විනෝදාස්වාද

ලෝක ශූරතා ටෙස්ට් තරගාවලියේ අවසන් මහා තරගය ලකුණු 209කින් ජය ගැනීමට ඔස්ට්‍රේලියානු කණ්ඩායම සමත් විය.

ටෙස්ට් තරගාවලියේ කසියේ වාසිය දිනූ ඉන්දිය කණ්ඩායමේ නායකයා පළමුවෙන් පන්දුවට පහරදීම සඳහා ඔස්ට්‍රේලියානු කණ්ඩායමට ආරාධනා කළේය.

එහිදී ඔස්ට්‍රේලියානු කණ්ඩායම පළමු ඉනිම සඳහා සියලුදෙනා දැවී ලකුණු 469ක් ලබාගත්තේය.

ඊට පිළිතුරු වශයෙන් ඉන්දීය කණ්ඩායමට සියලුදෙනා දැවී ලබාගත හැකි වුයේ ලකුණු 296ක් පමණි.

ඉන් අනතුරුව දෙවන ඉනිම සඳහා ඔස්ට්‍රේලියානු කණ්ඩායම කඩුලු 8ක් දැවී ලකුණු 270ක් ලබා සිටියදී පන්දුවට පහරදීමේ අවස්ථාව ඉන්දීය කණ්ඩායමට ලබාදුනි.

එහිදී දෙවන ඉනිම වෙනුවෙන් ඉන්දීය කණ්ඩායමට සියලුදෙනා දැවී ලබාගත හැකිවූයේ ලකුණු 234ක් පමණි.

ඒ අනුව, 2023 ලෝක ශූරතා ටෙස්ට් තරගාවලියේ අවසන් මහා තරගය ලකුණු 209කින් ජය ගැනීමට ඔස්ට්‍රේලියානු කණ්ඩායමට හැකි වුණි.

දකුණු කොරියාවේ පැවැත්වෙන ආසියානු කනිෂ්ඨ මලල ක්‍රීඩා තරගාවලයේදී රන් පදක්කමක් හිමි කර ගැනීමට තරුෂි කරුණාරත්න සමත් වූවාය.

ඒ මලල ක්‍රීඩා තරගාවලයේ මීටර 800 කාන්තා ධාවන ඉසව්ව වෙනුවෙනි.

තරුෂි කරුණාරත්න මීටර 400 කාන්තා ධාවන ඉසව්වේ ද රිදී පදක්කම හිමිකරගැනීමට ඊයේ (04) සමත්වූවාය.

මේ අතර ඊයේ දිනයේ දී මීටර් 400 කාන්තා ධාවන ඉසව්වෙන් ජයේෂි උත්තරා ලෝකඩ පදක්කම ශ්‍රී ලංකාවට දිනා දුන්නාය.

වසර 29 කට පසු මතකයන් අලුත් කරමින් ශ්‍රී ලංකාවට ගෞරවයක් ගෙනදෙන්නට මෙරට ක්‍රීඩිකාවන් දෙදෙනෙකු මෙලෙස සමත්වූවාය.

ආසියානු කනිෂ්ඨ මලල ක්‍රීඩා තරගාවලියක අවසන් වරට එවැනි දස්කමක් දක්වා තිබුණේ සුසන්තිකා ජයසිංහ සහ දමයන්ති දර්ශා ය.

මේ අතර මෙම තරගාවලියේදී තුන්පිම්ම බාලක ඉසව්වේ ලෝකඩ පදක්කම ශ්‍රී ලංකාවේ මලිත් යසිරු හිමි කරගත්තේය.

ලිංගිකත්වය ක්‍රීඩාවක් ලෙස නම් කළ ලොව පළමු රට ස්වීඩනය බවත් , ඒ ආශ්‍රිත යුරෝපානු තරගාවලියක් ද සංවිධානය කර එය ජුනි 08 ආරම්භ වන බව සඳහන් කරමින් සමාජ මාධ්‍යජාලා අතර සංසරණය වූ පුවත අසත්‍යක් බව අනාවරණය වෙයි.

ඒ සම්බන්ධව අදහස් දක්වමින් එරට සෞඛ්‍ය හා සමාජ කටයුතු අමාත්‍යාංශයේ සහ ජාතික ක්‍රීඩා සම්මේලනයේ සන්නිවේදන හා මාධ්‍ය ප්‍රධානින් ප්‍රකාශ නිකුත් කර පවසා ඇත්තේ ස්වීඩනයේ කීර්තිනාමය විනාශ කිරීමට කළ සදාචාර විරෝධී මාධ්‍ය භාවිතයක් බව ය.

මේ පුවත ස්වීඩනය සහ එරට ක්‍රීඩා ක්ෂේත්‍රය අපකීර්තියට පත් කිරිමට සිදු කළ මඩ ව්‍යාපාරයක් ලෙසද ඔවුන් හඳුන්වා ඇත.

ලිංගිකත්වය කිසිදු අයුරකින් ක්‍රීඩාවක් ලෙස ස්වීඩනයේ පිළිගැනීමට ලක් වී නැති බවත්, එරට ක්‍රීඩා සම්මේලනයේ ලියාපදිංචි කිසිදු ලිංගික ක්‍රීඩා සංගමයක් නැති බවත් ස්වීඩනයේ සෞඛ්‍ය හා සමාජ කටයුතු පිළිබඳ අමාත්‍යාංශයේ සන්නිවේදන හා මාධ්‍ය ප්‍රධානි කැරොලිනා ෆ්‍රැනී නිවේදනයක් නිකුත් කර ඇති අතර, එවැනි කිසිදු ලිංගික ක්‍රීඩා ශූරතාවලියක් ස්වීඩනයේ නොපැවැත්වෙන බවත් එම නිවේදනයේ සඳහන් වේ.

ස්වීඩනයේ ලිංගික ක්‍රීඩා ශූරතාවලියක් පැවැත්වීමේ පුවත පිළිබඳ නිවේදනයක් නිකුත් කරමින් එරට ක්‍රීඩා සම්මේලනයේ සන්නිවේදන හා මාධ්‍ය ප්‍රධානි ඇනා සෙට්ස්මන් සඳහන් කර ඇත්තේ එම පුවත දැඩි ලෙස ප්‍රතික්ෂේප කරන බවය. ඇතැම් ජාත්‍යන්තර මාධ්‍ය පතුරුවා හැර ඇති ස්වීඩනයේ ලිංගික ක්‍රීඩා ශූරතාවලියක් පැවැත්වෙන බවට වන පුවත සම්පූර්ණයෙන්ම සාවද්‍ය බව ඇය සිය නිවේදනයේ සඳහන් කර ඇත.

2023 ඉන්දීය ප්‍රිමියර් ලීග් ක්‍රිකට් තරගාවලියේ අවසන් මහා තරගයේදී ගුජරාට් කණ්ඩායමට එරෙහිව කඩුලු 5ක ජයක් හිමිකරගත් චෙන්නායි කණ්ඩායම තරගාවලියේ ශූරයන් බවට පත්විය.

ඒ අනුව චෙන්නායි කණ්ඩායම මෙලෙස IPL තරගාවලියක කිරුළ හිමිකරගන්නේ 5වන වතාවටය.

තරගයේ කාසියේ වාසිය දිනූ චෙන්නායි කණ්ඩායමේ ආරාධනාවෙන් ප්‍රථමයෙන් පන්දුවට පහරදුන් ගුජරාට් කණ්ඩායම කඩුලු 4ක් දැවී ලකුණු 214ක් රැස්කර ගැනීමට සමත්විය.

එහිදී අගනා ඉනිමක් ක්‍රීඩා කළ සායි සුධර්සන් ලකුණු 96ක් රැස්කර ගත්තේ පන්දු 58කදී හයේ පහර 6ක් සහ හතරේ පහර 8ක් සමගිනි.

ඔහුගේ ඉනිම නිමකළ ශ්‍රී ලංකා වේගපන්දු යවන ක්‍රීඩක මතීෂ පතිරණ එම තරගයේදී චෙන්නායි කණ්ඩායම වෙනුවෙන් ලබාගත් කඩුලු සංඛ්‍යාව 2කි. 

පිළිතුරු ඉනිම ක්‍රීඩා කිරීම සඳහා චෙන්නායි කණ්ඩායම පිටියට පිවිසීමත් සමග තරගයට වර්ෂාවෙන් බාධා එල්ලවිය.

ඒ අනුව ඩක්වත් ලුවිස් න්‍යායට අනුව චෙන්නායි කණ්ඩායමට පන්දුවාර 15කදී ලකුණු 171ක ඉලක්කයක් හිමිවිය.

පිළිතුරු ඉනිම ක්‍රීඩා කළ චෙන්නායි පිතිකරුවෝ තියුණු තරගයකින් අනතුරුව පන්දුවාර 15 අවසානයේ ලකුණු 171 රැස්කරගෙන තරගයේ ජය හිමිකරගත්තේය.

එහිදී අවසන් පන්දුවාරයේදී චෙන්නායි කණ්ඩායමට ජයග්‍රහණය සඳහා ලකුණු 13ක් අවශ්‍යව තිබුණි.

චෙන්නායි සියලු බලාපොරොත්තු සිය කර මතට ගත් ජඩේජා අවසන් පන්දු ද්විත්වයට හයේ පහරක් සහ හතරේ පහරක් එල්ලකරමින් ඒ වනවිටත් ගුජරාට් සතුව තිබූ ජය කණපිට හැරවීමට සමත්විය.