ආසියා හා ඕෂනියා කලාපයන්හි (Asia & Oceania ) වසරේ රාජ්‍යතාන්ත්‍රිකයා ලෙස එක්සත් රාජධානියේ ශ්‍රී ලංකා මහකොමසාරිස් සරෝජා සිරිසේන ලෝක ප්‍රකට ‘ඩිප්ලොමැට්’ සඟරාව විසින් සම්මානයට පාත්‍ර කරනු ලැබීය.
ඩිප්ලොමැට්’ වාර්ෂික සම්මාන ප්‍රදානය ලන්ඩනයේ ‘රෝයල් ඕවර්සීස් ලීගයේ’ පසුගිය 24 වන දා පැවැත්විණි.
පෙර නොවූ විරූ අභියෝග රැසකට ශ්‍රී ලංකාව මුහුණ දෙමින් සිටින සමයක මෙම සම්මානය ජාත්‍යන්තර තලයෙහි ශ්‍රී ලංකාවට ලැබුණු සම්මානයක් යැයි ද පෞද්ගලිකව ශ්‍රී ලංකාව නියෝජනය කරමින් වසර විසිපහක් පමණ වූ තම වෘත්තීය ජීවිතයට ලද පිළිගැනීමක් යැයිද සරෝජා සිරිසේන පැවසුවා ය.
ශ්‍රී ලංකා විදේශ සේවාවේ ජ්‍යෙෂ්ඨ නිලධාරිනියක වන සරෝජා සිරිසේන 1998 වසරේදී විදේශ සේවයට එක්ව තිබෙන අතර, එතැන් සිට මේ දක්වා විදේශ කටයුතු අමාත්‍යාංශයේ කොන්සියුලර් කටයුතු, ඇතුළුව දකුණු ආසියානු සහ සාර්ක් අංශයන්හි අධ්‍යක්ෂවරිය වශයෙන් ද ආර්ථික කටයුතු, පොදු රාජ්‍යතාන්ත්‍රිකභාවය යන අංශයන්හි අධ්‍යක්ෂ ජනරාල්වරිය වශයෙන් ද විදේශ කටයුතු අමාත්‍යාංශයේ මාධ්‍ය ප්‍රකාශිකාව වශයෙන් ද කටයුතු කර ඇත.
එමෙන් ම යුනෙස්කෝහි ශ්‍රී ලංකා ජාතික කොමිෂන් සභාවේ වැඩ බලන ලේකම්වරිය වශයෙන්ද යුනෙස්කෝහි නිත්‍ය නියෝජිත කණ්ඩායමේ පළමු ශ්‍රී ලංකා ලේකම්වරිය වශයෙන් ද කටයුතු කර තිබෙන සරෝජා සිරිසේන, ඔස්ට්‍රේලියාවේ මෙල්බර්න් විශ්වවිද්‍යාලයෙන් දේශපාලන විද්‍යාව පිළිබඳ ශාස්ත්‍රවේදී උපාධියක් ලබා ඇති අතර, ප්‍රංශයේ එකෝල් ජාතික පරිපාලන ආයතනයෙන් පශ්චාද් උපාධියක් ද ලබා තිබේ.
ඇය කොළඹ සිරිමාවෝ බණ්ඩාරනායක විද්‍යාලයේ හා දේවි බාලිකා විද්‍යාලයේ කීර්තිමත් ආදි ශිෂ්‍යාවකි.
https://casite-1385010.cloudaccess.net/news/17982-saroja-sirisena#sigProId639a7ff469