විනෝදාස්වාද

පෙබරවාරි 6 වන දින තුර්කියට එල්ලවූ මාරාන්තික භූමිකම්පාව සම්බන්ධයෙන් වාර්තා සැපයූ මාධ්‍යවේදීන් රාශියක් තුර්කි රජය අත්අඩංගුවට ගෙන ඇතැයි බීබීසිය වාර්තාකර තිබේ.

මීට දින කීපයකට පෙර භූමිකම්පාවෙන් විපතට පත් ප්‍රදේශ නැරඹීමට ගිය ජනාධිපති Recep Tayyip Erdogan ජනතාවට පැවසුවේ "ව්‍යාජ ප්‍රවෘත්ති" පතුරුවන සහ "සමාජ අවුල් ඇති කරන" අයට "ප්‍රකෝප කරන්නන්" ලෙස හඳුන්වමින් නඩු පවරන බවය.

බීබීසී වාර්තාවට අනුව භූමිකම්පාව වාර්තා කිරීම හෝ අදහස් දැක්වීම සම්බන්ධයෙන් මේ වනවිට සිය ගණනක් රඳවාගෙන, හිරිහැර කර හෝ වාර්තා කිරීමෙන් වළක්වා ඇත.
මාධ්‍ය නිදහස කණ්ඩායම් පවසන්නේ අසාධාරණ ලෙස ලෝක ජනතාවගෙන් තොරතුරු සැඟවීමට රජය ක්‍රියාකරන බවයි.

තුර්කියේ සහ සිරියාවේ භූමිකම්පාවලින් අවම වශයෙන් පුද්ගලයින් 50,000 ක් මිය ගියහ.

දිවි ගලවා ගත් සමහර අය පැවසුවේ තමන්ට දින ගණනක් ආධාර නොලැබුණු බවයි. විරුද්ධ පක්‍ෂ මාධ්‍ය ආයතන හරහා ද එවැනිම පැමිණිලි උපුටා දක්වන ලදී.

මෑතකදී හඳුන්වා දුන් සාවද්‍ය තොරතුරු නීතිය යටතේ වාර්තා කරුවන් අත්අඩංගුවට ගැනීම හා ප්‍රශ්න කිරීම් සිදු කර තිබේ.

 තුර්කියේ නව නීතිය ඔක්තෝබර් මාසයේදී සම්මත විය. එය මහජනතාව සාවද්‍ය තොරතුරු පතුරුවා හැරීම අපරාධයක් බවට පත් කළ අතර ප්‍රවෘත්ති වෙබ් අඩවි සහ සමාජ මාධ්‍ය පාලනය කිරීමට රාජ්‍යයට වඩා පුළුල් බලතල ලබා දුන්නේය.

අසත්‍ය තොරතුරු ප්‍රචාරය කළ බවට ඇතැමුන්ට පනවා ඇති චෝදනා ව්‍යාජ බවද මාධ්‍ය සංවිධාන පවසා තිබේ.

යුරෝපා කවුන්සිලයේ නෛතික නිරීක්ෂණ සංවිධානයක් වන ‘වැනීසියේ කොමිසම‘ පැවසුවේ නව නීතිය අදහස් ප්‍රකාශ කිරීමේ නිදහසට බාධා කරන බවයි.

දේශසීමා රහිත වාර්තාකරුවන් (RSF) වාර්තා කරුවන්ට එරෙහි පරීක්ෂණ "විකාර" ඒවා ලෙස හඳුන්වා ඇති අතර එය ඉවත් කරන ලෙස බලධාරීන්ගෙන් ඉල්ලා තිබේ.

දශක හයකට ආසන්න කාලයක් මෙරට වේදිකා, චිත්‍රපට සහ ටෙලිනාට්‍යවල චරිතාංග රංගන ශිල්පියකු වූ බුද්ධි වික්‍රම මහතා හෝමාගම රොහලේදී අද (5) සවස අභාවප්‍රාප්ත වූයේය.

මියයන විට 84 වන වියේ පසුවූ ඒ මහතා එක්දරු පියෙකි.

1965 දී ජී.ඩී.එල්. පෙරේරා නිෂ්පාදනය කළ සාමා චිත්‍රපටයෙන් සිනමා ලොවට පිවිසි බුද්ධි වික්‍රම මහතා ඉන්පසු සම්මානනීය චිත්‍රපට රැසක විවිධ චරිත නිරූපනය කළේය.

ඔහු රඟපෑ චිත්‍රපට අතර සැඩොල් කඳුලු, වැලිකතර, හාර ලක්ෂය, තරංගා, අම්මේ ඔබ නිසා, වන බඹරු, අන්තිම රැය සහ රාජ්‍ය සේවය පිණිසයි ඒ අතර වේ.

චිත්‍රපට සහ වේදිකා නාට්‍යවලට වඩා බුද්ධි වික්‍රම මහතා රසිකයන් අතර වඩාත් ජනප්‍රිය වූයේ ටෙලිනාට්‍ය රංගනයෙන්ය.

ඔහු රංගනයෙන් දායකවූ ටෙලිනාට්‍ය සංඛ්‍යාව 20 කට ආසන්නය. ඒවා අතර අඹ යහළුවෝ, දූ දරුවෝ, කුමාරි හාමි, හිරුට මුවාවෙන්, පළිඟු මැණිකේ, පිටගම්කාරයෝ, පුංචි හපන්නු, තාරාදේවි, සොදුරු සිතැත්තී සහ සුසීමා ද වේ.

බුද්ධි සේන දයාරත්න වික්‍රම නමින් ගාල්ලේදී උපත ලද ඒ මහතා බුද්ධි වික්‍රම නමින් කලා නොවෙහි හැඳින්විය.

හීනටිගල සාරිපුත්‍ර විද්‍යාලයෙන් ප්‍රාථමික අධ්‍යාපනය ලද ඔහු ගාල්ල මහින්ද විද්‍යාලය වෙතින් ද්විතීයික අධ්‍යාපනය සම්පූර්ණ කළේ ය.

ඔහු රංගන ශිල්පියෙකු බවට පත් වීමට පෙර මිනින්දෝරු දෙපාර්තමේන්තුවේ නිර්මාණ ශිල්පියෙකු ලෙස සේවය කළේ ය.

දේහය පිළිබඳ අවසන් කටයුතු පසුව දැනුම් දෙන බව පවුලේ සාමාජිකයෙක් පැවැසුවේය.

දකුණු අප්‍රිකාවේ පැවැත්වෙන විස්සයි විස්ස ලෝක කුසලාන ක්‍රිකට් තරගාවලියට සහභාගී වීම සදහා ශ්‍රී ලංකා කාන්තා ක්‍රිකට් කණ්ඩායම අද(03) අලුයම කටුනායක ගුවන් තොටුපළෙන් පිටත්ව ගියහ.

තරගාවලියට යාමට මත්තෙන් ශ්‍රී ලංකා ක්‍රිකට් ආයතනය වසර ගණනාවකට පසු සර්ව ආගමික වතාවත් සිදු කර පිටත්ව යාම ද විශේෂත්වයකි.

ක්‍රීඩිකාවෝ 15 දෙනෙක් සහ පුහුණුකරුවෝ,නිලධාරීහු 10 දෙනෙක් මෙම කණ්ඩායමට ඇතුළත් වෙති.

මෙම තරගාවලියේ දී ශ්‍රී ලංකා කාන්තා ක්‍රිකට් කණ්ඩායම " ඒ " කාණ්ඩය යටතේ තරග වැදීමට නියමිතය. මෙහි පළමු තරගය මෙම 10 වැනිදා පැවැත්වේ.

ප්‍රවීණ ගීත රචකයෙකු මෙන් ම ගුවන් විදුලි වැඩසටහන් නිෂ්පාදකවරයෙකු වූ හේම ශ්‍රී ද අල්විස් අභාවප්‍රාප්ත වී තිබේ.

මිය යන විට ඒ මහතා 81ක් වන වියේ පසු විය.

හේම ශ්‍රී ද අල්විස් ගුවන් විදුලියේ අවුරුදු තිස් දෙකක් පුරා විවිධ තනතුරු හොබවමින් සේවය කළ මෙරට ප්‍රවීණ ගේය පද රචකයෙකි.

ඔහු ලියූ ගී අතරින් ශ්‍රීනි විභූෂිත ලංකා ගීතය ඉතිහාසගත වූ ගීතයකි.

එම ගීතයට අමතරව හේම ශ්‍රී ද අලවිස් සූරීන් ගීත හාර දහසකට අධික සංඛ්‍යාවක් ලියා තිබේ.

ඒ අතර, රසික හදවත් පිනවූ ඔහුගේ බිරිඳ අයිරින් ද අල්විස් ගැයූ, ‘දෑස පා සිනා කියන රහස තේරුණා’, සුජාතා අත්තනායක ගැයූ ‘දුනුකෙයියා මලක් වගේ දුරට පෙනෙනවා’, එච්.ආර්. ජෝතිපාල ගැයූ ‘පෙර දිනෙක එදා හමු වූයේ’ සහ ‘ඔබ දැකුමෙන් මා සිත ලැබුවේ හැකි ඉහළ ම සතුටයි මෙලොවේ’, මොහිදින් බෙග් ගැයූ ‘ඇයි බඹරෝ පෙම් මල අතහැරලා’ හා ‘පුංචි පුතේ පුංචි දුවේ ඉපැදුණු සිරි ලක්බිමේ, රැක්මණී දේවි ගැයූ ‘සඳක් නැගේ සඳක් දිලේ සාගරේ’, ඉන්ද්‍රානි පෙරේරා ගයන ‘ඔබ සොයනා කළු කෙල්ල මමයි’ ආදී ගීත වේ.

ඔහු පිළිබඳව පසුගිය දා දැඩි කතා බහට ලක් වූයේ, හේම ශ්‍රී මහතා සහ ඔහුගේ බිරිඳ වූ අයිරින් ද අල්විස් පත්ව තිබූ දුක්බර තත්ත්වය හේතුවෙනි.

අයිරින් ද අල්විස් මහත්මිය 2018 වසරේදී ජීවිතක්ෂයට පත් වූ අතර මිය යන විට ඇය 74 වන වියේ පසු වූවා ය.

හේම ශ්‍රී ද අලවිස් සූරීන් ගී පද ලියද්දී අයිරින් ද අල්විස් ගැයූ ගීත සංඛ්‍යාව දහසකට අධික ය.

හේම ශ්‍රී මහතාගේ දේහය 50/9, මැද පාර, තල්පිටිය උතුර, වාද්දුව නිවසේ තැන්පත් කර ඇති අතර අවසන් කටයුතු ඉරිදා (දෙසැ. 5) සවස 4.00ට තල්පිටිය සුසාන භූමියේදී සිදුකිරීමට නියමිත ය.