සමාජ මාධ්‍ය ක්‍රියාකාරී දර්ශන හඳුන්ගොඩට කොටුව මහෙස්ත්‍රාත් අධිකරණය විසින් ඇප ලබා දී තිබේ.
ඊයේ (05) රාත්‍රී ඩුබායි සිට මෙරටට පැමිණි අවස්ථාවේ දී අපරාධ පරීක්ෂණ දෙපාර්තමේන්තුව විසින් කටුනායක බණ්ඩාරනායක ජාත්‍යන්තර ගුවන් තොටුපොළේ දී ඔහු අත්අඩංගුවට ගෙන තිබිණ.
පසුව ප්‍රකාශයක් ලබාගැනීමෙන් පසු ඔහු කොළඹ කොටුව මහේස්ත්‍රාත් අධිකරණයට අද ඉදිරිපත් කළ අතර, එහිදී ඔහුට ඇප ලබාදීමට නියෝග කෙරුණි.
ප්‍රචණ්ඩත්වය ඉස්මතුවන අන්දමේ වීඩියෝවක් සමාජ මාධ්‍ය ජාලාවලට මුදාහැරීම සම්බන්ධයෙන් අපරාධ පරීක්ෂණ දෙපාර්තමේන්තුවට ප්‍රකාශයක් ලබාදීම මඟ හැර යාමේ චෝදනාව මත දර්ශන හඳුන්ගොඩ අත්අඩංගුවට ගනුලැබූ බව පොලිසිය පවසයි.
ඉකුත් වසරේ අරගල සමයේ මැයි 09 වැනිදා රාත්‍රියේ අරලියගහ මන්දිරය ඉදිරිපිට සිදුවූ කලහකාරී සිදුවීමේදී ප්‍රචණ්ඩත්වය ඉස්මතුවන අන්දමේ වීඩියෝවක් සමාජ මාධ්‍යවල මුදාහැරීම සම්බන්ධයෙන් ඔහුට එරෙහිව අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාශය විමර්ශනයක් අරඹා තිබුණි.
පසුව එම විමර්ශනයට අදාළව දර්ශන හඳුන්ගොඩගෙන් ඉකුත් වසරේ මැයි 31 වන දින අපරාධ පරීක්ෂණ දෙපාර්තමේන්තුව පැය 04ක කාලයක් ප්‍රකාශ සටහන් කර ගනු ලැබීය.
වැඩිදුර විමර්ශන සඳහා ප්‍රකාශ සටහන් කර ගැනීමට ඔහුට මෙම වසරේ ජනවාරි 20 වන දින අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස දැනුම් දීම ලැබෙන අවස්ථාවේ ඔහු විදේශගතව සිටියේය.
එම තත්වය යටතේ අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාශය දර්ශන හඳුන්ගොඩට එරෙහිව අධිකරණ නියෝගයක් ලබාගෙන තිබිණ.
ඩුබායි රාජ්‍යයේ සිට ඊයේ රාත්‍රී යළි දිවයිනට පැමිණෙමින් සිටියදී දර්ශන හඳුන්ගොඩ කටුනායක ගුවන් තොටුපළේදී අත්අඩංගුවට ගෙන ඇත්තේ එම අධිකරණ නියෝගය අනුවය.
සිද්ධිය සම්බන්ධයෙන් විමර්ශන අඛණ්ඩව සිදුකරන බව පොලිසිය අධිකරණය හමුවේ කියා සිටියේය.