දේශීය ණය ප්‍රතිව්‍යුහගත කිරීම පිළිබඳව දැඩි අවධානයකින් බලා සිටින බවත් එහිදී කිසි ලෙසකින්වත් ණය කපා හැරීමක් සිදු නොවිය යුතු බවත් සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා අවධාරණය කරයි.
ඔහු මේ බව සඳහන් කර සිටියේ අද (25) කොළඹදී සිදුකළ අදහස් දැක්වීමකදී ය.
දේශීය ණය ප්‍රතිව්‍යුහගත නොකළ යුතුයැයි විපක්ෂයේ මතය වුවත් එය සිදුකළ යුතුම තත්ත්වයක් තිබෙන්නේ නම් එය රටට උපරිම සහනයක් ලැබෙන සේ කළ යුතු බවත් එවැනි අවස්ථාවක සහයෝගය ලබාදීමට ගැටලුවක් ඇති නොවන බවත් මෙහිදී අවධාරණය කර සිටියේය .
එසේම දේශීය ණය ප්‍රතිව්‍යුහගත කිරීම නිවැරදිව සිදුකළහොත් එයින් දැනට භාණ්ඩාගාර බිල්පත්වල තිබෙන අවධානම් පොලී ප්‍රතිශතය අඩුවී එය පොලී අනුපාත අඩුවීමටද හේතුවක් වනු ඇති බවත් එවිට , දැනට සංකෝචනය වී ඇති ආර්ථික කටයුතු පුළුල් වීමට අවස්ථාවක් ලැබෙන අතර එය මේ මොහොතේ එය අත්‍යවශ්‍ය දෙයක් බවත් මන්ත්‍රීවරයා සඳහන් කළේය.
මෙවැනි ආර්ථික කටයුතු පුළුල් වීමක් ව්‍යාපාරිකයින් ඇතුළු මෙරට සියළුම පුරවැසියන්ට අවශ්‍ය බවද මන්ත්‍රීවරයා පවසා සිටියේ ය.
දේශීය ණය ප්‍රතිව්‍යුහගත කිරීමේ යෝජනාව ඉදිරියේදී මුදල් කමිටුව හමුවට පැමිණෙනු ඇති බවටද හර්ෂ ද සිල්වා මන්ත්‍රීවරයා විශ්වාසය පළකර සිටියේ ය.
සජිත් හුඟක් වෙනස් !
කෙසේ වුවත් මන්ත්‍රීවරයා ගේ මේ අදහස් දැක්වීම විපක්ෂ නායක සජිත් ප්‍රේමදාස ගේ මතයට මුළුමනින්ම වෙනස් ස්ථාවරයක් ය. විපක්ෂ නායක සජිත් මීට පෙර සිටි ස්ථාවරය වූයේ ජාත්‍යන්තර මූල්‍ය අරමුදල සමග වන වැඩසටහන සඳහා විවේචනාත්මකව සහය දීමය. ඒ සම්බන්ධයෙන් ඔහුට මීට පෙර ගැටළුවක් තිබුනා නම් ඒ රනිල් වික්‍රමසිංහ ජනාධිපති වූ ආණ්ඩුව සමග IMF ගිවිසුමට එක්වීම ය.
නමුත් දේශපාලන ආරංචි මාර්ග සඳහන් කරන්නේ මේ වන විට නිදහස ජාතික සභාවේ සිටින වියත්මග නැත්නම් හිටපු ජනාධිපති ගෝඨාභය රාජපක්ෂ ගේ උපදේශකයන් ලෙස ප්‍රකට පිරිස ඇසුරත් සමග විපක්ෂ නායක සජිත් IMF සම්බන්ධයෙන් වන ස්ථාවරය වෙනස් කරගෙන ඇති බවය. දැන් ඔහු සිටින්නේ ණය ප්‍රතිව්‍යුහගත කිරීමට විරුද්ධ ස්ථාවරයක බවත් එසේම IMF සමග ඇතිකර ගත් ගිවිසුම ප්‍රතිසංශෝධනය වියයුතුය යන අදහසක බවත් දේශපාලන ආරංචි මාර්ග වැඩිදුරටත් පවසයි .