ජනාධිපති රනිල් වික්‍රමසිංහ 2024 ජනාධිපතිවරණය සඳහා නාම යෝජනා ලබාදීමෙන් පසුව පවත්වන මංගල මහා ජන රැලිය එළැඹෙන සෙනසුරාදා (17) පස්වරු 2.00 ට අනුරාධපුර සල්ගාදු ක්‍රීඩාංගණයේදී පැවැත්වීමට නියමිත බව වාර්තා වෙයි.
මේ සම්බන්ධයෙන් අදහස් දක්වමින් මුදල් රාජ්‍ය අමාත්‍ය ශෙහාන් සේමසිංහ පවසන්නේ ජනාධිපති රනිල් වික්‍රමසිංහ ජනාධිපති ධූරය ලබාගැනීමෙන් පසුව පවත්වන පළමු දේශපාලන රැලිය මෙය වන බවයි.
මේ සඳහා බහුතර පක්ෂ නියෝජිතයන් සහ සංවිධාන මේ අවස්ථාවට එක්වීමට නියමිත බවත් අනුරාධපුරයේ පැවැත්වෙන මෙම ජන රැලිය මහත් ජන සහභාගීත්වයක් ඇතිව සංවිධානය වන බවත් රාජ්‍ය අමාත්‍යවරයා සඳහන් කරයි.
රැලියට සහභාගී වීමට පෙර ජනාධිපති රනිල් වික්‍රමසිංහ ශ්‍රී මහා බෝධිය වෙත ගොස් ආශීර්වාද ගැනීමට නියමිත බවත් රාජ්‍ය අමාත්‍යවරයා පවසයි.
මේ අතර දේශපාලන විචාරකයන් පවසන්නේ අනුරාධපුර සල්ගාදු ක්‍රීඩාංගණයේ සාමාන්‍යයෙන් ජන රැලි පවත්වන්නේ පොදුජන පෙරමුණ විසින් වන අතර එය මෙතෙක් එම පක්ෂයේ අනන්‍යතාවයක් වූ බවයි. නමුත් මෙවර එම අනන්‍යතාවය පොදුජන පෙරමුණේ අපේක්ෂකයා වෙතින් ගිලිහී ජනාධිපති රනිල් වික්‍රමසිංහ ප්‍රමුඛ සන්ධානය වෙත අත්පත්ව ඇති බව ද විචාරකයන් පෙන්වා දෙයි.
Ad
