මැද පෙරදිග රටවල් ඇතුළු ශ්‍රී ලාංකික ශ්‍රමිකයන් යොමු කෙරෙන රටවල සංචාරකයන් මෙරටට ගෙන්වා ගැනීමේ නව ව්‍යාපාර අවස්ථා සඳහා විදේශ රැකියා නියෝජිත ආයතන අවධානය යොමු කරන්නේ නම් සංචාරක අමාත්‍යාංශය හරහා ඔවුන්ට අවශ්‍ය පහසුකම් සලසාදිය හැකි බව ජනාධිපති රනිල් වික්‍රමසිංහ පැවසීය.
ජනාධිපතිවරයා මේ බව සඳහන් කර සිටියේ කුරුණෑගල එපිටොම් හෝටල් පරිශ්‍රයේ ඊයේ (21) පැවති “අභිමන් 2024” උත්සවයට එක්වෙමිනි .
මෙරට ආර්ථිකය වෙනුවෙන් පුළුල් දායකත්වයක් ලබාදෙන විදේශ රැකියා නියෝජිත ආයතන අගයමින් සහතික පත් හා සමරු තිළිණ ප්‍රදානය කිරීම මෙහිදී ජනාධිපති රනිල් වික්‍රමසිංහ අතින් සිදු විය.
මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය,
මම ජනාධිපති ධූරය භාරගෙන වසර දෙකක් සම්පූර්ණ වන මේ අවස්ථාවේ ඔබට ස්තූති කළ යුතුයි. එදා ඔබ රටට මුදල් උපයා දුන්නේ නැත්නම් අද රට මෙවන් තත්ත්වයකට ගෙන ඒමට හැකියාව ලැබෙන්නේ නැහැ. වසර දෙකකට පෙර අප සිටියේ අසීරු තත්ත්වයකයි. පැවති ආර්ථික අර්බුදයෙන් රට ගොඩගැනීමට හැකි වනු ඇතැයි කිසිවෙකු විශ්වාස කළේ නැහැ. නමුත් ජනතාව සමඟ එක්ව මේ රට ගොඩගැනීමට හැකි බව මම විශ්වාස කළා. වෙනත් රටවල්වල මෙන් නොව වසර දෙකක් ගතවීමට පෙර අප එම වැඩ කටයුත්ත අවසන් කර තිබෙනවා.
අප පැමිණියේ දුෂ්කර ගමනක් බව ඔබ දන්නවා. බොහෝ දෙනෙක් සිතුවේ අපේ රටට අනාගතයක් නැහැ කියලයි. කර්මන්ශාලා පවත්වාගෙන යාමට ඉන්ධන තිබුණේ නැහැ. රටට සංචාරකයන් පැමිණියේ නැහැ. අපි විදේශ ශ්‍රමිකයන් එවු මුදල් වලින් තමයි රටේ ආර්ථිකය ඉදිරියට ගෙන යාමේ වැඩපිළිවෙළ ආරම්භ කළේ.
අනාගතයට මුහුණ දිය හැකි බවට විශ්වාසයක් දැන් අප තුළ තිබෙනවා. ලොව බොහෝ රටවල් අපෙන් අහනවා මේ දේ කළේ කොහොමද කියලා. අපි බංග්ලාදේශයේ ණය ආපසු ගෙවා තිබෙනවා. අද වන විට බංග්ලාදේශය තුළ නොසන්සුන් තත්ත්වයක් ඇති වී තිබෙනවා. අපට අපට දුෂ්කර අවස්ථාවේ සහාය වූ එම රට තුළ නැවත සාමය සහ ස්ථාවරත්වය ඇති වේවා කියා ප්‍රාර්ථනා කරනවා.
අප දැන් ඉදිරිගමන ගැන සිතිය යුතුයි. අපේ රට අපනයන ආර්ථිකයක් බවට පරිවර්තනය කළයුතුයි. ඒ වගේම විදේශගත වන ශ්‍රමිකයන්ගේ නිපුණතාවන් වර්ධනය කරමින් ඔවුන්ට අවශ්‍ය පුහුණුව ලබාදීමට විධිමත් වැඩපිළිවෙළක් ක්‍රියාත්මක කළයුතුයි. එවිට ඔවුන්ට හොද රැකියා අවස්ථා සඳහා යොමු වී වැඩි ආදායමක් ලබා ගැනීමට හැකිවෙනවා. එය එම පුද්ගලයන්ට මෙන්ම රටටත් හොඳ තත්ත්වයක් බව කිව යුතුයි.
වසර 02ක් අප දුක් වින්දා. වසර දෙකක් ඔබේ සහාය ඇතිව මම මේ රට ඉදිරියට ගෙන ආවා. එහි ප්‍රතිලාභ ඔබට හිමි විය යුතුයි. එසේනම් අප සියලුදෙනා එක්ව අලුත් ආර්ථිකයක් ගොඩනැඟිය යුතුයි. ඒ සඳහා අප සියලුදෙනා එක්වී කැපවී කටයුතු කරමු.
අපේ ශ්‍රමිකයන් බඳවා ගන්නා රටවල තිබෙන ව්‍යාපාර අවස්ථා ඇතැම් විට ඔබට ලංකාවට ගෙන ඒමට හැකි වනු ඇතැයි කියා මම විශ්වාස කරනවා. අද එම අවස්ථාව විශාල වශයෙන් හිමිව ඇත්තේ මැද පෙරදිග රටවලයි. ලංකාවේ ශ්‍රමිකයින් එම රටවලට යැවීමට හැකිනම් එම රටවල සංචාරකයන් මෙරටට ගෙන්වා ගැනිමට අපට හැකි විය යුතුයි. සංචාරක අමාත්‍යාංශය සමඟ එක්ව ඔබට ඒ සඳහා කටයුතු කළ හැකියි. එවිට ඔබේ ව්‍යාපාර තවදුරටත් පුළුල් වෙනවා. එම කටයුතු සඳහා ඔබට රජයේ සහයෝගය ලබාදීමට අපට පුළුවන්.
ඒ වගේම එම රටවලට අවශ්‍ය ආහාර සැපයීමට අපට හැකියාවක් තිබේනම් ඒ සඳහා ද රජයේ සහයෝගය ලබාදිය හැකි බව දැනුම්දීමට කැමතියි. අපි අලුතින් සිතා අලුත් ගමන යා යුතුයි. එක තැන සිර වෙන්න බැහැ. ඒ වගේම රටේ ඉදිරි න්‍යාය පත්‍රය සකස් කරන්නේ දේශපාලනඥයන් නොවන බව ද සිහිපත් කරමින් ඔබේ ඉදිරි කටයුතු වෙනුවෙන් මගේ සුබපැතුම් පළ කරනවා.
කම්කරු හා විදේශ රැකියා අමාත්‍ය මනූෂ නානායක්කාර :
ඇතැමුන් බලය ලබා ගැනීමේ කෑදරකමින් ජනතාව පීඩාවට ලක් කරමින් සිටින මොහොතක කිසිම කොන්දේසියක් නොදමා ජනාධිපති රනිල් වික්‍රමසිංහ මහතා ජනතාව දුකෙන් මුදවා ගැනීමට ඉදිරිපත් වුණා. එතුමාගේ රාජතාන්ත්‍රික භාවය මීට වසර දෙකකට පෙර පැවති දරුණු ආර්ථික අර්බුදයේදී පැහැදිලිව පෙන්නුම් කළා. වසර දෙකක් ඇතුළත පීඩාවට පත් ජනතාව ජීවත්වීමේ හැකියාවක් ඇති ආර්ථිකයක් ගොඩනැඟීමට එතුමාට පුළුවන් වුණා.එතුමාගේ ආර්ථික දැක්මට සහයෝගය දැක්වීම සඳහා විගමනික ශ්‍රමිකයින් තමන් උපයා ගත් ධනය බැංකු හරහා ලංකාවට එවීමට කටයුතු කළා. ඒ අනුව මේ වසරේදි පමණක් ඩොලර් බිලියන 12ක විදේශ විනිමයක් ලබාගැනීමට හැකි වුණා.
2022 වසරේදී මූලික අවශ්‍යතා ලබා ගැනීමටවත් විදේශ විනිමය නොතිබූ රටක් අද වන විට සාමාන්‍ය පරිදි ක්‍රියා කරවීමට ජනාධිපතිවරයාගේ ආර්ථික දැක්ම නිසා හැකි වුණා. ඒ සඳහා ඔබ විදේශ රැකියා නියෝජිත ආයතන වශයෙන් විශාල කාර්යභාරයක් ඉටු කළා. ඒ වෙනුවෙන් සිදු කරන ඇගයීම “අභිමන් 2024” ලෙස ඔබට පුද කරනවා.ඔබේ ශක්තිය එදා රටට නොලැබුණා නම් අද රට තිබෙන තැන හිතාගන්නවත් බැහැ. ඒ නිසා ඉදිරියටත් ඔබේ ශක්තිය අප රටට ලබාදෙමින් රටේ දියුණුවට දායක වන ලෙස ඉල්ලා සිටිනවා.
වයඹ පළාත් ආණ්ඩුකාර නසීර් අහමඩ්, රාජ්‍ය අමාත්‍යවරුන්වන ජගත් පුෂ්ප කුමාර, ශාන්ත බණ්ඩාර, ඩී.බී හේරත් , හිටපු අමාත්‍ය අකිල විරාජ් කාරියවසම්, විදේශ රැකියා බලපත්‍ර ලාභීන්ගේ දේශපාලන සංසදයේ සභාපති ලංකා විජිත කුමාර, ලේකම් ජී. ගනේෂවරන්, භාණ්ඩාගාරික නිශාන්ත ජයකොඩි යන මහත්වරුන් සහ විදේශ රැකියා නියෝජිත ආයතනවල ප්‍රධානීන් සහ නියෝජිතයන් මෙම අවස්ථාවට එක්ව සිටියහ.
