මාලිමාවේ ජනාධිපති අපේක්ෂක අනුර කුමාර දිසානායකගේ යෝජනා ක්‍රියාත්මක කළොත් 2022 මැයි මාසයට වඩා අමාරු තත්ත්වයක් ඇතිවී ඩොලරයට රුපියල් 500 ක් ගෙවීමට සිදුවනු ඇතැයි ජනාධිපති රනිල් වික්‍රමසිංහ පැවසිය.
ජනාධිපතිවරයා මේ බව සඳහන් කළේ, බේරුවල දී අඊයේ (13) පැවැති 'පුළුවන් ශ්‍රී ලංකා' ජනරැලිය අමතමිනි.
අනුර කුමාර දිසානායක ඉදිරිපත් කර ඇති ආර්ථික ප්‍රතිපත්තියට අනුව රුපියල බාල්දු වන බව ජනාධිපති රනිල් වික්‍රමසිංහ එහිදී අවධාරණය කළේය.
අනුර කුමාරගෙන් ගෝඨාභය පරද්දන වාර්තාවක්..
මාලිමාව ඉදිරිපත් කර ඇති ප්‍රතිපත්ති ක්‍රියාත්මක කිරීමෙන් අනුර කුමාර ගෝඨාභය පරද්දන වාර්තාවක් තබනු ඇති බවද ජනාධිපතිවරයා කීය.
"විදේශ සංචිත ගොඩනැගී තිබෙන නිසා වාහන ආනයන තහනම අප ඉවත් කර තිබෙනවා. මේ අනුව ලබන වසරේ සිට ලංකාවට වාහන ගේන්න පුළුවන්. මේ දියුණුව නැවත කඩාකප්පල් කරන්න අප සූදානම් නැහැ. මේ ආර්ථිකය නැවත කැඩෙන්න දෙන්න එපා. මාලිමාවේ ප්‍රතිපත්ති ක්‍රියාත්මක කළොත් රුපියලේ වටිනාකම තවත් වැටෙනවා. අඩු ගණනේ ඩොලරය රුපියල් 400ට පමණ ඉහල යාවි.
එහෙම වුනොත් අපේ ගෝඨාභය රාජපක්ෂ ජනාධිපතිතුමත් පරද්දන වාර්තාවක් දාන්න වේවි.එවිට අයි.එම්.එෆ් ගිවිසුම කඩාකප්පල් වෙනවා. එම සහයෝගය නැති උනොත් ඩොලරයට සාපේක්ෂව රුපියල 500 දක්වා කඩා වැටෙනවා.
මාලිමාවේ යෝජනා ක්‍රියාත්මක කළොත් 2022 මැයි මාසයට වඩා අමාරු තත්ත්වයක් ලංකාවට ඇතිවන බව කිව යුතුයි.
ඔය කතාව කිව්වාම මඩ ගහනවා ලු. මට අවශ්‍ය ඩොලරයට රුපියල් 275 ක් දක්වා පහතට ගෙන ඒමටයි.
අනුරට ඒක කරන්න පුළුවන් නම් මගේ විරුද්ධත්වයක් නෑ.මම සංඛ්‍යා ලේඛන පෙන්නනවා වගේ ඒ අයත් සංඛ්‍යා ලේඛන පෙන්වන්න.රුපියල ආරක්ෂා කිරීමට ඔවුන්ට තිබෙන සැලසුම කියන්නැයි" ජනාධිපතිවරයා කීය.
ජනාධිපතිවරයා තව දුරටත් මෙසේද පැවසිය.
ෙ'' මෝටර් රථ ආනයනයට තිබූ තහනම ඉවත් කළා."
"හිටපු කෘෂිකර්ම ඇමති අනුර කුමාර මහනුවරදී කියලා තියෙනවා මම එතුමාට මඩ ගහන ව්‍යාපාරයක් ගෙනියනවා කියලා. මම එහෙම කළේ නෑ. මම කිව්වේ එක දෙයයි. අනුර කුමාරගේ යෝජනා ක්‍රියාත්මක කරනවා නම්, IMF සංවිධානය සමග තියෙන එකඟත්වයට පටහැනියි. අපි ගිවිසුම කඩනවා. මේ ගිවිසුම කඩාකප්පල් කරාම ඒකෙත් පිහිට නැත්නම් ඩොලරය රුපියල් 500ක් වෙයි. තමන් කැමතිද එහෙම රුපියල බාල්දු වුණොත්. මම ඔච්චරයි ඇහුවේ. තමුන්නාන්සේ ඇයි රුපියල බාල්දු කරන්නේ. දැන් මේ වෙලාවේ රුපියල ආරක්ෂා කරන්න බැරිනම්, ජීවන බර වැඩිකරනවා නම් ඇයි අපි ඒ අයට ඡන්දෙ දෙන්නේ.
තමුන්නාන්සේලාගේ ආර්ථික යෝජනාවලින් ජනතාවට විශාල බරක් එනවා. ඒ බර ගැන කනගාටුවක් නැද්ද ? මඩ ගහන එකක් නෙමෙයි අපි අහන්නේ. මාලිමාවටත් හිටපු ඇමතිතුමාටත් ආර්ථිකය මෙහෙයවන්න ශක්තියක් තියෙනවා ද? කියන එකයි අපි අහන්නේ. මේක අමාරුවෙන් මම කළේ. මට ඕන ජීවන බර සැහැල්ලු කරන්න. අන්න ඒකයි අපි කරන්න බලාපොරොත්තුව. දැන් මොකද්ද තියෙන්නේ තවත් ආර්ථිකය දියුණු වෙනවා. එවිට අපි ඒ සහනය ඔබට දෙනවා. අද අපි තවත් තීරණ දෙකක් ගත්තා. මේ රටේ විදේශ සංචිතය ශක්තිමත් වෙලා නිසා ආපහු මෝටර් රථ ආනයනයට තිබූ තහනම ඉවත් කළා."