පුවත්

ඉදිරි මැතිවරණයේ දී ජාතික ලැයිස්තුවෙන් 50%ක නියෝජනයක් කාන්තාවන් ට ලබාදිය යුතු බව පිවිතුරු හෙළ උරුමය යෝජනා කර ඇත.

පිවිතුරු හෙළ උරුමය පක්ෂය මෙසේ යෝජනා කර ඇත්තේ මැතිවරණ ප්‍රතිසංස්කරණ සඳහා වන පාර්ලිමේන්තු කාරක සභාවටය.

එමෙන්ම අපේක්ෂක ලැයිස්තුවෙන් 25%ක නියෝජනයක් කාන්තාවන් ට ලබාදිය යුතු බව පිවිතුරු හෙළ උරුමය වෙනුවෙන් අමාත්‍ය උදය ගම්මන්පිල යෝජනා කර ඇතැයි වාර්තා වේ.

පාර්ලිමේන්තු විශේෂ කාරක සභාව අමාත්‍ය දිනේෂ් ගුණවර්ධනගේ ප්‍රධානත්වයෙන් පවත්වා ඇති අතර, එහිදී අදහස් දක්වමින් ගම්මන්පිල අමාත්‍යවරයා පවසා ඇත්තේ, ප්‍රචාරණයේ දී පෝස්ටර් තහනම ඉදිරියේ දී ද පවත්වා ගෙන යා යුතු බවය.

එමෙන්ම මැතිවරණයේ දී අපේක්ෂකයින් වියදම් කරන මුදල් ප්‍රමාණය පිළිබඳ සීමාවක් ඇති කළ යුතු බවත්, මැතිවරණයෙන් පසු මාස තුනක් ඇතුළත වියදම් කළ මුදල් ප්‍රමාණය ප්‍රසිද්ධියට පත්කර මුදල් පරිත්‍යාගවල ප්‍රභවය සඳහන් කළ යුතු බවත් ඔහු වැඩිදුරටත් සඳහන් කර ඇති බවත් වාර්තා වෙයි.

ජනාධිපතිවරයා පත්වීමේ වාර ගනන පිළිබඳව ද මැතිවරණ කොට්ඨාසය සීමා නිර්ණය කිරීමේ දී අවධානය යොමුකළ යුතු බව උදය ගම්මන්පිල අමාත්‍යවරයා පැවසූ බවත් වාර්තා වෙයි.

කෙසේ වුවත් මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ 20 සංශෝධනයට අත ඉස්සූ පිවිතුරු හෙළ උරුමය පක්ෂය මේ කර ඇති යෝජනා වැදගත් බවයි.

ඒවා ධනාත්මක ලෙස බාර ගතයුතු බවත් වත්මන් ආණ්ඩුව ලබා ඇති ජනතා අප්‍රසාදය හමුවේ සිය පැවැත්ම වෙනස් වටයකින් තහවුරු කර ගැනීමට ගන්නා උත්සාහයක් ලෙසත් ඔවුන් මෙය හඳුන්වයි.

කොළඹ විශ්වවිද්‍යාලයේ කුලපති ධූරය දැරීම සඳහා තමන් වහන්සේට සුදුසු කමක් නැතැයි නාරාහේන්පිට අභයාරාමාධිපති පූජ්‍ය මුරුත්තෙට්ටුවේ ආනන්ද හිමි සඳහන් කළ සේක.

ඒ ස්වාධීන රූපවාහිනියේ වැඩසටහනට එක්වූ උන්වහන්සේගෙන් මාධ්‍යවේදියා කළ විමසීමකට ප්‍රතිචාර දක්වමින් ය.

එහිදී උන්වහන්සේ මෙසේ සඳහන් කර සිටියහ.

‘ඇත්ත වශයෙන්ම ඒකට සුදුසුමක් නෑ. සුදුසුකමක් තියෙන නිසා නේද ජනාධිපති තුමා ඒකට පත් කරන්න ඇත්තේ. සුදුසුකමක් නැත්තං දෙයිද. ඒක එතුමාගෙන් අහන්න ඕනි මගෙන් නෙවෙයි’

කෙසේ වුවත් මේ වන විට කොළඹ විශ්වවිද්‍යාලයේ ආචාර්ය සංගම් සහ මහා ශිෂ්‍ය සංගමය අදාළ පත්කිරීම අවලංගු කරන ලෙස ජනාධිපති ගෝඨාභය රාජපක්ෂ වෙතින් ඉල්ලා ඇත.

එමෙන්ම ආණ්ඩු හිතවාදී රජයේ වෛද්‍ය නිලධාරීන්ගේ සංගමය ත් ඊට විරෝධය පලකරනවා මාධ්‍ය හමුවකදී අසන්නට ලැබිණ.

ස්වාධීන රූපවාහිනී සේවය සිදුකළ සම්මුඛ සාකච්ඡාව පහත දැක්වෙයි.

රාජ්‍ය අමාත්‍ය සීතා අරබෙපොල විසින් පත් කරන ලද සභාපති එරංග බස්නායක යටතේ 2021 දෙවන වාරයට ශිෂ්‍ය බඳවා ගැනීම් ඉලක්කයෙන් 10% ක් වත් ලගා කර ගැනීමට අපොහොසත් වී ඇති බව වෘත්තීය පුහුණු අධිකාරිය සුරැකීමේ එකමුතුව චෝදනා කරයි.

එම පාර්ශ්වය සඳහන් කරන ආකාරයට මේ තත්වය උදා වී තිබෙන්නේ, හිටපු සභාපති දමිත වික්‍රමසිංහ කොවිඩ් තත්වය මධ්‍යයේ වුවද 2020 සහ 2021 වාරයන් වල 93% කට වඩා බදවා ගැනීම් සාර්ථකව සිදුකර යහපත් මට්ටමේ තිබූ පසුබිමකය.

මතුව ඇති තත්ත්වය ආයතයක් විනාශ මුඛයට ඇද දැමීමක් ලෙස ඔවුන් පවසයි.

එසේම වත්මන් සභාපති එරංග බස්නායක, දක්ශ නිලධාරීන් සියල්ලගෙන් හිටපු සභාපතිගේ මිනිස්සු යැයි පවසමින්, ඇමතිවරියගේද ආශිර්වාද ඇතුව ගෙන ගිය ක්‍රියාකලාපය මේ තත්ත්වය ඇතිවීමට මූලිකව බලපෑ බවත් ඔවුන් පවසයි.

වැඩිදුරටත් දැනගන්නට ඇති ආකාරයට ශිෂ්‍ය බදවා ගැනිම් අංශයේ අධ්‍යක්ශක සමන් කුලසූරිය ඇතුලු ඉහල නිලධාරීන් සියල්ලම පාහේ ආයතනයටම සමුදී ඇත.

එමෙන්ම දක්ශ ලෙස දිස්ත්‍රික්ක මෙහෙයවූ නිලධාරීන් සථාන මාරු ලබදී යාන්ත්‍රනය විනාශ කරගෙන ඇත.

එමෙන්ම දක්ශ තොරතුරු තාක්ශණ උපදේශකවරුන් සියල්ලම පාහේ ආයතනය හැර ගොසින්ය.

මේ සියල්ලම මෙසේ සිදුවී ඇත්තේ අන්ත දූෂිත අල්ලස් කොමිසමේ විභාගයන්ට යටත්ව සේවයෙන් ඉවත් කර සිටි අධ්‍යක්ෂක ජෙනරාල් චූලංගනී පෙරේරා සේවයේ නැවත පිහිටුවා වගේම ඉතිහාසගත දූශිත නිලධාරියකු වන පාලන අධ්‍යක්ෂක ඩබ්ලිව්. රණවීරගේ කීම මත බවත් ඔවුන් චෝදනා කරයි.

මෙම රණවීර නම් දූෂිත නිලධාරියා 60 ඉක්මවූ පසුවද කැබිනට් පත්‍රිකාවක් මගින් සේවා දිගුවක් ලබා දීමට ඇමතිවරිය කටයුතු කරමින් ඇති බවත් පැවසේ.

තවදුරටත් වාර්තා වන ආකාරයට , 2021 වසරට 35,000 ක මධ්‍යස්ථාන ගත පුහුණුලාබීන් හා 35,000 ක මාර්ගගත පුහුණු ලාබීන් බදවා ගැනීමට හිටපු සභාපතිවරයා කටයුතු සූදානම් කර ඔහු අවසන් වරට සිටි 2021 පලමු වාරයේදීම සිසුන් 17,000 කට වඩා මධ්‍යස්ථාන ගත පුහුණුවටත් තවත් 10,000ක් මාර්ගගත පුහුණුවටත් බදවාගෙන තිබුනි.

නමුත් මෙවර 18,000 ඉලක්කයෙන් බදවාගෙන ඇත්තේ 1980 කි. එය 10% ක අගයෙකි.

1994 දී වත්මන් අගමැති මහින්ද රාජපක්ෂ විසින් දැයට දයාද කල ශ්‍රී ලංකාවේ දැවන්තම වෘත්තීය පුහුණු ආයතනයට කණ කොකා හැඩීම රටේම අභාග්‍යක් බවත් වෘත්තීය පුහුණු අධිකාරිය සුරැකීමේ එකමුතුව පවසයි.

මේ සම්බන්ධයෙන් ඔවුන් අග්‍රාමාත්‍ය මහින්ද රාජපක්ෂ දැනුවත් කිරීමට කටයුතු කරමින් ඇති බවත් වාර්තා වෙයි.

කොවිඩ් ආසාදිත වූ තවත් රෝගීන් 16 දෙනකු ඊයේ (9) මරණයට පත් වී ඇතැයි සෞඛ්‍ය සේවා අධ්‍යක්ෂ ජනරාල්වරයා අද (10) තහවුරු කළේය.

ඒ සමඟ මෙරටින් වාර්තා වූ මුළු කොරෝනා ආසාදිත මරණ සංඛ්‍යාව 13,908 දක්වා ඉහළ ගොස් ඇත.

වයස අවුරුදු 60 ට වැඩි 14 දෙනකු සහ අවුරුදු 30 ත් 59 ත් අතර දෙදෙනකු මියගිය අය අතර වන බව සෞඛ්‍ය සේවා අධ්‍යක්‍ෂ ජනරාල්වරයාගේ වාර්තාවේ දැක්වේ.

එමෙන්ම පිරිමි අය 8 දෙනකු සහ කාන්තාවන් 08 දෙනකු මියගිය පිරිසට ඇතුළත් බව ද එම වාර්තාවේ සඳහන් වේ.

ඉන්දියාවෙන් ආනයනය කරනු ලබන නැනෝ නයිට්‍රජන් දියර පොහොරවලින් කෘෂිකර්ම අමාත්‍ය මහින්දානන්ද අලුත්ගමගේ මහතා කොමිස් ලබා ගන්නා බවට පාර්ලිමේන්තු මන්ත්‍රී පාඨලී රණවක මාධ්‍ය හමුවකදී කරන ලද චෝදනාවට එරෙහිව විධිමත් පරික්ෂණයක් සිදු කරන ඉල්ලා අමාත්‍ය මහින්දානන්ද අලුත්ගමගේ අද (10) කොළඹ අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළේය.

මේ සම්බන්ධයෙන් අමාත්‍යවරයාගේ මාධ්‍ය ලේකම් නිවේදනයක් නිකුත්කර ඇති අතර එහි මෙසේද සඳහන් වෙයි.

විපක්ෂ මන්ත්‍රීවරු විටින් විට අසත්‍ය කරුණු පදනම් කර ගෙන ආණ්ඩුවට චෝදනා කිරීම අසාධාරණ බවත්, තමන් කෘෂිකර්ම අමාත්‍යවරයා ලෙස කිසිඳු වංචාවකට හෝ කොමිස් ලබා ගැනීමකට සම්බන්ධ නැති බවත්, ඒ නිසා තමා සමිබන්ධයෙන් පාඨලී රණවක මන්ත්‍රීවරයා සිදු කර ඇති ප්‍රකාශය සම්බන්ධයෙන් විධිමත් පරික්ෂණයක් සිදු කර ඔහුට විරුද්ධව නීතිය ක්‍රියාත්මක කරන ලෙස අපරාධ පරීක්ෂණ දෙපාර්තමේන්තුවෙන් ඉල්ලා සිටි බවද කෘෂිකර්ම අමාත්‍යවරයා කීවේය.

“අපි ඉන්දියාවෙන් රැගෙන ආවේ නැනෝ නයිට්‍රජන් දියර පොහොරයි. චම්පික රණවක මන්ත්‍රීවරයා සඳහන් කරන්නේ නැනෝ යුරියා පොහොර අපි ගෙනාවා කියලයි. අපි එහෙම පොහොර ලංකාවට ගෙනල්ලා නෑ. අනෙක මේ පොහොර ගෙන්වන ගණුදෙනුව විනිවිදභාවයෙන් යුතුව අපි සිදු කර තිබෙනවා. ඒ නිසා ඕනෑම කෙනෙකුට ඒ පිළිබඳ තොරතුරු සොයා බලන්න පුළුවන්” යැයිද අමාත්‍යවරයා සඳහන් කළේය.

PCR ගේ අභියෝගය !

කෙසේ වුවත් මේ ආකාරයට චෝදනාව සම්බන්ධයෙන් අපරාධ පරීක්ෂණ දෙපාර්තමේන්තුව වෙත යන බව කෘෂිකර්ම අමාත්‍ය මහින්දානන්ද අලුත්ගමගේ පසුගියදා පාර්ලිමේන්තුවේදී සඳහන් කළ අතර ඊට එදිනම හිටපු අමාත්‍ය පාඨලී චම්පික රණවක ප්‍රතිචාර දැක්වීය.

ඒ සාධාරණ විමර්ශනයක් සිදුවන්නේ නම් තමන් සතු තොරතුරු ද ලබාදිය හැකි බව පවසමිනි.

අසරණ පුරවැසියන්ගේ බදු මුදල කෝටි ගණනක් වියදම් කරත් ජපානයේ ශ්‍රී ලංකා තානාපති සංජිව් ගුණසේකර ගේ කාර්‍ය සාධනය කිසිසේත් ප්‍රමාණවත් නොවන බවට චෝදනා නැගෙයි.

ආසන්නතම නිදර්ශනය ලෙස වාර්තා වන්නේ පසුගියදා අසාර්ථක ලෙස අවසන් කරගත් සංචාරක ප්‍රවර්ධනය කියා පැවැත්වූ Webiner යයි.

ජපන් සංචාරක ආයතන 1300ක් හෝ ඊට ආසන්න ප්‍රමාණයක් එකතුකොට පවත්වන බවට ප්‍රසිද්ධ ප්‍රකාශ නිකුත්කර තිබුණත් අදාළ Webiner වට සහභාගීවී ඇත්තේ 115 ක් පමණ බවත් වාර්තා වෙයි.

දැනගන්නට ඇති ආකාරයට webiner ආරම්භවී පැය භාගයක් යන්නට පෙර මෙම සහභාගි වූ පිරිසෙන්ද අඩක් පමණ ඉවත්වගොස් තිබේ.

එසේම ඉතිරිවූ පිරිසෙන්ද බහුතරයක් මෙරට සංචාරක මගපෙන්වන්නන් බවත් වාර්තා වෙයි.

කෙසේ හෝ වේවා අවසානයේ තානාපති සහභාගිවූවන්ට ස්තූති කිරීමට හෝ ඉදිරිපත්ව නැති බවත් පැවසෙයි.

මේ සම්බන්ධයෙන් තතුදත් පිරිස් පවසන්නේ ජපානයේ ශ්‍රී ලංකා තානාපති කාර්‍යාලයේ පවත්වන සාද තරමට අනෙක් කටයුතු සාර්ථක කරගන්නට තානාපතිට හැකි නම් ඒ වැදගත් බවයි.

එසේම තානාපති කාර්‍යාලයේ කාර්‍ය කටයුතුද මේ වන විට අඩාල කරගෙන ඇති බවත් චෝදනා නැගී තිබේ.

එසේම සාදයක් සංවිධානය කිරීමේ උනන්දුව තානාපති සේවයේ වැඩ රාජකාරි වෙනුවෙන් යොමුකිරීම අත්‍යවශ්‍ය බව තානාපති සංජිව් ගුණසේකර තේරුම් ගතයුතු බවත් ඔවුන් පවසයි.

අදාළ ආරංචි මාර්ග වැඩිදුරටත් පවසන්නේ ජපානයේ වෙසෙන ශ්‍රී ලාංකික ජනතාවත්, තානාපති කාර්‍යාල සේවක පාර්ශ්වත් තානාපති රාජකාරි සම්බන්ධයෙන් කිසිදු පැහැදීමක් නොමැතිව සිටින බවයි. එසේම මේ සම්බන්ධයෙන් මේ වන විට විදෙස් අමාත්‍යංශය දැනුවත් කරන්න කටයුතු සිදුවෙමින් ඇති බවත් වාර්තා වෙයි.

විශේෂ වාර්තාකරුවෙකු විසිනි

නායයෑම් අවදානම් ස්ථානවලින් ඉවත් නොවන පුද්ගලයින් පොලීසිය හා අධිකරණ ක්‍රියාමාර්ග තුළින් බලය යොදා ඉවත් කරන බව ආපදා කළමනාකරණ මධ්‍යස්ථානයේ අධ්‍යක්ෂ ජනරාල් මේජර් ජෙනරල් සුදන්ත රණසිංහ පවසයි.

අධ්‍යක්ෂ ජනරාල්වරයා මේ බව සඳහන් කළේ අද (11) ප්‍රවෘත්ති දෙපාර්තමේන්තුවේ පැවති මාධ්‍ය හමුවේදීය.

ඒ අනුව උපදෙස් නොතකා රැඳී සිටින පිරිස් පොලීසියේ සහයෙන් ඉවත් කිරීමට දිසාපතිවරුන්ට අවසර දී තිබෙන බවයි රණසිංහ  පැවසුවේය.

''ජනතාවට දෙන්න තියෙන අවසන් පණිවිඩය තමයි කරුණාකරලා ලබා දී තිබෙන උපදෙස් අනුව කටයුතු කරන්න.අවවාද පිළිගන්න. ඉවත් වෙන්න කියල දැනුවත් කළාම වහාම ඉවත් වෙන්න. කඳු තරණය කරන්න විනෝද වෙන්න යන්න එපා. නායේ යෑම් ගැන රතු නිවේදන නිකුත් කරලා තියෙද්දී ඉවත් වෙන්නේ නැති කණ්ඩායම් ඉන්නවා නම් ඉතාමත් පැහැදිලිවම පොලිස්පතිතුමාටත් මේ ගැන දැනුවත් කරලා තිබෙනවා. අවවාද පිළිනොගන්නේ නම් ඉවත් නොවන්නේ නම් දිසාපතිවරුන්ට බලය පවරලා තියෙනවා අනිවාර්යයෙන්ම පොලීසිය යොදවල උසාවි මාර්ගයෙන් බලහත්කාරයෙන් හෝ ඉවත් කිරීමට සිදුවෙනවා. ජාතික ආරක්ෂාව අනුව එය කරන්න සිදුවෙනවා. ජනතාවගේ කැමැත්තෙන් හෝ අකමැත්තෙන් මහජන ආරක්ෂාව ලබා දීම අපේ වගකීම. '' යනුවෙන් අධ්‍යක්ෂවරයා තවදුරටත් පැහැදිලි කරන ලදී.

මේ අතර නුවරඑළිය,කළුතර,බදුල්ල,ගාල්ල,මන්නාරම,ගම්පහ,යාපනය යන ප්‍රදේශ වල සහන මධ්‍යස්ථාන ක්‍රියාත්මක අතර ඒවාට අවශ්‍ය සියලු දේවල් ලබා දීමට කටයුතු යොදා තිබෙන බවත් ආපදාවට ලක්වූ 62240ටම ප්‍රාදේශීය ලේකම් කොට්ඨාස මට්ටමෙන් හා ග්‍රාම නිලධාරී කොට්ඨාස මට්ටමෙන් ලබා දිය යුතු ආහාර පාන ඇතුළු සහන ලබා දීමට කටයුතු යොදා ඇති බවත් සුදත්ත රණසිංහ කියා සිටියේය.

එළඹෙන අයවැයෙන් යෝජිත වැටුප (වැටුප් විෂමතාව යෙන් 1/3 කොටස) එකවර ලබාදීමට අග්‍රාමාත්‍යවරයාගේ ප්‍රධානත්වයෙන් පැවති සාකච්ඡාවේදී මුදල් අමාත්‍යවරයා එකඟ වී ඇති බව ගුරුසම්ගම් නායකයෝ පවසති.

ශ්‍රී ජයවර්ධනපුර පාර්ලිමේන්තු සංකීර්ණයේ අද පැවැති සාකච්ඡාවේදී ඇමැති අනුකමිටුව ඉදිරිපත් කර ඇති වැටුප් වැඩිවීම එකවර ලබාදීමටත් එම වැඩි කිරීම අයවැයෙන් ලබාදීමටත් අග්‍රාමාත්‍යවරයා පොරොන්දු වූ බව ලංකා ගුරු සංගමයේ ප්‍රධාන ලේකම් ජෝසප් ස්ටාලින් පවසයි.

ගුරු හා විදුහල්පති වෘත්තීය සමති සංධානය ඉල්ලා සිටි ප්‍රධාන ඉල්ලීම එමගින් ඉටුවන බව ද ස්ටාලින්  කීය.

කෙසේවෙතත් අයවැයට තවත් දින දෙකක් තිබෙන අතර අද ලබා දුන් පොරොන්දුව අයවැයේදී නිල වශයෙන් ප්‍රකාශ කරන්නේද යන්න ගැන බැලිය යුතු බවයි මහින්ද ජයසිංහ කියා සිටියේය.

එක රටක් සහ එක නීතියක් සඳහා වූ ජනාධිපති කාර්යය සාධක බළකායක් පත්කරමින් ජනාධිපති ගෝටාබය රාජපක්ෂගේ අත්සනින් නිකුත්කළ ගැසට් නිවේදනය ආපසු හරවා සංශෝධන කිහිපයක් සිදුකර ඇත.

පළමු ගැසට් නිවේදනය ඔක්තෝබර් 10/26 වනදා නිකුත් කළ අතර ,එම ගැසට් නිවේදනයට සංශෝධන රැසක් සිදුකරමින් නව ගැසට් පත්‍රයක් 11/06 දාතමින් ඊයේ (09) මධ්‍යම රාත්‍රියේ නිකුත් කර තිබේ.

ඒ අනුව එම කාර්ය සාධක බලකායේ සාමාජිකව සිටි මහාචාර්ය දයානන්ද බණ්ඩා සහ කථිකාචාර්ය මොහොමඩ් ඉන්තිකාබ් යන දෙදෙනා නව සංශෝධනයට නොමැත.

ඒ බව වාර්තා වන්නේ ඔවුන් ඉල්ලා අස්වී ඇති ලෙසය.

එමෙන්ම එහි නව සාමාජිකයන් ලෙස රාමලිංගම් චක්‍රවර්ති කරුණානරන්, යෝගේෂ්වරී පත්ගුණරාජා සහ අයියාම්පිල්ලෙයි දයානන්දරාජා යන තිදෙනා පත්කර තිබේ.

එම ජනාධිපති කාර්ය සාධක බලකාය පිහිටුවමින් නිකුත් කළ පළමු ගැසට් නිවේදනයේ සඳහන් වන පරිදි, “01 ශ්‍රී ලංකාව තුළ එක රටක්, එක නීතියක් ක්‍රියාත්හක කිරීම සම්බන්යෙන් අධ්‍යයනය කර ඒ සඳහා පනත් කෙටුම්පතක් සකස් කිරීම”

“02. අධිකරණ අමාත්‍යාංශය විසින් මේ වනවිට මෙයට අදාළව සකස් කර ඇති නීති කෙටුම්පත් හා සංශෝධනයන් අධ්‍යයනය කොට ඒවායේ යෝග්‍යතාවය හා සුදුසු සංශෝධන වේ නම් ඒ සඳහා යෝජනා ඉදිරිපත් කිරීම හා යෝග්‍ය පරිදි අදාළ කෙටුම්පතට ඇතුළත් කිරීම.” එහි මූලික කාර්ය භාර්යය වන නමුත් ජනාධිපතිවරයාගේ දෙවන ගැසට් නිවේදනය මගින් එයද සංශෝධනය කර තිබේ.

දෙවන ගැසට් නිවේදනය අනුව එහි කාර්යය “ශ්‍රී ලංකාව තුළ “එක රටක් එක නීතියක්” යන සංකල්පය ක්‍රියාත්මක කිරීම සම්බන්ධයෙන් විවිධ පාර්ශවයන් දරන අදහස් හා මතවාදයන්ද සැලකිල්ලය ගනිමින් එකී සංකල්පය අධ්‍යයනය කිරීමෙන් අනතුරුව ඒ සඳහා ශ්‍රී ලංකාවට ආවේනික වූ සංකල්පමය රාමුවක් සකස් කිරීම සම්බන්ධයෙන් යෝජනා ඉදිරිපත් කිරීම.” ලෙස සංශෝධනය කර ඇත.

අදාළ නව ගැසට් සංශෝධනය පහත දැක්වෙයි.

ශ්‍රී ලංකා නිදහස් පක්ෂය ආණ්ඩුවට දැනට ඉල්ලීම් ඉදිරිපත් කරන පක්ෂයක් වුවද ඉදිරියේ දී ආණ්ඩුවට කොන්දේසි දමන පක්ෂය බවට පත් වන බව එම පක්ෂයේ උප සභාපති පාර්ලිමේන්තු මන්ත්‍රී ශාන් විජයලාල් ද සිල්වා සඳහන් කරයි.

ආණ්ඩුවේ ප‍්‍රබලම හවුල්කාර පක්ෂය ශ්‍රී ලංකා නිදහස් පක්ෂය වුවද ඒ සඳහා නිසි තැන මේ ආණ්ඩුව ලබාදී නැතැයි ද ඔහු චෝදනා කළේය.

පක්‍ෂයට නිතරම ලැබෙන්නේ අඩු සැලකිල්ලක් බවත් ඔහු පැවසූ අතර ඒ ඌරගස්මංහන්දිය ප්‍රදේශයේ පැවති ජන හමුවක් අමතමිනි.

එම තත්ත්වය මත ඉදිරියේදී ආණ්ඩුවට කොන්දේසි දමන පක්ෂයක් බවට පක්ෂය පත් කරවන බවද පැවසූ ඔහු ඒ සඳහා නිසි වේලාව පැමිණි විට ක්‍රියාමාර්ග ගන්නා බවත් දැනට කලබලයක් හදිසියක් නැති බවත් සඳහන් කළේය.

සෞඛ්‍ය සේවා අධ්‍යක්ෂ ජනරාල්වරයා විසින් තවත් කොරෝනා මරණ 17 ක් අද (9) වාර්තා කරනු ලැබීමත් සමග සමස්ත මරණ සංඛ්‍යාව 13,892 ක් දක්වා ඉහළ ගියේ ය. රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 10 දෙනෙකු පිරිමි පුද්ගලයින් වන අතර ඉතිරි 07 දෙනා කාන්තා ආසාදිතයින් ය.

මියගිය අය අතර වයස අවුරුදු 30ට අඩු එක් ආසාදිතයෙකු ද වේ.

වයස අවුරුදු 30 – 59 ත් අතර වයසේ පසුවන ආසාදිතයින්‍ 2 දෙනෙකු සිටින අතර ඉතිරි ආසාදිතයින් 14 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (09) වාර්තා කරන ලද මෙම මරණ 17 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.

විශ්‍රාමිකයින් සඳහා ක්‍රියාත්මක කිරීමට යෝජිත අග්‍රහාර රක්ෂණ යෝජනා ක්‍රමයට අදාළ චක්‍රලේඛය තාවකාලිකව අත්හිටුවා ඇතැයි රාජ්‍ය සේවා පළාත් සභා හා පළාත් පාලන අමාත්‍යංශය පවසයි.

රටේ පවතින උසස් පෙළ රටේ තරුණයන්ගේ අනාගතය කා දමන විනාශ කාරී අනවශ්‍ය ක්‍රමයක් බව අධ්‍යාපන හා උසස් අධ්‍යාපන අමාත්‍යාංශයේ හිටපු උපදේශකයකු වන කථිකාචාර්ය දිලන්ත විතානගේ පවසයි.

කොළඹ විශ්වවිද්‍යාලයේ පරිගණක විද්‍යා අධ්‍යාපනය පිළිබදව හිටපු කථිකාචාර්යකු වන ඔහු 2000 දී පාසල් පද්ධතියට තොරතුරු හා සන්නිවේදන තාක්ෂණ විෂය හදුන්වාදීමට නායකත්වය ලබාදුන් අයෙකි.

ඔහු අමාත්‍යංශ රැසක හා ආයතන රැසක උපදේශක ලෙස කටයුතු කර ඇත.

දිලන්ත විතානගේ ජාතික උපාධි මධ්‍යස්ථානයේ සේවය කරන අතර, අවශ්‍ය=  ඕනෑම කෙනෙකුට උසස් අධ්‍යාපන අවස්ථා ලබා දිමේ අයිතිය තහවූරු කිරීම සදහා "සැමට උපාධියක්" තේමාව ප්‍රවර්ධනයට නායකත්වය දෙනු ලබයි

අන්තර්ජාල සාකච්ඡාවක දී ඔහු මෙම අදහස් පළ කළේය.

O/L වලින් පසු අවුරුදු 03කින් උපාධියක් ලබාගතහැකි බව තරුණ ප්‍රජාව දැනුවත් කිරිමේ වැඩසටහනකට එක්වෙමින් ඔහු තව දුරටත් මෙසේද පැවසීය.

"ගෝලීය හා ජාතික අවශතා අනුව වෙනස් නොවුනහොත් අපේ රටේ රාජ්‍ය විශ්ව විදයාල ස්වභාවික මරණයකට පත්විය හැකියි.

සෑම උපාධිධාරීයකුටම රජයේ රැකියා දෙන ප්‍රතිපත්තිය රටේ සංවර්ධනයට බාධාවක්"

‍රටේ අධ්‍යාපනය සම්බන්ධයෙන් කථිකාචාර්ය දිලන්ත විතානගේ දැක්වූ වැඩිදුරට අදහස් දැක්වීම් පහතින් නරඹන්න.

මාවනැල්ල අධ්‍යාපන කලාපයේ හිඟුල මෙඩේරිගම මහා විද්‍යාලයට පසුගිය 03 වෙනිදා කඩාවැදී ගුරුවරුන්ට සහ දෙමව්පියන්ට තර්ජනය කිරීම ගරුවරුන්ට පහරදී ඇතුළු චෝදනා සම්බන්ධයෙන් මාවනැල්ල ප්‍රාදේශීය සභාවේ උප සභාපති කේ.ජී පියතිස්ස මෙතෙක් අත්අඩංගුවට ගැනීමට මාවනැල්ල පොලිසිය කටයුතු නොකිරීමට විරෝධය පල කරමින් අද (09) දින මාවනැල්ල අධ්‍යාපන කලාපයේ සියලුම පාසල් වාර්ජනයක් දියත් කර තිබේ.

මාවනැල්ල ප්‍රාදේශීය සභාවේ උප සභාපති කේ.ජී පියතිස්ස වහාම අත්අඩංගුවට ගන්නා ලෙස බලකරමින් එම පාසල්වල සියලුම ගුරුවරු මේ වනවිට මාවනැල්ල පොලිසිය ඉදිරිපිට දැවැන්ත විරෝධතාවයක නිරතව සිටිති.

එහිදී ගුරු විදුහල්පති උද්ඝෝෂකයන් වෙත පැමිණි පොලිසියේ උසස් නිලධාරියෙකු තමන් අදාළ සිදුවීම සම්බන්ධයෙන් විමර්ශන භාරගෙන ඉදිරි කටයුතු සිදුකරන බව පැවසීය.

එහිදී ගුරු විදුහල්පති වෘත්තීය සමිති නායකයන් අවධාරණය කර සිටියේ පොලිසියේ වචන විශ්වාස කල නොහැකි නමුත් යම් කාලයක් ලබාදීමට සූදානම් බවය.

එහෙත් යුක්තිය ඉටුකිරීම සිදුනොවන්නේ නම් මාවනැල්ල කළාපයේ පමණක් නොව කෑගල්ල දිස්ත්‍රික්කයේ සහ අවශ්‍ය නම් රටේම පාසල් ආවරණය වන ආකාරයට වෘත්තීය ක්‍රියාමාර්ග ගැනීමට පසුබට නොවන බවත් ඔවුන් පැවසීය.

එසේම අද දින පාසල් වැසීම හේතුවෙන් අධ්‍යාපන කටයුතු කඩාකප්පල් වීම ගැන පොලිසිය සහ දේශපාලන බල අධිකාරිය වගකිවයුතු බවත් ඔවුන් පැවසීය.

රජය විසින් නිකුත් කරන ලද ගැසට් නිවේදන නැවතත් ඉවත් කරගැනීමට කටයුතු කරන්නේ ජනතාව කෙරෙහි ඇති සංවේදීතාවය නිසා බව ශ්‍රී ලංකා පොදුජන පෙරමුණේ ප්‍රධාන ලේකම් පාර්ලිමේන්තු මන්ත්‍රී සාගර කාරියවසම් පවසයි.

යම් දෙයකින් ජනතාව තෘප්තිමත් නොවන බවට වැටහුන හොත් එය වෙනස් කිරීමට ආණ්ඩුව කටයුතු කරන බවද ඔහු පැවසීය.

පොදුජන පෙරමුණේ ප්‍රධාන ලේකම් මේ අදහස් දක්වා සිටියේ එම පක්ෂ මූලස්ථානයේ පැවති මාධ්‍ය හමුවකදී අදහස් දක්වමින් ය.

එහිදී ඔහු වැඩිදුරටත් මෙසේද පැවසීය.

‘ගැසට් ඉවත් කරගන්නේ ජනතාවට සංවේදී නිසා. අපි ගැසට් එක ගැහුවා ජනතාවට මොනවා වුණත් කමක් නෑ අපි මේක ගෙනියනව කියල තැනක අපි ඉන්නේ නෑ. අපි මේ රටේ ජනතාව කෙරෙහි ඉතා සංවේදී රජයක්. අපට තේරුම් ගියොත් අප කළ දෙකින් ජනතාව අතෘප්තියට පත් වෙනවා කියලා එය වෙනස් කරන්න අපි මැලි වෙන්නේ නැහැ. පුහු මාන්නයක් ආඩම්බරයක් තියෙන රජයක් නෙවෙයි අපි. ජනතාවාදී රජයක්. ජනතාව වෙනුවෙන් සිදු කළ යුතු දේවල් යුතු දේවල් ඕන දෙයක් කරනවා "

චීන පොහොර ගනුදෙනවට මොක ද වෙන්නේ?

චීන තානාපතිවරයා කළ ඉල්ලීමකට අනුව උපද්‍රවකාරි ක්ෂුද්‍ර ජීවින් සහිත පොහොර ගනුදෙනුවට අදාළ පාර්ශ්ව කිහිපයක් අද (08) කෘෂිකර්ම අමාත්‍යංශයට කැඳවා තිබිණ.

චින්දාවෝ සීවින් බයෝ ටෙක් සමූහයේ නියෝජ්‍ය සාමාන්‍යාධිකාරී සහ ප්‍රධාන තාක්ෂණික නිලධාරිනිය වන ඇනා සොන්ග් මහත්මිය ද මේ සාකච්ඡාවට සහභාගිවී සිටියා ය.

ඇය මාධ්‍ය වෙත අදහස් පළ කිරීමට උත්සාහ කළත් තානාපති කාර්යාලයේ නිලධාරීහු ඊට අවස්ථාව ලබා නොදුන්හ.

රජයේ පොහොර සමාගම්වල සභාපතිවරු කෘෂිකර්ම අමාත්‍යංශයේ නිලධාරීහු ද අද සාකච්ඡාවට සහභාගිවී සිටියහ.

සාකච්ඡාව අවසානයේ චීන තානාපති කාර්යාලයේ සහ චීන සමාගමේ නියෝජිතවරු අදහස් දැක්වීම ප්‍රතික්ෂේප කරමින් පිටව ගියහ.

චීන පොහොර නැව දැන් කෝ ?

කළුතර ආශ්‍රිත මුහුදු තීරයේ ශ්‍රී ලංකා අධිකරණ බල සීමාව ලෙස සැලකෙන නාවික සැතපුම් 12 සීමාවෙන් එපිට චීන පොහොර නැව මේ වනවිට රැඳී සිටී.

ඊයේ කොළඹ වරායට පිටතින් නැව දිස්වූ අතර අප කළ විමසීම්වලදී අනාවරණය වූයේ නැවට අවශ්‍ය ජලය කොළඹ වරායෙන් ලබාගෙන එය පිටත්වී ඇති බවයි.

තමන් ගැඹුරු මුහුදට යන බව ඔවුන් කොළඹ වරයාට දැනුම්දී තිබේ.

-News 1st

මෙම අවස්ථාවේ සිරිල් ගාමිණි ප්‍රනාන්දු පියතුමා අත්අඩංගුවට ගැනීමේ සූදානමක් නොමැති බව අපරාධ පරීක්ෂණ දෙපාර්තමේන්තුව අද (08) නීතිපතිවරයා මාර්ගයෙන් ශ්‍රේෂ්ඨාධිකරණයට දැනුම්දි ඇත.

තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා සිරිල් ගාමිණී පියතුමා විසින් ඉදිරිපත් කර තිබූ මූලික අයිතිවාසිකම් පෙත්සමක් අද කැඳවනු ලැබූ අවස්ථාවේදී අපරාධ පරීක්ෂණ දෙපාර්තමේන්තුවේ අධ්‍යක්ෂවරයා වෙනුවෙන් පෙනී සිටි අතිරේක සොලිසිටර් ජෙනරාල් රොහාන්ත අබේසූරිය එම දැනුම් දීම සිදුකළේය.

මෙහිදී අතිරේක සොලිස්ටර් ජෙනරාල්වරයා අධිකරණය හමුවේ ප්‍රතිඥාවක් ලබා දෙමින් සඳහන් කළේ, එම අවස්ථාවේදී සිරිල් ගාමිණි පියතුමා අත්අඩංගුවට ගැනීමේ සූදානමක් නොමැති බවය.

විමර්ශන කටයුතු නිමා වීමෙන් පසුව නීතිපති උපදෙස් මත මේ සම්බන්ධයෙන් තීරණයක් ගැනීමට නියමිත බව අතිරේක සොලිසිටර් ජෙනරාල්වරයා දන්වා සිටියේය.

මෙහිදී සිරිල් ගාමිණී පියතුමා වෙනුවෙන් පෙනී සිටි ජනාධිපති නීතිඥ රියන්සි අර්සකුලරත්න අධිකරණයට දන්වා සිටියේ, දැනුම් දෙන සුදුසු වෙලාවක විමර්ශන කටයුතු සඳහා අපරාධ පරීක්ෂණ දෙපාර්තමේන්තුව හමුවේ පෙනී සිට ප්‍රකාශක් ලබාදීමට තම සේවාදායකයා සූදානම් බවය.

මෙහිදී ත්‍රිපුද්ගල විනිසුරු මඬුල්ලේ සභාපති විනිසුරු විජිත් මළල්ගොඩ අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි අතිරේක සොලිසිටර් ජෙනරාල්වරයා දන්වා සිටියේ ප්‍රමාණවත් කාලයක් ලබා දී පෙත්සම්කරු අපරාධ පරීක්ෂණ දෙපාර්තමේන්තුවට කැඳවා ප්‍රකාශයක් ලබාගන්නා ලෙසය.

අද මෙම නඩුව අවස්ථාවේ කතෝලික පූජකවරුන් උසාවි භූමිය සිසාරා පැමිණ සිටිනු දක්නට ලැබිණ.

ජාතික ශාක නිරෝධන සේවාවේ අතිරේක අධ්‍යක්ෂවරයාට ලිපියක් යොමු කරන චීනයේ සිට මෙරටට කාබනික පොහොර ගෙන්වා ඇති චීන සමාගම විසින් ඩොලර් මිලියන අටක් ගෙවන ලෙස දන්වා තිබේ.

එම චීන සමාගම සිය නීත්ඥ සමාගම හරහා ජාතික ශාක නිරෝධන සේවාවේ අතිරේක අධ්‍යක්ෂවරයාට සති තුනක් ඇතුළත මෙම මුදල නොගෙවන්නේ නම් නඩු පැවරීමට කටයුතු කරන බව දැනුම් දී ඇතැයි වාර්තා වෙයි.

අදාළ චීන සමාගම විසින් සපයන ලද පොහොර වල හානිකර බැක්ටීරියා ඇතැයි කියමින් ප්‍රතික්ෂේප කිරීම පිළිබඳව සිය අප්‍රසාදය පළ කරමින් ඔවුන් විසින් මෙම ලිපිය යොමු කර ඇති බවත් වාර්තා වෙයි.

ශ්‍රී ලංකාවේ සිදු කරන ලද පරීක්ෂණ වාර්තා ප්‍රතික්ෂේප කරණ සමාගම සඳහන් කර ඇත්තේ දෙරටට පිළිගත හැකි තෙවන පාර්ශව වෙතින් නැවත පරීක්ෂා කළ යුතු බවයි.

එසේම චීන තානාපති කාර්‍යාලය විසින් මෙරට විෂය සම්බන්ධ අමාත්‍යවරුන් කැඳවූ අවස්ථාවේ තෙවැනි පාර්ශ්වයක පරීක්ෂණ වාර්තාවක් සඳහා එකඟ වූ බවත් මාධ්‍ය වාර්තා කර තිබිණ.

මේ අතර මාධ්‍යය වාර්තා පවසා සිටින්නේ අදාල නෞකාව මේ වන විට කළුතරට නුදුරු මුහුදේ යාත‍්‍රා කරමින් ඇති බවයි.