෙන්, ශ්‍රී ලංකාවේ ලාබාලතම කැබිනට් අමාත්‍යවරයා වන, ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන් මුස්ලිම් ප්‍රජාව ගෙන් සමාව අයැද සිටියේය.

තොණ්ඩමන් අමාත්‍යවරයාගේ මෙම අනපේක්ෂිත ප්‍රතිචාරය දක්නට ලැබුණේ, 2024 අප්‍රේල් 02 වන අඟහරුවාදා දින හැටන් නගරයේ ඔහුගේ ප්‍රධානත්වයෙන් පැවති ඉෆ්තාර් හමුවක් අතරතුරදී ය.

උක්ත ප්‍රතිපත්තිය නිසා මුස්ලිම් ප්‍රජාවට මුහුණපෑමට සිදු වූ අපහසුතා පිළිගත් අමාත්‍යවරයා ඒ පිළිබඳව සමාව අයැද සිටියේ ය. තමා අමාත්‍යවරයකු වශයෙන් වැඩ භාර ගැනීම සිදුවූයේ ඉකුත් වර්ෂයේ ජනවාරි මස වූව ද, තමාට පෙර කුමන පුද්ගලයකු එකී අමාත්‍ය ධුරයේ ක්‍රියාකළ ද, වර්තමානයේ ජල සම්පාදන කටයුතුවලට වගකියන අමාත්‍යවරයා ලෙස තමා එහි වගකීම භාරගැනීම වැදගත් බව ද හෙතෙම පවසා සිටියේ ය.

හිටපු ජනාධිපති ගෝඨාභය රාජපක්ෂගේ අනිවාර්ය ආදාහන ප්‍රතිපත්තිය ක්‍රියාත්මක කරනු ලැබුවේ, කොවිඩ්-19 තත්ත්වයෙන් මරණයට පත් වූ පුද්ගලයන් භූමදානය කිරීමෙන් ජල සැපයුම් පද්ධති අපවිත්‍ර වේ යැයි මතයක් ඉදිරිපත් වීම නිසා ය. මෙම ප්‍රතිපත්තිය ක්‍රියාත්මක කරනු ලැබුවේ, එවන් අවදානමක් සිදුනොවන බවට, ලෝක සෞඛ්‍ය සංවිධානයේ මතය ඇතුළු විවිධ විද්‍යාත්මක මත ඉදිරිපත් වී තිබූ පසුබිමක ය.

භූමදානය කිරීම සම්බන්ධයෙන් පැවති රජයේ මතය මේ වන විට ශ්‍රී ජයවර්ධනපුර විශ්ව විද්‍යාලයේ විශේෂඥයන් පිරිසක් විසින් සිදුකරන ලද අධ්‍යයනයක නව විද්‍යාත්මක ප්‍රතිඵල හමුවේ අභියෝගයට ලක්ව ඇති අතර, ඊට යාවත්කාලීනයක් ජල සම්පාදන හා වතු යටිතල පහසුකම් සංවර්ධන අමාත්‍යංශය යටතේ ඇති, පේරාදෙණිය විශ්ව විද්‍යාලයේ ජල තාක්ෂණය සඳහා ඒකාබද්ධ පර්යේෂණ සහ ආදර්ශන මධ්‍යස්ථානය (JRDC) විසින් එක්කර ඇත. එකී මුල් අධ්‍යයනයට මෙම යාවත්කාලීනය එක්කරනු ලැබුවේ තොණ්ඩමන් අමාත්‍යවරයා ඉකුත් වසරේ විෂයභාර අමාත්‍යවරයා ලෙස පත්වීමෙන් පසු ඔහුගේ උපදෙස් පරිදි ය.

ශ්‍රී ජයවර්ධනපුර විශ්ව විද්‍යාලයේ විශේෂඥයන් පිරිස විසින් දියත්කළ මුල් අධ්‍යයනයට මූල්‍ය සහාය ලබා දුන්නේ ජල සම්පාදන අමාත්‍යංශයෙන් වන අතර, සාර්ස්-කොව්-2 (SARS-CoV-2) වෛරසය ශ්‍රී ලංකාවේ විවිධ ප්‍රදේශවල මතුපිට හා අපජලය පවතින ස්ථානවල තිබේ දැයි හඳුනා ගැනීම එහි අරමුණ විය. මෙම පර්යේෂණය සිදුකරනු ලැබුවේ 2021 අගෝස්තු සහ දෙසැම්බර් යන මාස අතර කාලයේ වන අතර, ආදාහනය කිරීමේ අනිවාර්ය ප්‍රතිපත්තියට හේතු පාදක වූ ජලය හරහා වෛරසය සම්ප්‍රේෂණය වීමේ අවදානමක් පවතින්නේ යැයි පැවති මතයේ වලංගුභාවය පරීක්ෂා කිරීම ඉන් සිදුවිය.

මෙම අධ්‍යයනය අගයමින්, කොවිඩ් ආසාදිත මළසිරුරු භූමදානය කිරීමෙන් භූගත ජලයට සිදුවන බලපෑම විශ්ලේෂණය කිරීම සඳහා පරිපූර්ණ සමාලෝචන අධ්‍යයනයක් සිදුකිරීමට JRDC ආයතනය කටයුතු කළේය. එහි ප්‍රතිඵල මෙම වර්ෂයේ (2024) ප්‍රකාශයට පත් කරමින්, වසංගත තත්ත්වය පැවති සමයේ නිසිපරිදි භූමදානයකළ මළසිරුරු වලින් කිසිඳු භූගත ජල දූෂණයක් සිදුනොවන බවට එම ආයතනය නිගමනය කළේය. මුද්‍රා තබන ලද මෘත ශරීර අඩංගු මළු ගැඹුරු ලෙස භූමදානය කිරීම ඇතුළු නිසි භූමදාන ක්‍රමවේදයක් අනුගමනය කිරීම හරහා විධිමත් ලෙස පාරිසරික දූෂණයක් සිදුවීමේ අවදානම අවම කර ගත හැකි බවට එම අධ්‍යයනය අවධාරණය කළේය.

විවිධ ජල සම්පත්වල තිබී හමු වූ සාර්ස්-කොව්-2 හි රයිබොනියුක්ලික් අම්ල (SARS-CoV-2 RNA) එසේ ජලයට එක්ව තිබෙන්නේ මෘත දේහ භූමදානය කිරීමෙන් නොව, ආසාදිත පුද්ගලයන්ගේ මළපහ සහ මුත්‍රාවලින් බවට වැඩිදුරටත් එම අධ්‍යයනය විසින් පෙන්වා දුන් අතර, එමඟින් ආසාදිත මෘත දේහ ආදාහනය කිරීමේ අනිවාර්ය ප්‍රතිපත්තියට බලපෑ මත තවදුරටත් බැහැරකළ හැකි බවට ඉන් තහවුරු විය.

වසංගත තත්ත්වය හමුවේ ක්‍රියාත්මකකළ බරපතල තීන්දු තීරණ හමුවේ පුද්ගලයන් මුහුණ පෑ දුක්කම්කටොලු සමනය කිරීම සඳහා තොණ්ඩමන් අමාත්‍යවරයාගේ සමාව අයැද සිටීම වැදගත් පියවරක් වනු ඇති අතර, එමඟින් සාක්ෂි-මත පදනම් වූ තීන්දු තීරණ ගැනීම සඳහා රජය දරන කැපවීම සහ ශ්‍රී ලංකාවේ සියලු සංස්කෘතික හා ආගමික කටයුතු වෙනුවෙන් රජයේ ගරුත්වය තවදුරටත් තහවුරු වනු ඇත.

බලහත්කාරයෙන් ආදාහනය කිරීමේ ප්‍රතිපත්තිය නිසා විශේෂයෙන් ම මුස්ලිම් ප්‍රජාවට සිදු වූ අගතියට විධිමත් අන්දමින් සමාව භජනය කරමින්, මෙම අධ්‍යයනයේ සොයාගැනීම් ද සමඟ කැබිනට් පත්‍රිකාවක් නුදුරේදී ම ඉදිරිපත් කිරීමට තමා අපේක්ෂා කරන බව ද තොණ්ඩමන් අමාත්‍යවරයා පවසා සිටියේය.

Media unit

කාන්තාවකට තනිව සංචාරය කිරීමට සුදුසුම ගමනාන්ත අතරින් පළමු ස්ථානය ශ්‍රී ලංකාවට ලැබී තිබේ.

ලෝ ප්‍රකට ‘ටයිම් අවුට්’ (timeout.com) සඟරාව විසින් සිදු කරන ලද නවතම සමීක්‍ෂණ වාර්තාවකට අනුව ‍මේ පිළිබද තොරතුරු අනාවරණය කර ඇත.

තරුණ කාන්තාවන් බහු සංස්කෘතීන් සහිත රටවල් පිළිබඳ වැඩි උනන්දුවක් දක්වන අතර එහිදී කාන්තාවන්ට ඇති ආරක්ෂාව සැලකිල්ලට ගනිමින් මෙම ශ්‍රේණිගත කිරීම සිදු කර ඇත.

එම හේතුව නිසාම වැඩි වශයෙන් මෙලෙස තනිව සංචාරය සඳහා වයස අවුරුදු 28ට අඩු තරුණ පිරිස් ප්‍රියතාවක් දක්වන බව සඳහන්වේ.

කාන්තාවකට තනිව සංචාරය කිරීමට සුදුසුම ගමනාන්ත අතර දෙවන ස්ථානය පෘතුගාලයටත් තුන්වන ස්ථානය චෙකියා ජන රජයටත් හතරවන ස්ථානය ජපානයටත් ලැබී තිබේ.

කාන්තාවන්ට කිමිදීමට වඩාත් ආරක්ෂිත ස්ථාන, යුනෙස්කෝ ලෝක උරුම සහ නුවරඑළියේ චමත්කාරය, කන්ද උඩරට දුම්රිය සංචාර වැනි ආකර්ශනීය ස්ථාන හේතුවෙන් තනිව සංචාරයේ යෙදෙන විදේශීය කාන්තාවන්ට දකුණු ආසියාතික රාජ්‍යන් අතරින් ශ්‍රී ලංකාව සුදුසුම ස්ථානය ලෙස නම් කර ඇත.

මෙම ශ්‍රේණිගත කිරීමේ 05 වන ස්ථානය ග්වාතමාලාවටත්, 06 වන ස්ථානට ග්‍රීසියටත්, 07වන ස්ථානය ඔස්ට්‍රේලියාවටත් හිමිව තිබේ.

එකතු කළ අගය මත බදු (වැට්)  15% සිට 18% දක්වා වැඩි කිරීමට අදාල එකතු කල අගය මත බදු පනත යටතේ නියෝගය වැඩි ඡන්ද 36කින් පාර්ලිමේන්තුවේදී අද (02) පස්වරුවේ සම්මතවිය.

එම නියෝගයට පක්ෂව ඡන්ද 55ක් ලැබුණු අතර ඊට විරුද්ධව ලැබුණේ ඡන්ද 19ක් පමණි.

එම නියෝගය අනුමත කිරීමට සලකා බැලුණු අවස්ථාවේදී ඊට විරුද්ධ යැයි විපක්ෂයේ ප්‍රධාන සංවිධායක නීතිඥ ලක්ෂ්මන් කිරිඇල්ල  මුලසුනට දැනුම් දුන්නේය.

නියෝගය සම්බන්ධයෙන් ඡන්ද විමසීම පැවැත්වුණේ ඒ අනුවය.

මෙයට අමතරව බැංකු සංශෝධන පනත් කෙටුම්පත සහ කොළඹ වරාය නගරය ආර්ථික කොමිෂන් සභා පනත යටතේ නියෝගද මෙහිදී සම්මත විය.

සුරාබදු පනතේ විධිවිධානයන්ට පටහැනි ආකාරයෙන් මත්පැන් බලපත්‍ර නිකුත් කිරීම වළක්වාලමින් ශ්‍රේෂ්ඨාධිකරණය විසින් අද (02) අතුරු තහනම් නියෝගයක් නිකුත් කළේය.

ශ්‍රී ලංකා මත්පැන් බලපත්‍රහිමියන්ගේ සංගමය ඇතුළු පාර්ශ්ව කිහිපයක් විසින් ඉදිරිපත් කළ මූලික අයිතිවාසිකම් පෙත්සම් 03ක් සලකාබැලීමෙන් අනතුරුව ශ්‍රේෂ්ඨාධිකරණය විසින් මැයි මස 10 වනදා තෙක් බලපැවැත්වෙන පරිදි මෙම අතුරු තහනම් නියෝගය නිකුත් කර තිබේ.

පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ සංජීව ජයවර්ධන  ඇතුළු සෙසු නීතිඥවරුන් අධිකරණය හමුවේ කරුණු දක්වමින් වර්තමානයේ අවිධිමත් ආකාරයට නීතියට පටහැනි ලෙස මත්පැන් හල් බලපත්‍ර නිකුත් කිරීම සිදුවන බවට චෝදනා කළේය.

ඇතැම් බලපත්‍ර නිකුත් කිරීමේදී සුරා බදු රෙගුලාසිවල සඳහන් මූලික අවශ්‍යතා පවා උල්ලංඝනය කර තිබෙන බවත් ජනාධිපති නීතිඥ ජයවර්ධන පෙන්වා දුනි.

ඒ අනුව සුරාබදු පනතේ හා රෙගුලාසිවල සඳහන් ප්‍රතිපාදන අභිබවා ගොස් මත්පැන් බලපත්‍ර නිකුත් කිරීම තහනම් කිරීමේ නියෝගයක් නිකුත් කරන ලෙසද ජනාධිපති නීතිඥවරයා ඇතුළු සෙසු නීතිඥවරුන් අධිකරණයෙන් ඉල්ලා තිබුණි.

ඉදිරිපත් වූ සියලු කරුණු සලකා බැලූ ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල අනතුරුව මෙම නියෝග නිකුත් කෙරුණි.

අද (02) සිට දිවයිනේ සියලුම සතොස ශාඛා වෙතින් සහන මල්ලක් මිල දී ගැනීමට පාරිභෝගිකයන්ට අවස්ථාව ලබාදී තිබේ.

සතොස සභාපති පසඳ යාපා අබේවර්ධන  සඳහන් කළේ  එළඹෙන සිංහල දෙමළ අලුත් අවුරුද්ද නිමිත්තෙන් රුපියල් 4,500ක් වටිනා ආහාර ද්‍රව්‍ය 11ක් අඩංගු මෙම සහන මල්ල රුපියල් 3,420ක් වැනි සිල්ලර මිලකට මිළදී ගැනීමට මෙහිදී අවස්ථාව ලබාදී ඇති බවය.

එමෙන්ම අද සිට බිත්තරයක් රුපියල් 36 වැනි සිල්ලර මිලකට අලෙවි කිරීමටද සතොස පියවර ගෙන තිබේ.

ශ්‍රී ලංකා නිදහස් පක්ෂයේ ධූරවලින් දුමින්ද දිසානායක, ලසන්ත අලගියවන්න සහ මහින්ද අමරවීර යන මැති ඇමතිවරුන් ඉවත් කිරීම වළක්වාලමින් කොළඹ දිසා විනිසුරු සඳුන් විතාන අතුරු තහනම් නියෝගයක් අද (01) නිකුත් කළේය.

ස්වාභාවික යුක්ති මූල ධර්ම උල්ලංඝණය කරමින් නිසි විනය පරීක්ෂණයක් හෝ පැවැත්වීමකින් තොරව පක්ෂ ව්‍යවස්ථාවට පටහැනිව තමන් තනතුරු වලින් ඉවත් කිරීමට ශ්‍රී ලංකා නිදහස් පක්ෂය අනීතික සහ අත්තනෝමතික ක්‍රියා කර ඇතැයි පෙන්වා දෙමින් පෙත්සම්කරුවන් කළ ඉල්ලීම් සළකා බැලීමෙන් අනතුරුව අප්‍රේල් 08 දක්වා බලපැවැත්වෙන අන්දමට අදාළ අතුරු තහනම් නියෝගය නිකුත්කර ඇත .

අතුරු තහනම් නියෝගය සම්බන්ධයෙන් විරෝධතා ඇත්නම් පෙත්සම් යළි කැඳවන අප්‍රේල් 08 වැනිදා විරෝධතා දැක්වීමට වගඋත්තරකරුවන්ට නියම කළ දිසා විනිසුරුවරයා අතුරු තහනම් දැන්වීම් හා නොතීසි ද වගඋත්තරකරුවන් වෙත යැවීමටද නියම කළේය.

දුමින්ද දිසානයාක, ලසන්ත අලගියවන්න, මහින්ද අමරවීර විසින් ගොනු කර ඇති පෙත්සම් වල වගඋත්තරකරුවන් වශයෙන් ශ්‍රී ලංකා නිදහස් පක්‍ෂයේ සභාපති මෛත්‍රීපාල සිරිසේන, වැඩ බලන ලේකම් සාරතී දුෂ්මන්ත මිත්‍රපාල, ජ්‍යෙෂ්ඨ උප සභාපති නිමල් සිරිපාල ද සිල්වා, ජනාධිපති නීතීඥ ෆයිසර් මුස්තාපා, මහියංගන ආසන සංවිධායක කේ.පී. ගුණවර්ධන කර ඇත.

ශ්‍රී ලංකා නිදහස් පක්ෂ මූලස්ථානයේදී පසුගිය මාර්තු 30 වැනිදා පක්ෂයේ විධායක සභාව රැස්වී තමන් පක්‍ෂයේ දැරූ තනතුරු වලින් ඉවත් කිරීමට තීරණය කර ඇතැයි සඳහන් කරන එම පක්‍ෂයේ ජාතික සංවිධායක දුමින්ද දිසානායක, භාණ්ඩාගාරික ලසන්ත අලගියවන්න සහ ජ්‍යෙෂ්ඨ උප සභාපති මහින්ද අමරවීර පක්ෂයේ විධායක සභාව ගත් එම තීරණය පක්ෂ ව්‍යවස්ථාවට පටහැනි බව පෙත්සම්කරුවන් සිය පෙත්සම්වලින් පෙන්වාදී තිබේ .

ඉදිරිපත් වු කරුණු සළකා බැලීමෙන් අනතුරුව අදාළ නියෝග නිකුත් කළ විනිසුරුවරයා අදාළ පෙත්සම ලබන 08 වැනිදා යළි කැඳවීමටද නියම කළේය.

පෙත්සම්කරුවන් වෙනුවෙන් ජනාධිපති නීතිඥවරුන් වන කුවේරා ද සොයිසා, චන්දක ජයසුන්දර පෙනී සිටියහ.

නඩු තීන්දුවෙන් පසු ශ්‍රීලනිප පක්ෂ මුලස්ථානයට වෙත ගිය දුමින්ද දිසානායක සහ ලසන්ත අලගියවන්න විශේෂ මාධ්‍ය හමුවක් කැඳවා කරුණු පැහැදිලි කිරීමක් කළහ.

බී ලූනු, හාල්මැස්සන් ඇතුළු ආහාර ද්‍රව්‍ය ආනයනය කිරීමේදී ආනයනකරුවන් අයථා ලෙස ලාභ උපයා ගැනීම් සම්බන්ධයෙන් ප්‍රශ්න කිරීම සඳහා ආයතන පහක් පාර්ලිමේන්තුවේ ක්‍රම සහ විධි පිළිබඳ පාර්ලිමේන්තු කාරක සභාව හමුවට හෙට (02) කැඳවනු ලැබ තිබේ.

පාර්ලිමේන්තුවේ ක්‍රම සහ විධි පිළිබඳ පාර්ලිමේන්තු කාරක සභාව හමුවට මෙසේ කැඳවා තිබෙන්නේ වෙළෙඳ හා ආයෝජන ප්‍රතිපත්ති දෙපාර්තමේන්තුව,
පාරිභෝගික සේවා අධිකාරිය,ශ්‍රී ලංකා රේගුව, ජනලේඛන හා සංඛ්‍යා ලේඛණ දෙපාර්තමේන්තුව, සහ කොබ්බෑකඩුව ගොවි පර්යේෂණ දෙපාර්තමේන්තුව යන ආයතනය.

රජයේ මුදල් පිළිබඳ කාරක සභාවේ නිර්දේශ මත පදනම්ව ශ්‍රී ලංකා මහ බැංකුවේ වැටුප් වැඩිවීම සමාලෝචනය කිරීම සඳහා මුදල් ආර්ථික ස්ථායීකරණ සහ ජාතික ප්‍රතිපත්ති අමාත්‍යවරයා ලෙස ජනාධිපති රනිල් වික්‍රමසිංහ විසින් ස්වාධීන පාරිශ්‍රමික කමිටුවක් පත් කර තිබේ.

රජයේ මුදල් කාරක සභාව හා ශ්‍රී ලංකා මහ බැංකුව අතර සිදු වූ සියලු ලිපි ගණුදෙනු මත පදනම්ව, ශ්‍රී ලංකා මහ බැංකුවේ ස්වාධීනත්වයට හානියක් නොවන පරිදි ගැටළුවට සාධාරණ විසඳුමක් සහිතව සහ ශ්‍රී ලංකා මහ බැංකුවේ 2024-2026 වැටුප් සංශෝධනය ශීර්ෂය සහිත 2024-03-16 දිනැති ශ්‍රී ලංකා මහ බැංකුවේ ලිපියට විශේෂ අවධානයක් යොමු කරමින් සාකච්ඡාවට තුඩු දී ඇති වැටුප් වැඩි කිරීම සලකා බැලීම සඳහා මුදල් අමාත්‍යවරයා ලෙස ජනාධිපතිවරයා විසින් මෙම කමිටුව පත් කර තිබේ.

දිනේෂ් ස්ටීවන් වීරක්කොඩි, අර්ජුන හේරත්, ආචාර්ය ඉන්ද්‍රජිත් කුමාරස්වාමි, සුධර්මා කරුණාරත්න, ඇන්තනී නිහාල් ෆොන්සේකා, අනුෂ්ක එස්. විජේසිංහ, දුමින්ද හුලංගමුව යන අය මෙම කමිටුවේ සාමාජිකයන් ලෙස පත් කර ඇත.

ශ්‍රී ලංකා මහබැංකුවට අදාළ මෙන්ම විශේෂිත කාර්ය මණ්ඩලවල ප්‍රවීනත්වය ප්‍රමුඛ කර සියළු කාර්ය මණ්ඩල ශ්‍රේණිවල පාරිශ්‍රමික සාධාරණ ලෙස ගැලපුම් කිරීම මෙම කමිටුව විසින් කරනු ඇති බවට රජයේ මුදල් කාරක සභාව අපේක්ෂා කරයි.

වෘත්තීය කාර්ය මණ්ඩලයට වැටුප් තීරණය කිරීමේ ක්‍රමවේදය වෘත්තීය නොවන සහ සෙසු කාර්ය මණ්ඩලයෙන් වෙන් කළ යතු බවට ද දැඩි ලෙස නිර්දේශ කර තිබේ.

අනුගත සංශෝධනවලදී ශ්‍රී ලංකා මහ බැංකු කාර්ය මණ්ඩල පාරිශ්‍රමික, විනිවිදයනසුළු ක්‍රමවේදයකට අනුව සිදු කිරීම මෙම කමිටුව විසින් කළ යුතු බවට රජයේ මුදල් කාරක සභාව ද නිර්දේශ කරයි.

ඒ පිළිබඳ වාර්තාව සති 04ක් ඇතුළත රජයේ මුදල් කාරක සභාව වෙත ඉදිරිපත් කරන ලෙසත්, ලැබී ඇති කරුණු මත අන්‍යෝන්‍යව පිළිගත් විසඳුමක් ලැබෙන තුරු වැටුප් වැඩිවීම ශ්‍රී ලංකා මහ බැංකුව විසින් කල්දමන ලෙසත් රජයේ මුදල් කාරක සභාව නිර්දේශ කරයි.

රටේ පැවති ආර්ථික අර්බුදය විසඳීම සඳහා සිටින දක්ෂතම සහ සුදුසුම නායකයා ජනාධිපති රනිල් වික්‍රමසිංහ මහතා බව මේ වන විට ලබා ඇති ප්‍රගතියෙන් තහවුරු වන බවත් එබැවින් ඒ මහතාගේ නායකත්වය ඉදිරියට ද රටට අවශ්‍ය බවත් මුදල් රාජ්‍ය අමාත්‍ය ශෙහාන් සේමසිංහ පැවසීය.

මේ වන විට ලබා ඇති ප්‍රගතිය හමුවේ ඕනෑම අයෙකුට රට පාලනය කළ හැකි බව ඇතැමුන් විශ්වාස කිරීමට පෙළඹී ඇතත් එය නිවැරදි නොවන බව ද මුදල් රාජ්‍ය අමාත්‍යවරයා සඳහන් කර සිටියේය.

මුදල් රාජ්‍ය අමාත්‍ය ශෙහාන් සේමසිංහ  මේ බව සඳහන් කර සිටියේ 'ස්ථාවර රටකට සැවොම එක මඟකට' මැයෙන් අද (01) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

ලක්ෂ 24ක් සඳහා අස්වැසුම ප්‍රතිලාභය ලබාදීමේ කටයුතු අවසන් කර ඒ පිළිබඳව පසුවිපරම් සමීක්ෂණයක් සිදු කිරීමට බලාපොරොත්තු වන බව ද මුදල් රාජ්‍ය අමාත්‍ය ශෙහාන් සේමසිංහ පැවසීය.

එහිදී වැඩිදුරටත් අදහස් දැක්වූ රාජ්‍ය අමාත්‍යවරයා මෙසේ ද සඳහන් කළේය.

අස්වැසුම දෙවැනි අදියර සඳහා අයදුම්පත් කැඳවීමෙන් පසුව ඒ සඳහා ලක්ෂ 04ක පමණ අයදුම්පත් ප්‍රමාණයක් ලැබෙනු ඇති බවට අප අපේක්ෂා කරනවා. ඒ අනුව ලක්ෂ 24ක් සඳහා අස්වැසුම ලබාදීම සම්පූර්ණ කිරීමට නියමිතව තිබෙනවා. නමුත් පසුගිය මැයි මාසයේ සිට පළමුවර අස්වැසුම සඳහා අයදුම් කල ලක්ෂ 34ක ප්‍රමාණය පිළිබඳව ද නැවත සමීක්ෂණයක් සිදු කරන බව පැවසිය යුතුයි. ඒ වගේම අලුතින් අයදුම්පත්‍ර යොමු කල ලක්ෂ 04ක ප්‍රමාණය සම්බන්ධව ද සම්පූර්ණ සමීක්ෂණයක් ද සිදු කෙරෙනවා. අප එය සිදු කරන්නේ මෙම සහ‍නාධාරය ලැබිය යුතු සුදුසුම කණ්ඩායම තෝරාගැනීමේ ක්‍රමවේදය තවදුරටත් ශක්තිමත් කර ගැනීම සඳහායි.

එමෙන්ම අස්වැසුම ප්‍රතිලාභීන් ලක්ෂ 24ක් තෝරාගැනීමෙන් පසු ඔවුන් පිළිබඳව පසුවිපරම් සමීක්ෂණයක් සිදු කිරීමට ද අප බාලාපොරොත්තු වනවා. එහි දී අස්වැසුම මඟින් ලබාදුන් මුදල් ඔවුන් විසින් කුමන කටයුත්තක් සඳහා වියදම් කලා ද ? යන්න සහ ඉදිරියේ දී සවිබල ගැන්වීමේ වැඩසටහනකට මෙය කෙතෙක් දුරට සහයෝගය ලබා දෙනවා ද ? සහ ඔවුන් ලැබූ ප්‍රතිලාභය කුමක් ද යන්න පිළිබඳව විශේෂ අවධානයක් යොමු කිරීමට නියමිතයි.

අඛණ්ඩව කාර්තු 06ක් සෘණ ආර්ථික වර්ධන වේගයක් තිබුණු රටක් මේ වන විට යහපත් තත්ත්වයකට ගෙන ඒමට අප කටයුතු කලා. 2023 තුන්වන සහ හතරවන කාර්තුවල ආර්ථිකය ප්‍රසාරණය වීම ඇරඹුණා. ජනාධිපති රනිල් වික්‍රමසිංහ මහතා සහ රජය ජාත්‍යන්තර මූල්‍ය අරමුදල සමඟ අනෙකුත් මූල්‍ය පහසුකම් ලබාදෙන ආයතන සමඟ අත්වැල් බැඳගෙන කටයුතු කළහැකි පිළිගත් මූල්‍ය විනයක් තුළ රටේ ආර්ථිකය ගමන් කරවීම හේතුවෙන් මෙම තත්ත්වයට පත්වීමට හැකි වූ බව සඳහන් කළ යුතුයි. එහිදී ජනතාවට අපහසුතා පැවතියත් මේ වන විට එම තත්ත්වය ක්‍රමානූකූලව අඩුවෙමින් පවතිනවා.

ඒ අනුව ඉකුත් මාසයේ දී උද්ධමනය 0.9%කින් අඩු වී තිබෙනවා. රුපියල තවදුරටත් ශක්තිමත් වීම තුළ එහි වාසිය පාරිභෝගිකයාට ලබාදීමට අවශ්‍ය පසුබිම රටතුළ නිර්මාණය වෙමින් පවතින බව ද අප විශ්වාස කරනවා. අද වන විට මිල ගණන් ස්ථාවර වෙමින් පවතිනවා.

ආර්ථිකය සම්බන්ධයෙන් විවිධ පුද්ගලයින් යම් කාරණා හුවා දක්වමින් විවිධ විවේචන සිදු කළා. නමුත් ඒවා සාධාරණ නොවන බව මේ වන විට රටේ ජනතාවට ඔප්පු වී තිබෙනවා. ඒ සඳහා ජනාධිපති රනිල් වික්‍රමසිංහ මහතා ලබා දෙන නායකත්වය ඇගයිය යුතුයි. රටේ පැවති ආර්ථික අර්බුදය විසඳීම සඳහා සිටින දක්ෂතම සහ සුදුසුම නායකයා ජනාධිපති රනිල් වික්‍රමසිංහ මහතා බව මේ වන විට ලබා ඇති ප්‍රගතියෙන් තහවුරු වනවා. ඔහු ඉතා දක්ෂ ලෙස ආර්ථික අර්බුදය කළමනාකරණය කළා. එබැවින් ඒ මහතාගේ නායකත්වය ඉදිරියට ද රටට අවශ්‍යයි.

මේ වන විට රට ලබා ඇති ප්‍රගතිය හමුවේ ඕනෑම අයෙකුට රට පාලනය කල හැකි බවට ඇතැමුන් විශ්වාස කිරීමට පෙළඹී තිබෙනවා. නමුත් එය වැරදි අදහසක් බව කිව යුතුයි.
දැන් රට සාමාන්‍ය තත්ත්වයට පැමිණ ඇති නිසා ඇතැමුන් මේ අකාරයට විශ්වාස කරනවා විය හැකියි. නමුත් එවැනි තත්ත්වයක් තවමත් නැහැ.

දැනට මේ පවතින ස්ථාවරත්වය ලබා ඇත්තේ ඉතාම හොඳ කළමනාකරණය සහ සෘජු තීන්දු ගැනීම තුළ මෙන්ම ජාත්‍යන්තරයේ විශ්වාසය දිනා ගැනීම හරහායි. නමුත් එය ඕනෑම අයෙකුට කළ හැකි දෙයක් නොවෙයි. වත්මන් වැඩපිළිවෙල තුළ ඉදිරියට ගියහොත් 2024 වර්ෂයේ දී 2% ඉක්ම වූ ආර්ථික වර්ධන වේගයක් දක්වා ගමන් කළ හැකි බවට දැඩි විශ්වාසයක් තිබෙනවා.

තව ද විනිමය අනුපාතය ශක්තිමත් වුව ද, උද්ධමනය 70% සිට 5% දක්වා අඩු වූව ද, මිල අඩු වීමේ වාසිය ජනතාවට නොලැබෙන බවට ජනතාව විසින් මැසිවිලි නඟනවා. ඒ කලු කඩ මාෆියාව විසින් මිල පාලනයකට යටත් නොකිරීම නිසා මෙය සිදු වන බව සඳහන් කල යුතුයි. වෙළඳ අමාත්‍යවරයා විසින් මෙම හේතුව පදනම් කර ගනිමින් ලබන සතියේ සිට තොග මිල ගණන් ජනතාව වෙත සති පතා දැනුම් දීමට කටයුතු කරන බවට තීන්දුවක් ගෙන තිබෙනවා. ඉන් පසු සිල්ලර මිල ගණන් පිළිබඳව ජනතාවට අවබෝධයක් ලබාගත හැකියි.

එමෙන්ම ණය ප්‍රතිව්‍යුහගත කිරීමේ වැඩසටහන ද අද වනවිට විශාල ප්‍රගතියක් ලබා තිබෙනවා. ජාත්‍යන්තර මූල්‍ය අරමුදල සමඟ දෙවන සමාලෝචනය සති දෙකකට පෙර අවසන් කලා. මේ වන විට ඒ පිළිබඳව කාර්ය මණ්ඩල මට්ටමේ එකඟතාවයකට පැමිණ තිබෙනවා. එය තුන්වන වාරිකය ලබාගැනීම සඳහා අතිශයින් පිටිවහලක් බවට පත් වනවා.

රාජ්‍ය ත්‍යාග නීතිවිරෝධී ලෙස අලෙවි කිරීමේ සිද්ධිය සම්බන්ධයෙන් සිරගතව සිටින පාකිස්තානයේ හිටපු අග්‍රාමාත්‍ය ඉම්රාන් ඛාන්ට පනවා තිබූ වසර 14ක සිර දඬුවම අත්හිටුවීමට එරට ඉස්ලාමාබාද් මහාධිකරණය නියෝග කර තිබේ.

ඛාන් සහ ඔහුගේ බිරිඳ බුෂ්රා බීබීට ජනවාරි 31 වන දින මෙම නඩුව සම්බන්ධයෙන් වසර 14 බැගින් සිර දඬුවම් නියම වූයේ, පෙබරවාරි මස 08 වන දා පැවති මැතිවරණයට සතියකට පෙර ය.

දින 10කින් ආරම්භ වන ඊද් නිවාඩුවෙන් පසු නඩුව සම්බන්ධයෙන් තීරණයක් ගන්නා තෙක් මෙම යුවළගේ දඩුවම අත්හිටුවන බව ඉස්ලාමාබාද් මහාධිකරණය අද (අප්‍රේල් 01) ප්‍රකාශ කළ බව විදෙස් මාධ්‍ය වාර්තා කර ඇත.

ඔහු විසින් ගොනුකර තිබූ අභියාචනයක් සලකාබැලීමට තීරණය කිරීමත් සමග අධිකරණය මෙම නියෝගය ලබාදී ඇත.

2018 සිට 2022 අප්‍රේල් දක්වා අගමැති ධූරයේ සිටි අවධියේ තමන් වෙත ලැබුණු පකිස්ථාන රුපියල් මිලියන 140කට වඩා වටිනාකමකින් යුතු රාජ්‍ය ත්‍යාග විකුණා ඉපැයූ වත්කම් හෙළි නොකිරීම සම්බන්ධයෙන් 71 හැවිරිදි ඉම්රාන් ඛාන් වෙත චෝදනා එල්ල වී තිබේ.

මෙම නඩුව පකිස්ථානයේ දූෂණ විරෝධී ඒජන්සිය විසින් ගොනු කරනු ලැබ ඇත.

කෙසේ වෙතත් මීට පෙර ඔහුට එරෙහිව පවරා ඇති නඩු කටයුතු හේතුවෙන් හිටපු අග්‍රාමාත්‍ය ඉම්රාන් ඛාන් තවදුරටත් බන්ධනාගාරගතව සිටී.