අරගලකරුවන් ජනාධිපති මන්දිරයට ඇතුළු වූ අවස්ථාවේ එහි තිබී රුපියල් එක්කෝටි හැත්තෑ අට ලක්ෂයකට අධික මුදල් සොයා ගැනීමේ සිද්ධියට අදාළව සැකකරුවකු වශයෙන් පෙනී සිටින ලෙස දන්වා කොළඹ කොටුව මහේස්ත්‍රාත් අධිකරණය බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් වෙත නිකුත් කර තිබූ සිතාසිය බල රහිත කරමින් අභියාචනාධිකරණය අද (ජුනි 26 වැනිදා ) රිට් ආඥාවක් නිකුත් කළේය.
දේශබන්දු තෙන්නකෝන් ඉදිරිපත් කළ රීට් පෙත්සමේ තීන්දුව දෙමින් අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන විනිසුරු මඩුල්ල විසින් මෙම නියෝගය නිකුත් කරනු ලැබීය.
තීන්දුව ප්‍රකාශයට පත් කරමින් අභියාචනාධිකරණයේ, සභාපති විනිසුරුවරයා කියා සිටියේ ජනාධිපති මන්දිරයේ දී සොයා ගත් මුදල් හිටපු ජනාධිපතිවරයාගේ බවට කරුණු ඉදිරිපත් වී නොමැති බවය.
එමෙන්ම අදාළ මුදල් අධිකරණයට ඉදිරිපත් කිරීමේ අවශ්‍යතාවක් නොමැති බවත් තීන්දුවේ සඳහන් විය.
ඒ අනුව මෙම පුද්ගලික පැමිණිල්ල පවත්වාගෙන යාමේ හැකියාවක් නොමැති බව සඳහන් කළ විනිසුරුවරයා පෙත්සම්කරුට සැකකරුවෙකු වශයෙන් අධිකරණයේ පෙනී සිටින ලෙස දන්වා මහේස්ත්‍රාත්වරයා නිකුත් කළ සිතාසිය බල රහිත කරමින් රිට් ආඥාවක් නිකුත් කිරීමටත් නියෝග කළේය.
ඊට අමතරව පෙත්සම්කාර ජ්‍යෙෂ්ඨ නියෝජ්‍ය පොලිස්පතිවරයාට එරෙහිව තවදුරටත් නීතිමය ක්‍රියාමාර්ග නොගන්නා ලෙසත් විනිසුරු මඩුල්ල විසින් කොළඹ කොටුව මහේස්ත්‍රාත් වරයාට නියෝග කරන ලදි.
'ගෝඨා ගෝ ගම'ට පහරදීමේ සැකකරුවකු ලෙස නම් කරමින් නිකුත් කළ ලිපිය බල රහිත කරමින් තවත් රිට් ආඥාවක්
මේ අතර ඉකුත් වසරේ මැයි මස 9 වන දා ගාලු මුවදොර 'ගෝඨා ගෝ ගම' අරගලයට පහරදීමේ සිද්ධියට අදාළව සැකකරුවකු ලෙස දේශබන්දු තෙන්නකෝන් නම් කරන ලෙස නීතිපතිවරයා නිකුත් කරන ලද ලිපියක් ද බල රහිත කරමින් අභියාචනාධිකරණය විසින් තවත් රිට් ආඥාවක් නිකුත් කළේය.
නීතිපතිවරයා විසින් නිකුත් කළ ලිපිය බලරහිත කරන ලෙස ඉල්ලා දේශබන්දු තෙන්නකෝන් විසින් ගොනුකළ පෙත්සමේ තීන්දුව දෙමින් අභියාචනාධිකරණ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන විනිසුරු මඩුල්ල විසින් මෙම නියෝගය නිකුත් කරනු ලැබීය.
තීන්දුව ප්‍රකාශයට පත් කරමින් අභියාචනාධිකරණයේ සභාපති විනිසුරුවරයා සඳහන් කළේ ඉකුත් වසරේ මැයි 09 වැනිදා ගාලුමුවදොර අරගලයට පහරදීමේ සිද්ධියට මෙම පෙත්සම්කරු ආධාර අනුබල දුන් බවට ප්‍රමාණවත් සාක්ෂි අනාවරණය වී නොමැති බවය.
ඒ අනුව පෙත්සම්කරුට එරෙහිව දණ්ඩ නිති සංග්‍රහයේ 314, 316 සහ 343 යන වගන්ති යටතේ චෝදනා ඉදිරිපත් කිරීමට හැකියාවක් නොමැති බව සඳහන් කළ අභියාචනාධිකරණ විනිසුරු මඩුල්ල එසේ චෝදනා ඉදිරිපත් කිරීමෙන් ඔහුට අයුක්තියක් සහ අසාධාරණයක් සිදුවන බව ද ප්‍රකාශ කළේය.
ඒ අනුව පෙත්සම්කරු, සැකකරු වශයෙන් නම්කරන ලෙස දන්වමින් නීතිපතිවරයා විසින් ඉකුත් අප්‍රේල් මස මස 19 වැනිදා අපරාධ පරීක්ෂණ දෙපාර්තමේන්තුව වෙත යැවූ ලිපිය තුළින් පෙත්සම්කරුට පිරිමැසිය නොහැකි හානියක් සිදුවී ඇති බවත් එය නීතිපතිවරයා තමන්ට පැවරී තිබෙන බලය අභිබවා ගොස් කටයුතු කිරීමක් බවත් අභියාචනාධිකරණයේ සභාපති විනිසුරුවරයා පෙන්වා දුන්නේය.
ඒ අනුව පෙත්සම්කරු සැකකරු වශයෙන් නම් කරන ලෙස දන්වමින් නීතිපතිවරයා විසින් නිකුත් කළ ලිපිය ද බල රහිත කිරීමේ රිට් ආඥාවක් නිකුත් කළ අභියාචනාධිකරණය ඔහු අදාළ සිද්ධියේ තවදුරටත් සැකකරුවකු නොවන බව කොළඹ කොටුව මහේස්ත්‍රාත් අධිකරණයට දැනුම් දෙන ලෙසත් අපරාධ පරීක්ෂණ දෙපාර්තමේන්තුවේ අධ්‍යක්ෂ වරයාට නියෝග කළේය.
එම සිද්ධිය සම්බන්ධයෙන් පෙත්සම්කාර දේශබන්දු තෙන්නකෝන් අත්අඩංගුවට ගැනීම වළක්වමින් අභියාචනාධිකරණය විසින් අපරාධ පරීක්ෂණ දෙපාර්තමේන්තුවට තවත් රිට් ආඥාවක් ද නිකුත් කරනු ලැබීය.
නිදන කාමරයෙන් හමුවූ මිලියන 18 ගැන ගෝඨාභයගෙන් ප්‍රකාශ ගැනීමට අධිකරණයෙන් නියෝග
අරගලකරුවන් කොටුව ජනාධිපති මන්දිරයෙන් සොයා ගත් රුපියල් මිලියන 18කට අධික මුදල ලැබුණු ආකාරය ගැන හිටපු ජනාධිපති ගෝඨාභය රාජපක්ෂගෙන් ප්‍රකාශයක් ගෙන විමර්ශනය කරන්නැයි කොටුව මහෙස්ත්‍රාත් තිළිණ ගමගේ (2022 නොවැම්බර් 11 ) පොලිසියට නියෝග කළේය.
2022 ජුලි 09 වැනිදා අරගලකරුවන් විසින් මෙම මුදල් තොගය සොයා ගෙන තිබුණේ ගෝඨාභය රාජපක්ෂ හිටපු ජනාධිපතිවරයාගේ නිදන කාමරයේ තිබියදීය.
නඩුව කැදවු අවස්ථාවේදී ජනාධිපති නීතිඥ රියන්සි අර්සකුලරත්න අගතියට පත් පාර්ශවය වෙනුවෙන් පෙනී සිටියේය.
මෙම සිද්ධිය සම්බන්ධයෙන් මේ දක්වා හිටපු ජනාධිපති ගෝඨභය රාජපක්ෂගෙන් ප්‍රකාශයක් ලබා ගෙන නොමැති බව ජනාධිපති නීතිඥවරයා අධිකරණයට පෙන්වා දුන්නේය.
ඒ අනුව ඔහුගෙන් ප්‍රකාශයක් ගැනීමට අධිකරණය විසින් කොටුව පොලිසියට නියෝග කරනු ලැබීය.
මේ අතර අරගලකරුවන් කොටුව ජනාධිපති මන්දිරයට බලහත්කාරයෙන් ඇතුලු වීමේ සිද්ධිය සම්බන්ධයෙන් පවරා ඇති නඩුවේ 59 වැනි සැකකරු ලෙස නීතිඥ නුවන් බෝපගේ මෙදින නම් කෙරිණි.
කොළඹ මධ්‍යම අපරාධ විමර්ශන කොට්ඨාසය කළ කරුණු දැක්වීමක් සළකා බලමින් කොටුව මහෙස්ත්‍රාත් අධිකරණය ඔහුව සැකකරුවෙකු ලෙස නම් කිරීමට අවසර ලබා දුන්නේය.
බීබීසී
Ad
