රුපියල් බිලියන එකයි දශම පහකට (රුපියල් කෝටි 150) අධික බදු ප්‍රමාණයක් රජයට ගෙවීම පැහැර හැරීම හේතුවෙන් බලපත්‍රය අත්හිටුවන ලද ඩබ්ලිව්.එම්. මෙන්ඩිස් සමාගමේ බලපත්‍රය සක්‍රීය කර මත්පැන් නිෂ්පාදනය ඊයේ (01දා) සිට නැවත ආරම්භ කිරීම සඳහා සුරාබදු දෙපාර්තමේන්තුව අවසර ලබාදී ඇත.
රජයට ගෙවිය යුතු හිඟ බදු ප්‍රමාණය ගෙවීමේ එකඟතාව මත මෙම අවසරය ලබාදුන් බව සුරාබදු කොමසාරිස් ජනරාල් උපුටා දක්වමින් දෙරණ මාධ්‍ය ජාලයට අයත් ද මෝර්නිං සහ අරුණ පුවත්පත් වාර්තා කර ඇත.
බදු පැහැර හැරීම හේතුවෙන් 2018 වර්ෂය ආරම්භයේදී මෙන්ඩිස් සමාගමේ මත්පැන් නිෂ්පාදන බලපත්‍රය සුරාබදු දෙපාර්තමේන්තුව විසින් අත්හිටවනු ලැබූ අතර එම හිඟ බදු මුදල් රජයට අයකර ගැනීම සම්බන්ධයෙන් පාර්ලිමේන්තුවේදී සාකච්ඡාවට ලක් විය.
මෙන්ඩිස් සමාගම 2011 වසරේ දී අර්ජුන් ඇලෝසියස් ගේ පර්පෙචුවල් ට්‍රෙෂරීස් සමාගම විසින් ගනු ලැබිණ. පසුගිය යහපාලන ආණ්ඩුව සමයේ ප්‍රශ්නගත බැඳුම්කර ගනුදෙනුවට මැදිහත් වූයේ වෙන සමාගමක් නොව අර්ජුන් ඇලෝසියස් ට අයත් පර්පෙචුවල් ට්‍රෙෂරීස් සමාගම ය.
මේ ආණ්ඩුව බලය ගත්තේ බැඳුම්කර හොරු අල්ලනවා කියමිනි.