පුවත්

ශ්‍රී ලංකාවට කාබනික පොහොර තොගයක් එවන ලද චීන සමාගම විසින් තමන්ගේ පොර තොගය ශ්‍රී ලංකාවේ භාර නොගැනීම හේතුවෙන් සිදු වූ අලාභය ඉල්ල ඉල්ලමින් සිංගප්පූරුවේ බේරුම්කරණයට පැමිණිලි කර ඇත.

ඩොලර් මිලියන 8ක වන්දි මුදලක් ඔවුන් ඉල්ලා ඇති අතර නැව් ගාස්තු හා නඩු ගාස්තුුද ශ‍්‍රී ලංකා රජයෙන් අයකර දෙන ලෙස ඉල්ලා ඇත.

එම කාබනික පොහොර තොගයේ අහිතකර ක්‍ෂුද‍්‍ර ජීවීන් සිටින බවට හෙලිවීමෙන් පසු ශ්‍රී ලංකාව එම පොහොර තොගය භාරගැනීම ප්‍රතික්ෂේප කරන ලදී.

එම නෞකාව මේ වන විට ශ්‍රී ලංකා මුහුදු සීමාවෙන් ඉවතට ගෙන ගොස් තිබේ.

තවත් කොරෝනා මරණ 21 ක් වාර්තා වීමත් සමග මෙරට සමස්ත කොරෝනා මරණ සංඛ්‍යාව 14,461 ක් දක්වා ඉහළ ගියේ ය. රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 14 දෙනෙකු පිරිමි ආසාදිතයින් වන අතර ඉතිරි 07 දෙනා කාන්තා ආසාදිතයින් ය.

මියගිය පිරිස අතර වයස අවුරුදු 30 – 59 ත් අතර වයසේ පසුවන ආසාදිතයින් 3 දෙනෙකු සිටින අතර ඉතිරි ආසාදිතයින් 18 දෙනා වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (05) වාර්තා කරන ලද මෙම මරණ 21 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.

කවර හේතුවක් මත වුවද පාකිස්ථානයේදී ශ්‍රී ලාංකිකයා ඝාතනය කිරීම අතිශ්‍ය මේලේච්ඡ සහ තිරිසන් ක්‍රියාවක්. මෙය එදත් අදත් හෙටත් ඉස්ලාම් අන්තවාදයේ ස්වරූපය බවට සැකයක් නැහැ.

මේ සිදුවීමෙන් අපටත් ඉගෙනීමට බොහෝ දේ තිබෙනවා. මේ කුරිරු හා සාහසික ඝාතනයත් සමග ඉස්ලාමය සහ පකිස්ථානය ඇතුළු මුස්ලිම් රටවල් දෙස බොහෝ දෙනෙක් බලන්නේ කිසිදු පැහැදීමකින් තොරව බව අවිවාදිතයි.

අවිහිංසාවාදි ආගමක් ලෙස ලෝකයම පිළිගන්නා බුදු දහම ප්‍රධාන ආගම කොටගත් ලංකාවේද මෙවැනි අමානුෂික ඝාතන නොවූවද ආගම වෙනුවෙන් යැයි කියන සාහසික හැසිරීම් අප කෙතෙක් දැක ඇත්ද? අළුත්ගම ධර්ගා නගරයේ සිදුවීම වැනි අවස්ථා මෙන්ම තලේබාන් පන්නයට හැඩගැසී ඇති ඇතැම් භික්ෂූන්ගේද, බෞද්ධ යැයි කියාගත් ත්‍රස්ත වෙස්ගත් පිරිස්ගේද ප්‍රචණ්ඩ හැසිරීම් බෞද්ධාගම මෙන්ම ශ්‍රී ලංකාවේ ප්‍රතිරූපය කෙරෙහි ඉතා නරක ලෙස බලපා තිබෙන්නක්.

අද අප ඉස්ලාමය හෝ පාකිස්ථානය දෙස බලන්නේ කෙසේද, එලෙසම අදාළ අවස්ථාවල අනෙකුත් ආගමිකයන් හා රටවල් බෞද්ධාගම සහ ශ්‍රී ලංකාව දෙස බලන්නේද ඒ ආකාරයටම බවට සැක නැහැ.

1983 කළු ජුලිය යනු ජාතිය පදනම් කරගත්තක් වූවත් එය ශ්‍රී ලංකාවට අදත් කළු පැල්ලමක්. බ්‍රිතාන්‍ය, කැනඩාව වැනි රටවල් අදත් ශ්‍රී ලංකාව සම්බන්ධ තීරණාත්මක සංධිස්ථානවලදී ලෑන්ඩ්මාර්ක් එකක් බවට පත්කර ගන්නේ එයයි.

කෙසේවෙතත් බටහිර ජාතිකයන් සමග යම් අදහස් හුවමාරු කරගැනීමකදී බෞද්ධාගම ගැන කෙරෙන සඳහනකදී මාගේ පෞද්ගලික අත්දැකීම නම් ඔවුන් සෑම විටම කියන එක් දෙයකි. ඒ "I love Buddhism” හෝ "I like Buddhism” යන්නයි. අනතුරුව ඔවුන් කියන්නේ බෞද්ධාගම නිසා තමන් ශ්‍රී ලංකාවට කැමති බවයි. (මේ අත්දකීම විදෙස්ගත බොහෝ දෙනෙකුට ඇතැයි සිතමි) තම රටටවිත් සිටින ඇතැම් ආගමික අන්තවාදීන්ගේ ක්‍රියාකාරකම් දකින නිසාම ඔවුන්ට මේ ආකාර හැඟීමක් දැනෙනවා විය හැකියි.

අපේ ඇතැම් අන්තවාදී සහ වර්ගවාදි භික්ෂූන් ඇතුළු ඇතැම් කණ්ඩායම් රටට අහිමි කරන්නේ ශ්‍රී ලංකාවට හිමිව ඇති ගෞරවණීය සම්භාවනාවයි. මෙවැනි සිදුවීමකින් අනාගතයට ගත යුතුවන්නේ එවැනි තත්ත්වයත්ගෙන් වැළකෙන්නේ කෙසේද යන්නයි.

පාකිස්ථාන අගමැති ඉම්රාන් ඛාන් මේ සිදුවීම හෙළා දැක කඩිනමින් ක්‍රියාත්මක වීමද අගය කළ යුත්තක් වන අතරම ඔහු බටහිර සමග ඇති සම්බන්ධයත් සමයාන්තර ආගමික බලපෑමත් ඊට හේතු වූවා විය හැකිය. අපේ රටේ අන්තවාදි නායකයන්ද ගතයුතු මග වන්නේද එයයි.

මහින්ද රුබසිංහ

ජනාධිපති ලේකම් පීබී ජයසුන්දර ඉල්ලා අස්වීමේ සූදානමක් සම්බන්ධයෙන් ආණ්ඩුව හිතවාදී මාධ්‍ය වාර්තා පුවත් පළකරමින් ඇත.

මේ පහත දැක්වෙන්නේ ඒ සම්බන්ධයෙන් lead news වෙබ් අඩවිය සිදුකළ අනාවරණයකි.

ජනාධිපති චන්ද්‍රිකා බණ්ඩාරනායක මහත්මියගේ පාලන කාලයේ සිට මෙරට ආර්ථිකය මෙහෙයවන ප්‍රධාන පෙළේ රාජ්‍ය නිලධාරියෙකු සිය ධුරයෙන් ඉල්ලා අස්වන්නට තීරණය කර ඇති බව වෙබ් අඩවි කිහිපයක් විසින් වාර්තා කර සිටී.

මෙම නිලධාරියා දැනටමත් ඇතැම් දේශපාලනඥයන්ට ප්‍රකාශ කර ඇත්තේ තමන් කඩිනමින් තනතුරෙන් ඉවත් වන බවයි.

පොහොර අර්බුදය සහ විදේශ ශ්‍රමිකයන්ගේ මුදල් මෙරටට එවීම යන කාරණා මත චමල් රාජපක්ශ අමාත්‍යවරයා විසින් ඔහුට තදින් දෝෂාරෝපණය කිරීම ඔහුගේ ඉල්ලා අස්වීම කඩිනම් වීමට බලපාන ප්‍රධනතම හේතුව බවද එම වෙබ් අඩවි වැඩිදුරටත් වාර්තා කර සිටී.

මේ සම්බන්ධයෙන් අප වෙත අදහස් දැක්වූ ජේෂ්ඨ නීතිඥ මහතෙකු පවසා සිටියේ ආර්ථික ඝාතක තීන්දු රැසකට මුල් වූ මෙම නිලධාරියා ඉහළ අධිකරණයෙන් දඬුවම් ලැබ රජයේ කිසිදු තනතුරක් නොදැරීමට සුදුස්සෙකු නොවන බවට තීන්දු කළ අයෙකු බවයි.

එම නීතිඥවරයාට අනුව වසර තිහක් තිස්සේ අදාල නිලධාරියා විසින් ගනු ලැබූ ආර්ථික ඝාතක තීන්දු හේතුවෙන් රට බංකොලොත් තත්වයට වැටී ඇති බවත් එලෙස රටවල් බංකොලොත් කිරීමට දායක වූ නිලධාරීන්ට ඔවුන්ගේ හාම්පුතුන් වන බටහිර රටවල්වල දොරටු ඕනෑම මොහොතක විවර කර ඇති බවත්ය.

ජනතා විමුක්ති පෙරමුණ සන්ධානයක් සෑදීමට සූදානම් බවට නිල ප්‍රකාශ නිකුත්කරමින් ඇත.

ඒ ජවිපෙ නායක පාර්ලිමේන්තු මන්ත්‍රී අනුර කුමාර දිසානායක ගේ මූලිකත්වයෙනි.

මේ සම්බන්ධයෙන් අදහස් දක්වමින් පාර්ලිමේන්තු මන්ත්‍රී විජිත හේරත් පවසන්නේ, රටේ පැන නැගි ඇති අර්බුද හමුවේ ජනතා විමුක්ති පෙරමුණේ නායක අනුර කුමාර දිසානායකගේ නායකත්වය යටතේ පක්ෂ කිහිපයක් එක් කර ගනිමින් කඩිනමින් මේ රට තුල ජාතික බලවේගයක් ගොඩ නැගිමට අවශ්‍ය පියවර මේ වන විට ගනිමින් සිටින බවය.

විජිත හේරත් මන්ත්‍රිවරයා ඒ බැව් කියා සිටියේ අද (05) දින ගමෙන් පටන් ගමු යන වැඩසටහන හැටන් නගරයෙන් අරම්භ කරමිණි.

මෙහිදි වැඩි දුරටත් අදහස් දැක් වු විජිත හේරත් මන්ත්‍රිවරයා කියා සිටියේ මේ රටේ ජනතාවගේ සහ ආණ්ඩු සහ විපක්ෂයේ මන්ත්‍රිවරුන් ගණනාවකගේ ඉල්ලිමක් මත ජාතික බලවේගයක් ගොඩනගා කඩනමින් රටේ පාලන තත්ත්වය ජාතික බලවේගය සතු කරගෙන මේ රටේ ජනතාවට කඩිනමින් සහන සැලසිම ජාතික බලවේගයේ අපෙක්ෂාව බවයි.

රටේ ජනතාවට ආරක්ෂාව නොමැති අවස්තාවක පාර්ලිමේන්තු මන්ත්‍රිවරුන්ට ආරක්ෂාවක් නොමැති බවත්, රට පාලනය කිරිමට වත්මන් රජයට නොහැකි තත්ත්වයක් උද්ගත වි ඇති බවයි විජිත හේරත් මන්ත්‍රීවරයා පැවසීය.

පකිස්ථානයේ සියල්කොට්වල සිද්ධ උන අතිශයින් අමානුෂික සිද්ධිය ගැන ශ්‍රී ලංකිකයෙක් විදිහට කතා නොකර ඉන්න බෑ.

රටේ රාළ වගේ කෙනෙකුට එහෙම නිහඩව ඉන්න අයිතියකුත් නෑ. ඇත්තටම ශ්‍රී ලාංකිකයකුට වෙන රටකදී අත්වෙන්න ඊට වැඩිය ඛේදනීය ඉරණමක් නෑ.

ඒ අවාසනාවන්ත සිද්ධියකට මුහුණ දුන්නේ වෘත්තීයෙන් ඉංජිනේරුවෙක් වෙච්චි, පකිස්ථානයේ කර්මාන්ත ශාලාවක අවුරුදු එකොළහකට වැඩි කාලයක් සේවයක කරපු ප්‍රියන්ත කුමාර දියවඩන කියන ශ්‍රී ලාංකිකයා.

රටේ රාළ ඉස්සෙල්ලාම එතුමාගේ බිරිඳ, දරුවන් දෙදෙනා ඇතුළු පවුලේ සියලු දෙනාටම තමන්ගේ සාතිශය සංවේගය පිරිනමනවා. ඒ වගේම ප්‍රියන්ත කුමාර දියවඩන සොහොයුරාට උතුම් නිවන් සුව අවබෝධ වේවා කියලත් ප්‍රාර්ථනා කරනවා.

ඇත්තටම මේ ප්‍රශ්න ඇතුළේ කතා කරන්න ලොකු දේශපාලනයක් තියනවා. හැබැයි මේවගේ ප්‍රශ්නයක දේශපාලනය කතා කරනකොට ගොඩක් පරිස්සම් වෙන්න ඕනි. ඒ වගේම තමයි සම්පූර්ණයෙන්ම විවෘත වෙන්න ඕනි. ඒ විවෘතකම, සංවේදීකම ඕනැවටත් වැඩිය රටේ රාළට තියනවා. ඒක නිසා මේතනදී හරි කෙලින් වගේම ඇත්ත වචන පිටකරන්න ඕනි.

ඇත්තටම මේ සිද්ධිය ඉතාම ම්ලේච්ඡ එකක්. අද ලෝකය වෙලා ගනිමින් තියන ආගම් අනාතවාදයේ ම්ලේච්ඡත්වයේ තරම මේකෙන් පේනවා. මීට ඉස්සර මේ වගේ කුරිරු ඝාතන අපි දැක්කේ සිරියාවේ ISIS සංවිධානය කරනවා. පණ පිටින් මිනිස්සුන්ගේ බෙල්ල කපනවා, පනපිටින් මිනිස්සු පුච්චනවා.හිතා ගන්නවත් බැරි කෘරත්වයක්.මේත් ඒ පන්නයේ ඊට දෙවෙනි නොවෙන ඝාතනයක්.

හැබැයි මෙතනදි එකක් කියන්න ඕනි මේක ප්‍රියන්ත කුමාර දියවඩන ශ්‍රී ලාංකිකයෙකු වීම නිසා එල්ල උන ප්‍රහාරයක් නෙවෙයි. ප්‍රියන්ත කුමාර දියවඩන සහෝදරයා සිංහල බෞද්ධයෙකු වීම නිසා එල්ල වෙච්චි ප්‍රහාරයක් නෙවෙයි. ඒක ගැන වැරදි අර්ථ කථන නං දෙන්න එන්න එපා. ලෝකයේ ඉන්න හැම ජාතියකම පුද්ගලයෙකුටම තියෙන තර්ජනයක් මේක. ඒ තර්ජනයේ අලුත්ම ගොදුර උනේ අපේ ප්‍රියන්ත සහෝදරයා.

ඒක නිසා අපට එක දෙයක් පැහැදිලියි. ලෝකයේ කොතැනක කොයි වෙලේ මතු උනත් ආගමික අන්තවාදය කියන්නේ උන්මත්තක එකක්. ජාතිවාදයත් එහෙමයි. උන්මත්තකයි. මොන ආගමික ස්වරූපයෙන් මතු උනත් ඒක උන්මත්තකයි. මොන ජාතිකත්ව අනන්‍යතාවයෙන් මතු උනත් ජාතිවාදයත් එහෙමයි. ඒක සුළු ජාතිකද මහ ජාතිකද කියලා අදාල නෑ. ඒක කුරිරුයි.

ඒක නිසා ආගමික අන්තවාදය, උන්මත්තක ජාතිවාදය ලෝකයෙන් දවසක තූරන් කරන ඕනි. ඒක දැන් කරන්න පුළුවන් නං දැන් රටේ රාළ වැඩේට ලෑස්තියි.

ඇත්තටම ඉස්සාමීය ආගමික අන්තවාදය අද ලෝකයට තියන බරපතල පිලිලයක්. විශේෂයෙන් අරාබිකරයට. ඒ වගේම අද ඒක ලෝකය පුරා කරක් ගහනවා. ඇත්තටම පකිස්ථානය කියන්නේ ඒ උන්මත්තක ආගමිකයන් අන්තවාදීන් බැට කන රටක්. ඒකට හේතුව තමයි ආගම්ක සංකල්ප පදනම් කරගෙන දැඩි මතධාරී නිකායන් ඈතිවීම. මුල් ආගම්ක මතවාදයට පස්සේ එකතු කරපු උන්මත්තක සංකල්ප මේවා. හැම ආගමකම ඒක දක්නට ලැබෙනවා.

ලෝකයේ මේ දක්වා පහල උන පරම අවිහිංසාවාදියා විදිහට සලකන බුදු හාමුදුරුවන්ගේ දර්ශණයටත් එහෙම විකෘති කරපු ආගමික සංකල්ප ගොඩක් එකතු කරලා තියනවා. සිංහල බෞද්ධ සංකල්පය අද යොදාගන්නෙත් ඒ වරද වෙනුවෙන්. ඉතින් අනිත් ඒවා ගැන කවර කතාද? ඉස්ලාම්ය අන්තවාදය කියන්නෙත් එහෙම එකක්. එහෙම නිකායන් සියගානක් ලෝකයේ තියනවා. ඇත්තටම පාකිස්ථානය ඒකෙන් තදින්ම බැට කන රටක්. මේ වෙනකොට විදේශිකයන් නෙවෙයි පාකිස්ථානුවන්ම ඒ අන්තවාදයේ ගොදුරු බවට පත්වෙලා.

පකිස්ථානයට තමන්ගේ ශිෂ්ඨත්වය ලෝකෙට කියන්න බැරි ප්‍රධාන බාධාවක් ඒක. මේ වෙනකොට පකිස්ථානුවන් සිය ගානක් ඒ උන්මත්තක ආගමික අන්තවාදයට ගොදුරු වෙලා ඉවරයි. ඒකට පකිස්ථානයේ පොඩි දරුවන් පවා බිලි වෙනවා.

ඔයාලට මතක ඇති පසුගිය දවසක ඔය වගේ අන්තවාදී ආගමික සංවිධානයකට සම්බන්ධ පකිස්ථාන ජාතිකයෙක් තමන්ගේ දුව නොගැලපෙන ප්‍රේම සම්බන්ධයක් ඇති කරගත්තා කියලා. පවුලේ සියලු දරුවන් මරලා දැම්මා. ඒක නිසා ආගමික අන්තවාදයේ කෘරත්වය තාත්තගෙන් දරුවට උනත් එන්න පුළුවන්.

කොහොම උනත් දැන් ප්‍රියන්තගේ සිද්ධිය වෙලා ඉවරයි. ඇත්තටම මේ ප්‍රශ්නය ඉස්සරහා පකිස්ථාන ආණ්ඩුව හැසිරෙන විදිහ බොහෝම රාජ තාන්ත්‍රිකයි. ප්‍රසස්ථයි. විශේෂයෙන් පකිස්ථාන අගමැති ඉම්ද්‍රාන් ඛාන්. ඒ වගේම පකිස්ථාන ජනතාවත් ඒ බව පෙන්වනවා. එයාලා අන්තර්ජාලයට මුදා හැරලා තියෙන කමෙන්ට්ස්වලින් ඒක පැහැදිලිව පේනවා.

'සමාවෙන්න' - පාකිස්තාන වැසියෝ ශ්‍රී ලාංකිකයින්ගෙන් ඉල්ලති

පකිස්ථාන අගමැතිගේ පටන් බහුතර පකිස්ථාන ජනතාව අපි වගේම ලොකු කම්පනයක් පෙන්වනවා. ඒ වගේම ඒ සිද්ධිය ගැන එයාලා ලැජ්ජා වෙනවා. ඒක පකිස්ථානයට වෙච්චි මහා කැලලක්.

සමහරවිට එතනදී නම් ප්‍රියන්ත කුමාර දියවඩන ශ්‍රී ලාංකිකයෙකුවීම ගොඩක් බලපානවා ඇති. මොකද පකිස්ථානය හා ශ්‍රී ලංකාව කියන්නේ බොහොම මිත්‍රශීලී රටවල් දෙකක්. ශ්‍රී ලාංකිකයන්ගේ උප විඥානය ඇතුළේ පකිස්ථානයට දක්වන විශේෂ ගෞරවයක් තැන්පත් වෙලා තියනවා. වර්තමාන අගමැති ඉම්ද්‍රාන් ඛාන් ඒක තවත් වැඩි කලා.

ඇත්තටම මේ ප්‍රශ්නයේදී ප්‍රියන්ත කුමාර දියවඩනට යුක්තිය ඉෂ්ඨ වෙන්න ඕනි. ඒ පවුලට යුක්තිය ඉෂ්ඨ වෙන්න ඕනි. ඒ මහන්සිය පකිස්ථානය ගන්න බව පේනවා. ඉම්ද්‍රාන් ඛාන් ඒ වැඩේට පෞද්ගලිකව මැදිහත් වෙන බව පේනවා. දැනටත් ඝාතනයට නායකත්වය දුන්න පුද්ගලයා එක්ක 150 ක් විතර අත්තඩංගුවට අරන්.

ඇත්තටම අපේ රටේ නීතිය ක්‍රියාත්මක වෙනවට වඩා ඉක්මනින් පකිස්ථානයේ නීතිය ක්‍රියත්මක වෙනවා. ඉම්ද්‍රාන් නිසා ඒක තවත් තහවුරු වෙනවා.

මේ වනවිට ලංකාවේ විදේශ සංචිත ප්‍රමාණය ඩොලර් බිලියන 1.2 දක්වා පහත වැටී ඇති බව පාර්ලිමේන්තු මන්ත්‍රී ඉරාන් වික්‍රමරත්න පවසයි.

මන්ත්‍රීවරයා මේ බව අනාවරණය කර ඇත්තේ පාර්ලිමේන්තුවේදී අදහස් දක්වමින් ය.

මෙය ලංකා ඉතිහාසයේ අවම විදේශ සංචිත ප්‍රමාණය පැවැති කාලසීමාව බවද මන්ත්‍රීවරයා අවධාරණය කර ඇත.

පසුගිය ජනවාරි 12වන දින අධිකරණයට අපහාස කිරීමේ චෝදනාවට වසර 4 බරපතල වැඩ සහිත අත්සිටවූ සිරඳඩුවමට ලක්කළ ප්‍රතිභාපූර්ණ, සම්මානනීය නළුවකු වූ හිටපු පාර්ලිමේන්තු මංත්‍රී රන්ජන් රාමනායක වෙනුවෙන් දිවයින පුරා අත්සන් දශ ලක්ෂයක පෙත්සමක් වෙනුවෙන් රන්ජන්ට ආදරය කරන ජනතාව එක්‍ රොක් වෙමින් සිටී. …. එය සමගි තරුණ ජනබලවේගය විසින් සංවිධානය කර ඇත…

යුරෝපයේ ජීවත්වන ශ්‍රී ලාංකිකයන් රන්ජන් වෙනුවෙන් යුරෝපා පාර්ලිමේන්තුවට ….. !

මේ මොහොතවන විට ජනාධිපතිවරයාට භාරදීම වෙනුවෙන් ක්‍රියාත්මක අත්සන් දස ලක්ෂයේ ව්‍යාපෘතියට සමගාමීව ඊට ජාත්‍යන්තර අවධානය යොමුකරමින් යුරෝපයේ වෙසෙන ශ්‍රී ලාංකිකයන් විසින් යුරෝපා පාර්ලිමේන්තුවට සන්දේශයක් භාරදීමට කටයුතු කරමින් සිටී..

රන්ජන් හෙළිකළ දේ ඇස් පනාපිට සිදුවෙයි…?

දිගින් දිගටම කඩවන මානවහිමිකම්,ආයුධ පෙන්වීමට ගොස් රාජ්‍ය භාරයේ සිටින සැකකරුවන් ඝාතණය කිරීම්,වංචා දූෂණ හා ශ්‍රී ලංකාව තුළ ඇතිවී තිබෙන වර්තමාන තත්වය පිළිබඳ හිටපු පාර්ලිමේන්තු මංත්‍රී රන්ජන් රාමනායක විසින් දිගින් දිගටම තම හඬ අවදි කල චරිතයකි…

එනිසාවෙන්ම රන්ජන් රාමනායක නම් කළාකරුවා, දේශපාලන සිරකරුවා වෙනුවෙන් යුරෝපයේ ජීවතන ශ්‍රීලාංකිකයන් දෙසැම්බර් මස 12වන ඉරිදා සවස 01.00 සිට 4.00 දක්වා කාළය තුළ ජිනීවා මානව හිමිකම් කාර්‍යාලයට සන්දේශයක් භාරදීමට කයටුතු සූදානම් කොට ඇත…

රන්ජන් රාමනායකගේ නිදසහ වෙනුවෙන් ඉතාලියේ වෙසෙන ශ්‍රී ලාංකික පිරිසක් විසින් සංවිධානය කරන මෙම සත්කාර්‍ය වෙනුවෙන් ජර්මනිය,ස්විස්ටර්ලන්තය,ප්‍රංශය,ඔස්ට්‍රියාව,එංගලතය ඇතුලු රටවල් කීපයක වෙසෙන සිවිල් ක්‍රියාකාරීන්ගේද සහාය ලැබීම විශේෂත්වයකි.

සුමුදු මද්දුමආරච්චි.

මිලානෝ.

ඉතාලිය.

අප්‍රිකානු කලාපයේ ඇතැම් රටවල දේශපාලන සමාජ ආර්ථික තත්වයට ශ්‍රී ලංකාව ද සමාන වෙමින් පවතින බව ආචාර්ය මැදගොඩ අභයතිස්ස හිමි සඳහන් කරති.

ඒ උත්සව සභාවක් අමතමිනි.

මැටි රොටී කන, සතුන්ගේ ලේ බොන ඇතැම් රටවල් එම කලාපයේ ඇති බවත් ජනතාව කුසගින්නේ සිටින රටවල් එම කලාපයේ ඇති බවත් පැවසූ වහන්සේ ශ්‍රී ලංකාවද මේ ගමන් කරමින් තිබේ දිසාවට බවද මැදගොඩ අභය තිස්ස හිමි වැඩිදුරටත් පවසා සිටීත

ජීවත් වෙන්න ක්‍රමයක් නැතිව වැහරලි ඇදගෙන අපිරිසිදුවට සිටින මිනිසුන් ඒවායේ ඕනෑතරම් ඇතැයි ද උන්වහන්සේ කීහ.

අපේ රටද එතනට දවසින් දවස ළඟා වෙමින් ඇතැයි ද උන්වහන්සේ සඳහන් කළහ.

‘තව කාලයක් යනකොට අපේ රටට වෙන දේ හිතාගන්නවත් බැරි වෙයි. ටික කාලෙකින් අපේ රට අන්ත අසරණ අප්‍රිකානු රාජ්‍යයක් බවට පත්වෙයි. එළවළු බෑග් එකක් ගේන්න සල්ලි බෑග් එකක් පොළට අරන් යන්න වෙයි"

ශ්‍රී ලංකාවේ ආර්ථිකය මේ වන විට දැවැන්ත අගාධයකට කඩාවැටෙමින් පවතින බවත්, මධ්‍යම පන්තිය විශාල ගැටළු රැසකට මුහුණ පා සිටින බවත්, ඉන් ගොඩ ඒමට මේ මොහොතේ ශ්‍රී ලංකාවට ජාත්‍යන්තර සහය අවශ්‍ය බවත්, හිටපු අග්‍රාමාත්‍ය රනිල් වික්‍රමසිංහ පවසයි.

අබුඩාබි බලා පිටත්ව යාමට පෙර පසුගියදා Zoom තාක්ෂණය ඔස්සේ ජාත්‍යන්තර ප්‍රජාතන්ත්‍රවාදීන්ගේ සංගමයේ සැසිවාරයකට එක්වෙමින් ඔහු මේ බව ප්‍රකාශකර ඇත.

කොවිඩ් 19 වසංගතය ආරම්භ වීමත් සමඟම ශ්‍රී ලංකාව තුළ නිසි ආර්ථික කළමණාකාරිත්වයක් ඇති නොවීම මෙම තත්වයට හේතුව බවයි ඔහු එහිදී පෙන්වා දුන්නේ.

මිට අමතරව, ශ්‍රී ලංකාවේ වත්මන් දේශපාලන තත්වය පිළිබඳව හිටපු අග්‍රාමාත්‍යවරයා මෙහිදී පැහැදිලි කර සිටියා.

මෙ වන විට ජනතාව අලුත් මුහුණු දේශපාලන යාන්ත්‍රණයට අපේක්ෂා කරන බවයි ඔහු පෙන්වා දෙන්නේ. ඊට එක්සත් ජාතික පක්ෂය සුදානම් බවද, හි රනිල් වික්‍රමසිංහ එහිදී සඳහන් කර සිටියා.

මෙම සාකච්ජාවෙන් අනතුරුව අබුඩාබි නුවර බලා හිටපු අග්‍රාමාත්‍යවරයා පිටත්ව ගිය අතර ඔහු අද (05) ඉන්දීය සාගර සමුළුව ඇමතීමට නියමිතයි.

තවත් කොරෝනා මරණ 21 ක් වාර්තා වීමත් සමග මෙරට සමස්ත කොරෝනා මරණ සංඛ්‍යාව 14,440 ක් දක්වා ඉහළ ගියේ ය.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 17 දෙනෙකු කාන්තා ආසාදිතයින් වන අතර ඉතිරි 04 දෙනා පිරිමි ආසාදිතයින් ය.

මියගිය පිරිස අතර වයස අවුරුදු 30 – 59 ත් අතර වයසේ පසුවන ආසාදිතයින් 06 දෙනෙකු සිටින අතර ඉතිරි ආසාදිතයින් 15 දෙනා වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (04) වාර්තා කරන ලද මෙම මරණ 21 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.

පාර්ලිමේන්තුව තුළ විපක්ෂයේ මන්ත්‍රීවරුන්ගේ ආරක්ෂාව තහවුරු කරන තෙක් සභාවට නොපැමිණීමට සමගි ජන බලවේගයේ මන්ත්‍රී කණ්ඩායම අද තීරණය කළේ ය.

ඒ, විපක්ෂ මන්ත්‍රී මනූෂ නානායක්කාර හා රාජ්‍ය අමාත්‍ය කංචන විජේසේකර යන අය අතර ඇති වූ සංවාදයක් දුරදිග යෑමෙනි.

අද පෙරවරුවේ පාර්ලිමේන්තුව උණසුම් මුහුණුවරක් ගත්තේ ය.

ඒ ඊයේ පස්වරුවේ ආණ්ඩු පක්ෂ හා විපක්ෂ මන්ත්‍රීවරු අතර ඇතිවූ ගැටුම්කාරී තත්වය මුල්කර ගනිමිනි.

ඊයේ පස්වරු 05න් පසුව විපක්ෂයට අයවැය විවාදයේ අදහස් දැක්වීමට කාලය ලබා දීමට ආණ්ඩු පක්ෂය විරුද්ධ වීමත් සමග දෙපිරිස අතර උණුසුම් තත්වයක් නිර්මාණය විය.

අද පාර්ලිමේන්තු ආරම්භයේදී යළිත් මේ ගැන සංවාදයක් ඇති විය.

පාකිස්තානයේ කර්මාන්ත ශාලාවක සේවය කළ ශ්‍රී ලාංකික වෘත්තිකයෙකු වන ප්‍රියන්ත කුමාර  අමානුෂික ලෙස ඝාතනය කිරීම පිළිබඳ ජනාධිපති ගෝඨාභය රාජපක්ෂ නිවේදනයක් නිකුත් කර තිබේ.

එහි දැක්වෙන්නේ එම පුවත අසා තමන් මහත් සංවේගයට පත්වූ බවය.

එම ම්ලේච්ඡ සිදුවීම ශ්‍රී ලාංකිකයන්ට සේම මනුෂ්‍යත්වය අගයන ලෝකයේ සැමට බලවත් කම්පනයක් බවද ජනාධිපතිවරයා පෙන්වා දෙයි.

අග්‍රාමාත්‍ය ඉම්රාන් ඛාන් ප්‍රමුඛ පාකිස්තානු රජය මෙම ම්ලේච්ඡ ඝාතනය සිදුවූ වහාම යුක්තිය පසිඳලීමට ගත් ක්‍රියාමාර්ග පාකිස්තානයේ අත්‍යන්ත මිතුරෙකු ලෙස ශ්‍රී ලංකාව අගය කරන අතර මේ පිළිබඳ පාකිස්තාන රජය ගන්නා ඉදිරි ක්‍රියාමාර්ග දෙස ද ශ්‍රී ලංකා රජයත්, සමස්ත ජනතාවත් දැඩි විශ්වාසයෙන් බලා සිටින බවද ජනාධිපතිවරයා සඳහන් කරයි.

නොරොච්චෝලේ බලාගාරය යථාතත්ත්තවයට පත් කරන තෙක් ඉදිරි දින 04 තුළ දිවයිනේ ඇතැම් ප්‍ර‍දේශවල පස්වරු 6.00 සිට පස්වරු 9.30 දක්වා පැයක පමණ කාලයක් විදුලිය සීමා කිරීමට සිදුවන බව විදුලිබල මණ්ඩලය පවසයි.

මෙගාවොට් 300ක් නොරොච්‍චෝලේ බලාගාරය හරහා ජාතික විදුලිබල පද්ධතියට එක් කරන බවත්, මෙගාවොට් 600ක ධාරිතාවක් විදුලිබල පද්ධතියට එක් කිරීමට  තවත්  දින 03ක් පමණ ගත වන බවත් විදුලිබල අමාත්‍යාංශය ප්‍රකාශ කර සිටී.

ඒ අනුව නොරොච්චෝලේ බලාගාරය යථාතත්ත්වයට පත් කරන තෙක් ජාතික දෛනික විදුලි උත්පාදනය අනුව විටින් විට කෙටි කාලීනව විදුලිය විසන්ධි කිරීමට සිදු වන එම අමාත්‍යාංශය වැඩිදුරටත් දන්වා සිටී.

පකිස්ථානයේ සියල්කොට්හිදී ශ්‍රී ලාංකිකයෙකු කෲර ලෙස ඝාතනය කිරීමේ සිද්ධිය සම්බන්ධයෙන් පුද්ගලයින් 100 දෙනෙකු පමණ අත්අඩංගුවට ගෙන ඇතැයි, විදෙස් මාධ්‍ය වාර්තා කර තිබේ.

සියල්කොට්හී වසිරාබාද් මාර්ගයේදී ඊයේ පාකිස්ථානුවන් පිරිසක් ශ්‍රී ලාංකික ශ්‍රමිකයෙකු වධ හිංසනයට ලක් කර ඝාතනය කර තිබුණි.

වධහිංසනයට ලක් කර ඝාතනය කිරීමෙන් පසු ඔහුගේ සිරුර පුළුස්සා දමා ඇති බව පකිස්ථාන ඩෝන් පුවත් වෙබ් අඩවිය සඳහන් කර තිබූ අතර එම සිදුවීමට අදාළ දර්ශන ද විදෙස් මාධ්‍ය ඔස්සේ පළ කෙරිණ.

මෙලෙස ඝාතනයට ලක්ව ඇත්තේ සියල්කොට්හී පෞද්ගලික කර්මාන්ත ශාලාවක සාමාන්‍යාධිකාරීවරයෙකු ලෙස සේවය කළ ශ්‍රී ලාංකිකයෙකි.

මේ අතර ඊයේ පකිස්ථාන අග්‍රාමාත්‍ය ඉම්රාන් ඛාන් අවධාරණය කර සිටියේ, ශ්‍රී ලාංකිකයාගේ ඝාතනයට වගකිව යුතු සියලු දෙනා නීතිය හමුවට ගෙනැවිත් දැඩි දඬුවම් පමුණුවන බවයි.

සිය ට්විටර් ගිණුමේ සටහනක් තබමින් පකිස්ථාන අග්‍රාමාත්‍යවරයා පැවසුවේ, එලෙස ශ්‍රී ලාංකිකයෙකු කෲර ලෙස ඝාතනය කිරීම පාකිස්ථානයට ලැජ්ජාවක් බවත් ඝාතනයට අදාළ පරීක්ෂණය තමන් අධීක්ෂණය කරමින් සිටින බවත් ය.

News 1st

මෙරටින් හමුවූ ප්‍රථම ඔමික්‍රෝන් ආසාදිතයා කවරෙකුදැයි යන්න මේ වනතෙක් මහජන සෞඛ්‍ය පරීක්ෂකවරුන් වෙත දැනුම්දී නැතැයි මහජන සෞඛ්‍ය පරීක්ෂකවරුන්ගේ සංගමය පවසයි.

එහි සභාපති උපුල් රෝහණ  සඳහන් කළේ එම ආසාදිත කාන්තාව යැයි සැක කරන කාන්තාවක් ඊයේ (03) දිනයේ හමුවූ බවය.

"අපිට නිල වශයෙන් ඒ කාන්තාව කවුද කියලා දැනුම්දීලා නෑ. නමුත් මහවැව සෞඛ්‍ය වෛද්‍ය නිලධාරී කොට්ඨාසයෙන් ඒ ආසාදිත කාන්තාව යැයි සැක කරන කාන්තාවකගේ PCR සහ ඇයගේ ආශ්‍රිතයින්ගේ PCR කරලා එවන්න කියලා වසංගත රෝග විද්‍යා ඒකකයෙන් දැනුම්දීලා තිබුණා. ඒ මාරවිල මහජන සෞඛ්‍ය පරීක්ෂකවරයාගේ බලප්‍රදේශයට අයත් නිවසකින්. අපි ඒක යවලා තියෙනවා."

"මේ කියන කාන්තාව පසුගිය 24 වනදා නයිජීරියාවේ සමුළුවකට සහභාගී වෙලා ඇයගේ ස්වාමි පුරුෂයාත් එක්ක තමයි ලංකාවට ඇවිත් තියෙන්නේ."

ප්‍රවීණ වේදිකා හා සිනමා නළු සරත් චන්ද්‍රසිරි අභවප්‍රාප්ත වී ඇත.

මිය යන විට ඔහු 57 වැනි වියේ පසු විය.

අසනීප තත්ත්වයක් නිසා ඔහු දින 21 පුරාවට කොළඹ ජාතික රෝහලේ දැඩිසත්කාර ඒකකයේ ප්‍රතිකාර ලැබීය.

මීට ඉහත අවස්ථා කිහිපයක දී ම ඔහු මිය ගිය බවට අසත්‍ය ප්‍රචාරයන් සමාජ මාධ්‍යයන් හරහා පැතිරුණු නමුත්, සහෘද හදවතට කම්පනයක් එක් කරමින් සරත් චන්ද්‍රසිරි අද පාන්දර කොළඹ ජාතික රෝහලේ දී දිවි රඟ මඬලට සමු දුන්නේය.

තවත් කොරෝනා මරණ 20 ක් වාර්තා වීමත් සමග මෙරට සමස්ත කොරෝනා මරණ සංඛ්‍යාව 14,419 ක් දක්වා ඉහළ ගියේ ය.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 11 දෙනෙකු කාන්තා ආසාදිතයින් වන අතර ඉතිරි 09 දෙනා පිරිමි ආසාදිතයින් ය.

මියගිය පිරිස අතර වයස අවුරුදු 30 – 59 ත් අතර වයසේ පසුවන ආසාදිතයින් 06 දෙනෙකු සිටින අතර ඉතිරි ආසාදිතයින් 14 දෙනා වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (03) වාර්තා කරන ලද මෙම මරණ 20 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.