පුවත්

මතුවී තිබෙන ඩොලර් අර්බුදය ශ්‍රී ලංකාව නියෝජනය කරමින් විදේශ රටවල පවත්වාගෙන යන තානාපති කාර්යාල වසා දැමීම දක්වා තීව්‍ර වෙමින් පවතී.

ඒ බව තහවුරු කරමින් අද (21) ලංකාදීප පුවත්පතේ ප්‍රධාන ප්‍රවෘත්තියෙන් හෙළිකර ඇත්තේ , ඉරාක සහ නෝර්වේ යන රටවල ශ්‍රී ලංකා තානාපති කාර්යාල වසා දැමීමට වසා දැමීමට තීරණය කර ඇති අතර ඕස්ට්‍රේලියාවේ සිඩ්නි නුවර පිහිටා තිබෙන කොන්සල් කාර්යාලයද වසා දැමීමට නියමිතව ඇති බවයි.

මෙම තීරණ මාර්තු 31 වෙනිදා සිට ක්‍රියාත්මක වන බවත් වාර්තා වෙයි.

ලංකා රජය චීනයෙන් ඩොලර් බිලියන 2.5 ක ණයක් ඉල්ලා ඇති බවත් එම මුදලෙන් ඩොලර් බිලියනයක් සෘජු ණයක් ලෙසත් ඩොලර් බිලියන 1.5 ක් වෙනත් ණය මාර්ගවලින් ලබාදෙන ලෙසත් ඉල්ලා ඇති බවත් ශ්‍රී ලංකාවේ චීන තානාපති චී ෂෙන්හොංග් පැවසීය.

ඒ කොළඹදී අද (21) පැවැති විශේෂ මාධ්‍ය හමුවකදී අදහස් දක්වමින් ය.

ශ්‍රී ලංකාවේ ඉල්ලීම පරිදි ඒ පිළිබඳව සළකා බලමින් සිටින බව කී ශ්‍රී ලංකාවේ චීන තානාපති චී ෂෙන්හොංග් චීනය තව දුරටත් ශ්‍රී ලංකාවට සියලුම අංශවලින් සහයෝගය දක්වන ප්‍රමුඛයා බවට ද සඳහන් කළේය.

ශ්‍රී ලංකාවේ මහ බැංකු වාර්තාවට අනුව ද චීනය අඛණ්ඩව මූල්‍යමය සහ සෙසු සියලුම අංශවලින් සහයෝගය දක්මින් ප්‍රමුඛයා යැයි තව දුරටත් පත්ව සිටින බව ද චීන තානාපතිවරයා වැඩි දුරටත් කීය.

රට අත්‍යවශ්‍ය ආහාර භාණ්ඩ , ඉන්ධන ගෑස් ඇතුළු උග්‍ර අර්බුදයක සිටින පසුබිමේ පවා කිලෝ මීටර් 5.3 පාරක් රුපියල් බිලියන 28 ක් වැයකර ඉදිකර 2023 දී විවෘත කිරීමේ සූදානමක් සම්බන්ධයෙන් තොරතුරු වාර්තා වෙයි.

මේ බව අනාවරණය වී ඇත්තේ කුළුණු මතින් දිවෙන වරාය පිවිසුම් මාර්ගයේ ඉදිකිරීම්වල ප්‍රගතිය පිලිබඳව සාකච්ඡා කිරීම සඳහා පැවති ප්‍රගති සමාලෝචන රැස්වීමේදීය.

මේ සම්බන්ධයෙන් අමාත්‍යවරයා ගේ මාධ්‍ය ඒකකය නිකුත්කළ නිවේදනයක මෙසේද සඳහන් වෙයි.

ඉඟුරුකඩේ මංසන්ධියේ සිට ගාලුමුවදොර වරාය නගරය දක්වා කුළුණු මතින් දිවෙන වරාය පිවිසුම් මාර්ගයේ ඉදිකිරීම් කඩිනම් කර 2023 වසරේ දී අවසන් කර , ජනතා අයිතියට පත්කල යුතු බව ආණ්ඩු පක්ෂයේ ප්‍රධාන සංවිධායක , මහාමාර්ග අමාත්‍ය ජොන්ස්ටන් ප්‍රනාන්දු ප්‍රකාශ කර ඇත.

 කුළුණු මත ඉදිකරන වරාය පිවිසුම් මාර්ගයේ ඉදිකිරීම් ආරම්භවූ මුල් වසර දෙක ඇතුලත එහි ඉදිකිරීම් ඉතාමත් මන්දගාමී අයුරින් සිදු වුන බැවින් ඉදිකිරීම් වල ප්‍රගතිය 7% ක් වැනි අඩු ප්‍රමාණයක තිබිණි. නමුත් 2022 වසරේ මුල් කාර්තුව වන විට සමස්ථ ඉදිකිරීම් වල ප්‍රගතිය 32% බවත් , ශ්‍රී ලංකාවේ ප්‍රථම වරට භාවිතා කරන නව තාක්ෂණික ක්‍රමවේදයක් වන පෙර සවි කොන්ක්‍රීට් පාලම් කොටස් සවි කිරීමේ කටයුතුද මේවන විට අඛන්ඩව සිදු කරන බවත් ව්‍යාපෘති අධ්‍යක්ෂ ඉංජිනේරු කේ.ඩබ්ලිව්. කණ්ඩම්බි විසින් අමාත්‍යවරයා දැනුවත් කරන ලදි.

කොළඹ වානිජ නගරයට ප්‍රවේශ වීමේදී පවතින අධික රථවාහන තදබදයට ස්ථාවර පිළියම් ලෙස ඉඟුරුකඩේ මංසන්ධියේ සිට අභිනව වරාය නගරයට පිවිසීමට කුළුණු මතින් අධිවේගී මාර්ගයක් ඉදිකිරීමට මහාමාර්ග අමාත්‍යාංශය සහ මාර්ග සංවර්ධන අධිකාරිය සැලසුම් සකස් කරන ලදි. මෙම මාර්ගයේ ඇති සුවිශේෂත්වය නම් පරිසර හිතකාමීව කුළුණු මතින් ඉදිකිරීම් සිදු කිරීමයි.

කුළුණු මතින් දිවෙන වරාය පිවිසුම් අධිවේගී මාර්ගයේ දුර කි.මි 5.3 ක් වේ. මංතීරු 4 ක් යටතේ මෙහි ඉදිකිරීම් කටයුතු සිදුකරනු ලබයි. ඉඟුරුකඩේ මංසන්ධියෙන් ආරම්භ වී ගාලුමුවදොර වරාය නගරයෙන් අවසන් වන මෙම මාර්ගයේ ඉදිකිරීම් සඳහා රු.මිලියන 28,002 ක මුදලක් වැය කෙරේ.

ජනාධිපති ගෝඨාභය රාජපක්ෂ සිය ධුරයෙන් ඉල්ලා අස්වීමට සලකා බලමින් සිටින්නේ යයි පලවන සමාජ මාධ්‍ය වාර්තා ජනාධිපති මාධ්‍ය ප‍්‍රකාශක කිංස්ලි රත්නායක විසින් ප්‍රතික්ෂේප කරයි.

ජනාධිපතිවරයා බරපතළ අර්බුදයකදී පලා යන පුද්ගලයකු නොවන බවත් අද රට මුහුණ පා ඇති ගැටලුවලට විසඳුම් සෙවීමට ජනාධිපතිවරයාගේ අවධානය යොමුව ඇති බවත් ජනාධිපති මාධ්‍ය ප්‍රකාශක පවසා ඇත.

ඇතැම් පිරිස් රට තවදුරටත් අස්ථාවර කිරීම සඳහා මෙවන් කටකතා පතුරවන බවද ඔහු පවසා සිටියි.

මුදල් මුද්‍රණය කිරීම වහාම සීමා කළ යුතු බව අමාත්‍ය බන්දුල ගුණවර්ධන පවසා ඇත.

ඒ ආණ්ඩුව හිතවාදී පෞද්ගලික මාධ්‍ය ජාලයක් වන දෙරණ මාධ්‍ය ජාලයේ ද මෝනිං පුවත්පත සමග සිදුකළ සම්මුඛ සාකච්ඡාවකදී ය.

රට මුහුණ දී තිබෙන ආර්ථික අර්බුදය සහ ආර්ථික විද්‍යාව පිළිබද අවබෝධය මේ තරමට දුර්වල වූ වෙනත් කිසිදු පාර්ලිමේන්තුවක් තමන් දැක නැති බවත් අමාත්‍යවරයා එහිදී සඳහන් කර ඇත.

මුදල් අච්චු ගසා දුප්පතුන්ට සහ අඩු වරප‍්‍රසාද ලත් පිරිස් අතර බෙදා දීමට බැරි ඇයි කියා අසන පිරිස් ද සිටින බවටත් අමාත්‍යවරයා එහිදී චෝදනා කර ඇත.

එසේ කළහොත් එය සමස්ත ආර්ථිකයටම අහිතකර ලෙස බලපාන බව ඔවුන්ට නොතේරෙන බවද අමාත්‍යවරයා පවසයි.

එහිදී අමාත්‍යවරයා වැඩිදුරටත් සඳහන් කර ඇත්තේ මේ තත්ත්වය තේරුම් ගෙන මුදල් මුද්‍රණය සීමා කිරීම සදහා පාර්ලිමේන්තුව මැදිහත් විය යුතු බවය.

ගිය සතියෙත් රුපියල් බිලියන 55.95ක් අච්චු ගහලා !

මේ අතර මූල්‍ය වෙළෙඳ පොළ ආරංචි මාර්ග සඳහන් කර සිටින්නේ මහ බැංකුව පසුගිය සතියේ තවත් රුපියල් බිලියන 55.95ක් මුද්‍රණය කොට ඇති බවයි.

ඒ සමගම මේ මාසයේ මේ දක්වා මුද්‍රණය කර ඇති මුළු මුදල රු. බිලියන 172.34ක් දක්වා ඉහළ ගොස් ඇති බවත් සඳහන් වෙයි.

මේ සම්බන්ධයෙන් අදහස් දක්වමින් මූල්‍ය වෙළෙඳ පොළ විශ්ලේෂකයන් පවසන්නේ ආණ්ඩුවේ මේ අසීමිත මුදල් අච්චු ගැහීම හේතුවෙන් දැඩි උද්ධමනකාරී ප්‍රතිවිපාකයන්ට මුහුණ දීමට ජනතාවට සිදුවනු ඇති බවය.

සල්ලි අච්චු ගැහීම උද්ධමනයට හේතුවක් නොවේ කී කබ්‍රාල් නිහඬයි !

කෙසේ වුවත් අසීමිත ලෙස මුදල් අච්චු ගැසීමේ ප්‍රතිපත්තිය ආරම්භයේ සිටම ආර්ථික සහ මූල්‍ය වෙළෙඳ පොළ විශේෂඥයන් වෙතින් විවේචනය වූ අතර එහිදී ඔවුන් අවධාරණය කර සිටියේ මේ හේතුවෙන් අධික උද්ධමනයක් රට තුළ ඇතිවන බවයි.

එහෙත් ඒ අවස්ථාවේ මහ බැංකු අධිපති අජිත් නිවාඩ් කබ්‍රාල් ප්‍රසිද්ධියේ කියා සිටියේ මුදල් අච්චු ගැසීම උද්ධමනයට බලපෑමක් නොවන බවයි.

නමුත් මේ වන විට රට තුළ සියලු පරිභෝජන භාණ්ඩ මිල අධික ලෙස මිල ඉහළ යමින් ඇති අතර මිල පාලනය ආණ්ඩුව විසින් ප්‍රතිපත්තියක් ලෙස අත්හැර තිබේ.

කිරි තේ එකක මිල රුපියල් 100ක් වන බව ආපනශාලා හිමිකරුවන්ගේ සංගමය පවසයි.

එහි කැඳවුම් කරු අසේල සම්පත් මාධ්‍ය වෙත සඳහන් කලේ කිරිපිටි මිල ඉහල දැමීමට ගෙන ඇති තීරණය අනුව මෙම පියවර ගන්නා බවයි.

ග්‍රෑම් 400 ආනයනික කිරිපිටි පැකට්ටුවක් මේ වනවිට රුපියල් 790 ක් වන අතර ගෑස් මිලද මේ වනවිට ඉහළ නංවා තිබේ.

ඒ පසුබිමේ ඇතැම් විට ආපනශාලා වල කිරි තේ ලබාදීමට නොහැකි විය හැකි බවත් ඔහු අවධාරණය කර ඇත.

ලංකා විදුලි බල මණ්ඩලය විසින් සිය පාරිභෝගිකයන් වෙත ලිඛිත බිල්පතක් නිකුත් කිරීමට කටයුතු කරමින් ඇත බව දැනගන්නට ඇත.

විදුලි බල මණ්ඩල ආරංචි මාර්ග පවසන්නේ විදුලි බිල්පත් මුද්‍රණය සදහා කඩදාසි හිඟය බාධාවක්ව ඇති බවය.

එහි මාධ්‍ය ප්‍රකාශක ඇන්ඩෲ නවමුනි පවසන්නේ ලිඛිත බිල්පත් පාරිභෝගිකයන්ට නිකුත් කරන ලෙස මනු කියවන්නන්ට දැනුම් දී ඇති බවයි.

පාරිභෝගිකයනට බිල්පත් ගැන ගැටළුකාරි තත්ත්වයක් ඇත්නම් විදුලිබල මණ්ඩලයේ වෙබ් අඩවියෙන් පරික්ෂා කරගත හැකි යයිද ඔහු කීය.

ලාෆ් ගෑස් සමාගම විසින් ගෑස් මිල ඉහල දමා තිබෙන බව වාර්තා වෙයි.

ඊට අනුව ලාෆ් සමාගමේ කිලෝග්‍රෑම් 12.5ක ගෑස් සිලින්ඩරයක නව මිල රු 4199කි.

මෙම මිල ඉහල දැමීම පෙර මිලට අනුව රුපියල් 1500ක පමණ මිල වැඩිකිරීමකි.

කිලෝග්‍රෑම් 5ක සිලින්ඩරයක් රුපියල් 1680ක් වන අතර කිලෝග්‍රෑම් 2.5ක ගෑස් සිලින්ඩරයක් රුපියල් 672කි.

වෙළෙඳ පොළේ බඩු නැතුවම මිල ඉහළට !

කෙසේ වුවත් මේ වන විට ලාෆ් සමාගමේ 12.5 kg, 5kg, 2.5 kg ගෑස් හිඟයක් පවතී.

එයින් ලාෆ් ගෑස් ගෘහස්ථ පරිභෝජනයට භාවිතා කළ ජනතාව අතිමහත් පීඩාවකට පත්ව ඇත. ඒ පසුබිමේ සිදුකර ඇති මිල ඉහළ දැමීම සම්බන්ධයෙන් පාරිභෝගික ජනතාව සිය බලවත් කනස්සල්ලකින් පසුවෙයි. පාරිභෝගික කටයුතු වෙනුවෙන් වෙනම අමාත්‍යංශයක් පැවතියත් එයත් ක්‍රියාත්මක වන්නේ පාරිභෝගිකයන් වෙනුවෙන් ද නැත්නම් සමාගම් වෙනුවෙන් ද කියා ජනතාව ප්‍රශ්න කරයි.

මේ අතර ලිට්‍රෝ ගෑස් සමාගමද කිලෝග්‍රෑම් 12.5ක ගෑස් සිලින්ඩරයක මිල රුපියල් 2000කින් ඉහල දැමීමට අවසර ඉල්ලා ඇති බවත් වාර්තා වෙයි.

ශ්‍රී ලංකා ක්‍රිකට් ආයතනයේ සිදුවී ඇතැයි කියන රුපියල් කෝටි ගණනක දූෂණ වංචා සහ අක්‍රමිකතා හේතුවෙන් එම ආයතනය පොදු ව්‍යාපාර පිළිබඳ පාර්ලිමේන්තු කාරක සභාවේ (කෝප්) දැඩි දෝෂාරෝපණයට ලක්ව ඇති බව වාර්තා වෙයි.

වාර්තා වන ආකාරයට ශ්‍රී ලංකා ක්‍රිකට් රට නියෝජනය කරන ආයතනයක් විනා නිලධාරීන් ගේ පෞද්ගලික දේපළක් නොවන බව සිතා කටයුතු කරන්නැයි කෝප් කාරක සභාව එහි ප්‍රධානීන්ට දැනුම්දී ඇත.

මේ තොරතුරු සඳහන් වන්නේ පොදු ව්‍යාපාර පිළිබඳ පාර්ලිමේන්තු කාරක සභාව පාර්ලිමේන්තුවට පසුගියදා ඉදිරිපත් කළ වාර්තාවේය.

කෝප් කාරක සභාවේ සභාපති මහාචාර්ය චරිත හේරත් වාර්තාව පාර්ලිමේන්තුවට ඉදිරිපත් කර ඇත.

ආයතනයේ ක්‍රියාකාරකම්වලට අදාල තොරතුරු ලබාදෙන්නැයි විගණන කාර්යාලය ඉල්ලීම් කර ඇතත් ඒවාට පිළිතුරු නිසි අයුරින් සපයා නැතැයි කියන සිද්ධියක් සම්බන්ධයෙන්ද කෝප් කමිටුව එම ආයතනයට බලවත් අප්‍රසාදය පළ කර තිබේ.

විවිධ දූෂණ වංචා සහ අක්‍රමිකතා පිළිබඳව කාරක සභාව කළ විමසුම්වලදී නිලධාරීන් පරස්පර විරෝධී තොරතුරු සහ අදහස් ඉදිරිපත් කිරීම සම්බන්ධයෙන්ද කෝප් කමිටුව එහි ප්‍රධානීන්ට අප්‍රසාදය පළකර තිබේ.

මේ අතර රුපියල් දෙකෝටි හැට ලක්ෂයකට වැඩි වටිනා ව්‍යාපෘති හතරක් අතහැර දමා ඇතැයි කියන සිද්ධියක් පිළිබඳවද කෝප් කමිටුව ශ්‍රී ලංකා ක්‍රිකට් බලධාරීන්ගෙන් ප්‍රශ්න කර ඇත.එම වියදම් 2020 වර්ෂයේ මූල්‍ය ප්‍රකාශනවල කෙරීගෙන යන වැඩ ලෙස දක්වා ඇතැයිද කෝප් කමිටු සඳහන් කර ඇත.

දකුණු අප්‍රිකා ශ්‍රී ලංකා තරඟයේ රූපවාහිනි විකාශයට අදාළව (2018) රුපියල් තුන් කෝටියකට ආසන්න මුදලක් ශ්‍රී ලංකා ක්‍රිකට් ආයතනයේ බැංකු ගිණුමට නොව වෙනත් බැංකු ගිණුමකට හරවා යැවීම සම්බන්ධයෙන්ද කෝප් කාරක සභාව කරුණු විමසා ඇත.

මේ අතර ශ්‍රී ලංකා ක්‍රිකට් ආයතනයේ වාර්ෂික වාර්තා කාලයක් තිස්සේ පාර්ලිමේන්තුවට ඉදිරිපත් කර නොමැති බවද කාරක සභාව නිරීක්ෂණය කර ඇත.

ජනාධිපති ගෝඨාභය රාජපක්ෂගේ ප්‍රධානත්වයෙන් ලබන බදාදා(23) පැවැත්වීමට නියමිත සර්වපාක්ෂික සමුළුව වර්ජනය කිරීමට ඇමති වාසුදේව නානයක්කාර, හිටපු ඇමතිවරුන් වන විමල් වීරවංශ සහ උදය ගම්මන්පිල තීරණය කර ඇතැයි වාර්තා වේ.

ඒ වෙනුවට ,ආණ්ඩුවේ හවුල්කාර පක්ෂ දහයෙන් නියෝජිතයන් දෙදෙනකු පමණක් සර්ව පක්ෂයේ සමුළුවට යැවීමට තීරණය කර ඇති අතර, පාර්ලිමේන්තු මන්ත්‍රීවරුන් වන, අතුරලියේ රතන හිමියන් සහ මහාචාර්ය තිස්ස විතාරණ ඊට සහභාගි වනු ඇතැයි දැනගන්නට ඇත.

එසේ වුවද ,ශ්‍රී ලංකා නිදහස් පක්ෂය සර්ව පාක්ෂික සමුළුවට සහභාගී වීමට තීරණය කර ඇත.

රටේ ඇතිව තිබෙන තත්වය සම්බන්ධයෙන් සාකච්ඡා කිරීමට සර්වපාක්ෂික සමුළුවක් ජනාධිපති ගෝඨාභය රාජපක්ෂගේ ප්‍රධානත්වයෙන් ලබන බදාදා පැවැත්වෙන අතර ,ඊට සහභාගි වන්නැයි ජනාධිපති කාර්යාලය පාර්ලිමේන්තුව නියෝජනය කරන සියලුම පක්ෂවල නායකයන්ට ලිඛිතව දැනුම් දී ඇත .

ආණ්ඩුව සර්ව සර්වපාක්ෂික සමුළුවක් නමින් සාකච්ඡාවක් කැදවා ඇත්තේ අවංක වුවමනාවකින් නොවන බැවින්, ඊට සහභාගී නොවීමට වාසුදේව නානයක්කාර විමල් වීරවංශ සහ උදය ගම්මන්පිල තීරණය කර ඇතැයි හවුල්කාර පක්ෂයක නායකයෙක් සඳහන් කළේය.

රට තුළ ඇතිව තිබෙන අර්බුදය සම්බන්ධයෙන් ශ්‍රී ලංකා පොදුජන පෙරමුණ පක්ෂය තුළ, ආණ්ඩු පක්ෂ මන්ත්‍රී කණ්ඩායම තුළ හෝ කැබිනට් මණ්ඩලය තුළ සාකච්ඡා නොකර ,සර්ව පාක්ෂික සමුළුවක් කැඳවන්නේ බොරුවට බවද ඔහු සඳහන් කළේය .

රටම ආණ්ඩුවට බනින මේ මොහොතේ සර්ව පාක්ෂික සමුළුවක් කැඳවා ඇත්තේ එම බැනුම බෙදාගැනීමට යැයිද හෙතෙම කීවේය.

- Lankadeepa

ඉදිරි මාස තුන ඇතුළත දී බස් ගාස්තුව යලි 25%කින් වැඩි කිරීම‌ට නියමිතව ඇත.

ඊට අනුව අවම බස් ගාස්තුව රුපියල් 25ත් 30ත් අතර ප්‍රමාණයකින් ඉහළ යනු ඇති අතර එය සිදුවන බව සඳහන් වන්නේ වාර්ෂික ගාස්තු වැඩි කිරීමේ එකඟතාවයට අනුවය.

මේ බව මාර්තු 20 ඉරිදා ලංකාදීප පුවත්පත වාර්තා කර ඇති අතර ලබන සඳුදා වනවිට ටයරයක මිල 15%කින් ඉහළ යන බවද වාර්තා වී ඇතැයි පෞද්ගලික බස්රථ හිමියන්ගේ සංගමයේ සභාපති ගැමුණු විජයරත්න පවසන බවත් වාර්තා කර ඇත.

පසුගිය සතියේ දී බස්ගාස්තුව වැඩි වූයේ ඉන්ධන මිලට සමගාමීව වෙන අතර ඒ මිල ඉහළයාමට අනෙකුත් කරුණු බලපෑවේ නැතැයිද ඔහු එහිදී සඳහන් කර ඇත.

ජාතික ප්‍රතිපත්තියට අනුව වාර්ෂිකව සිදුවන ගාස්තු ඉහළ දැමීමේ ක්‍රියාවලියට අනෙකුත් වියදම්ද එක්වීමෙන් බස් ගාස්තුව යළි වැඩිවෙන බව ඔහු එහිදී පෙන්වා දී තිබේ.

අද රටේ පවතින ආරිථික අර්බුදකාරී තත්වය හා ‌ඩොලර් මිල මේ ආකාරයටම පැවතුනහොත් ලබන ජූනි – ජූලි මාසය වනවිට බස් ගස්තුව තවත් 25%කින් වැඩි වනු ඇතැයිද ඔහු අවධාරණය කර ඇත.

මේ අතර පසුගියදා ප්‍රසිද්ධ ජන හමුවකදී අදහස් දක්වමින් ප්‍රවාහන අමාත්‍ය දිලුම් අමුණුගම පවසා සිටියේ දුම්රිය ගාස්තු ද ඉහළ දැමීමට සිදුව ඇති බවයි.

ලිට්‍රෝ ගෑස් මිල තවත් ඉහළට !

එසේම ලිට්‍රෝ සමාගම ගෑස් සින්ඩරයකින් රුපියල් 2000ක පාඩුවක් ලබන නිසා ගෑස් මිල කළමනාකරණය කර ලිට්‍රෝ ගෑස් සමාගම රැකගැනීමට කටයුතු කරන්නැයි ලිට්‍රෝ ගෑස් සමාගම සුරැකීමේ සංවිධානය බලධාරීන්ගෙන් ඉල්ලා ඇති බවත් වාර්තා වෙයි.

ලිට්‍රෝ ගෑස් සමාගම සුරැකීමේ සංවිධානය සමාගමේ අංශ ප්‍රධානින් ඇතුළු පිරිසකගෙන් සමන්විත බව ප්‍රසිද්ධ කරුණකි.

ඒ බව තහවුරු කරමින් ලිට්‍රෝ ගෑස් සමාගම සුරැකීමේ සංවිධානය වෙනුවෙන් ලිට්‍රෝ සමාගමේ ප්‍රචාරණ කළමනාකරු පියල් කොළඹහෙට්ටිගේ පවසන්නේ පාඩු ලබමින් තව දුරටත් ගෑස් සැපයුව හොත් ලිට්‍රෝ සමාගම තවත් මාස තුනකින් වසා දැමීමට සිදුවන බවය.

රටට ඉතුරුව තිබෙන එකම ගෑස් සමාගම බේරාගැනීමට බලධාරීන් කටයුතු කළ යුතු බවද ඔහු පවසයි.

මේ වනවිට ගෑස් බාමින් තිබෙන නෞකාවෙන් පමණක් ලිට්‍රෝ සමාගම රුපියල් මිලියන 200ක පාඩුවක් ලැබීම හේතුවෙන් ඉදිරියේදී ආනයනය කරන නෞකාවලින් වන පාඩුව රුපියල් මිලියන 200ක් ඉක්මවීම අනිවාර්ය බව කියන ලිට්‍රෝ ප්‍රචාරණ කළමනාකරු පියල් කොළඹහෙට්ටිගේ, කිලෝ 12.5ක ගෑස් සිලින්ඩරයක වර්තමාන පිරිවැය රුපියල් 4,462.25ක් වුවද එය රුපියල් 2,675කට අළෙවි කරන බවද සඳහන් කරයි.

ලිට්‍රෝ සමාගම 2021 වසරේ සිට ජනතාවට සහන සැළසීම සඳහා පාඩු ලබමින් ගෑස් ලබාදීම හේතුවෙන් 2021 වසරේ පමණක් රුපියල් කෝටි 1,100ක් අහිමිකරගත් අතරම මෙම වසරේ මේ දක්වා කාලය තුළ රුපියල් කෝටි 100ක් අහිමිකරගෙන ඇති බවත් වර්තමානය වනවිට ආයතනයේ මූල්‍ය තත්වය ඉතාමත් දුර්වල වී ඇති බවත් ඒ ඔහු අවධාරණය කරයි.

පවතින උග්‍ර මූල්‍ය - ආර්ථික අර්බුදය සමනය කරගන්න ජාත්‍යන්තර මූල්‍ය අරමුදලේ සහය පැතීම සම්බන්ධයෙන් මුදල් ඇමති බැසිල් රාජපක්ෂ සහ මහ බැංකු අධිපති අජිත් නිවාඩ් කබ්‍රාල් අතර පැවති සීතල යුද්ධය අවසන්ව ඇති බවත් අවසානයේ මහ බැංකු අධිපති මුදල් ඇමති හමුවේ දනගසා ඇති බවත් මූල්‍ය වෙළෙඳ පොළ විශ්ලේෂකයන් පවසයි.

ඔවුන් මේ නිරීක්ෂණය ඉදිරිපත් කරන්නේ ,පවතින තත්වය යටතේ මුදල් අර්බුදය විසඳා ගැනීම සඳහා ජාත්‍යන්තර මූල්‍ය අරමුදලට (අයි.එම්.එෆ්) යෑම සුදුසු බව ශ්‍රී ලංකා මහ බැංකුව රජයට නිර්දේශ කර ඇති බවට පළවෙන වාර්තා පදනම් කරගෙන ය.

මේ වන විට IMF සමග ක්‍රියාත්මක වියයුතු ආකාරය සම්බන්ධයෙන් විශේෂ යෝජනාවලියක්ද ශ්‍රී ලංකා මහ බැංකුව විසින් රජයට දැනටමත් ඉදිරිපත් කරන ලැබ ඇති බවත් ඔවුන් පවසයි.

මේ සම්බන්ධයෙන් ශ්‍රී ලංකා මහ බැංකුවේ අධිපති අජිත් නිවාඩ් කබ්රාල් වෙතින් මාධ්‍ය කළ විමසුමකදී ඔහු පවසා ඇත්තේ , පවතින තත්වය යටතේ අකමැත්තෙන් හෝ එම තීරණයට යෑමට සිදුවන බවයි.

පවතින ගැටළුව විසඳාගැනීම සඳහා තුන්වැනි පාර්ශ්වයක සහයෝගය ලබා ගැනීමට සිදුවන බවද ඔහු සඳහන් කළ බවත් වාර්තා කර ඇත.

කෙසේ වෙතත් රටට අත්වන වාසි සහ අවාසි තත්වයන් ඉතා සමීපව නිරීක්ෂණය කරමින් එම සාකච්ඡා ක්‍රියාවලිය ආරම්භ කළ යුතු බව පැවසූ මහ බැංකු අධිපතිවරයා ජනාධිපතිවරයා ඒ පිළිබඳවූ පැහැදිලි ස්ථාවරය ජාතිය අමතා කළ කතාවෙන් පැහැදිලි කළ බවද ප්‍රකාශ කළ බවත් වාර්තා වෙයි.

එළැඹෙන ජුනි මාසයේ පළාත් පාලන මැතිවරණය පැවැත්වීමට ආණ්ඩුවේ ප්‍රධානීන් තීන්දුවක් ගෙන ඇති බව දේශපාලන ආරංචි මාර්ග පවසයි.

ජුනි මාසයේ හෝ ඒ ආසන්නයේ පැවැත්වෙන පලාත් පාලන ආයතන මැතිවරණය වෙනුවෙන් පාක්ෂිකයින් ධෛර්යයමත් කිරීමට මැයි දින රැලිය උපරිම ජන සහභාගිත්වයක් ඇතිව පැවැත්වීමට ආණ්ඩුව තීරණය කර ඇති බවත් වාර්තා වෙයි.

මාධ්‍ය වාර්තා සඳහන් කරන ආකාරයට ඒ වෙනුවෙන් මේ වන විට මැයි 1 වනදා යෝධ ජන රැළියක් ගෝල්ෆේස් පිටියේ පැවැත්වීමටත් කටයුතු සූදානම් වෙමින් පවතී.

ඒ වෙනුවෙන් දැනටමත් ගෝල්ෆේස් පිටිය පොදුජන පෙරමුණ ආණ්ඩුව විසින් වෙන්කරගෙන ඇති බවත් වාර්තා සඳහන් කරයි.

එසේම මේ වන විට පළාත් පාලන ආයතන ඉලක්ක කර ප්‍රාදේශීය සංවර්ධන , මංමාවත් සහ හෝම් ෂොප් වැනි කටයුතු කඩිනම් කිරීමට උපදෙස් නිකුත්කර ඇති බවත් වාර්තා වෙයි.

මෙවර මේ කටයුතුවල සියලු මෙහෙයුම් කටයුතු මුදල් අමාත්‍ය බැසිල් රාජපක්ෂ ගේ ප්‍රධානත්වයෙන් සිදුකිරීමට නියමිත බවත් දේශපාලන ආරංචි මාර්ග පවසයි.

ඒ 2024 පොදුජන පෙරමුණේ ජනාධිපති අපේක්ෂකත්වය බැසිල් රාජපක්ෂ වෙත ගැනීමට නියමිත නිසා බවත් දැනගන්නට ඇත.

පවතින ඉන්ධන සහ ගෑස් අර්බුදය විසඳීමේ වැඩපිළිවෙළක් ආණ්ඩුව වහාම ඉදිරිපත් කළ යුතු බව ආණ්ඩුවේ පසුපෙල මන්ත්‍රී කණ්ඩායම ඉල්ලීමක් කර ඇති බව ආණ්ඩු හිතවාදී සමාජ මාධ්‍ය වාර්තා කරයි.

ජනතාව මුහුණ දී ඇති අර්බුදය හමුවේ පාරට බහින්න නොහැකි තත්වයක් තමනට ද උදා වී ඇතැයි ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ප්‍රමිත බණ්ඩාර තෙන්නකෝන් සඳහන් කළ බවත් අදාළ පුවත පවසයි.

එහි වැඩිදුරටත් මෙසේද සඳහන් වෙයි.

අර්බුදය විසඳන්න වැඩපිළිවෙළක් ආණ්ඩුව රටට ඉදිරිපත් කළ යුතු බවත් හොඳ දේට හොඳයි කීම සහ වැරදි දේය වැරදියි කීම කණ්ඩායමේ ප්‍රතිපත්තිය බවත් කී ඔහු එසේ නැතිව පසු පෙල සිටින්නේ ආණ්ඩුවට ප්‍රසස්ති කීමට නො වන බව ද පැවසීය.

ඉන්ධන හා ගෑස් අර්බුදය හමුවේ ජන ජීවිතය බරපතළ ලෙස කඩා වැටී ඇති බවත් එනිසා ජනතාවගෙන් එල්ලවන අපවාදයෙන් බේරීමට ආණ්ඩුවට හැකියාවක් නැතැයිද ඔහු කියා සිටියේය.

ලලිත් එල්ලාවල !

මේ අතර ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ලලිත් එල්ලාවල සඳහන් කරන්නේ රට අනිවාර්යෙන්ම හදනවා යැයි ජනාධිපතිවරයා ජාතිය අමතා පැවසුවත් ජනතාව තවදුරටත් එතුමා කෙරෙහි විශ්වාසය තබයි ද යන්න ගැටළුවක් බවයි.

ජනතාව පෝලිම්වල දැඩි පීඩාවකින් සිටින බවත් ජනතාවට තවදුරටත් මෙය දරා ගැනීමට අමාරු බවත් හෙතෙම සඳහන් කළේය.

පසු පෙල මන්ත්‍රීවරුන් ලෙස නායකයන්ට ප්‍රශස්ති නොකියන බවත් ජනතාව විසින් තමන් පාර්ලිමේන්තු යැවුවේ ප්‍රශස්ති ගී ගයන්නට ම නොවන බවත් ඔහු පැවසීය.

බැසිල්ගේ ගෝලයන් !

මේ සම්බන්ධයෙන් අදහස් දක්වන දේශපාලන විචාරකයන් පවසන්නේ , පසුපෙළ මන්ත්‍රීවරුන් ගේ මුවින් පිටවුණත් මේ ප්‍රකාශය පසුපස ආණ්ඩුවේ අභ්‍යන්තර දේශපාලන ගැටුමක් නිරීක්ෂණය වන බවයි.

මේ වන විට ආණ්ඩුව ජාත්‍යන්තර මූල්‍ය අරමුදලේ සහය ලබාගන්නට කටයුතු කරමින් සිටින බවත් එහි සහය ලැබුණත් එය මාස කිහිපයක් ගතවෙන ක්‍රියාවලියක් බවත් ඔවුන් පෙන්වා දෙයි.

ඒ පසුබිමේ මෙවැනි ප්‍රකාශ හරහා සෘජුව ජනාධිපති අපහසුතාවට පත්වෙන බවත් විචාරකයන් පවසයි.

ඊට හේතුව ලෙස ඔවුන් දක්වන්නේ , ජනාධිපති ගෝඨාභය රාජපක්ෂ ජාතිය අමතා සතියක් ඉක්මයන්න පෙර මේ ප්‍රකාශ සිදුවීමත්, ජනාධිපති පත්කළ ජාතික ආර්ථික කමිටුව හා ඊට උපදෙස් දෙන්න පත්කළ උපදේශක සභාව ක්‍රියාත්මක වීමට පෙර මේ ආකාරයට ප්‍රකාශ නිකුත්වීමය.

අනෙක් අතට ජනාධිපති පූර්ණ බලතල සහිත විධායකය නියෝජනය කළත්, ඔහුට ආණ්ඩුවේ දේශපාලන නායකත්වය නොමැති පසුබිමේ සමස්ථ ආණ්ඩුව විසින් උත්තර සෙවිය යුතු ප්‍රශ්නයක් මේ ආකාරයට සුළඟේ පාකර ප්‍රසිද්ධ කිරීම පැහැදිලි ගැටලුවක් බවත් දේශපාලන විචාරකයන් අවධාරණය කරයි.

වැඩිදුරටත් අදහස් දක්වමින් දේශපාලන විචාරකයන් පවසන්නේ ආණ්ඩුවේ පසුපෙළ සඳහා දේශපාලන නායකත්වය ලබාදෙන්නේ මුදල් ඇමති බැසිල් රාජපක්ෂ බවයි. ඒ හමුවේ සෘජුව ඔහු වෙත මේ දුක්ගැනවිල්ල ඉදිරිපත් නොකර ප්‍රසිද්ධ කිරීම පැහැදිලි දේශපාලන ගැටුමක් ලෙස හඳුනා ගැනීම දුෂ්කර නොවන බවත් දේශපාලන විචාරකයන් පවසයි.

ආනයනික කිරිපිටි මිල යළිත් ඉහළ දැමීමට සිදුව ඇතැයි කිරිපිටි ආනයන කරුවෝ පවසති.

ඒ අනුව ආනයනික කිරිපිටි කිලෝවක් රුපියල් 1,345 සිට රුපියල් 1,945 දක්වාද ග්‍රෑම් 400ක පැකට්ටුවක මිල රුපියල් 540 සිට රුපියල් 800 දක්වා වැඩි කිරිමට සිදුව ඇතැයි ඔවූහු පෙන්වා දෙති.

පාරිභෝගික සේවා රාජ්‍ය අමාත්‍ය ලසන්ත අලගියවන්න වෙත පසුගිය 07 වැනිදා කළ දැනුම් දිමට අනුව කිරිපිටි කිලෝවක් රුපියල් 600කින් හා ග්‍රෑම් 400ක පැකට්ටුවක මිල රුපියල් 260 ඉහළ යනු ඇතැයිද ඔවුහු කියති.

ලෝක වෙළෙඳ පොළේ කිරිපිටි කිලෝවක මිල ඩොලර් 2.80සිට ඩොලර් 5.30 දක්වා ඉහළ යාම සහ ඇමෙරිකා ඩොලරයක වටිනාකම රුපියල් 202 සිට රුපියල් 280 දක්වා වැඩිවීම හේතුවෙන් ආයනයන කිරිපිරි මිල වැඩිකිරීමට සිදුව ඇතැයිද එම සමාගම් සඳහන් කරයි.

බොරතෙල් නොමැතිවීම හේතුවෙන් සපුගස්කන්ද තෙල් පිරිපහදුව හෙට (20) රාත්‍රියේ සිට යළි වසා දැමීමට තීරණය කර ඇතැයි ලංකා ඛනිජ තෙල් නීතිගත සංස්ථාව පවසයි.

සමාගම් කිහිපයකින් මේ වනවිට බොරතෙල් ඇණවුම් කර ඇති බව ද එම සංස්ථාව ප්‍රකාශ කළේ ය.

එහි ප්‍රකාශකයෙකු සඳහන් කළේ, අදාළ ඇණවුම් ලැබෙන නිශ්චිත දිනයක් මෙතෙක් ප්‍රකාශ වී නොමැති බවය.

කෙසේ වෙතත් ඇණවුම් ලද විගස පිරිපහදුවේ මෙහෙයුම් යළි ආරම්භ කරන බව ද, ලංකා ඛනිජ තෙල් සංස්ථාව සඳහන් කළේ ය.

මේ අතර, ඩීසල් මෙට්‍රික් ටොන් 20,000ක් රැගත් නෞකාවක් ඉන්දියාවේ සිට හෙට(20) මෙරටට ළඟාවීමට නියමිතව ති‌බේ.

කඩදාසි ඇතුළු අත්‍යවශ්‍ය ද්‍රව්‍ය හිඟයක් හේතුවෙන් බස්නාහිර පළාත් පාසල්වල විභාග නිසි පරිදි පැවැත්වීමට නොහැකිව ඇති බව වාර්තා වෙයි.

මේ හේතුවෙන් පළාත් අධ්‍යාපන අධ්‍යක්ෂ ශ්‍රීලාල් නෝනිස් සියලුම කලාප අධ්‍යාපන අධ්‍යක්වරුන් වෙත විශේෂ ලිපියක් යොමු කරමින් දැනුම් දී ඇත්තේ මේ පිළිබඳව දැනුවත් කිරීම් කරන ලෙසය.

මේ නිසා 6, 7, 8, ශ්‍රේණි සඳහා වර්ෂ අවසාන ඇගයීම් සංශෝධනය කිරීමට උපදෙස් ලබා දී තිබේ.

ඒ අනුව බස්නාහිර පළාත් අධ්‍යාපන දෙපාර්තමේන්තුව ප්‍රශ්න පත්‍ර අනුව වාර විභාගය පැවැත්විය හැකි සෑම පාසලක්ම එම කාල සටහන අනුව විභාගය පැවැත්විය හැකියි.

එසේ පැවැත්වීමට අපහසු පාසල් සඳහා ප්‍රශ්න පත්‍ර සහ කාලසටහන් පාසල් මට්ටමින් සකස් කරගෙන විභාගය පැවැත්වීමට හැකි වේ.

4, 9, 10 හා 11 ශ්‍රේණි වර්ෂ අවසාන ඇගයීම් අප්‍රේල් නිවාඩුවෙන් පසු පැවැත්වීමට බස්නාහිර පළාත් අධ්‍යාපන දෙපාර්තමේන්තුව තීරණය කර තිබේ.

(මූලාශ්‍රය news 1st )

1979 අංක 48දරණ ත්‍රස්තවාදය වැලැක්වීමේ පනත ( විශේෂ විදිවිධාන පනත) දශක ගණනාවක් මුලුල්ලේ අහෝසි කරන බවට ව්‍යාජ පොරොන්දු දෙමින් එය හුදෙක් ආණ්ඩු විරෝධීන් දඩයම් කරන ප්‍රජාතන්ත්‍රවාදයට මරු පහරක් එල්ල කළ පනතක් ලෙස අතීතයට වඩා වර්ථමානයේ සාහසික මුහුණුවරක් ගෙන ඇත.

උතුරෙන් දකුණට එන ගමනට මතක මංගලත් එක්වෙයි…!

පාර්ලිමේන්තු මංත්‍රී සුමන්තිරන්, ශානික්‍යන් රාසමානික්කම් විසින් අත්සන් කිරීමේ පෙත්සම රැගෙන ගාල්ලේ සිට මාතර දක්වා පැමිණි අතර, ඔවුන් දිවංගත හිටපු අමාත්‍ය මංගල සමරවීරයන්ගේ නිවසේ සූදානම් කළ තේ පැන් සංග්‍රයට මුලින්ම සහභාගීවූයේ සමරවීරයන්ගේ සහෝදරිය වූ ජයන්ති සමරවීර හා පවුලේ හිතවතුන් කීපදෙනෙක් සමගින්…

විශේෂයෙන්ම මංගල සමරවීරයන්ගේ හදිසි අභාවය නිසාවෙන් ඔහු වෙනුවෙන් විශේෂ අවසන් ගෞරවය පවුලේ හිතවතුන් සමග බෙදාගැනීම ප්‍රධනව, හිටපු අමාත්‍ය මංගල සමාවීරයන් විසින් නිරන්තරයෙන් සිදුකළ PTA පනත අහෝසිකිරීමෙහිලා කල අවංක කැපවීමට විශේෂ ගෞරවයක් ලෙස එතුමාගේ නිවසේදී සවස 3.30 සිට සවස 4.00දක්වා ත්‍රස්තවාදය වැලැක්වීමේ පනතට විරුද්ධව අත්සන් තැබීම ඇරඹුණි..

ආණ්ඩු විරෝධීන් දඩයම් පණත හකුළවන සටනට දකුණෙන් දැවැන්ත සහායක්…!

ඊයේ ( 17 ) දින සවස 4.00 සිට 5.00 දක්වා කාළය තුළ මාතර උයන්වත්ත ක්‍රීඩාංගනය ඉදිරිපිට පැවති ත්‍රස්තවාදය වැලැක්වීමේ පනත අහෝසිකරන ලෙස ඉල්ලා සංවිධානය කළ අත්සන් ලභාගැනීමේ ක්‍රියාවලිය අතිසාර්ථක කරමින් දැවැන්ත ජන සහභාගීත්වයක් දක්නට ලැබුණි….

එහිදී විශේෂයෙන්ම පාර්ලිමේන්තු මංත්‍රී ශානික්‍යන් රාසමානික්කම් හා සුමන්තිරන් විසින් පනත අවභාවිතා කරමින් සිදුකරන සිරගත කිරීම් පිළිබඳ වැඩිදුරටත් කරුණු දැක්වූ අතර එක්සත් සමජවාදී පක්ෂයේ නායක සිරිතුංග ජජයසූරිය සහෝදරයාද එම අවස්තාවට සහභාගී වීම විශේෂත්වයක් වූ අතර ඉතා උද්වේගකරව වත්මන් ආණ්ඩුව PTA පනත භාවිතා කරමින් ආණ්ඩුවට යම් තර්ජනයක්වන පුද්ගලයන් හා ජනමාධ්‍යවේදින් මර්ධනය කිරීම ගැන දැඩි විවේචනයත් විරෝධයත් පළ කලහ…

එමෙන්ම විපක්ෂය නියෝජනය කරමින් පාර්ලිමේන්තු මංත්‍රී එරාන් වවික්‍රමරත්න අදහස් දැක්වූ අතර අනතුරුව විපක්ෂ නායක සජිත් ප්‍රේමදාස, බුද්ධික පතිරණ, චතුර ගලප්පත්ති, රෙහාන් ජයවික්‍රම ඇතුලු පිරිසක් හා සිවිල් ක්‍රියාකාරීන් ලෙස විශ්‍රාමික විදුලි ඉංජිනේරු අජිත් මුණසිංහ,වෛද්‍ය ප්‍රසාද් මොහොට්ටි ඇතුලු විශාල ජන සහභාගීත්වයකින් ඉතා උද්‍යෝගයෙන් අත්සන් එකතුකිරීමේ ව්‍යාපාරය සාර්ථකව අවසන් වූ අතර වත්මන් ආණ්ඩුව බලයට ගෙන ඒමේදී සහාය දැක්වූ දකුණේ ප්‍රභල පිරිස් කීපයක් ඒ හා එක්විය…

.එමෙන්ම වත්මන් අමාත්‍ය ඩලස් අලහප්පෙරුමගේ ලේකම්වරයකු ලෙස කටයුතු කල දැනට ක්‍රියාකාරී දේශපාලනයෙන් ඉවත්ව සිටින උදය හිත්තැටියගේද සහභාගී වීම විශේෂත්වයක්..

ඔබේ නගරයේද නුදුරු දිනක ආරම්භ වීමට නියමිත ත්‍රස්තවාදය වැලැක්වීමේ පණත අහෝසි කිරීම වෙනුවෙන් ඔබේ වටිනා අත්සන ලභාදෙන මෙන් ඉල්ලමු……

සුමුදු මද්දුමආරච්චි.
මිලානෝ,
ඉතාලිය.