පුවත්

පොදුජන පෙරමුණ පක්ෂයේ ආරම්භක සභාපති ලෙස කටයුතු කළ වත්මන් විදෙස් අමාත්‍ය ජී. එල්. පීරිස්, අමාත්‍යංශ ලේකම් ගේ ක්‍රියාකලාපය හේතුවෙන් බලවත් සිත් තැවුලට ලක්ව ඇති බව ආරංචි මාර්ග කියයි.

විදේශ කටයුතු අමාත්‍යංශයේ ලේකම්වරයා වශයෙන් කටයුතු කරන්නේ අද්මිරාල් ජයන්ත කොළඹගේය.

ආණ්ඩු හිතවාදී වෙබ් අඩවියක් වන ලංකා ලීඩ් වෙබ් අනාවරණය අනුව ජී. එල්. හා කොළඹ ගේ ගැටුම කරළියට පැමිණ ඇත්තේ මීට දවස් දෙක තුනකට පෙරය. ජනාධිපතිවරයා ස්කොට්ලන්තයට යාමට පෙර ඒ වැඩ කටයුතු සූදානම් කිරීමට ජී. එල්. ලන්ඩන් නුවර බල පිටත් වී ඇත. ජී. එල්. මෙම ගමනට ඔහුගේ පෞද්ගලික කාර්යමණ්ඩලයේ අයෙක් වූ ගම්ලත් නැමැත්තකුද සහභාගී කරගෙන ඇත.

නමුත් ලන්ඩන් සිට ස්කොට්ලන්තය බලා යන කණ්ඩායමෙන් ගම්ලත්ගේ නම ඉවත් කර ඇත. ඇමැතිගේ පෞද්ගලික කාර්යමණ්ඩලයේ කෙනෙක් රැගෙන යාමට දෙන්න බෑ කියා අද්මිරාල් දුන් නියෝගයකට අනුව ගම්ලත්ගේ නම කැපී ඇති බව කියවේ.

නමුත් ඇමැති ජි .එල්. ගම්ලත්ව ස්කොට්ලන්තය බලා රැගෙන ගොස් ඇත. ‘‘අඩුම ගානේ වයස ගැනවත් හිතන්න තිබුණා. බෑග් එකවත් අරගෙන යන්න කෙනෙක් ගෙනිච්චාම මොකද වෙන්නේ ‘‘ කියා මේ වන විට ඇමැතිවරයාට හිතවත් අමත්‍යංශයේ අය කතාබහ වන බව ආරංචි මාර්ග කියයි.

එකී ආරංචි මාර්ගම වැඩි දුරටත් පවසන්නේ ඇමැතිට පෞද්ගලික කාර්ය මණ්ඩලයේ අය ගෙනියන්න බෑ කියන අද්මිරල් පසු ගිය දිනක මොස්කවු හී කළ සංචාරයට තමන්ගේ පෞද්ගලිකකාර්ය මණ්ඩලයේ අයෙක් රැගෙන ගිය බවයි. මෙලෙස අමාත්‍යංශ ලේකම්වරයෙක් තමන්ගේ බෑග් එක උස්සගෙන යාමට සහයකයෙක් රැගෙන ගියේ ප්‍රථම වතාවට බවත් කියයි.

මේ දෙදෙනාගේ ගැටුමේ උච්චතම අවස්ථාව උදාවී ඇත්තේ‍ ජනාධිපතිවරයා සිය දේශනය කිරීමට යන විටදීය. දේශනය සඳහා ජනාධිපති සමග ඇතුළට යන්න දෙන්නේ එක් අයකුට පමණි. ‍අද්මිරාල් එතැනදීත් ජී. එල්. ගේ නම කපා ලලිත් වීරතුංගගේ නම දමා ඇත. කෝපය ඉහ වහ ගිය ජී .එල්. බැරිම තැන කෙලින්ම බැසිල්ට ඇමැතුමක් දී සියල්ල මුල සිට කියා ඇත.

දෙමළ සහ මුස්ලිම් දේශපාලන පක්ෂ නායකයින් අතර හමුවක් ඊයේ(02) උදෑසන යාපනයේ පෞද්ගලික හෝටලයකදී පවත්වා ඇති අතර එහිදී රජයට ඉදිරිපත් කිරීම සඳහා යෝජනා 5ක් සම්මත කරගෙන ඇත.

ඒ, 1. ද්‍රවිඩ භාෂාව කතා කරන ජනතාවගේ දීර්ඝ කාලීන අභිලාෂයන් වූ දේශපාලන විසඳුමක් ඉතාම ඉක්මනින් ලබා දීම.

2. 13 වන සංශෝධනය වහාම ක්‍රියාත්මක කිරීම.

3. ආණ්ඩුකාරවරුන් යටතේ පවත්වන පළාත් සභාවලට අවශ්‍ය වූ ඒ මැතිවරණය ඉතාම ඉක්මනින් පැවැත්විවීම.

4. ත්‍රස්තවාදය වැළක්වීමේ පනත අහෝසි කිරීම.

5. ත්‍රස්තවාදය වැළක්වීමේ පනත යටතේ අත්අඩංගුවේ සිටින අය නිදහස් කිරීම. එම යෝජනා වෙයි.

පැය තුනකට අධික කාලයක් පැවති එම රැස්වීමට ශ්‍රී ලංකා මුස්ලිම් කොංග්‍රස් නායක රවුෆ් හකීම්, දෙමළ ප්‍රගතිශීලි පක්ෂයේ නායක මනෝ ගනේෂන්, ප්ලොට් සංවිධානයේ නායක ධර්මලිංගම් සිද්ධාර්ථන්, ටෙලෝ පක්ෂයේ නායක සෙල්වම් අඩෙයිකලනාදන් ඇතුළු පිරිසක් සහභාගි වී තිබේ.

රටේ වර්තමාන දේශපාලන තත්ත්වය, ජනතා ගැටලු මෙන්ම දෙමළ සහ මුද්ලිම් ජනතාව මුහුණ දෙන ගැටලු සම්බන්ධයෙන් ද මෙහිදී දෙපාර්ශවය අතර දීර්ඝ වශයෙන් සාකච්ඡා වී ඇති බව පැවසේ.

එහිදී මාධ්‍ය වෙත කරුණු දැක්වූ මුස්ලිම් කොංග්‍රස් නායක , පාර්ලිමේන්තු මන්ත්‍රී රාවුෆ් හකීම් ” එකම රට – එකම නීතිය කියන සංකල්පයක් යටතේ ජනාධිපති කාර්ය සාධක බළකායක් ඇති කරලා තියෙනවා. එම බළකාය හරහා මේ රටේ ජනතාව අතර තියෙන සංහිඳියාව, එකමුතුකම සම්පූර්ණයෙන් ම විනාශ වියහැකියි කියන අනාවැකිය අපි ප්‍රකාශ කරනවා. ඒ ප්‍රයත්නය සම්පූර්ණයෙන් ම අපි ප්‍රතික්ෂේප කරනවා.” යනුවෙන් පවසා ඇත.

එක් රටක්’, ‘එකම නීතියක්’ සඳහා වූ ජනාධිපති කාර්ය සාධක බළකාය නුසුදුසු සහ නීති සම්පාදනය සඳහා වූ පිළිගත් රාමුවෙන් බැහැර වූ එකක් බව ශ්‍රී ලංකා නීතීඥ සංගමය ජනාධිපති ගෝඨාභය රාජපක්ෂ වෙත දැනුම්දි ඇත.

එක රටක් – එක නීතියක්” සඳහා වන ජනාධිපති කාර්ය සාධක බළකාය පත්කිරීම සම්බන්ධයෙන් ජනාධිපතිවරයා වෙත ලිපියක් යොමුකරණ ශ්‍රී ලංකා නීතිඥ සංගමය පෙන්වා දෙන්නේ එම විෂය සම්බන්ධයෙන් අධිකරණ අමාත්‍යාංශය විසින් දැනටමත් සම්පාදනය කර ඇති නීති කෙටුම්පත සහ එහි යෝග්‍යතාව අධ්‍යයනය කළ යුතු බවයි.

එම ලිපිය මගින් වැඩිදුරටත් ශ්‍රී ලංකා නීතිඥ සංගමය පෙන්වා දී ඇත්තේ මෙරට තුළ එම සංකල්පය ක්‍රියාත්මක කරන ආකාරය කාර්ය සාධක බළකාය විසින් අධ්‍යයනය කළ යුතු අතර එම අරමුණ වෙනුවෙන් නීතියක් කෙටුම්පත් කළ යුතු බවයි

නීති සම්පාදනය සඳහා ක්‍රමවේදයක් ආණ්ඩුක්‍රම ව්‍යවස්ථාව විසින්ම සම්පාදනය කර ඇති බව පෙන්වාදෙන නීතිඥ සංගමය වෙනත් නීති පාර්ලිමේන්තුවේ ස්ථාවර නියෝග මඟින් ශක්තිමත් කර ඇති බව ද සඳහන් කළේය.

එම අරමුණ වෙනුවෙන් ප්‍රමාණවත් නීති සහ ස්ථාවර නියෝග ද, යෝග්‍ය යාන්ත්‍රණයක් ද ආණ්ඩුක්‍රම ව්‍යවස්ථා රාමුව තුළ මේ වන විටත් අන්තර්ගත වන බව ඔවුන් පවසයි.

ඥානසාර හිමියන්ගේ චීවරයට තමන් ගරු කරන නමුත් එක රටක් එක නීතියක් ජනාධිපති කාර්ය සාධක බළකාය උන්වහන්සේට භා=ර දීම සම්බන්ධයෙන් සිය හෘදය සාක්ෂියට අනුව එකග විය නොහැකි බව පාර්ලිමේන්තු මන්ත්‍රී , ෆීල්ඩ් මාෂල් සරත් ෆොන්සේකා පවසයි.

මාධ්‍ය හමුවකදී අදහස් දක්වමින් ඔහු මේ බව සඳහන් කළ අතර මෙම කටයුත්ත උන්වහන්සේට ගැලපෙන්නේද යන්න පිළිබදව සැක මතුවන බවත් පැවසීය.

එමෙන්ම උන්වහන්සේගේ අතීත ක්‍රියාකාරකම් පිළිබද බරපතළ ප්‍රශ්න මතුවන බවත්, උන්වහන්සේ ජාතිවාදී පරිසරයක් යම් යම් අවස්ථාවලදී ගොඩනැගූ බවත් සරත් ෆොන්සේකා මන්ත්‍රීවරයා පැවසීය.

හෙට මොකද වෙන්නේ? ලයිට් කපයි ද? කරුවලේ ඉන්න වෙයි ද? මෙය අද ශ්‍රී ලංකාවේ බොහෝ දෙනාගේ සිතට නැගෙන ප්‍රශ්නයක් විය යුතු ය.

තමා පැය 48ක වැඩ වර්ජනයකට එළඹෙන්නේයැ යි විදුලි වෘත්තීය සමිති විසින් පසුගිය සතියේ දී ප්‍රකාශ වීමත් සමග මෙම ගැටලු මතුවිය.

"ආණ්ඩුව අපිට කියනවා වැඩවර්ජනයකට පලයල්ලා! අඳුරේ තියපල්ලා! එතකින් මෙහා අපි මේ නරුම ප්‍රතිපත්තිය, මේ ගිවිසුම අකුලගන්නේ නැහැ කියලා. ඒ නිසා අපි ජනතාවට කියනවා, මේ තුවාලය සුව කරන්න ඔබට, අපිට අඳුරේ ඉන්න වෙයි දවස් දෙකක්. අපි රට අඳුරට පත් කරනවා වැඩ වර්ජනයකට යනවා," ලංවිම ඒකාබද්ධ වෘත්තීය සමිති සන්ධානයේ කැඳවුම්කරු රන්ජන් ජයලාල් පසුගිය සතියේ ප්‍රකාශ කළේ ය.

එහෙත් මේ වන විට ලංකා විදුලි බල මණ්ඩල වෘත්තීය සමිති සන්ධානය අවධාරණය කරන්නේ, හෙට (නොවැම්බර් 03) වැඩ වර්ජනයක් ක්‍රියාත්මක නොකරන බවයි.

ලංකාව: විදුලි ඒකකයක මිල වැඩිම රටක් විදුලි රැහැන් හා ගොඩනැගිලි: නව රෙගුලාසියක් හෙට මොකද වෙන්නේ? කෙරවලපිටිය යුගදනවි විදුලි බලාගාරයේ 40%ක කොටස් හා මෙරට LNG (ද්‍රවකළ ස්වභාවික වායුව) සැපයුම අමෙරිකාවේ නිව් ෆෝට්‍රස් සමාගමට ලබාදීමේ සූදානම මුල්කරගෙන තමන් ඒකාබද්ධ වෘත්තීය ක්‍රියාමාර්ගයකට සූදානම් වන බව විදුලි වෘත්තීය සමිති පවසයි.

රටේ ජාතික සම්පත් විකිණීමට එරෙහි ඒකාබද්ධ සන්ධානය ලෙස ඔවුහු මෙම ඒකාබද්ධ ක්‍රියාමාර්ගයට එක්ව සිටිති.

"තුන්වැනිදා වැඩ වර්ජනයක් නැහැ. හැබැයි බලාගාර සහ බිඳවැටුම්වලට අත්‍යාවශ්‍ය සේවකයෝ තියලා, අපි කොළඹට කැඳවනවා නඩත්තු කටයුතු සේවකයෝ. වැඩ වර්ජනයක් කියන කාරණය සම්බන්ධයෙන් වරක් දෙවරක් නොවෙයි සිය දහස් වාරයක් හිතනවා. තුන් වැනිදායින් පස්සේ අපි දින නියම කරනවා. අපි වැඩ වර්ජනයකට යන්නේ ලයිට් කපල නොවෙයි. ලයිට් තියෙද්දි. පවත්වාගෙන යාම බැසිල් රාජපක්ෂ මහතාටයි, ගෝඨාභය මහතාටයි, මහින්ද රාජපක්ෂ මහතාටයි බාරයි," ලංවිම ඒකාබද්ධ වෘත්තීය සමිති සන්ධානයේ කැඳවුම්කරු රන්ජන් ජයලාල් පැවසීය.

"අපි දන්න සාස්තරේ අනුව නම්, අපි බලාගාරේ නැත්තන්, අපි වැඩ බිමේ නැත්තන් විදුලි සැපයුම පවත්වගෙන යන්න බැහැ. පැය 24ක් විදුලි බල මණ්ඩලය වැඩ වර්ජනයක් කළොත් [රට] වැටෙනවා, බිංදුවටම වැටෙනවා හතරගාතේ දාලා. මේ ගොල්ලන්ට විදුලිබල මණ්ඩලය වැඩ වර්ජනයක් කරලා රටට කෙළවුණාට රටේ පාලකයන්ට ප්‍රශ්නයක් නැහැ. අමෙරිකා නිව් ෆෝට්රස් සමාගමත් එක්ක රටට කෙලවලා තියෙන්නේ, ජාතික ආරක්ෂාවට කෙලවන්න පුළුවන් හොඳම කෙළවිල්ල කෙළවලා තියෙන්නේ."

මෙම විදුලි සේවකයන්ගේ වෘත්තීය ක්‍රියාමාර්ගයට අනෙකුත් වෘත්තීය සමිතිද සහයෝගය පළකර ඇත.

වරාය ඒකාබද්ධ වෘත්තීය සමිති සන්ධානයේ සම කැඳවුම්කරු ලාල් බංගමුවගේ දැක්වුයේ මෙවන් අදහසකි.

"තෙල්මිල ඉහළ ගියා. ගෑස් මිල ඩබල් වුණා. අදානිගේ සාක්කුවට වැටිලා, බටහිර පර්යන්තය අදානි ගොඩනගලා බිස්නස් එක ගන්නකන් නැගෙනහිර පර්යන්තයට අත තියන්නේ නැහැ කියන එක අපිට දැන් පැහැදිලි වෙනවා. මේ ආයතන තුන නැතිවුණාම සේවකයින්ට පමණක් නොවේ මේ රටේ ජනතාවටත් ජීවත් වෙන්න විදිහක් නැති වෙනවා. එතකොට අපිට කියන්න වෙන්නේ ඩොලර් තිබෙන්නේ කොයි කොයි දේසේ, ඩොලර් තිබෙන්නේ බංගලි දේසේ කියන එක තමයි."

මේ සම්බන්ධයෙන් ප්‍රතිචාර දක්වමින් ප්‍රවාහන අමාත්‍ය ගාමිණී ලොකුගේ පැවසුවේ විදුලිබල සේවකයින් 03 වැනිදා වැඩ වර්ජනයක් කරනු ඇතැ යි තමා නොසිතනබව යි.

ඔහු මාධ්‍ය වෙත අදහස් දක්වමින් වැඩිදුරටත් සඳහන්කර සිටියේ, "කැළණිතිස්ස එවකට තාප බලාගාරය සියයට සීයක්ම ඇමරිකන් කාරයෝනේ මෙච්චර කල් කළේ. ඊයේ පෙරේදා තමයි ජපන් සමාගම ගත්තේ. ඒ කාලේ ඒ අය බුදියගෙන ද හිටියේ? විදුලිබල මණ්ඩලය කෙරවලපිටියෙන් ගන්නේ 10%ක් වගේ විදුලියක්. 100%ක්ම විදුලිබල මණ්ඩලයෙන් විදුලිය ගන්නේ. දැන් කැළණිතිස්ස බලාගාරය ජපන් රජයට විකුණනකොට කවුරුත් කතා කළා ද? ඒගොල්ලෝ ඒ ගනුදෙනුව කර ගත්තා."

අත්‍යවශ්‍ය සේවා ප්‍රකාශයට පත් කරමින් රජයෙන් අතිවිශේෂ ගැසට් නිවේදනයක් වරාය, ඉන්ධන, තැපැල්, ප්‍රවාහන, සහ රජයේ බැංකු ඇතුළු ආයතන කිහිපයක් අත්‍යවශ්‍ය සේවා බවට පත්කරමින් අතිවිශේෂ ගැසට් නිවේදනයක් පසුගිය දා නිකුත් කෙරින.

ජනාධිපතිවරයාගේ නියෝග පරිදි ජනාධිපති ලේකම් නිකුත් කළ එම නිවේදනයට අනුව, ජන ජීවිතයට අත්‍යවශ්‍ය අදාළ සේවාවන් බාධාවකින් තොරව පවත්වාගෙන යාම එහි අරමුණ යි.

මේ ගැසට් පත්‍රය සම්බන්ධයෙන් ලංවිම ඒකාබද්ධ වෘත්තිය සමිති සන්ධානයේ කැඳවුම්කරු රංජන් ජයලාල් පැවසුවේ, ආණ්ඩුව විදුලිබල මණ්ඩලය අමතකකර, තෙල් හා වරාය අත්‍යවශ්‍ය සේවාවක් බවට පත්කර ඇති බවයි.

"මේ වෙද්දී ආණ්ඩුව සූදානම් වෙලා සිටිනවා, විදුලිබල මණ්ඩලය අමතක කරලා, අත්‍යවශ්‍ය සේවාවක් බවට පත් කරලා තියෙන්නේ තෙල් එකයි වරායයි. ඒකෙන් විදුලිබල මණ්ඩලය ආණ්ඩුව තමන්ගේ පාලනයෙන් අයින් කරලා තියෙනවා. ඒ කියන්නේ ආණ්ඩුව සමස්ත බලශක්ති ක්ෂේත්‍රය ඇමරිකාව සතු කරන්න යනවා කියන එක පැහැදිලියි. ආණ්ඩුව ලෑස්ති වෙනවා නම් තෙල් එකටයි වරායටයි අදාළව හෝ, විදුලි බලයට අදාළව හෝ අත්‍යවශය සේවා නියෝග පනවලා ඉදිරියේ ගනු ලබන ක්‍රියාමාර්ග අත්හිටුවන්න, ඒක අසාර්ථක යි. ඒක ආණ්ඩුවට කරන්න බෑ. අපි ඒ නීතියට යටත් වෙන්නේ නැහැ."

ජාතික ප්‍රශ්නයක්

ලංකා විදුලිබල මණ්ඩල ඉංජිනේරු සංගමයේ ඒකාබද්ධ වෘත්තීය සමිති නියෝජිත ඉංජිනේරු චරිත ජයනාත් දයාරත්න අවධාරණයකර සිටින්නේ, මෙම ගිවිසුම ජාතික ප්‍රශ්නයක් බවයි.

මෙමඟින් ඕනෑම රටකට මෙරට විදුලිබල ක්ෂේත්‍රයට මැදිහත් විය හැකි බව ඔහු කියා සිටියේ ය. ඔහු පවසන්නේ මෙවැන්නක් සිදුකිරීම සඳහා නිශ්චිත ක්‍රියාවලියක් ඇති බව යි.

තරගකාරී ටෙන්ඩර් කැඳවීම යටතේ, ජාතික ප්‍රසම්පාදන ප්‍රතිපත්තියට අනුව සහ රටේ ජාතික බලශක්ති ප්‍රතිපත්තියට අනුව රටට අනර්ථයක් නොවන ලෙස ඕනෑම රටකට මෙරට බලශක්ති ක්ෂේත්‍රයට මැදිහත් විය හැකි බව ද ඔහු පෙන්වා දෙන නමුත් පවතින ක්‍රියාවලිය නීතිවිරෝධී බව ඔහු පවසයි.

තුන්වැනිදා තමන් ගන්නා ක්‍රියාමාර්ගය දැනුවත් විය යුත්තන්ට දෙන පණිවිඩයක් බවද ඔහු පැවසීය.

ඉංජිනේරුවරයා රටේ ජනතාවගෙන් ඉල්ලා සිටින්නේ, මේ ගැටලුව කුමක්දැ යි බුද්ධියෙන් සිතා බලන ලෙසයි. විදුලිබල මණ්ඩලයේ ඉංජිනේරුවාගේ සිට බිම් මට්ටමේ සේවකයින් දක්වා එකට එකතු වී සිටින්නේ ජාතික ප්‍රශ්නයක් වෙනුවෙන් බව ඔහු පවසයි.

ලයිට් කපයි ද?

ඉංජිනේරු චරිත ජයනාත් දයාරත්න අවධාරණය කළේ ලයිට් කැපීමක් මේ මොහොතේ සිදුනොවන බවයි.

වැඩ වර්ජනයකට යෑමට මෙතෙක් තීරණය කර නැතැ යි ද ඔහු ප්‍රකාශ කළේ ය.

මේ අතර ජලසම්පාදන මණ්ඩලයේ ඉංජිනේරුවන් පවසන්නේ විදුලි සේවකයන් හෙට දිනයේදී ක්‍රියාත්මක කිරීමට නියමිත උද්ඝෝෂණයට සමගාමීව විදුලිය විසන්ධි වීමක් සිදුවුවහොත් ජල සැපයුම සම්පූර්ණයෙන්ම ඇණහිටීම වැළැක්විය නොහැකි බවයි.

නිව් ෆෝට්ට්‍රෙස් සමාගම සමග ඇතිවූ ගිවිසුම මොකක්ද?

විදුලිය උත්පාදනය හා ස්වභාවික ද්‍රව වායු හෙවත් LNG සැපයීමට අදාළව රජය අමෙරිකානු සමාගමක් සමග මුලික එකඟතා ගිවිසුමක් අත්සන් කර ගෙන ඇත.එම ගිවිසුම මගින් කෙරවළපිටියේ දැනට ක්‍රියාත්මක වන මෙගවොට් 350 ක යුගදනවි විදුලි බලාගාරය හිමි වෙස්ට්කෝස්ට් සමාගමේ කොටස් වලින් මහා භාණ්ඩාගාරයට අයත් 40% ක් අමෙරිකාවේ නිව් ෆොට්ට්‍රෙස් නමැති සමාගමට විකිණීමටත් විදුලි බලාගාරයට ස්වභාවික ද්‍රව වායු හෙවත් LNG සැපයීමට අදාළ පාවෙන ගබඩාව හා නළ පද්ධතිය ඉදිකිරීම හා පවත්වාගෙන යාම ද අදාළ සමාගමට පැවරීමට යෝජනා වී ඇත."මේ කැබිනට් පත්‍රිකාව ඉදිරිපත් කරන්නේ 2021.09.06 වෙනිදා මේ කැබිනට් පත්‍රිකාව අනුමත කරනකොට කිසි ඇමතිවරයෙක් ගාව මේ කැබිනට් පත්‍රිකාව නෑ. දැකලා නෑ. හැබැයි කැබිනට් මණ්ඩලය අනුමත කරනවා. අනුමත කරලා කියනවා. මෙහෙම කොටස් විකිණීමේ හා මිලදී ගැනීමේ ගිවිසුම අත්සන් කිරීමෙන් පසු එය අනුමත කිරීම සඳහා අමාත්‍ය මණ්ඩලය වෙත ඉදිරිපත් කරනු ඇත. අත්සන් කරාට පස්සේ මොකක්ද අනුමත කරන්න කියන්නේ. අත්සන් කරලා ඉවරයි," ජනතා විමුක්ති පෙරමුණු නායක අනුර කුමාර දිසානායක පසුගියදා අනාවරණයක් කරමින් පැවසීය.

"මේ ගිවිසුම අත්සන් කරලා තියෙන්නේ 17 වෙනිදා රෑ 12 පසුවි විනාඩි 06 ට සිකුරාදා රාත්‍රීයේ රෑ 12 ට ගිවිසුම් අත්සන් කරනවා, රට ගැන අත්සන් කරලා ආපු සුද්දා පාන්දර 2 ට තියෙන ෆලයිට් එකේ ඇමරිකාවට යනවා. ඕකයි සිද්ද වුණේ, ඔබ හිතනවාද මේ රටේ රෑ 12 .06ට ගිවිසුම් අත්සන් කරන්න. බකමුණො ද මේ ගොල්ලෝ. නිසාචරයින්ද?"

ඔහු තවදුරත් පැවසුවේ බලශක්ති ක්ෂෙත්‍රයේ අයිතිකාරයන හෙට අපේ රටේ ආණ්ඩු තීරණය කරන බවත් මෙය වළක්වා ගැනීම සඳහා ඔවුන් නීතිමය ක්‍රියාමාර්ග ගැනීමට අපෙක්ෂා කරන බවයි.පෙරටුගාමි සමාජවාදී පක්ෂයේ අධ්‍යාපන ලේකම් පුබුදු ජයගොඩ පවසන්නේ, එක් අතකින් මෙය බලශක්ති සෛවරීත්වයට ප්‍රශ්නයක් බවත් අනෙක් අතින් ඇමරිකාවේ දේශපාලන බලපෑමට යුද බලපෑම්වලට එකඟ වීමට සිද්ධ විය හැකි බවයි.තෙල් බෙදා හැරිමෙන් තුනෙන් එකක් ඉන්දියාවට ලබාදී ඇති බවත් මුතුරාජවෙල අක්කර 109 ක් ගොඩකර චීන සමාගමකට විදුලි බලාගාරයක් පිහිටුවීමට ඉඩ දී ඇති බවත් මේ අනුව රටේ බලශක්ති සම්බන්ධ සම්පූර්ණ තීරණ ගන්නේ ඇමරිකාව, චීනය සහ ඉන්දියාව බවටත් ඔහු චෝදනා කර සිටීයි."එක පැත්තකින් මේක බලශක්ති ස්වරීත්වයට ප්‍රශ්නයක්. එතනින් පස්සේ බලශක්තිය මත අපිට ගෙදර ලයිට් එක දාගන්න නම් ඇමරිකාවේ දේශපාලන බලපෑමට යුධ බලපෑම්වලට එවට එකඟ වෙන්න සිද්ද වෙනවා. සමස්ත තෙල් බෙදා හැරිමෙන් තුනෙන් එකක් ඉන්දියාවට ලබාදුන්නා. මුතුරාජවෙල අක්කර 109 ක් ගොඩකරලා චීනයේ විදුලිබලාගාරයක් චීන සමාගමකට අයත් විදුලි බලාගාරයක් දැන් හදමින් යනවා."

"මේක සිද්ද වෙන්නේ පාර්ලිමේන්තුවට සම්පූර්ණ පිටස්තරව. මොක්ද වසංගතයට වඩා භායනකයි මේවා. ද්විත්ව පුරවැසි බැසිල් රාජපක්ෂ නැවත පැනලා යයි තමන්ගේ රටට ගියාට පස්සේ ලංකාව තුළ හිරවෙන්නේ මේ නිලධාරීන් ඒ නිසා අපි නිලධාරීන්ට කියනවා. මේවට මැදිහත් වෙන්න ඒපා මේවට අත්සන් කරන්න ඒපා"

රජය මෙම චොදනා ප්‍රතික්ශේප කරන අතර ඔවුන් පවසන්නේ මෙය රාජ්‍ය පෞද්ගලික ආයෝජනයක් මිස විකිණීමක් නොවන බවයි.

ශෙහාන් සේමසිංහ, තිස්සකුට්ටි ආරච්චි හෝ සාගර කාරියවසම්ලා තමන් ගණන් නොගන්නා බව ශ්‍රී ලංකා නිදහස් පක්ෂයේ මහ ලේකම් , රාජ්‍ය අමාත්‍ය දයාසිරි ජයසේකර පවසයි.

අමාත්‍ය විමල් වීරවංශ – උදය ගම්මන්පිල – වාසුදේව නානායක්කාර ඇතුළු ආණ්ඩුවට සම්බන්ධ සෙසු පක්ෂ නායකයන්ගේ ප‍්‍රධානත්වයෙන් පැවති මහජන මන්ත‍්‍රණ සභාවේ දී එම පක්ෂ නායකයන් ආණ්ඩුව දැඩි ලෙස විවේචනයට ලක් කළ අතර ඊට පොදුජන පෙරමුණේ මේ මන්ත්‍රීවරුන් දැක්වූ ප්‍රතිචාර සම්බන්ධයෙන් කරුණු විමසීමේදී රාජ්‍ය අමාත්‍ය දයාසිරි ජයසේකර මෙසේ පවසා ඇත.

දේශපාලන පළපුරුද්ද නැති අය තමන්ව විවේචනය කළත්, අගමැති මහින්ද රාජපක්ෂ වැනි අයෙකු කිසි විටෙකත් තමන්ව හෝ තම කණ්ඩායම විවේචනය නො කරන බව ද අමාත්‍යවරයා පවසා ඇත.

කොවිඩ් වසංගතයට එරෙහිව භාවිතා කරන සයිනොෆාම් දෙවැනි එන්නතත් ලබාදීමෙන් මාස තුනකට පසුව අදාළ ප්‍රතිශක්තිකරණ ශක්තිය හීන වන බව මාධ්‍ය හමුවක් පවත්වමින් ශ්‍රී ලංකා වෛද්‍ය සංගමය හෙළිදරව් කළ බව මාධ්‍ය විසින් අද (02) වාර්තා කර තිබේ.

මෙරට හා විදේශයන් හි සිදුකරන පුළුල් පරීක්‍ෂණ මගින් මේ බැව් සනාථ වන බව විශේෂඥ වෛද්‍ය රජීව් ද සිල්වා මෙහිදී පෙන්වා දී ඇත.

එබැවින් පවතින තත්වය හමුවේ ඔහු අවධාරණය කළේ අදාළ එන්නත ලබාදුන් අයට තෙවැනි එන්නතද ලබාදිය යුතු බවයි.

මේ වනවිට ලංකාවේ වැඩිම පිරිසකට ලබා දී ඇති සයිනොෆාම් එන්නත චීනයේ නිෂ්පාදනයකි. සයිනොෆාම් එන්නත පිළිබඳව ආරම්භයේ සිටම ලංකාවේ වෛද්‍ය වෘත්තිකයන්ගේ කුකුසට ලක් වූයේය.

ෆයිසර්, මොඩර්නා වැනි එන්නත් කෙරේ ඔවුන් වැඩි විශ්වාසයක් තැබුවේ ජාත්‍යන්තර නිර්ණායකයන්ද උපුටා දක්වමිනි.

තම රටට පැමිණිමේදී ෆයිසර් හෝ මොඩර්නා එන්නත ලබාගත් බවට අනිවාර්ය සහතිකයක් අවශ්‍ය බැව් බඛෝ රජයන් විසින් මේ වනවිටත් නිල වශයෙන් ප්‍රකාශ කර ඇත. මේ නිසා ලංකාවේද පාසැල් සිසුන්ට එන්නත්කරණයට යොමු කිරීමේදී අදාළ ෆයිසර් එන්නත පමණක්ම ලබාදිය යුතු බවට රැල්ලක් නිර්මාණය වෙමින් පවතින විට ආණ්ඩුව එම පියවර ගන්නට කටයුතු කළේය.

මේ අතර බොහෝ රටවල් ෆයිසර් එන්නතේද තෙවැනි මාත්‍රාවක් ලබාදීමට කටයුතු කර තිබේ.

කොවිඩ් රෝගය මැඩලීමේදී ජනාධිපතිවරයා හා වෘත්තිකයන් අතර තිබුන සහසම්බන්ධය දේශපාලඥයන්ගේ විවිධ ප්‍රකාශ හා ක්‍රියායාකාරකම් මැද බිඳි ගියේද මෙවැනි පසුබිමක් ජාත්‍යන්තරයේ තිබියදීය. පළමු එන්නත් වාරයක පමණක් ලබාගන්නට එකඟවන බවට ලිපි අදාළ එන්නත්කරණයට බඳුන්වන ජනතාවගෙන් ලබාගැනීම්, දේශපාලඥයන්ගේ ඍජු මැදිහත්වීම් මැද එන්නත්කරණය අඩාල වූ අවස්ථා, එන්නත්කරණයට සැලසුම් කර තිබූ සීමාවන් බිඳ දමා කොළඹ සිට අදාළ දුරස්ථ ප්‍රදේශ වලට ගොස් දේශපාලන බලවතුන් හා හිතවතුන් විසින් එන්නත් ලබාගැනීම් ආදි සිදුවීම් පසුගිය කාල‍යේ දිගින් දිගටම වාර්තා විය.

මේ තත්වය මත වෘත්තිකයන් මෙම කො‍රෝනා මර්දන ක්‍රියාවලියෙන් ඈත් වූ අතර, සමහර වෘත්තිකයෝ ලංකාවෙන් බැහැරව වූහ.

අද වනවිට කොවිඞ් රෝගය කිසියම් මට්ටමකට පාලනය වූ ස්වභාවයක් දැකිය හැකි වුවද, එය කිසිසේත්ම පරාජය කළ හැකි ආකාරයට මෙල්ල වී නැත. පසුගිය දා පාසැල් ඇරඹීමත් සමග පාසැල් දෙකකින් කොවිඩ් රෝගීන් වාර්තා වීම මෙයට කදිම නිදසුනකි.

එබැවින් අදාළ වෘත්තිකයන්ගේ උපදෙස් අනුව ක්‍රියාත්මක වීම වඩාත් ආරක්ෂාකාරි බව පැහැදිලිය.

(Headline news )

අද(02) දින පෙරවරුවේ ශ්‍රී ලංකා පොදුජන පෙරමුණේ පස්වන ජාතික මහා සම්මේලනය නෙළුම් පොකුණ රඟහලේ පැවැත්වූ අතර ඒ පක්ෂ නායක , අගමැති මහින්ද රාජපක්ෂගේ ප්‍රධානත්වයෙනි.

උත්සවය ආරම්භ වූයේ, ශ්‍රී ලංකා පොදු ජන පෙරමුනේ නිර්මාතෘ මුදල් අමාත්‍ය බැසිල් රාජපක්ෂගේ පැමිණිමත් සමගයි.

මහජන මන්ත්‍රණ සභාවක් පිහිටුවමින් LNG ගනුදෙනුවට එරෙහිව කටයුතු කරන නිදහස් පක්ෂය ඇතුළු ආණ්ඩුවේ හවුල්කාර පක්ෂ 11 නායකයෝ හා සාමාජිකයෝ ද මීට එකව සිටි අතර එය කාගේත් අවධානය යොමුවූ සිදුවීමක් විය.

සම්මේලනය අමතමින් අමාත්‍ය බැසිල් රාජපක්ෂ පැවසුවේ, පක්ෂය නිර්මාණය කරනු ලැබුවේ, කිසිවකු පරාජය කිරීමට නොව ජනතාව දිනවීමට බවයි.

මෙහිදී සභාව අමතමින් අගමැති මහින්ද රාජපක්ෂ සිදුකළ අදහස් දැක්වීම සුවිශේෂ වූ අතර එහිදී පොදුජන පෙරමුණ සහ ආණ්ඩුවේ සෙසු පක්ෂ අතර මතුව ඇති අර්බුදය සමනය කිරීමේ ප්‍රයත්නයක් පෙන්නුම් කෙරුණු බව දේශපාලන විචාරකයන් පවසයි.

තාප්පවල චිත්‍ර ඇඳපු තරුණියෝ කෝ : අනෙක් පක්ෂ අපේ කිහිලිකරු නොවේ - මහින්ද පරිණත කතාව !

දේශපාලන පක්ෂ ලොකු කුඩා වුණත් දුෂ්කර අවස්ථාවල එක් අරමුණක් වෙනුවෙන් එකට එක පිලේ එක් අරමුණකට සටන් කළ අය මේ කවුරුවත් අපට ඈත් කරන්න බෑ. ඒ අය අපේ ආධාරක නෙමෙයි. අපේ කිහිලිකරුත් නෙමෙයි. ඒ අය අපේ අතකොළුත් නෙවෙයි. ඒනිසා එදා හිටපු සියලු පක්ෂ එක රෑනට එකට ඉන්න ඕනෑ. ඒ සමගිය රකින එක ප්‍රධාන පක්ෂයේ අපේ වගකීම" යැයි ශ්‍රී ලංකා පොදුජන පෙරමුණේ නායක අග්‍රාමාත්‍ය මහින්ද රාජපක්ෂ එහිදී පැවසීය.

තාප්පවල චිත්‍ර ඇඳලා දේශපාලනයෙන් රට අවලස්සන කරන්න එපා කිව්ව තරුණයන් අද රට හැර යන්න පාස්පෝට් ගන්න පෝලිමේ ඉන්නවාද කියලා හොයලා බලලා,එහෙම ඉන්නව නම් ඒ අය ආයෙත් මේ රටට කැඳවාගන්න පුළුවන් විධියේ දේශපාලනයක යෙදීම පොදුජන පෙරමුණට ඇති ඓතිහාසික අනාගතවාදී කාර්යය බව ද අග්‍රාමාත්‍යතුමා මෙහි දී පෙන්වා දුන්නේය.

පරණ මහින්ද මතුවෙයි !

මේ අතර දේශපාලන විචාරකයන් පවසන්නේ පොදුජන පෙරමුණ සමුළුව අවස්ථාවේ අගමැති මහින්ද රාජපක්ෂ සිය දේශපාලන පරිණත භාවය පෙන්වමින් සිදුකළ කතාව ආණ්ඩුවේ හෙට දවසට තීරණාත්මක බවයි.

ආණ්ඩුවේ බැබැසිල්වාදින් සෙසු පක්ෂ නොතකා ඔවුන් මැඩීමට කටයුතු කරන පසුබිමේ මහින්ද රාජපක්ෂ අගමැති ලෙස සූක්ෂම ලෙස ඉදිරි ගමන වෙනුවෙන් එකට සිටීමේ වැදගත්කම අවධාරණය කිරීම තුළ ඉස්සර සිටි පරණ මහින්ද සිහියට නැංවූ බවත් විචාරකයන් පවසයි.

කෙසේ වුවත් එය උපක්‍රමික ප්‍රවේශයක් ද නැද්ද යන්න තීරණය වන්නේ ආණ්ඩුවේ ප්‍රධානීන් ගේ ඉදිරි හැසිරීම මත බවත් දේශපාලන විචාරකයන් පවසයි.

නාරාහෙන්පිට අභයාරාමාධිපති මුරුත්තෙට්ටුවේ ආනන්ද හිමි කොළඹ විශ්වවිද්‍යාලයේ කුලපති ධුරයට පත්කර තිබේ.

ජනාධිපති ගෝඨාභය රාජපක්ෂ විසින් මෙම පත්වීම ලබා දී ඇත.

අදාල පත්වීමේ ලිපිය මේ වන විට උන්වහන්සේ වෙත ලැබී ඇති බවත් වාර්තා වෙයි.

වර්තමාන ආණ්ඩුව බලයට ගෙන ඒම සඳහා විශේෂ කැපකිරීමක් කරන ලද උන්වහන්සේ මෑතක සිට ආණ්ඩුවට දැඩි විවේචනයන් එල්ල කරමින් සිටි අතර ජනාධිපති පවා එහිදී විවේචනයට ලක්විය.

ඉදිරි ජනාධිපතිවරණයේ දී විමල් වීරවංශ හා උදය ගම්මන්පිල යන අමාත්‍යවරුන් වෙනත් අපේක්ෂකයෙකුට සහාය දීමේ අරමුණකින් යුතුව සිටින බව රාජ්‍ය අමාත්‍ය සනත් නිශාන්ත සඳහන් කරයි.

එම අරමුණ සහිතව ඔවුන් ආණ්ඩුවට විවේචන එල්ල කරන බවද අමාත්‍යවරයා පෙන්වා දෙයි.

ආණ්ඩුව තුළ සිටිමින් ආණ්ඩුව විවේචනය නොකර ආණ්ඩුවෙන් ඉවත් වන්නැයි ඔහු ඔවුන්ගෙන් ඉල්ලා සිටියේය.

ආණ්ඩුව තුල ඇතිව තිබෙන මතභේදකාරී තත්ත්වය සම්බන්ධයෙන් මාධ්‍ය වෙත අදහස් පළ කරමින් අමාත්‍යවරයා මේ බව පැවසීය.

මේ රටේ හාල් හිඟ වුවත් අතිතයේ ගම් වල මඤ්ඤොක්කා, මුං ඇට, බතල කෑවා. පාන් කනව වෙනුවට මඤ්ඤොක්කා, මුං කැවොත් නරකක් වෙන්නේ නෑ. මඤ්ඤොක්කා පිළිකාවටත් හොඳයි”යැයි වාරිමාර්ග අමාත්‍ය චමල් රාජපක්ෂ  පවසයි.

ශ්‍රී දළදා යල් අස්වනු පූජාවෙන් අනතුරුව මාධ්‍ය හමුවේ අදහස් දක්වමින් ඇමැතිවරයා මේ බව ප්‍රකාශ කළේය.

“ලංකාව පුරා ගොවි සංවිධාන පසුගිය කන්නයේ නෙළා ගත් අස්වැන්නේ අග්‍ර කොටස දළදා වහන්සේට පූජා කිරීම වාර්ෂිකව සිදු කරනවා. මහ කන්නයේදී සාර්ථක අස්වැන්නක් අපේක්ෂාවෙන් ගොවීන් දළදා වහන්සේ උදෙසා මෙම පූජාව සිදු කරන්නේ ඉතාම ගෞරවය පෙරදැරිවයි.

මමත් ගොවියෙක් මම කාබනික පොහොර යොදල වගා කලා අලුත් අයට අලුත් අත් දැකීමක් මෙය දිගින් දිගටම කරගෙන යද්දි සාර්ථකව කරගත හැකි වෙයි. පළමුවන කන්නය අත්දැකිමක්. අස්වැන්න අඩු වුණොත් සහතිකයක් දීල තියෙනව අලභය ගෙවනව කියල. ඒකට බයවෙන්න දෙයක් නෑ. උද්ඝෝෂණ කරන අයගේ හඬට කන් දුන්නොත් ඔවුන් කියන්නේ කාබනික වගාව හොඳයි නමුත් එක පාරට කරපු එකයි වරද කියලා.

කවුරුවත් කාබනික වගාවට අකමැති නැහැ කියන එක මෙතනින් පැහැදිලියි. අප බලන්න ඕන ජනතාවට ගුණාත්මක වස විසෙන් තොර ආහාර ලබා දෙන්න. ඉස්සර කෑ ගැහුවෙ බහු ජාතික සමාගම් එපා කියල.

දැන් කියන්නේ රසායනික පොහොර ගන්න එයාලව තියාගන්න කියලා.මේවා අපි කල්පනා කර බලන්න ඕන. අපේ බිමේ මඤ්ඤොක්කා හොඳට වැවෙනවා.දේශීය අල වර්ග 60 කට වඩා තිබෙනවා.මුං ඇට කව්පි වගේ බෝග තිබෙනවා.මේවා ආහාරයට ගැනීමට අපි පුරුදු වෙන්න ඕන. රසායනික පොහොර වලට අපේ සල්ලි යනව දෙගොල්ලනම මේ සදහා කැපවිමක් කරන්න අවශ්‍යයි.

හාල් හිගයක් දැනුත් තියෙනව. අඩු ආදායම්ලාභින්ට දැනුත් හාල් කොච්චර තිබුනත් රටින් ගෙන්වන්න හදනව. අඩු ආදායම් ලාභින් පිලිබදව කල්පනා කරනව ඒ අයට අඩුව හාල් දෙන්නෙ කොහොමද කියල කල්පනා කරනවා”

– ADA

තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා සිරිල් ගාමිණි ප්‍රනාන්දු පියතුමා විසින් ශ්‍රේෂ්ඨාධිකරණයට මූලික අයිතිවාසිකම් පෙත්සමක් ඉදිරිපත් කර ඇත.

එහි වගඋත්තරකරුවන් ලෙස අපරාධ පරීක්ෂණ දෙපාර්තමේන්තුවේ විශේෂ විමර්ශනයක ස්ථානාධිපති ප්‍රධාන පොලිස් පරීක්ෂක ලලිත දිසානායක, එහි ජ්‍යෙෂ්ඨ පොලිස් අධිකාරී රොහාන් ප්‍රේමරත්න, අපරාධ පරීක්ෂණ දෙපාර්තමේන්තුවේ අධ්‍යක්ෂ ඩබ්ලිව්. තිලකරත්න, පොලිස්පතිවරයා, රාජ්‍ය බුද්ධි සේවයේ ප්‍රධානී සුරේෂ් සාලේ, කාදිනල් අතිඋතුම් මැල්කම් රංජිත් හිමිපාණන් සහ නීතිපතිවරයා නම් කර ඇත.

රාජ්‍ය බුද්ධි සේවයේ ප්‍රධානී සුරේෂ් සලේ විසින් කරන ලද පැමිණිල්ලකට අනුව ප්‍රකාශයක් සටහන් කර ගැනීම සඳහා තමන් වහන්සේට හෙට (03) පෙරවරු 9.30ට අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙස දැනුම් දීමක් සිදුකර ඇති බවත් ඉන් අනතුරුව තමන් වහන්සේ අත්අඩංගුවට ගැනීමට නියමිත බවත් කිසිදු සාධාරණ හේතුවක් නොමැතිව තමන් වහන්සේ අත්අඩංගුවට ගැනීම තුළින් සිය මූලික මිනිස් අයිතීන් උල්ලංඝනය වන බවත් පෙත්සම ඉදිරිපත්කරමින් සිරිල් ගාමිණී පියතුමා කියා සිටී.

ඒ අනුව තමන් වහන්සේව අත්අඩංගුවට ගැනීම වැළැක්වීමේ අතුරු නියෝගයක් වගඋත්තරකරුවන් වෙත නිකුත් කරන ලෙස ශ්‍රේෂ්ඨාධිකරණයෙන් ඉල්ලා සිටින සිරිල් ගාමිණි පියතුමා වගඋත්තරඅකරුවන්ගේ ක්‍රියා කලාපය තුළින් සිය මූලික අයිතීන් උල්ලංඝනය වන බවට තීන්දුවක් ලබාදෙන ලෙසද ශ්‍රේෂ්ඨාධිකරණයෙන් වැඩිදුරටත් ඉල්ලා තිබේ.

ඉකුත් 25 වනදා සූම් තාක්ෂණය ඔස්සේ පැවති සංවාදයකදී තමන් වහන්සේ ජාතික ආරක්ෂාවට තර්ජනයක් වන ආකාරයේ ප්‍රකාශ සිදුකිරීම තුළින් දණ්ඩ නීති සංග්‍රහය සහ එක්සත් ජාතීන්ගේ සිවිල් හා දේශපාලන අයිතිවාසිකම් පිළිබඳ සම්මුති පනත යටතේ වරදවල් සිදුකර ඇති බවට චෝදනා කරමින් විමර්ශන සිදුකරන බවට තොරතුරු අනාවරණය වී ඇතැයිද එම පෙත්සමින් සඳහන් වේ.

එහෙත් තමන් එම චෝදනා ප්‍රතික්ෂේප කරන බවද සිරිල් ගාමිණි පියතුමා කියා සිටී.

පොදුජන පෙරමුණ ආණ්ඩුවේ පසුපෙළ මන්ත්‍රීවරුන් සහ රාජ්‍ය අමාත්‍යවරුන් යොදවා ආණ්ඩුව නියෝජනය කරන සෙසු පක්ෂ නායකයන්ට පහරදීම මේ වන විට දෛනික සිදුවීමක් බවට පත්ව තිබේ.

එහිදී ශ්‍රීලනිප නායක , හිටපු ජනාධිපති මෛත්‍රීපාල සිරිසේන ට එරෙහිව යොදවා ඇත්තේ රාජ්‍ය අමාත්‍ය රොෂාන් රණසිංහ වන අතර පසුගියදා පැවති මාධ්‍ය හමුවකදී රාජ්‍ය අමාත්‍යවරයා යළිත් ක්‍රියාත්මක විය.

පසුගිය ජනාධිපතිවරණයේදී මෛත්‍රීපාල සිරිසේන මහත්තයා පස්ස දොරින් පැනැල ගියේ එතුමාට ඡන්දෙට දාන්න අනුගාමිකයෙක්වත් නැති නිසා යැයි පළාත් සභා හා පළාත් පාලන අමාත්‍ය රොෂාන් රණසිංහ එහිදී පැවසීය .

මේ මාධ්‍ය හමුව පවත්වා තිබුණේ පොදුජන පෙරමුණට වසර පහක් පිරීම නිමිත්තෙන් පැවැත්වෙන ජාතික මහා සමුළුව පිළිබඳව හා රටේ වත්මන් දේශපාලන තත්ත්වය පිළිබඳව කරුණු පැහැදිලි කිරීම සඳහා පොළොන්නරුව බැඳිවැව පිහිටි රාජ්‍ය අමාත්‍යවරයාගේ නිවසේදී ය.

එහිදී අමාත්‍යවරයා මෙසේද පැවසීය. පක්ෂය 2016 වර්ෂයේ බිහි කරලා නෙළුම් පොහොට්ටුව ලකුණ ලබා ගෙන පළවන පළාත් පාලන මැතිවරණයට 2018 වර්ෂයෙදී මුහුණ දුන්නා. එහිදී පක්ෂය හඳලා අවුරුදු 02 කට අඩු කාලයක් තුළ දී සියළුම පක්ෂ පරාජය කරලා පළාත් පාලන ආයතන අති විශාල සංඛ්‍යාවක ජයග්‍රහණය ලබා ගනිමින් පොදු ජන පෙරමුණ පක්ෂයට ජය ලබා ගැනීමට හැකි වුණා. එහිදී විධායක ජනාධිපතිවරයාගේ දිස්ත්‍රික්කය පොදු ජන පෙරමුණ හැටියට ජයග්‍රහණය ලබා ගැනීමට හැකි වුණා.

ඉන්පසු ජනාධිපතිවරණයේදී සුවිශේෂ ජන වරමක් සමඟ ගොඨාභය රාජපක්ෂ මැතිතුමා මේ රටේ ජනතාව ජයග්‍රහණය කරවනු ලැබුවා. මහ මැතිවරණයේදී කොවිඩ් අර්බුදය මැද වුවත් සජිත් ප්‍රේමදාස මහතා සහ අනුර කුමාර දිසානායන මහතාගේ මතය නැවත ප්‍රතික්ෂේප කොට 2/3 වරමින් ආණ්ඩුවක් ගෙන යන්න අපිට බලය ලබා දුන්නා.

සිරගත වී සිටින හිටපු පාර්ලිමේන්තු මන්ත්‍රී රංජන් රාමනායකට නැවතත් පාර්ලිමේන්තු මන්ත්‍රීධූරය ලබාදීම සදහා තමන්ගේ ජාතික ලැයිස්තු පාර්ලිමේන්තු මන්ත්‍රීධූරයෙන් ඉල්ලා අස්වීමට තමන් සූදානම් බව සමගි ජනබලවේගයේ උප සභාපති පාර්ලිමේන්තු මන්ත්‍රී හරීන් ප්‍රනාන්දු පවසයි.

ඔහු මේ බව කියා සිටියේ වත්තල ආසනයේ සමගි ජනබලවේග ප්‍රධාන කාර්යාලය විවෘත කිරීමේ අවස්ථාවට අද (01) එක්වූ අවස්ථාවේදීය.

තමන්ට වයස අවුරුදු 60 සම්පූර්ණ වූ විගස තාරුණ්‍යයට අවස්ථාව ලබාදෙමින් දේශපාලනයෙන් ඉවත් වන බවටද හරීන් ප්‍රනාන්දු එහිදී ප්‍රතිඥාවක් ද ලබාදී ඇත.

වත්තල ආසනයේ සමගි ජනබලවේගය ප්‍රධාන කාර්‍යාලය විවෘත කිරීමේ ප්‍රධාන අමුත්තා වූයේ විපක්ෂ නායක සජිත් ප්‍රේමදාස ය.

පොදුජන පෙරමුණ ආණ්ඩුවේ අභ්‍යන්තර ගැටුම තවදුරටත් ඔඩුදුවන තත්ත්වයක් උද්ගතව ඇති බව දේශපාලන නිරීක්ෂකයන් පෙන්වා දෙයි.

ඔවුන් පවසන්නේ ආණ්ඩුව නිශ්චිත ලෙසම පුපුරා යන බවත් දැනට ඇත්තේ ඊට කාලය සම්බන්ධයෙන් ප්‍රශ්නයක් පමණක් බවයි.

මේ වන විට විමල් වාසු ගම්මන්පිල අමාත්‍යවරුන් ප්‍රමුඛ ශ්‍රීලනිප පාර්ශ්ව උපක්‍රමික ලෙස ආණ්ඩුවේ සිටිමින් ආණ්ඩුව දෙදරවීමට අවශ්‍ය දේශපාලන පසුබිම සකස් කරන අතර ඊට පොදුජන පෙරමුණ දක්වන ප්‍රතිවිරෝධය ආණ්ඩුවේ ගමනක අවසානය තහවුරු කරනු ඇති බවත් දේශපාලන නිරීක්ෂකයන් පෙන්වා දෙයි.

සාගර ගේම ඉල්ලයි !

මේ අදහස් තහවුරු කරමින්, පොදුජන පෙරමුණේ මහ ලේකම්, පාර්ලිමේන්තු මන්ත්‍රී නීතිඥ සාගර කාරියවසම් මාධ්‍යය වෙත අදහස් දක්වමින්, කැබිනට් සාමූහික වගකීම කඩ කරමින් කටයුතු කරන විමල් වීරවංශ, උදය ගම්මන්පිල යන අමාත්‍යවරුන් ඇතුළු පිරිස සම්බන්ධයෙන් වහාම පියවරක් ගන්නැයි පක්ෂයක් හැටියට ජනාධිපතිවරයාගෙන් සහ අගමැතිවරයාගෙන් විශේෂ ඉල්ලීමක් කිරීමට කටයුතු කරගෙන යන බව පැවසීමත් සමගය.

මෙලෙස ඉල්ලීමක් කිරීමට තීරණය කිරීමට හේතුවූයේ එම පිරිසේ ක්‍රියා කලාපය සහ හැසිරීම ආණ්ඩුවේ ඉදිරි පැවැත්මට බරපතළ තර්ජනයක් හා ගැටලුවක් නිසා බවද ඔහු වැඩිදුරටත් පවසා සිටියේය.

“යුගදනවි බලාගාරය සම්බන්ධයෙන් නිශ්චිත ගිවිසුමක් තවමත් අත්සන් කර නැති හෙයින් ඒ පිළිබඳව කිසිසේත්ම කලබල නොවන්නැයි මුදල් අමාත්‍ය බැසිල් රාජපක්ෂ මහතා පක්ෂ නායක රැස්වීමේදී පැහැදිලිවම දැනුම් දී තිබියදී මෙම පිරිස මේ ආකාරයට ආණ්ඩුව පදනම් විරහිතව විවේචනය කරමින් කටයුතු කිරීම ඉතා පහත් කැත වැඩක්. මේ පිරිස මෙලෙස හැසිරෙනේ කිසියම් බාහිර කුමන්ත්‍රණයක් අනුව බවට බොහෝ දෙනෙකුට සැක මතුවී තිබෙනවා” යනුවෙන් සාගර කාරියවසම් මන්ත්‍රීවරයා පැවසුවේය.

එහිදී වැඩිදුරටත් අදහස් දක්වමින් මේ සම්බන්ධයෙන් තවම ඇත්තේ මූලික එකඟතාවක් පමණක් හෙයින් ගිවිසුම සකස් කිරීමට පෙර සියලු පක්ෂවල නිර්දේශ ඉදිරිපත් කරන්නැයිද මුදල් ඇමැතිවරයා එම රැස්වීමේදී පැහැදිලිවම ප්‍රකාශ කළ බව පැවසූ සාගර කාරියවසම් ඒ ආකාරයට සද්භාවයෙන් සහ නම්‍යශීලීව කටයුතු කරන අවස්ථාවක මේ පිරිසේ හැසිරීම පිළිගත නොහැකි බවද අවධාරණය කළේය.

තවත් කොවිඩ් මරණ 17ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

ඒ අනුව, මෙරටින් මේ දක්වා වාර්තා වී ඇති මුළු කොවිඩ් මරණ ගණන 13,760කි.

සෞඛ්‍ය අංශ පෙන්වා දෙන්නේ එම මරණ ඊයේ (31) සිදුව ඇති බවය.

එම මරණ අතරට කාන්තාවන් 06 දෙනෙකු සහ පිරිමි පුද්ගලයින් 11 දෙනෙකු අයත්ය.

තමාට හිමි තානාපති වරප්‍රසාද අහිමි කිරීමට අදාළව, අමෙරිකාවේ හිටපු ශ්‍රී ලංකා තානාපති ජාලිය වික්‍රමසූරිය විසින් ගොනු කළ රිට් පෙත්සමක් විභාගයට නොගෙන ප්‍රතික්ෂේප කිරීමට අභියාචනාධිකරණය කළ නියෝගය අභියෝගයට ලක්කරමින් ඔහු විසින් ගොනු කළ අභියාචන පෙත්සම ශ්‍රේෂ්ඨාධිකරණය නිෂ්ප්‍රභ කර ඇත.

මෙම අභියාචන පෙත්සමේ වගඋත්තරකරුවන් ලෙස නම් කර තිබුණේ විදේශ කටයුතු අමාත්‍යවරයා, නීතිපතිවරයා ඇතුළු පිරිසක් වන අතර අදාළ තීන්දුව අද (01) නිකුත්කර ඇත.

2018 මාර්තු මස 29 දා ජාලිය වික්‍රමසූරිය අභියාචනාධිකරණයට ගොනු කළ රිට් පෙත්සම නීතිපතිවරයා ඉදිරිපත් කළ මූලික විරෝධතා පිළිගැනීමෙන් අනතුරුව ප්‍රතික්ෂේප කරනු ලැබිණ.

ඒ අනුව අභියාචනාධිකරණය නිකුත් කළ නියෝගය නිවැරැදි බවට ශ්‍රේෂ්ඨාධිකරණ විනිසුරු විජිත් මලල්ගොඩ, කුමුදිනී වික්‍රමසිංහ සහ මහින්ද සමයවර්ධන යන ත්‍රිපුද්ගල විනිසුරු මඩුල්ල තීරණය කළ අතර පෙත්සම රුපියල් 50,000 ක නඩු ගාස්තුවකට යටත්ව ප්‍රතික්ෂේප කර තිබේ.

මිනිසුන් ස්වභාවධර්මයට එරෙහිව ක්‍රියා කරනවාට වඩා ඒ සමග සමපාත විය යුතු බවත් සොබාදහමට එරෙහි නොවන නව කෘෂිකාර්මික විප්ලවයක් අවශ්‍ය බවත් ජනාධිපති ගෝඨාභය රාජපක්ෂ මහතා අවධාරණය කරනවා

ස්කොට්ලන්තයේ ග්ලාස්ගො හි දී පැවැත්වෙන COP :26 එක්සත් ජාතීන්ගේ දේශගුණික විපර්යාස පිළිබඳ සමුළුවට සමගාමීව “නයිට්‍රජන් නැවත සොයා ගැනීම : දේශගුණික විපර්යාස, සෞඛ්‍ය ජෛව විවිධත්වය සහ චක්‍රීය ආර්ථිකය සඳහා විසඳුම් සහ ක්‍රියාකාරීත්වය” තේමාව යටතේ ශ්‍රි ලංකාව සංවිධාන කළ විශේෂ සම්මන්ත්‍රණය අමතමින් ජනාධිපතිවරයා මේ බව සඳහන් කළා.

එරට වේලාවෙන් ඊයේ (31) ප.ව 5.00 ට මෙම සම්මන්ත්‍රණය පැවැත්විණ.

සිය රජයේ ප්‍රතිපත්ති රාමුව තිරසර සංවර්ධනය බව මෙහිදී අවධාරණය කළ ජනාධිපතිවරයා දේශගුණික විපර්යාස පිළිබඳ එක්සත් ජාතීන්ගේ සම්මුතිය වෙනුවෙන් ශ්‍රී ලංකාවේ යාවත්කාලීන කළ ජාතික නිර්ණයන් සහ අභිලාෂයන්ගෙන් ඒ බව මනාව පිළිබිඹු වන බව සඳහන් කළා.

නවීන විද්‍යාත්මක ශිල්පීය ක්‍රමවේද සහ හුරුපුරුදු භාවිතයන් තුළින් පරිසරය විනාශ නොකොට කෘෂිකාර්මික නිෂ්පාදන ඉහළ නැංවීම අප හමුවේ ඇති අභියෝගයක්. දශක ගණනාවක් පුරා නිදන්ගත වකුගඩු රෝගය ශ්‍රී ලංකාවේ ගොවි ජනතාව අතර බරපතළ ගැටලුවක් වී තිබෙනවා. රසායනික පොහොර අධික ලෙස භාවිත කිරීම මීට ප්‍රමුඛ හේතුවක් බව පෙන්වා දුන් ජනාධිපතිවරයා රසායනික පොහොර ආනයනය අවම කිරීමටත්, කාබනික කෘෂිකර්මාන්තය දැඩි ලෙස දිරිමත් කිරීමටත් තම රජය පියවර ගත්තේ මෙම සන්දර්භය තුළ බව කියා සිටියා.

මෙම ක්‍රියාව පුළුල් ඇගයීමට ලක්ව ඇතත්, ඊට විවේචන සහ විරෝධතා එල්ල වී තිබෙනවා. රසායනික පොහොර සඳහා සහාය දක්වන කණ්ඩායම්වලට අමතරව, අස්වැන්න වැඩි කර ගැනීමේ පහසු මාධ්‍යයක් ලෙස පොහොර අධික ලෙස භාවිතා කිරීමට පුරුදු වී ඇති ගොවීන්ගෙන් මෙම විරෝධතා පැමිණ ඇති අතර, ශ්‍රී ලාංකීය පොහොසත් කෘෂිකර්මික උරුමය සලකා බැලීමේ දී මෙය ඉතා අවාසනාවන්ත තත්ත්වයක් බව ද ජනාධිපතිවරයා සඳහන් කළා.

පරිසරය පිළිබඳ ශ්‍රී ලංකාවේ ප්‍රගිතිශීලි න්‍යාය පත්‍රය ක්‍රියාත්මක වන්නේ, සංවර්ධනය වෙමින් පවතින ජාතියක් ලෙස එයට මුහුණදෙන සම්පත් බාධක මාධ්‍යයේ බව පැවසූ ජනාධිපතිවරයා සංවර්ධන වැඩසටහන් සමගින් එවැනි න්‍යාය පත්‍රයක් පවත්වාගෙන යාම විශේෂයෙන් කොවිඩි වසංගතයෙන් පසුව, සංවර්ධනය වෙමින් පවතින සියලුම ජාතීන්ට අභියෝගාත්මක බව ද පෙන්වා දුන්නා.

සංවර්ධිත රටවල් මගින් එවැනි ජාතීන්ට සංවර්ධන ආධාර, තාක්ෂණ හුවමාරු කිරීම්, කුසලතා සංවර්ධනය, ආයෝජන සහ මූල්‍ය සහාය හරහා ඔවුන්ගේ උපරිම සහයෝගය ලබා දෙනු ඇති බවට විශ්වාසය පළ කළ ජනාධිපතිවරයා මෙහිදී ව්‍යාපාර සඳහා සැලකිය යුතු කාර්යභාරයක් පවතින අතර තිරසර සංවර්ධනය සඳහා ආයෝජන කිරීමේ දී සැලකිය යුතු ප්‍රතිලාභයක් ලැබිය යුතු බව ද සඳහන් කළා.

අද ජීවත්ව සිටින අප සියලුදෙනා මේ මිහිතලයේ භාරකරුවෝ වන්නේ අනාගත පරපුර වෙනුවෙන් බව පැවසූ ජනාධිපතිවරයා හැකි අයුරින් ඊට දායක වෙමින් සෞඛ්‍ය යහපත තහවුරු කිරීමට සියලු දෙනා එක්ව කටයුතු කළ යුතු බවද කියා සිටියා.

සියලු දෙනා සාමුහිකත්වයෙන් සහ සයෝගයෙන් මෙය ඉටුකරන්නේ නම් ජනතාවට සහ පෘථිවියට ධනාත්මක වෙනසක් උදාකර දිය හැකි බව ද ජනාධිපතිවරයා සඳහන් කළා.

හරිත කෘෂිකර්මාන්තයට 100%ක්ම පරිවර්තනය වීමට තීරණය කළ ලොව පළමු රට බවට ශ්‍රී ලංකාව පත්ව සිටින බව සම්මන්ත්‍රණයට පැමිණ සිටි විදේශ නියෝජිතයන් පිළිගනිමින් පරිසර අමාත්‍ය මහින්ද අමරවීර මහතා පැවසුවා.

දේශගුණික විපර්යාස සඳහා තිරසර විසඳුම් සහිත හරිත – සමාජ ආර්ථිකයක් නිර්මාණය කිරීම එහි අරමුණ බව ද අමාත්‍යවරයා කියා සිටියා.

ඉතිහාසයේ සිටි සහ වර්තමානයේ ජීවත්වන සියලු විද්‍යාඥයන් නයිට්‍රජන් සම්බන්ධව කරන ලද සොයා ගැනීම් අගය කළ අමාත්‍යවරයා නයිට්‍රජන් සොයා ගැනීමෙන් සියවස් ගණනාවකට පසු ශ්‍රී ලංකාව ද එම අභියෝගය ජය ගනිමින් සිටින බව සඳහන් කළා.

(Lanka lead )