පුවත්

ඉඩම් අමාත්‍යංශයේ ලේකම්, ආර්. ඒ. ඒ. කේ. රණවක මහතා විසින් සියලු දිස්ත්‍රික් ලේකම්වරුන් හා සියලූ ප්‍රාදේශීය ලේකම්වරුන් වෙත “රජයේ ඉඩම් මැන වෙන් කිරීම” සඳහා වන චක්‍රලේකයක් 2021 අගෝස්තු මස 6 වන දින අංක 02/2021 යටතේ නිකුත් කර තිබේ.

මෙම චක්‍රලේකය මගින් අවධානය යොමු කර ඇත්තේ ඉඩම් සංවර්ධන ආඥාපනතේ 8 වන වගන්තියට අනුව ඉඩම් කොමසාරිස් ජනරාල්වරයාගේ සාමාන්‍ය හා විශේෂ විධිවිධානවලට යටත් ව ප්‍රාදේශීය ලේකම්වරුන්ට රජයේ ඉඩම් විවිධ කාර්යන් සඳහා මැන වෙන් කරනු ලැබිය හැකි බැවින් විවිධ සංවර්ධන කටයුතු, ගම් පුළුල් කිරීම හා අනාගත සංවර්ධන කටයුතු සඳහා ආරක්ෂා කිරීමට ඉඩම් මැනීම් කර හඳුනා ගැනීමට කටයුතු කරන ලෙස ය.

එම චක්‍රලේඛයේ විශේෂයෙන් සඳහන් කර ඇත්තේ වනජීවී හා වන සංරක්ෂණ අමාත්‍යංශයේ, ලේකම් විසින් නිකුත් කළ 2020 නොවැම්බර් මස 04 වන දින අංක MWFC/01/2020 දරන චක්‍රලේඛයේ සඳහන් පරිදි මීට ප්‍රථම ප්‍රකාශිත 1998.07.01 දින අංක 05/98 දරන, 2001.08.10 වන දින අංක 5/2001 දරන හා 2006.05.17 වන දින අංක 02/2006 දරන චක්‍රලේඛ ත්‍රිත්වය අවලංගු කර ඇති බැවින් වන සංරක්ෂණ ජනරාල්වරයා විසින් හා වනජීවී සංරක්ෂණ ජනරාල් විසින් ගැසට් මගින් ප්‍රකාශයට පත් කර ඇති වනජීවී ප්‍රදේශ හැර අනෙක් රජයේ ඉඩම් ප්‍රාදේශීය ලේකම්වරුන් හා දිස්ත්‍රික් ලේකම්වරුන් භාරයේ තබා ගන්නා ලෙස ය.

සාවද්‍ය චක්‍රලේඛයක් !

මෙම චක්‍රලේඛය අධ්‍යයනය කර බැලීමේ දී පෙනී යන්නේ එහි සාවද්‍ය කරුණු ගණනාවක් අන්තර්ගත වන බව ය. වන සංරක්ෂණ හා වනජීවී සංරක්ෂණ දෙපාර්තමේන්තු යටතේ පාලනය වන රක්ෂිත ප්‍රදේශ ප්‍රකාශයට පත් කිරීම සිදු කරනු ලබන්නේ 2009 අංක 65 දරන පනතින් අවසන්වරට සංශෝධිත 1907 අංක 16 දරන වන සංරක්ෂණ ආඥාපනතට අනුව හා 2009 අංක 22 දරන පනතින් අවසන්වරට සංශෝධිත 1937 අංක 2 දරන වන සත්ත්ව හා වෘක්ෂලතා ආරක්ෂක ආඥාපනතට අනුව ය. එම රක්ෂිත ප්‍රදේශ ප්‍රකාශයට පත් කරනු ලබන්නේ අදාළ විෂය භාර අමාත්‍යවරයා විසින් ය. මෙම චක්‍රලේඛයේ සඳහන් පරිදි වන සංරක්ෂණ ජනරාල් හෝ වනජීවී සංරක්ෂණ ජනරාල් (අධ්‍යක්ෂ ජනරාල්) විසින් ප්‍රකාශිත කිසිදු රක්ෂිත ප්‍රදේශයක් නොමැත. ඒ අනුව මෙය ඉතා ම දෝෂ සහිත චක්‍රලේඛයක් බව පෙනී යයි.

වන සංරක්ෂණ ආඥාපනත උල්ලංඝනය කිරීම !

මෙම චක්‍රලේඛයේ ප්‍රධාන නීති විරෝධී තත්ත්වය වන්නේ වන රක්ෂිත ලෙස ප්‍රකාශයට පත් කළ ප්‍රදේශ හැර ඉතිරි ඉඩම් සංවර්ධන කටයුතු සඳහා, ගම් පුළුල් කිරීම සඳහා සහ අනාගත සංවර්ධන කටයුතු සඳහා මැනීම් කර ප්‍රාදේශීය ලේකම් හා දිස්ත්‍රික් ලේකම් භාරයේ තබා ගැනීමට නියෝග නිකුත් කිරීම ය. මෙය වන සංරක්ෂණ ආඥාපනත සම්පූර්ණයෙන් ම උල්ලංඝනය කිරීමකි. වන සංරක්ෂණ ආඥාපනතේ 20 වන වගන්තියට අනුව සංරක්ෂණ වනාන්තර, වන රක්ෂිත හා ගම්බද වනාන්තර ලෙස ප්‍රකාශයට පත් කළ වනාන්තර හැර රජයට අයත් සියලූ ම වනාන්තර මෙම වගන්තිය යටතේ පාලනය වේ. එම වනාන්තර ගැසට් මගින් ප්‍රකාශයට පත් කර නොමැති අතර රජයේ ඉඩම්වල පිහිටි සියලූ ම වනාන්තර මෙම වගන්තියට යටත් වේ.

පනතේ 20(1) වගන්තියට අනුව රජයට අයත් වනාන්තරයක ගස් කැපීම, කැනීම් කටයුතු සිදු කිරීම, ගිනි තැබීම, වනාන්තර එළි කර වගා කිරීම, ස්ථිර හෝ තාවකාලික ඉදිකිරීම් සිදු කිරීම, පාරවල් සකස් කිරීම, මායිම් සලකුණු වෙනස් කිරීම යන සියලු ක්‍රියා නීති විරෝධී වේ. මෙවන් නීති විරෝධී ක්‍රියාවකට මහේස්ත්‍රාත් අධිකරණයක් ඉදිරියේ වරදකරුවකු වන පුද්ගලයකු රුපියල් 5000 ත් 50,000 ත් අතර දඩයකට හෝ වසර 2 ක් දක්වා බන්ධනාගාරගත කිරීමකට හෝ මේ දඩුවම් දෙකට ම යටත් කළ හැකි ය. ඊට අමතර ව වනාන්තරයට සිදු කරන ලද හානියට වන්දියක් ලෙස අධිකරණය විසින් නියම කරන දඩයකට ද යටත් විය යුතු ය. 20(2)(1) වගන්තියට අනුව රජයට අයත් වනාන්තරයක යම් වරදක් සිදු කිරීම සඳහා ආධාර හෝ අනුබල ලබා දෙන තැනැත්තෙකු ද වරදකරුවකු වන අතර එම දඩුවමට ම යටත් කළ හැකි ය.

05/98 හා 05/2001 අංක දරන චක්‍රලේක, අංක MWFC/01/2020 දරන චක්‍රලේඛය මගින් අහෝසි කරනු ලැබූව ද 2009 අංක 65 දරන පනතින් වන සංරක්ෂණ ආඥාපනත අවසන් වශයෙන් සංශෝධනය කිරීමේ දී මෙම චක්‍රලේඛ මගින් නෛතික ආවරණය ලබා දුන් සියලූ ම වනාන්තරවල ආරක්ෂාව පාර්ලිමේන්තුවෙන් සම්මත වූ මෙම පනතේ 20 වන වගන්තියට යටත් කර තිබිය දී චක්‍රලේඛයක් මගින් එම වනාන්තර වෙනත් ආයතනයකට පැවරීමේ කිසිදු නෛතික හැකියාවක් නොමැත. එමගින් සිදු කරන්නේ වන සංරක්ෂණ ආඥාපනත උල්ලංඝනය කිරීම පමණක් නොව රජයට අයත් වනාන්තර විනාශ කිරීමට ආධාර හා අනුබල ලබා දීමකි. මේ නිසා මෙම චක්‍රලේඛය නීති විරෝධී වේ.

ආණ්ඩුක්‍රම ව්‍යවස්ථාව උල්ලංඝනය කිරීම !

නීති විරෝධී ලෙස මෙම චක්‍රලේඛය ප්‍රකාශයට පත් කිරීමෙන් ඉඩම් අමාත්‍යංශයේ ලේකම්වරයා සිදු කර ඇත්තේ නීතිය අතික්‍රමණය කිරීමකි. එපමණක් නොව ආණ්ඩුක්‍රම ව්‍යවස්ථාව ද උල්ලංඝනය කිරීමකි. ශ්‍රී ලංකා ප්‍රජාතාන්ත්‍රික සමාජවාදී ජනරජයේ ආණ්ඩුක්‍රම ව්‍යවස්ථාවේ හය වන පරිච්ඡේදයේ දැක්වෙන රාජ්‍ය ප්‍රතිපත්ති මෙහෙයවීමේ මූලධර්ම හා මූලික යුතුකම් කොටසේ 27(14) ව්‍යවස්ථාවේ දැක්වෙන ලෙස ජනතාවගේ යහපත තකා රජය විසින් පරිසරය ආරක්ෂා කොට සුරක්ෂිත කොට වැඩිදියුණු කළ යුතු ය. ඒ වෙනුවට ඉඩම් අමාත්‍යංශයේ ලේකම්වරයා විසින් මෙම චක්‍රලේඛය මගින් සිදු කර ඇත්තේ වනාන්තර විනාශ කොට ජනතාවගේ යහපැවැත්ම සම්පූර්ණයෙන් ම බිඳ දැමීමට කටයුතු කිරීම ය.

රක්ෂිත ලෙස ප්‍රකාශයට පත් කර නොමැති රජයට අයත් බොහෝ වනාන්තර ප්‍රදේශ වැව් හා ජලාශවල ජල පෝෂක ප්‍රදේශ වේ. එපමණක් නොව මෙම වනාන්තර රක්ෂිත ප්‍රදේශ අතර සම්බන්ධතාවය ඇති කරන අලි - ඇතුන්ගේ ප්‍රධාන වාසස්ථාන වේ. මීට අමතර ව තෙත් කලාපයේ පිහිටි බොහෝ රජයට අයත් වනාන්තර ප්‍රදේශ තුළ මෙරටට ආවේණික හා වඳවීමේ තර්ජනයට දරුණු ලෙස මුහුණපා ඇති විශේෂ ජීවත් වේ. මෙම වනාන්තර සංවර්ධන කාර්යන් සඳහා භාවිතා කිරීමෙන් සිදු වන්නේ පානීය ජල අර්බුධ හා කෘෂිකාර්මික වාරි ජල අර්බුධ ඇති වීමෙන් ග්‍රාමීය ජනතාවගේ ජීවන පැවැත්ම බිඳ වැටීමයි. එපමණක් නොව අලි - මිනිස් ගැටුම වර්ධනය වීම හා තෙත් කලාපයේ ස්ථානීය ආවේණික ජීවී විශේෂ බොහොමයක් වඳ වී යාම ද මෙමගින් සිදු වනු ඇත. රජයට අයත් වනාන්තර ඉඩම් ලෙස රක්ෂිත වනාන්තර වලින් පරිභාහිරව ප්‍රතිශතයක් ලෙස වැඩි ම භූමි ප්‍රමාණයක පැතිර ඇත්තේ කඩොලාන වනාන්තර යි. මෙම වනාන්තර තුළ නොගැඹුරු මුහුදේ මත්ස්‍ය විශේෂ, ඉස්සසන් හා කකුළුවන් විශේෂ බෝවීම සිදු වේ. මීට අමතර ව කලපු ආශ්‍රිත සත්ත්ව විශේෂ සියල්ලේ ම බෝවීම සිදු වන්නේ කඩොලාන වනාන්තර තුළ ය. මේ නිසා මෙම චක්‍රලේඛයෙන් වැඩි ම හානිය කඩොලාන වනාන්තරවලට සිදු වීමට නියමිත අතර ඒ හේතුවෙන් කලපු හා සාගර ජීවීන්ගේ පැවැත්මට හා දීවර කර්මාන්තයේ පැවැත්මට දරුණු බලපෑම් එල්ල වනු ඇත.

සෞභාග්‍යයේ දැක්ම උල්ලංඝනය කිරීම !

මෙවර ජනාධිපතිවරණයේ දී ගෝඨාභය රාජපක්ෂ මහතා විසින් ඉදිරිපත් කළ සෞභාග්‍යයේ දැක්ම ප්‍රතිපත්ති ප්‍රකාශනයේ අට වන පරිච්ඡේදයේ දැක්වෙන තිරසර පරිසර ප්‍රතිපත්තියක් කොටසෙහි සඳහන් කර ඇත්තේ ජාතික වන වැස්ම 30% ක් දක්වා ඉහළ නැංවීමට කටයුතු කරන බවත්, ස්වාභාවික පරිසර පද්ධති සංරක්ෂණය කරන අතර හානියට ලක් වූ පරිසර පද්ධති ප්‍රතිස්ථාපනය කරන බවත්, මිනිසා මෙන් ම අනෙක් සත්ත්වයින්ට භූමියට ඇති අයිතිය සුරක්ෂිත කරන භාරකරුවකු ලෙස රජය ක්‍රියා කරන බවත් ය. නමුත් මෙම චක්‍රලේඛයෙන් ඒ සියල්ල ම බිඳ දමා ඇත.

ඉතිරි වී ඇති වනාන්තරවලින් 12% ක් විනාශ කිරීම !

වර්ෂ 2010 දී වන සංරක්ෂණ දෙපාර්තමේන්තුව මගින් සිදු කළ අවසන් වනාන්තර සංගණනයට අනුව මෙරට සමස්ත වනාන්තර ආවරණය හෙක්ටයාර 19,51,473 කි. එය මෙරට සමස්ත භූමි ප්‍රමාණයෙන් 29.7% කි. මෙම වනාන්තර ආවරණයට තෙත්, අතරමැදි, වියළි හා ශුෂ්ක කලාපවල පිහිටි ඝන වනාන්තර, විවෘත වනාන්තර, කටු පදුරු සහිත ලදු කැළෑ, කඩොලාන වනාන්තර හා තෘණ භූමි අයත් වේ. මේ අතුරෙන් පහතරට වැසි වනාන්තර ඉතිරි වී ඇත්තේ සියයට 1.9 ක ප්‍රතිශතයකි. එනම් හෙක්ටයාර 1,23,302 කකි. ඉහළ කඳුකර වනාන්තර ප්‍රතිශතය සියයට 0.7 කි. එහි ප්‍රමාණය හෙක්ටයාර 44,758 කි. උප කඳුකර වනාන්තර ප්‍රතිශතය සියයට 0.4 කි. එහි ප්‍රමාණය හෙක්ටයාර 28,513 කි. වියළි මිශ්‍ර සදාහරිත වනාන්තර හෙක්ටයාර 11,21,392 ක් නැතහොත් සියයට 17.1 කක ප්‍රතිශතයක් පවතී. කඩොලාන වනාන්තර 0.2% ක් නැතහොත් හෙක්ටයාර 15,670 ක් පමණ වෙයි.

වර්ෂ 2014 වන සංරක්ෂණ දෙපාර්තමේන්තුවේ සංඛ්‍යා ලේඛනවලට අනුව රක්ෂිත ලෙස ප්‍රකාශයට පත් කළ යුතු යෝජිත රක්ෂිත හා රජයට අයත් වෙනත් කැලෑ ලෙස හඳුන්වන වන සංරක්ෂණ ආඥාපනතේ 20 වන වගන්තිය යටතේ පාලනය වන වනාන්තර 103 ක් ඇති අතර ඒවායෙහි භූමි ප්‍රමාණය හෙක්ටයාර 2,24,564 ක් නැතහොත් අක්කර 5,79,608 ක් පමණ වේ. එම සියලු වනාන්තර මෙම චක්‍රලේඛය මගින් අහිමි කිරීමට නියමිත අතර එය වර්තමානයේ ලංකාවේ ඉතිරි වී ඇති වනාන්තර ප්‍රමාණයෙන් 12% ක් තරම් ඉහළ ප්‍රතිශතයකි.

අලි - මිනිස් ගැටුම වර්ධනය කිරීම !

අලි - ඇතුන් ඇතුළු ව බොහෝ වන සතුන්ගේ වාසස්ථාන මහා පරිමාණ සංවර්ධනයේ නාමයෙන් අහිමි කිරීම හේතුවෙන් අලි - මිනිස් ගැටුම හා වන සතුන් හා මිනිසුන් අතර ගැටුම් වර්ධනය වී ඇත. මේ නිසා සුළු පරිමාණ ගොවීන් වගා බිම් වලින් ඉවත් වී එම වගා බිම් මහා පරිමාණ වාණිජ වගාවන් සඳහා විවිධ සමාගම් වලට ලබා දෙමින් තිබේ. 1990 වසරේ සිට 2000 වසර දක්වා කාලය තුළ දී වසරකට අලි - මිනිස් ගැටුමේ ප්‍රතිඵලයක් ලෙස වාර්ෂික ව අලින් 150 ක් හා මිනිසුන් 40 ක් පමණ මරණයට පත් ව තිබේ. 2010 සිට 2018 දක්වා කාලය තුළ අලි - මිනිස් ගැටුම නිසා වසරකට මිය යන මිනිසුන්ගේ ප්‍රමාණය 80 දක්වා ත් අලි ඇතුන්ගේ ප්‍රමාණය 275 දක්වා මෙතෙක් ඉතිහාසයේ වර්ධනීය ම තත්ත්වයට පත් විය. ඒ තත්ත්වය ඉතා උග්‍ර මට්ටමකට පත් කරමින් පසුගිය 2019 වර්ෂය මෙතෙක් ඉතිහාසයේ අලි - මිනිස් ගැටුමේ වර්ධනීය ම තත්ත්වයක් වාර්තා වූ වර්ෂය බවට පත් විය. එම වසරේ දී හානි කර මිනිස් ක්‍රියාකාරකම් හේතුවෙන් අලි මරණ 406 ක් හා අලින්ගේ පහරදීම නිසා මිනිසුන් 122 ක් පමණ මියගොස් ඇති බවට වාර්තා වී තිබේ. 2020 වසරේ දී අලි මරණ 317 ක් හා අලින්ගේ පහරදීම් නිසා සිදු වූ මිනිස් මරණ 112 ක් වාර්තා වී විය. මේ තත්ත්වය ඇති වීමට ප්‍රධාන හේතූන් වී ඇත්තේ අලි - ඇතුන්ගේ වාසස්ථාන වන වනාන්තර හා තෘණ භූමි ශීඝ්‍රයෙන් විනාශ කිරීම, එම වාසස්ථාන කොටස් වලට බෙදී වෙන් වන පරිදි හානි කර සංවර්ධන ව්‍යාපෘති ක්‍රියාත්මක කිරීම යි. මෙම චක්‍රලේඛයත් සමඟ ම රක්ෂිත වනාන්තර වලින් පරිබාහිර වියළි කලාපීය වනාන්තර සංවර්ධන ව්‍යාපෘති සඳහා මහ පරිමාණයෙන් භාවිත කිරීමේ ප්‍රතිඵලයක් ලෙස වර්තමානයේ පවතින අලි - මිනිස් ගැටුම තවත් උග්‍ර මට්ටමකට පරිවර්ථනය වනු ඇත.

චක්‍රලේඛය අහෝසි කර ජාතික ඉඩම් කොමිෂන් සභාව පිහිටුවීම !

ආණ්ඩුක්‍රම ව්‍යවස්ථාව හා වන සංරක්ෂණ ආඥාපනත උල්ලංඝනය කරමින් රටට දැවැන්ත විනාශයක් ඇති කිරීමට හේතු වන 02/2021 චක්‍රලේඛය අවලංගු කර ඉඩම් අමාත්‍යංශයේ ලේකම්වරයාට හෝ ආණ්ඩුවේ මැති ඇමතිවරුන්ට හෝ අවශ්‍ය පරිදි ඉඩම් පිළිබඳ ව තීන්දු තීරණ ගැනීම වෙනුවට 1987 ශ්‍රී ලංකා ආණ්ඩුක්‍රම ව්‍යවස්ථාවේ 13 වන සංශෝධනය මඟින් නීති ගත කරන ලද 9 වන උපලේඛනයේ පළාත් සභා ලැයිස්තුවේ දෙවන පරිශිෂ්ටයේ සඳහන් පරිදි “ජාතික ඉඩම් කොමිෂන් සභාවක්” පිහිටු විය යුතු ය. මෙම ජාතික ඉඩම් කොමිෂන් සභාවේ මූලික වගකීමක් ලෙස දක්වා ඇත්තේ රජයේ ඉඩම් පරිහරණය හා සම්බන්ධ “ජාතික ඉඩම් ප්‍රතිපත්තියක්” සකස් කිරීමයි. ඒ මත පදනම් ව ඉඩම් භාවිතා ව පිළිබඳ ව තීන්දු තීරණ ගත යුතු ය.

දෙවන පරිශිෂ්ටයේ 3 වන වගන්තියේ දක්වා ඇත්තේ ශ්‍රී ලංකා ආණ්ඩුව විසින් ජාතික ඉඩම් කොමිෂන් සභාවක් පිහිටු වීම, එම කොම්ෂන් සභාව රජයේ ඉඩම් භාවිතා ව හා සම්බන්ධ ජාතික ප්‍රතිපත්තිය සකස් කිරීම පිළිබඳ ව වගකීම, මෙම කොමිෂන් සභාවට දිවයිනේ සියලූ ම පළාත් සභා වල නියෝජිතයන් ඇතුළත් වීම, ජාතික ඉඩම් කොමිෂන් සභාවට ස්වාභාවික සම්පත් කළමනාකරණයට අදාළ සමාජ ආර්ථික සාධක මෙන්ම, භෞතික සාධක ඇඟයීම සඳහා අවශ්‍ය අදාළ සියලු විෂයයන් නියෝජනය වන තාක්ෂණික ලේකම් කාර්යාලයක් ඇතුළත් වීම, ඉඩම් භාවිතය පිළිබඳ ජාතික ප්‍රතිපත්තිය දේශපාලනික වශයෙන් හෝ ජනවාර්ගික වශයෛන් නොව තාක්ෂණික සාධක මත පදනම් වීම, ඉඩම් කොමිෂන් සභාව විසින් පස, දේශගුණය, වර්ෂාපතනය, පස සේදීයාම, වන ආවරණය, පාරිසරික සාධක, ආර්ථික යෝග්‍යතාව ආදී කරුණු කෙරෙහි සැලැකිලිමත් ව ඉඩම් භාවිතා ව හා සම්බන්ධ පොදු න්‍යාය නියම කිරීම, පළාත් සභා වෙත පැවරෙන බලතල ක්‍රියාත්මක කිරීමේ දී පළාත් සභා විසින් ජාතික ඉඩම් ප්‍රතිපත්තිය කෙරෙහි නිසි පරිදි සැලැකිලිමත් ව තම බලබල ක්‍රියාත්මක කිරීම සිදු කළ යුතු බව ය. නමුත් 13 වන ව්‍යවස්ථා සංශෝධනයෙන් පසුව අද වන විට වසර 34 ක් ගත වී ඇතත් මෙතෙක් බලයට පත් වූ සියළු රජයන් ජාතික ඉඩම් කොමිෂන් සභාව පිහිටු වීම හා ඒ මත පදනම් ව ඉඩම් භාවිතා ව තීරණය කිරීම හිතාමතා ම මඟ හැර ඇත. මේ නිසා මෙම චක්‍රලේඛ අහෝසි කර වහා ම ජාතික ඉඩම් කොමිෂන් සභාව පිහිටු වීමට කටයුතු කරන ලෙස අවධාරණය කර සිටිමු.

සජීව චාමිකර

ඉඩම් හා කෘෂිකර්ම ප්‍රතිසංස්කරණ ව්‍යාපාරය

කොරෝනා ඩෙල්ටා ප්‍රභේදය මහත් ව්‍යසන ගෙනදෙමින් පැතිරයමින් ඇති පසුබිමේ විපක්ෂ නායක සජිත් ප්‍රේමදාස යාල වනෝද්‍යානයේ සෆාරියක නිරතව ඇති බවට දේශපාලන ආරංචිමාර්ග සඳහන් කරනවා.

වැඩේ කියන්නේ වෙන කවුරුවත් නෙවෙයි, විපක්ෂ නායකතුමාගේ සමගි ජනබලවේගය පක්ෂය අභ්‍යන්තරයෙන්ම මේ චෝදනාව ඉදිරිපත්වීම.

කතාවේ ඇත්ත නැත්ත අපි දන්නේ නෑ, නමුත් චෝදනාවේ හැටියට නම් විපක්ෂ නායක සජිත් ඔහුගේ බිරිද සමඟ අලි සහ කොටි නරඹන්න යාලේ ගිහින්ලු.

කොහොමටත් අලි සහ කොටි නැරඹීමට යාම විපක්ෂ නායක සජිත්ගේ ප්‍රියතම විනෝදාංශයක් බව ප්‍රසිද්ධ කරුණක්. විශේෂයෙන් කොටි බලන්න යාලට යන විපක්ෂ නායකවරයා ඒ සඳහා ඇතැම් අවස්ථාවල දිවා රෑ නොතකා කැපවෙන බවත් ප්‍රසිද්ධ කාරණයක්.

නමුත් දේශපාලන ආරංචිමාර්ග කියන විදියට මේ වෙලාවේ ඔය විනෝදාංශය අමතක කරලා ජනතාව වෙනුවෙන් නොසිටීම අවුලක් කියලයි පක්ෂයේ උදවිය කියන්නේ. ඔෆිස් එකේ ඉන්න හාදයෙකුට කියලා නිවේදනයක් මාධ්‍යට යවනවට වඩා දෙයක් මේ වෙලාවේ විපක්ෂ නායක විදියට සජිත්ගෙන් වෙන්න ඕන කියලයි සජබ උදවියත් කියන්නේ.

මේ වෙලාවේ වෛද්‍ය විශේෂඥ මතය අනුව රට ලොක්ඩවුන් නොකිරීම ගැන ආණ්ඩුවට බරපතළ විවේචන එල්ලවෙමින් තිබෙන්නේ. දවසකට කොරෝනා නිසා මියයන ප්‍රමාණය 100 ඉක්මවලා. දවසකට වාර්තා වන ආසාදිතයන් ප්‍රමාණය 3000ට ආසන්න වෙලා. නමුත් සජිත් අලි කොටි ගැන හොයමින් ඉන්නවා හැර විකල්පය තමන් බවට ජනතාවට ඒත්තු ගන්වන්න අසමත් බවටත් සජබ යේම පිරිස් චෝදනා කරන්න අරගෙන.

ඔවුන් කියන්නේ, විපක්ෂ නායක නිසා ආණ්ඩුව ජනතා අප්‍රසාදයට පත්වෙලා ඉබේම තමන් රාජ්‍ය නායකයා වෙයි කියන එක සජිත්ගේ සහ ඔහු වටේ ඉන්න කිහිපදෙනාගේ අදහස වෙලා තියෙන්නේ කියලා. ඒ වෙනුවට ඔවුන් කියන්නේ, විපක්ෂ නායක ලෙස වත්මන් පාලනය අසමත් බව තහවුරු කරන අතර විකල්පය තමන් බවත් පෙන්වීමට, මිනිසුන් තුල විශ්වාසයක් ඇති කිරීමට කටයුතු කරන්න ඕන කියලයි.

ඒ වෙනුවට වෙලා තියෙන්නේ ආණ්ඩුව මිනිස්සුන්ට තමන්ව එපා කරගන්න කොට ඊට නොදෙවෙනි ලෙස සජිතුත් මිනිස්සුන්ට එපා වෙන දේවල්ම කරමින් ඉන්නවා කියලයි සජබ අභාන්තරයේ චෝදනාව නැගෙමින් තියෙන්නේ.

විශේෂයෙන් ආණ්ඩුවට විරුද්ධ වෙන සහ ආණ්ඩුවෙන් ගැලවෙන පාක්ෂිකයන්ට එක්වෙන්න කඳවුරක් අවශ්‍ය නමුත් එය ගොඩනැගීමට සජිත් අසමත් බවත් ඔවුන් කියනවා. ඉතිහාසයේ කවදාවත් නොවූ ලෙස ඉතාම ඉක්මනින් අපකීර්තියට පත්වූ ආණ්ඩුවක් ඉස්සරහා විපක්ෂයට නිල නොලත් ආණ්ඩුවක් ලෙස පවා කටයුතු කිරීමට හැකියාවක් පවතින නමුත් සජිත්ගේ මේ දෝෂය නිසාම එය සිදුනොවන බවත් මේ සජබ කණ්ඩායම පවසනවා.

බලය ගැනීම කෙසේ වෙතත් කොරෝනා නිසා රටම තැති ගෙන මර බයෙන් ඉන්න මේ වෙලාවේ සජිත් ඔහොම ගමනක් ගියා නම් ඒක සජිත්ගේ දේශපාලනික අපරිණතබව තහවුරු කරන සාක්ෂියක් වේවි. ඒ නිසාම 2024 විලක්පය වීමත් සජිත්ගෙන් ඈත්වෙන්න මේ වගේ වැඩ හේතුවෙන්න පුළුවන්.

දේශපාලන වාර්තාකරු

PCR පරීක්ෂණයක් සඳහා රුපියල් 6,500 ක් හා ඇන්ටිජන් පරීක්ෂණයක් සඳහා රුපියල් 2,000 ක මිලක් නියම කරමින් මිල නියාමන ගැසට්ටුව නිකුත් කරන බව සෞඛ්‍ය අමාත්‍ය පවිත්‍රා වන්නිආරච්චි පවසයි.

සෞඛ්‍ය අමාත්‍යාංශයේ අද පැවැති විශේෂ සාකච්ඡාවකින් අනතුරුව මෙම මිල ගණන් නියාමනය කිරීමට අදාළ ගැසට් පත්‍රය හෙට (12) නිකුත් කිරීමට පියවර ගන්නා බව සෞඛ්‍ය අමාත්‍ය පවිත්‍රා වන්නිආරච්චි ප්‍රකාශ කළා ය.

කොවිඩ්-19 වසංගතයේ ව්‍යාප්තිය හේතුවෙන් කොවිඩ් වෛරසය ආසාදිතයින් හඳුනා ගැනීම සඳහා පෞද්ගලික අංශයේ රෝහල්වලින් සිදු කරනු ලබන PCR සහ ඇන්ටිජන් පරික්ෂණ සඳහා අය කරනු ලබන මිල ගණන් නියාමනය කිරීමට සෞඛ්‍ය අමාත්‍යාංශය ගෙන තිබේ.

මොළය බාගෙට මිය ගිය නිලධාරීන් විසින් රට පාලනය කළොත් ඉදිරියේදී විශාල අභියෝගයට රටට ජනතාවට මුහුණ දෙන සිදුවනු ඇතැයි ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී චන්දිම වීරක්කොඩි  සඳහන් කරයි.

ඔහු මේ බව සඳහන් කර සිටියේ ගාල්ල ප්‍රදේශයේදී මාධ්‍ය වෙත අදහස් දක්වමිනි.

කොරෝනා ආසාදිතයන් එක්කෙනෙක් දෙන්නෙක් සිටියදී සම්පූර්ණයෙන්ම රට වසා දැමුවද අද විශාල වශයෙන් රෝගීන් හමුවද්දී රට සම්පූර්ණයෙන්ම විවෘත කර ඇති බවද ඔහු පැවසීය.

පවතින වසංගත තත්වය හමුවේ විශේෂඥ වෛද්‍ය මතයට කන් දෙන ලෙසද මන්ත‍්‍රීවරයා ඉල්ලා සිටියේය.

මහලූ පුද්ගලයකු වන ජනාධිපති ලේකම්වරයා විසින් චක්‍රලේඛයක් මගින් සියළුම රාජ්‍ය සේවකයන් සේවයට කැඳවූ බවත් එය සිදු කළේ කුමන පදනමක් මතදැයි මන්ත්‍රීවරයා එහිදී  ප්‍රශ්න කළේය.

අද (10) මධ්‍යම රාත්‍රියේ සිට ක්‍රියාත්මක වන පරිදි විවාහ මංගල උත්සව සඳහා සහභාහි විය හැකි සංඛ්‍යාව සංශෝධනය කර ඇති බව යුද හමුදාපති ජෙනරාල් ශවේන්ද්‍ර සිල්වා පවසයි.

ඔහු පවසන ආකාරයට මංගල උත්සවයකට සහභාගී විය හැකි උපරිම සංඛ්‍යාව 50කි.

මේ අතර පළාත් අතර සංචරණ සීමා දැඩි කෙරෙන බවත් යුද හමුදාපතිවරයා පවසා සිටියි.

ඒ අනුව පළාත් අතර සංචරණය කළ හැක්කේ අත්‍යවශ්‍ය රාජකාරී සඳහා අනුයුක්ත පුද්ගලයන්ට පමණය.

හිටපු අමාත්‍ය රිෂාඩ් බදියුදීන් ලබන 18 වැනිදා දක්වා රක්ෂිත බන්ධනාගාරගත කිරීමට කොටුව මහේස්ත්‍රාත් ප්‍රියන්ත ලියනගේ අද (10) නියෝග කළේ ය.

එසේ රක්ෂිත බන්ධනාගාර ගත කරනුයේ ත්‍රස්තවාදය වැළැක්වීමේ පනත යටතේ ලබාගත් රැඳවුම් නියෝග මත අපරාධ පරීක්ෂණ දෙපාර්තමේන්තුවේ රඳවා ප්‍රශ්න කරමින් සිටියදී අද කොටුව මහේස්ත්‍රාත් අධිකරණයට ඉදිරිපත් කිරීමෙන් අනතුරුවයි.

පැමිණිල්ල විසින් සැකකරුට එරෙහිව ඉදිරිපත් කර ඇත්තේ ත්‍රස්තවාදය වැළැක්වීමේ පනත යටතේ ගැනෙන චෝදනා වන බැවින් නඩු විභාගය අවසන් වනතුරු සැකකරු රක්ෂිත බන්ධනාගාරගත කිරීමේ බලය තම අධිකරණයට ඇති බව පෙන්වා දෙමින් මහේස්ත්‍රාත්වරයා එම නියෝගය කළේ ය.

රිෂාඩ් බදියුදීන් මහතා කර්මාන්ත හා වාණිජ කටයුතු අමාත්‍යවරයා ලෙස කටයුතු කරමින් සිටියදී කර්මාන්ත දෙපාර්තමේන්තුවට අයත් අබලි ද්‍රව්‍ය සහ තඹ සිනමන් ග්‍රෑන්ඩ් හෝටලයේ බෝම්බකරු වන ඊබ්‍රාහිම් අහමඩ් නැමැත්තාට අයත් වැල්ලම්පිටිය ප්‍රදේශයේ පිහිටි පුද්ගලික සමාගමට ප්‍රමුඛතාවයක් හිමිකර ලබා දීමෙන් අයුතු ලෙස උපයාගත් මුදල් ත්‍රස්ත ක්‍රියා සඳහා යෙදවීම ඇතුළු චෝදනා යටතේ ඔහුව අද අධිකරණයට ඉදිරිපත් කර තිබුණි.

පාස්කු ඉරුදින ප්‍රහාර මාලාවට අදාළ විමර්ශනය සම්බන්ධයෙන් අපරාධ පරීක්ෂණ දෙපාර්තමේන්තුව මෙම සැකකාර හිටපු අමාත්‍යවරයා අත්අඩංගුවට ගෙන තිබුණේ ඉකුත් අප්‍රේල් මස 24 වැනිදා ය .

කොවිඩ් ආසාදිතයන් ඉහළ යාම හරහා මේ වනවිට රෝහල් පද්ධතිය අර්බුදයට ගොස් ඇති බවත්, මෙම තත්වය තවදුරටත් වර්ධනය වුවහොත් අවාසනාවන්ත තත්වයක් ඇති විය හැකි බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය පවසයි.

එම සංගමයේ සභාපති උපුල් රෝහණ පවසන්නේ ආසාදිතයන් වාර්තා වීම සහ මරණ සිදුවීම පාලනය කිරීමට නම් සංචරණ සීමා දැඩි කිරීම කඩිනමින් සිදුකළ යුතු බවත්, සෞඛ්‍ය අංශයට දරාගත නොහැකි අන්දමින් රෝගීන් වැඩිවීම කඩිනමින් පාලනය කළ යුතු බවත්ය.

තීරණ ගැනීමට පසුබට වන සෑම අවස්ථාවකම තවත් ජීවිත කිහිපයක් අහිමි විය හැකි බව පෙන්වා දෙන උපුල් රෝහණ  පවසන්නේ සියල්ලටම වඩා ජනතාවගේ ජීවිත ආරක්ෂා කිරීම වැදගත් බවයි.

ඉදිරි දින 14 තුළ මරණ සංඛ්‍යාව සහ ආසාදිතයන් සංඛ්‍යාව සීග්‍ර ලෙස ඉහළ යාහැකි බවත්, මේ නිසා සියලුම සමාජ ඒකරාශීවීම් අත්හිටුවීම, පළාත් අතර සංචරණය සම්පූර්ණයෙන් අත්හිටුවීම සිදුකළ යුතු බවද ඔහු සඳහන් කරයි..

බිම් මට්ටමේ පවතින, වසංගතයේ සැබෑ තත්වය නිසි පරිදි ජාතික සංඛ්‍යා ලේඛනවලට ඇතුළත් නොවන බව උපුල් රෝහණ පෙන්වා දෙන අතර,  සංඛ්‍යා ලේඛනවලින් සැබෑ තත්වය අනාවරණය නොවීම බරපතල ගැටලුවක් බවත් ඒ හරහා ජනතාවට වසංගතයේ සැබෑ තත්වය පිළිබඳව අවබෝධයක් නොලැබෙන බවත්  එය වසංගත තත්වය ඉහළ යාමට හේතුවක් වියහැකි බවත් ඔහු පෙන්වා දෙයි.

ශීඝ්‍රයෙන් පැතිර යන කොවිඩ් වසංගතය පාලනය සඳහා අවම වශයෙන් මාසයක්වත් රට වසා දමා නිරෝධායන ඇඳිරි නීතිය පනවන්නැයි සෞඛ්‍ය බලධාරීන් රජයෙන් ඉල්ලීමක් කර ඇතැයි වාර්තා වේ.

රෝගීන් සංඛ්‍යාව ශීඝ්‍රයෙන් ඉහළ යාම සහ මරණ සංඛ්‍යාව දිනෙන් දින වැඩි වීම සෞඛ්‍ය පද්ධතියට දරාගත නොහැකි මට්ටමට පැමිණෙමින් තිබෙන බැවින්, මෙවැනි ක්‍රියා මාර්ගයක් ගැනීම අත්‍යවශ්‍ය බවද ඔවුන් රජයට දැනුම් දී ඇතැයි සෞඛ්‍ය ආරංචි මාර්ග සඳහන් කරයි.

එසේ නොකර සිටීම සුළුකොට නොතැකිය යුතු බව නිවේදනයක් නිකුත් කරමින් ඔවුන් අවධාරණය කරයි.

එසේ කිරීම මගින් බලාපොරොත්තු වන්නේ , දැනට උච්චතම අවස්ථාවට පැමිණ ඇති ප්‍රතිකාර කිරීමේ හැකියාව යම් කිසි තරමකට හොද මට්ටමක පත්වනු ඇති බවයි.

සංචරණ සීමා ප්‍රතිඵලදායීවීමට නම් ඉතා දැඩි ලෙස ක්‍රියාත්මක කරන ඇඳිරි නීති තත්ත්වයක් වුවද ප්‍රකාශ කිරීමට සිදුවිය හැකි බවද තම විශ්වාසය බව විශේෂඥ වෛද්‍යවරුන්ගේ සංගමය නිකුත් කළ නිවේදනයේ සඳහන් ය.

කොවිඩ් ආසාදිතයින් තුන් දහසකට ආසන්න පිරිසක් දෛනිකව වාර්තා වෙමින් තිබෙන අතර,දෛනික මරණ සංඛ්‍යාවද සීයකට ආසන්න වෙමින් තිබේ .

ඉකුත් දින 13 ක කාලය තුළ පමණක් කොරෝනා මරණ දහසකට ආසන්න සංඛ්‍යාවක් වාර්තා වී ඇත.

මේ අතර, බොහෝ රෝහල්වල මෘත ශරීරාගාර ද කොවිඩ් මෘතදේහ වලින් පිරී ගොස් ඇති අතර, රෝහල්වල වාට්ටු ද කොවිඩ් රෝගීන්ගෙන් පිරී පවතී .

මේ තත්වය තුළ රෝහල් ධාරිතාවට දරාගත නොහැකි මට්ටමට රෝගීන් වාර්තා වෙමින් තිබෙන බැවින්, රෝගීන් වාර්තා වීම අවම කර ගැනීම සඳහා කඩිනම් ක්‍රියාමාර්ග වලට යාම අත්‍යවශ්‍ය බව ද තවදුරටත් රෝගය පැතිරීම වැළැක්වීම සඳහා සංචරණ සීමා දැඩි ලෙස පැනවීම අපට ඇති ප්‍රධානම අවිය ලෙස සැලකිය යුතු බව සිය හැඟීම බව ද විශේෂඥ වෛද්‍යවරුන්ගේ සංගමය අවධාරණය කර සිටියි.

ආනයනික කිරිපිටි සඳහා අයකරන බදු සංශෝධනය කිරීමට ආණ්ඩුව කටයුතු කරමින් සිටින බව ඉතාමත් විශ්වාස කටයුතු ආරංචිමාර්ග පවසයි.

ආණ්ඩුව විසින් ආනයනික කිරිපිටි සඳහා අයකරන බදු මුදල් වැඩි කිරීමත් සමඟ කිරිපිටි සමාගම් විසින් ආනයනය සිමා කිරීම නිසා වෙළඳපොලේ කිරිපිටි හිඟයක් ඇතිවී තිබේ.

ශ්‍රී ලංකාවේ දෛනික කිරි අවශ්‍යතාවය, දේශිය කිරි නිෂ්පාදන ධාරිතාවය, දේශීය කිරි නිෂ්පාදනය වැඩි කිරීමේ සැලසුම් වැනි මූලික කරුණු ගැන වත් සැලකීමක් නොදක්වා ආණ්ඩුව විසින් විටින් විට ගන්නා මෙවැනි තීරණ ‘රිවර්ස්’ කිරීම හැර වෙනත් විකල්පයක් නැතැයි මුදල් අමාත්‍යංශ නිළධාරියෙක් ලංකාටෲත් වෙත පවසා ඇත.

ශ්‍රි ලංකාවේ මේ වන විට දිනකට වන මරණ අනුපාතය ඉන්දියාවේ මෙන් 10 ගුණයක් යැයි රජරට විශ්වවිද්‍යාලයේ වෛද්‍ය පීඨ මහාචාර්ය සුනෙත් අගම්පොඩි පවසයි.

ඒ, සිය ට්ව්ටර් ගිණුම හරහා සංඛාලේඛන සහිතව ප්‍රකාශයක් නිකුත් කරමිනි.

එසේම මහාචාර්යවරයා පවසන්නේ, ශ්‍රී ලංකාවේ මේ වන විට සිදුවන කොරෝනා මරණ සමාන්‍යය ඉන්දියාවේ උපරිම කොරොනා මරණ සිදුවූ අවස්ථාවටත් වඩා ඉහළ අගයක් ගන්නා බවය.

මීට පෙරද මහාචාර්ය අගම්පොඩි ට්විටර් පනිවිඩයක් නිකුත් කරමින් පවසා සිටියේ ශ්‍රී ලංකාවේ ආණ්ඩුව විසින් ඩෙල්ටා ප්‍රභේදයට අභියෝග කිරිමට ගත් ප්‍රවේශය හේතුවෙන් දිනකට පුද්ගලයන් 150-200 ක් පමණ ආදාහනය කල හැකි සමූහ ආදාහනාගාර ඉදිකිරිමට කාලය පැමිණ ඇති බවයි.

අදාළ දත්ත වගු පහත පරිදි මහාචාර්යවරයා විසින් ට්වීටර් ගිණුමට එක්කර තිබිණ.

තවත් කොරෝනා මරණ 111 ක් සෞඛ්‍ය අධ්‍යක්ෂක ජනරාල්වරයා විසින් තහවුරු කර , අද (09) රජයේ ප්‍රවෘත්ති අධ්‍යක්ෂ ජනරාල් විසින් නිවේදනය කර ඇත.

එය මෙතෙක් මෙරටින් වාර්තා වූ දෛනික ඉහලම මරණ ප‍්‍රමාණයයි.

අදාළ නිවේදනය පහත දැක්වෙයි.

නිරෝධායනය නොකළ පවුලක මරණයක් නම් PCR නෑ !

මේ අතර කළුතර ජාතික සෞඛ්‍ය විද්‍යායතනයේ අධ්‍යක්ෂක වෛද්‍ය තමර කළුබෝවිල උපුටා දක්වමින් ලංකාදීප වෙබ් අඩවිය වාර්තා කර ඇත්තේ, නිරෝධානය නොකල පවුලක යම් සාමාජිකයකු මියගියහොත් ඔහුගේ මළ සිරුර පි.සි.ආර් පරීක්ෂණයකින් තොරව හා පශ්චාත් මරණ පරීක්ෂණයකින් තොරව ඥාතීන්ට මුදා හැරීමේ බලය අධිකරණ අමාත්‍යාංශය මගින් මරණ පරීක්ෂකවරුන්ට පැවරූ බවය.

අදාළ පුවතේ වැඩිදුරටත් මෙසේද සඳහන් වෙයි.

සෞඛ්‍ය සේවා අධ්‍යක්ෂ ජනරාල්වරයා ඒ පිළිබඳ අධිකරණ අමාත්‍යාංශය දැනුම්වත් කිරීමෙන් අනතුරුව මේ සම්බන්ධයෙන් මරණ පරීක්ෂකවරුන්ට ලිඛිතව මේ වනවිටත් දන්වා ඇතැයි වෛද්‍යවරයා අධ්‍යක්ෂවරයා කීය .

යම් පුද්ගලයකු නිවසේදී හෝ රෝහලක දී මියගියහොත් ඔහුගේ හෝ ඇයගේ මළ සිරුර පශ්චාත් මරණ පරීක්ෂණය පැවැත්වීමට පෙර පි.සි.ආර්.පරීක්ෂණ සිදු කිරීම සඳහා රෝහල්වල මෘත ශරීරාගාරවල තැන්පත් කර තිබීමෙන් මෘත ශරීරාගාරවල ඇතිවන තදබදය අවම කිරීම සඳහා මෙම පියවර ගෙන ඇත.

යම් පුද්ගලයෙක් සැකකටයුතු අයුරින් මියගොස් තිබුනොත් හෝ සියදිවි නසාගෙන මියගොස් තිබුනොත් සුපුරුදු නීතිමය කර්තව්‍යයන් සිදු කරන බව අධ්‍යක්ෂකවරයා කිය

මෙම තීරණය හේතුවෙන් රෝහල්වල මෘත ශරීරාගාරවල මළ සිරුරු තැන්පත් කිරීමේදී පවතින ගැටලු සහගත තත්ත්වයන්වලට පිළියමක් වනු ඇතැයි වෛද්‍ය අධ්‍යක්ෂවරයා වැඩිදුරටත් පැවසීය.

උද්ඝෝෂණයේ සහ විරෝධය දැක්වීමේ අයිතිය උල්ලංඝනය කරමින් දිවයින පුරා උද්ඝෝෂණ ව්‍යාපාරවල යෙදුණු ගුරුවරුන් සහ විදුහල්පතිවරුන්ව අනීතික ලෙස පොලිසිය විසින් අත්අඩංගුවට ගැනීමට එරෙහිව ගුරු - විදුහල්පති වෘත්තීය සමිති සන්ධානය පොලිස්පතිවරයාට ලිඛිතව පැමිණිලි කර ඇත.

මෙරට ප්‍රබලම ගුරු සංවිධාන 24ක් නියෝජනය කරමින් අදාළ පැමිණිල්ල අද (09) සිදුකර තිබේ.

එහිදී 2021 අගෝස්තු 04 වනදා කොළඹ පැවති විරෝධතා උද්ඝෝෂණයට සහභාගීවී පෙරළා යමින් සිටි ගුරුවරුන් - විදුහල්පතිවරුන් ඇතුළු 44 දෙනෙකු පොලිසිය විසින් ස්ථාන කිහිපයකදී අත්අඩංගුවට ගැනීම ඇතුළු දීප ව්‍යාප්තව පැවති තවත් ගුරු - විදුහල්පති විරෝධතා වලදී සිදුව ඇති අත්අඩංගුවට ගැනීම් සම්බන්ධව එහිදී පොලිස්පතිවරයාට පෙන්වාදී ඇත.

එහිදී ඔවුන් ඉල්ලා ඇත්තේ, පොලිසියේ මේ අත්තනෝමතික ක්‍රියාව වළක්වන ලෙසය.

ගුරු - විදුහල්පති වෘත්තීය සමිති සන්ධානය විසින් පොලිස්පතිට යොමුකළ අදාළ ලිපිය පහත දැක්වෙයි.

මෑත කාලීනව ප්‍රජාතන්ත්‍රවාදී ලෙසත් සාමකාමී ලෙසත් ගෙන ගිය විරෝධතා මර්දනය කිරීමට ආණ්ඩුව විසින් ගන්නා ලද උත්සාහයන්ට විරෝධය දැක්වීමට විශ්වවිද්‍යාලයීය ආචාර්යවරුන්ගේ සමිති සම්මේලනය සංකේත වර්ජනයක් කැඳවා ඇත.

ඒ අනුව විශ්වවිද්‍යාලයීය ආචාර්යවරුන්ගේ සමිති සම්මේලනය නිකුත් කළ නිවේදනයක දැක්වෙන්නේ අදාළ සංකේත වර්ජනය හෙට (10) කැඳවීමටය.

මේ පිළිබඳ අදාළ නිවේදනයේ වැඩිදුරටත් මෙසේද සඳහන් වෙයි.

“විශ්වවිද්‍යාලයීය ආචාර්යවරුන්ගේ සමිති සම්මේලනය 2021.08.06 දින කැඳවූ හදිසි නියෝජිත මණ්ඩල රැස්වීමේ දී කොතලාවල ජාතික ආරක්‍ෂක විශ්වවිද්‍යාලයීය පනත් කෙටුම් පතට සහ අධ්‍යාපන ක්ෂේත්‍රයේ වෙනත් අසාධාරණකම්වලට එරෙහිව සංවිධානය කර තිබූ සාමකාමී විරෝධතා ව්‍යාපාර මැඩපැවැත්වීම සඳහා රජය විසින් අනුගමනය කරන ලද බියගැන්වීමේ හා හිරිහැර කිරීමේ උපක්‍රමවලින් සමන්විත වූ මෑත සිදුවීම් මාලාව පිළිබඳව සාකච්ඡාට ගැණින.

ප්‍රජාතන්ත්‍රවාදී හා සාධාරණ අරගල මැඩපැවැත්වීම සඳහා, විශ්වවිද්‍යාලයීය ආචාර්යවරුන්ගේ සමිති සම්මේලනයේ සාමාජිකයින් සහ අනෙකුත් පාර්ශවයන් තුළ භීතියක් ඇති කිරීමට උත්සාහ කිරීමේ රජයේ උපක්‍රමය සහෝදර සංගම් නියෝජිතයින්ගේ දැඩි කණස්සල්ලට සහ අප්‍රසාදයට ලක්විය. අප සාමාජිකයන් ද මෙම මර්දනයේ ඉතා ඉක්මන් ඉලක්ක බවට පත් විය හැකි බව පුරෝකථනය කළ මණ්ඩලය නොපමාව ක්‍රියාමාර්ග ගත යුතු බව ද ඒකමතිකව තීරණය කරන ලදී. රජයේ මෙම මර්දනකාරී ක්‍රියාකලාපය පිළිබඳව විරෝධය පළ කිරීම සඳහා ක්‍රියාකාරකම් මාලාවක් තීරණය කළ සංගමය, එහි එක් පියවරක් ලෙස සියලුම සහෝදර සංගම්වල පූර්ණ අනුමැතිය සහ සහයෝගය ඇතිව 2021 අගෝස්තු 10 එක් දින සංකේත වර්ජනයක් සියලුම රාජ්‍ය විශ්වවිද්‍යාලයන්හී ක්‍රියාත්මක කිරමට තීරණය කරන ලදී.”

මෙරට නගරවල ගෑස් කඩ අසල දිගු ගෑස් පොලම් දක්නට ඇතැයි සමාජ මාධ්‍ය වාර්තා වල දැක්වෙයි.

දැනට සති කිහිපයක සිට වෙළඳපොල තුළ ලාෆ් (කහ ) ගෑස් බෙදාහැරීම නැවතී ඇත. එසේම මේ වන විට වාර්තා වන්නේ ලිට්‍රෝ (නිල් ) ගෑස් ලැබීමේද ප්‍රමාදයක් ඇති බවයි.

මාතර ඇතුළු නගර කිහිපයක හිස් ගෑස් ටැංකි තබා ගත් පිරිස් ගෑස් මිලදී ගැනීමේ අරමුණින් පොලිම්වල සිටින අයුරු දැක්වෙන ජායාරූප තවදුරටත් සමාජ මාධ්‍ය ජාල අතර හුවමාරු වෙමින් තිබෙයි.

හර්ෂගේ අනතුරු ඇඟවීම !

මේ අතර විපක්ෂනායක කාර්යාලයේ පැවති මාධ්‍ය හමුවකදී අදහස් දක්වමින් පාර්ලිමේන්තු මන්ත්‍රී හර්ෂ ද සිල්වා පවසන්නේ ශ්‍රී ලංකාවට ඉදිරියේදී ඉන්ධන ආනයනය නැවතීමට ඉඩ ඇති බවට බලශක්ති ඇමතිවරයා අනතුරු අඟවා ඇති බවයි.

ඉන්ධන සැපයුම අඩාල වුවහොත් රටේ ජනතාව දැවැන්ත අර්බුදයකට මුහුණ දෙනු ඇති බවද ඔහු පැවසීය.

දැනටමත් මෙරට ගෑස් ආනයන සමාගමක් ගෑස් ආනයනය නවතා ඇති බවත් ඉන් අසරණ වූ පාරිභෝගිකයන්ට තවමත් විසඳුම් ලැබී නැති බවත් ඔහු කියා සිටී.

කිරිපිටි ආනයනය අත්හිටුවීමට ද සමාගම් තීරණය කර ඇති ඇති නිසා වෙළඳපල තුල කිරිපිටි හිගයක් ඇති වී තිබෙන බවද ඔහු පැවසීය.

කොරෝනා වසංගතයක් සමඟ ඇතිව තිබෙන ආර්ථික අර්බුදයට කිසිදු විසඳුමක් ලබාදීමට ආණ්ඩුවට නොහැකි වී ඇතැයිද ඔහු කියා සිටියේය.

ලෝ ප්‍රකට අන්තර්ජාතික පුවත් සේවාවක් වන ඇසෝෂියේටඩ් ප්‍රෙස් (AP) විසින් එහි ප්‍රධාන විධායක නිලධාරී තනතුර සඳහා ශ්‍රී ලාංකික සම්භවයක් සහිත කාන්තාවක් සහ ආයතනයේ ජ්‍යේෂ්ඨයෙකු වන ඩේසි වීරසිංහම් පත් කර ඇත. මෙම පත්වීම, 2022 ජනවාරි 01 දා පටන් ක්‍රියාත්මක වේ.

ඩේසි වීරසිංහම්, මේ වන විට AP හි විධායක උප සභාපතිනිය සහ ප්‍රධාන මෙහෙයුම් නිලධාරිනිය ලෙස කටයුතු කරයි.

ඇසෝෂියේටඩ් පුවත් සේවයේ වසර 175 ක කීර්තිමත් ඉතිහාසය තුළ එහි ඉහළම තනතුර සඳහා කාන්තාවක පත් වන පළමු අවස්ථාව මෙයයි. තවද එම තනතුරට පත් වන පළමු සුදු ජාතික නොවන කාන්තාව මෙන්ම පළමු අන්තර්ජාතික පුරවැසියා වන්නේ ද ඇයයි.

51 හැවිරිදි ඩේසි වීරසිංහම්, බ්‍රිතාන්‍ය ජාතිකයෙකු වුවද, ඇගේ සම්භවය ශ්‍රී ලංකාවේ ය. ඇගේ දෙමාපියන් ශ්‍රී ලංකාවෙන් 1970 දශකයට පෙර බ්‍රිතාන්‍යයට සංක්‍රමණය වූ දමිල ජාතිකයන් වේ.

පුරා වසර 17 ක් ඩේසි වීරසිංහම් ඇසෝෂියේටඩ් ප්‍රෙස් පුවත් ආයතනය සමග කටයුතු කර ඇති අතර, පුවත් සේවය ඩිජිටල්කරණයට ලක් කරමින් සජීවී වීඩියෝ විකාශ යනාදිය සමග එය නව තාක්ෂණය වෙත කැඳවාගෙන යන්නට සමත් වූවාය. එමගින් පුවත් සේවයේ ග්‍රාහකයන්ගේ විවිධාංගීකරණය ඉහළ ගියේය. ප්‍රධාන ආදායම් නිලධාරිනිය වශයෙන් ද ඇය විශාල වැඩ කොටසක් සිදුකර තිබේ. මාධ්‍ය වේදයේ නව ව්‍යාපාර ආකෘති හඳුන්වා දීම ද ඇගේ විෂයන් අතර වේ. 2004 වසෙර්දී ඩේසි වීරසිංහම් ඇසෝෂියේටඩ් පුවත් සේවය සමග එක් වන්නේ අලෙවි අධ්‍යක්ෂවරිය ලෙස ය. AP Global Media Services සහ වීඩියෝ අන්තර්ගතයන් සම්බන්ධයෙන් යුරෝපය, මැද පෙරදිග, අප්‍රිකාව, ආසියාව සහ ඔස්ට්‍රේලියාව යන කලාපවල ට සපයන අන්තර්ගනයන්ගේ වරලත් බව ලබාදීම (licensing) ඇයට පැවරී තිබිණි. එහිදී ඇය ඉහළ සාර්ථකත්වයක් පෙන්වා තිබේ. නීති උපාධියක් සහිත ඩේසි, මීට පෙර ෆයිනෑන්ෂියල් ටයිම්ස් වැනි මාධ්‍ය ආයතනවල ද සේවය කර ඇත.

අසෝෂියේටඩ් ප්‍රෙස් මාධ්‍යවේදීන්, මාධ්‍යකරණය සඳහා පිදෙන ඉහළම අන්තර්ජාතික සම්මානය සේ සැලකෙන පුලිට්සර් සම්මාන 6 ක් දිනා ඇති අතර, ලෝකයේ මහජන සේවා මාධ්‍යකරණය සඳහා පිදෙන පළමු රන් පදක්කම දිනා ගත්තේ ද ඔවුන් විසිනි.

‘‘මේ තනතුරට ඩේසි තරම් සුදුසු වෙන අයෙකු නැති බව මගේ හැඟීමයි. ඇගේ අත්දැකීම්, විනිශ්චයන් සහ අගනාකම් විසින් ඇසෝෂියේටඩ් ප්‍රෙස් වෙතට අනර්ඝ නායකත්වයක් සපයනු ඇති.‘‘ එසේ ඇයට සුබ පතන්නේ මාධ්‍ය ආයතනයේ අධ්‍යක්ෂ මණ්ඩල සභාපති ස්ටීවන් ආර්. ස්වාට්ස් විසිනි.

‘‘ඩේසි වීරසිංහම්, තමන් නායිකාවක බව සනාථ කළ අයෙක්. අනාගතය පිළිබඳ පැහැදිලි දැක්මක් ඇය සතුයි..‘‘ යනුවෙන් AP පුවත් සේවය, සිය මාධ්‍ය ආයතනයේ සුක්කානම භාර ගැනීමට නියමිත ඉතිහාසයේ පළමු කාන්තාව පිළිබඳ කියා තිබේ.

ලොවෙන් අඩක් AP ග්‍රාහකයන් ය.

ලෝකයෙන් භාගයක් පමණ ඇසෝෂියේටඩ් ප්‍රෙස් ග්‍රාහකයන් බවට දිනපතා පත් වන බව මේ අතර වාර්තා වේ. මේ අනුව ඇය ප්‍රධාන තනතුරට පත් වන්නේ ලෝකයෙන් භාගයක්ම ඇසුරු කරන මාධ්‍යයක ය. වසර 15කට පසු ප්‍රථම වතාවට, ඇසෝෂියේටඩ් ප්‍රෙස්හි ආදායමෙන් 40%ක් ලැබෙන්නේ ඇමරිකාවෙන් පිටත ලබාදෙන පුවත් සේවාවන්ගෙනි.

ඇසෝෂියේටඩ් ප්‍රෙස් පුවත් සේවය ප්‍රවෘත්ති 2,000 ක්, ඡායාරූප 3,000 ක් සහ වීඩියෝ 200 ක් ලබාදෙයි. අපක්ෂපාතී බව සහ කරුණු මත පදනම් වූ ප්‍රවෘත්ති මූලාශ්‍රයක් ලෙස කටයුතු කිරීම ඔවුන්ගේ වසර 175 ක සාර්ථකත්වයේ රහසයි.

අමාලි ජයවීර - www.outboundtoday.com

දැනට රට තුළ පවතින වසංගත තත්වය හේතුවෙන් කලින් සැලසුම් කර තිබූ පරිදි එළැඹෙන මස මුල් සතියේ පාසල් යළි විවෘත කිරීම අවිනිශ්චිත බව අධ්‍යාපන ඇමැති මහාචාර්ය ජී. එල් පීරිස් සදහන් කරයි.

ඇමතිවරයා බව කියා සිටියේ ශ්‍රී ලංකා පොදුජන පෙරමුණේ පැවති මූලස්ථානයේ පැවැති මාධ්‍ය හමුවකදී අදහස් දක්වමිනි.

අගෝස්තු මස අවසන් වීමට ප්‍රථම සියලු ගුරුවරුන්ටත් අනධ්‍යන කාර්ය මණ්ඩලයවලටත් එන්නත් ලබා දී ඉන් අනතුරුව සැප්තැම්බර් මුල් සතියේ ක්‍රමානුකූලව පාසැල් විවෘත කිරීමට කලින් සැලසුම් කර තිබූ බවත් ඔහු පැවසීය.

නමුත් පවතින වසංගත තත්වය යටතේ එය කළ නොහැකි බවත් ගුරු වෘත්තීය සමිති විසින් දැනට ක්‍රියාත්මක කරන වෘත්තීය ක්‍රියාමාර්ගය ද ඊට බලපෑ බවත් ඔහු සඳහන් කළේය.

කිරිපිටි වෙළෙඳපොළේ හිඟ වුණේ ඇයි ? ඇත්ත හේතුව අපි සොයා බැලුවෙමු.

කිරිපිටි ක්ෂණිකව සැඟවෙන්නේ මිල වැඩි කිරීමේ යෝජනාවත් සමගය.

-සමාගම් මිල වැඩි කරන්න ඉල්ලනවා.

-රජය තවමත් ඒ ගැන හිතනවා.

-ජනතාව දැන් කිරිපිටි නැතිව වෙළෙඳපොළේ රස්තියාදු වනු ඇත.

මෙරට මාසික කිරිපිටි පරිභෝජනය මෙට්‍රික් ටොන් 6500 ක් පමණ වේ. මෙරටට කිරිපිටි ආනයනය සඳහා වාර්ෂිකව වැය කළ මුදල අමෙරිකානු ඩොලර් මිලියන 360 කි.

මහජන අයිතීන් සුරැකීමේ සංවිධානයේ කැඳවුම්කරු අසේල සම්පත්,

ඩොලර් නැති හින්දා හෝ වෙනයම් කාරණයක් නිසා හෝ ආනයනය නවත්වලා කිරිපිටි පැකට් එකක්වත් හොයා ගන්න වෙන්නේ නැහැ. අපි කතා කරා සමාගම්වලට. කතා කරලා ඇහුවම මොකද කිව්වේ පිටිකිරි කිලෝ එකක් ලංකාවට ගොඩ බාන්න 1200 ගාණක් යනවා. අපි කොහොමද 900 ගාණට දෙන්නේ කියල. දැන් පිටිකිරි හිඟයක් එනකොට ආණ්ඩුවට කියන්න පුළුවන්නේ රයිට් පිටිකිරි ප්‍රශ්නයක් නැහැ. බීපල්ලා එළකිරි. චුන් පාන් වහනේ වගේ උදේපාන්දර එනාව එළිකිරි බොතලේ ගෙදරට.  පුළුවන් නම් කියන්න බලන්න ඇමති කෙනෙක් ඒ කතාව. කරුණාකාරලා මොකද්ද මේ කිරිපිටි ගැටලුට රටට හෙළි කරන්න. හෙට අනිද්දා කිරිපිටි ඕනේ නැහැ ප්‍රතිශක්තිකරණයට බොමු බාන් වැල් ගැට. කොත්තමල්ලි. අනිවාර්යෙන්ම ඒකත් කියයි

ප්‍රධාන විධායක නිලධාරී ආරිය කිරි සමාගම ලක්ෂ්මන් වීරසූරිය,

අපි මිල වැඩි කරන්න ඉල්ලන්නේ මාස ගාණක ඉඳලා. ඩොලරය වැඩි වෙලා. ආනයනයේදී කිලෝ එකක මිලත් වැඩියි විශාල පිරිවැයක් යනවා. කිලෝ එකකින් 270 ක් පාඩුයි.

වෙළෙඳ අමාත්‍ය බන්දුල ගුණර්ධන ,

කිරිපිටි නිෂ්පාදන සමාගම් විශාල අනුපාතයකින් මිල ඉහළ නංවන්න අවසර ඉල්ලලා තියෙනවා පාරිභෝගික කටයුතු අධිකාරියෙන්. නමුත් අපිට අවසර දෙන්න පුළුවන්කමක් නැහැ මේ අවස්ථාවේ. මේ රටේ හැම ජනතාව කැප කිරීම් කරලා තියෙන්නේ. කිරිපිටි සමාගම් වෙළෙඳපොළ හොඳට තියෙන කොට අධික ලාභ ලබලා තියෙනවා. දීර්ඝ කාලයක් තිස්සේ. විපතක් වුණාම විපතෙන් කොටසක් ඒ අයත් විඳදරා ගන්න ඕනේ. පහසු ක්‍රමය තමයි ඕන තරම් කිරිපිටි දෙන්නම් කියලා රු. 200 කින් විතර කිරිපිටි මිල වැඩි කලොත් කිරිපිටි වෙළෙදපොළ පිරෙනවා ඒක කරන්න දුන්නොත් බොහො පීඩාවට පත්වෙච්ච ජනතාව අන්ත අසීරුතාවයක් වෙනවා

මේ අර්බුදයට විසඳුම කුමක් ද?

පශු සම්පත්, ගොවිපොල ප්‍රවර්ධන හා කිරි හා බිත්තර ආශ්‍රිත රාජ්‍ය අමාත්‍ය ඩී.බී.හේරත් , 

අද වෙනකොට නවත්වන්න හදනවා නෙවෙයි, අපි 40% යි අපිට ඕන ප්‍රමාණය හදන්නේ. අපි ඒක 40% ඉදලා 100% කින් සම්පුර්ණ වෙන්න ඕනේ. එහෙම වුණාම තමයි අපි කිරි පිටරටින් ගෙන්වන එක නවත්වන්නේ. පාරිභෝගිකයා තෘප්තිමත් කරන්න ඕනේ. හැබැයි අපි කිරිවලින් ස්වයංපෝශිත කරන්න ඕනේ. කිරිවලින් ස්වයංපෝශිත වනවා කියන්නේ පිටරටින් ආනයනය කරන එක නවත්වනවා. ඒක තමයි අපේ වෑයම. ඒක අපිට ක්ෂණිකව කරන්න බැරි වෙයි. හැබැයි අවුරුදු 2-3 ක ඉලක්කයක් එක්ක, කිරිවලින් ස්වංපෝහිත වන වැඩපිළිවෙළකට යන්න අපි සුදානම් කරලා තියෙනවා

වෙළෙඳපොළෙන් කිරිපිටි ක්ෂණිකව අතුරුදන් වීමට ආසන්න හේතුව මිල වැඩි කිරීමේ ඉල්ලීම  සහ රජයේ ප්‍රතිචාර ප්‍රමාද වීම.

වෙළෙඳ ඇමතිවරයාගේ ස්ථාවරය මිල වැඩි නොකිරීමයි.

එය පාරිභෝගිකයාට සහනයක්.

එහෙත් වෙළෙඳපොළේ කිරිපිටි නැතිවීම පාරිභෝගිකයාට අසහනයක්.

ශ්‍රී ජයවර්ධනපුර විශ්වවිද්‍යාලයේ කළමනාකරණ හා වාණිජ විද්‍යා පීඨයේ මහාචාර්ය ජනක් කුමාරසිංහ,

මේ කිරි පිටි හිඟය ඇතිවෙන්න බලපාන ප්‍රධානම ප්‍රශ්නයක් තමයි පහුගිය කාලය තුළ දිගින් දිගටම මතු කරපු විදේශ විනිමය අර්බුධය. කිරි පිටි ඩොලර් දීලා ලංකාවට ගෙන්පුහාම ඒ ඩොලර්වලින් ගෙනව භාණ්ඩවල මිල දේශීය වෙළෙඳපොළේ ඉහළ ගියා. මොකද පිරිවැය වැඩියි. විශේෂයෙන්ම විදේශ විනිමය හිඟ වීම නිසා තමයි මේ අර්බුදයටත් අපි මුහුණ දෙන්නේ. ඒ නිසා ඉතාම ඉක්මනින් මේ විදේශ විනිමය අර්බුදයට කෙටි කාලීන හා දිගු කාලීන පිළිතුරු අපි සොයා ගත්තේ නැත්නම් අපි තව තවත් භාණ්ඩවර්ග මේ අර්බුදයට එකතු වෙන්න පුළුවන්.

(ගුවන් විදුලියේ මාර යුද්ධයක් !) යන ශීර්ෂයෙන් යුතුව අප වෙබ් අඩවියේ පළවූ පුවත සම්බන්ධව , ශ්‍රී ලංකා ගුවන් විදුලි සංස්ථාවේ අධ්‍යක්ෂ ජනරාල් චන්ද්‍රපාල ලියනගේ ගේ නිල තනතුරෙහි විද්‍යුත් තැපෑල හරහා පිළිතුරක් එවා ඇත.

ඒ ගුවන් විදුලි සංස්ථාවේ ආණ්ඩු පාර්ශවයේ වෘත්තීය සමිති නායකයන් විසින් ,ශ්‍රී ලංකා පොදුජන පෙරමුණ, වෘත්තීය සමිති ජාතික මධ්‍යස්ථානයේ ප්‍රධාන ලේකම් වෙත යොමුකළ ලිපියකි.

පිළිතුරුදීමේ අයිතිය පිළිගන්නා වෙබ් අඩවියක් ලෙස අප එය කිසිඳු සංස්කරණයකින් තොරව ගුවන් විදුලි සංස්ථාවේ අධ්‍යක්ෂ ජනරාල් යොමුකළ සටහන සහ පිලිය පහත පළකරමු.

"ඉහත කරුණට අදාළව එම ප්‍රවෘත්තිය සම්බන්ධයෙන් එම සාකච්ඡාවට සම්බන්ධ වී කටයුතු කළ වෘත්තීය සමිති නියෝජිතයන් ගේ අත්සනින් ඉදිරිපත් කරන කරුණු පැහැදිලි කිරීම මේ සමඟ යොමු කරන අතර, එම කරුණු පිළිබඳ තොරතුරු ඔබ ඉදිරිපත් කළ ප්‍රවෘත්තියට හා සමාන වටිනාකමකින් යුතුව ඉදිරිපත් කරන ලෙසත් ඇමුණුමක් ලෙස එම ලිපිය පළ කරන ලෙසත් දන්වා සිටිමි."

නීතිඥ සුමිත් විජේසිංහ මහතා, ප්‍රධාන ලේකම්, ශ්‍රී ලංකා පොදුජන පෙරමුණ, වෘත්තීය සමිති ජාතික මධ්‍යස්ථානය, නෙලුම් මාවත, බත්තරමුල්ල.

මහත්මයාණෙනි,

සමාජ මාධ්‍ය ඔස්සේ පළ වූ තොරතුරු නිවැරදි කිරීම සම්බන්ධවයි.

ශ්‍රී ලංකා ගුවන් විදුලි සංස්ථා වෘත්තීය සමිති විධායක සභාව ඔබතුමාගේ මූලිකත්වයෙන් පසුගිය බ්‍රහස්පතින්දා (2021.07.27) ජාතික විධායක සභාව සමඟ පැවැති සාකච්ඡාව පිළිබඳව සමාජ මාධ්‍ය වල කරුණු වාර්තා කර තිබුණු අතර එම කරුණු සම්පූර්ණයෙන්ම සත්‍යයෙන් තොරය.

එම සාකච්ඡාව කිසිවිටෙකත් වත්මන් සංස්ථා සභාපති හඩ්සන් සමරසිංහ මහතා පලවා හැරීමට හෝ ඉවත් කිරීම වෙනුවෙන් සිදුකරන ලද්දක් නොවන බව වගකීමෙන් ප්‍රකාශ කරමු. එමෙන්ම එය රැස්වූයේ සංස්ථා අධ්‍යක්ෂ ජනරාල් චන්ද්‍රපාල ලියනගේ මහතාගේ උපදෙස් පරිදි බවද සඳහන්ව තිබුණි. එයද පදනම් විරහිත අසත්‍ය ප්‍රකාශයකි.

සංස්ථා වෘත්තීය සමිති ශාඛා සභාපති, ලේකම් ප්‍රමුඛ පිරිස එම අවස්ථාවට සහභාගි වූයේ වෘත්තීය සමිතිය තුළ පවතින කරුණු කිහිපයක් සාකච්ඡා කිරීම උදෙසා බවත් එම කැඳවීම පක්ෂ ප්‍රධාන කාර්යාල වෘත්තීය සමිති ජාතික මධ්‍යස්ථානය විසින් සිදුකරන ලද්දක් බවද සඳහන් කරමු.

අප වෘත්තීය සමිති සභාපති සුසන්ත කරුණාසිංහ මහතා එම සාකච්ඡාවේදී සංස්ථා සභාපති වෙනුවෙන් පෙනී සිටි බව එම ලිපියේ වැඩිදුරටත් සඳහන් වේ. නමුත් එවැනි පෙනී සිටීමක් සිදු නොවුණු බවත් එවැනි පෙනී සිටීමක් අවශ්‍ය නොවන බවත් සාමූහිකව ප්‍රකාශ කරන්නෙමු. මෙවැනි අසත්‍ය ප්‍රචාර සමාජගත වීම ජාතික ආයතනයක් වන අප සංස්ථාවටත් එහි පරිපාලනයටත් සේවකයින්ටත් හානියක් සේම කැළලකි. එමෙන්ම අප පක්ෂයේ ජාතික වෘත්තීය සමිතිය ක්‍රියාකාරීත්වයටද අප්‍රසාදයකි. එබැවින් මෙම කරුණ පිළිබඳව අදාළ අංශ දැනුවත් කරන ලෙසත් මෙවැනි අසත්‍ය මත පතුරන්නන් පිළිබඳව විධිමත් පරීක්ෂණයක් සිදුකර දෙන ලෙස මෙයින් ඉල්ලා සිටිමු.

මෙයට,

සභාපති - සුසන්ත කරුණාසිංහ.

ලේකම් - කේ.එම් සුධර්මා කුලතුංග.

භාණ්ඩාගාරික - සංජීව ජයතිලක.

සංවිධායක - මංජුල සෙනෙවිරත්න.

උපදේශක - තුෂාර සන්දනායක.

පිටපත් :

සභාපති,

ශ්‍රී ලංකා ගුවන් විදුලි සංස්ථාව.

අධ්‍යක්ෂ ජනරාල්, ශ්‍රී ලංකා ගුවන් විදුලි සංස්ථාව.