පුවත්

බිත්තර මිල සම්බන්ධයෙන් නව ගැසට් නිවේදනයක් නිකුත් කර ඇත.

ඊට අනුව සුදු බිත්තරයක උපරිම සිල්ලර මිල රුපියල් 44.00 ක් වන අතර රතු බිත්තරයක උපරිම සිල්ලර මිල රුපියල් 46ක් විය යුතුය.

අදාළ ගැසට් පත්‍රය පාරිභෝගික කටයුතු අධිකාරියේ සභාපතිවරයා විසින් නිකුත්කර තිබේ.

රී ලංකාව සහ ඉන්දියාව අතර ඒකාබද්ධ පොදු වැඩසටහනක් ක්‍රියාවට නැංවීමට ජනාධිපති රනිල් වික්‍රමසිංහ  සහ ඉන්දීය විදේශ කටයුතු අමාත්‍ය ආචාර්ය එස්. ජයශංකර්  අතර පැවති සාකච්ඡාවේ දී එකඟතාව පළ කෙරිණි.

ජනාධිපති රනිල් වික්‍රමසිංහ  සහ ඉන්දීය ‍විදේශ අමාත්‍යවරයා අතර හමුව අද (20) පෙරවරුවේ ජනාධිපති කාර්යාලයේ දී පැවැත්වුණු අතර මෙහිදී ජනාධිපතිවරයා විසින් ඉන්දීය විදේශ අමාත්‍යවරයාව ඉතා සුහදශිලීව පිළිගනු ලැබීය.

මෙම නිල සාකච්ඡාවලට පෙර ජනාධිපති රනිල් වික්‍රමසිංහ  සහ ඉන්දීය විදේශ අමාත්‍යවරයා කොළඹ, පැජට් පාරේ පිහිටි ජනාධිපති නිල නිවසේ දී විශේෂ සාකච්ඡාවකට ද එක් වූහ.

දෙරට අතර දේශපාලන, ආර්ථික සහ සමාජයීය කරුණු රැසක් පිළිබඳ මෙන්ම ආයෝජන කටයුතු සම්බන්ධයෙන් ද එහිදී දීර්ඝ ලෙස සාකච්ඡා කෙරිණි.

ශ්‍රී ලංකාවේ ණය ප්‍රතිව්‍යුහගතකරණ කටයුතු පිළිබඳ විශේෂ අවධානයක් යොමු වූ අතර ඒ පිළිබඳ ඉන්දීය රජය පාර්ශ්වයෙන් සුබවාදී ප්‍රතිචාරයක් පළ විය.

‍ඉන්දීය හිටපු අග්‍රාමාත්‍ය පී.වී නරසිම්හ රාඕගේ පාලනය ආරම්භ වූ 1991 වර්ෂයේදී ඉන්දියාවට ද අද ශ්‍රී ලංකාව මුහුණ දී ඇති අන්දමේ ආර්ථික අර්බුදයකට මුහුණදීමට සිදුවූ බව සිහිපත් කළ ඉන්දීය විදේශ අමාත්‍යවරයා ඉන්දීය රජය එම අර්බුදය සමනය කර ගනු ලැබුවේ රජය සතු රන් සංචිත උකස් තැබීමේන් බව ද සිහිපත් කළේය.

එබැවින් අද ශ්‍රී ලංකාව මුහුණ දී සිටින තත්ත්වය පිළිබඳ මනා අවබෝධයක් ඉන්දියාවට ඇති බව පැවසූ ජයශංකර් ශ්‍රී ලංකාව මුහුණ දී ඇති වත්මන් ආර්ථික ගැටලු විසඳා ගැනීමට ඉන්දීය රජයෙන් ලබාදිය හැකි සෑම සහායක්ම ලබා දෙන බව පැවසීය.

අනතුරුව ජනාධිපති කාර්යාලයේ දී ජනාධිපති රනිල් වික්‍රමසිංහ  සහ ඉන්දීය විදේශ අමාත්‍යවරයා අතර පැවති හමුවේ දී ගිවිසුමකට අත්සන් තැබුණු අතර ඉන්දීය රජයේ සහාය ඇතිව ක්‍රියාත්මක සංවර්ධන ව්‍යාපෘති කිහිපයක් මාර්ගගත තාක්ෂණය ඔස්සේ විවෘත කිරීම ද සිදු විය.

ඉන්දීය රජයේ සහාය මත මෙරට ක්‍රියාත්මක ඉහළ බලපෑමක් ඇති ප්‍රජා සංවර්ධන ව්‍යාපෘතිවල (HICDP- High Impact Community Development Project ) සීමාවන් ඉහළ නැංවීමට අදාළ ද්වීපාර්ශ්වීය ගිවිසුමට මෙහිදී අත්සන් තැබිණි.

ශ්‍රී ලංකා පාර්ශ්වය වෙනුවෙන් මුදල් අමාත්‍යාංශයේ ලේකම් මහින්ද සිරිවර්ධන ගිවිසුමට අත්සන් තැබූ අතර ඉන්දීය පාර්ශ්වය වෙනුවෙන් ශ්‍රී ලංකාවේ ඉන්දීය මහකොමසාරිස් ගෝපාල් බාග්ලේ  ඊට අත්සන් තැබීය.

ඉන්දීය රජයේ සහාය ඇතිව ශ්‍රී ලංකාව තුළ ක්‍රියාත්මක ප්‍රජා සංවර්ධන ව්‍යාපෘති රැසකට මඟ පෙන්වනු ලබන මෙම ගිවිසුමට 2005 වසරේ මැයි මාසයේදී අත්සන් තැබිණි. එහි තනි පුද්ගල ව්‍යාපෘති සීමාව ශ්‍රී ලංකා රුපියල් මිලියන 300 ක් වූ අතර එය ශ්‍රී ලංකා රුපියල් මිලියන 600ක් දක්වා දෙගුණ කිරීම අද අත්සන් තැබූ ගිවිසුම මගින් සිදු කෙරේ.

මේ අතර අග්‍රාමාත්‍ය නරේන්ද්‍ර මෝදි හතා 2017 වස‍රේ ශ්‍රී ලංකාවේ සිදු කළ සංචාරයේ දී ඉන්දීය රජය සහ ජනතාව විසින් ශ්‍රී ලංකාවට ලබා දෙන ත්‍යාගයක් ලෙස උඩරට නැටුම් සඳහා ඇකඩමියක් ඉදිකිරීමට මුල්ගල් තැබිණි. මහනුවර ඓතිහාසික දළදා මාළිගාව අසළ ඉදිකෙරුණු එම ඇකඩමිය මාර්ගගත තාක්ෂණය ඔස්සේ විවෘත කිරීම ද මෙහිදී ඉන්දීය විදේශ අමාත්‍යවරයා අතින් සිදු විය.

ඉන්දියානු රජයේ සහාය ඇතිව මෙරට ක්‍රියාත්මක නිවාස ව්‍යාපෘතිය යටතේ වැඩ නිම කෙරුණු නිවාස 300ක් (ගාල්ල, මහනුවර, නුවරඑළිය – නිවාස 100 බැගින්) භාරදීම ද මෙහිදී ඉන්දීය විදේශ අමාත්‍යවරයා අතින් මාර්ගගත තාක්ෂණය ඔස්සේ සිදු කරනු ලැබීය.

නිවාස 60,000ක මෙම ව්‍යාපෘතියට අදාළ නිවාස 50,000ක ඉදිකිරීම් අවසන් කර තිබේ. වතුකරයේ ජනතාව වෙනුවෙන් නිවාස 4000ක ඉදිකිරීමේ ව්‍යාපෘතියේ තුන්වන අදියර මේ වන විට ක්‍රියාත්මක වෙමින් පවතින අතර ඒ යට‍තේ ඉදිකෙරුණු නිවාස 3300කට වැඩි ප්‍රමාණයක් මේ වන විටත් ප්‍රතිලාභීන් වෙත ලබා දී අවසන්ය.

ශ්‍රී ලංකාවේ අඩු ආදායම් ලාභී පවුල් වෙනුවෙන් ඉන්දීය රජයේ සහාය ඇතිව ක්‍රියාත්මක “ආදර්ශ ගම්මාන නිවාස වැඩසටහන” යටතේ අනුරාධපුර සහ බදුල්ල දිස්ත්‍රික්කවල ඉදිකෙරුණු නිවාස ප්‍රතිලාභීන් ද වෙත ලබාදීම සංකේතවත් කිරීම ද මෙහිදී සිදු කෙරිණි.

විදේශ කටයුතු අමාත්‍ය අලී සබ්‍රි, බුද්ධශාසන, ආගමික හා සංස්කෘතික කටයුතු අමාත්‍ය විදුර වික්‍රමනායක, ජල සම්පාදන හා වතු යටිතල පහසුකම් සංවර්ධන අමාත්‍ය ජීවන් තොණ්ඩමන්, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණඩල ප්‍රධානි සාගල රත්නායක, ජනාධිපති ලේකම් සමන් ඒකනායක යන මහත්වරු සහ බුද්ධශාසන, ආගමික හා සංස්කෘතික කටයුතු අමාත්‍යාංශයේ ලේකම්, නාගරික සංවර්ධන හා නිවාස අමාත්‍යාංශයේ ලේකම් ඇතුළු රාජ්‍ය නිලධාරීහු සහ ඉන්දීය රජයේ විශේෂ නියෝජිත පිරිසක් මෙම සාකච්ඡාවට එක්ව සිටියහ.

ඉදිරි පළාත් පාලන මැතිවරණයේදී කොළඹ නගර සභාවේ නගරාධිපති ධූරයට තරග කිරීම සඳහා සමගි ජන බලවේගය පක්ෂයේ කොළඹ දිස්ත්‍රික් මන්ත්‍රී මුජුබර් රහුමාන් අද පෙරවරුවේ සිය මන්ත්‍රී ධූරයෙන් ඉල්ලා අස් විය.

තම පාර්ලිමේන්තු මන්ත්‍රී ධුරයෙන් ඉල්ලා අස්වන බව ඔහු අද පාර්ලිමේන්තුවට දැනුම් දුන්නේය.

තමන් වෙත අසූ හාර දහසකට වැඩි මනාප ඡන්ද ප්‍රකාශ කරමින් තමන්ව දෙවන වරටත් පාර්ලිමේන්තුවට එවූ ජනතාවට සිය කෘතවේදීත්වය පළකරන බව පැවසූ මුජිබර් මන්ත්‍රීවරයා, මේ රටේ සමස්ත ජනතාවගේ අයිතිවාසිකම් වෙනුවෙන් නොබියව පෙනී සිටින බවද පැවසිය.

සැලසුම් කොට ඇති පරිදි වහාම මැතිවරණය පවත්වන ලෙස ආණ්ඩුවට බලකරන බව පැවසූ මන්ත්‍රීවරයා, ජනතාවගේ ප්‍රජාතන්ත්‍රවාදී අයිතිවාසිකම් සුරක්ෂිත කිරීම වෙනුවෙන් කැපවන ලෙස ද ලෙසද ඉල්ලා සිටියේය.

පාර්ලිමේන්තුවේදී විශේෂ ප්‍රකාශයක් කරමින් ඔහු මේ බව කියා සිටියේය.

ඔහු ඉල්ලා අස්වීම ප්‍රකාශ කිරීමෙන් අනතුරුව මුජබර් රහුමාන් විපක්ෂ නායක සජිත් ප්‍රේමදාස සමග ගොස් ඉල්ලා අස්වීමේ ලිපිය පාර්ලිමේන්තු මහ ලේකම්වරයා වෙත භාරදුන්නේය.

මුජුබර් රහුමාන් ගේ නියත ජයග්‍රහණය වෙනුවෙන් තමාගේ උණුසුම් සුභ පැතුම් පිරිනමන බව එහිදී විපක්ෂ නායකවරයා පැවසීය

මුස්ලිම් ප්‍රජාවගේ ගැටළුවලට විසඳුම් සෙවීම සඳහා සමාජ සාධාරණත්ව කොමිසම සමඟ අත්වැල් බැඳ ගන්නා ලෙස ජනාධිපති රනිල් වික්‍රමසිංහ මහතා මුස්ලිම් ප්‍රජාවට ආරාධනා කළේය.

ජනාධිපතිවරයා මේ බව සඳහන් කළේ කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණශාලවේ දී අද (19) පැවති සමස්ත ලංකා ජම්ඉයියතුල් උලමා සංවිධානයේ 100 වන සංවත්සරය අමතමිනි.

75 වන නිදහස් උත්සවය සැමරීමට ශක්තිමත් සහ සැබෑ ශ්‍රී ලාංකිකයන් ලෙස එක්වන ලෙසද ජනාධිපතිවරයා මෙහිදී සියලු ප්‍රජාවන්ගෙන් ඉල්ලා සිටියේය.

ඕනෑම ආගමක් නවීන ලෝකය සමඟ අනුගත විය යුතු බව පැවසූ ජනාධිපති රනිල් වික්‍රමසිංහ කිසිඳු ආගමක් වෛරී ආගමක් නොවන බව ද පැවසීය.

සමස්ත ලංකා ජම්ඉයියතුල් උලමා සංවිධානයේ සභාපති අෂ්- ෂෙයික් එම්. අයි. එම් රිස්වි විසින් ජනාධිපති රනිල් වික්‍රමසිංහ වෙත සමරු තිළිණයක් පිළිගන්වනු ලැබීය.

සමස්ත ලංකා ජම්ඉයියතුල් උලමා සංවිධානයේ 100 වන සංවත්සරය වෙනුවෙන් නිකුත් කළ සමරු මුද්දරය ජනමාධ්‍ය රාජ්‍ය අමාත්‍ය ශාන්ත බණ්ඩාර විසින් මෙහිදී ජනාධිපතිවරයා වෙත පිළිගැන්වීය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය .

සමස්ත ලංකා ජම්ඉයියතුල් උලමා සංවිධානයේ සියවැනි සංවත්සරය සමරන මේ අවස්ථාවේ එහි ආරම්භය පිළිබඳව සිහිපත් කළ යුතුයි.

1922 ආරම්භය, පළමු ලෝක යුද්ධයෙන් පසු ලෝකය විශාල පරිවර්තනයකට භාජනය වෙමින් පැවතියා. මුහම්මද් නබිතුමාගේ මරණයෙන් පසු සියවස් ගණනාව තුළ මුස්ලිම් ප්‍රජාව සහ එහි ආධිපත්‍යය යටතේ පැවති ඉඩම් සහ ජනතාව ඇතුළත් දේශපාලන-ආගමික රාජ්‍යය අහෝසි කිරීම එයට ඇතුළත් වෙනවා. ඒ වගේම එය ඉන්දියාවේ ස්ථාපිත කිරීම සඳහා විශාල ව්‍යාපාරයක් තිබුණා. නමුත් ලංකාවේ ඔබ සමස්ත ලංකා ජම්ඉයියතුල් උලමා සංවිධානය ආරම්භ කරනවා. එහි මුස්ලිම් චින්තනය මිස වාද විවාදයක් නැහැ.

ඉතින් එදා තිබු ඇතැම් ප්‍රශ්නවලට අදත් ඔබ මුහුණ දෙනවා. පළමුව, අප සිටින්නේ 1922 දී නොසිටී ජාතීන් 150ක් පමණ සිටින වෙනස්ම ලෝකයකයි. එමෙන්ම අප එළැඹ සිටින්නේ විද්‍යාව හා තාක්‍ෂණයේ දියුණුව මෙන්ම දේශපාලන අයිතිවාසිකම් සංවර්ධනය සමඟම ඇති වූ වෙනස්ම සියවසකටයි. අපට ශ්‍රී ලංකාවේ මුස්ලිම්වරුන්ගේ අනාගතය දෙස බැලීමට සිදුව ඇත්තේ මේ පසුබිම තුළයි.

පළමුව ඉස්ලාම් ආගම පමණක් නොවෙයි, සියලුම ආගම් බලන්නේ ආගමේ හරය කුමක්ද යන්නයි. ආගමේ නිර්මල අරුත කුමක්ද සහ අප නූතන ලෝකය සමඟ සම්බන්ධ වන්නේ කෙසේද කියලයි. ආගමේ හරය අතීතයට, වර්තමානයට සහ අනාගතයට සරිලන අයුරින් තිබිය යුතුයි.

හොඳ උදාහරණයක් තමයි බුදුදහම. බුදු රජාණන් වහන්සේ ගංගා ඉවුරුවල දේශනා කරන විට ජලාශ්‍රිත ශිෂ්ටාචාරයක් තිබුණේ නැහැ. නමුත් ශ්‍රී ලංකාව සම්බන්ධයෙන් ගත් කල, එහි එක් පදනමක් වන බුදුදහම සහිත ජලාශ්‍රිත ශිෂ්ටාචාරයක් ගොඩනැගීමට අපට හැකි වුණා. ගෞතම බුදුරදුන්ගේ කාලයේ ජලාශ්‍රිත ශිෂ්ටාචාරය නොතිබුණත් අප එය පිළිගෙන ඊට අනුගත වුණා.

ඒ හා සමානව, අප සියල්ලන්ම වර්තමානයේ ජීවත් වෙමින් අනාගතය දෙස බැලිය යුතුයි. අපේ ආගමේ හරය කුමක්දැයි සොයා බැලීමට අතීතය ප්‍රයෝජනවත් වෙනවා. එනමුත් කිසිම ආගමක් වෛරී ආගමක් නොවිය යුතුයි. එය අනුකම්පා සහගත විය යුතුයි. ඒ වගේම විශේෂයෙන්ම ඉස්ලාම් ආගම හෝ ක්‍රිස්තියානි හෝ වේවා ආගම් කිසිම ආකාරයකින් වෛරී විය නොහැකියි.
ක්‍රිස්තියානි ආගමේ ආකාරයට මෝසෙස්ව පිළිගැනීම සහ ක්‍රිස්තුස්වහන්සේව පිලිගැනීම මෙන්ම ඉස්ලාම් ධර්මයට අනුව නබිතුමාව පිළිගැනීම වෛරී ආගමක් නොවේ. එය ආගමික ප්‍රගතියක්. ඉස්ලාම් දහම මගින් මුහම්මද් නබිතුමා කළේ, එම පණිවිඩය තව දුරටත් ඉදිරියට ගෙන යාමයි. ඒ නිසා අපි කිසිම ආගමක් වෛරී ආගමක් බවට පත් නොකළ යුතුයි. නමුත් අපි එකට ජීවත් විය හැකි ආකාරය සහ එකිනෙකාගේ ආගම දෙස හරවත් ලෙස බැලිය යුතුයි.

සෑම ආගමක්ම උත්සාහ කරන්නේ එය අදහන අයට මෙන්ම අදහන්නේ නැති අයටද තම ආගම පිළිබඳ දේශනා කිරීමටයි. නමුත් ඒ ආගම අදහන්නේ නැති අයට
නොඇදහිලිවන්තයන්ට දේශනා කිරීමෙන් අදහස් කරන්නේ ඔවුන් ඕනෑම ආගමක සතුරන් කියලා නෙවෙයි. සෑම ආගමකම දැන් බොහෝ ආරවුල් දකින්න ලැබෙනවා. එය ඉස්ලාම් දහමේ පමණක් නොව, අනෙක් ආගම්වලත් අනාගතය කුමක්ද යන්න පිළිබඳව විශාල වාද විවාද සහ සාකච්ඡාවක් සිදු වෙනවා.

හැම ආගමකම හින්දු ආගමේ වේවා, බුද්ධාගමේ වේවා ප්‍රශ්න මතුව තිබෙනවා. අපි සාකච්ඡා කරන්නේ ඒ මොකක්ද කියලා. එබැවින් අපි සියල්ලෝම මෙම ගැටලුවට මුහුණදී සිටිනවා. නමුත් අපි අපගේ මූලික මූලධර්මවලින් ඉවත් නොවිය යුතුයි.

ඒ නිසා අපි ඉස්ලාම් ආගමේ මෙන්ම බුද්ධාගමේ, හින්දු, ක්‍රිස්තියානි ආගම්වලත් අපේ ආගමේ හරය සෙවීමේදී එම ප්‍රතිපත්තිවලට ගරු කළ යුතුයි. එවගේම අද අපිට දැනෙනවා ආගම වාණිජකරණය වෙලා කියලා. ඔව් ඇතැම් විට ආගම පාවිච්චි කරලා තියෙන්නේ යුද්දෙට සහ වෛරයටයි.එයින් අදහස් කරන්නේ ආපසු අතීතයට ගොස් යුද්ධ ආරම්භ කරන්න කියා නෙවෙයි.

දෙවනුව ආගම ඊටම අනුගතවී නූතනත්වයට මග පෙන්විය යුතුයි. ඉස්ලාමීය සෞදි අරාබියට හෝ නබිතුමාගේ උපත සිදුවූ කාලයට ආපසු යා යුතු යැයි කියන අයට, බැග්ඩෑඩ් අගනුවර වූ ඉස්ලාමීය ශිෂ්ටාචාරයේ ස්වර්ණමය යුගය ගැන මොකද කියන්නේ තියෙන්නේ කියල මම අහනවා.

තාරකා විද්‍යාව, වෛද්‍ය විද්‍යාව සහ රාජධානි දෙස බලන්න, යුරෝපය ශිෂ්ඨාචාරගත කිරීමට උපකාර වූ අයිබීරියානු අර්ධද්වීපයේ හෝ ස්පාඤ්ඤයේ මුස්ලිම් රාජධානි දෙස බලන්න. ඔටෝමාන් අධිරාජ්‍යයේ අතිවිශිෂ්ට සුලෙයිමාන් දෙස බලන්න. ඔබ ඔහුව ප්‍රතික්ෂේප කරනවාද? අපේ කලාපයේ පවා, අක්බර් අධිරාජ්‍යයා සහ ඔහු කලාප එකතු කිරීමට උත්සාහ කළේ කොහොමද? ඔහුව අනුගමනය කරමින් ඉන්දියන් සාගරයේ සහ පැසිෆික් සාගරයේ සන්ධිස්ථානය ගැන ඔහුගේ මුණුපුරා කතා කළා. අපි එය ඉන්දු-පැසිෆික් ලෙස හඳුන්වනවා. නමුත් ඔහු කීවේ එය නොවේ. ඔහු අදහස් කළේ සාගර දෙකක එකමුතුව නොව හින්දු ආගමේ සහ ඉස්ලාම් ආගමේ එකමුතුව ගැනයි. එබැවින් ඔහු පැවසූ දේ පවා ගැටුමට මුල පිරුවේ එය වෙනත් ආකාරයකින් භූ දේශපාලනයට ඇඳෑ ගත් නිසයි.

ඔබ නූතනත්වය පිළිගෙන ඉදිරියට යනවාද? ආගම් එය කළ යුතුයි. ඔබට එය වෙනස් කළ හැකි මාර්ගයක් නෑ. ඉස්ලාම් ආගම සෞදි අරාබියේ ආරම්භ වූණත් එහි විශාලතම බැතිමතුන් සංඛ්‍යාව සිටින්නේ ඉන්දුනීසියාව, පකිස්ථානය, ඉන්දියාව, බංග්ලාදේශය වැනි රටවල් පිහිටි දකුණු ආසියාවේ සහ අග්නිදිග ආසියාවේ බව කවුරුත් පිළිගත යුතුයි.

ඒ වගේම දැන් පවා ඔබට පෙනෙනවා වෙනස්කම් නිසා ලෝකයේ සියලුම රටවල ඇතිවී ඇති ගැටුම් පිළිබඳව. අපි දැන් බටහිර ශිෂ්ටාචාරය පිළිගෙන ඉවරයි. හොඳම උදාහරණය නම්, බ්‍රිතාන්‍යයේ අගමැතිවරයෙකු ලෙස හින්දු ජාතිකයෙකු පත් වීම සහ ලන්ඩනයේ නගරාධිපතිධුරයට මුස්ලිම් ජාතිකයෙකු පත්වීම පෙන්වා දෙන්න පුළුවන්. ඔවුන් නියෝජනය කරන්නේ බටහිර සංස්කෘතීන් මිස හින්දු හෝ මුස්ලිම් සංස්කෘතීන් නොවේ. ඉතින් මේවා තමයි නූතනත්වය පිළිබඳ අද අපට පෙනෙන්න තිබෙන හොඳම උදාහරණ.

තුර්කියේ කෙමාල් අතාටර්ක්ගේ, ඊජිප්තුවේ ගමාල් නසාර් කළ දේ අපි ප්‍රතික්ෂේප කළ යුතුද? ඒවගේම ජනාධිපති සුකර්නෝ දූපත් 400 ක් එකතු කර ඉන්දුනීසියාව ඇති කළේ කෙසේද? බෝරෝබුදුර් සහ රාමායනයේ ජයග්‍රහණ මතකයේ තබා ගන්න. ඉතින් ඔබ ඒ සියල්ල ප්‍රතික්ෂේප කරනවාද? අපි මෙය පිළිගෙන ඉදිරියට යා යුතුයි. එබැවින් නූතනත්වය වැදගත් වන අතරම ශ්‍රී ලංකාවේ මුස්ලිම්වරුන් අතර නවීන චින්තන මධ්‍යස්ථාන තිබිය යුතුයි. ඊට හොඳම උදාහරණය බහුතර මුස්ලිම් ප්‍රජාවක් වෙසෙන අග්නිදිග ප්‍රදේශයේ පිහිටුවා ඇති විශ්ව විද්‍යාලයයි. ඒ වගේම අෂ්රෆ් මැතිනිය කාන්තාවක් විදියට තමන් කරපු ජයග්‍රහණ වෙනුවෙන් ඇයට සම්මානයක් ලැබීම ගැන මම සතුටු වෙනවා. ඇය එය ලබා ගත යුතුයි. ඒවගේම විශ්වවිද්‍යාලය පිහිටුවීමේ දී දිවංගත අෂ්රෆ් අමාත්‍යවරයා ඉටුකළ කාර්යභාරය ද මා අගය කරනවා.

එය සියලු ආකාරයෙන්ම වඩාත් නවීන විශ්වවිද්‍යාලයක් විය යුතුයි. එය රාජ්‍ය අනුග්‍රහය ලබා දෙන සියලු ජාතින්ට ප්‍රයෝජනවත් වන විශ්ව විද්‍යාලයක් විය යුතුයි. එය මුස්ලිම්වරුන්ට පමණක් සීමා කිරීමට උත්සාහ කළ හොත් බෞද්ධ හා පාලි විශ්වවිද්‍යාලයට අත් වූ ඉරණමම අත්විය හැකියි. ඒ නිසා එය හොඳින් සිහියට ගත යුතුයි.

එබැවින් නූතනත්වය යනු සාරය බව අප පිළිගත යුතු සහ අප ඉදිරියට යා යුතු දෙයයි. මම දකින්නේ මෙතැනදී පවා මුස්ලිම් සමාජය ඒ වෙනස්කම්වලට ලක්වෙමින් ඒ වෙනස්කම් ගැන සාකච්ඡා කරනවා. මුස්ලිම් විවාහ සහ දික්කසාද පනත (MMDA) යනු ප්‍රධාන ප්‍රශ්නවලින් එකක්. ඒකට මම මැදිහත් වෙන්න යන්නේ නැහැ.

ඒක මුස්ලිම් ප්‍රජාවගේ ප්‍රශ්නයක්. නමුත් මම එකක් කියනවා, ආපස්සට යන්න එපා. මුස්ලිම්වරුන්ට අහිතකර කිසිම ක්‍රියාවක යෙදෙන්න එපා. පහුගිය දවසක මම දැක්කා සමහර මුස්ලිම් ළමයි මේ වෙනුවෙන් උද්ඝෝෂණ කරනවා. එය ඇත්ත වශයෙන්ම දරුවන්ගේ රැකවරණය පිළිබඳ නීතිය උල්ලංඝනය කිරීමක්. වැඩිහිටියන්ට අවශ්‍ය නම් එය කළාට කමක් නැහැ. එහෙත් දරුවන්ව ඉන් ඈත් කර තබන්න. ඒක ඇත්තටම මුස්ලිම් අය පිළිබඳව සෘණාත්මක තක්සේරුවක් ඇති කරන්නක් නිසා, ඒකට ඉඩ දෙන්න එපා. මට කියන්න තියෙන්නේ එච්චරයි.
දැන් ඔබ ඔබේ සියවන වසර සම්පූර්ණ කර තිබෙනවා. අපි අපේ නිදහසේ 75 වන වසරට මුහුණ දෙන්නේ. මේ කාලයෙන් වැඩි හරියක් අප ගත කරලා තියෙන්නේ එකිනෙකා සමඟ සටන් කරමිනි. මම හිතන්නේ දැන් සංහිඳියාවට සහ සහජීවනයට කාලයයි.

ඉතින් අපි දැන් පටන් අරන් තියෙන්නේ ශ්‍රී ලාංකීය දෙමළ, ප්‍රශ්න මොනවද, අපි සංහිඳියාව කරා යන්නේ කොහොමද කියලා සාකච්ඡා කරන්න. ඒ වගේම අප එහි පළමු පියවර අරගෙන අපි නැවතත් පක්ෂ නායකයන් හමුවෙනවා. පැවැති සාකච්ඡාවලදී අපි විශාල ප්‍රගතියක් ලබා තිබෙනවා. කඳුකරයේ දෙමළ ජනතාව සමාජයේ සෙසු අය සමඟ ඒකාබද්ධ කරන්නේ කෙසේද යන්න පිළිබඳව ද අපි සාකච්ඡාවක් ආරම්භ කර තිබෙනවා.

අනෙකුත් ජනවර්ග සහ ආගමික කණ්ඩායම් එයට ඒකාබද්ධ කර ගත යුතයි. මොකද මේවායේ ප්‍රතිලාභ ඔවුන්ට ලැබී නැහැ. අපි සම්පුර්ණයෙන්ම ඒකාත්මික විය යුතුයි. එමෙන්ම මට අවශ්‍ය වන්නේ මුස්ලිම් ප්‍රජාව මුහුණ දෙන ගැටලු පිළිබඳව ඔබ සමඟ සාකච්ඡා කිරීමටයි. දැන් ඔබ මුහුණ දෙන ප්‍රශ්න මොනවාද? මම හිතන්නේ ඒකට හොඳ උදාහරණයක් තමයි 2018 දිගන කෝලාහලය. ඒ ගැන කතා කරන්න වෙනවා. ඒ වගේම 2019 පාස්කු බෝම්බ ගැනත් කතා කරන්න වෙනවා. මෙයට හේතු වූ කරුණු සහ ප්‍රශ්න මොනවාද යන්න පිළිබඳව අප කතා කළ යුතුයි. කොළඹ මුස්ලිම් ජනතාව මුහුණ දෙන ප්‍රශ්න ශ්‍රී ලංකාවේ ගිනිකොන දෙසින් සිටින මුස්ලිම්වරුන් හෝ මන්නාරම මුස්ලිම්වරුන් මුහුණ දෙන ප්‍රශ්නවලට වඩා හාත්පසින්ම වෙනස්.

අප ගෙනයන සාකච්ඡාවලට දෙමළ, උඩරට දෙමළ, ශ්‍රී ලාංකික දෙමළ සහ සිංහල අය සම්බන්ධ කර ගන්නේ කොහොමද? ඔබේ දුක්ගැනවිලි, ඔබට දැනෙන සමාජ පසුගාමීත්වය පිළිබඳව සාකච්ඡා කරමු. මම හිතන්නේ එය සිදු කිරීමට මේ තමයි හොඳම කාලය කියායි.

ඒ විතරක් නෙවෙයි. අපි සිංහල අය අතරත් සාකච්ඡාවක් කරනවා. සමහර කණ්ඩායම් බලපෑමට ලක්ව වෙලා ඉන්නේ. විවිධ හේතුන් මත ඔවුන් සමාජය පිළිගන්නේ නැහැ. .මේ නිසා තමයි දිගුකාලීන ගැටලු පිළිබඳව සොයා බලන සමාජ සාධාරණත්වය කොමිෂන් සභාවක් පිහිටුවීමට අවශ්‍ය වන්නේ. එබැවින් ප්‍රශ්න ගැන ඉතා සෘජුව කතා කළ සමස්ත ලංකා ජම් ඉයියතුල් උලමා සංවිධානයෙන් මම ඉල්ලා සිටින්නේ මුස්ලිම් කණ්ඩායමද මෙය සමඟ එකතු වී එහි තුන්වන අදියර ලෙස මුස්ලිම් ප්‍රජාවගේ ප්‍රශ්න සාකච්ඡා කරමු කියලයි.

අපි එකින් එක ප්‍රශ්න විසඳගෙන ඉදිරියට යමු. මම මේ සාකච්ඡා එකක්වත් එකට ගත්තේ නැහැ. මොකද ඒ ඒ පිරිස් තමන්ගේ ප්‍රශ්න වලට ප්‍රමුඛත්වය බලාපොරොත්තුවෙනවා. මේ විදිහට ගියොත් කිසිම ප්‍රශ්නයක් විසඳන්න වෙන්නේ නෑ. ඒ නිසා අපි වෙනස්ම ආකාරයට එකින් එක විසදා ගනිමින් ඉදිරියට යමු.

ඉතින් නිදහසේ 75 වනසංවත්සරයේදී අපි සියලු දෙනාම සැබෑ ශ්‍රී ලාංකිකයන් වෙමු. ඉන්පසු ඉදිරි වසර 25 දෙස බලමු. අපි ඉදිරි වසර 25 තුළ කුමක්ද කරන්නේ ? අපි ආරම්භ කරන එක් ආයතනයක් තමයි මේ සියලු කරුණු සාකච්ඡා කළ හැකි ඉතිහාස පිළිබඳ අධ්‍යයන ආයතනය. ඊට අමතරව රාජ්‍ය සහ වෙනත් ආයතන තිබෙනවා. අපට ඉදිරියට යාමට නව ආර්ථිකයක් ඇති කර ගැනීමට මේ සියල්ල අවශ්‍යයි.

ශ්‍රී ලාංකික ජාතිය ලෙස අප ශක්තිමත් වෙමු. සමාජ සාධාරණත්වය ජය ගනිමු. වාර්ගික සහජීවනය ඇති කර ගනිමු. අපට ඉතා තරගකාරී ආර්ථිකයක් වීමට හැකි වන පරිදි නව ආර්ථිකයක් ඇති කර ගනිමු. අපව සමෘද්ධිමත් වෙමු.

ඉන්දීය විදේශ කටයුතු පිළිබඳ අමාත්‍ය ආචාර්ය එස්.ජයිෂංකර් (Dr: S.Jaishankar) ශ්‍රී ලංකාවේ දෙදින නිල සංචාරයක් සදහා කටුනායක ගුවන් තොටුපළ වෙත අද (19) සවස පැමිණියේය .

ඔහු සමග එරට විදේශ කටයුතු අමාත්‍යාංශයේ උසස් නිලධාරීන් සිව් දෙනෙකු ද මෙරටට පැමිණ සිටියි.

ඔවුන් මෙසේ ලංකාවට පැමිණියේ මාලදිවයින සංචාරයක් නිමා කරමින් වන අතර ඒ ඉන්දියාවට අයත් විශේෂ ගුවන් යානයකින්ය.

මෙම පිරිස පිළිගැනීම සදහා ශ්‍රී ලංකා විදේශ කටයුතු අමාත්‍යාංශයේ නිලධාරීන් පිරිසක් කටුනායක ගුවන් තොටුපළ විශේෂ අමුත්තන්ගේ මැදිරිය වෙත පැමිණ සිටි අතර එහි මාධ්‍ය ආවරණය කිරීමට ශ්‍රී ලාංකික මාධ්‍යවේදීන් හට ආරක්ෂක හේතූන් මත අවසරදී තිබුණේ නැත.

"විපක්ෂ නායකතුමා බස් බෙදාගෙන යනවා. බස් එක එළවන්නෙ ලයිසන් එකක් තියාගෙනද ?" යනුවෙන් රාජ්‍ය අමාත්‍ය ඩයනා ගමගේ ප්‍රශ්න කළාය.

බස් රථ ධාවනය කරවීමට වෙමන ධාවන බලපත්‍රයක් අවශ්‍ය බව පැවසූ ඇය වැඩිදුරටත් ප්‍රශ්නකර සිටියේ විපක්ෂ නායකවරයාට එම රියදුරු බලපත්‍රය තිබේද කියාය.

රාජ්‍ය අමාත්‍යවරිය පාර්ලිමේන්තුව අමතමින් මේ ආකාරයට විපක්ෂනායකවරයා ප්‍රශ්න කල අතර මැතිවරණ වියදම් නියාමනය කිරීමේ පනත අනිවාර්යයෙන්ම සම්මත කළ යුතුව තිබෙන බවත් අවධාරණය කර සිටියාය.

මේ සම්බන්ධයෙන් අදහස් දක්වන දේශපාලන විචාරකයන් පවසන්නේ ඩයනා රාජ්‍ය අමාත්‍යවරියගේ මේ ප්‍රශ්න කිරීම හමුවේ නුදුරේදීම විපක්ෂ නායකවරයා බර වාහන රියදුරු බලපත්‍රයක් ගෙන එය සමාජ මාධ්‍ය ඔස්සේ ප්‍රසිද්ධ කරනු ඇති බවය.

ලංකා සතොස අත්‍යවශ්‍ය භාණ්ඩ වර්ග 12 ක මිල තව දුරටත් අඩු කිරීමට පියවර ගෙන තිබේ.

එම භාණ්ඩ අඩු කළ මිලට අද (19) සිට ලංකා සතොස අළෙවිසැල්වලින් මිලදී ගත හැකි බව ද සතොස පවසයි.

ලොකු ලූණු කිලෝවක් රුපියල් 5.00 කින්, සුදු සීනි කිලෝවක් රුපියල් 2.00 කින්, රතු කැකුළු සහල් කිලෝවක් රුපියල් 8.00 කින්, සුදු කැකුළු සහල් (දේශීය) සහ සම්බා සහල් (දේශීය) කිලෝවක් රුපියල් 10.00 බැගින්, සුදු නාඩු (දේශීය) රුපියල් 9.00 කින්, සුදු නාඩු (ආනයනික) රුපියල් 8.00 කින්, කීරි සම්බා සහල් කිලෝවක් රුපියල් 6.00 කින්, රතු පරිප්පු කිලෝවක් රුපියල් 7.00 කින්, වියළි මිරිස් කිලෝවක් රුපියල් 50.00 කින්, පාන් පිටි කිලෝවක් රුපියල් 5.00 කින් සහ හාල්මැස්සෝ කරවල කිලෝවක් රුපියල් 20.00 කින් අඩු කළ බව ද සතොස පවසයි.

ඒ අනුව ලොකු ලූණු කිලෝවක් රුපියල් 180.00 කට, සුදු සීනි කිලෝවක් රුපියල් 216.00 කට, රතු කැකුළු සහල් කිලෝවක් රුපියල් 187.00 කට, සුදු කැකුළු සහල් (දේශීය) කිලෝවක් රුපියල් 179.00 කට, සම්බා සහල් (දේශීය) කිලෝවක් රුපියල් 210.00 කට, සුදු නාඩු (දේශීය) කිලෝවක් රුපියල් 189.00 කට, සුදු නාඩු (ආනයනික) රුපියල් 180.00 කට, කීරි සම්බා සහල් කිලෝවක් රුපියල් 239.00 කට, රතු පරිප්පු කිලෝවක් රුපියල් 370.00 කට, වියළි මිරිස් කිලෝවක් රුපියල් 1730.00 කට, පාන් පිටි කිලෝවක් රුපියල් 235.00 කට සහ හාල්මැස්සෝ කරවල කිලෝවක් රුපියල් 1100.00 කට මිලදී ගතහැකි බව ද සතොස වැඩි දුරටත් සඳහන් කරයි.

පළාත් පාලන මැතිවරණයේ දී බහුතර ආයතන සංඛ්‍යාවක් සඳහා ශ්‍රී ලංකා නිදහස් පක්‍ෂය වෙනම තරග කළත් නිදහස් ජනතා සන්ධානය සමඟ ඇති බැඳීමට ඉන් ගැටලුවක් නොවන බව ශ්‍රී ලංකා නිදහස් පක්‍ෂ සභාපති සහ හිටපු ජනාධිපති මෛත්‍රීපාල සිරිසේන පවසයි.

ශ්‍රී ලංකා නිදහස් පක්‍ෂය ‘අත’ ලකුණ යටතේ පළාත් පාලන ආයතන 218කට ඇප තැන්පත් කර ඇති අතර, තවත් ආයතන 61ක් සඳහා නිදහස් ජනතා සන්ධානය ලෙස හෙලිකොප්ටරය ලකුණින් ඇප බැඳ තිබෙන බව ද ඔහු සඳහන් කරයි.

මෙතෙක් ඇප තැන්පත් කර නැති පළාත් පාලන ආයතන 62 ක් ඇති අතර, ඒ සඳහා ද හෙට (20) දිනයේදී ඇප තැන්පත් කරන බව හිටපු ජනාධිපති සිරිසේන පවසයි.

හිටපු ජනාධිපතිවරයා මේ බව සඳහන් කර සිටියේ අද (19) ශ්‍රීලනිප මුලස්ථානයේ පැවති මාධ්‍ය හමුවක් අමතමින් වන අතර
නාමයෝජනා භාරදීමෙන් පසු සන්ධානයක් ලෙස එක්ව කටයුතු කරන බවත් සන්ධානය සමඟ ඇති බැඳීමෙහි කිසිඳු බිඳීමක් සිදුව නැති බවත් පැවසීය.

ශ්‍රී ලංකා නිදහස් පක්‍ෂය වමේ ප්‍රගතිශීලී දේශපාලන පක්‍ෂ හා එක්ව නිදහස් ජනතා සන්ධානය ගොඩනැගුවත්, නාමයෝජනා සඳහා අපේක්‍ෂකයන් තේරීමේදී ඇතිවූ ගැටලු නිසා ශ්‍රී ලංකා නිදහස් පක්‍ෂයට වැඩි බලයක් ඇති ප්‍රදේශවලට වෙනම තරඟ කිරීමටත්, තවත් ප්‍රදේශවලට සන්ධානයක් ලෙසත් තරඟ කිරීමට තීරණය කළ බව ද ඔහු පැවසීය.

මැතිවරණ වියදම් නියාමන පනත් කෙටුම්පත අද (19) පාර්ලිමේන්තුවේදී වැඩි ඡන්ද 61 කින් සංශෝධන සහිතව සම්මතවිය.

පනත් කෙටුම්පතට පක්ෂව ඡන්ද 97ක් ලැබුණු අතර ඊට විරුද්ධව ලැබුණේ ඡන්ද 36 ක් පමණි.

සමගි ජන බලවේගය සහ ජාතික ජන බලවේගය ඇතුළු විපක්ෂයේ මන්ත්‍රීවරුන් පනතට විරුද්ධව ඡන්දය ප්‍රකාශ කළහ.

අධිකරණ බන්ධනාගාර කටයුතු සහ සහ ව්‍යවස්ථා ප්‍රතිසංස්කරණ අමාත්‍ය ආචාර්ය විජයදාස රාජපක්ෂ විසින් ඡන්ද අපේක්ෂකයන්ගේ මැතිවරණ වියදම් සීමා කිරීම සඳහා විධිවිධාන ඇතුළත් මෙම පනත් කෙටුම්පත දෙවැනි වර කියවීමේ විවාදය සඳහා ඉදිරිපත් කරනු ලැබීය.

පනත් කෙටුම්පත පිළිබඳ විවාදය ඊයේ (18) දවස පුරා පැවැත්විණ.

මෙම පනත් කෙටුම්පත ඡන්දයක් ප්‍රකාශ කර ඇති අවස්ථාවක විවාදයට ගැනීම සම්බන්ධයෙන් විපක්ෂයේ දේශපාලන පක්ෂ කිහිපයක නායකයෝ පාර්ලිමේන්තු කටයුතු පිළිබඳ කාරක සභාවේදී සිය විරෝධය පළ කළහ. පනත් කෙටුම්පත විවාදයට ගන්නේ නම් ඉදිරියේ එන පළාත් පාලන මැතිවරණයට පනත බල නොපාන බවට වගන්තියක් ඊට ඇතුළත් කරන්නැයි විපක්ෂයේ නායකයන් ඉල්ලා සිටි නමුත් ඊට ආණ්ඩුව පාර්ශ්වයෙන් එකඟත්වයක් ලැබුණේ නැත.

ප්‍රවීණ චිත්‍රපට අධ්‍යක්ෂිකා ආචාර්ය සුමිත්‍රා පීරිස් අභාවප්‍රාප්ත වී තිබේ.

හෙළ සිනමාවේ අද්විතීය සිනමාකරු ලෙස්ටර් ජේම්ස් පීරිස්ගේ බිරිඳ වූ සුමිත්‍රා පීරිස් මිය යන විට 88 වැනි වියේ පසු විය.

1978 දී ඇරඹි ඇගේ සිනමා නිර්මාණ චාරිකාවේ ඇය විසින් අධ්‍යක්ෂණය කරන ලද විශිෂ්ට, කලාත්මක හා සිනමානුරූපී චිත්‍රපට රැසකි. ගැහැනු ළමයි (1978) සිට වෛෂ්ණාවී දක්වා ඇගේ නම ඉදිරියේ ලියැවී ඇති සිනමා කෘති අතර, ගැහැනු ළමයි, ගඟ අද්දර, සාගර ජලය මදි හැඬුවා ඔබ සන්දා වැනි නිර්මාණ විශේෂ වන අතර යහළු යෙහෙළි, මායා, ලොකු දුව, දුවට මවක මිස, සක්මන් මළුව, යහළුවෝ වැනි චිත්‍රපට ද රසික ආදරයට පත් වූ නිර්මාණ විය.

ජීවන් තොණ්ඩමන් සහ පවිත්‍රා දේවි වන්නිආරච්චි නව අමාත්‍යවරු ලෙස ජනාධිපති රනිල් වික්‍රමසිංහ ඉදිරියේ දිවුරුම් දී තිබේ.

ඒ අනුව, ජල සම්පාදන හා වතු යටිතල පහසුකම් සංවර්ධන අමාත්‍යවරයා ලෙස ජීවන් තොණ්ඩමන් දිවුරුම් දුන්නේ ය.

වනජීවී හා වන සම්පත් සංරක්ෂණ අමාත්‍යවරිය ලෙස දිවුරුම් දෙනු ලැබුවේ, පවිත්‍රා දේවි වන්නිආරච්චි මහත්මියයි.

මෙම අමාත්‍ය ධුරය කලින් දැරු මහින්ද අමරවීර අද උදෑසන ඉන් ඉවත් වුණේ ජනාධිපතිවරයාට නව අමාත්‍යවරයෙකු පත් කර ගැනීමට ඉඩ සලසමිනි.

රස්තවාදය වැළැක්වීමේ පනත ප්‍රකාරව අත්අඩංගුවට ගෙන රඳවා තබා පසුව රක්ෂිත බන්ධනාගාරගත කර සිටින අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වසන්ත මුදලිගේ යන අයගේ ඇප ඉල්ලීම සම්බන්ධ නියෝගය ලබන 31 වන දා ලබා දෙන බව කොළඹ ප්‍රධාන මහේස්ත්‍රාත් ප්‍රසන්න අල්විස් ඊයේ (ජන. 17) දැනුම් දුන්නේ ය.

මෙම නඩුව ඊයේ දින පළමු වරට කැඳවනු ලැබුවේ කොළඹ අතිරේක මහේස්ත්‍රාත් තරංගා මහවත්ත හමුවේ වන අතර එහිදී නීතිපතිවරයා නියෝජනය කරමින් ජ්‍යෙෂ්ඨ නියෝජ්‍ය සොලිසිටර් ජනරාල් දිලීප පීරිස් අධිකරණය හමුවේ පෙනී සිටියේ ය.

මෙම නඩුවේ සැකකරුවන් වන ගල්වැව සිරිධම්ම හිමි හා අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වසන්ත මුදලිගේ යන අය පසුගිය නොවැම්බර් මස 17 හා 22 වන දිනවල අධිකරණයට ඉදිරිපත් කළ අවස්ථාවේදී මහේස්ත්‍රාත් නිල මැදිරිය තුළදී එම නඩුව කැඳවූ අතර එහිදී මහේස්ත්‍රාත්වරිය කළ ප්‍රකාශ සම්බන්ධයෙන් හා ක්‍රියා සම්බන්ධයෙන් ත්‍රස්ත මර්දන කොට්ඨාසයේ නිලධාරීන් 4 දෙනෙකු විසින් පොලිස්පතිවරයා වෙත දිවුරුම් ප්‍රකාශ ලබා දී ඇති බව නියෝජ්‍ය සොලිසිටර් ජනරාල්වරයා එහිදී අධිකරණයට කරුණු දැක්වීය.

ත්‍රස්ත මර්දන කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරි ප්‍රසන්න ද අල්විස්, සහකාර පොලිස් අධිකාරි වසන්ත රත්නායක හා ප්‍රධාන පොලිස් පරීක්ෂක කපිල බණ්ඩාර ඇතුළු නිලධාරීන් සිවුදෙනෙකු විසින් පොලිස්පතිවරයා වෙත ලබා දී ඇති දිවුරුම් ප්‍රකාශ අනුව අතිරේක මහේස්ත්‍රාත්වරිය සම්බන්ධයෙන් පැමිණිලි කිරීම සඳහා අධිකරණ සේවා කොමිසම වෙත යොමු කරන ලෙසට පොලිස්පතිවරයා ඉල්ලීමක් කර ඇති බව ජ්‍යෙෂ්ඨ නියෝජ්‍ය සොලිසිටර් ජනරාල්වරයා අධිකරණයට දැනුම් දුන්නේ ය.

එම ඉදිරිපත් කර ඇති දිවුරුම් ප්‍රකාශවලට අනුව පසුගිය නොවැම්බර් මස 17 වන දා සැකකරුවන් අධිකරණය නිල මැදිරියට ඉදිරිපත් කිරීමෙන් අනතුරුව “අපි හැමෝම වෙනුවෙන් ඔබලා අරගල කළේ ඒත් ත්‍රස්තවාදය වැළැක්වීමේ පනත යටතේ ඉදිරිපත් කර ඇති නිසා ඇප ලබා දිය නොහැකි බවත් පනතෙන් අපගේ අත් බැඳ ඇති අතර සැකකාර මේ හිමිනමට සිංහල බෙහෙත් ලබා ගැනීමට අවශ්‍ය නම් එයට ඉඩ ලබා දෙන්න” යනුවෙන් ප්‍රකාශ කරමින් සැකකාර සිරිධම්ම හිමිට පස්පංගුව හා සස්ටජන් ලබාදීමට අධිකරණ නිලධාරියෙකු අතට රුපියල් 10,000ක මුදලක් ලබා දී ඇතැයි සඳහන් වන බව ජ්‍යෙෂ්ඨ නියෝජ්‍ය සොලිසිටර් ජනරාල්වරයා අධිකරණයට දැනුම් දුන්නේ ය.

ඉදිරිපත් කර ඇති දිවුරුම් ප්‍රකාශ අධිකරණයට ඉදිරිපත් කරන ලෙසට එහිදී අතිරේක මහේස්ත්‍රාත්වරිය සඳහන් කර සිටියා ය.

ඒ අනුව, අදාළ දිවුරුම් ප්‍රකාශ අධිකරණයට ඉදිරිපත් කරමින් මෙම නඩුව මෙම අතිරේක මහේස්ත්‍රාත් අධිකරණය හමුවේ කැඳවීම සුදුසු නොවන බැවින් මෙය ප්‍රධාන මහෙස්ත්‍රාත් අධිකරණය වෙත මාරුකරන ලෙසට ජ්‍යෙෂ්ඨ නියෝජ්‍ය සොලිසිටර් ජනරාල්වරයා අධිකරණයෙන් ඉල්ලා සිටියේ ය.

මෙහිදී විත්තිය වෙනුවෙන් අධිකරණය හමුවේ පෙනී සිටි ජනාධිපති නීතිඥ සාලිය පීරිස් මෙම ඉල්ලීම සම්බන්ධයෙන් දැඩි ලෙස විරුද්ධත්වය ප්‍රකාශ කළ අතර නීතිපතිවරයාට නඩුවක් මාරු කිරීමට අවශ්‍ය නම් එය අපරාධ නඩු විධාන සංග්‍රහයේ ප්‍රතිපාදන අනුව කළ යුතු අතර මෙලෙස කිරීම යහපත් දෙයක් නොවන බවත් එය අධිකරණය බිය වැද්දීමක් හා අධිකරණයේ ස්වාධීනත්වයට හානියක් කිරීමට උත්සාහයක් දැරීම ලෙසට සැලකිය හැකි බව ප්‍රකාශ කළේ ය.

මෙම නඩුවේ දෙවන සැකකරු වන සිරිධම්ම හිමි භික්ෂුවක් ලෙසට සලකා මානුෂීය චේතනාව පෙරදැරිව තමන් විසින් එම ක්‍රියාව කළද තමන් විසින් එම අවස්ථාවේ ප්‍රකාශ කරන ලද සියල්ල ත්‍රස්ත මර්දන කොට්ඨාසයේ නිලධාරීන් ඉදිරිපිටදී ම ප්‍රකාශ කළ බවත්, සඳහන් නොකළ කරුණු ද මේ වන විට ප්‍රකාශ කිරීමෙන් තමන් වෙත ප්‍රශ්නයක් ඇති කිරීමට දරන උත්සාහය අනුමත නොකරන බවට මහේස්ත්‍රාත්වරිය මෙහිදී අධිකරණය හමුවේ ප්‍රකාශ කළා ය.

එසේ ම, මේ දිවුරුම් ප්‍රකාශ සම්බන්ධයෙන් අධිකරණ සේවා කොමිසම වෙත පැමිණිලි ඉදිරිපත් කර තිබේ ද යන්න මහේස්ත්‍රාත්වරිය මෙන්ම විත්තියේ ජනාධිපති නීතිඥවරයා ද පැමිණිල්ලෙන් විමසා සිටියහ.

අදාළ දිවුරුම් ප්‍රකාශ සම්බන්ධයෙන් ඉදිරි දිනවල පැමිණිලි ඉදිරිපත් කිරීමට නීතිපති දෙපාර්තමේන්තුව බලාපොරොත්තු වන බවට ජ්‍යෙෂ්ඨ නියෝජ්‍ය සොලිසිටර් ජනරාල්වරයා එහිදී අධිකරණයට පිළිතුරු ලබා දුන්නේ ය.

ඒ අනුව ඉදිරිපත් වූ සියලු කරුණු සලකා බැලූ අතිරේක මහේස්ත්‍රාත්වරිය මෙම නඩුව ප්‍රධාන මහෙස්ත්‍රාත් අධිකරණය හමුවේ මින් ඉදිරියට කැඳවන ලෙසට නියෝග කළා ය.

ඒ අනුව, නඩුව ප්‍රධාන මහේස්ත්‍රාත් අධිකරණය හමුවේ කැඳවනු ලැබීය.

නඩුව ප්‍රධාන මහේස්ත්‍රාත් අධිකරණය හමුවේ කැඳවනු ලැබීමෙන් අනතුරුව විත්තිය වෙනුවෙන් පෙනී සිටි ජනාධිපති නීතිඥවරයා සැකකරුට ඇප ලබාදෙන ලෙසට ඉල්ලීමක් ඉදිරිපත් කළේය.

එම ඉල්ලීමට අදාළ ලිඛිත දේශන ලබන 24 වන දා අධිකරණය හමුවේ ගොනු කරන ලෙස දෙපාර්ශ්වය වෙත නියෝග නිකුත් කළ මහේස්ත්‍රාත්වරයා සැකකරු ලබන 31 වන දා දක්වා තවදුරටත් රක්ෂිත බන්ධනාගාරගත කිරීමට නියම කළේ ය.

- mawbima

“පිරිමි සම්භාහනය ගැහැනුන්ට තහනම්” යනුවෙන් පළවූ මාධ්‍ය වාර්තා සාවද්‍ය බව ආයුර්වේද කොමසාරිස් ආචාර්ය එම්.ඩී.ජේ. අබේගුණවර්ධන පවසයි.

නිවේදනයක් නිකුත් කරමින් ආයුර්වේද කොමසාරිස් ආචාර්ය එම්.ඩී.ජේ. අබේගුණවර්ධන මේ බව සඳහන් කර ඇති අතර අදාළ පුවත දැක තමන් වික්ෂිප්ත වූ බවත් සඳහන් කර ඇත.

එසේම තම නාමය යොදා ගනිමින්, තනතුරු නාමය ලෙස “ආයුර්වේද කොමසාරිස් ජනරාල්” ලෙස ආරූඪ තනතුරක් යොදා ගනිමින් තමන් එම ප්‍රකාශය සිදු කළ බවට එම වාර්තාවල සඳහන් වූ බව අබේගුණවර්ධන සිය නිවේදනය මගින් පෙන්වා දී ඇත.

ඒ සම්බන්ධයෙන් ආයුර්වේද කොමසාරිස් ආචාර්ය එම්.ඩී.ජේ. අබේගුණවර්ධන නිකුත් කළ නිවේදනය පහතින් දැක්වේ.

ජාතික යොවුන් සේනාංකය, හැකියාවෙන් හා පෞරුෂත්වයෙන් පිරි තරුණ පරපුරක් බිහිකිරීමට වත්මන් ජනාධිපති රනිල් වික්‍රමසිංහ අග්‍රාමාත්‍යවරයා ලෙස සිටියදී ගෙන ගිය දූරදර්ශී වැඩපිළිවෙළක එක් කොටසක් බව අගමැති දිනේෂ් ගුණවර්ධන පැවසීය.

ජාතික නායකයන් බිහි කිරීම වෙනුවෙන් ජාතික යොවුන් සේනාංකය ගෙන යන වැඩපිළිවෙළ ප්‍රශංසනීය බවද අගමැතිවරයා ප්‍රකාශ කළේය.

අගමැති දිනේෂ් ගුණවර්ධන මේ බව සඳහන් කළේ, කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ දී ඊයේ (17) පැවති ජාතික යොවුන් සේනාංකයේ වාර්ෂික කලා මංගල්‍යය සහ සම්මාන උළෙල “ පෞර්ෂාභිමාන- 2022” අමතමිනි.

මෙහිදී වැඩි දුරටත් අදහස් දැක් වූ අගමැති දිනේෂ් ගුණවර්ධන මෙසේද පැවසීය.

ජාතියේ අනාගතය වෙනුවෙන් යොවුන් සේනාංකය බිහි වී දශක තුනකට ආසන්න කාලයක් ගෙවී තිබෙනවා. තරුණ තරුණියන්ට මේ අවකාශය ලබා දීමට වත්මන් ජනාධිපතිතුමා, තරුණ සේවා ඇමැතිවරයා ලෙස එවකට විශාල වැඩ කොටසක් සිදු කළා. පාසල් ජීවිතයෙන් පසුව විශ්විද්‍යාලවලට නොයන තරුණ පරපුරට මඟ පෙන්වීමට තරුණ සේවා සභාව විශාල කාර්යභාරයක් සිදුකරන බව පැහැදිලියි. ඒ සඳහා යොවුන් සේනාංකයෙන් විශාල වගකීමක් ඉටු කරන බව අපි දන්නවා. යොවුන් සේනාංකය රටට එක්කර තිබෙන විශාලම දායාදය තාරුණ්‍යයේ එකමුතු බවයි. ඉදිරියේදී රට ගොඩනැඟීමට තිබෙන අභියෝගයට යොවුන් සේනාංක වැනි සංවිධාන වලින් විශාලම දායකත්වයක් ලබා ගත හැකියි. තරුණ තරුණියන්ගේ හැකියාවන්වලට උදව් දෙන සියලුම පහසුකම් යොවුන් සේනාංකයට තිබෙනවා. අපේ තරුණ තරුණියන්ගේ නිපුණත්වය ඔපමට්ටම් කරමින් අනාගතය භාර ගැනීමට හැකි පුරවැසියන් බිහි කිරීමට මෙමගින් හැකියාව ලැබෙනවා.

එහිදී සභාව ඇමතු ජනාධිපති කාර්ය මණ්ඩල ප්‍රධානි හා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක මෙසේ පැවසීය.

චන්න ගුණතිලක මහතා සහ මම මේ වැඩ කටයුතු ආරම්භ කරන විට අපට ජාතික යොවුන් සේනාංකයක් තිබුණේ නෑ. මූලික වගකීම වුණේ අද ජනාධිපතිතුමා, එවකට අපේ අග්‍රාමාත්‍යතුමාගේ සංකල්පය ක්‍රියාවට නැංවීමට අවශ්‍ය පියවර ගැනීමයි. එහි මූලික අවශ්‍යතාව වුණේ මනා පෞර්ෂත්වයකින් යුත් , කාලයට ගැළපෙන දක්ෂතාවයන්ගෙන් හෙබි, හොඳ නායකත්වයක් දිය හැකි, අනාගත අභියෝග ජයගත හැකි , රැකියා වෙළෙඳපොළට සූදානම්, ගැළපෙන නියම ආකල්පවලින් පිරිපුන් තරුණ පරම්පරාවක් ගොඩ නැඟීමයි.

මේ වන විට වසර 20ක පමණ කාලයක් තුළ මේ වැඩසටහන දියුණු වෙලා තියෙනවා. තවමත් දේශපාලනීකරණය වීමෙන් තොරව වැඩකටයුතු සිදු කෙරෙන ආකාරය පිළිබඳව සතුටුයි. අපේ රටට වැදගත්ම දේ තරුණයින්ගේ අනාගතයයි. අද ඒ ඇගයීමට ලක් වූ සියලුම දූ දරුවන්ට මගේ සුබ පැතුම් පිරිනමනවා.

ඒ වගේම ඔවුන් පුහුණු කිරීමට, වැඩසටහන් සම්පාදනයට ඇප කැප වූ මෙන්ම ඊට නායකත්වය දුන් සියලු දෙනාට මගේ සුබ පැතුම් පිරිනමනවා. අද මෙතැන දකින්න ලැබුණේ කලා අංග පමණයි. ඒ සියල්ල අති විශිෂ්ටයි. අනෙක් වැඩසටහන්වල විශිෂ්ඨත්වයත් මට හිතා ගන්න පුළුවන්. මොකද කලා අංග පුහුණු වෙන්නේ අනෙක් වැඩකටයුතු කරන අතරතුර බව මට සභාපතිවරයා දැනුම් දුන්නා.

ජාතික තරුණ සේවා සභාව මීට වෙනස්. කලා අංශයට ගියොත් පුහුණු වෙන්නේ කලා කටයුතු පමණයි. මෙතැන ඉදිරිපත් වූ කලා අංග පුහුණ වෙන්නේ වෙනත් වෘත්තියකට සූදානම් වන අතරතුරයි.

කෙසේ වුවත් අපි තව දුරටත් යාවත්කාලීන විය යුතුයි. ලෝකයට මුහුණ දීමට අප සූදානම් විය යුතුයි. කාර්මික විප්ලවයේ තුන්වැනි අදියරේ සිට හතරවැනි අදියරට රට ගමන් කරනවා. තොරතුරු තාක්ෂණයේ සිට කෘත්‍රිම දැනුම දක්වා ගමන් කරනවා. ඒ වගේම සම්පූර්ණයෙන්ම ඩිජිටල්කරණය වූ ලෝකයකට අප ඇතුළු වෙනවා. ඒ සඳහාත් අප සූදානම් විය යුතුයි.

එයින් අදහස් කරන්නේ දැන් තිබෙන සියලු දේ නැති වෙනවා කියන එක නෙවෙයි. නමුත් අලුත් දේවල්වලට මුහුණ ‍දීමට අප සූදානම් විය යුතු වෙනවා. යම් අංශවලින් රැකියා නැති වේවි. ඒ වගේම තවත් අංශවලින් රැකියා ඇති වේවි. ඒ රැකියා අපට පුරුදු රැකියාවලට වඩා ඉහළ මට්ටමේ ඒවා විය හැකියි. ඒ වගේම මේ සමඟ මුහුණ දීමට සිදුවන අවදානමත් තිබෙනවා.

අද තරුණ පරම්පරාව දෙස බැලුවොත් ‍දුරකතනයෙන් එහාට ජීවිතයක් නැතිව තිබෙනවා. එතන අවදානමත් තිබෙනවා. ඒවාටත් ගොදුරු නොවී ඒ විප්ලවයෙන් අපි ජය ගන්නේ කොහොමද ? අපි අනාගතයට සන්නද්ධ වන්නේ කෙහොමද? ඒ වගේම මේ රට ලෝකයේ ඉදිරියෙන්ම සිටින රටක් බවට පත් කරන්නේ කොහොමද කියන ඉලක්කය අනුව තමයි අපි ඉදිරියට යා යුත්තේ. යොවුන් සේනාංකය ඊට සුදුසුම ස්ථානයයි.

මම මීට පෙර සභාපතිතුමාට සිහිපත් කළා දේශගුණික විපර්යාසයට අපේ ලෝකය ගොදුරු වෙමින් සිටිද්දී ශ්‍රී ලංකාවත් ඉතාම අවදානම් තැනක ඉන්නේ. යොවුන් සේනාංකයට ඒ සම්බන්ධයෙන් විශාල සේවයක් කළ හැකියි. ඒ වගේම ලෝකයේම තරුණ ප්‍රජාව එක්ව සිටින කාලයක, රට වෙනුවෙන් එවැනි කටයුතු ඉටු කිරීමට අපේ තරුණ පරම්පරාවට වගකීමක් තිබෙනවා. යොවුන් සේනාංකයට එවන් වූ වගකීමකුත් තිබෙනවා. ඒ දෙස බලන්න කියලා මම සභාපති ඇතුළු පාලන මණ්ඩලයෙන් ඉල්ලා සිටිනවා. දූ දරුවන් ගෙන් ඉල්ලා සිටිනවා අනාගතයට මුහුණ දීම සඳහා සූදානම් වෙන්න කියලා.

අපි අමාරු කාලයකට මුහුණ දෙමින් සිටිනවා. නමුත් එයින් ජය ගැනීමට අවශ්‍ය වැඩපිළිවෙළ ජනාධිපති රනිල් වික්‍රමසිංහ මහතා ඉතා උනන්දුවෙන් ක්‍රියාත්මක කරමින් සිටිනවා. ඡන්දය ඉල්ලලා පත් වූ ජනාධිපතිවරයකුට වැඩිය එතුමාට විශාල වගකීමක් තිබෙනවා වගේම එතුමාට හැකියාවත් තිබෙනවා. අද එතුමාට වගකියන්න තිබෙන්නේ මේ තරුණ පරම්පරාවට හා ජනතාවට පමණයි. ඒ වගකීම එතුමා හරියාකාරව ඉටු කරමින් සිටිනවා. එතුමා වැඩ කරන්නේ ඡන්දදායකයින් සතුටු කරන්න නෙවෙයි. එතුමා වග කියන්නේ අනාගත පරම්පරාවට , රටේ ජනතාවට හා මේ රටට. ඒ වගකීම එතුමා ඉටු කරමින් සිටිනවා. ආර්ථික රාමුව නිසියාකාරව සකස් වෙමින් පවතිනවා. විනිවිදභාවයෙන් යුතුව වැඩ කටයුතු කළ හැකි රටක් නිර්මාණය වෙනවා. ආයෝජකයෙක් ආවත් විනිවදභාවයෙන් යුක්තව ඒ ආයෝජනය සිදු කර මේ රටේ තරුණ තරුණියන්ට රැකියා අවස්ථා ලබා දෙනවා වගේම අපේ රටට විදේශ විනිමය උපයා දීමට හැකියාව ලැබෙනවා.

එය තමයි අපට අවශ්‍ය වන්නේ. අපේ රටට විදේශ විනිමය එන තරමට තමයි අපිට ආදායම් වැඩි වෙන්නේ. ආදායම් වැඩි වන විට තමයි මේ රටේ දියුණුව ඇති කළ හැකි වන්නේ. ඒ අනාගතය උදා කරන්න ජනාධිපති රනිල් වික්‍රමසිංහ මහතා කටයුතු කරමින් සිටිනවා. ඔබ සියලු දෙනාට වඩාත් හොඳ අනාගතයක් ලබා දීමට එතුමා මහන්සි වෙනවා. ඒ පිළිබඳව විශ්වාසය තබා ගන්න. ඔබත් ඒ ගමන යන්න සූදානම් වෙන්න.

ක්‍රීඩා හා යෞවන කටයුතු රාජ්‍ය අමාත්‍ය රෝහණ දිසානායක, පාර්ලිමේන්තු මන්ත්‍රීවරුන් වන මධුර විතානගේ, කපිල නුවන් අතුකෝරල , ජාතික යොවුන් සේනාංකයේ සභාපති කර්නල් දර්ශන රත්නායක ඇතුළු පිරිසක් මෙම අවස්ථාවට එක්ව සිටියහ.

හිටපු ජනාධිපති, පාර්ලිමේන්තු මන්ත්‍රී මෛත්‍රීපාල සිරිසේන සහ පාර්ලිමේන්තු මන්ත්‍රී, ෆීල්ඩ් මාෂල් සරත් ෆොන්සේකා අතර අද (18) පාර්ලිමේන්තුවේදී දැඩි මත ගැටුමක් සිදුවිය.

එහිදී අදහස් දැක්වූ මන්ත්‍රී මෛත්‍රීපාල සිරිසේන මෙසේ පැවසීය.

"හිරේ හිටපු තමුන්නාන්සේව මම තමයි නිදොස් කොට නිදහස් කෙරුවේ. තමුන්නාන්සේට ගරු කිරීමක් විදිහට මම තමයි තමුන්නාන්සේව ෆීල්ඩ් මාෂල් කළේ. ඒ තත්ත්වය තුළ සිටියදී මට මේ විදිහට කතා කිරීම ඉතාම අසාධාරණයි. ඔබතුමාට කොහෙත්ම පුළුවන්කමක් නැහැ මට ඉලක්ක කරලා ජාතික ආරක්ෂාව ගැන කියන්න."

"ඔබතුමා හමුදාපති ලෙස ඉන්නකොට හමුදා මූලස්ථානයට පැනපු එල්ටීටීඊ කාන්තාවක් බෝම්බ පිපිරුවා. ඔබතුමාට ඒක වැදිලා බඩවැලුත් එළියට ඇවිල්ලා වෛද්‍යවරු තමයි බේරගත්තේ."

"හමුදාපති විදියට හමුදා මූලස්ථානය බේරගන්න බැරි කෙනා.. බඩවැල් එළියට ඇවිත් හානි වෙච්ච මිනිහා..මට ඇඟිල්ල දිගු කරන්නේ කොහොමද? ජාතික ආරක්ෂාව පිළිබඳව."

"චන්ද්‍රිකා මැතිණිය හැමතැනම කියනවා මාව හිරේ දාන්න කියලා. එතුමියගේ එක ඇහැක් නැතුව ගියා. ඇස් දෙක බේරගන්න බැරි වුණු මිනිස්සු.. තමන්ගේ ශරීරය බේරගන්න බැරි වුණු මිනිස්සු මට ඇඟිල්ල දිගු කරලා කියනවා.. මේ මේ තමුසේ ජාතික ආරක්ෂාව දන්නෑ කියලා."

"ඔයාට වඩා මම ජාතික ආරක්ෂාව පෙන්නුවා. සහරාන් ඇතුළු මුළු සංවිධානයම මම සති 3කින් විනාශ කළා."

ඊට යළිත් ප්‍රතිචාර දක්වමින් පාර්ලිමේන්තු මන්ත්‍රී, ෆීල්ඩ් මාෂල් සරත් ෆොන්සේකා මෙසේ පැවසීය.

"මෙයා කිව්වා මාව නිදහස් කළා කියලා. ෆීල්ඩ් මාෂල් කළා කියලා. මෙයාගේ මැතිවරණ වේදිකාවට කොහොමහරි එන්න කියලා කිව්වා. මම රැස්වීම් 100ක කතා කළා. දින 100 කියලා තිබ්බා මට සාධාරණය ඉටු කරනවා කියලා. ඒක තනි මතයට කරපු දෙයක් නෙමෙයි. හැබැයි ඔබතුමා මගේ අමාත්‍ය ධුරය ඉතාම නිවට විදියට අයින් කළා."

"සාම සාකච්ඡා අතරේ ත්‍රස්තවාදියෙක්ට රිංගලා එන්න පුළුවන්. ඔබතුමාට මේවා තේරෙන්නේ නැහැ. ඒ නිසා තමයි ඒ වගේ අනතුරකට යුද හමුදා මූලස්ථානය මුහුණ දුන්නේ."

"බෝම්බේ ගියායින් පස්සෙත් ලංකාවට ආපු ගුවන් යානා දෙකේම එන්නේ නැතුව රෑ 1ට ආපු ගුවන් යානයේ ආවේ. ඒ මොකද?. ඒකේ විතරයි පළවෙනි පන්තිය තියෙන්නේ. අච්චර ජන විනාශයක් වෙලත් ගුවන් යානයක නැගලා රටට එන්න උනන්දුවක් තිබුණේ නැති ඔබතුමා.. බලන්න ඔබතුමාගේ ආකල්ප."

මන්ත්‍රී සිරිසේන :

"මෙතුමා ෆීල්ඩ් මාෂල්කම ඉල්ලගෙන මගේ පස්සෙන් ඇවිත් ඇඬුවා."

ශ්‍රී ලංකාවේ ජාත්‍යන්තර ගුවන් තොටුපළකින් හෝ වරායකින් පිටත්ව යන පුද්ගලයින් විසින් ගෙවිය යුතු අපගමන බද්ද සම්බන්ධයෙන් නව නිවේදනයක් නිකුත් ඇත.

මුදල් අමාත්‍යවරයා වශයෙන් ජනාධිපති රනිල් වික්‍රමසිංහගේ අත්සනින් යුතුව නිකුත් කර ඇති මෙම රජයේ නිවේදනයට අනුව 2022.03.27 සිට 2023.03.26 දක්වා කාලපරිච්ඡේදය තුළ දී කොළඹ ජාත්‍යන්තර ගුවන් තොටුපළ රත්මලාන සිට ගුවන් යානයකින් ශ්‍රී ලංකාවෙන් පිටත්ව යන සෑම තැනැත්තෙක්ම ඇමරිකානු ඩොලර් 30 ක අපගමන බද්දක් ගෙවිය යුතුවෙයි.

මීට අමතරව 2023.01.12 සිට 2023.07.11 දක්වා කාලපරිච්ඡේදය තුළ දී යාපනය ජාත්‍යන්තර ගුවන්තොටුපළෙන් පිටත්ව යන සෑම තැනැත්තෙකුගෙන්ම ද ඩොලර් 30 ක අපගමන බද්දක් අය කරනු ලැබේ.

අදාළ නිවේදනයේ වැඩිදුරටත් සඳහන් වන්නේ මත්තල, රත්මලාන හෝ යාපනය යන ජාත්‍යන්තර ගුවන්තොටුපළ හැර ශ්‍රී ලංකාවේ වෙනත් ගුවන් තොටුපළකින් පිටත්ව යන ඕනෑම අයෙකු විසින් ඩොලර් 60 ක අපගමන බද්දක් ගෙවිය යුතු බවයි. එනම් මෙම නියමය කටනායක බණ්ඩාරනායක ජාත්‍යන්තර ගුවන් තොටුපළින් පිටත්ව යන තැනැත්තන් සඳහා අදාළ වේ.

තවද ශ්‍රී ලංකාවේ සිට නෞකා මාර්ගයෙන් පිටත්ව යන තැනැත්තන් ද ඩොලර් 60 ක අපගමන බද්දකට යටත් වනු ඇත.

මත්තල මහින්ද රාජපක්ෂ ගුවන් තොටුපළ සමඟ මෙහෙයුම් ආරම්භ කරනු ලබන ජාත්‍යන්තර ගුවන් සමාගම් සඳහා මෙහෙයුම් ආරම්භ කරනු ලබන දින සිට වසර දෙක කාලයක් මෙම බද්ද අය කිරීම නිදහස් වේ.
වෙයි.

පාස්කු ප්‍රහාරයෙන් වින්දිතයන් බවට පත්වූ පුද්ගලයින් වන්දි ඉල්ලා ගොනු කර ඇති නඩුවල වගඋත්තරකරුවකු වශයෙන් නම් කර සිටින රාජ්‍ය බුද්ධි සේවයේ හිටපු ප්‍රධානී නිලන්ත ජයවර්ධන වෙනුවෙන් පෙනී නොසිටින බව නීතිපති වරයා කොළඹ දිසා අධිකරණයට දැනුම් දී තිබේ.

නීතිපතිවරයා මේ බව දැනුම්දී සිටියේ වින්දිතයින් විසින් ගොනුකර තිබෙන නඩු අද(18) කොළඹ දිසා අධිකරණය හමුවේ කැඳවනු ලැබූ අවස්ථාවේදීය.

තවද පාස්කු ඉරුදින ත්‍රස්ත ප්‍රහාරයක් එල්ලවීමට නියමිත බවට බුද්ධි තොරතුරු ලැබී තිබියදීත් එය වළක්වා ගැනීමට පියවර නොගැනීම හේතුවෙන් වින්දිතයින් බවට පත්වූ තමන්ට වන්දි අය කරදෙන ලෙස ඉල්ලා වින්දිතයින් විසින් ගොනුකර තිබෙන නඩු 108ක වගඋත්තරකරුවකු වශයෙන් නම්කර සිටින ජනාධිපති රනිල් වික්‍රමසිංහ එම නඩුවලින් ඉවත් කරන්නේ ද? නැද්ද? යන නියෝගය ලබන මාර්තු 01 වනදා ප්‍රකාශයට පත්කරන බව කොළඹ දිසා අධිකරණය නිවේදනය කළේය.

එහිදී රනිල් වික්‍රමසිංහ ජනාධිපතිවරයා වශයෙන් පත්වී සිටින බැවින් ආණ්ඩුක්‍රම ව්‍යවස්ථාව තිස් පස් වන වගන්තිය යටතේ ඒ මහතාට එරෙහිව නඩුවක් පවත්වාගෙන යා නොහැකි බවට ඒ මහතාගේ නීතිඥවරු විසින් අධිකරණය හමුවේ ඉල්ලීමක් ඉදිරිපත් කර තිබුණි.

එම ඉල්ලීමට අදාළ ලිඛිත දේශන පාර්ශවකරුවන් විසින් අද ඉදිරිපත් කළේය.

ජනවාර්ගික ගැටලූවට විසඳුම් අපෙක්ෂාවෙන් ජනාධිපතිවරයා හා දෙමළ දේශපාලන පක්ෂ අතර ආරම්භ කෙරුණු සාකච්ඡවලදි ඉදිරිපත් වුණු මුලික ඉල්ලීම් ඉටුකිරීමට ආණ්ඩුවට ලබාදුන් කාලය අවසන් බව දෙමළ ජාතික සන්ධානයේ නායක පාර්ලිමේන්තු මන්ත්‍රී ආර්. සම්බන්දන් පවසයි.

ඒ අනුව එම සාකච්ඡා ඉදිරියට පවත්වාගෙන යාම තීරණය කරනු ලබන්නේ තම පාර්ශවය ආණ්ඩුව වෙත ඉදිරිපත් කරනු ලැබු මුලික ඉල්ලීම් ඉටු කිරීමෙන් පසුව බව ද ඔහු සඳහන් කරයි.

සම්බන්දන් මහතා මේ බව පැවසුවේ පසුගිය 10 වනදා ජනාධිපතිවරයා හා දෙමළ දේශපාලන පක්ෂ අතර පැවති සාකච්ඡාවේදී දෙමළ දේශපාලන පක්ෂ ජනාධිපතිවරයාට ඉදිරිපත් කළ යෝජනා සම්බන්ධයෙන් කළ විමසීමකදීය.

"දෙමළ දේශපාලන සිරකරුවන් නිදහස් කිරීම , උතුරු නැගෙනහිර පළාත් ඉඩම් අත්පත් කර ගැනීම නතර කිරීම හා අත්පත් කර ගෙන ඇති ඉඩම් නිදහස් කිරීම හා මුලික බලතල බෙදීම යන ඉල්ලීම් ඉටු කිරීමට රජයට සතියක කාලයක් ලබාදුන්නා. නමුත් ලබාදුන් එම කාලය අවසන්. මෙතෙක් එම ඉල්ලීම් වෙනුවෙන් කිසිදු සාධනීය පිළිතුරක් ලබාදීමට ආණ්ඩුව සමත් වී නැහැ.

තෛයිපොංගල් උත්සවය සැමරීම වෙනුවෙන් යාපනයේ සංචාරයක නිරත වු ජනාධිපති රනිල් වික‍්‍රමසිංහ මහතා අපගේ පාර්ලිමේන්තු මන්තී‍්‍රවරුන් සමඟ සාකච්ඡුාවක් පවත්වා තිබෙනවා. එහිදි ඉඩම් ආක‍්‍රමණ සම්බන්ධයෙන් යම් යම් පොරොන්දු ලබා දී තිබුණා. නමුත් මෙම පොරොන්දු ආරක්ෂක අංශ විසින් පිළිපදින්නේද යන්න පිළිබඳව විශ්වාස කිරීමට යම් කාලයක් බලා සීටීමට සිදුවනු ඇති. ජනාධිපතිවරයා හා මීළඟ සාකච්ඡා වටය වෙනුවෙන් මෙතෙක් ආරාධනා ලැබුණේ නැහැ. එවැනි සාකාච්ඡාවක් වෙනුවෙන් ආරාධනා ලැබුණහොත් එයට සහභාගි වන්නේද නැද්ද යන්න පිළිබඳව තීරණයක් ගනු ලබනවා.නමුත් මීළඟ සාකච්ඡා වටයට සහභාගි වන්නේ මීට පෙර සාකච්ඡාවේදි අප ඉදිරිපත් කළ ඉල්ලීම් වලට යම් හෝ සාධනීය විසඳුම් ලැබුණොත් පමණයි."