පෞද්ගලික හේතුවක් මත තමා 2024 ජනාධිපතිවරණය සඳහා අපේක්ෂකයෙකු වශයෙන් ඉදිරිපත් නොවන බව පොදුජන පෙරමුණේ නාමල් පාර්ශ්වයේ තේරීම වූ කෝටිපති ව්‍යාපාරික ධම්මික පෙරේරා පවසයි.
ශ්‍රී ලංකා පොදුජන පෙරමුණ මහ ලේකම්, නීතිඥ සාගර කාරියවසම් වෙත ලිපියක් යොමුකරමින් ඔහු එබව දැනුම්දී ඇත.
එම ලිපිය පහත දැක්වෙයි.
2024 ජනාධිපතිවරණය සඳහා අපේක්ෂකයෙක් වශයෙන් ඉදිරිපත් නොවන බව දැනුම් දීම
පළමුව, 2024 ජනාධිපතිවරණය සඳහා ශ්‍රී ලංකා පොදුජන පෙරමුණ නියෝජනය කරන අපේක්ෂකයා වශයෙන් මා ඉදිරිපත් කිරීමට යෝජනා කිරීම සම්බන්ධව පක්ෂ නායකත්වයටත්, ඔබතුමාටත්, අනෙකුත් සියලුම දේශපාලන නියෝජිතවරුන්ටත් මා ගේ හෘදයාගම ස්තූතිය පළ කරමි.
නමුත්, පෞද්ගලික හේතුවක් මත මා 2024 ජනාධිපතිවරණය සඳහා අපේක්ෂකයෙකු වශයෙන් ඉදිරිපත් නොවන බව මෙයින් කාරුණිකව දන්වමි. පක්ෂයේ උන්නතිය සහ ඉදිරි කටයුතු සාර්ථකත්වය උදෙසා මාගේ සුභ පැතුම් මෙයින් එක් කරමි.''
ස්තූතියි මෙයට හිතවත්
ධම්මික පෙරේරා (පා.ම.)
මේ අතර ජනාධිපතිවරණය වෙනුවෙන් පොදුජන පෙරමුණේ අපේක්ෂකයා ලෙස ඉදිරිපත් වන ලෙස එම පක්ෂයේ නාමල් පාර්ශ්වය විසින් අගමැති දිනේෂ් ගුණවර්ධන වෙතින් ඉල්ලා ඇති නමුත් ඔහු එය ප්‍රතික්ෂේප කර ඇති බව වාර්තා වෙයි.
මේ අතර පොදුජන පෙරමුණේ සමාජ මාධ්‍ය ක්‍රියාකාරීන් පාර්ලිමේන්තු මන්ත්‍රී නාමල් රාජපක්ෂ හෝ බැසිල් රාජපක්ෂ පොදුජන පෙරමුණ පක්ෂයේ ජනාධිපති අපේක්ෂකයා වන ලෙස ඉල්ලමින් ප්‍රචාරක ව්‍යාපාරයක් දියත් කර ඇත.