අධිකරණයට අපහාස කිරීම සම්බන්ධයෙන් රාජ්‍ය ඇමතිනී ඩයනා ගමගේට එරෙහිව පියවර ගන්නා ලෙස අභියාචනාධිකරණයේ සභාපති විනිසුරුවරයා වෙත ඉල්ලීමක් යොමු කරන බව කොළඹ මහෙස්ත්‍රාත් අධිකරණය අද (22) දන්වා සිටියේය.
අපරාධ පරීක්ෂණ දෙපාර්තමේන්තුව සහ සමාජ මාධ්‍ය ක්‍රියාකාරිකයෙකු වන ඔෂල හේරත් වෙනුවෙන් පෙනී සිටි නීතිඥවරුන් විසින් ඉදිරිපත් කළ කරුණු සලකාබැලීමෙන් අනතුරුව කොළඹ ප්‍රධාන මහෙස්ත්‍රාත් ප්‍රසන්න අල්විස් අදාළ නියෝගය නිකුත් කර තිබුණි.
රාජ්‍ය ඇමතිනී ඩයනා ගමගේ ගේ පුරවැසිභාවයට අදාළව කොළඹ මහෙස්ත්‍රාත් අධිකරණය හමුවේ ගොනුකර ඇති නඩුවක නියෝගයක් පසුගිය අප්‍රේල් මස 24 වනදා කොළඹ ප්‍රධාන මහෙස්ත්‍රාත් ප්‍රසන්න අල්විස් විසින් ප්‍රකාශයට පත් කර තිබුණි.
ඉකුත් මැයි මස 29 වනදා 'අද දෙරණ' රූපවාහිනී නාලිකාවේ 360 වැඩසටහනට සහභාගී වූ ඩයනා ගමගේ අමාත්‍යවරිය එම නඩු තීන්දුව ප්‍රකාශයට පත්වීමට පෙරම එය ලබාගන තිබෙන බව ප්‍රකාශ කර තිබුණේ යැයි අපරාධ පරීක්ෂණ දෙපාර්තමේන්තුව අධිකරණය හමුවේ සඳහන් කළේය.
මේ සම්බන්ධයෙන් සමාජ මාධ්‍ය ආවේෂණ පරීක්ෂණයක් සිදුකළ බවත් එහිදී අදාළ නඩු තීන්දුව මුලින්ම පළවී තිබුණේ ඕෂල ලක්මාල් නමැත්තෙකුගේ සමාජ මාධ්‍ය ගිණුමේ බවත් අදාළ නඩු තීන්දුව ප්‍රකාශයට පත් කළ අප්‍රේල් මස 24 වනදාට පෙර එම තීන්දුව කිසිදු සමාජ මාධ්‍ය ජාලයක් ඔස්සේ පළවී නොතිබූ බවත් අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශයේ ස්ථානාධිපතිවරයා අධිකරණයට දන්වා සිටියේය.
මීට අදාළව ඔෂල හේරත් ගෙන් ප්‍රකාශයක් සහටන් කරගත් බවත් එම ප්‍රකාශයට අනුව අදාළ නඩු තීන්දුව ප්‍රකාශයට පත්වී දින හතරකට පසුව ඔහු විසින් එහි පිටපත් ලබාගෙන තිබෙන බව අනාවරණයවී ඇතැයි ද අපරාධ පරීක්ෂණ දෙපාර්තමේන්තුවේ නිලධාරියා කියා සිටියේය.
මීට අදාළව ඩයනා ගමගේ රාජ්‍ය අමාත්‍යවරියගෙන් ප්‍රකාශයක් සටහන් කරගැනීමට අවශ්‍යව තිබෙන හෙයින් එම ප්‍රකාශය සටහන් කරගෙන වාර්තාවක් ඉදිරිපත් කිරීම සඳහා දිනයක් ලබාදෙන ලෙස අපරාධ පරීක්ෂණ දෙපාර්තමේන්තුව අධිකරණයෙන් ඉල්ලා සිටියේය.
එම අවස්ථාවේදී සමාජ මාධ්‍ය ක්‍රියාකාරිකයෙකු වන ඔෂල හේරත් වෙනුවෙන් පෙනී සිටි නීතිඥ හෆීල් ෆාරිස් අධිකරණය හමුවේ කරුණු දක්වමින් මෙම ප්‍රකාශය තුළින් රාජ්‍ය ඇමතිනී ඩයනා ගමගේ අධිකරණයට අපහාසයක් සිදුකර ඇති බවට චෝදනා කළේය.
ඒ අනුව ඇයට එරෙහිව අධිකරණයට අපහාස කිරීම සම්බන්ධයෙන් කටයුතු කිරීම සඳහා අදාළ පැමිණිල්ල අභියාචනාධිකරණය වෙත යොමු කරන ලෙසත් නීතිඥවරයා ඉල්ලීම් කළේය.
දෙපාර්ශ්වය විසින් ඉදිරිපත් කළ කරුණුවලට සවන් දුන් කොළඹ ප්‍රධාන මහෙස්ත්‍රාත් ප්‍රසන්න අල්විස් සිය තීන්දුව ප්‍රකාශයට පත් කළේය.
"අධිකරණය හමුවේ ඉදිරිපත්වී ඇති කරුණු පිරික්සීමේදී මා විසින් අදාළ නඩු තීන්දුව ප්‍රකාශයට පත් කිරීමට පෙර එය ලබාගන තිබෙන බව මෙම පරීක්ෂණයට භාජනය වී සිටින තැනැත්තිය විසින් ප්‍රකාශ කර තිබෙනවා. මෙම නඩු තීන්දුව යතුරුලියනය කරන ලද්දේ මාගේ නිවසේදී මා විසින් මාගේ ලැප්ටොප් පරිගණකයෙන්. එසේ යතුරුලියනය කරන ලද නඩු තීන්දුව pen drive එකක දමාගෙන නිවසේ සිට මගේ කලිසම් සාක්කුවේ දමාගෙන අධිකරණය වෙත රැගෙන ආවා."
"ඉන්පසුව අධිකරණයේ දී එම නඩු තීන්දුවට අදාළ පිටපත් මා විසින්ම ලබා ගත්තා. මෙම නඩු තීන්දුව පිටපත් කිරීමේ කටයුතුවලට කිසිදු යතුරුලියන ලේඛිකාවක් සම්බන්ධ වුණේ නැහැ. එමනිසා මෙම නඩු තීන්දුව ප්‍රකාශයට පත් කිරීමට පෙර පිටවීමට කිසිදු හැකියාවක් නැහැ." යනුවෙන් ප්‍රධාන මහෙස්ත්‍රාත්වරයා කියා සිටියේය."
වැඩිදුරටත් කරුණු දැක්වූ ප්‍රධාන මහෙස්ත්‍රාත්වරයා,
"ඉදිරිපත්වී ඇති කරුණු පිරික්සීමේදී මෙම පරීක්ෂණයට භාජනයවී සිටින තැනැත්තිය විසින් සිදුකර ඇති අදාළ ප්‍රකාශය අධිකරණය විසින් නිරීක්ෂණය කළා. ඒ තුළින් බැලූ බැල්මටම අධිකරණයට අපහාස කිරීම සම්බන්ධයෙන් කටයුතු කිරීමට සුදුසු කරුණු ඇති බව පෙනී යනවා. ආණ්ඩුක්‍රම ව්‍යවස්ථාවේ 105 (3) වගන්තිය ප්‍රකාරව මහෙස්ත්‍රාත් අධිකරණයට කරුණු ලබන අපහාසයක් සම්බන්ධයෙන් නඩු විභාග කිරීමේ බලය අභියාචනාධිකරණය වෙත පැවරී තිබෙනවා."
"නමුත් අධිකරණ සංවිධාන පනත යටතේ ද මෙම අපහාසය සම්බන්ධයෙන් නඩු විභාග කිරීමට මාගේ අධිකරණයටත් බලය ලබාදී තිබෙනවා. එහෙත් මෙම වරදේ ස්වභාවය සම්බන්ධයෙන් සලකාබැලීමේදී මාගේ අධිකරණය හමුවේ පවත්වනු ලබන නඩු විභාගයකින් අනතුරුව පැනවිය හැකි දඩුවම ප්‍රමාණවත් වන්නේ නැහැ."
"නමුත් අභියාචනාධිකරණයට දඬුවම් පැමිණවීම සම්බන්ධයෙන් පුළුල් බලයක් තිබෙනවා."යනුවෙන් සඳහන් කළ ප්‍රධාන මහෙස්ත්‍රාත්වරයා ඒ අනුව ඩයනා ගමගේ මහත්මිය සම්බන්ධයෙන් අධිකරණයට අපහාස කිරීමේ චෝදනාවට අදාළව පියවරගන්නා ලෙස අභියාචනාධිකරණය සභාපතිවරයා වෙත ඉල්ලීමක් යොමු කරන බවත් නියෝග කළේය.
ඊට අදාළ කටයුතු සඳහා මහෙස්ත්‍රාත් අධිකරණයේ පවතින නඩුවේ සහතික පිටපතක්, ඇය විසින් අදාළ රූපවාහිනී සාකච්ඡාවේදී කරන ලද ප්‍රකාශය අන්තර්ගත සංයුක්ත තැටිය සහ සෙසු ලේඛන ද අභියාචනාධිකරණය වෙත යොමු කරන ලෙසත් ප්‍රධාන මහෙස්ත්‍රාත්වරයා විසින් අපරාධ පරීක්ෂණ දෙපාර්තමේන්තුවට නියෝග කර සිටියේය.
මුලාශ්‍රය - අද දෙරණ
Ad
