පාර්ලිමේන්තු මන්ත්‍රී කුමාර වෙල්ගමගේ නායකත්වයෙන් යුත් නව ලංකා නිදහස් පක්ෂය සහ පාර්ලිමේන්තු මන්ත්‍රී පාඨලී චම්පික රණවක නායකත්වය දරණ 43 වන සේනාංකය එළඹෙන පළාත් පාලන මැතිවරණයේ දී එක්ව තරග කිරීමට තීරණය කර ඇත.
ඒ සඳහා වන ගිවිසුමකට ද පාඨලී චම්පික රණවක සහ කුමාර වෙල්ගම මන්ත්‍රීවරුන් අද (16) අත්සන් තබා තිබේ.
එහිදී රණවක මන්ත්‍රීවරයා පවසා ඇත්තේ තම කණ්ඩායම් දෙක එක්ව පළාත් පාලන ආයතන කිහිපයකට තරඟ කරන බවත්, තවත් ආයතනවලට ස්වාධීනව අපේක්‍ෂකයන් ඉදිරිපත් කිරීමට බලාපොරොත්තු වන බවත්ය.
‘හෙලිකොප්ටරය’ ලකුණින් තරඟ කරන නිදහස් ජනතා සන්ධානයට ද සුබ පතන බව කී රණවක මන්ත්‍රීවරයා ඔවුන් සමඟ ද සාකච්ඡා කළ නමුත් යම් යම් කරුණු සම්බන්ධයෙන් එකඟතාවට පත්වීමට නොහැකිවීම නිසා වෙනම තරග කිරීමට තීරණය කළ බව සඳහන් කළේය.
පාර්ලිමේන්තු මන්ත්‍රී කුමාර වෙල්ගම ද මෙහිදී පැවසුවේ නිදහස් ජනතා සන්ධානයේ සිටින්නේ තම සහෝදර මන්ත්‍රීවරුන් බවයි.