රට යළි ගොඩ නැගීම සඳහා ජනාධිපති රනිල් වික්‍රමසිංහ ගෙනයන වැඩපිළිවෙළට තවදුරටත් සහාය දැක්විය යුතු බවටත්, ඒ වෙනුවෙන් ඉදිරි ජනාධිපතිවරණයේදී ඔහුට සහාය දැක්විය යුතු බවටත් අද (03) රැස්වූ පොදුජන පෙරමුණේ වාරියපොල ආසනයේ බල මණ්ඩලය යෝජනා සම්මත කර ගෙන ඇත.
රාජ්‍ය අමාත්‍ය ඩී.බී. හේරත් විසින් පොදුජන පෙරමුණේ වාරියපොළ ආසන සංවිධායක ලෙස ඉදිරි ජනාධිපතිවරණය පිළිබඳ සාකච්ඡා කිරීම සඳහා මෙම ආසන බල මණ්ඩල රැස්වීම අද පෙරවරුවේ කැඳවා තිබිණ.
මේ සඳහා වාරියපොළ ප්‍රාදේශීය සභාව නියෝජනය කළ හිටපු මන්ත්‍රීවරුන්, වාරියපොළ සමූපකාර අධ්‍යක්ෂ මණ්ඩලය, කොට්ඨාස කැඳවුම්කරුවන්, ආගමික නායකයින් ඇතුළු සියළු දේශපාලනික ක්‍රියාකාරිකයින් සහභාගී වූ බව වාර්තා වේ.
කුරුණෑගල දිස්ත්‍රික් නායක ජොන්ස්ටන් ප්‍රනාන්දු මෙතෙක් ජනාධිපතිවරයාට සහාය දැක්වීමට තීරණය කර නොමැති අවස්ථාවක මෙම තීන්දුව සුවිශේෂී බව දේශපාලනික විචාරකයින්ගේ මතය වී තිබේ.