පුවත්

"රුපියල් 65 ට රටට ගොඩබාපු සීනි කිලෝව අද රු. 220 ට විකුණනවා. රු. 84 ට තිබ්බ පරිප්පු අද, 240 යි. ඇමති කියනවා අසධාරණයි, හැබැයි කරන්න දෙයක් නෑ කියලා. බැංකු, මුල්‍ය ආයතන, ලැයිස්තුගත සමාගම්වල ගිණුම් වාර්තා පත්තරවල යනවා. ඔවුන්ගේ ලාභය දෙතුන් ගුණයකින් වැඩිවෙලා. සිය ව්‍යාපාරික ගජමිතුරන්ට ලාභ හොයන්න බදු සහන දුන් ආණ්ඩුව දැන් අන්ත දිළින්දන්ගේ බඩට ගහලා බදු සල්ලි හොයා ගන්න හදනවා" යැයි මන්ත්‍රීනී රෝහිණී කවිරත්න චෝදනා කරයි.

මාධ්‍ය නිවේදනයක් නිකුත් කරමින් මන්ත්‍රීවරිය මෙසේ චෝදනා නගන අතර අදාළ නිවේදනයේ වැඩිදුරටත් මෙසේද සඳහන් වෙයි.

මේ ආණ්ඩුව බලයට ඇවිත් 2019 නොවැ. 27 පළමු කැබිනට්ටුවේ, පළමු රැස්වීමේ දී කරපු පළමු වැඩේ ඡන්දෙට වියදම් කරපු ගජමිතුරන්නට බදු සහන ලබාදීමයි. උපයන විට බද්ධ, වැට් බද්ධ, ජාතිය ගොඩනැගිමේ බද්ධ. කොටස් වෙළෙඳපොල බද්ද ආදී එකි මෙකී හැම බද්ධක්ම අඩු කරලා භාණ්ඩාගාරයේ ආදායම රුපියල් බිලියන 500කට වැඩි ප්‍රමාණයකින් ආණ්ඩුව අඩු කර ගත්තා. දැන් රජයේ සේවකයින්ගෙන්, පඩිය හිඟා කනවා. දැන් රට කරන්න දිගට හරහට ආණ්ඩුව සල්ලි අච්චු ගහනවා. අගෝස්තු 20 දවසට රු.බිලියන 29 ක් අච්චු ගැහුවා. අද මහ බැංකුව කියන්නේ සල්ලි අච්චු ගහන මැෂිමක්. මුදල් අමාත්‍යාංශයේ ලේකම් කරන්නේ මුද්‍රණාලයාධිපති ගේ වැඩේ. මුදල් ලේකම් සල්ලි ඉල්ලලා ලියුම් ලියලා සල්ලි ඉල්ලලා, එයාම මුදල් මණ්ඩලයේ සාමාජිකයෙක් විදිහට වාඩි වෙලා සල්ලි අච්චු ගහන්න අවසර දෙනවා.

මුදල් රාජ්‍ය ඇමති, මුදල් ලේකම්, මහ බැංකු අධිපති කියනවා මුදල් අච්චු ගැහුවට බඩු මිල ඉහළ යන්නේ නෑ කියලා. දැන් පලාත් සභාවට කතා කර කර කියනවා රට වහලා තිබ්බට කොහොම හරි මෝටර් රථ ප්‍රවාහණයේ ඇරලා සල්ලි ටික එකතු කරලා දෙන්න කියලා. මේ රටේ කවුරුත් ධනපතියන්ට බදු සහන දීලා සීනි, හාල්, පරිප්පු, ඖෂධ, ගෑස්, ඉන්ධන මිල ඉහළ දාන්න කිව්වේ නෑ. කෘෂි රසායන ගෙන්වන්න මුදල් නැති කර ගන්න කිව්වේ නෑ. සෑම අත්‍යවශ්‍ය ආහාර ද්‍රව්‍යයකම මිල දෙගුණයකට වැඩිය වැඩිවෙලා තියෙනවා.

මොන අවාසනාවන්ත කාලය ආවත් ගොවිබිම්වල කන්න එළවළු - පළතුරු ටික හැදුණා. දැන් කෘෂි රාසායන නැතිව වගාව සම්පූර්ණයෙන්ම විනාශ වෙනවා. දිලීර නාශක නැතිව උඩරට එළවළු වත්තේ කුණු වෙනවා. ඒක කිව්වාම, ඡන්දෙට වියදම්කරපු ගජමිතුරෙකුට කෘමිනාශක, දිලීර නාශක අලෙවියේ ඒකාධිකාරය දෙන්න හදනවා. ගොවියාට බීලා මැරෙන්නවත් අද වල් නාශකයක් නෑ.

සීනි ඒකාධිකාරය දිලා රු. 65 ට ගෙන්වපු සීනි දැන් රු. 220 ට කනවා. මේ ආණ්ඩුව දුප්පතාගේ ඔළුවට පිස්තෝලේ නොතියා සේසතම පැහැර ගන්නවා.

පොහොර ටික, කෘෂි රසායන ටිකට සල්ලිවලට දෙන්න කැමති නැති ආණ්ඩුව කිරි පිටි වලට බදු සහන දුන්නා. දැන් ආණ්ඩුවට ආදායමත් නෑ. මිනිස්සුන්ට කිරි ත් දෙකම නෑ. ගොවියාට කෘෂිරසානයන ටික දුන්නා නම් රටට අල බතල ටික හදාගන්න තිබුණා. නිකං නෙවෙයි, සහන මිලට නොවෙයි, සල්ලිවලට වත් රටේ කෘෂි නිෂ්පාදනයට අවශ්‍ය අමුද්‍රව්‍ය ටික ගේන්න දෙන්නේ නැති ආණ්ඩුව කටින් රෝකට් යවනවා.

අද මුදල් අමාත්‍යාංශය යාලුවන්ට බදු සහන දෙන දන්සලක් වෙලා. අලුත් මුදල් ඇමතිතුමා එනකොට හන්දි ගානේ කොඩි දාලා රතිඤ්ඤා පත්තු කරලා කවි ගී ලිව්වා. නිදහසින් පස්සේ හිටපු මුදල් ඇමතිවරු, ජේ.ආර්., වන්නිනායක, ඇන්.එම්., ෆීලික්ස් ඩයස්, රෝනී ද මෙල්, චන්ද්‍රිකා, මංගල හත් දෙනාගේම මොළ හතම තියනවා කියලා බැනර් ගැහුවා. දැන් ඩී.බී.විජේතුංග මුදල් ඇමතිතුමා කිව්වා කිව්වා මගේ ප්‍රතිපත්තිය ධනපතියාගෙන් අරං දුප්පතාට සහන දෙන එක කියලා. දැන් වෙන්නේ එකේ අනිත් පැත්ත. ධනපතියෝ කිව්ව ජේ.ආර්., ෆීලික්ස් ඩයස්, රෝනී, චන්ද්‍රිකා ලා වත් මෙහෙම කළේ නෑ. වගා කරලා කාපු රටක් දැන් හිඟා කාලා කන තැනකට පත් වෙලා තියෙන එකෙන් මහා වැඩකාරයොන්ගේ මොළයේ ප්‍රමාණය තේරුම් ගන්න පුළුවන් යැයි ද රෝහිණී කවිරත්න නිකුත් කළ නිවේදනයේ දැක්වේ.

දළදා පෙරහැර හා ලංකා දේශපාලන අතර දැවැන්ත සම්බන්ධයක් තිබේ. ‘පූජනීය දළදා සංස්කෘතිය‘ දාහතරවන කලාපයට පෙරවදනක් ලියන්නට මම දළදා සංස්කෘතියේ දේශපාලනය අධ්‍යයනය කළෙමි.

දළදා සංස්කෘතියේ දේශපාලන කතාව කියන්නට දළදා හාමුරුවන්ගෙන් අවසරයි!

ඇත්තු කුලප්පු හා මැතිවරණ දේශපාලනය !

මහ­නු­වර දළදා පෙර­හැරේ අලි කුලප්පුවීමකින් 1959 අගෝස්තු 19 දින පුද්ගලයින් 15 ක් මිය ගියේය. පොලිස් නිලධාරීන් දෙදෙනෙකු වෙඩි තබා ඇතා ඝාතනය කළේය. මේ අලි කුලප්පුව ගැන දීර්ඝ ලිඛිත සාහිත්‍යයක් ‘අලි කොමිසම‘, පාර්ලිමේන්තුව, පත්තර, මහෙස්ත්‍රාත් විභාගය හරහා නිර්මාණය විය.

පසුව එය රාජ්‍ය මන්ත්‍රණ සභාවෙන් එපිට මැතිවරණ වේදිකාවට ද ගියේය. “දේශ­පා­ලන කුල­ප්පු­ව­ලින් අලින් කුලප්පු වෙලා” එදා මුදල් ඇමති ස්ටැන්ලි ද සොයිසා කීවේය. ටී.බී.ඉලංගරත්න ඇමතිගේ මැදිහත්වීමෙන් පරීක්ෂණයක් පටන්ගත්තේය.

එදා පටන් අලි කුලප්පුව දේශපාලනය හා බැඳී ඇත.

1959 සැප්තෑම්බර් 25 බණ්ඩාරනායක ඝාතනය සිදු විය. ලංකා දේශපාලනය උඩු යටි කුරු කළ 56 විප්ලවයෙන්‘ 1956 අප්‍රේල් බිහි වූ ආණ්ඩුව සිය කාලය සම්පූර්ණ කිරීමටත් පෙර, 1959 දෙසැම්බර් 4 බිඳවැටුණි. 1960 මාර්තු මැතිවරණයෙන් එජාපයේ ඩඩ්ලි සේනානායක ආණ්ඩු පිහිටවූවේය.

1976 අගෝස්තු ඇසළ පෙරහැරේ පත්තිනි දේවාල රන්දෝලියේ ඇතා කුලප්පුවිය. පොලිස් වෙඩි පහරින් පත්තිනි දේවාලයේ වතුර මල අසල දි ඇතා මැරී වැටුනේය. 1977 ජූලි 22 එජාපය 5/6 ක බලයක් සහිතව ආණ්ඩු බලය ලබාගත්තේය.

1992 අගෝස්තු නෙරංජන් විජේරත්න දියවඩන නිලමේ සමයේ දී, පෙරහර කරඩුව රැගත් මංගල හස්තිරාජයා කලබලයට පත් වූවේ විදුලි කාන්දුවක් හේතුවෙන් රන්සිවිගේ ගිණිගැනීමෙනි. 1992 කරඬුුව වඩම්වන්නට සිටි රත්නපුර සමන් දේවාලයේ ඇතා ඇත් ගොව්වාට පහර දී කලබැගෑනියක් ඇති වූවේ කරඬුව බඳින්නට සුළු වේළාවකට පෙරය. ඇතා නිර්වින්දනය කළ අතර, පෙරහැර කරඬුව වැඩම කරනු ලැබූවේ ජයරාජා නම් ඇතා පිට ය. 1993 මැයි 1 දින ජනාධිපති ආර්.ප්‍රේමදාස ඝාතනය විය. 1993 මැයි 17 පලාත් සභා ඡන්ද විමසීමේ දී බස්නාහිර, වයඹ සහ දකුණු පළාත් සභා බලය විපක්ෂයට ගියේය.

1993 අගෝස්තු ජනපති ඩී.බී.විජේතුංග සමයේ දෙවැනි කුඹල් පෙරහැරේ දී කරඩුව මඩම්මවන මගුල් ඇතු කුලප්පුවූවා පමණක් නොව ඇඳ වැටුණි. 1994 අගෝස්තු 16 දින එජාපයේ 17 වසරක පාලනය අවසන් වී චන්ද්‍රිකා බණ්ඩාරනායක අගමැතිවරයා ලෙස පත් විය.

2012 හෝ 2013 පළමු කුඹල් පෙරහැර අතර, මහ වැසි වැටී මහමළුවේ තිබූ දැවැන්ත අට්ටාලයක් කඩා වැටුණි. එහි ශබ්දයට අලි කලබල වූ අතර, අලි රංචුවට බිය වී වැටී එක් (ගැබිණි කාන්තාවක්) මියගියේය. මහ වැස්ස නිසා එදා පෙරහැරේ බෙර වාදනය කළේ සුදු ඉටිරෙදිවලින් වසා (මළ ගෙදරක) වාගේ ය.

2014 මහ පෙරහැරේ දී කරඬුව මඩම්මවමින් සිටි ඉන්දි රාජා ට කොටුගොඩැල්ල වීදියේ දී දෑලේ සිටි බූරුම රාජා දළ පහරක් එල්ල කළේය. එදා පෙරහැර ගෙවැදුනේ දෑලේ ඇතුන් රහිතව ය.

2014 පෙරහැර අවසන් වී දින කිහිපයකින් ලංකාවේ දේශපාලනය වෙනස් වන්නට පටන් ගෙන, 2015 ජනවාරි 8 යහපාලන ආණ්ඩුව බිහිවිය.

2019 අගොස්තු මාලිගාවේ ඇතෙකුට පහරදීමට නාථ දේවාලයේ පෙරහැරට ගෙන ආ අලියෙක් උත්සහ කළේය. 2019 නොවැම්බර් මැතිවරණයෙන් යහපාලන ආණ්ඩුව බිඳවැටුණේය.

අටුවා කථාව !

දළදා සංස්කෘතියේ අලි ඇත්තු කලබලවීම ගැන 1959 කතාවේ දී නුගවෙල නිළමේ කරඬුව වැඩම කළ ඇතා ගේ දළයෙන් අල්ලා ගෙන කලබලය සමනය කර ගත් අයුරු ගැන දීර්ඝ ලිඛිත සාක්ෂි ඇත.

1976 පත්තිනි දේවාලයේ ඇතා නවරත්න නිළමේ (අමාත්‍යවරයෙකි) ඉදිරිපිට වෙඩි වැදී මියයාම ගැන පොලිස් වාර්තා පවසන්නේ ‘අත්වැරැද්දකින් වෙඩි වැදීමක්‘ ලෙස ය.

1992 සිද්ධිය ජනමාධ්‍ය එදා වාර්තා කළේ නැත. සිද්ධිය ඇසින් දුටුවන්, අවසන් මොහොතේ පෙරහැර කරඬුව බැදීමේ කාර්යය ඉටු කළ ජයතිස්ස බණ්ඩාර ඇහැලමල්පේ ඇතුළු කිහිප දෙනෙකු හැර සිද්ධියට ලිඛිත සාක්ෂි නැති තරම් ය.

1993 අවසනාවන්ත සිදුවීමට මුහුණ දුන්නේ කරඬුව වඩම්මවමින් සිටි ඇතා ය. කරඬුවට හානියක් නොවු නමුත් ඇතා ඇඳ වැටුණු බව ඇසින් දුටුවන්ගෙන් මම අසා ඇත්තෙමි.

2019 අගොස්තු මාසයේ නාථ දේවාලය අසල බැඳ සිටි (පෙරහැරේ නොගිය) සතෙකු මාලිගාවේ පෙරහැරේ ගිය සතෙකුට පහරදීම/පහරදීමට උත්සහ දැරීම නිසා පෙරහැර ගෙවදීමට ආසන්නයේ කලබලය සිදුවිය. ‍එවකට මම මධ්‍යම පළාතේ ආණ්ඩුකායා වූ බැවින් සිද්ධිය මා දැනගත් නමුත්, ඉතිහාසය පුරාම සිදුවී ඇති අයුරින්ම එය සිරස්තලයක් වූවේ නැත.

2021 අගෝස්තු 22 අවසන් රන්දෝළි පෙරහැරේ දී කතරගම දේවාලයේ අලි තිදෙනෙකු හෝ සිව් දෙනෙකු කුලප්පු විය. කුලප්පු වූ එක් සතෙකු දළදා කරඬුව වැඩමවූ අලි පන්තිය අසලට පැමිණි නමුත්, නැදුන්ගමුවේ ඇතා ද, දෑලේ ඇත්තු ද නොසෙල්වී කිසිදු කලබලයකින් තොරව සිටියේය.

රූපවාහිනියෙන් ද, අන්තර් ජාලයෙන් ද සජීවී යැයි කියා පෙර දින පෙරහැර පෙන්වනු ලැබීය.

ටීකා ව !

පෙරහැර සංස්කෘතියකි! දේශපාලනය ද සංස්කෘතියකි!!

පසු සටහන - මෑත කාලයේ රටේම අලි ඇතුන් පෙරහැරට එක් කර ගන්නට දරණ උත්සාහය නිසා පෙරහැර දිගු වී ඇත. අලි කුලප්පුවීම් වැඩිවීමට එය ප්‍රධාන හේතුවකි.

හිටපු ආණ්ඩුකාර - රජිත් කීර්ති තෙන්නකෝන්

එන්නත ලබා ගත් බවට සහතික කෙරෙන ස්මාට් එන්නත්කරණ කාඩ්පත ලබා ගැනීම සඳහා ජාතික තොරතුරු තාක්ෂණ නියෝජිතායතනය කටයුතු යොදා ඇත.

සෞඛ්‍ය අමාත්‍යාංශය සහ ලෝක සෞඛ්‍ය සංවිධානය (ශ්‍රී ලංකාව) සමඟ එක්ව කොවිඩ් -19 ස්මාර්ට් එන්නත්කරණ සහතික පත්‍රය දියත් කරන බව ICTA ආයතනය නිවේදනය කරයි.

මෙම සහතිකය දැනට නිකුත් කෙරෙන්නේ විදෙස්ගත වන අය සඳහා පමණි.

එන්නත්කරණය සිදුකළ බව සඳහන් කාඩ්පත අස්ථානගත වූ යම් පුද්ගලයකු සිටිනවා නම් තමන් පදිංචි ප්‍රදේශයේ මහජන සෞඛ්‍ය පරීක්ෂක හමු වී අදාළ උපදෙස් ලබාගැනීමට ක්‍රියාකළ යුතු බවයි රාජ්‍ය අමාත්‍ය විශේෂඥ වෛද්‍ය සුදර්ශනී ප්‍රනාන්දුපුල්ලේ  පවසා ඇත.

ලියාපදිංචි වීම සඳහා මෙතන click කරන්න.

තවත් කොවිඩ් මරණ 198ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

ඊයේ (24) දින තහවුරු කර ඇති එම මරණ 198ත් සමග මෙරට සිදුවී ඇති සමස්ත කොවිඩ් මරණ සංඛ්‍යාව 7,948ක් දක්වා ඉහළගොස් ඇත.

කාන්තාවන් 79 දෙනෙකු සහ පිරිමි පුද්ගලයින් 119 දෙනෙකු ඊයේ තහවුරු කළ මරණ අතරට අයත්ය.

එම මරණ අතර අවුරුදු 30ට අඩු එක් පිරිමි පුද්ගලයෙකු ද සිටින බව වාර්තා වෙයි.

මේ වනවිට රජය පනවා ඇති සංචරණ සීමාවලට ජනතාව නිවැරදිව අනුගත නොවුනොත් එම සංචරණ සීමා දීර්ඝ කිරීමට සිදුවිය හැකි බව රජයේ වෛද්‍ය නිලධාරීන්ගේ සංගමය අනතුරු අඟවයි.

අද (25) කොළඹ පැවති මාධ්‍ය හමුවකදී එම සංගමයේ මාධ්‍ය ප්‍රකාශක වෛද්‍ය සමන්ත ආනන්ද ඒ බව සඳහන් කළේ ය.

"මේ දාලා තියෙන ලොක්ඩවුන් එක හරියටම ක්‍රියාත්මක කිරීම සඳහා ජනතාව සහයෝගය ලබාදිය යුතුයි. එහෙම නැති වුණොත් මේ දාපු ලොක්ඩවුන් එක එක්කො දීර්ඝ කරන්න වෙයි. නැත්නම් ආයේ මාසෙකින් ලොක්ඩවුන් කරන්න වෙයි. එතකොට මේක අරිනවා.. වහනවා. මේ ආකාරයට ගමන් කරන්න බෑ. ඒක රජයටත් ජනතාවටත් අපහසුවක්. ඒ නිසා මේ සංචරණ සීමාවලට අනුගතවෙන අය වගේම ක්‍රියාත්මක කරන අයත් ඒක හරියටම කරන්න ඕනේ."

තරුණ සේවා සභාවේ අධ්‍යක්ෂක මණ්ඩලයට පත්කර සිටි ඉරාජ් වීරරත්න නම් ගායකයා එම තනතුරෙන් ඉල්ලා අස්වී තිබේ.

අද (25) අදාළ ලිපිය තරුණ සහ ක්‍රීඩා ඇමති නාමල් රාජපක්ෂ වෙත යවා ඇති අතර එහි පිටපතක් මේ වන විට සමාජ මාධ්‍ය තුළ සංසරණය වෙයි.

lanka truth වෙබ් අඩවිය වාර්තා කර ඇත්තේ, ඉරාජ් වීරරත්නට ඉල්ලා අස්වන ලෙස ආණ්ඩුව දන්වා ඇති බවයි.

ඉල්ලා අස්වීමේ ලිපිය පහත දැක්වෙයි.

නිරෝධායනය වන පවුල් සඳහා ලබාදෙමින් තිබූ රු. 10,000ක් වටිනාකමින් යුත් සහන මල්ල සීමා කොට, තෝරාගත් පිරිසකට පමණක් ලබා දීමට ආණ්ඩුව තීරණයක් ගෙන ඇති බව විපක්ෂ නායක සජිත් ප්‍රේමදාස චෝදනා කරයි.

නිවේදනයක් නිකුත් කරමින් ඔහු මේ බව සඳහන් කරන අතර එහි මෙසේද සඳහන් වෙයි.

ජනතාවගේ ගෙල සිරකොට හෝ සිය අරමුණු ඉටුකර ගැනීමට දෙවරක් නොසිතන ආණ්ඩුව කොරෝනා ව්‍යසනයෙන් අන්ත අසරණව සිටින ජනතාවගෙන්ද පලිගැනීම ආරම්භ කොට තිබේ.

කෙටි කලකට හෝ රට වසා දමන්නැයි අප ආණ්ඩුවට බලකළේ පවත්නා බිහිසුණු කොරෝනා ව්‍යාප්තියෙන් ජීවිත බේරා ගැනීමට මිස එය ජන ජීවිත පීඩාවට පත් කිරීමට ආණ්ඩුවට දුන් බලපත්‍රයක් නොවේ.අප පුනපුනා කළ ඉල්ලීම කඩිනම් නොකර කල්මැරීමෙහි ආදීනව රටම භුක්ති විදිමින් සිටින අතර කොරෝනා ව්‍යසනයෙන් පීඩාවට පත් රටවල් අතර ප්‍රමුඛ තැනකට අපේ රට පත්ව ඇත්තේද ඒ හිතුවක්කාරී ක්‍රියාපිලිවෙත නිසාය.

වසා දැමූ බොහෝ රටවල් සිය ජනතාවගේ ජීවිත නඩත්තු කිරීමට සහන පැකේජ හදුන්වා දී ඇති නමුත් ලංකාවේ සිදුවෙමින් තිබෙන්නේ අපේ බලපෑම නිසාම ජනතාවට දෙන්නට වූ අවම සහන මල්ල පවා අත් හිටුවීම ය.

“ජනතාවට කැපකිරීම් කරන්න”යැයි ආණ්ඩුව ඉල්ලා සිටින නමුත්,කොරෝනා උවදුර ආරම්භ වූ දවසේ සිටම ජනතාව කරනු ලබන කැපකිරීම ආණ්ඩුවට නොපෙනීම සහ නොදැනීම අදහාගත නොහැකි ය.

ජනතාවට කැපකිරීම් කරන්න යැයි කියන්නේ මේ වනවිට අත්‍යාවශ්‍ය ආහාර ද්‍රව්‍යවල මිල ගණන් ඉතිහාසයේ පෙර නොවූ විරූ තරම් ඉහළ දැමූ ආණ්ඩුව ය. ජනතාවට කැපකිරීම් කරන්න යැයි කියන්නේ ආහාර වියදම දරාගැනීමේ ශක්තිය අතින් ලංකාව ලොව දුප්පත්ම රටවල් 5 අතරට දමා වැටුපෙන් 66%ක් ආහාර වලට වැයකරන තැනට රට පත් කළ ආණ්ඩුව ය. ජනතාවට කැපකිරීම් කරන්න යැයි කියන්නේ ධන කුවේරයන්ට බදු සහන ලබා දී මිලියන හයසීයක් රටට අහිමි කළ ආණ්ඩුව ය.

ජනතාවට කැපකිරීම් කරන්න යැයි කියන්නේ සීනි සහ පොල්තෙල් වංචාවන් හරහා ගජමිතුරන්ට සහන ලබා දුන් ආණ්ඩුව ය.

තුන් වේල තබා එක වේලක් හෝ කෑමට යමක් නැතිව සුසුම් හෙළන ලක්ෂ ගණනක් පුරවැසියන් ජීවත්වන රටක ජනතාවට කැපකිරීම් කරන ලෙස ඉල්ලීම තරම් සාහසික ඉල්ලීමක් තවත් නැත. කොරෝනා ව්‍යසනය මැද ජීවිතය සහ මරණය සමග අරගල කරන මිනිසුන්ගේ සහන මල්ලටත් සීමා දමනවානම් ඒ ආණ්ඩුවේ අමානුෂිකත්වයේ තරම වටහාගත හැකිය.

සජිත් ප්‍රේමදාස විපක්ෂ නායක

ත්‍රස්තවාදය වැළැක්වීමේ පනත ප්‍රකාරව නිර්දේශ සහ තීරණ ඉදිරිපත් කිරීම සඳහා ජනාධිපති ගෝඨාභය රාජපක්ෂ විසින් උපදේශක මණ්ඩලයක් පත් කර ඇති බව වාර්තා වෙයි.

ජනාධිපති මාධ්‍ය අංශය නිවේදනය කරන්නේ, හිටපු අගවිනිසුරු අශෝක ද සිල්වාගේ සභාපතිත්ව‍යෙන් යුතු මෙම උපදේශක මණ්ඩලයේ සෙසු සාමාජිකයන් ලෙස විශ්‍රාමලත් මහාධිකරණ විනිසුරු ඒ. ඒ. ආර් හෙයියන්තුඩුව සහ විශ්‍රාමලත් සොලිසිටර් ජනරාල් සුහද ගම්ලත් පත්කර ඇත.

ත්‍රස්තවාදී ක්‍රියා සම්බන්ධයෙන් සිරදඬුවම් විඳින සහ රැඳවුම් නියෝග මත අත්අඩංගුවේ පසුවන පුද්ගලයන් පිළිබඳව සොයා බැලීම, නිදහස් කිරීම, ඇප ලබාදීම ඇතුළු ඉදිරි තීරණ සම්බන්ධයෙන් ජනාධිපතිවරයාට නිර්දේශ සහ උපදෙස් ලබාදීම මෙම මණ්ඩලයෙන් අපේක්ෂිත ය.

ජනාධිපති මාධ්‍ය අංශය නිකුත් කළ නිවේදනයේ වැඩිදුරටත් සඳහන් වන්නේ, දීර්ඝ කාලයක සිට උපදේශක මණ්ඩලයක් පත් කර නොතිබීම හේතුවෙන් මෙතෙක් සිරගතව සිටින පිරිසට තමන්ගේ අයිතිවාසිකම් සම්බන්ධයෙන් කරුණු ඉදිරිපත් කිරීමට අවස්ථාවක් නොතිබූ බවත් මෙම උපදේශක මණ්ඩලය පත් කිරීමත් සමග එම සිරකරුවන්ට ඔවුන්ට ඇති ගැටලු ඉදිරිපත් කිරීමට අවස්ථාව හිමිවන බවයි.

අභාවප්‍රාප්ත හිටපු මුදල් අමාත්‍ය මංගල සරමරවීර සම්බන්ධව "නිදහස, අවංක පාලන ක්‍රමයක්, සියල්ලන් එක්සත් කරන සහ විවිධත්වය ගරු කිරීම ඉහළින්ම රජයන රටක් - දේශපාලනඥයින්ට නොව තම ජනතාවට සැබැවින්ම සලකන පාලන ක්‍රමයක් සහිත රටක්- මේ සියල්ලේ සංකේතය ඔබයි." යනුවෙන් සංවේදී සටහනක් සිය ෆේස්බුක් පිටුවේ තැබීමට හිටපු ජනාධිපතිනි, චන්ද්‍රිකා බණ්ඩාරනායක කුමාරතුංග කටයුතු කර ඇත.

අදාළ ෆේස්බුක් සටහන පහත දැක්වෙයි.

මංගල - මා ආදරණීය මිතුර, සොයුර, සටන් සගය !

මේ අඳුරු දිනයේ ඔබ ජීවිත සටන පරාජය වී ඇත. ඔබේ ඥාතීන් සහ මිතුරන් ඔබව ජීවත් කිරීමට ඔබ සමග සටන් කළහ. කඳුළු සැලූහ. අපි ද ඒ සටහ පැරදුණෙමු. මංගල, ඔබ මිය ගොස් නැත. ලංකාව සහ ලෝකය පිළිබඳ ඔබ තුළ පැවති අසාමාන්‍ය දර්ශනය ජීවත් වනු ඇත. අපි උරෙනුර ගැටී කළ සටන සදාකල්හි ජීවත් වනු ඇත. ආදරණීය මංගල, වඩා හොඳ ශ්‍රී ලංකාවක් ගොඩනැගීම වෙනුවෙන් සිදු වන සෑම සටනකම ඔබ ජීවත් වනවා නිසැකය. නිදහස, අවංක පාලන ක්‍රමයක්, සියල්ලන් එක්සත් කරන සහ විවිධත්වය ගරු කිරීම ඉහළින්ම රජයන රටක් - දේශපාලනඥයින්ට නොව තම ජනතාවට සැබැවින්ම සලකන පාලන ක්‍රමයක් සහිත රටක්- මේ සියල්ලේ සංකේතය ඔබයි. අසාධාරණය, දූෂණය සහ භීෂණයට එරෙහිව නැඟී සිටින සියල්ලන්ගේ හදවත්වල සහ ක්‍රියාවන් තුළ ඔබ ජීවත් වනු ඇත. විවිධ කැබිනට් අමාත්‍ය ධුර දරමින් අප දේශය වෙනුවෙන් සිදු කළ ඉමහත් සේවය මම සදා සමරමි. ජාතික සන්නිවේදන සහ ජනමාධ්‍ය ක්ෂේත්‍රය නවීකරණය කිරීමට ඔබ නායකත්වය ලබා දුන්නේය. අඳුරු අගාධයකට ඇද දමා තිබුණු අප රටේ විදේශ සබඳතා විශාල වශයෙන් යළි දියුණු කළ ඔබ, ශ්‍රී ලංකාව ජාත්‍යන්තර වේදිකාව කරා යළි ගෙන යමින් ප්‍රෞඪ සහ ශක්තිමත් දේශයක් බවට අප රට පත් කළේය. මේ සියල්ල ඔබ සිදු කළේ මහා අභියෝග සහ අවධානම්වලට නොබියව මුහුණ දෙමිනි. මේ සියලල්ටම වඩා වැඩියෙන් ඔබ තුළ වූ පෞද්ගලික ප්‍රතිපත්ති සහ ගතිගුණ ලංකා දේශපාලන ක්ෂේත්‍රයේ සොයා ගැනීමට නොහැකි තරම් ය. පරම්පරා ගණනාවක් ඉදිරියට ද අප තාරුණ්‍යය ඔබ විසින් අභිප්‍රේරණය කරනු ඇත. ආදරණීය මිතුර, ශක්තිමත්ව සැතපෙන්න. නිවන් දකින්නට පෙර සසර ගමනේ ඔබ-අප සිහින දුටු වැදගත් ශ්‍රී ලංකාවක් ගොඩනැගීම වෙනුවෙන් කරන සටනට එක්වීමට නැවත අප අතරට පැමිණෙන්න. මීට,

චන්ද්‍රිකා බණ්ඩාරනායක කුමාරතුංග

දෙමව්පියන්ගේ හිතුමනාපය පරිදි දරුවන්ට විටමින් C ලබාදීම නුසුදුනු බව රිජ්වේ ආර්යා ළමා රෝහලේ දැඩි සත්කාර ඒකකය භාර විශේෂඥ වෛද්‍ය නලින් කිතුල්වත්ත පැවසීය.

ඔහු ‍මේ පිළිබද පවසා ඇත්තේ රූපවාහිනී වැඩසටහනකට සහභාගී වූ අතරතුරය.

එහිදී ඔහු වැඩිදුරටත් සඳහන් කළේ, මේ දිනවල දරුවන්ට සුදුසු බව පවසමින් සමාජ මාධ්‍යවල විවිධ බෙහෙත් වර්ග පිළිබඳව සඳහන් කරන බවය.

"සමාජ මාධ්‍යයෙන් දැකලා තියෙන, ඔබට හිතෙන එක එක බෙහෙත් වර්ග දරුවන්ට ලබාදෙන්න එපා. ඒක සමහර වෙලාවට දරුණු ආබාධ ඇතිකරන්න පුළුවන්. දෙමව්පියන්ට හිතෙන පරිදි දරුවන්ට විටමින් C දෙන්න එපා කියන එක තමයි අපි කියන්නේ. මොකද දරුවන්ට විටමින් C කොච්චර දෙන්න ඕනෙද කියලා කවුරුත් දන්නේ නෑ. උණ තියෙනවා නම් නියමිත මාත්‍රාවෙන් පැරසෙටමෝල් ලබාදෙන්න. ඊට වඩා දෙයක් තියෙනවා නම් රෝහලකට හෝ වෛද්‍යවරයෙකු හමුවෙලා වෛද්‍ය උපදෙස් අනුව පමණක් ලබාදිය හැකි ඖෂධ පමණක් ලබාදෙන්න."

හිටපු අමාත්‍ය මහානාම සමරවීර සහ ඛේමා පද්මාවතී සමරවීර යන අයට දාව 1956 අප්‍රේල් 21 දා මෙලොව උපත ලද මංගල සමරවීර වසර 65කුත් මාස 4යි

දින 3ක් ආයු වළඳා අද අවසන් ගමන යන්නේ ඔහුගේ ජීවිතයෙන් පමණක් නොව අපේ කාලයේ දේශපාලනයේ ඉතිරිව තිබූ අවසන් බලාපොරොත්තුවට ද නැවතීමේ තිත තබමිනි.

මාතර රාහුල විද්‍යාලයෙන් සිප්සතර හැදෑරීම ඇරඹූ මංගල සමරවීර කොළඹ රාජකීය විද්‍යාලයෙන් ද පසුව ලන්ඩනයේ වෝල්ටම්ෆොරස්ට් විද්‍යාලයෙන් සිය මූලික අධ්‍යාපන කටයුත සිදුකළේය. පසුව ලන්ඩන්හි ශාන්ත මාර්ටින් කලා විද්‍යාලයෙන් ඇඳුම් පැළඳුම් සැලසුම් සහ තාක්‍ෂණය පිළිබඳ ශාස්ත්‍රවේදී උපාධියක් හිමිකර ගැනීමට සමත් විය. පසුව ශ්‍රී ලංකා ජාතික සැලසුම් මධ්‍යස්ථානයේ සැලසුම් උපදේශකවරයෙකු ලෙස සේවය කළ අතර කැලණිය විශ්වවිද්‍යාලයේ සෞන්දර්ය අධ්‍යයන ආයතනයේ බාහිර කථිකාචාර්‍යවරයකු වශයෙන් ද සේවය කළේය. ‍

1983 කළු ජූලියෙන් මෙසිරලක මිනිස් ප්‍රාණීන් විනාශවන අයුරු සියසින් දැක ඊට එරෙහිව සමාජ සංහිඳියාව ගොඩනැගිය යුතු යැයි අපෙක්ෂා සහගතව සිට මංගල සමරවීරට ශ්‍රී ලංකා නිදහස් පක්ෂ නායිකා සිරිමාවෝ බණ්ඩාරනායක මහත්මිය සහ අනුර බණ්ඩාරනායක මහතාගේ ඉල්ලීම අනුව මෙරට දේශපාලන ප්‍රවාහයට අවතීර්ණ විය.

ඒ් 1988 දී ශ්‍රී ලංකා නිදහස් පක්ෂ මාතර ආසන සංවිධායක ධූරය ලද මංගල සමරවීර එතැන් පටන් අවසන් ගමන් යනතුරාවට තමන්ටමට වූ දේශපාලන ප්‍රතිපත්තියක්, දේශපාලන දර්ශනයක් සහ ඒ වෙනුවෙන් වූ වැඩපිළිවෙලක් සහිත දේශපාලන චරිතයක් විය.

1989 පළමුවරට පාර්ලිමේන්තුවට තේරීපත් වූ මංගල අඛණ්ඩව 2020 දක්වා වසර 31ක් පුරාවට සිය දේශපාලන ප්‍රතිපත්තිය ඛණ්ඩනය කර නො ගත් එකම ප්‍රායෝගික දේශපාලකයා ද මංගලය. එය තවදුරටත් 1989 අප්‍රේල් 03 වෙනිදා ශ්‍රී ලංකා පාර්ලිමේන්තුවේ දී සිදුකළ සිය ප්‍රථම පාර්ලිමේන්තු කතාවේ සිට 2020 පෙබරවාරි 20 වෙනිදා මැතිසබේ සිදුකළ අවසන් කතාව දක්වා වූ පාර්ලිමේන්තු හැන්සාඩ් වාර්තා සාක්ෂි දරනු ඇත.

මංගල සමරවීර මහජන නියෝජිතයෙකු ලෙස පාර්ලිමේන්තුවට තේරීපත්වූ අවධිය මෙරට දේශාපාලනය බෙහෙවින්ම ව්‍යාකූල වී තිබිණි. දේශප්‍රේමී බලහත්කාරය හා රාජ්‍ය භීෂණය විසින් තරුණ ජීවිත දහස් ගනනින් නිරපරාදේ රටට අහිමි කළේය. එවන් පසුබිමක පාලම්, බෝක්කු, මහාමාර්ග හෝ ගොඩනැගිලි දේශපාලනය වෙනුවට යුක්තිය හා සාධාරණත්වය ඉල්ලා සටන් කරන සමාජ ප්‍රජාතන්ත්‍රවාදයේ ආරක්ෂකයකු රටට උවමනාකර තිබුණේය. මංගල සමරවීරගේ දේශපාලන දැක්ම හා දේශපාලන භාවිතාව ප්‍රතිනිර්මාණය වන්නේ එවන් වූ ජනතා අපේක්ෂාවන් සමගය.

රාජ්‍ය භීෂණ සමයේ සියලු ආකාරයේ ඝාතන හා පැහැර ගැනීම්වලට එරෙහිව සටන් සගයකු වූ මංගල සමරවීර මුළුමහත් රටේම රජකළ අවනීතිය අයුක්තිය හා අසාධාරණයට එරෙහිව සනාථ වූ දේශයක් උදෙසා දරුවන් අහිමිව හැඬූ කඳුළින් දිවි ගෙවූ මව්වරුන් එකතු කරමින් “මව් පෙරමුණ“ නම් සංවිධානය ගොඩනැගීය. මංගල සමරවීර සමග මහින්ද රාජපක්ෂ ද එහි සම කැඳවුම්කරුවන් විය.

ශ්‍රී ලංකාව වෙලාගෙන සිටි සිවිල් යුද වතාවරණයට තිත තැබීමේ අරමුණින් චන්ද්‍රිකා බණ්ඩාරනායක ජනාධිපතිතුමිය හා එක්ව ජාතින් අතර සාමය ගොඩනැගීම අරමුණු කොට ගත් 'සුදු නෙළුම් ව්‍යාපාරය'ට උරදුන් අතර 'පොතයි ගඩොලයි' හරහා යාපනය පුස්තකාලය ගොඩනැගීමට ද පියවර ගත්තේය.

එසේම මෙරට සංනිවේදන ක්ෂේත්‍රයේ සුවිශේෂී වෙනස්කම් සිදුකිරීමට නොබියව පියවර තැබූ මංගල සමරවීර ටෙලිකොම් ආයතනය පෞද්ගලීකරණය කිරීමට පියවර ගත්තේය. එසේම එකල නගර අලංකරණයට නව මානයක් එක්කරමින් කොළඹ නගර සංවර්ධනය වගේම මහල් නිවාස ගොඩනැගීමට අවශ්‍ය පියවර තැබීම ද මංගල දේශපාලනයේ සුවිශේෂී මංසලකුණු විය.

එපමණක් නොව අනාගත සංවර්ධන ඉලක්ක කරා යන ගමන වෙනුවෙන් වූ නීල හරිත ආර්ථිකයක් පදනම් කරගත් "Vision 2025" හරහා 'ගම්පෙරළිය', 'Enterprise Sri Lanka' වැනි ප්‍රායෝගික වැඩසටහන් තුළින් මහජනතාවට රටේ අනාගතය පිළිබඳ නැවුම් බලාපොරොත්තු දැල්වීමට සමත් විය.

මංගල සමරවීර දේශපාලන ගමන් මග කෙටියෙන්...

1989/02/15 - පළමුවරට පාර්ලිමේන්තු මන්ත්‍රීවරයකු ලෙස තේරී පත්වීම

1994/08/16 දින පැවති මහ මැතිවරණයෙන් ජයගෙන දෙවන වරට පාර්ලිමේන්තුවට පත්වීම සහ තැපැල් හා විදුලි සංදේශ කැබිනට් අමාත්‍ය ධූරයට පත්වීම.

පසුව නාගරික සංවර්ධන කැබිනට් අමාත්‍යධූරය ද මුදල් නියෝජ්‍ය ඇමතිධූරය ද හෙබවිය.

2001 වර්ෂයේ දී පාර්ලිමේන්තුවේ විපක්ෂයේ ප්‍රධාන සංවිධායකවරයා වූ මංගල සමරවීර ශ්‍රී ලංකා නිදහස් පක්ෂයේ භාණ්ඩාගාරිකවරයා ද විය.

එකල වරාය සහ ගුවන් අමත්‍ය මෙන්ම ජනමාධ්‍ය අමාත්‍යධූරයේ ද කටයුතු කළේය.

2005 ජනාධිපතිවරණයේ දී ජනාධිපති අපේක්ෂක මහින්ද රාජපක්ෂ මහතාගේ මැතිවරණ ප්‍රචාරක මෙහෙයුම් කළමනාකරු වශයෙන් කටයුතු කළ මංගල සමරවීර ජනාධිපතිවරණ ජයග්‍රහණයෙන් පසුව විදේශ කටයුතු අමාත්‍යවරයා වශයෙන් පත්කරන ලදී.

2007 ජනවාරි මස විදේශ කටයුතු අමාත්‍යධූරය වෙනුවට වරාය ගුවන් අමාත්‍යධූරයට පත්කරන ලද අතර 2007 පෙබරවාරි 07 දින ජනාධිපති මහින්ද රාජපක්ෂ මහතා විසින් මංගල සමරවීර කැබිනට් මණ්ඩලයෙන් ඉවත්කරන ලදී.

පසුව එතෙක් තමන් දේශපාලනය කළ ශ්‍රී ලංකා නිදහස් පක්ෂයට සමුදී ශ්‍රීපති සූරියආරච්චි සමග එක්ව ශ්‍රී ලංකා නිදහස් පක්ෂ මහජන ('ම') පාර්ශවය නිර්මාණය කළේය.

එකල නීති විරෝධී පුද්ගල අතුරුදන් කිරීම්, රාජ්‍ය දේපළ අවභාවිතය සහ හිතුවක්කාරී ආණ්ඩු පාලනයට එරෙහිව කටයුතු කළ මංගල සමරවීර එක්සත් ජාතික පක්ෂ නායක රනිල් වික්‍රමසිංහ මහතාගේ ආරාධනාවක් අනුව එක්සත් ජාතික පක්ෂය හා එක්ව සිය දේශපාලනය ඉදිරියට ගෙන ගියේය.

ඒ අනුව එතෙක් පැවැති මහින්ද රාජපක්ෂ පාලනයට එරෙහිව කටයුතු කළ මංගල සමරවීර 2015 ජනවාරි 08 ඵෙතිහාසික දේශපාලන ජයග්‍රහණයේ සුවිශේෂී කාර්යභාරයක් ඉටුකළේය.

පසුව නැවතත් විදේශ කටයුතු අමාත්‍යධූරයට පත් වූ අතර පසුව මුදල් අමත්‍ය ධූරය ද සමග ජනමාධ්‍ය අමාත්‍ය ධූරයේද කටයුතු කළේය.

මේ රට දියුණු සංවර්ධිත රටක් වශයෙන් ගොඩනැගීමට නම්, ප්‍රජාතන්ත්‍රවාදය, සංහිඳියාව මත පදනම් වූ සංවර්ධනයක් සිදුකළ යුතු බව කවදත් විශ්වාස කළ මංගල සමරවීර මහතා ඒ කාර්යය ඉටුකිරීමට මේ පවතින දේශපාලන පක්ෂ හා තවදුරටත් කටයුතු කිරීමෙන් ඵලක් නොවන බව තේරුම් ගැනීමෙන් පසු 2020 මහ මැතිවරණය සඳහා නාමයෝජනා භාරදීමෙන් පසුව සිය තීරණය වෙනස් කොට පාර්ලිමේන්තු දේශපාලනයට තිත තැබුවේය.

ඉන් පසුව මේ රටේ දේශපාලනයේ සැබෑ වුවමනාවන් සහිත පුද්ගල හා කණ්ඩායම් ඒකරාශී කරගනිමින් සැබෑ දේශප්‍රේමීන් නමින් නව දේශපාලන ප්‍රවාහයක් ගොඩනැගීමට උරදුන්නේය. එසේම අපේක්ෂාවන්ගෙන් පිරුණ තරුණ තරුණියන් හා එක්ව සිය ජීවිතයේ අවසන් හුස්ම පොද මිහිතලයට මුදාහරින මොහොත දක්වා අප්‍රතිහත ධෛර්යයෙන් යුතුව මේ රටට සුගතියක් අත්කරදීමේ පරම අභිලාශය වෙනුවෙන් සිය කාලය, ධනය, ශ්‍රමය කැපකළ අපේ කාලයේ සමකල නොහැකි අපූර්ව දේශපාලන චරිතයකි මංගල සමරවීර.

හිටපු මුදල් අමාත්‍ය මංගල සමරවීර මහතා  අභාවප්‍රාප්ත වූ බව සංවේගයෙන් දැනුම් දෙමු.

තවත් කොරෝනා මරණ 194 ක් සෞඛ්‍ය සේවා අධ්‍යක්ෂ ජනරාල් විසින් තහවුරු කරනු ලැබීමත් සමග මෙරට සමස්ත කොරෝනා මරණ සංඛ්‍යාව 7,560 ක් දක්වා ඉහළ ගියේ ය.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 103 දෙනෙකු කාන්තාවන් වන අතර ඉතිරි 91 දෙනා පිරිමි පුද්ගලයින් ය.

මියගිය පිරිස අතර අවුරුදු 30 – 59 ත් අතර වයසේ පසුවන ආසාදිතයින් 49 දෙනෙකු සිටින අතර ඉතිරි පුද්ගලයින් 145 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (23) වාර්තා කරන ලද මෙම මරණ 194 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.

මාධ්‍යවේදීන් අත්අඩංගුවට ගැනීම සහ ප්‍රශ්න කිරීමට අදාළව මෙරට ප්‍රධාන පෙළේ මාධ්‍ය සංවිධාන 6ක් විසින් පොලිස්පති සී.ඩී . වික්‍රමරත්න වෙත කරුණු පැහැදිළි කරමින් ලිපියක් යොමුකර ඇත.

එහිදී පසුගියදා අත්අඩංගුවට ගැනුණු ලංකා ඊ නිව්ස් මාධ්‍යවේදී කීර්ති රත්නායක, සිදුවීමටට අදාල සමස්ත නිරවද්‍ය තොරතුරු සමාජ ගත කරන මෙන්ද නෛතික විධිවිධාන ප්‍රකාරව ඉදිරි කටයුතු සිදු කරන මෙන් ඉල්ලා ඇත.

එසේම ප්‍රශ්න කිරීමට ලක්වූ තුෂාරා වන්නිආරච්චිගේ සිදුවීම, එසේම තමිලන් පුවත්පතේ කර්තෘ ආර්. සිවරාජා පදිංචි නිවෙසට රහස් පොලීසියෙන් යැයි කියා කිසියම් පිරිසක් ඇතුළු වන්නට උත්සාහ ගෙන තිබීම, මඩකලපුවේ මාධ්‍යවේදියකුගෙන්ද ප්‍රශ්න කිරීමක් සිදුවීම යන මෑත කාලීන සිදුවීම්වලද පසුබිම පැහැදිලි නොවන අතර ඒ සම්බන්ධයෙන් නිශ්චිත තොරතුරු සමාජ ගත කිරීම සෑම අතින්ම යහපත් බවත් අදාළ ලිපියේ සඳහන් කර ඇත.

මාධ්‍ය සංවිධාන එකමුතුව විසින් පොලිස්පතිට යොමුකළ සම්පූර්ණ ලිපිය පහත දැක්වෙයි.

ජනතා විමුක්ති පෙරමුණේ දේශපාලන මණ්ඩල සභික, හිටපු පාර්ලිමේන්තු මන්ත්‍රී , බිමල් රත්නායක විසින් පසුගියදා හිටපු ජනාධිපති මෛත්‍රීපාල සිරිසේනට චෝදනා කර සිටියේ විශ්‍රාම යාමට මත්තෙන් කොළඹ නගර මධ්‍යයේ තිබෙන සුවිශාල මන්දිර දෙකක් එකට එකතු කොට ඔහු තමන්ට ලියා ගත් බවත්, එය නැවත භාරදෙනවාද යන්න රටට ප්‍රකාශ කළ යුතු බව පවසමින්ය

හිටපු මන්ත්‍රීවරයා මෙම චෝදනාව එල්ල කර සිටියේ පසුගියදා ජාතික ජනබලවේගය විසින් පැවැත්වූ මාධ්‍ය හමුවකදී අදහස් දක්වමින්ය.

නමුත් හිටපු ජනාධිපතිවරයාගේ පෞද්ගලික ලේකම් සමීර සිල්වා විසින් විශේෂ මාධ්‍ය නිවේදනයක් නිකුත් කරමින් අදාළ චෝදනාව ප්‍රතික්ෂේප කර ඇති අතර එම නිවේදනය පහත දැක්වෙයි.

කැබිනට් අමාත්‍යවරුන් වන විමල් වීරවංශ , උදය ප්‍රභාත් ගම්මන්පිල ඇතුළු පිරිසක් ජාත්‍යන්තර කුමන්ත්‍රණයක නිරත බවට ආණ්ඩු පාර්ශවය විසින්ම බරපතළ චෝදනාවක් එල්ලකර ඇත.

ශ්‍රී ලංකා පොදුජන පෙරමුණේ මහ ලේකම් පාර්ලිමේන්තු මන්ත්‍රී නීතිඥ සාගර කාරියවසම් සහ අමාත්‍ය ගාමිණි ලොකුගේ විසින් අද (23) එම පක්ෂ මුලස්ථානයේ පැවැත්වූ මාධ්‍ය හමුවේදී මේ බව අනාවරණය කෙරින.

සති තුනකට රට වසන ලෙස පසුගියදා ආණ්ඩු පක්ෂ සන්ධානයේ පක්ෂ 10ක් ජනාධිපතිවරයා වෙත යොමුකළ ලිපිය ජාත්‍යන්තර බළල් අතක මෙහෙයවීමක් අනුව සිදුව ඇති බවට එහිදී පැහැදිලි සැකසංකා මතුකෙරිණ.

ජාත්‍යන්තර බලවේග ආණ්ඩුවේ පාර්ශව බිලිබා ගනිමින් ඇති බවත් රට වැසීම සඳහා පසුගියදා ප්‍රසිද්ධියට පත්කළ ලිපිය ඒ අනුව ප්‍රසිද්ධියට පත්කරනු ලැබුවක් බවට එහිදී ලොකුගේ අමාත්‍යවරයා සෘජුවම චෝදනා කර සිටියේය.

කැබිනට් මණ්ඩලයේ එකට සිට රට වසා දමන‌ ලෙසට කිසිවක් ප්‍රකාශ නොකොට එළියට විත් රට වසා දමන ලෙසට විමල් වීරවංශ මහතා ඇතුලු ආණ්ඩුවේ කොටසක් ලිපි ලිවීම කිසිසේත්ම පිළිගත නොහැකි එකක් බවත් මේ සම්බන්ධව දැඩි පියවර ගන්නා ලෙසද ඔවුන් විසින් ජනාධිපති වෙතින් ඉල්ලා සිටින ලදී.

කොරෝනා වෛරසයේ බීජෞෂණ සමය පිළිබඳව විද්‍යාත්මකව සලකා බලන විට දින 10ක් රට වැසීම ප්‍රමාණවත් නොවන බවත් වසර 21ක් වසංගත රෝග පාලන ඒකකයේ කටයුතු කළ වෛද්‍යවරුයකු ලෙස තත්ත්වය පාලනය කර ගැනීමට නම් තවත් දින 10ක් ඇඳිරි නීති තත්ත්වය දීර්ඝ කළ යුතු බව තමාගේ අදහස බව වසංගත රෝග ඒකකයේ හිටපු ප්‍රධානී විශේෂඥ වෛද්‍ය නිහාල් අබේසිංහ පවසයි.

ඔහු පවසන්නේ, තමන්ගේ පමණක් නොව අනෙකුත් විශේෂඥ වෛද්‍යවරුන්ගේ මතයද එයම බවයි.

කොළඹ පැවති මාධ්‍ය හමුවකදී අදහස් දක්වමින් ඔහු මේ බව පැවසීය,

එන්නත්කරණය යනු ගෝලීය වසංගතයට ඇති එකම විසදුම නොවන බවත් මුහුණු ආවරණ පැළඳීම, අත් සේදීම සහ සමාජ දුරස්ථභාවය රැක ගැනීම ආදී මූලික නිරෝධායන ක්‍රියාමාර්ග අනුගමනය කිරීම අනිවාර්යයෙන් සිදු කළ යුතු බවද විශේෂඥ වෛද්‍ය නිහාල් අබේසිංහ සඳහන් කළේය.

මේ අතර අවුරුදු 60 වැඩි ජේෂ්ඨ පුරවැසියන් ඇන්ටිජන් පරීක්ෂණ නැවත නැවත කර ගත යුතු බවට කවුරුන් හෝ ජනාධිපතිවරයාට වැරදි උපදෙස් ලබා දී ඇතැයි ද ඔහු සඳහන් කළේය.

ශ්‍රී ලංකාවේ එන්නත්කරණ වැඩසටහන වෙනුවෙන් ෆයිසර් එන්නත් මාත්‍රා 76,000ක තොගයක් අද (23) උදෑසන කටාර් ගුවන් සේවයේ භාණ්ඩ ප්‍රවාහන ගුවන් යානයකින් රැගෙනවිත් ඇත.

මේ අතර චීනයේ නිෂ්පාදිත සයිනොෆාම් එන්නත් මාත්‍රා මිලියනයක් හෙට (24) දිනයේ ශ්‍රී ලංකාවට රැගෙන ඒමට නියමිතව තිබේ.

මෙරට පිහිටි චීන තානාපති කාර්යාලය සඳහන් කළේ ඊට අමතරව තවත් එන්නත් මාත්‍රා මිලියන දෙකක් අගෝස්තු මාසය අවසන්වීමට පෙර මෙරටට ලැබීමට නියමිත බවය.

සිය ට්විටර් ගිණුමේ සටහනක් තබමින් චීන තානාපති කාර්යාලය සදහන් කළේ, මේ වනවිට චීනය විසින් සයිනොෆාම් එන්නත් මාත්‍රා මිලියන 13.98ක් ශ්‍රී ලංකාවට ලබාදී ඇති බවය.

එය මෙරට එන්නත් කළ යුතු ජනගහනයෙන් සියයට 95ක ප්‍රතිශතයක් බව චීනා තානාපති කාර්යාලය පෙන්වා දෙයි.

මේ වනවිට මෙරට පුද්ගලයින් 01 කෝටි 20 ලක්ෂ 88,864 දෙනෙකුට කොවිඩ් එන්නත් මාත්‍රා එකක් හෝ ලබාදී ඇති බව වසංගත රෝග විද්‍යා අංශය සඳහන් කළේය.

ඊට අමතරව පුද්ගලයින් 56 ලක්ෂ 20,254 දෙනෙකුට කොවිඩ් එන්නත් මාත්‍රා දෙකම ලබා දී තිබේ.

මේ අතර වයස අවුරුදු 60ට වැඩි මෙතෙක් එන්නත් ලබානොගත් සියලු පුද්ගලයින් පිළිබඳ අද දිනය තුළ තොරතුරු ලබාගැනීමට රජය විශේෂ වැඩපිළිවෙලක් සකස්කර ඇති බව වාර්තා වෙයි.

ගම්මට්ටමින් අදාළ තොරතුරු ලබාගෙන ඉදිරි සතිය තුළ වයස අවුරුදු 60ට වැඩි සියලු පුද්ගලයින්ට කොවිඩ් මර්දන එන්නත ලබාදීමට පියවර ගන්නා බව සෞඛ්‍ය අමාත්‍යාංශය සඳහන් කළේය.