ශ්‍රී ලංකා රූපවාහිනී සංස්ථාවේ අධ්‍යක්ෂ ජනරාල් ලෙස ශ්‍රී ලංකා ගුවන් විදුලි සංස්ථාවේ හිටපු සභාපති ජයම්පති බණ්ඩාර හීන්කෙන්ද පත්කර ඇත.
ඔහු ඊට පෙර ශ්‍රී ලංකා ගුවන් විදුලි සංස්ථාවේ සභාපති ලෙස පත්ව සිටි අතර එම තනතුර සඳහා හඩ්සන් සමරසිංහ පත්කර ඇත.
රූපවහිනී සංස්ථාවේ අධ්‍යක්ෂ ජනරාල් ලෙස කටයුතු කළ අජිත් නාරගල එම තනතුරෙන් ඉවත් කිරීම සම්බන්ධව සංස්ථා සේවකයන් අතර විවිධ කතාබහ මතුව තිබේ.
ඇතැමුන් පවසන්නේ පසුගිය ජුනි මස මුල ජනාධිපති මාධ්‍ය අංශය සහ රාජ්‍ය මාධ්‍ය ප්‍රධානීන් අතර පැවති සාකච්ඡාවකදී ජනාධිපති මාධ්‍ය ප්‍රකාශක කිංස්ලි රත්නායක සමඟ අජිත් නාරගල ඇතිකරගත් කතාබහක් මීට හේතුවී ඇති බවයි.
මාධ්‍ය කිහිපයක්ම වාර්තා කල ආකාරයට දෙදෙනා අතර මේ කතාබහ ඇතිව තිබුණේ ජුනි 7 හෝ ඊට ආසන්න දිනකදී රජයේ ප්‍රවෘත්ති දෙපාර්තමේන්තුවේ පැවති සාකච්ඡාවකදීය.
එහිදී ජනාධිපති මාධ්‍ය ප්‍රකාශක කිංස්ලි රත්නායක "රාජ්‍ය මාධ්‍ය මොනවද කරන්නේ ..? මොනවද රජයට දෙන සහයෝගය ..? රාජ්‍ය මාධ්‍ය එක්ක මෙහෙම කරන්න බෑ.." යනුවෙන් පවසා ඇති අතර එහිදී ඊට ප්‍රතිචාර දක්වා ඇත්තේ SLRC අධ්‍යක්ෂ ජනරාල් අජිත් නාරගලය.
" මෙතැන ඉන්නේ මේ රටට , මේ රජයට ආදරය කරන මිනිස්සු ... මෙතැන ඉන්නේ පහුගිය කාලේ හිරේ ගිය, FCID,CID ගිහිල්ලා දුක් විඳපු මිනිස්සු... මේ ආණ්ඩුව බලයට පත් කරන්න රට වටේ ගිය මිනිස්සු ... අපි අපේ රාජකාරිය හොඳට කරනවා...'' යනුවෙන් එහිදී ඔහු පවසා ඇත.
එම සංවාදයට එක් වෙමින් ලේක්හවුස් කර්තෘ මණ්ඩල අධ්‍යක්ෂ ධර්ම ශ්‍රී කාරියවසම් පවසා ඇත්තේ අඩුපාඩු සහ දුෂකරතා මැද රාජ්‍ය මාධ්‍ය මේවිටත් උපරිමයෙන් කටයුතු කරමින් සිටින බවය.
'අපිට ප්‍රයිවට් මිඩියාවල වගේ වැඩ කරන්න බැහැ. රජයේ මාධ්‍ය කියන්නේ විනයක් තියෙන මාධ්‍යයක්. වකීමෙන් වැඩ කරන්න වෙනවා. පියුමි හංසමාලීගේ නිවුස් එක රජයේ මාධ්‍යයකින් පෞද්ගලික මාධ්‍යවලින් වගේ ගන්න බැහැ. රජයේ මාධ්‍යයකට ගොසිප් කියන්න බැහැ. රජයේ මාධ්‍ය තමන්ගේ වගකීම අවබෝධ කරගනිමින් රජයේ සංවර්ධන වැඩපිළිවෙල ගැන පුළුල් ප්‍රචාරයක් ලබා දෙනෙවා....'යැයි ද ධර්ම ශ්‍රී කාරියවසම් අවධාරණය කර ඇත,
කෙසේවුවත් මේ කතාබහ අවසානයේ කිංස්ලි රත්නායක එම ස්ථානයෙන් බැහැරව ගොස් තිබේ.