පුවත්

රට තුළ නව ආර්ථිකයක් නිර්මාණය කරන්නේ තරුණ පරපුර ඉල්ලා සිටින වෙනස ලබා දෙමින් රට ශීඝ්‍ර සංවර්ධනයක් කරා ගෙන යාමට බව ජනාධිපති රනිල් වික්‍රමසිංහ පැවසීය.

එම නව ආර්ථිකය ඇති කිරීමට අදාළ මුලික නීති ලබන මැයි මාසයේදී පාර්ලිමේන්තුවට ඉදිරිපත් කර ජුනි මාසයේදී සම්මත කර ගන්නා බවද ජනාධිපතිවරයා සඳහන් කළේය.

ජනාධිපති රනිල් වික්‍රමසිංහ මේ බව ප්‍රකාශ කළේ මහනුවර ජනාධිපති මන්දිරයේ පැවැති“ මගෙන් පටන්ගමු මහනුවර දිස්ත්‍රික් තරුණ සමුළුව“ අමතමිනි.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

රට ශීඝ්‍ර දියුණුවකට ගෙන ගියේ නැත්නම් රටට අනාගතයක් නැහැ. රටේ ආර්ථිකය එක තැන පල්වීමට ඉඩ තබනවාද, එය ඉදිරියට ගෙන යනවාද නැත්නම් කඩා වැටීමට ඉඩ තබනවාද කියා තීරණය කළ යුත්තේ තරුණ පරපුරයි.

අද රජය ගෙන යන ආර්ථික වැඩපිළිවෙළ ප්‍රතික්ෂේප කළොත් රටේ ආර්ථිකය නැවත කඩාවැටීමකට ලක් වෙනවා. සෑම අයෙකුටම රට හැර යාමට ආර්ථික හැකියාවක් නැහැ. එසේනම් අප සියලු දෙනා එක්ව රටේ ආර්ථිකය ශක්තිමත් කරගත යුතුයි.

දැනට රට තුළ ක්‍රියාත්මක වන ආර්ථික වැඩපිළිවෙළ පිළිබඳ තරුණ තරුණියන් සෑහීමකට පත් වන්නේ නැහැ. ඔවුන් වෙනසක් ඉල්ලා සිටිනවා. රට තුළ නව ආර්ථිකයක් ගොඩනැඟීමට අප කටයුතු කරන්නේ එම වෙනස ලබාදීම සඳහායි. ඒ සඳහා අවශ්‍ය මූලික නීති මෙම මැයි මාසයේ දී පාර්ලිමේන්තුවට ඉදිරිපත් කර ජුනි මාසයේ දී සම්මත කර ගැනීමට අපේක්ෂා කරනවා. ආර්ථිකය වෙනස් කිරීමට නම් රටේ නීති පද්ධතිය ද වෙනස් කළ යුතුයි.

රට ශීඝ්‍ර ආර්ථික දියුණුවක් කරා ගෙන යාමේදී රජයේ සෑම දෙපාර්තමේන්තුවකම හා සංස්ථාවකම සහාය අවශ්‍ය වෙනවා. එසේ සිදු කිරීමට නොහැකි නම් එම ආයතන ව්‍යුහය සංශෝධනයකට ලක් කළ යුතුයි.

ඒ වගේම ගමේ ආර්ථිකය දියුණු නොකර රටේ ආර්ථිකය දියුණු කරන්න බැහැ. දියුණු සෑම රටක්ම ග්‍රාමීය කෘෂි ආර්ථිකය දියුණු කර තිබෙනවා. ගමට නවීන කෘෂිකර්මාන්තය ගෙන ඒමට අප කෘෂි නවීකරණ වැඩසටහන ක්‍රියාත්මක කර තිබෙන්නේ ඒ නිසයි. එසේ නම් වෙනසක් සමඟ ඉදිරියට යනවාද, එක තැන පල්වෙනවාද කියා තරුණ ඔබ තීරණය කළ යුතුයි.

1977 එක්සත් ජාතික පක්ෂය බලය ලබාගත් අවස්ථාවේ ජේ.ආර්. ජයවර්ධන ජනාධිපතිවරයා ප්‍රකාශ කළේ රට ඉදිරියට ගෙන යාම සිදු කළ යුත්තේ තරුණ පිරිස කියලයි. “ඔබ එය සිදුකිරීමට සූදානම් නම් මම අවශ්‍ය මඟපෙන්වීම ලබාදෙන්නම් කියලා” එතුමා ප්‍රකාශ කළා.

ඒ අනුව තරුණ අප මැතිවරණයට ඉදිරිපත්ව එක්සත් ජාතික පක්ෂය ජයග්‍රහණය කරා ගෙන ගියා. ඉන් පසුව එතුමා මහවැලි ව්‍යාපාරය ආරම්භ කළා. වසර 30ක් ගතවන බව පැවසූ මහවැලි ව්‍යාපාරය වසර 10කින් අවසන් කිරීමට හැකි වුණා. ඒ වගේම රටට අවශ්‍ය විදුලි බලය ලබා දුන්නා. ජේ.ආර්. ජයවර්ධන මැතිතුමාගේ සමයේදී වෙළෙඳ කලාප දෙකක් ආරම්භ කළා. එම වැඩපිළිවෙළ ඉදිරියට ගෙන යමින් ආර්. ප්‍රේමදාස ජනාධිපතිවරයා රටපුරා ඇඟලුම් කර්මාන්ත ශාලා 200ක් ආරම්භ කර ග්‍රාමීය ආර්ථිකය ශක්තිමත් කළා.
අප එදා තරුණයන් ලෙස මෙම වැඩසටහන් ඉල්ලා සිටියා. තරුණ පරපුර ලෙස අද ඔබ ඊට සූදානම් නම් අප එක්ව මෙම ගමන යමු. නව ආර්ථිකයක් ඇති කිරීමට අවශ්‍ය නීති ගෙන ඒමට අප කටයුතු කරනවා.

ආර්ථිකය ප්‍රතිව්‍යුහගතකරණ පනත ගෙනවිත් අප එම වැඩපිළිවෙළ ආරම්භ කරමු. තවද රජයේ මුදල් පාලනය කිරීමට නව මුදල් පනතක් ගෙන ඒමටද කටයුතු කරනවා.

අද රටේ ජනතාවගෙන් බහුතරයක් කාන්තාවන් වුවත් රැකියා නියුක්ත කාන්තා නියෝජනය ප්‍රමාණවත් නැහැ. ඒ නිසා කාන්තා අයිතිවාසිකම් සුරක්ෂිත කරන නව පනත් දෙකක් අප ගෙන එනවා. මේ සියල්ලම මෙම මැයි මාසයේ දී පාර්ලිමේන්තුවට ඉදිරිපත් කරනවා. ඒ සමඟ රටේ විශාල වෙනසක් සිදු කිරීමට බලාපොරොත්තු වෙනවා. ඒ වෙනස සඳහා එක්වන ලෙස මම ඔබට ආරාධනා කරනවා.

ඔබව බොරුවෙන් මුලාකරන කිසිඳු පාර්ශ්වයකට මම ඉඩදෙන්නේ නැහැ. ඔබේ ප්‍රශ්න පිළිබඳ මට අවබෝධයක් තිබෙනවා. මෙම නව නීති ගෙන එන්නේ එම ප්‍රශ්න විසඳීමට බව කිව යුතුයි.

මෙහිදී තරුණ තරුණියන් මතු කළ ප්‍රශ්න කිහිපයක් සහ ඒවාට ජනාධිපතිවරයා ලබා දුන් පිළිතුරු මෙසේය,

ප්‍රශ්නය
ජනාධිපතිතුමනි, අප රටේ විවිධ අණපනත් ගෙනවිත් තිබෙනවා. ඒ වගේම ළඟදී පිහිටවූ ජනසභාව හොඳ පනතක්. දැන් ජනසභා පිහිටුවීම මන්දගාමී වී ඇති බවක් පෙනෙන්නට තිබෙනවා.

පිළිතුර
ජන සභා හොඳ වැඩසටහනක්. මේ වන විට අත්හදා බැලීමේ පදනම මත කිහිපයක් ආරම්භ කර තිබෙනවා. ජනසභා නීතිගත කිරීමේදී ප්‍රශ්න ඇති නොවන ආකාරයට කටයුතු කළ යුතුයි. එහි සාමාජිකයන් තේරීම වැනි ප්‍රශ්න කිහිපයක් තිබෙනවා. පළාත් පාලන අමාත්‍යාංශය සමඟ සාකච්ඡා කර, ප්‍රශ්න විසඳගෙන මෙම වැඩපිළිවෙළ ආරම්භ කළ යුතුයි. මේ වසරේ නොහැකි වුවහොත් ලබන වසරේදී යළිත් ජනසභා ආරම්භ කිරීමට බලාපොරොත්තු වෙනවා. ‍

ප්‍රශ්නය
අස්වැසුම ප්‍රතිලාභ ලබාදීමේදී අඩුපාඩු සිදුව තිබෙනවා. දිළිඳු පවුල් සියල්ලටම අස්වැසුම ප්‍රතිලාභ ලැබෙයි කියා අප බලාපොරොත්තු වෙනවා.

පිළිතුර
එම අඩුපාඩු මඟහරවා ගනිමින් කටයුතු කිරීමට රජය පියවර ගෙන තිබෙනවා. විශේෂයෙන් මෙම ප්‍රතිලාභය ලබාදීමේ දී සුදුසුකම් පිළිබඳව සොයා බලනවා. 2025 වසරේදී මෙම වැඩසටහන පරිගණකගත කිරීමට බලාපොරොත්තු වෙනවා. ලක්ෂ 24කට මෙම ප්‍රතිලාභය ලබාදීමට අපේක්ෂා කරනවා. අස්වැසුම වැඩසටහන ආරම්භ කළේ රටේ සියලු දළිඳු ජනතාවට සහනයක් ලබාදීමටයි.

ප්‍රශ්නය
බිඳ වැටී තිබූ මෙරට සංචාරක කර්මාන්තය මේ වන විට යහපත් තත්ත්වයකට පත්වෙමින් තිබෙනවා. කුඩා ව්‍යාපාර කර්මාන්තකරුවන්ට සංචාරක ව්‍යාපාරයේ ප්‍රතිලාභ බෙදී යන ආකාරයට වැඩසටහනක් ආරම්භ කිරීමට සැලසුම් කර තිබෙනවාද කියා දැන ගැනීමට කැමතියි.

පිළිතුර
කොරෝනා වසංගතය සහ රට තුළ ඇති වු අයහපත් ආර්ථික තත්ත්වය නිසා මෙරට සංචාරක ව්‍යාපාරය කඩාවැටීමකට ලක් වුණා. නමුත් මේ වන විට අපේ රටට සංචාරකයන් පැමිණීම නැවතත් ඉහළ ගොස් තිබෙනවා.

සංචාරක ව්‍යාපාරයේ මෙම නව පිබිදිමත් සමඟ කුඩා පරිමාණයේ ව්‍යවසායකයන්ට සහන ලබාදීමට ද අප කටයුතු කරනවා. ඒ වගේම මෙරට සංචාරක ව්‍යාපාරය ශීඝ්‍ර වර්ධනයකට ගෙන යාමට අප සැලසුම් කර තිබෙනවා. ඒ අනුව සෑම පළාතකම සංචාරක ව්‍යාපාරය ප්‍රවර්ධනය කිරීමට කමිටුවක් පත් කිරීමට ද බලාපොරොත්තු වෙනවා.

ප්‍රශ්නය
වෘත්තීය පුහුණුව අවසන් කරන තරුණ තරුණියන් සඳහා ප්‍රමාණවත් රැකියා අවස්ථා නැහැ. වෘත්තීය පුහුණුව අවසන් කරන අභ්‍යාසලාභීන් සම්බන්ධයෙන් ගෙන තිබෙන පියවර කුමක්ද කියා දැන ගැනීමට කැමතියි.

පිළිතුර
ආර්ථික අර්බුදය නිසා ඇතැම් පිරිසකගේ රැකියා අහිමි වුණා. මේ වන විට රට බංකොලොත්භාවයෙන් ඉවත් වෙමින් තිබෙනවා . විශේෂයෙන් රට තුළ ආයෝජන අවස්ථා පුළුල්වීමත් සමඟ නව රැකියා අවස්ථා රැසක් බිහි වෙනවා.

අමාත්‍ය මනූෂ නානායක්කාර, රාජ්‍ය අමාත්‍යවරුන් වන ලොහාන් රත්වත්තේ, අනුරාධ ජයරත්න, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක, එක්සත් ජාතික පක්ෂයේ මහ ලේකම් පාලිත රංගේ බණ්ඩාර, හිටපු පාර්ලිමේන්තු මන්ත්‍රී කේ.කේ. පියදාස, එක්සත් ලක්වනිතා පෙරමුණේ සභාපතිනි ශාන්තිනී කෝන්ගහගේ යන මහත්ම මහත්මීන් ඇතුළු පිරිසක් ද මෙම අවස්ථාවට එක්ව සිටියහ.

ජෙනරල් ශ්‍රීමත් ජෝන් කොතලාවල ආරක්ෂක විශ්වවිද්‍යාලයේ වෛද්‍ය විද්‍යා උපාධිය සඳහා ගෙවීමේ පදනම මත ශිෂ්‍යයින් ඇතුළත් කර ගැනීමට කැබිනට් අනුමැතිය හිමි වී තිබේ.

ජෙනරල් ශ්‍රීමත් ජෝන් කොතලාවල ආරක්ෂක විශ්වවිද්‍යාලය, 1988 අංක 27 දරන ජෙනරල් ශ්‍රීමත් ජෝන් කොතලාවල රාජ්‍ය ආරක්ෂක අභ්‍යාස ආයතනය (සංශෝධන) පනත මගින් විශ්වවිද්‍යාලයක් බවට පත් කර ඇත.

සන්නද්ධ සේවාවන්හි සේවා අවශ්‍යතාව අනුව, වෛද්‍ය වෘත්තිකයින් වශයෙන් ශිෂ්‍යභට නිලධාරීන් පුහුණු කර වෛද්‍යවේදය සහ ශල්‍ය වෛද්‍යවේදය (MBBS) උපාධි පිරිනැමීම සඳහා 2011 වර්ෂයේදී මෙම විශ්වවිද්‍යාලයේ වෛද්‍ය පීඨය ආරම්භ කෙරිණි.

ඒ අනුව, දැනට දේශීය සිසුන් සඳහා ත්‍රිවිධ හමුදාවට හෝ පොලිසියට කැඩෙට් නිලධාරියෙකු ලෙස බැඳීමෙන් පමණක් සහ විදේශීය සුදුසුකම් ලත් සිසුන් සඳහා මුදල් ගෙවීමේ පදනම මත පමණක් එම විශ්වවිද්‍යාලයේ වෛද්‍ය උපාධිය හැදෑරීමේ අවස්ථාව ලබා ගත හැකි බව රජය පවසයි.

එම අවස්ථාව තවදුරට ත් පුළුල් කරමින් 2024 අධ්‍යන වර්ෂයේ සිට සුදුසුකම් සපුරා ඇති දේශීය අයැදුම්කරුවන් ද මුදල් ගෙවීමේ පදනම මත වෛද්‍ය උපාධි පාඨමාලාව සඳහා බඳවාගැනීමට සැලසුම් කර තිබේ.

ඒ අනුව, ශ්‍රී ලංකාවේ අනෙකුත් ජාතික විශ්වවිද්‍යාලවල සිසුන් බඳවා ගැනීම සඳහා විශ්වවිද්‍යාල ප්‍රතිපාදන කොමිෂන් සභාව විසින් අනුගමනය කරනු ලබන z අගයට අමතරව තවත් අතිරේක සුදුසුකම් කිහිපයක් ද සහිතව සකස් කරනු ලැබ ඇති නිර්ණායක අනුගමනය කරමින්, ගෙවීමේ පදනම මත වෛද්‍යවේදය හා ශල්‍ය වෛද්‍යවේදය උපාධි හැදෑරීම සඳහා ජෙනරල් ශ්‍රීමත් ජෝන් කොතලාවල ආරක්ෂක විශ්වවිද්‍යාලයේ වෛද්‍ය පීඨය වෙත උපාධි අපේක්ෂකයන් ඇතුළත් කර ගැනීම සඳහා මෙලෙස කැබිනට් අනුමැතිය ලැබී තිබේ.

ජනාධිපතිවරණය සහ මහ මැතිවරණය යන දෙකම එකට පැවැත්වීමට හැකි නීතිමය පසුබිමක් රටේ නැතැයි මැතිවරණ කොමිෂන් සභාවේ අධ්‍යක්ෂ ජනරාල් සමන් රත්නායක අවධාරණය කරයි.

මැතිවරණ දෙකම එකට පැවැත්වීම ජනප්‍රිය මාතෘකාවක් වුවත් එමගින් වියදම අඩුවේදැයි යන්න ගැටළුවක් බවත් සමහර විට මෙය වියදම වැඩිවීමට බලපාන කාරණයක් විය හැකි බවත් ඔහු පෙන්වා දෙයි.

නිශ්චිත කාලවලදී ඒ ඒ මැතිවරණ පවත්වන්නේ නම් කිසිදු ගැටලුවක් මතු නොවන බවද ඔහු වැඩිදුරටත් සඳහන් කරයි.

මේ වර්ෂයේදී ජනාධිපතිවරණය පැවැත්වීමට කොමිෂන් සභාව සූදානම් බවද අධ්‍යක්ෂ ජනරාල්වරයා ප්‍රකාශ කළේය.

රට තුළ සීග්‍ර ආර්ථික වර්ධනයක් ඇති කිරීමට රජය ආරම්භ කර ඇති වැඩපිළිවෙළ සාර්ථක කර ගැනීමට නම් නීති පද්ධතියද නවීකරණය විය යුතු බව ජනාධිපති රනිල් වික්‍රමසිංහ පැවසීය.

ජනාධිපතිවරයා මේ බව සඳහන් කර සිටියේ මහනුවර නීතිඥවරුන් සමඟ ඊයේ (07) මහනුවර මහවැලි රීච් හෝටලයේ පැවති සුහද හමුවේදීය.

බිඳ වැටුණු ශ්‍රී ලංකා ආර්ථිකය ගොඩනැඟීමට ඇති කඩිනම් විසඳුම ජාත්‍යන්තර මූල්‍ය අරමුදල සමඟ වන වැඩසටහන බව මෙහිදී පෙන්වා දුන් ජනාධිපතිවරයා එම ප්‍රතිලාභය ජනතාවට හිමිකර දීම වෙනුවෙන් ජාත්‍යන්තර මූල්‍ය අරමුදල සමඟ වන ගිවිසුම නීතිගත කිරීමට කටයුතු කරන බව ද සඳහන් කළේය.

එසේම සෑම ක්ෂේත්‍රයකම නවීකරණයක් වෙනුවෙන් නව නීති පද්ධතියක් ගෙන එන බව පැවසූ ජනාධිපතිවරයා එම කටයුතු සඳහා නීති ක්ෂේත්‍රයේ සියලුදෙනාගේ සහාය අපේක්ෂා කරන බවද සඳහන් කළේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

ජාත්‍යන්තර මූල්‍ය අරමුදල සමඟ වන වැඩසටහන ඉදිරියට ක්‍රියාත්මක කරනවාද, නැත්නම් එය ආපසු හරවනවාද යන්න පිළිබඳ අප තීරණය කළ යුතුයි. මේ සඳහා එකඟත්වය පළ කරුණු සෑම අවස්ථාවකම පසුව එම තීරණය ආපසු හරවන බවට නරක නාමයක් ශ්‍රී ලංකාවට තිබෙනවා. රට වෙනුවෙන් අපට ලැබී ඇති අවසන් අවස්ථාව මෙයයි. ඒ නිසා මෙම ප්‍රතිලාභය ජනතාවට ලබාදීම වෙනුවෙන් ජාත්‍යන්තර මූල්‍ය අරමුදල සමඟ වන ගිවිසුම නීතිගත කිරීමට අප බලාපෙරොත්තු වෙනවා.

රට හමුවේ ඇති වගකීමෙන් අප කිසිවෙකුට පැන යන්න බැහැ. ඒ නිසා එහිදී වැදගත් තීන්දු තීරණවලට එළැඹිය යුතුයි.

එසේම රටේ දැනට පවතින ආර්ථික ක්‍රමය සමඟ එක තැන සිරවී සිටිනවාද, නැතිනම් තරගකාරී අපනයන ආර්ථිකයකට යොමුව රටේ ආර්ථිකය ශක්තිමත් කර, නැවත රට තුළ ආර්ථික අර්බුදයක් ඇති නොවන්නට වග බලා ගන්නවාද කියා අප තීරණය කළ යුතුයි.

මේ රටේ ආර්ථිකය නැවත ශක්තිමත් කළ හැකි බවට විශ්වාසයක් මා තුළ තිබෙනවා. ඒ සඳහා අවශ්‍ය භෞතික සම්පත මෙන්ම මානව සම්පත්ද අප සතුව තිබෙනවා. අපේ රටේ ව්‍යාපාරිකයන් බොහෝ පිරිසක් පිටරටවල සිය ව්‍යාපාර කටයුතු පවත්වාගෙන යනු ලබනවා. අද ලෝකයේ විශාලතම වැවිලි සමාගම අයත් වන්නේ ලංකාවේ සමාගමකටයි. ඒ වගේම ලෝකයේ විශාලතම තේ වතු සමාගම අයත් රට ශ්‍රී ලංකාවයි. අපගේ ඇඟලුම් කර්මාන්තයට ලෝකයේ ඉහළ තැනක් හිමිව තිබෙනවා. එම නිසා උත්සාහ කළහොත් අපට ලෝකය දිනාගත හැකියි. එබැවින් අප කඩිනමින් අපනයන ආර්ථිකයකට යොමු විය යුතුයි. එහිදී නව ක්ෂේත්‍ර පිළිබඳ අවධානය යොමු කළ යුතුව තිබෙනවා.

එසේම අපගේ වෙළෙඳ භාවිතාවන්වල විශාල වෙනස්කම් සිදුවිය යුතුයි. එහිදී බොහෝ නීති නවීකරණය කළයුතුයි. එසේම ලෝකය පිළිගත් නවීන නීති බොහොමයක් තවමත් ශ්‍රී ලංකාව තුළ ක්‍රියාත්මක වන්නේ නැහැ. අප ලෝකයට අවතීරණවීමට නම් එම නීති පද්ධතියටද ඇතුළත් විය යුතුයි.

ආර්ථික පරිවර්තන වැඩපිළිවෙළේදී ඩිජිටල් ආර්ථිකයක් පිළිබඳ අප ප්‍රමුඛ අවධානයක් යොමු කර තිබෙනවා. ඩිජිටල් ආර්ථිකයක් ඇති කිරීමේදී ඩිජිටල්කරණය හා සම්බන්ධ සියලුම නීති ඊට ඇතුළත් විය යුතුයි.

ඒ වගේම දේශගුණික විපර්යාස පිළිබඳ නීති සහ නව පාරිසරික නීති ගෙන ඒමට අප බලාපොරොත්තු වෙනවා. එසේම නව මූල්‍ය නීති හා බැඳුණු වාණිජ නීති අප විසින් සම්පාදනය කරනවා. නව බැංකු නීති කෙටුම්පත් කරනවා. මෙම පියවර සමඟ ඉදිරි වසර 10 තුළ නව නීති පද්ධතියක් රට තුළ නිර්මාණය වෙනවා. එය ශ්‍රී ලංකාව දිගුකාලීන සංවර්ධනයක් කරා ගෙන යන වැඩපිළිවෙළක් වනු ඇති බව මාගේ විශ්වාසයයි.

නව නීති ගෙන එන අතරම පවතින නීතිවල සංශෝධනද සිදු විය යුතුයි. ශ්‍රී ලංකාව අයෝජන සඳහා සුදුසු රටක් ලෙස සාර්ථකවීමට නම් ඊට අදාළව ක්‍රියාත්මකවන නීති පද්ධතියේද සංශෝධනයක් අවශ්‍යයි. අප රට තුළ ආයෝජකයන් රඳවා තබා ගැනීමට නොහැකි එක් හේතුවක් වන්නේ නීතිමය කටයුතුවල තිබෙන ප්‍රමාදයයි.
එසේම ශ්‍රී ලංකාවේ ආර්ථිකය විවෘත කරන විට වරාය නගරය කොළඹ මූල්‍ය කලාපය බවට පරිවර්තනය කිරීමට අපගේ අවධානය යොමු කර තිබෙනවා. එවිට එය අක්වෙරළ ආර්ථිකයක් බවට පත් වනු ඇතියි. එය වෙනම අංශයක් ලෙස ක්‍රියාත්මක වන අතර අලුත් නීති මාලාවක්ද ක්‍රියාත්මක වෙනවා.

ඊට අමතරව, කාන්තාවන් සවිබල ගැන්වීමේ නීතිය සහ ස්ත්‍රී පුරුෂ සමානාත්මතාවය පිළිබඳ නීතිය ගෙන ඒමට පියවර ගෙන තිබෙනවා.

රටේ සිදුකරන ආර්ථික පරිවර්තනයේ දී නීති පද්ධතිය ද නවීකරණය කළ යුතුයි. අප තීරණ ගත යුත්තේ තවත් වසර 20ක ඉදිරිය දෙස අවධානය යොමු කරමිනුයි. තවත් වසර 20ක් යන විට මා සහ මෙතන සිටින බොහෝ පිරිසක් ජීවතුන් අතර නොසිටීවි. නමුත් මෙහි සිටින තරුණ නීතිඥයන් මෙම නවීකරණ වැඩපිළිවෙළ සමඟ ඉදිරියට යා යුතුයි.

අද අපට ලැබී ඇත්තේ ශ්‍රී ලංකාවේ ආර්ථිකය ගොඩනැංවීමේ අවසාන අවස්ථාවයි. එබැවින් නවීකරණය වී ලෝකය සමඟ ඉදිරියට යනවාද, පසුපසට ඇද වැටෙනවාද කියා තීරණය කළ යුතුයි. 1948 නිදහස ලැබූ දා සිට අපට ලැබුණු කිසිඳු අවස්ථාවකින් අප නිසි ප්‍රයෝජන ගත්තේ නැහැ. නමුත් අප මෙම වසරේදී රට පිළිබඳ සිතා තීරණයකට එළැඹිය යුතුයි.

විධායක ජනාධිපති ක්‍රමය තිබිය යුතුද, නැතිනම් ජනාධිපති ක්‍රමය අහෝසි කළ යුතුද යන්න අද රට හමුවේ තිබෙන වැදගත් ප්‍රශ්නය බවට පත් කිරීමට ඇතැමුන් උත්සාහ දරනවා. එය වැදගත් දෙයක් කියා මා සිතන්නේ නැහැ. එය තීරණය කළ යුත්තේ පාර්ලිමේන්තුවයි.

අද දවසේ වැදගත් ප්‍රශ්නය වන්නේ රටේ සිටින්නේ විධායක ජනාධිපතිවරයෙකුද, අගමැතිවරයෙකු ද යන ප්‍රශ්නය නොවෙයි. ශ්‍රී ලංකාව දියුණු කළ හැක්කේ කෙසේද යන ප්‍රශ්නයයි. ඒ නිසා සැබෑ අරමුණ කෙරෙහි ප්‍රමුඛත්වය ලබා දෙමින් එම ප්‍රශ්නවලට විසඳුම් සෙවීමට අප සියලුදෙනා එක් වෙමු කියා මම ආරාධනා කරනවා.

අමාත්‍ය මනූෂ නානායක්කාර, රාජ්‍ය අමාත්‍යවරුන් වන ලොහාන් රත්වත්තේ, අනුරාධ ජයරත්න , දිලුම් අමුණුගම, පාර්ලිමේන්තු මන්ත්‍රී වේලු කුමාර්, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක යන මහත්වරු ඇතුළු පිරිසක් මෙම අවස්ථාව එක්ව සිටියහ.

2022/2023 වසරේ අ.පො.ස සාමාන්‍ය පෙළ විභාගය විශිෂ්ඨ ලෙස සමත් ආර්ථික අපහසුතා ඇති සිසු දරුවන් 6000ක් සඳහා උසස් පෙළ හැදෑරීමට ශිෂ්‍යත්ව ලබා දීමට අදාළ කටයුතු මේ වන විට අවසන් අදියරේ පසුවන බවත්, ඒ අනුව 2024 මැයි මස සිට මාර්තු, අප්‍රේල් මාසවල හිඟ වාරික ද සහිතව එම ගෙවීම් සිදු කිරීමට කටයුතු සුදානම් කර ඇති බවත් ජනාධිපති අරමුදල දැනුම් දෙයි.

ඒ අනුව 2024 මාර්තු මස සිට ක්‍රියාත්මක වන පරිදි මසකට රුපියල් 6000 බැගින් වාරික 24ක් සඳහා මෙම ශිෂ්‍යත්ව ප්‍රදානය සිදු කෙරේ.

තෝරාගන්නා ලද සිසුන්ගේ නාමලේඛන පළාත් වශයෙන් ඉදිරි දින කිහිපය තුළ ජනාධිපති අරමුදලේ නිල වෙබ් අඩවියේ (www.presidentsfund.gov.lk) පල කිරීමට කටයුතු කරනු ලබන අතර වැඩිදුර විස්තර සඳහා ජනාධිපති අරමුදලේ නිල ෆේස්බුක් පිටුව (www.facebook.com/president.fund) like/follow කර තබාගන්නා මෙන් ද ජනාධිපති අරමුදල දැනුම් දී සිටි.

තවද 1 ශ්‍රේණියේ සිට 11 ශ්‍රේණිය දක්වා ආර්ථික අපහසුතා සහිත සිසුන් ලක්ෂයක් සදහා පිරිනැමෙන ජනාධිපති අධ්‍යයන ශිෂ්‍යත්ව වැඩසටහනේ අයදුම්පත් භාර ගැනීම මේ වන විට අවසන් වී ඇති අතර ශිෂ්‍යත්වලාභීන්ගේ නාමලේඛන කලාප මට්ටමින් ඉදිරි මාසය තුළ ජනාධිපති අරමුදල වෙත ලැබීමට නියමිතව තිබේ.

එම නාමලේඛන ලද පසු අදාළ සිසුන් සදහා ශිෂ්‍යත්ව දීමනා වශයෙන් මසකට රුපියල් 3000 බැගින් මාසික වාරික 12ක් ගෙවීමට කටයුතු කෙරෙන අතර මෙම ශිෂ්‍යත්ව මුදල්ද 2024 මැයි මස සිට ලබා දීමට නියමිතව ඇත.

මීට අදාළ මාධ්‍ය නිවේදනය ජනාධිපති මාධ්‍ය අංශය විසින් නිකුත්කර ඇත .

ජාතික ජනබලවේගය පක්ෂයේ ආර්ථික කමිටුව සහ සජබ ආර්ථික කමිටුව අතර විවාදයක් වෙනුවට ජනාධිපති අපේක්ෂකයන් වීමට නියමිත අනුර දිසානායක සහ සජිත් ප්‍රේමදාස අතර විවාදයක් සඳහා පමණක් ජවිපෙ ප්‍රධාන ලේකම් ටිල්වින් සිල්වා අනුමැතිය පළකර ඇත.

ජාතික ජනබලවේගය පක්ෂය විසින් සංවිධානය කරන ලද උත්සව අවස්ථාවක් අමතමින් ඔහු සිය ස්ථාවරය ප්‍රකාශ කර ඇති අතර ප්‍රතිපත්තියක් නැති කණ්ඩායම් සමග විවාද කරන්න ජාතික ජන බලවේගය සූදානම් නැති බවත් පවසා තිබේ.

එහිදී අදහස් දක්වා ඇති ජවිපෙ මහ ලේකම් ටිල්වින් සිල්වා මෙසේ පවසා ඇත .

‘සමගි ජන බලවේගයේ පිරිසක් ආර්ථික ප්‍රතිපත්ති ගැන විවාද කරන්න අපිට අභියෝග කරනවා. රනිල් වික්‍රමසිංහ අගමැති යටතේ අවුරුදු 05ක් ආණ්ඩුවේ හිටපු, ජාත්‍යන්තර ස්වෛරීත්ව බැ¾දුම්කරවලින් ලංකාවට වැඩිම විදේශ ණය ගෙන ඒ උගුලේ අපිව හිර කරපු අයම අපට විවාදයකට කතා කරනවා.

ඒ අයට අපි උත්තර දුන්නේ එහෙට මෙහෙට පනින ප්‍රතිපත්තියක් නැති අය වෙනුවට ජනාධිපතිවණයකදී වැදගත් වෙන්නේ අපේක්ෂකයන් හැටියට ඉදිරිපත් වෙන පක්ෂ නායකයන් නිසා අපේ පක්ෂයේ නායක අනුර දිසානායක සහෝදරයා සමඟ ඒ ගොල්ලන්ගේ නායක සජිත් ප්‍රේමදාස මහත්තයට විවාදයකට එන්න කියලා. සජිත් ප්‍රේමදාස විවාදයකට එනවා නම් අපි සතුටුයි.

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ ජවිපෙ ප්‍රධාන ලේකම් ටිල්වින් සිල්වා යෝජිත විවාදය ගැන ආපදා කළමනාකරණ තීන්දුවක් ගෙන ඇති බවය. සජබ ආර්ථික කමිටුව සහ ජාජබ ආර්ථික කමිටුව අතර විවාදය තුළ, ජාජබ පාර්ශ්වය වෙතින් ජවිපෙ ස්ථාවරය ඛණ්ඩනය වීම වළක්වා ගැනීමට මේ තීන්දුව ගෙන ඇති බව පැහැදිලි බව විචාරක මතය වී ඇත.

එහිදී ඔවුන් පෙන්වා දෙන්නේ ජාජබ ආර්ථික ප්‍රතිපත්තිය සහ ජවිපෙ ප්‍රතිපත්තිය අතර ඇති විසංවාදය ගැන වාදයක් ඇතිවීම අහිතකර බව ටිල්වින් සිල්වා ගේ තක්සේරුව වී ඇති බවයි.

මුස්ලිම් ප්‍රජාව ඇතුළු ඕනෑම පුද්ගලයෙකුගේ අවසන් කටයුතු සිදු කිරීමේදී ආගමානුකූලව හෝ අවසන් කැමති පත්‍රයට අනුව සිදු කිරීමට අවශ්‍ය කටයුතු සැලසීම සඳහා නව කමිටුවක් පත් කරන බව ජනාධිපති රනිල් වික්‍රමසිංහ පැවසීය.

ඊට අදාළ නීති සම්පාදනය කිරීමට ඉදිරියේදී කටයුතු කරන බව ද ජනාධිපතිවරයා සඳහන් කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ මහනුවර කටුකැලේ ජුම්මා මුස්ලිම් පල්ලියේ ඊයේ (07) පැවති ඉෆ්තාර් උත්සවයට එක්වෙමිනි.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

පසුගිය සමයේ රටේ පැවති ආර්ථික අර්බුදය නිසා ජනතාවට පෝලිම්වල සිටීමට සිදුවීම නිසා රාමසාන් උපවාසය පවා නිසි අයුරින් සිදු කිරීමට හැකි වුණේ නැහැ. පසුගිය වසරේ සිට ආර්ථිකය යහපත් තත්ත්වයට පත්වෙමින් තිබෙන නිසා අද වන විට සුපුරුදු ආකාරයටම රාමසාන් සමය සහ රාමසාන් උපවාසය සිදු කිරීමට අවස්ථාව ලැබී තිබෙනවා.

රාමසාන් කාලයේදී මුස්ලිම් ප්‍රජාව නිරාහාරව සිටිමින් උපවාස ශීලය රකිමින් කුසල් දහම් වඩමින් සිටිනවා. රාමසාන් උත්සවය සහ සිංහල අලුත් අවුරුදු සමය එකම කාලවකවානුක යෙදී තිබෙනවා. ජාති ආගම් බේදයකින් තොරව කටයුතු කළ හැකි සංස්කෘතියක් ඉතිහාසයේ සිටම මේ රට තුළ නිර්මාණය වී තිබෙනවා.

මේ වන විටත් පිරිවෙන් අධ්‍යාපනය අධ්‍යාපන අමාත්‍යංශය යටතේ නියාමනය වනවා සේම, මද්‍රසා පාසල් ද අධ්‍යාපන අමාත්‍යංශය යටතේ නියාමනය කිරීමට අවධානය යොමු කර තිබෙනවා. 2019 කාල සීමාව තුළ මුස්ලිම් පොත් පත් සම්බන්ධයෙන් ඇති වු බාධා සොයා බලා ඒවා ඉවත් කිරීම පිළිබඳව ද අවධානය යොමු කර තිබෙනවා.

පසුගිය කොරෝනා වසංගත සමයේ මුස්ලිම් ප්‍රජාව තමන්ගේ අවසන් කටයුතු නිසි ආකාරයෙන් සිදු කර ගැනීමට නොහැකිව දැඩි වේදනාකාරී තත්ත්වයක පසු වුණා. එම තත්ත්වය වෙනස් කිරීමට ඉදිරියේදී අප කටයුතු කරනවා. ඕනෑම කෙනෙකුට ආගමානුකූලව හෝ අවසන් කැමති පත්‍රයක් මඟින්, තමන්ට කැමති ලෙස අවසන් කටයුතු සිදු කර ගත හැකි නීති ඉදිරියේදී සකස් කරනවා. ඕනෑම කෙනෙකුට භූමදානය සඳහා හෝ ආදාහනය සඳහා අයිතියක් තිබෙනවා. එය ඔහුගේ හෝ ඇයගේ කැමැත්ත අනුව සිදු කිරීමට අවශ්‍ය නීති අප සකස් කරනවා.

අද ශ්‍රී ලංකාවේ රාමසාන් උපවාසය සිදු කළත් ගාසා තීරයේ ඉතා කණගාටු තත්ත්වයක් උද්ගත වී තිබෙනවා. එහි මුස්ලිම් ප්‍රජාව තිස්පන්දහකගේ පමණ ජීවිත අහිමි වී තිබෙනවා. එම නිසා මෙවර ජාතික රාමසාන් උත්සවය නොපවත්වා එම මුදල් ගාසා තීරයේ මුස්ලිම් ජනතාව වෙනුවෙන් ලබාදීමට අප කටයුතු කළා. ඒ වගේම යුද්ධය අවසන් වූ පසුව ගාසා තිරයට පාසලක් ඉදිකර දීමටත් අප පොරොන්දු වී තිබෙනවා. පලස්තීන රාජ්‍යය බිඳ දැමීමට අප කිසිදා සහාය පළ කරන්නේ නැහැ. එම නිසා මෙම යුද්ධය නැවැත්වීම සඳහා අප සහයෝග ලබා දෙනවා.

කාන්තංකුඩි මුස්ලිම් පල්ලියෙන් රුපියල් මිලියන 10ක මුදලක් සහ කටු කැලේ ජුම්මා මුස්ලිම් පල්ලිය මඟින් ‍රුපියල් මිලියන 2.2ක් සහ මුස්ලිම් විදේශ රැකියා නියෝජිත ආයතන මගින් රුපියල් මිලියන 3.5ක මුදලක් ගසා තීරයේ මුස්ලිම් ප්‍රජාව වෙත ලබාදීම වෙනුවෙන් මෙහිදී ජනාධිපති රනිල් වික්‍රමසිංහ වෙත භාරදීමද සිදු විය.

මහනුවර කටුකැලේ ජුම්මා මුස්ලිම් පල්ලියේ ප්‍රධාන මවුලවී සයිද් මවුලානා, අමාත්‍ය මනූෂ නානායක්කාර,රාජ්‍ය අමාත්‍යවරුන් වන ලොහාන් රත්වත්තේ , අනුරාධ ජයරත්න , දිලුම් අමුණුගම, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක යන මහත්වරු ඇතුළු පිරිසක් මෙම අවස්ථාවට එක්ව සිටියහ.

අලුත් අවුරුදු උත්සව සමයේදී සංවිධානය කෙරෙන ක්‍රීඩා තරගවලට අදාළව මාර්ගෝපදේශ මාලාවක් නිකුත් කර ඇත.

ඒ සම්බන්ධයෙන් අද (08) ප්‍රවෘත්ති දෙපාර්තමේන්තුවේ පැවති මාධ්‍ය හමුවකදී අදහස් දක්වමින් සෞඛ්‍ය අමාත්‍ය වෛද්‍ය රමේෂ් පතිරණ පවසා සිටියේ අලුත් අවුරුදු කාලය තුළ සිදුවිය හැකි අනතුරු අවම කර ගැනීම සඳහා එම මාර්ගෝපදේශ මාලාව නිකුත් කරන බවය.

මෙහිදී ප්‍රජා වෛද්‍ය විශේෂඥ සමිත සිරිතුංග පැවසුවේ ඇතැම් ක්‍රීඩා සඳහා වෛද්‍ය සහතිකයක් ඉදිරිපත් කිරීම ඇතුළු මාර්ගෝපදේශ මාලාවක් ඉදිරිපත් කර ඇති බවය.

එමෙන්ම ධාවන තරග, මැරතන් තරග ඇතුළු අවුරුදු ක්‍රීඩා සම්බන්ධයෙන් අවශ්‍ය මැදිහත් වීම සඳහා සියලු පොලිස් ස්ථාන වෙත චක්‍රලේඛයක් නිකුත් කර ඇති බව රථවාහන පාලන හා මාර්ග ආරක්ෂාව පිළිබඳ නියෝජ්‍ය පොලිස්පති ඉන්දික හපුගොඩ එහිදී සදහන් කළේය.

2023 වසරේ බීමත්ව රිය පැදවූ පුද්ගලයින් 124,760 දෙනෙකු අත්අඩංගුවට ගෙන තිබේ.

එම වසරේ අප්‍රේල් මාසයේ දී බීමත්ව රිය පැදවීම් හේතුවෙන් සිදුවූ අනතුරුවලින් පුද්ගල මරණ 07ක් සිදුව ඇති බව නියෝජ්‍ය පොලිස්පති ඉන්දික හපුගොඩ සඳහන් කළේය.

රජය විසින් නිකුත්කර ඇති මාර්ගෝපදේශ මාලාව පහත දැක්වෙයි .

අලුත් අවුරුදු උත්සව සමයේ දී ක්‍රීඩා තරගවලට අදාළව මාර්ගෝපදේශ මාලාවක් by poornima on Scribd

අද සමගි ජන බලවේගය තුළ එක්සත් ජාතික පක්ෂයේ ප්‍රතිපත්ති නොමැති බවත්, මේ වන විට එහි ආර්ථික ප්‍රතිපත්තිය හසුරුවන්නේ පොහොට්ටුවෙන් පිටමන් කළ කණ්ඩායම විසින් බවත් ජනාධිපති රනිල් වික්‍රමසිංහ පැවසීය.

2020 දී එක්සත් ජාතික පක්ෂයේ අයිතිය ප්‍රකාශ කරමින්, සිරිකොත අල්ලා ගැනීමට සූදානම්ව සිටි සමගි ජන බලවේගය අද පොහොට්ටුවේ සභාපති ඇතුළු පිරිසට යටවී ඇති බවද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ  මේ බව සඳහන් කළේ, මහනුවර ජනාධිපති මන්දිරයේදී ඊයේ (07) පැවති දේශපාලන පක්ෂ නියෝජිත හමුව අමතමිනි.

2022 ජූලි මාසයේ සිදුවූ දේශපාලන පෙරළිය සමග මෙරට පක්ෂ ක්‍රමයද වෙනසකට ලක්ව ඇති බව පෙන්වා දුන් ජනාධිපතිවරයා කුමන දේශපාලන පක්ෂයක් නියෝජනය කළ ද අද සියලුදෙනා රට පිළිබඳ සිතා රජයේ වැඩපිළිවෙළ සමඟ සහයෝගයෙන් ඉදිරියට යා යුතු බවද පැවසීය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය

ආර්ථික අර්බුදය හමුවේ 2022 ජූලි මාසයේ සිදුවූ දේශපාලන පෙරළිය සමඟ මෙරට පක්ෂ ක්‍රමයද වෙනසකට ලක් වුණා. අද සියලුදෙනාගේ සහයෝගයෙන් රට තුළ ආර්ථික ස්ථාවරත්වයක් ඇති කිරීමට අපට හැකිව තිබෙනවා. මෙම තත්ත්වය ආරක්ෂා කරගෙන ඉදිරියට ගෙන යාම අප සියලුදෙනාගේ වගකීමක්.

පසුගිය වසර දෙක තුළ අප පාර්ලිමේන්තුවේ සම්මත කරගෙන තිබෙන නීති ඇතැම් අය සිය පාර්ලිමේන්තු කාලය තුළම සිදු කර නැහැ. රටේ ආර්ථික ගැටළු තිබුණද අඩු ආදායම්ලාභී ජනතාව වෙනුවෙන් අස්වැසුම වැඩසටහන ආරම්භ කර, එතෙක් පැවති දීමනාව තුන් ගුණයකින් ඉහළ නැංවීමට අප කටයුතු කළා. ඒ වගේම ලක්ෂ 20කට උරුමය සින්නක්කර ඔප්පු ලබාදීමේ වැඩසටහන ආරම්භ කර තිබෙනවා. මෙම වැඩපිළිවෙළ රටේ ආර්ථිකය යහපත්ව තිබූ කාල සීමාවේ ඉටු නොකළ වැඩකොටසක් බව කිවයුතුයි.

මෙම වැඩසටහන් ඉදිරියට ගෙන යාම වෙනුවෙන් පාර්ලිමේන්තුවේ බහුතරයක් මට සහාය ලබා දී තිබෙනවා. පෙදුජන පෙරමුණේ, එක්සත් ජාතික පක්ෂයේ මෙන්ම ශ්‍රී ලංකා නිදහස් පක්ෂයේ ද කොටසක් මේ අතර සිටිනවා. ඒ වගේම වෙනත් පක්ෂවල අය ද සිටිනවා. මේ සියලුදෙනා එකට එක්ව සම්බන්ධීකරණයක් ඇති කර ගනිමින් ඉදිරියට යා යුතුයි.

පොදුජන පෙරමුණේ සිටියත් එක්සත් ජාතික පක්ෂයේ හෝ ශ්‍රී ලංකා නිදහස් පක්ෂයේ සිටියත් වෙනත් පක්ෂයක සිටියත් රජයේ මෙම වැඩපිළිවෙළ සමග ඉදිරියට යනවාද නැද්ද යන තීරණය ගැනීමට පමණයි තිබෙන්නේ.

පසුගිය කාලයේ දේශපාලන පක්ෂ තුළ බෙදිමක් ඇති වුණා. පොහොට්ටුවේ සභාපති සහ සුළුතරයක් විපක්ෂයට ගියා. දැන් එම කණ්ඩායම සමගි ජනබලවේගය අල්ලාගෙන සිටිනවා. 2020 සමගි ජන බලවේගය ප්‍රකාශ කළේ අපි එක්සත් ජාතික පාක්ෂිකයෝ ඒ නිසා සිරිකොත අල්ලාගන්න ඕන කියලා. එසේ පැවසු සමගි ජන බලවේගය අද පොහොට්ටුවෙන් පිටමන් කළ කණ්ඩායමට යට වී සිටිනවා.

අද සමගි ජන බලවේගය තුළ එක්සත් ජාතික පක්ෂය නැහැ. එක්සත් ජාතික පක්ෂය ආරක්ෂා කළේ මමයි. ජේ.ආර්. ජයවර්ධන, ආර්, ප්‍රේමදාස, ඩී.බී. විජේතුංග මේ සියලුදෙනා සමඟ අපි වැඩකළා.

අද සමගි ජන බලවේගයට එක්සත් ජාතික පක්ෂය කියන්න කිසිම අයිතියක් නැහැ. අද අපට පොදුජන පෙරමුණ සමඟ මෙන්ම ශ්‍රී ලංකා නිදහස් පක්ෂය සමඟ ද වැඩ කිරීමට සිදුව තිබෙනවා. රට වෙනුවෙන් අපි එකට සිටිය යුතුයි. අද දේශපාලනය වෙනස් වෙලා.

ඔබ සියලුදෙනා ගමට යා යුතුයි. උරුමය සින්නක්කර ඔප්පු ලක්ෂ 20න්, ලක්ෂ 10ක් මේ වන විට සකස් කර අවසන් කර තිබෙනවා. එම ඔප්පු මාසයක් තුළ ජනතාවට බෙදා දීමට අපිට එක්ව වැඩ කරන්න හැකියාව තිබෙනවා. ඒ නිසා මේ මහනුවර දිස්ත්‍රික්කයේ ඔබ සියලුදෙනා මනා සම්බන්ධීකරණයකින් යුතුව රජයේ වැඩපිළිවෙළට සහාය ලබාදෙනු ඇතැයි මම විශ්වාස කරනවා.

මේ අතර ශ්‍රී ලංකා පොදු ජන පෙරමුණේ පළාත් පාලන සංසදයේ සහාය ජනාධිපතිවරයා වෙත පළ කරමින් සංවිධානය කෙරුණු ශ්‍රී ලංකා පොදුජන පෙරමුණේ පළාත් පාලන සභාපතිවරුන්ගේ හමුවකට ද ජනාධිපති රනිල් වික්‍රමසිංහ අද (07) පෙරවරුවේ මහනුවර ජනාධිපති මන්දිරයේ දී එක් විය.

රටේ ආර්ථිකය ශක්තිමත් කිරීම වෙනුවෙන් රජය ගෙන යන වැඩපිළිවෙළ පිළිබඳ ජනතාව දැනුම්වත් කිරීම සඳහා, ගම සමග සම්බන්ධීකරණයට පළාත් පාලන හිටපු සභාපතිවරුන්ගේ සාමාජිකත්වයෙන් උපදේශක සංවිධානයක් ඇති කරන බව ජනාධිපති රනිල් වික්‍රමසිංහ එහිදී ප්‍රකාශ කළේය.

ඒ අනුව ගම්වල තිබෙන ගැටළු පිළිබඳව සෘජුව ජනාධිපතිවරයාව සහ අගමැතිවරයාව දැනුම්වත් කිරීමට හැකි ආකාරයේ යාන්ත්‍රණයක් ක්‍රියාත්මක කරන බවද ජනාධිපතිවරයා සඳහන් කළේය.

දැනට රජය ගෙනයන “අස්වැසුම” වැඩසටහන සහ “උරුමය” ඉඩම් ඔප්පු ලබාදීමේ වැඩසටහනට ඍජුව සහභාගී වන ලෙස හිටපු පළාත් පාලන මන්ත්‍රීවරුන්ට දැනුම් දුන් ජනාධිපතිවරයා ඊට අවශ්‍ය පහසුකම් සලසා දීමට කටයුතු කරන බව ද කියා සිටියේය.

එසේම පළාත් පාලන බල ප්‍රදේශවල සිටින තරුණ තරුණියන් රජයේ වැඩසටහන් ක්‍රියාත්මක කිරීමේ නියමුවන් ලෙස ඉදිරියට ගෙන ඒමේ අවශ්‍යතාවයද ජනාධිපති රනිල් වික්‍රමසිංහ පෙන්වා දුන්නේය.

අමාත්‍ය මනූෂ නානායක්කාර, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක, එක්සත් ජාතික පක්ෂයේ මහ ලේකම් පාලිත රංගේ බණ්ඩාර යන මෙම අවස්ථාවන්ට එක්ව සිටියහ.

ශ්‍රී ලංකා නිදහස් පක්ෂයේ නව වැඩබලන සභාපතිවරයා ලෙස නිමල් සිරිපාල ද සිල්වා  පත්කර තිබෙයි.

එහි වැඩ බලන ලේකම්වරයා ලෙස ජාතික සංවිධායක දුමින්ද දිසානායක තේරි පත් විය.

අද (08) උදෑසන එම පක්ෂයේ හිටපු සභාපතිනි චන්ද්‍රිකා බණ්ඩාරනායක කුමාරතුංග ඇතුළු ජ්‍යේෂ්ඨයින්ගේ ප්‍රධානත්වයෙන් දේශපාලන මණ්ඩලයේ හදිසි රැස්වීමක් පැවැත්වූ අතර, එහිදී එම තීරණය ගෙන තිබේ.

ආන්දෝලනයකට තුඩු දී ඇති ඉමියුනෝග්ලොබියුලීන් සිද්ධිය සම්බන්ධයෙන් රක්ෂිත බන්ධනාගාර ගත කර සිටි හිටපු සෞඛ්‍ය අමාත්‍ය කෙහෙළිය රඹුක්වැල්ල  අප්‍රේල් 22 වනදා දක්වා නැවතත් රක්ෂිත බන්ධනාගාර ගත කර තිබේ.

ඒ මහතා ඇතුළු සැකකරුවන් පිරිසක් ව අද (08) දින මාළිගාකන්ද මහෙස්ත්‍රාත් අධිකරණයට ඉදිරිපත් කෙරිණි.

අප අධිකරණ වාර්තාකරු සඳහන් කළේ පළවෙනි, දෙවැනි, තුන්වැනි, හතරවැනි, හයවැනි, හත්වැනි සහ අටවැනි සැකකරුවන් එහිදී නැවතත් රක්ෂිත බන්ධනාගාරගත කළ බවත් 5 වැනි සැකකරුව මීට පෙර ඇප මත මුදාහැර ඇති බවත් ය.

එසේම 10 වන සහ 11 වන සැකකරුවන්ට ඇප දෙනවාද නැත්ද යන්න සම්බන්ධයෙන් තීරණය කිරීම සඳහා ඔවුන්ව නැවතත් 10 වනදා අධිකරණයට ඉදිරිපත් කරන ලෙස මහෙස්ත්‍රාත්වරිය නියෝග කළ අතර එතෙක් ඔවුන්ව නැවතත් රක්ෂිත බන්ධනාගාර ගත කෙරිණි.

මෙම නඩුව සඳහා සැකකරුවන් 11 දෙනෙක් සිටින අතර ඉන් 09 වන සැකකරු වන වෛද්‍ය ජයනාත් බුත්පිටිය විදෙස් ගතව සිටින බව සඳහන් ය.

කොම්පඤ්ඤවීදිය, විනිසුරු අක්බාර් මාවත හා උත්තරානන්ද මාවත සම්බන්ධ කරමින් දුම්රිය මාර්ගයට ඉහළින් ඉදිකරන ලද ද්විත්ව ගුවන් පාලම ජනාධිපති රනිල් වික්‍රමසිංහ  විසින් අද (08) ජනතා අයිතියට පත් කරන ලදී.

මෙම ව්‍යාපෘතියේ සෙසු ඉදිකිරීම් කටයුතු සැප්තැම්බර් මාසය වන විට අවසන් කිරීමට සැලසුම් කර ඇති අතර, සමස්ත ව්‍යාපෘතිය වෙනුවෙන් ඇස්තමේන්තුගත මුදල රුපියල් 5,278,081,272.43කි.

රජයේ කාර්යාල, රෝහල්, ආගමික ස්ථාන, ආපනශාලා, චිත්‍රපට ශාලා ඇතුළු විවිධ ආයතනයන්ගෙන් සමන්විත ඉතා කාර්යබහුල වාණිජ නගරයක් වන කොම්පඤ්ඤවීදිය ප්‍රදේශයේ පිහිටි දුම්රිය හරස් මාර්ගය හේතුවෙන් දෛනිකව පැය 3කට ආසන්න කාලයක් අපතේ යන බවට නිරීක්ෂණය වී තිබේ.

එම ප්‍රමාදය මඟහරවා ගැනීම ඉලක්ක කර මාර්ග සංවර්ධන අධිකාරිය විසින් සිදු කරන මෙම ව්‍යාපෘතියේ ඉදිකිරීම් කටයුතු මාගා ඉංජිනේරු සමාගම (Maga Engineering) විසින් සිදු කරයි.

ප්‍රවාහන, මහාමාර්ග හා ජනමාධ්‍ය අමාත්‍ය බන්දුල ගුණවර්ධන, එක්සත් ජාතික පක්ෂ සභාපති, පාර්ලිමේන්තු මන්ත්‍රී වජිර අබේවර්ධන, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක, ප්‍රවාහන හා මහාමාර්ග අමාත්‍යාංශයේ ලේකම් ආර්. ඩබ්. ආර්. පේමසිරි, මාර්ග සංවර්ධන අධිකාරියේ සභාපති චමින්ද අතලුවගේ, මාර්ග සංවර්ධන අධිකාරියේ අධ්‍යක්ෂ ජනරාල් ප්‍රියන්ත සූරියබණ්ඩාර යන මෙම අවස්ථාවට එක්ව සිටියහ.

ජේ.ආර්. ජයවර්ධන ජනාධිපතිවරයා සමඟ කටයුතු කරමින්, රණසිංහ ප්‍රේමදාස ජනාධිපතිවරයා යටතේ පක්ෂය ආරක්ෂා කරමින්, ඩී.බී. විජේතුංග ජනාධිපතිවරයා සමඟ ද කටයුතු කර එක්සත් ජාතික පක්ෂයෙන්ම අග්‍රාමාත්‍ය ධූරයට පත්ව, රටේ නායකත්වය කරා තමා පැමිණියේ එක්සත් ජාතික පක්ෂයේ පරපුරක උරුමය සමඟ බව ජනාධිපති රනිල් වික්‍රමසිංහ පැවසීය.

සජිත් ප්‍රේමදාස මහතා එක්සත් ජාතික පක්ෂය දෙකඩ කර සමගි ජන බලවේගය ගොඩනැඟූ බවත්, ඒ පිළිබඳ තමන් කණගාටු වන්නේ එතුමාගේ පියාගේ පාලන සමයේ දී පක්ෂය කැඩීයාමට ගිය අවස්ථාවේ පක්ෂය ආරක්ෂා කර දුන්නේ තමන් වීම නිසා බවත් ජනාධිපතිවරයා කියා සිටියේය.

ජනාධිපති රනිල් වික්‍රමසිංහ මේ බව සඳහන් කර සිටියේ මහනුවර ජනාධිපති මන්දිරයේදී අද (07) පැවති එක්සත් ජාතික පක්ෂ ක්‍රියාකාරී හමුව අමතමිනි.

එක්සත් ජාතික පක්ෂය කැඩී යාමට ඉඩ නොතැබුවා නම් අද එක්සත් ජාතික පක්ෂය ශක්තිමත්ව ඉදිරියට පැමිණෙන බව මෙහිදී පෙන්වා දුන් ජනාධිපතිවරයා, පක්ෂය දෙකඩ කරමින් ගොඩනැඟු සමගි ජනබලවේගය තුළ අද එක්සත් ජාතික පක්ෂයේ ප්‍රතිපත්ති නොමැති බවත්, එම පක්ෂය තුළ එක්සත් ජාතික පක්ෂයේ අයෙකු නම් කිරීම කිසාගෝතමිය අබ ඇටයක් සොයා ගිය ගමනටත් වඩා අසීරු වී ඇති බවත් පෙන්වා දුන්නේය.

එක්සත් ජාතික පක්ෂයේ නායකයාට ජනාධිපති ධූරය ලබා දීම නිසා පොහොට්ටුවෙන් ඉවත් වු පිරිස සමඟ එක්ව අගමැති ධූරය භාර ගැනීමට සූදානම් වු සමගි ජන බලවේගය තුළ අද ඇත්තේ ප්‍රතිපත්තියක් නොව, වෛරයක් බවද පෙන්වා දුන් ජනාධිපතිවරයා එක්සත් ජාතික පක්ෂය කිසිදා වෛරී දේශපාලනයක නිරත නොවන බවත් අද දවසේ සැබෑ අවශ්‍යතාවය වී තිබෙන්නේ රටේ ආර්ථිකය දියුණු කිරීම බවත් ප්‍රකාශ කළේය.

මෙහිදී වැඩිදුරටත් අදහස් දැක්වු ජනාධිපති රනිල් වික්‍රමසිංහ මෙසේ ද පැවසීය.

අද අප මෙහි රැස් වී සිටිනේ වෙනස් දේශපාලන වාතාවරණයක් තුළයි. 2022 අර්බුදය සමඟ රටේ ආර්ථිකය මෙන්ම දේශපාලන පක්ෂ ක්‍රමයද කැඩී ගියා. අද අපේ මූලික වගකීම වන්නේ කුමන දේශපාලන පක්ෂයකට අයත් වුවත් රටේ ආර්ථිකය බේරාගෙන ජනතාව ජිවත් කරවීමයි.

එක්සත් ජාතික පක්ෂය මෙම ආර්ථික අර්බුදය මුල සිටම හඳුනාගෙන සිටියා. අපි 2020 මැතිවරණයේ දී ප්‍රකාශ කළා මේ ආර්ථික අර්බුදයට මුහුණ දෙන්න නම් ඩොලර් බිලියන 03ක් අවශ්‍යයි කියලා. එසේ ප්‍රකාශ කළේ එක්සත් ජාතික පක්ෂය පමණයි.

නමුත් පිරිසක් එක්සත් ජාතික පක්ෂය කඩලා සජිත් ප්‍රේමදාස මහතා සමඟ සමගි ජන බලවේගය ඇති කරගත්තා. මා කණගාටු වන්නේ එතුමාගේ පියා යටතේ පක්ෂය කැඩී යාමට ගිය අවස්ථාවේ එදා පක්ෂය ආරක්ෂා කරදුන්නේ මම වීම නිසයි. කෙසේ හෝ මෙම පක්ෂය කඩන්නේ නැතිව අප ඉදිරියට ගියා නම් දේශපාලන වශයෙන් අද අප ශක්තිමත් පක්ෂයක්. අපට ආණ්ඩුවක් හදන්න අවස්ථාව තිබුණා.

මහින්ද රාජපක්ෂ අගමැතිවරයා ඉවත් වන විට ඔවුන් ප්‍රකාශ කළේ අපට මෙය කරන්න බැහැ කරන්න පුළුවන් අයෙකුට සහාය ලබා දෙනවා කියලයි. එම කාලයේදී ඔවුන්ගේ සහාය අවශ්‍යව තිබුණා.

ඇයි එදා අපට එක්වෙලා ආණ්ඩු බලය ලබාගන්න නොහැකි වුණේ. එක්සත් ජාතික පක්ෂයේ කොටසක් අද විපක්ෂයේ සිටින්නේ පක්ෂය කැඩුව නිසයි. ඒ වගේම මම අගමැති ධූරයට පත්වූ අවස්ථාවේ මට සහාය දෙන්න කියලා මම නැවත ඉල්ලා සිටියා. නමුත් එම සහයෝගය හිමි වුණේ නැහැ.

ඉන්පසුව මේ රටේ විශාල අර්බුදයක් ඇති වුණා. මම අගමැතිවරයා ලෙස ජනාධිපති ධූරය භාර ගැනීමට නියමිතව තිබුණා. එවිට කිව්වා සමගි ජන බලවේගයට ජනාධිපති ධූරය අවශ්‍ය නිසා විපක්ෂ නායකව ජනාධිපති කරන්න කියලා. ඉන්පසුව එක්සත් ජාතික පක්ෂයේ නායකයාට රටේ ජනාධිපතිකම දෙනවා කියලා පොහොට්ටුවෙන් ඉවත් වු පිරිස සමඟ එකතු වෙලා අගමැති වෙන්න සුදානම් වුණා.

රටේ අසීරු අවස්ථාවේදී පොහොට්ටුවේ බහුතරයක් ප්‍රකාශ කළා අගමැතිවරයාට අවස්ථාව දෙමු, අප සහාය ලබා දෙන්නම් කියලා. සුළුතරයක් ඊට විරුද්ධ වුණා. පොහොට්ටුවේ සභාපති ජී.එල්. පීරිස් මහත්මයා කිව්වා පොහොට්ටුවේ සහය දෙන්න ඕන පොහොට්ටුවේ සාමාජිකයෙක්ට කියලා. ඉන්පසුව ඔහු ඇතුළු සුළුතරයක් විපක්ෂයට ගියා. පොහොට්ටුවේ අපේක්ෂකයෙක් ජනාධිපති ඡන්දයට ඉදිරිපත් කරන්න ඕන කිව්වා. එවිට හිටපු අමාත්‍ය ඩලස් අලහප්පෙරුමව ඉදිරිපත් කළා. එවිට සජිත් ප්‍රේමදාස මහත්මයා පොහොට්ටුවේ අගමැති වෙන්න සූදානම් වුණා. මුලින් අගමැති ධූරය භාර ගන්න බැහැ කියලා පැනලා ගියා.

කෙසේ හෝ මම ජනාධිපති ධූරයට පත් වුණා. මම එම වගකීම භාරගත්තේ දේශපාලනය ගැන හිතලා නොවෙයි, රට ගැන හිතලා. ඒ සඳහා සෑම පක්ෂයකම සහාය ඉල්ලුවා. කෙසේ හෝ අප සියලුදෙනා එකට එකතුව මේ ප්‍රශ්නය විසඳා තිබෙනවා. පොහොට්ටුව සහ එක්සත් ජාතික පක්ෂය එදා ගම්වල එකිනෙකාට විරුද්ධව කටයුතු කළ කණ්ඩායම්. නමුත් අපි රට වෙනුවෙන් එකතු වුණා. දැන් රටේ ආර්ථිකය සාමාන්‍ය තත්ත්වයට පත්වෙමින් තිබෙනවා.

එදා සමගි ජන බලවේගය කිව්වේ එක්සත් ජාතික පක්ෂය තිබෙන්නේ අපේ ළඟයි, අපට සිරිකොත පමණයි නැත්තේ, අපට බලය ලබා දෙන්න අපි සිරිකොත අල්ල ගන්නවා කියලා. දැන් සන්ධානයක් හදලා ජී.එල් පීරිස් ඇතුළු පොහොට්ටුවේ කණ්ඩායම සමගි ජන බලවේගය අල්ලගෙන තිබෙනවා.

අද සජිත් සමඟ එකට අසුන් ගන්නේ රංජිත් මද්දුමබණ්ඩාර මහත්මයා පමණයි. එක්සත් ජාතික පක්ෂයේ වෙන කිසිවෙක් එහි නැහැ. අද සමගි ජන බලවේගය තුළ එක්සත් ජාතික පක්ෂයේ අයෙකු නම් කිරීම කිසාගෝතමියට අබ ඇටයක් සොයා ගැනීමටත් වඩා අසීරු කාර්යයක් වී තිබෙනවා.

අද සමගි ජන බලවේගය තුළ එක්සත් ජාතික පක්ෂයේ ප්‍රතිපත්ති නැහැ. එසේ නම් අද ඔවුන්ට එක්සත් ජාතික පාක්ෂිකයන් කියන්න බැහැ. පසුගිය මැතිවරණයේදී කිව්වේ නියම එක්සත් ජාතික පක්ෂය තිබෙන්නේ ඔවුන් ළඟ කියලා. එවිට එක්සත් ජාතික පක්ෂයේ පිරිසක් ඔවුන්ට ඡන්දය දුන්නා. දැන් ජී.එල්. පීරිස් ඇතුළු පොහොට්ටුවේ කණ්ඩායමට සමගි ජන බලවේගයට යට වුණහම ඊට එක්සත් ජාතික පක්ෂය කියන්නේ කොහොමද කියලා මම අහන්න කැමතියි. ඒ නිසා සමගි ජන බලවේගය ගමේ එක්සත් ජාතික පාක්ෂිකයන් නොමඟ යවා තිබෙනවා. ඔවුන් නැවත එක්සත් ජාතික පක්ෂය වටා පෙළගැසිය යුතුයි.

ජේ.ආර්. ජයවර්ධන මහතා සමග කටයුතු කර, ප්‍රේමදාස ජනාධිපතිවරයාව ආරක්ෂා කරමින් ඔහු සමග කටයුතු කර, ඩී.බී. විජේතුංග මහතාව ජනාධිපති කර එම පක්ෂයෙන්ම අගමැති වී ඉන්පසුව මම රටේ නායකත්වයට පත් වුණා. මා ඉදිරියට පැමිණියේ එවන් පරපුරක උරුමය සමඟයි. එක්සත් ජාතික පක්ෂය නැති කිරීමට ඇතැමුන් උත්සාහ කළා. ඒ නිසා එක්සත් ජාතික පක්ෂය ආරක්ෂා කර ගැනීමට ඡන්දය ලබා දුන් දෙලක්ෂ පනස්දහසට මම ස්තූතිවන්ත වෙනවා. දැන් අප එක්සත් ජාතික පක්ෂය ලෙස එක්ව කටයුතු කළයුතුයි. ඒ සඳහා ගමේ පාක්ෂිකයන් එක්කරගත යුතුයි.

අසීරු කාලයේ රට බේරගන්න පක්ෂ බේදයකින් තොරව අපි සියලුදෙනා එකට එකතු වුණා. ඇතැම් අය චෝදනා කරනවා මහින්ද රාජපක්ෂ සමඟ එක් වුණා කියලා. පොදුජන පෙරමුණේ බහුතරයක් මට සහාය ලබා දෙන්න එකඟ වුණා. එවිට එම බහුතරය සමඟ එක්වීමට මහින්ද රාජපක්ෂ මහත්මයාට සිදු වුණා. සභාපතිවරයා බහුතරයට විරුද්ධව කටයුතු කළා. මෙහි තිබෙන්නේ වෛරයයි. ප්‍රතිපත්ති නොවෙයි. නමුත් අප තුළ වෛරය නැහැ. අපට අවශ්‍ය රට දියුණු කිරීමටයි.

අද රට තුළ තිබෙන්නේ එදා තිබුණ ආර්ථික තත්ත්වය නොවෙයි. අද සියලු ජනතාවට ජීවත්වීමේ අයිතිය ලැබී තිබෙනවා. අප ආර්ථික වශයෙන් දිනෙන් දින ඉදිරියට යනවා. ඒ සඳහා අපි එකතුවෙලා කටයුතු කරමු.

අද අපි ආරම්භ කර තිබෙන අස්වැසුම සහ උරුමය වැඩසටහන් තුළ තිබෙන්නේ එක්සත් ජාතික පක්ෂයේ ප්‍රතිපත්ති බව කිවයුතුයි. ඒ නිසා මෙම වැඩපිළිවෙළට විරුද්ධවීමට සමගි ජන බලවේගයට හැකියාවක් නැහැ. ඔවුන් ඊට සහාය ලබා නොදෙන්නේ එක්සත් ජාතික පක්ෂයේ ප්‍රතිපත්ති දැන් ඔවුන් ළඟ නොමැති නිසයි.

අද එක්සත් ජාතික පක්ෂයේ ප්‍රතිපත්ති තිබෙන්නේ ඩී.එස්. සේනානායක මැතිතුමාගේ පක්ෂය පිළිගන්න, ජේ.ආර්. ජයවර්ධන මැතිතුමාගේ වැඩපිළිවෙළ පිළිගන්න එමෙන්ම 1989 ප්‍රේමදාස ජනාධිපතිවරයාගේ ආණ්ඩුව ආරක්ෂා කළ අය සිටින තැනයි යන පණිවිඩය ගමේ පාක්ෂිකයාට ලබාදෙන්න කියන ඉල්ලීම මම ඔබෙන් කරනවා.

අමාත්‍ය මනූෂ නානායක්කාර, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක, එක්සත් ජාතික පක්ෂයේ මහ ලේකම් පාලිත රංගේ බණ්ඩාර , හිටපු පාර්ලිමේන්තු මන්ත්‍රී කේ.කේ. පියදාස, එක්සත් ලක්වනිතා පෙරමුණේ සභාපතිනි ශාන්තිනී කෝන්ගහගේ, මහනුවර මහනගර සභාවේ හිටපු නගරාධිපති කේෂර සේනානායක, එක්සත් ජාතික පක්ෂ මහනුවර දිස්ත්‍රික් නායක චානක අයිලප්පෙරුම යන මහත්ම මහත්මීන් ඇතුළු එක්සත් ජාතික පක්ෂ සාමාජිකයන් විශාල පිරිසක් මෙම අවස්ථාවට එක්ව සිටියහ.

උඩරට නැටුම් කලාව ආරක්ෂා කර ගනිමින් ඉදිරියට පවත්වාගෙන යාම සඳහා ගත යුතු ක්‍රියාමාර්ග පිළිබඳ සොයා බැලීමට කමිටුවක් පත් කරන බව ජනාධිපති රනිල් වික්‍රමසිංහ පැවසීය.

සංස්කෘතික කටයුතු අමාත්‍යාංශය, සෞන්දර්ය විශ්වවිද්‍යාලය ඇතුළු අදාළ ආයතන නියෝජනය වන අයුරින් පත් කරනු ලබන මෙම කමිටුවට මහනුවර සාම්ප්‍රදායික නර්තන ශිල්පීන්ගේ නියෝජිතයෙකුද ඇතුළත් කර ගැනීමට උපදෙස් ලබා දෙන බව පැවසූ ජනාධිපතිවරයා, උඩ රට කලා මධ්‍යස්ථානයක් ද ස්ථාපිත කිරීමට ඒ යටතේ කටයුතු කරන බව සඳහන් කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ මහනුවර ජනාධිපති මන්දිරයේ දී අද (07) පෙරවරුවේ මහනුවර සාම්ප්‍රදායික නර්තන ශිල්පීන් හමුවූ අවස්ථාවේදීය.

මහනුවර සාම්ප්‍රදායික නර්තන ශිල්පීන්ට විශ්‍රාම වැටුපක් ලබාදීම සම්බන්ධයෙන් සොයා බලන ලෙස ද ජනාධිපති රනිල් වික්‍රමසිංහ කම්කරු අමාත්‍ය මනුෂ නානායක්කාර මහතාට මෙහිදී උපදෙස් දුන්නේය.

උඩරට නැටුම් කලාව දේශීය මෙන්ම විදේශිය වශයෙන් ප්‍රචලිතව තිබුණද පාරම්පරික සම්ප්‍රදායන් අනුගමනය නොකිරීමේ ගැටළුව පිළිබඳව ද අවධානය යොමු කළ ජනාධිපතිවරයා නව කමිටුව මගින් ඒ පිළිබඳ සොයා බලා සුදුසු ක්‍රමවේදයක් සකස් කිරිමට උපදෙස් ලබා දෙන බවද පැවසීය.

ක්ෂේත්‍රයේ කටයුතු කිරීමේ දී මුහුණ දීමට සිදුව ඇති ගැටළු කිහිපයක් පිළිබඳව මෙහිදී මහනුවර සාම්ප්‍රදායීක නර්තන ශිල්පීන් ජනාධිපතිවරයාව දැනුවත් කළ අතර එම ගැටළු පිළිබඳ සොයා බලා ඔවුන්ට අවශ්‍ය සහාය ලබාදීමට මැදිහත්ව කටයුතු කරන ලෙස ජනාධිපතිවරයා නිලධාරීන්ට උපදෙස් දුන්නේය.

එසේම සබරගමුව නැටුම් කලාව වැනි මෙරට සම්ප්‍රදායික කලා ශිල්ප ආරක්ෂා කර ගනිමින් ඉදිරියට පවත්වාගෙන යාමේ වැදගත්කම ජනාධිපතිවරයා පෙන්වා දුන්නේය.

රටේ ආර්ථිකය නගා සිටුවමින් සියලු ජනතාවට යහපත් රටක් ගොඩනගා දීම වෙනුවෙන් ජනාධිපති රනිල් වික්‍රමසිංහ මහතා ගෙන යන වැඩපිළිවෙළට මෙහිදී මහනුවර සම්ප්‍රදායික නර්තන ශිල්පීන් සිය ප්‍රශංසාව පළ කළහ.

අමාත්‍ය මනූෂ නානායක්කාර, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක, එක්සත් ජාතික පක්ෂ මහ ලේකම් පාලිත රංගේ බණ්ඩාර යන මහත්වරුන් ද මෙම අවස්ථාවට එක්ව සිටියහ.

ශ්‍රී ලංකා නිදහස් පක්ෂයේ දේශපාලන මණ්ඩල රැස්වීමක් හෙට (08) දින කැඳවා ඇති අතර ඒ මේ වන විට පක්ෂයේ උද්ගතවී ඇති තත්ත්වය හමුවේ ඉදිරි ක්‍රියාමාර්ග පිළිබඳව සාකච්ඡා කිරීමේ අරමුණින් ය.

වාර්තා වන ආකාරයට ශ්‍රීලනිප අනුශාසිකා හිටපු ජනාධිපතිනි චන්ද්‍රිකා බණ්ඩාරනායක කුමාරතුංග එහි මුලසුන දැරීමට නියමිත ය.

වැඩිදුරටත් වාර්තා වන ආකාරයට ශ්‍රී ලංකා නිදහස් පක්ෂයේ දේශපාලන මණ්ඩල රැස්වීම එහි ජ්‍යෙෂ්ඨ උප සභාපති නිමල් සිරිපාල ද සිල්වා අමාත්‍යවරයා විසින් හෙට (08) පෙරවරු 10ට පදනම් ආයතනයේ කැඳවා තිබේ.

මැතිවරණ කොමිෂන් සභාව පවත්වාගෙන යනු ලබන ලිපි ගොනුවේ සඳහන් සාමාජිකයින් වන ශ්‍රී ලංකා නිදහස් පක්ෂයේ සභාපති මෛත්‍රීපාල සිරිසේන, දයාසිරි ජයසේකර සහ ශාන් විජයලාල් ද සිල්වා අය හැරුණුකොට අනෙකුත් සාමාජිකයින් ඊට කැඳවා ඇති බව වාර්තා වෙයි.

ශාන් විජයලාල් මේ වන විට සමගි ජනබලවේගය පක්ෂයට එක්ව ඇත.

මේ වන විටත් හිටපු ජනාධිපති මෛත්‍රීපාල සිරිසේන ශ්‍රී ලංකා නිදහස් පක්ෂයේ සභාපති ලෙස කටුයුතු කිරීම වළක්වාලමින් කොළඹ දිසා අධිකරණය අප්‍රෙල් 4 වනදා අතුරු තහනම් නියෝගයක් නිකුත් කර ඇති අතර ඒ හිටපු ජනාධිපතිනි චන්ද්‍රිකා බණ්ඩාරනායක කුමාරතුංග ගොනු කළ පෙත්සමක් විභාගයට ගනිමිනි.

අනතුරුව පක්ෂ මූලස්ථානයේ තිබූ වැදගත් ලිපිගොනු කිහිපයක් අස්ථනගතවී ඇති බවට පක්ෂයේ වැඩබලන මහලේකම්වරයා සිදුකළ පැමිණිල්ලට අනුව ශ්‍රී ලංකා නිදහස් පක්ෂ මූලස්ථානයට කිසිවෙකුට ඇතුළුවීම පොලීසිය ඊයේ තහනම් කළේය.

මෙරට දේශපාලන පක්ෂ ක්‍රමය සකස් විය යුත්තේ රට ආර්ථික වශයෙන් ගොඩනැගීමට මිස පක්ෂයට අවශ්‍ය ලෙස රටේ ආර්ථිකය සකස් කිරීමට නොවන බව ජනාධිපති රනිල් වික්‍රමසිංහ ප්‍රකාශ කළේය.

පක්ෂවල වුවමනාවන්ට අනුව රටේ ආර්ථිකය සකස් කිරීමට ගොස් විශාල අර්බුදයකට රටට මුහුණ දීමට සිදුවූ බව පෙන්වා දුන් ජනාධිපතිවරයා යළි එසේ නොවීමට නම් සාම්ප්‍රදායික දේශපාලනයෙන් මිදිය යුතු බවද කියා සිටියේය.

ජනාධිපති රනිල් වික්‍රමසිංහ  මේ බව සඳහන් කර සිටියේ අනුරාධපුර දිස්ත්‍රික් නීතීවේදීන් සමඟ ඊයේ (06) පැවති හමුවේදීය.

පසුගිය කාලය තුළ සිදු වූ සිදුවීම් හේතුවෙන් රටේ ප්‍රජාතන්ත්‍රවාදය සෙළවීමකට ලක් වූ බව මෙහිදී සිහිපත් කළ ජනාධිපතිවරයා රට තුළ නීතිය හා සාමය ආරක්ෂා කරමින් රට ඉදිරියට ගෙන යාමට එක්වන ලෙස ද මෙහිදී නීතිඥවරුන්ගෙන් ඉල්ලා සිටියේය.

රටේ ආර්ථිකය ගොඩනැගීමට රජය ගෙන යන වැඩපිළිවෙළ වෙනුවෙන් සිය අදහස් සහ යෝජනා ලබාදීමට මෙන්ම සිය වෘත්තීය ඉල්ලීම් කිහිපයක් ද මෙහිදී නීතිඥවරුන් ජනාධිපතිවරයා වෙත ඉදිරිපත් කළේය.

එම ඉල්ලීම් කිහිපයකට එම අවස්ථාවේම විසඳුම් ලබා දීමට ජනාධිපති රනිල් වික්‍රමසිංහ කටයුතු කළ අතර අනුරාධපුර නීතිඥවරුන්ගේ වෘත්තීය තත්ත්වය ඉහළ නැංවිම වෙනුවෙන් නිතිඥ විවේකාගාරයක් ඉදිකිරීමට මුදල් වෙන් කරන බව ද සඳහන් කළේය.

එහිදී වැඩිදුරටත් අදහස් දක්වූ ජනාධිපති රනිල් වික්‍රමසිංහ මෙසේද පැවසීය.

මෙතන විවිධ පක්ෂවල අය ඉන්නවා. මම මෙතනට ආවේ එක්සත් ජාතික පක්ෂයේ නායකයා ලෙස නොවෙයි. මම ජනාධිපතිවරයා ලෙසයි ඔබ සියලුදෙනා වෙනුවෙන් කටයුතු කරන්නේ. දැන් අපි සම්ප්‍රදායිකව සිතු කාලය අවසන් වෙලා තිබෙනවා. සම්ප්‍රදායික දේශපාලන නිසා අපිට මේ අසීරු තත්ත්වයට මුහුණ දීමට සිදු වුණා. අපි එයින් ඉවත්විය යුතුයි.
පක්ෂ ක්‍රමය සකස් විය යුත්තේ රටේ අවශ්‍යතාවය අනුවයි. පක්ෂ ක්‍රමයේ වුවමනාවට රට හදන්න බැහැ. එය සිදු කිරීමට යාම නිසා තමයි පසුගිය කාලයේ අභියෝග රැසකට මුහුණ දීමට සිදුවුණේ. එහිදී කිසිවෙකු වගකීම භාරගත්තේ නැහැ. අවසානයේ ආණ්ඩුව හදන්නවත් කිසිවෙක් ඉදිරිපත් වුණේ නැහැ.

ප්‍රධාන පක්ෂ එකට එක් වී මේ පිළිබඳ සාකච්ඡා කිරීම වඩා සුදුසු බව මගේ විශ්වාසයයි. පැරණි පක්ෂ වන එක්සත් ජාතික පක්ෂය සහ ශ්‍රී ලංකා නිදහස් පක්ෂය මත තමයි එදා ගම ගොඩනැගුණේ. නමුත් දැන් නව පක්ෂ ගණනාවක් බිහි වී තිබෙනවා. ඉදිරි මැතිවරණයේදී මේ සියල්ල වෙනස් විය හැකියි. පක්ෂ පිළිබඳ නොසිතා රට ගැන සිතා කටයුතු කළයුතුව තිබෙනවා. නැත්නම් සිදු වන්නේ බෙදීමක් පමණයි.

අපි පසුකළේ ඉතා කණගාටුදායක කාලයක්. අපේ මන්ත්‍රීවරයෙක් මහමගදී පහරදී ඝාතනය කළා. අපි නැවත එම තත්ත්වයට යා යුතුද කියලා මම සියලුදෙනාගෙන් අහන්න කැමතියි. ඇතැම් දේශපාලනඥයන් මෙය අනුමත කළා. මානව හිමිකම් වෙනුවෙන් පෙනී සිටින නීතිඥ සංගමයවත් මෙය හෙළා දැකීමට පියවර ගත්තේ නැහැ.

එදා ඝාතනය කෙරුණේ ප්‍රජාතන්ත්‍රවාදයෙන් තේරි පත් වූ මන්ත්‍රීවරයෙක්. එදා මේ රටේ ප්‍රජාතන්ත්‍රවාදය තිබූ තැන අද අප අමතක කර තිබෙනවා.

පාර්ලිමේන්තුවේ බහුතරයක් තිබෙන පුද්ගලයා තමයි අගමැතිවරයා විය යුත්තේ. එය නොමැතිනම් වෙනත් අයෙකුට අගමැති ධූරයට පත්විය හැකියි. අගමැතිවරයාගේ නිවසට ගිනි තබා අයින් වෙන්න කියනව නම්, අගමැතිවරයාට ඉල්ලා අස්වන ලෙස විපක්ෂය කියනවා නම් රටේ ප්‍රජාත්න්ත්‍රවාදයක් තිබෙනවාද කියා අහන්න කැමතියි. එංගන්තය වැනි රටක මෙය සිදුවුවහොත් කුමක් වෙයිද, ඒ නිසා දැන් අපට තිබෙන්නේ රට තුළ ප්‍රජාතන්ත්‍රවාදය ශක්තිමත් කිරීමයි.

එම මූලධර්ම අනුව පක්ෂයෙක් කිසිවෙකුට කරදරයක් සිදු වුවහොත් එය හෙළා දැකිය යුතුයි. විපක්ෂයේ සිටි කුමාර වෙල්ගම මහතාත් මෝටර් රථය තුළට දමා ගිනි තැබීමට උත්සාහ කළ අවස්ථාවේ එහි සිටි පිරිසක් එතුමා බේරගනු ලැබුවා. ඔහු හොරෙක්වත්, මිනීමරුවෙක්වත් නොවෙයි.

ඒ නිසා අප රට තුළ නීතිය හා සාමය තහවුරු කළයුතුයි. එහිදි අප සියලුදෙනා එකට වැඩකළයුතුයි. ඇතැම් පක්ෂ කියනවා සොරුන්ට දඩුවම් කරනවා කියලා. සොරකමට අපි විරුද්ධයි. නමුත් පක්ෂවලට ඔවුන්ට දඩුවම් කරන්න බැහැ. සොරුන්ව හොයාගෙන අධිකරණයට ඉදිරිපත් කරනවා කියලා ප්‍රකාශ කරනවා නම් එය නිවැරදියි. ඒ වගේම ඔන්ලයින් ගෙන ආ විට ප්‍රජාතන්ත්‍රවාදය නැති වෙනවා කියලා කියනවා. ඒ නිසා මේ පැරණි දේශපාලනයෙන් අප ඉවත්විය යුතුයි.

අප සියලුදෙනා අලුතින් සිතිය යුතුයි. පසුගිය සමයේ රටේ ප්‍රජාතන්ත්‍රවාදය සෙළවිමකට ලක් වුණා. ඒ නිසා රට තුළ පිළිපැන්න ප්‍රජාතන්ත්‍රවාදය නිසි මගට ගෙන රට ඉදිරියට ගෙන යාමට එක්වෙමු කියලා ඔබ සියලු දෙනාට මම ආරාධනා කරනවා.

නීතිඥවරුන් අසන ලද ප්‍රශ්න කිහිපයක් සහ ඒවාට ජනාධිපතිවරයා ලබාදුන් පිළිතුරු මෙසේය,

ප්‍රශ්නය
අනුරාධපුර නගරය සංචාරක කලාපයක් ලෙස සංවර්ධනය කිරීමට විධිමත් වැඩපිළිවෙළක් සකස් කළහොත් අනුරාධපුර නගරය පුළුල් කිරීමට එය හොද අවස්ථාවක් වනු ඇතැයි යෝජනා කරන්න කැමැතියි.

පිළිතුර
ඉඩම් සම්බන්ධව ගැටළු රැසක් මතුව තිබෙනවා. ඒ නිසා රජයේ ඉඩම් පිළිබඳ අයිතිය එක් ආයතනයක් යටතට ගෙන ඒමට අප කටයුතු කරනවා. ඒ අනුව විධිමත් සැලැස්මක් යටතේ මෙම පළාත දියුණු කිරිමට අපේක්ෂා කරනවා. ප්‍රධාන පෙළේ සංචාරක හෝටල් කිහිපයක්ම මෙහි ආයෝජන සඳහා කැමැත්ත පළ කර තිබෙනවා. අප ඔවුන්ට ද අවස්ථාව ලබාදිය යුතුයි. ඒ අනුව මෙම අනුරාධපුර නගරය සංචාරක කලාපයක් ලෙස සංවර්ධනය කිරීමට නිසි සැලැස්මක් අනුව කටයුතු කරනවා.

ප්‍රශ්නය
රට ආර්ථික අර්බුදයක පවතින අවස්ථාවක ආදායම් මාර්ග උත්පාදනය කරගන්නා අතරම රාජ්‍ය ආයතනවල සිදුවන නාස්තිය අවම කර ගැනීම ද අත්‍යාවශ්‍යයි. මිලියන ගණනක් අහිමි කර ගනිමින් රජයේ දෙපාර්තමේන්තු සහ සංස්ථා විසින් සිදුකරන මිලදීගැනීම් සහ ක්‍රමසම්පාදනයන් පිළිබඳ නව නිති ගෙන ඒමට කටයුතු කරනවාද කියා දැන ගැනිමට කැමතියි.

පිළිතුර
රාජ්‍ය ආයතන තුළ සිදුවන නාස්තිය නැති කිරීමේ වැඩපිළිවෙළ දැනටමත් අප ආරම්භ කර තිබෙනවා. මේ පිළිබඳ සොයා බලා වාර්තා කිරීම සඳහා පාර්ලිමේන්තු කමිටු ගණනාවක් පත් කර තිබෙනවා. ඒ වගේම විශේෂඥ දැනුම ලබාගෙන රජයේ දෙපාර්තමේන්තු සහ සංස්ථා ගණන අඩු කිරීමට සැලසුම් කර තිබෙනවා.
ඇතැම් විෂයයන්ට දෙපාර්තමේන්තු, සංස්ථා ගණනාවක් තිබෙනවා. ඒ නිසා සම්පුර්ණ රාජ්‍ය ව්‍යුහයම වෙනස් කළ යුතුව තිබෙනවා. ඒ වගේම පුළුල් වැඩකොටසක් පළාත් සභාවලට භාරදීමට අප ඉදිරියේදී කටයුතු කරනවා.

අප දැනට ප්‍රමුඛත්වය දිය යුත්තේ රටේ ආර්ථිකය ගොඩනැඟීම සඳහායි. ඒ නිසා මෙම වැඩපිළිවෙළ ඉදිරි වසර කිහිපය තුළ ක්‍රියාත්මක කිරීමට අපි සැලසුම් කර තිබෙනවා. මෙම ක්‍රියාකාරී වැඩසටහන් පිළිබඳ අප ලෝක බැංකුව සහ ආසියානු සංවර්ධන බැංකුව සමග කටයුතු කරගෙන යනවා. මෙම තත්ත්වයට එංගලන්තයටත් මුහුණදීමට සිදු වුණා. 1979 පසු එහි විශාල ලෙස ප්‍රතිසංවිධානයක් සිදු වුණා.

අමාත්‍ය මනූෂ නානායක්කාර, රාජ්‍ය අමාත්‍ය ෂෙහාන් සේමසිංහ, පාර්ලිමේන්තු මන්ත්‍රී දුමින්ද දිසානායක හිටපු අමාත්‍ය පී. හැරිසන්, එක්සත් ජාතික පක්ෂ මහලේකම් හිටපු අමාත්‍ය පාලිත රංගේ බණ්ඩාර, ජනාධිපති අධ්‍යක්ෂ ජනරාල් (ප්‍රජා කටයුතු පිළිබඳ) රජිත කීර්ති තෙන්නකෝන්, ජනාධිපති වෘත්තිය සමිති අධ්‍යක්ෂ ජනරාල් සමන් රත්නප්‍රිය, උතුරු මැද පළාත් හිටපු විපක්ෂ නායයක නීතිඥ කස්තුරි අනුරාධනායක යන මහත්වරු සහ අනුරාධපුර නීතිඥ සංගමයේ සාමාජිකයන් විශාල පිරිසක් මෙම අවස්ථාවට එක්ව සිටියහ.

ග්‍රාම නිලධාරීන් සඳහා ගෙවනු ලබන දීමනා සංශෝධනය කිරීමට රජය තීරණය කර ඇති අතර ඒ අනුව, අප්‍රේල් මස පළමුවන දින සිට ක්‍රියාත්මක වන පරිදි ග්‍රාම නිලධාරීන් සඳහා ලබාදෙන කාර්යාල දීමනා හා ලිපිද්‍රව්‍ය දීමනා ඉහළ දමා ඇත.

ඊට අදාළ චක්‍ර ලේඛය රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යංශ ලේකම්වරයා විසින් සියලු දිස්ත්‍රික් ලේකම්වරුන්, දිසාපතිවරුන් හා ප්‍රාදේශීය ලේකම්වරුන් වෙත නිකුත් කර තිබෙන බවද වාර්තා වෙයි .

ඒ අනුව මහනගර සභා, නගර සභා සීමාව තුළ මාසික කාර්යාල දීමනාව රුපියල් 3,000 දක්වා ඉහළ දමා ඇති අතර ප්‍රාදේශීය සභා සීමාව තුළ මාසික කාර්යාල දීමනාව රුපියල් 2,000 දක්වා ඉහළ දමා ඇත.

වාර්ෂික ලිපි ද්‍රව්‍ය දීමනාව ද රුපියල් 3,000 දක්වා ඉහළ දමා ඇති බව රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යංශය සඳහන් කර සිටියි .

ප්‍රථමවරට මෙරට බීජ වර්ග කිහිපයක් අපනයනය සඳහා සූදානම් කර තිබේ.

ඒ අනුව මිරිස්, වම්බටු , මාළු මිරිස් හා බණ්ඩක්කා සහ බඩඉරිඟු විශේෂ කිහිපයක් සාර්ථක ලෙස අත්හදා බලා ඇති අතර එම බීජ සඳහා ඉහළ ඉල්ලුමක් විදේශ රටවල් ගණනාවකින් ඉදිරිපත් ව ඇත.

කෘෂිකර්ම දෙපාර්තමේන්තුව හා මෙරට පුද්ගලික අංශය එක්ව මෙම නව බීජ වර්ග පීළිබඳ පර්යේෂණ සිදු කර ඇති අතර බීජ පිළිබඳ පර්යේෂණ කෘෂිකර්ම දෙපාර්තමේන්තුවේ විශේෂඥයින් විසින් සිදු කර තිබේ.

එමෙන්ම එම බීජ වැඩි දියුණු කිරීම හා සැකසීම ඉහළම තාක්ෂණය හා විශේෂඥ සහයෝගය ලබා ගනිමින් මෙරට පුද්ගලික අංශය විසින් සිදු කර ඇත.

ඒ අනුව මෙම වසර තුළ පළමුවරට මෙරටින් ඉහත සඳහන් කළ බීජ වර්ග යම් ප්‍රමාණයක් අපනයනය සඳහා සූදානම් කර ඇති බව කෘෂිකර්ම අධ්‍යක්ෂ ජනරාල් මාලතී පරසුරාමන්  කෘෂිකර්ම හා වැවිලි කර්මාන්ත අමාත්‍ය මහින්ද අමරවීරට දැනුම් දුන්නේය.

ඊයේ (06) පස්වරුවේ අමාත්‍යවරයා පැල්වෙහෙර CIC ගොවිපොළේ පර්යේෂණ වගාවන් නිරීක්ෂණය කළේය.

මෙහිදී අදහස් පළ කළ අමාත්‍යවරයා මෙතෙක් විවිධ බෝගවර්ග සදහා බීජ වර්ග විදේශ රටවලින් මෙරටට ආනයනය කළ ද මේ වනවිට අපේ රටේ වගාවට ඉතාමත් උචිත බීජ නිෂ්පාදනය කෙරෙමින් තිබීමඅගය කළ යුතු යැයි ද ප්‍රකාශ කළේය.

කෘෂිකර්ම දෙපාර්තමේන්තුව විසින් හඳුන්වා දුන් MICH 1 -2 මිරිස් ප්‍රභේදය මේ වනවිට රට පුරා ඉතාමත් සාර්ථකව අස්වනු ලබා දෙමින් ඇත. එම මිරිස් වගාවෙන් අඛණ්ඩව මාස 09ක් අස්වනු ලබා ගැනීමට හැකියාව තිබේ. මේ අයුරින්ම සාර්ථක ලෙස බඩඉරිඟු ඇතුළත් තවත් එළවළු බෝගවර්ග ගණනාවක් හා පලතුරු ප්‍රභේද ගණනාවක් සම්බන්ධව සිදු කළ පර්යේෂණ සාර්ථකවීම මත ඉදිරියේ දී මෙරටට බීජ ආනයනය කිරීම නැවැත්වීමට හැකිවනු ඇතැයි ද අමාත්‍යවරයා පැවසීය.

මේ නිසා බීජ වර්ගවල මිල ගණන් සියයට 50කින් පමණ අවම වනු ඇත. අපේ රටේ ගොවීන්ට ආනයනික බීජවලට ඉතාමත් අඩු මිලකට මෙම බීජ වර්ග මිල දී ගැනීමට අවස්ථාව සලසන්නැයි ද අමාත්‍යවරයා නිලධාරින්ට උපදෙස් දුන්නේය.

මෙම අවස්ථාවට කෘෂිකර්ම දෙපාර්තමේන්තුවේ අධ්‍යක්ෂ ජනරාල් මාලති පරසුරාමන්ද සහභාගි වූවාය.