ආර්ථික

ශ්‍රී ලංකා මහ බැංකුව ඊයේ (07) නිකුත් කර ඇති නිවේදනයක් අනුව ඩොලර් එකක් සඳහා රුපියල් 230ක් දක්වා විශාල වශයෙන් අවප්‍රමාණය කිරීමක් සිදු කර තිබේ.

මේ දක්වා ශ්‍රී ලංකා මහ බැංකුව විසින් ඩොලරයේ රුපියල් විනිමය අනුපාතය විකුණුම් මිල රුපියල් 203ක මට්ටමේ කෘතීමව පවත්වාගෙන තිබිණි. එහෙත් කළුකඩ වෙළඳපොළේ එය රුපියල් 250ක් පමණ වී තිබිණි. මෙම තත්වය තුළ මහ බැංකුව විසින් අවම වශයෙන් රුපියල් 27කින් ඩොලරයට නියම වී තිබූ විනිමය අනුපාතය පා කර හැර තිබේ.

කෙසේ වුවත් මේ සම්බන්ධයෙන් අදහස් දක්වමින් මූල්‍ය වෙළෙඳ පොළ විශ්ලේෂකයන් පවසන්නේ මේ වනවිට පවතින ඩොලර් අර්බුදය හමුවේ දැනට පවතින රුපියල් 250ක් පමණ වූ කළු කඩ මිල තව දුරටත් එසේම පවතිනු ඇති බව පුරෝකථනය කළ හැකි බවයි.

එසේම මෙම තත්වය තුළ මහ බැංකුවට තවදුරටත් රුපියල පාකර හැරීමට සිදුවනු ඇති බවත් ඔවුන් පවසයි.

මහ බැංකු නිවේදනය මෙන්න !

 බාහිර කම්පනවල දැඩි බව සහ දේශීය ආර්ථිකයේ මෑත කාලීන ප්‍රවණතා සැලකිල්ලට ගනිමින්, එවැනි ආර්ථික තත්ත්වයන්ට මුහුණ දීම සඳහා ශ්‍රී ලංකා මහ බැංකුවේ මුදල් මණ්ඩලය විසින් 2022 මාර්තු 04වන දින පුළුල් ප්‍රතිපත්ති මාලාවක් ප්‍රකාශයට පත්කරන ලදි. එමෙන්ම, ශ්‍රී ලංකා මහ බැංකුව ගෝලීය මෙන්ම දේශීය වශයෙන් ඇතිවෙමින් පවතින සාර්ව ආර්ථික සහ මූල්‍ය වෙළඳපොළ ප්‍රවණතා සමීපව නිරීක්ෂණය කරන බවට නිවේදනය කරන ලද අතර, උද්ධමනය, විදේශීය අංශය සහ මූල්‍ය අංශයේ ස්ථායීතාව ළඟා කර ගැනීමේ අරමුණින් තවදුරටත් ක්‍රියාමාර්ග ගැනීමට සූදානමින් සිටින බවද දැනුම් දෙන ලදි.

ඒ අනුව, වහාම ක්‍රියාත්මක වන පරිදි, විනිමය අනුපාතිකයෙහි ඉහළ නම්‍යශීලීභාවයක් සහිතව ගනුදෙනු කිරීමට වෙළඳපොළට ඉඩ සලසනු ලැබේ. විදේශ විනිමය ගනුදෙනු එක්සත් ජනපද ඩොලරයකට රුපියල් 230 කට නොවැඩි මට්ටමක පවතිනු ඇතැයි ද මහ බැංකුව අපේක්ෂා කරයි.

ශ්‍රී ලංකා මහ බැංකුව තවදුරටත් දේශීය විදේශ විනිමය වෙළපොළෙහි ප්‍රවණතා සමීපව නිරීක්ෂණය කරමින් අවශ්‍ය පරිදි සුදුසු ප්‍රතිපත්ති ගැළපීම් සිදු කරනු ඇත.

ඔමික්‍රොන් කොරෝනා වෛරස් ප්‍රභේදය යුරෝපයේ සහ ඇමරිකා එක්සත් ජනපදයේ පැතිරෙද්දී ආයෝජකයන් තුළ මතු කරන අවිනිශ්චිතභාවය හමුවේ ලෝක වෙළෙදපොළේ තෙල් මිල කැපී පෙනෙන ලෙස පහත වැටීමක් දක්නට ලැබෙන බව වාර්තා වෙයි.

ඒ අනුව බ්‍රෙන්ට් වර්ගයේ බොර තෙල් බැරලයක 3.2%කින් පහත වැටී සටහන් වූයේ ඩොලර් 71යි ශත 10ක් ලෙසයි.

ඇමරිකානු ඩබ්ලිව් ටී.අයි. තෙල් බැරලයක මිල 3.9%කින් පහත වැටී ඩොලර් 68යි ශත 7ක් ලෙස සටහන් වී ඇත.=

අද (2) වන විට ලෝක වෙළඳපොලේ බොරතෙල් තෙල් මිල බැරල් එකක් ඩොලර් 108ත් 110ත් අතර මිලක පවතින බව වාර්තා වෙයි.

ඒ අනුව බ්‍රෙන්ට් කෘඩ් බොරතෙල් බැරලයක මිල ඇමෙරිකා එක්සත් ජනපද ඩොලර් 109.83 වී ඇති අතර ඩබ්ලිව්.ටී.අයි බොරතෙල් බැරලයක මිල ඇමෙරිකා එක්සත් ජනපද ඩොලර් 108.10 වී තිබේ.

මේ අතර ඇමෙරිකා එක්සත් ජනපදය හදිසි උපාය මාර්ගික ක්‍රියා මාර්ගයක් ලෙස ඇමෙරිකාවේ ඛනිජ තෙල් අතිරේක සංචිතයෙන් බොරතෙල් බැරල් මිලියන 30ක් ලෝක බොරතෙල් වෙළඳපොල වෙත නිදහස් කරන බව නිවේදනය කර තිබේ.

ඒකාබද්ධ ජාත්‍යන්තර බලශක්ති ඒජන්සියේ (IEA) රැස්වීමකින් පසුව රුසියානු-යුක්රේන යුද්ධය හේතුවෙන් අහස උසට නගින බොරතෙල් බැරලයක මිල පාලනය කිරීම සඳහා සාමාජික රටවල් 30ක් විසින් තම අතිරේක බොරතෙල් සංචිතවලින් බොරතෙල් බැරල් මිලියන 60ක් ලෝක වෙළඳපොල වෙත නිදහස් කිරීමට එකඟ වී ඇත.

බලාගාර 08ක් කොට උඩ !

මේ අතර ජාතික විදුලි පද්ධතියට විදුලිය ජනනය කරන ඉන්ධන විදුලිබලාගාර 10න් අටක්ම ඉන්ධන නොමැතිවීම නිසා අක්‍රීය වී ඇතැයි ලංකා විදුලිබල මණ්ඩලය පවසයි.

එම බලාගාර 08 අක්‍රීය වීමෙන් ජාතික විදුලි පද්ධතියට මෙගාවොට් 424ක් අහිමිවී ඇති බව කී එම නිලධාරියා සපුගස්කන්ද A සහ B බලාගාර දෙක සහ ‘සොජිට්ස්’ බගාලාරය පමණක් මේ වනවිට ක්‍රියාත්මක වන බවද සඳහන් කළ බව lanka truth වෙබ් අඩවිය වාර්තා කරයි.

එම පුවතේ වැඩිදුරටත් සඳහන් වන්නේ යුගදනවි බලාගාරය සඳහා ඉන්ධන අද දිනයේ ලබාදෙන බවට ඛනිජ තෙල් සංස්ථාව පවසා තිබූ බවත් නැප්තා මේ වනවිට විදුලිබලාගාරයට පොම්ප කරමින් සිටීම නිසා එම ප්‍රමාණය අද දිනයේ පාවිච්චි කළ හැකි බව අදාළ නිලධාරියා පැවසූ බවයි.

ජාත්‍යන්තර මූල්‍ය ශ්‍රේණිගත කිරීම ආයතනයක් වන ‘ෆිච් රේටිං’ ආයතනය විසින් නවතම ශ්‍රේණිගත කිරීම් අනුව ශ‍්‍රී ලංකාව CC දක්වා පහත හෙළා ඇත.

වාර්තා වල දැක්වෙන ආකාරයට CCCහි සිට මෙම පහත හෙළීම කර ඇත.

ශ්‍රී ලංකාවේ නරක අතට හැරෙන බාහිර ද්‍රවශීලතා තත්ත්වය අනුව ඉහළ විදේශ ණය ගෙවීම් සහ සීමිත මූල්‍ය ගලා ඒම් හේතුවෙන් විදේශ විනිමය සංචිතවල පහත වැටීමක් පෙන්වන ඔවුන් ඉදිරි මාසවලදී ණය පැහැර හැරීමේ සිදුවීමක වැඩි සම්භාවිතාවක් ඇතැයිද කියා සිටී.

මූල්‍ය ආතතියේ බරපතලකම රජයේ බැඳුම්කර ඵලදාව ඉහළ යාම සහ මුදල් ඒකකයේ පහළට යන පීඩනය මගින් නිරූපණය කරනු ඇතැයිද වාර්තාව සදහන් කරයි.

මීට අදාළ ෆිච් රේටිං වාර්තාව පහත සබැඳියෙන් කියවිය හැකිය.

https://www.fitchratings.com/research/sovereigns/fitch-downgrades-sri-lanka-long-term-foreign-currency-idr-to-cc-17-12-2021

මහ බැංකුව නහයෙන් අඬයි !

කෙසේ වුවත් ෆිච් රේටින් ශ්‍රේණි ගත කිරීම් වලින් ශ‍්‍රී ලංකාව පහළට හෙළීම සම්බන්ධයෙන් ශ්‍රී ලංකා මහ බැංකුව සිය නොසතුට පළ කරයි.

නිවේදනයක් නිකුත් කරමින් ශ්‍රී ලංකා මහ බැංකුව සඳහන් කරන්නේ ශ්‍රී ලංකාවේ ධනාත්මක ආර්ථික වර්ධනයන් හඳුනා ගැනීමට මෙම ශ්‍රේණිගත කිරීම අසමත් වී ඇති බවයි.

ශ්‍රේණිගත කිරීම් වලින් ශ්‍රී ලංකාව පහත හෙලීම සිතාගත නොහැකි බවද මහ බැංකු විසින් නිකුත් කළ නිවේදනයේ දැක්වෙයි.

ශ්‍රී ලංකා ආර්ථිකයේ සියලුම අංශවල නවතම වර්ධනයන් සහ ආසන්න විදේශ විනිමය ගලා ඒම් පිළිබඳව නිරන්තරයෙන් යාවත්කාලීන කර ඇතැයි ද එම නිවේදනයේ දැක්වේ.

https://www.cbsl.gov.lk/si/node/11624

ඉන්දියාව මෙරටට ලබාදීමට යෝජනා කෙරුණු ඩොලර් බිලියනයක ණය මුදල සඳහා ඉන්දීය කැබිනට් මණ්ඩලයේ අනුමැතිය හිමිව ඇති බව වාර්තා වෙයි.

මුදල් අමාත්‍යංශ ආරංචි මාර්ග මේ බව පවසයි.

පසුගියදා මෙරට මුදල් අමාත්‍ය බැසිල් රාජපක්ෂ සහ මුදල් අමාත්‍යංශ ලේකම් ඉන්දීය සංචාරයක නිරත වීමට නියමිතව තිබූ නමුත් පසුව එය කල් දැමුණු බව වාර්තා විය.

කෙසේ වුවත් මේ වන විට වාර්තා වන්නේ ඉතා නුදුරු දිනයක මෙකී ඩොලර් බිලියනයක ණය ගිවිසුම අත්සන් කිරීමට දෙරට කටයුතු කරනු ඇති බවය.

මෙම වසර ආරම්භයේ ජනවාරි මස කොළඹ පාරිභෝගික මිල දර්ශකයේ වැඩිවීම් අනුපාතය 3.0%ක් වී තිබූ අතර එය නොවැම්බර් මස අවසන් වනවිට 9.9%ක් දක්වා තුන්ගුණය ඉක්මවා ගිය වැඩි වීමක් සිදුවී ඇත.

ශ්‍රී ලංකා මහ බැංකුව නොවැම්බර් 30 වෙනි දින නිකුත් කර තිබෙන නිවේදනයකින් මේ බව හෙළි වේ. ජනවාරි මාසයේ 3.0%ක තිබූ උද්ධමනය අප්‍රේල් මස අවසන්වනවිට 3.9% දක්වා උච්චාවචනයන්ට යටත්ව ඉහළ ගොස් තිබිණි. නමුත් අප්‍රේල් මාසයෙන් පසුව එය අඛණ්ඩව ඉහළ යමින් 9.9% දක්වා පැමිණ තිබේ.

උද්ධමණයට ප්‍රධාන වශයෙන්ම අතිවිශාල මුදල් ප්‍රමාණයක් අච්චු ගසා වෙළඳපොළට නිකුත්කිරීම, රුපියල කඩා වැටීම සහ භාණ්ඩ හිගය යන මූලික කරුණු පදනම් වී ඇති බව ආර්ථික විශ්ලේෂකයන් පෙන්වා දෙයි.

කොළඹ කොටස් වෙළඳපොලේ දෛනික ගනුදෙනු අද දහවල් හදිසියේ අත්හිටුවීමට සිදුවිය. අද පස්වරු 1.45 සිට මිනිත්තු 30 ක කාලයක් ගනුදෙනු අත්හිටවූ බවයි වාර්තා වෙයි.

ඉතිහාසයේ සියලු කොටස් මිල දර්ශකයෙහි තනි දිනක් තුළ දක්නට ලැබුණු දෙවැනි විශාලතම පහළ යාම අද දිනයේ වාර්තා වී ඇත.

එහිදී සියලු කොටස් මිල දර්ශක අගය ඒකක 542.67 කින් පහළ ගිය අතර එය දෙවැනි වන්නේ 2021 පෙබරවාරි 02 වැනි දින ඒකක 561.75කින් සියලු කොටස් මිල දර්ශකයේ වාර්තා වූ කඩා වැටීමට පමණි.

දිනය අවසානයේ දී සියලු කොටස් මිල දර්ශකය ඒකක 11,591.37 ක් ලෙසින් සටහන් වූ අතර 2021 දෙසැම්බර් 21 දිනෙන් පසු වාර්තා වූ අඩුම සියලු කොටස් මිල දර්ශක අගය වේ.

මේ අතර දිනයේ ගනුදෙනු අතරවාරයේ දී S&P SL20 දර්ශකය පූර්ව ගනුදෙනු දිනයට සාපේක්ෂව 5% ක ප්‍රමාණයක් ඉක්මවා පහළ යාම හේතුවෙන් පස්වරු 1.44 ට මිනිත්තු 30 ක කාලයක් සඳහා කොටස් වෙළෙඳපොළ ගනුදෙනු පද්ධතියේ ස්වයංක්‍රීයව අත්හිටුවීමක් ද වාර්තා වුණි.

S&P SL20 දර්ශක අගය දිනය අවසානයේ දී ඒකක 3,932.78 ක් ලෙසින් දැක්වුණේ ඒකක 207.88 ක පහළ යාමක් සමඟිනි.

රුපියල් බිලියන 4.22 ක ගනුදෙනු පිරිවැටුමක් අද දින වාර්තා විය.

කොළඹ පාරිභෝගික මිල දර්ශකය මත පදනම් වූ මතුපිට උද්ධමනය සියයට 9.9 දක්වා ඉහළ ගොස් ඇත.

2021 නොවැම්බර් මාසයේ සිටය.

රොයිටර්ස් මාධ්‍ය වාර්තාවක සඳහන් වන්නේ මෙය 2012 ජූලි මාසයෙන් පසු වාර්තා වූ ඉහළම උද්ධමන මට්ටම බවයි.

ඒ අනුව ඔක්තෝබර් මාසයේ පැවති සියයට 7.6හි සිට නොවැම්බර් මාසයේ දී සියයට 9.9 දක්වා ඉහළ ගියේය.

ආහාර සහ ආහාර නොවන කාණ්ඩ දෙකෙහිම අයිතමවල මිල ගණන්හි සිදු වූ මාසික ඉහළ යෑම් මේ සඳහා හේතු විය. මෙහිදී, ආහාර කාණ්ඩයෙහි වාර්ෂික ලක්ෂ්‍යමය උද්ධමනය 2021 ඔක්තෝබර් මාසයේ පැවති සියයට 12.8හි සිට 2021 නොවැම්බර් මාසයේ දී සියයට 17.5 දක්වා ඉහළ ගිය අතර, ආහාර නොවන කාණ්ඩයෙහි වාර්ෂික ලක්ෂ්‍යමය උද්ධමනය 2021 ඔක්තෝබර් මාසයේ පැවති සියයට 5.4හි සිට 2021 නොවැම්බර් මාසයේ දී සියයට 6.4 දක්වා ඉහළ ගියේය.

පසුගිය වසර අවසන් වනවිට ඩොලර් කෝටි 200ක වත්කම් ඍණ ශේෂයක් තිබූ ශ්‍රී ලංකා මහ බැංකුව දිගටම ස්වැප් ණය පහසුකම් යටතේ විදේශ විනිමය ලබා ගැනීම නිසා අති අවදානමකට පත්ව ඇති බව ආර්ථික විශ්ලේෂකයන් විවිධ අවස්ථාවල පෙන්වා දී ඇත.

හිටපු මහ බැංකු නියෝජ්‍ය අධිපතිවරයෙකු වන ආචාර්ය ඩබ්ලිව්. ඒ. විජේවර්ධන මාධ්‍යයට අදහස් දක්වමින් දිගින් දිගටම පෙන්වා දෙන්නේ මෙම තත්වය ඉතාමත්ම අනතුරුදායක බවය.

මහාචාර්ය සිරිමල් අබේරත්න, ආචාර්ය අමින්ද මෙත්සිල, ආචර්ය නන්දසිරි කිහිඹියහෙට්ටි, ආචාර්ය නිශාන් ද මෙල් ඇතුළු විශ්ලේෂකයන් කිහිප දෙනෙකුම මෙම තත්වය පෙන්වාදී තිබේ. පසුගිය සතියේ ඉන්දීය සංචාරයක යෙදුණු විදේශ ඇමති ජී. එල්. පීරිස් ප්‍රකාශ කර තිබෙන්නේ ඉන්දියාවෙන් තවත් ඩොලර් කෝටි 250ක හදිසි ණය මුදලක් ලබා දෙන බවය.

මෙම වසරේ පසුගිය මාස එක හමාරක කාලය තුළ ස්වැප් ණය පහසුකම් යටතේ ඩොලර් මිලියන 5,000ක පමණ විදේශ විනිමය ලබා ගැනීමේ එකඟතා ඇතිකර ගෙන තිබිණි. මෙසේ ලබා ගන්නා ණය සඳහා අධික පොලියක් ගෙවීමට සිදුවීම සහ ඒ මගින් වත්කම් ඉපදවීමක් සිදු නොවන බැවින් විශේෂයෙන්ම ශ්‍රී ලංකා මහ බැංකුව අති අවදානමකට පත්වන බව පෙන්වාදී ඇත.

මෙම වසර අවසන්වන විට විදේශ ණය සහ පොලිය වශයෙන් ඩොලර් මිලියන 6,903.7ක් ගෙවීමට සිදුවී තිබෙන අතර කෙටි කාලීනව එදිනෙදා ගණුදෙනු සඳහා විදේශ විනිමය ලබා ගැනීමෙන් අති විශාල පොලී ප්‍රමාණයක් එකතුවේ.

රටේ මූල්‍ය පද්ධතිය හසුරවන ශ්‍රී ලංකා මහ බැංකුව හෝ ආණ්ඩුවේ වගකියයුත්තන් මේ පිළිබඳව කිසිදු අවධානයක් යොමු නොකිරීම ඉතා විනාශකාරී ප්‍රතිඵල අත්කරදීමට හේතුවන බව අවධාරණය කර තිබේ.

Lanka truth

වර්තමාන රජය බලයට පත්වීමෙන් පසු රුපියල් ටි‍්‍රලියන 3.6 ක මුදලක් මුද්‍රණය කර ඇති බව රුහුණු විශ්ව විද්‍යාලයේ ආර්ථික විද්‍යා අංශයේ කථිකාචාර්ය ආචාර්ය නන්දසිරි කිඹියහෙට්ටි පවසයි.

ආචාර්ය නන්දසිරි කිඹියහෙට්ටි වැඩිදුරටත් පවසා සිටියේ ශ‍්‍රී ලංකා මහ බැංකුවේ වාර්තා සැලකීමේදී මෙම මුදල් අච්චු ගැසූ ප්‍රමාණය අනාවරණය වී ඇති බවයි.

“2019 මාර්තු 27 වනදා සිට 2021 නොවැම්බර් 17 වනදා දක්වා ශ්‍රී ලංකා මහ බැංකුව නිකුත් කර ඇති වාර්තා ගැලපීමේදී මෙතෙක් අච්චු ගසා ඇති මුදල් ප්‍රමාණය අනාවරණය වනවා.” යනුවෙන් ඔහු සඳහන් කර ඇත.

ඒ අනුව මේ පොදුජන පෙරමුණ ආණ්ඩුව බලය ලබා වසර 2ක් තුළ මුද්‍රණය කර ඇති මුදල් කන්දරාවයි.

ස්ටෑන්ඩඩ් ඇන්ඩ් පුවර්ස් නම් ජාත්‍යන්තර මුල්‍ය ශ්‍රේණිගත කිරීමේ ආයතනය විසින් ශ‍්‍රී ලංකාව CCC+ කාණ්ඩයේ සිට CCC කාණ්ඩය දක්වා පහත හෙළා දමා ඇති බව වාර්තා වේ.

ඔවුන් ඉදිරිපත් කරණ දීර්ඝ වාර්තාව මගින් පෙන්වා දෙන්නේ ශ්‍රී ලංකාවේ විදේශීය ණය ගෙවීමේ අවදානම පැහැර හැරීමේ අවදානම ඉතා ඉහළ බවයි.

ඔවුන්ගේ වාර්තාවට අනුව ශ්‍රී ලංකාවේ බාහිර මූල්‍ය තත්ත්වය තවදුරටත් දුර්වල වෙමින් පවතින අතර ඉදිරි කාල සීමාවේදී බැඳුම්කර ණය කල් පිරීම මත විදේශ විනිමය මත තවදුරටත් පීඩනය එල්ල වීමට නියමිතය.

ශ‍්‍රී ලංකාව දිගුකාලීන ශ්‍රේණි ගත කිරීමේදී තවදුරටත් සෘණාත්මක බව එම වාර්තාව මගින් අවධාරණය කරයි.

මීට පෙර මූඩිස් හා ෆිච් රේටින් යන ආයතන විසින්ද ශ්‍රී ලංකාවේ ණය ශ්‍රේණිගත කිරීම මේ හා සමාන කාණ්ඩවලට පහත දමා තිබුණි.

කෙසේ වෙතත් මෙම ශ්‍රේණිගත කිරීම සම්බන්ධයෙන් ප්‍රතිචාර දක්වමින් ශ්‍රී ලංකා මහ බැංකුව පවසන්නේ ජනවාරි 18 වනදා කල්පිරෙන ජාත්‍යන්තර ස්වෛරී බැඳුම්කරය පියවීමට කටයුතු සූදානම් කර තිබියදී ස්ටෑන්ඩර්ඩ් ඇන්ඩ් පුවර්ස් ශ්‍රේණිගත කිරීම අනවශ්‍ය බවයි.

තැන තැන ගෑස් ටැංකි පුපුරා යාමට හේතුව ඒවායේ සංයුතිය වෙනස් වීම බව රජයේ රස පරීක්ෂක වාර්තාවක් තහවුරු කර ඇත.

පසුගිය දිනවල කොළඹ, වැලිගම සහ මහනුවර ඇතුළු ප්‍රදේශවල සිදු වූ පිපිරීම්වලට හේතුව ගෑස් කාන්දු බවට තහවුරු වන බව රජයේ රස පරීක්ෂක වාර්තාවලින් පෙන්වාදී ඇත.

පිළිගත හැකි පැහැදිලි හේතුවක් නොපෙන්වා මෙරට ගෘහස්ථ භාවිතය සඳහා ගන්නා එල් පී ගෑස් සංයුතිය වෙනස් කිරීමට පළමුව ලිට්රෝ සමාගම තීරණය කළේ එහි සිලින්ඩරයේ ගෑස් පරිමාණය අඩු කර එයට නව වෙළඳ නාමයක් ද එක් කරමිනි.

පසුගිය අප්‍රේල් මාසයේ සිට ලිට්‍රෝ සහ ලාෆ්ස් සමාගම් විසින්, ශ්‍රී ලංකා ප්‍රමිති ආයතනයේ අනුමැතියකින් ද තොරව සිලින්ඩරයක ගෑස් සංයුතිය බුටේන් සහ ප්‍රොපේන් 50:50 ලෙස වෙනස් කරනු ලැබිණ.

ඒ එතෙක් පැවති අඩුවෙන් ගිනි ගන්නා බුටේන් 80 සහ වැඩියෙන් ගිනිගන්නා ප්‍රොපේන් 20 පිළිවෙළ වෙනස් කරමින්ය.

මෙම පියවර සාධාරණීකරණය කිරීමට ලිට්ට්‍රෝ සමාගමේ එවක පාලනාධිකාරිය කියා සිටියේ මෙම ගෑස් සංයුති වෙනස හරහා වඩාත් අධික තාපයක් නිකුත් කිරීම හේතුවෙන් අඩු ගෑස් පරිභෝජනය කින් එදිනෙදා කටයුතු සිදුකර ගත යුතු හැකි බවයි.

කෙසේ වෙතත් මෙසේ සිදු කෙරුණු ගෑස් සංයුති වෙනස හරහා බරපතල අනතුරු දායක තත්වයක් නිර්මාණය විය හැකි බවට දිගින් දිගටම ශ්‍රී ලංකා ප්‍රමිති ආයතනයට පාරිභෝගිකයින්ගෙන් පැමිනිලි සහ චෝදනා එල්ලවිය.

මේ සම්බන්ධයෙන් ශ්‍රී ලංකා ප්‍රමිති ආයතනය සාධනීය පියවරක් නොගැනීම සම්බන්ධයෙන් මේ වන විට ප්‍රමිති ආයතනයට ද චෝදනා එල්ලවී ඇත.

ප්‍රමිති ආයතනය පවසන්නේ තම නිර්නායක ගෑස් සමාගම් නොතකා ඇති බවයි.

ශ්‍රී ලංකාවේ ක්‍රියාත්මක කෙරෙන ලෝක ආහාර වැඩසටහනේ ව්‍යාපෘති සඳහා රුසියාවෙන් ඇමෙරිකානු ඩොලර් මිලියන 5.5ක් වෙන්කර ඇති බව කොළඹ පිහිටි රුසියාවේ තානාපති කාර්යාලය නිවේදනය කර තිබේ.

ඊට අනුව පාසල් මට්ටමින් ශ්‍රී ලංකාවේ ‍පෝෂණ ව්‍යාපෘති ක්‍රියාත්මක කිරීම සඳහා ලෝක ආහාර වැඩසටහන වෙත ඇමෙරිකානු ඩොලර් මිලියන 5.5ක මුදලක් රුසියාව විසින් ලබා දෙන ලද බව තිරසාර සංවර්ධන අවශ්‍යතා සැලකිල්ලට ගනිමින් ශ්‍රී ලංකාව සමඟ පවත්වා ගන්නා සහයෝගීතාව ශක්තිමත් කිරීමේ ප්‍රතිපත්තියට අනුව එම මුදල ප්‍රේෂණය කරන ලද බව තානාපති කාර්යාලීය ප්‍රකාශකයෙක් පැවසූ බව ලීඩර් වෙබ් අඩවිය වාර්තා කර ඇත.

පසුගිය වසරේ දෙසැම්බර් මස 25 දා එකී මුදල ප්‍රේෂණය කර තිබෙන බවත් එහි සඳහන් කර ඇත.

මේ වන විට වෙළෙඳ පොළ තුළ මතුව ඇති ගෑස් හිඟය ආගමික සිද්ධස්ථාන වෙතත් පීඩනයක් යොමුකර ඇත.

සිය පන්සලේද ගෑස් ටැංකිය අවසන් වීම හේතුවෙන් ගෑස් පෝලිමේ ස්වාමීන් වහන්සේ නමක්ද සිටින ආකාරයක් ඊයේ(23) දිනයේ දැනගත හැකි විය.

මාවනැල්ල ප්‍රදේශයේ මෙම සිදුවීම දැකගන්නට ලැබුණු අතර උන්වහන්සේ කියා සිටියේ රුපියල් 4000ක් වියදම් කරගෙන සිව් වතාවක් ගෑස් ගැනීම සදහා නගරයට පැමිණියද ගෑස් ගැනීමට නොහැකි වූ බවකි.

කිරි පිටි මිල ඉහල දැමීමට කිරි පිටි ආනයන සමාගම් විසින් තීරණය කර ඇත.

ඒ අනුව ග්‍රෑම් 400ක කිරිපිටි පැකැට්ටුවක් රුපියල් 60.00 කින් හා කිලෝ එකේ කිරිපිටි පැකට්ටුවක් රුපියල් 150.00 කින් මිල ඉහළ දමා ඇත.

මේ නව මිල ගණන් අනුව කිරිපිටි ග්‍රෑම් 400 රුපියල් 540ක් සහ කිලෝ එකේ පැකට්ටුව රුපියල් 1345ක් වේ.

රජය විසින් මිල පාලනය අතහැරීමත් සමග කිරිපිටි ආනයනය කරුවන්ගේ සංගමය විසින් මිල තීරණය කරමින් පවතින අතර මේ සම්බන්ධයෙන් වන පාරිභෝගික ප්‍රජාව දැඩි පීඩාවකට පත්ව ඇත.

බත් පාර්සලය සහ ප්ලේන්ටි එකක මිල හෙට (23) සිට ඉහළ දැමීමට සිදුව ඇති බව ආපනශාලා හිමියන්ගේ සංගමය පවසයි.

ආපනශාලා හිමියන්ගේ සංගමයේ ජාතික සංවිධායක අසේල සම්පත් මහතා ප්‍රකාශ කරන ආකාරයට බත් පාර්සලයක මිල ඉහළ දමා ඇත්තේ රුපියල් 20 කිනි.

ප්ලේන් ටී එකක මිල ද රුපියල් 5 කින් ඉහළ දමා ඇත.

ඒ අනුව රුපියල් 180ක් වැනි මිලකට තිබූ එළවළු බත් පාර්සලයක් රුපියල් 200.00 දක්වා මිල ඉහළ දැමීමට ලක්වෙයි.

ගෑස් , එළවළු , සහල්, මෙන්ම අත්‍යවශ්‍ය භාණ්ඩ මිල ඉහළ ගොස් ඇති බවත් ඒ හමුවේ විකල්පයක් නොමැති බැවින් මේ මිල ඉහළ දැමීම සිදුවන බවත් ආපනශාලා හිමියන්ගේ සංගමය පවසයි.

2021 වසරේ වාර්තාවූ ඉහළම උද්ධමනය ලෙස සියයට 11.1ක් වූ අගය පසුගිය නොවැම්බර් මාසයේ සටහන් වූ බව ශ්‍රී ලංකා මහ බැංකුව නිවේදනය කරයි.

ඔක්තෝබර් මාසයේ උද්ධමනය ලෙස වාර්තා වී තිබුණේ සියයට 8.3ක් ලෙසිනි.

මෙය ඊට පෙර මාසයට සාපේක්ෂව සියයට 2.8 ක ඉහළ යෑමක් බවත් ආහාර සහ ආහාර නොවන යන කාණ්ඩ දෙකේම මිල ගණන් ඉහළ යෑම මෙම තත්වයට හේතුව බවත් මහ බැංකුව පවසයි.

මේ වනවිට රට මුහුණ දී තිබෙන විදේශ විනිමය අර්බුදය තව දුරටත් තීව්‍රවී ඇති බව විදේශ රැකියා නියුක්තිකයන් මෙරට සම්ප්‍රේෂණය කරන ආදායම් සහ කෘෂිකාර්මික අපනයන යන ප්‍රධාන කරුණු දෙක මගින් තහවුරු වී ඇත.

ශ්‍රී ලංකා මහ බැංකුව විසින් පසුගිය සැප්තැම්බර් මාසයට අදාළව නිකුත් කර තිබෙන විදේශීය අංශයේ ක්‍රියාකාරීත්වය නම් නිවේදනයේ මෙයට සම්බන්ධ දත්ත ඇතුලත් වේ. 2020 සැප්තැම්බර් මාසයේදී විදේශ රැකියා නියුක්තිකයන් ඩොලර් මිලියන 703ක් මෙරටට එවා ඇති අතර එම මෙම වසරේදි ඩොලර් මිලියන 353 දක්වා හරි අඩකින් බිඳවැටී ඇත.

මේ අතර මුල් මාස නවයේදී (9) කෘෂිකාර්මික අපනයන මගින් ඩොලර් මිලියන 1986.7ක් උපයා ඇති අතර එම කාලය තුළදී රසායනික පොහොර ආනයනය වෙනුවෙන් වැය වී ඇත්තේ ඩොලර් මිලියන 104.8ක් පමණි. ක්ෂණිකව රසායනික පොහොර තහනම් කිරීම නිසා මෙම අපනයන ආදායම් දැඩි අනතුරකට ලක්වී තිබේ. මෙම වසරේ මුල් මාස නවය තුළ රසායනික පොහොර ආනයනය වෙනුවෙන් දැරූ වියදම මෙන් 19 ගුණයක කෘෂිකාර්මික අපනයන ආදායමක් උපයා ඇත.

මෙසේ තිබියදී මේ වනවිට රසායනික පොහොර තහනමේ ප්‍රති විපාකයක් ලෙස දේශීය වෙළඳපොලේ පවා බරපතල කෘෂි නිෂ්පාදන හිඟයක් නිර්මාණය වී තිබේ.

lanka truth