ඉන්ධන මිල සූත්‍රයට අනුව ඉන්ධන මිල හෙට (24) මධ්‍යම රාත්‍රීයේ සිට ඉහළ දැමීමට නියමිත බව බලශක්ති අමාත්‍යංශයේ උසස් නිලධාරියෙක් අද (23) පස්වරුවේ පැවසූ බව මාධ්‍ය වාර්තා පවසයි .
ඊට අනුව මෙම ඉන්ධන මිල ඉහළ දැමීමේදී සියලුම වර්ගවල පෙට්‍රල් සහ ඩීසල් ලීටරයක් රුපියල් 60 කට ආසන්න මුදලකින් ඉහළ දමනු ඇති බවත් භූමිතෙල් ලිටරයක් රුපියල් 200 කට වැඩි මිලක් දක්වා ඉහළ දමනු ඇති බව එම නිලධාරියා පැවසූ බව සඳහන් වෙයි.
ඒ අනුව ඔක්ටේන් 92 පෙට්‍රල් ලීටරයක මිල රුපියල් 74 කින් ද, ඔක්ටේන් 95 පෙට්‍රල් ලීටරයක මිල රුපියල් 78 කින් ද, ඩීසල් වර්ග දෙකම ලීටරයක මිල රුපියල් 56 කින් ද, සුපර් ඩීසල් ලීටරයක මිල රුපියල් 65 කින් ද ඉහළ නැංවීමට සැලසුම් කර ඇති බවත් භූමිතෙල් ලීටරයක් රුපියල් 210 ක් බවට පත්වීමට ඉඩ ඇති බව එම නිලධාරියා වැඩි දුරටත් සඳහන් කළ බවත් අදාළ මාධ්‍ය වාර්තා වල සඳහන් වෙයි.
ලංකා ඛනිජ තෙල් සංස්ථාව පසුගිය මැයි මස 24 වැනිදා කළ අවසන් ඉන්ධන මිල ඉහළ දැමීමෙන් ඔක්ටේන් 92 පෙට්‍රල් ලීටරයක් රුපියල් 420 ක්, ඔක්ටේන් 95 පෙට්‍රල් ලීටරයක් රුපියල් 450 ක්, ඔටෝ ඩීසල් ලීටරයක් රුපියල් 400 ක් සහ සුපිරි ඩීසල් ලීටරයක් රුපියල් 445 ක් දක්වා ඉහළ දැමීය.
ඒ අනුව පෙට්‍රල් සහ ඩීසල් ලීටරයක මිල රුපියල් 500.00 කට ආසන්න වෙයි. ඇතැම් මාධ්‍ය වාර්තා වල සඳහන් වන්නේ මෙකී ඉන්ධන ලීටරයක මිල නුදුරේදීම රුපියල් 500. 00 ඉක්මවා යන තත්ත්වයක් ඇති බවය.
කෙසේ වුවත් මේ වන විට ඉන්ධන හල් ආශ්‍රිත ඉතා දිගු පෝලිම් මෙන්ම ගැටුම්ද ඉහළ යන තත්ත්වයක් පෙන්නුම් කරයි.