පුවත්

විදුලි කප්පාදුව ඉදිරි දිනවලදී පැය 10 ක් දක්වා දීර්ඝ වියහැකි බවට ලංකා විදුලිබල මණ්ඩලයේ ආරංචි මාර්ග උපුටා දක්වමින් මාධ්‍ය වාර්තා කර ඇත.

ජලවිදුලි බලාගාර ආශ්‍රිත ජලාශවල ජල ප්‍රමාණය වර්තමාන විදුලි ජනන ධාරිතාවෙන් හෝ තවත් දින 10 ක් පමණක් පවත්වාගෙන යෑමට කළහැකි වීම සහ කෙරවලපිටි විදුලි බලාගාරය වසා දැමීම හේතුවෙන් මෙම තත්වය උද්ගත වී ඇති බවත් විදුලි ජනනයට අවශ්‍ය දැවිතෙල් අවසන් වීම නිසා ඇනවුමක් ලැබෙන තෙක් බලාසිටීම සිදුවීම හේතුවෙන් තත්වය තවත් බරපතල වී ඇති බවත් එම මාධ්‍ය වාර්තා වල සඳහන් වෙයි.

පැය 10 කට අධික කාලයක් විදුලිය කප්පාදු කිරීමට මහජන උපයෝගිතා කොමිසමෙන් අවසර ඉල්ලා සිටීමට විදුලි බල මණ්ඩලය බලාපොරොත්තු වන බව ද එම මාධ්‍ය වාර්තා වැඩිදුරටත් සඳහන් කර ඇත.

කෙසේ වුවත් මහජන උපයෝගීතා කොමිසමේ සභාපති ජනක රත්නායක පවසා ඇත්තේ මෙතෙක් පැය 10 ක විදුලි කප්පාදුවක් අවශ්‍ය නොවන බවයි.

ආණ්ඩුව ජනතාවට ලබාදෙන දෙන අත්‍යවශ්‍ය භාණ්ඩ හා සේවාවල මිල අසාධාරණ ලෙස ඉහල දැමීම හේතුවෙන් ජනතාවගේ මූලික අයිතිවාසිකම් කඩ වී ඇතැයි සඳහන් කරමින් ශ්‍රී ලංකා නීතිඥ සංගමය අද (25) ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් දෙකක් ගොනු කර තිබේ.

ජනතාවට සහන සලසා දීමට අවශ්‍ය ක්‍රමවේදයක් වහාම සකස් කරන ලෙස අග්‍රාමාත්‍යවරයා ඇතුලු අමාත්‍ය මණ්ඩලයට නියෝගක් නිකුත් කරන ලෙස ද ශ්‍රී ලංකා නීතීඥ සංගමය මෙම පෙත්සමෙන් ඉල්ලා ඇත.

ශ්‍රී ලංකා නීතිඥ සංගමයේ සභාපතිවරයා සහ උපසභාපතිවරයා ඇතුළු නිලධාරී මණ්ඩලය ගොනු කළ මෙම පෙත්සම් දෙකෙන් පෙන්වා දී ඇත්තේ හිඟයකින් තොරව සාධාරණ මිලකට ජනතාවට අත්‍යවශ්‍ය භාණ්ඩ හා සේවා ලබාදීමට අසමත්වීමෙන් ව්‍යවස්ථාවෙන් තහවුරු වී ඇති ජනතාවගේ මූලික අයිතිවාසිකම් කඩවන බවයි.

නීතිපතිවරයා, සියලුම කැබිනට් ඇමතිවරුන්, මහබැංකු අධිපතිවරයා, භාණ්ඩාගාර ලේකම්වරයා, අමාත්‍යාංශ කිහිපයක ලේකම්වරුන්, විදුලිබල මණ්ඩලය, ඛණිජ තෙල් සංස්ථාව සහ රාජ්‍ය ඖෂධ නීතිගත සංස්ථාව ඇතුළු පාරශ්වකරුවන් මෙම පෙත්සම්වල වගඋත්තරකරුවන් කර තිබේ.

නී.තිඥ ජී. ජී. අරුල් ප්‍රගාසම් මහතාගේ උපදෙස් මත ජනාධිපති නීතිඥ ආචාර්ය කේ. කණගීස්වරම් ,ජනාධිපති නීතිඥ උදිත ඉගලහේවා සහ නීතිඥ සුරේෂ් ඥානරාජ් , නිතිඥ පුලස්ති හේවාමාන්න යන නීතිඥ මණ්ඩලය ශ්‍රී ලංකා නීතිඥ සංගමය වෙනුවෙන් පෙනී සිටියේ ය.

ජනාධිපති නියමයෙන් කැබිනට් අමාත්‍ය ධූරයෙන් ඉවත්කර ඇති විමල් වීරවංශ එතැන් සිට මේ දක්වා පාර්ලිමේන්තු පැමිණ නැති බව වාර්තා වෙයි.

කෙසේ වෙතත් ඔහු පාර්ලිමේන්තුවේ කමිටු රැස්වීම්වලට සහභාගිවී ඇත.

විමල් වීරවංශ කැබිනට් අමාත්‍ය ධූරයෙන් ඉවත් කෙරුණේ පසුගිය මාර්තු මස 3 වැනිදා වන අතර අනතුරුව ඔහු සමග අමාත්‍ය ධූරයෙන් ඉවත් කෙරුණු උදය ගම්මන්පිල ඇතුළු දෙදෙනාට පාර්ලිමේන්තු සභා ගර්භයේ පනවා තිබුණේ පසුපෙළ අසුන් ය.

එහිදී ඔවුන් එම අසුන් පැණවීම ප්‍රතික්ෂේප කරනු ලැබූ අතර ඒ තමන් පක්ෂ නායකයන් බැවින් ඊට සුදුසු ආකාරයට අසුන් ගැනීමට අවශ්‍ය බව සඳහන් කරමිනි.

මාධ්‍යවේදී චමුදිත සමරවික්‍රම ගේ නිවසට පසුගිය පෙබරවාරි මස 14 වනදා ප්‍රහාරයක් එල්ල වූ අතර එම ප්‍රහාරයත් සමගම චමුදිතගේ ජීවිතයට එල්ල වූ  තර්ජනය සම්බන්ධයෙන් ඔහුට රාජ්‍ය ආරක්ෂාව ලබා දෙන මෙන් ඉල්ලා කැස්බෑව මහේස්ත්‍රාත් අධිකරණයට ඉදිරිපත් කල මෝසමට  අදාළව නඩුව අද  ( 25)  එම  අධිකරණයේදී කැඳවන ලදී.

අගතියට පත් වූ චමුදීත සමරවික්‍රම ගේ අයිතිවාසිකම් වෙනුවෙන් ජනාධිපති නීතිඥ කුවේර ද සොයිසා ප්‍රමුඛ නීතීඥ කණඩායමක් පෙනී සිටි අතර ඔවුන් අධිකරණය අමතමින්  “මේ ප්‍රහාරය හා සම්බන්ධ කාරණාව පිලිබඳව කැරුණු දක්වමින්, මේ සිද්ධිය සිදු වී මේ වන විට මාස දෙකකට ආසන්න වුවත් තවමත් කිසිදු සැකකරුවෙකු අත් අඩංගුවට ගෙන නොමැති බවත් පොලිසියේ විමර්ශන කටයුතු පිලිබඳව කිසිදු අකාරයකින් සැහීමකට පත් විය නොහැකි බවද”,  ප්‍රකාශ කරන ලදී.

කැස්බෑව මහේස්ත්‍රාත්තුමා පොලිසිය අමතමින්, “ මෙපමණ කාලයක් ගත වීත් සැකකරුවන් අත් අඩංගුවට නොගත්තේ ඇයි” දැයි පොලිසියෙන් ප්‍රශ්න කරන ලද අතර පිළිතුරු ලබා දෙමින් පොලිසිය කියා සිටියේ,  ලබා ගන්නා ලද CCTV දර්ශන මොරටුව විශ්වවිද්‍යාලය වෙත යොමුකර තිබෙන බවත් එහි ප්‍රතිපල ලැබුණු වහාම එහි ඇති අංක තහඩු වලට අනුව ඉදිරි කටයුතු සිදු  කරන බවයි.

ඒ අනුව සැකකරුවන් වහාම අත් අඩංගුවට ගෙන අධිකරනයාට ඉදිරිපත් කරන ලෙස  කැස්බෑව මහේස්ත්‍රාත් විසින් පොලිසියට නියෝග කල අතර නඩුව නැවත අප්‍රේල් මස 27 වැනි දිනයට කල් තබන ලදී.  ඒ අවස්ථාවේ වින්දිත සමරවික්‍රම මහතාගේ අයිතිවාසිකම් වෙනුවෙන් පෙනී සිටි ජනාධිපති නීතිඥ කුවේර ද සොයිසා මහතා අධිකරණය අමතා ප්‍රකාශ කලේ එදිනට සැකකරුවන් අත් අඩංගුවට ගෙන නොතිබුණහොත් මෙහි පරීක්ෂණ කටයුතු සිදු කිරීම සදහා රහස් පොලිසියට භාර දීමට නියෝගයක් නිකුත් කරන ලෙස ඉල්ලීමක් ද  කරන ලදී.

ඒ අනුව මෙම නඩුව නැවත 2022 අප්‍රේල් මස 27 වැනි දින විවෘත අධිකරණයේදී කැඳවීමට නියම කරන ලදී.

(මූලාශ්‍රය මව්රට )

රජයේ බැංකුවක් “ඩිෆෝල්ට්” තත්වයට (විදේශීය අතමාරු ණයක් ගෙවීම ප්‍රමාදවීමක්) පත් කර ඇතැයි ඇතැයි ඊයේ (24) සජබ පාර්ලිමේන්තු මන්ත්‍රී හර්ෂ ද සිල්වා සිදුකළ ප්‍රකාශය කිසිසේත් අනුමත කළ නොහැකි බව ආර්ථික විශේෂඥයන් පවසයි.

වෙළෙඳ පොළ මෙන්ම බැංකු ඇතුළු මූල්‍ය ක්ශේත්‍රය සම්බන්ධයෙන් දැනුමක් ඇත්තෙකු වශයෙන් මන්ත්‍රීවරයා සිදුකළ ප්‍රකාශය නොකළ යුතුව තිබුණක් බවත් එසේම සත්‍ය වශයෙන් එවැන්නක් සිදුවීමේ අවධානමක් පැවතියත් එය හදිසියේ අනාවරණය කිරීමේ හානිදායක බව මන්ත්‍රීවරයා නොදැන සිටිය නොහැකි බවත් ආර්ථික විශේෂඥයන් අවධාරණය කරයි.

ඊයේ (24) පාර්ලිමේන්තුවේ විවාදයට සහභාගි වෙමින් පාර්ලිමේන්තු මන්ත්‍රි හර්ෂ ද සිල්වා මේ බව අනාවරණය කර සිටි අතර මෙය සත්‍ය සිදුවීමක් නම් එය ඉතා කනගාටුදායක බවත් මහා ව්‍යසනයක ආරම්භයක් බවත් අවධාරණය කළේය.

මේ සම්බන්ධයෙන් වැඩිදුරටත් අදහස් දක්වමින් ආර්ථික විශේෂඥයකු newstube.lk වෙත මෙසේද පැවසීය.

රාජ්‍ය බැංකු වෙනුවෙන් රජය වෙනුවෙන් මහ බැංකුව වගකීමට බැඳී සිටිනවා. ඒ නිසා කොරහේ කිඹුලන් පෙන්වීමට කිසිම අවශ්‍යතාවයක් නෑ. පාර්ලිමේන්තු පනත් හරහා තමයි මේ බැංකු ස්ථාපිත කරලා තියෙන්නේ. මේ වගේ ප්‍රකාශ නිසා , අර තල් අත්තට බෙලි ගෙඩියක් වැටිලා ලෝකය කඩා වැටෙනවා කියලා කැලේ කලබල කරපු හාවෙක් වගේ හැසිරීම කොහොමටත් අනුමත කරන්න නරකයි. මොකක්ද එයින් මන්ත්‍රීවරයා බලාපොරොත්තු වෙන්නේ.

කිසිම ප්‍රශ්නයක් නෑ. මේ ආණ්ඩුවේ ආර්ථික කටයුතු හැසිරවීම අන්තිමයි, අසාර්ථකයි, නින්දාසහගතයි. ඒ ගැන විවේචනය කරන්න ඕන. මේ අනුවණ හැසිරීම් වලට වැටෙන්න ගහන්න ඕන. හැබැයි ඒකයි මේකයි දෙකක්. බැංකුවක් ඩිෆෝල්ට් වෙනවා කියන්නේ , ගැලරි කතාවකින් වාසි ගන්න දෙයක් නෙවෙයි.

තැම්පත්කරුවන් පෝලිම් හැදුනා නම් මොකද කරන්නේ ? හොඳ වෙලාවට වැඩේ දුරදිග ගියේ නෑ. ඇත්තටම ආර්ථික විද්‍යාව සම්බන්ධයෙන් ප්‍රවීණයකු දේශපාලනඥයකු ලෙස සිදුකළ ඒ ක්‍රියාව කොහොමටත් අනුමත කරන්න බෑ. "

ජවිපෙ සහ ජාතික ජනබලවේගය පක්ෂයේ නායක අනුර කුමාර දිසානායක මේ රටේ නායකයා වීම ස්ථිර යැයි ජනතා විමුක්ති පෙරමුණේ හිටපු පාර්ලිමේන්තු මන්ත්‍රී සුනිල් හඳුන්නෙත්ති සඳහන් කරයි.

නිශ්ශංක සේනාධිපතිලාගේ හොර සේනාවලට එය නැවැත්විය නොහැකි බවද හෙතෙම සඳහන් කළේය.

විමල් වීරවංශ වැනි දේශපාලනික වශයෙන් පජාති වුණු අය තම ව්‍යාපාරයට ගාව ගන්නේ නැතැයි ද ඔහු පවසයි.

හිටපු මන්ත්‍රීවරයා මේ බව සඳහන් කරන්නේ මාධ්‍යවේදී චමුදිත සමරවික්‍රම සමග youtube නාලිකාවක සාකච්ඡාවකට එක්වෙමිනි.

මුදල් අමාත්‍ය බැසිල් රාජපක්ෂ ඉන්දියාව සමඟ හොර ගිවිසුමක් අත්සන් කර ශ්‍රී ලංකාවේ මුහුද සහ අහස විකුණා අවසන් බව ද හෙතෙම එහිදී පැවසීය.

මුදල් අමාත්‍යවරයාට විශාල උගත්කමක් නැතත් ගේම් ගහන්න පුදුම මොළයක් ඇතැයි ද හෙතෙම පැවසීය.

 උතුරු මාර්ගයේ කොළඹ කොටුවේ සිට කුරුණෑගල දක්වා පළමු පන්තියට රුපියල් 600ක්ව පැවති ගාස්තුව රුපියල් දහසක් දක්වාත්, කොළඹ කොටුව අනුරාධපුරය පළමු පන්තියේ ගාස්තුව රුපියල් 1200 සිට 1500 දක්වාත් , කොටුව – කන්කසන්තුරය පළමු පන්තියේ ගාස්තුව රුපියල් 1400 සිට 1700 දක්වාත් වැඩි කළ බව දුම්රිය  නියෝජ්‍ය සාමාන්‍යාධිකාරී වී. එස් පොල්වත්තගේ සඳහන් කරයි.

මීට අමතරව උතුරු මාර්ගයේ දෙවන හා තුන්වන පන්තිවල වෙන් කළ ආසන ගාස්තුව ද ඉහළ දමා තිබේ.

ප්‍රධාන මාර්ගයේ කොළඹ කොටුවේ සිට මහනුවර දක්වා පළමු පන්ති ගාස්තුව රුපියල් දහසේ සිට 1200 දක්වාත්, නානුඔයට රුපියල් 1200 සිට 2000 දක්වාත්, ඇල්ල සහ බදුල්ල යන ගමනාන්ත වෙත පළමු පන්තියේ ගාස්තුව රුපියල් 1500 සිට 2500 දක්වාත් වැඩි කර ඇති බව නියෝජ්‍ය සාමාන්‍යාධිකාරීවරයා පැවසුවේ ය.

මීට සාපේක්ෂව එම ගමනාන්ත දක්වා දෙවන හා තුන්වන පන්තිය වෙන්කළ ආසන ගාස්තුව ද වැඩි කර තිබේ.

නව වැඩිකිරීම් යටතේ කොළඹ – නුවර නගරාන්තර දුම්රියේ ගාස්තුව ද ඉහළ දැමූ බව දුම්රිය දෙපාර්තමේන්තුව සඳහන් කළේ ය.

කෙසේ වෙතත් දුම්රිය සාමාන්‍ය ප්‍රවේශපත්‍ර ගාස්තුව මෙතෙක් ඉහළ දමා නැත.

එම ගාස්තු සංශෝධනය සඳහා ද සාකච්ඡා පවත්වමින් සිටින බව දුම්රිය නියෝජ්‍ය සාමාන්‍යාධිකාරී වී.එස් පොල්වත්තගේ සඳහන් කළේ ය.

1949 මාර්තු 24 දා උපන්, හිටපු අග්‍රාමාත්‍ය , එක්සත් ජාතික පක්ෂයේ නායක රනිල් වික්‍රමසිංහ ගේ 73 වන උපන්දිනය අද (24) ට යෙදී ඇත.

මේ සම්බන්ධයෙන් වන විශේෂ සුබ පැතුම් පණිවිඩයක් සමගි ජනබලවේගය මන්ත්‍රී හරීන් ප්‍රනාන්දු විසින් සිය ෆේස්බුක් ගිනුමේ තබා ඇති අතර එය පහත දැක්වෙයි.

කෙසේ වුවත් හරීන් ප්‍රනාන්දු මන්ත්‍රීවරයා මේ ආකාරයට තැබූ උපන්දින සුබ පැතුම සම්බන්ධයෙන් දේශපාලන ක්ශේත්‍රයේ විශේෂ අවධානයක් යොමුව ඇත.

ඊට අමාත්‍ය මහින්දානන්ද අලුත්ගමගේ අද පාර්ලිමේන්තුවේදී සිදුකළ ප්‍රකාශයක් ද බලපා තිබේ.

මහින්දානන්දගේ අනාවරණය !

අමාත්‍ය මහින්දානන්ද අලුත්ගමගේ අමාත්‍යවරයා පාර්ලිමේන්තුවේදී පවසා සිටියේ විපක්ෂ නායක සජිත් ප්‍රේමදාස මහතා ළඟ සිටින මන්ත්‍රීවරුන් දහ දෙනකු එක්සත් ජාතික පක්ෂයේ නායක රනිල් වික්‍රමසිංහ සමඟ ළඟදීම එක්වීමට නියමිතව ඇති බවය.

සමගි ජන බලවේගයේ මන්ත්‍රීවරුන් දසදෙනකු රනිල් වික්‍රමසිංහ සමඟ ඒ සම්බන්ධයෙන් සාකච්ඡා අරඹා ඇතැයි පැවසූ අමාත්‍යවරයා මන්ත්‍රීවරුන් දසදෙනකු වික්‍රමසිංහ මහතාට එකතුවීමට දැනටමත් කැමැත්ත පළ කර ඇති බවද සඳහන් කළේය.

අලුත්ගමගේ අමාත්‍යවරයා මෙසේ පැවසූවේ විපක්ෂ නායක සජිත් ප්‍රේමදාස රටේ ආහාර ප්‍රශ්නය සම්බන්ධයෙන් ප්‍රශ්නයක් මතු කළ අවස්ථාවේදී ඇතිවූ සංවාදයකදීය.

මහින්දානන්ද අලුත්ගමගේ අමාත්‍යවරයා එහිදී මෙසේද ප්‍රකාශ කළේය.

විපක්ෂ නායකතුමනි. මම ඒ යන අයගේ නම් කියන්නද.නම්වල මුල් අකුරු විතරක් කියන්නම්. හ යන්නෙන් එක්කෙනයි. එ යන්නෙන් එක්කෙනයි. ර යන්නෙන් එක්කෙනයි. ස යන්නෙන් එක්කෙනයි. දැන් ඔය නම් ටික බලා ගත්ත නම් හරි.

රජයේ බැංකුවක් “ඩිෆෝල්ට්” තත්වයට (විදේශීය අතමාරු ණයක් ගෙවීම ප්‍රමාදවීමක්) පත් කර ඇතැයි ඇතැයි අද පෙරවරුවේ වාර්තා වූ බව පාර්ලිමේන්තු මන්ත්‍රී හර්ෂ ද සිල්වා පවසයි.

අද (24) පාර්ලිමේන්තුවේ විවාදයට සහභාගි වෙමින් පාර්ලිමේන්තු මන්ත්‍රි හර්ෂ ද සිල්වා මේ බව අනාවරණය කර සිටි අතර මෙය සත්‍ය සිදුවීමක් නම් එය ඉතා කනගාටුදායක බවත් මහා ව්‍යසනයක ආරම්භයක් බවත් අවධාරණය කළේය.

රටේ ප්‍රශ්න සම්බන්ධයෙන් පිළිතුරු දීම සඳහා මුදල් අමාත්‍යවරයා හෝ වගකිවයුතු කිසිවකු පාර්ලිමේන්තුවට කිසිම විටෙක නොපැමිණෙන බවද ඔහු චෝදනා කර සිටියේය.

අවශ්‍ය බලතල ලබාදෙන්නේ නම් මහජන උද්ඝෝෂණ සදහා එක්වන පුද්ගලයන්ට කදුළු ගෑස්, ජල ප්‍රහාර මෙන්ම ගම්මිරිස් මිශ්‍ර ජල ප්‍රහාර එල්ල කරන බව මහජන ආරක්‍ෂක අමාත්‍ය රියර් අද්මිරාල් ආචාර්ය සරත් වීරසේකර පවසා ඇත.

අමාත්‍යවරයා මේ බව සඳහන් කර සිටියේ නෙත් එෆ් එම් අන්ලිමිටඩ් වැඩසටහනට එක්වෙමින් ය.

තමන් එලෙස ක්‍රියා කරන්නේ මහජන උද්ඝෝෂණ හේතුවෙන් සාමාන්‍ය ජනතාවගේ ජනජීවිතයට එල්ල වන බලපෑම් හේතුවෙන් බවත් අමාත්‍යවරයා එහිදී පැවසීය.

කෙසේවෙතත් එලෙස ක්‍රියා කිරීමට ජනාධිපති ගෝඨාභය රාජපක්‍ෂ මහතා ඉඩ ලබානොදෙන බවත් මහජන ආරක්‍ෂක අමාත්‍ය විශ්‍රාමික රියර් අද්මිරාල් සරත් වීරසේකර පැවසීය.

(මූලාශ්‍රය neth news )

නුදරු දිනකදීම ආණ්ඩුවට 113ක බහුතරය අහිමි කරවන බව හිටපු අමාත්‍ය විමල් වීරවංශ අභියෝග කර සිටියි.

මන්ත්‍රීවරයා මේ බව සඳහන් කර සිටියේ , ආණ්ඩුවේ හවුල්කාර පක්ෂ විසින් ඉකුත්දා නිකුත් කරන ලද ” රට හරි මගට යෝජනාවලිය ද මල්වතු අස්ගිරි මහ නාහිමිවරුන්ට පිළිගැන්වීමේ අවස්ථාවෙන් පසුව මාධ්‍ය වෙත අදහස් දක්වමින් ය.

මුදල් ඇමැතිවරයා උද්දච්ජ ලෙස කටයුතු කරන බවත්, 113ක බහුතරය අහිමි කොට මෙම උද්දච්ජ ආණ්ඩුව ගෙදර යවන බවත් එහිදී ඔහු වැඩිදුරටත් සඳහන් කර සිටියේය.

මල්වතු නායක හිමියන්ට කියූ ටික !

මේ අතර හිටපු අමාත්‍ය පාර්ලිමේන්තු මන්ත්‍රී විමල් වීරවංශ ඇතුළු මන්ත්‍රී කණ්ඩායම තිබ්බටුවාවේ ශ්‍රී සිද්ධාර්ථ සුමංගල මල්වතු පාර්ශවයේ මහානාහිමියන් හමුවී ප්‍රකාශ කර සිටියේ "රටට එරෙහි ගිවිසුම් සේරම අත්සන් කරලයි ඒවා ගැන කැබිනට් මණ්ඩලයට කිව්වේ. ජනතාව සිහිවිකල්ව ගෑස් පෝලිම්වල ඉන්ධන පෝලිම්වල බෙහෙත් පෝලිම්වල ඉන්න අවස්ථාවේ මේ සේරම ගිවිසුම් අත්සන් කළේ.‘" යනුවෙනි.

එසේම " රට තුළ ඉතා භයානක තත්ත්වයක් ඇති වී තිබෙනවා. ඒ තත්ත්වය නරක අතට හැරෙන්න ඉඩ දිය නොහැකියි. ඒ නිසා බැරිම තැන තමයි අපි මේ ගැන රටට කියන්න පටන් ගත්තේ එහෙම කරද්දී අප ආණ්ඩුවෙන් එළියට දැම්මා " යැයිද ඔහු පැවසීය.

විනිමය අනුපාත පාලනයකින් තොරව පැවතුනහොත් මැයි ජුනි මාස වනවිට ඇමරිකානු ඩොලරයක් රුපියල් 400 ය සීමාව ඉක්මවනු ඇතැයි ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ගුණපාල රත්නසේකර සඳහන් කරයි.

පාර්ලිමේන්තුවේ දී අද (24) අදහස් දක්වමින් මන්ත්‍රීවරයා මේ බව පැවසූ අතර අද වන විට ඩොලරය පාලනය අත හැරීමෙන් පසු එහි වටිනාකම රුපියල් 300 මට්ටමකට ඉහළ ගොස් ඇති බවත් පැවසීය.

මෙම තත්ත්වය මත ඉදිරි කාල සීමාවේදී ජනතාවට දරාගන්න බැරි මට්ටමට ජීවන වියදම අනිවාර්යයෙන්ම ඉහළ යනු ඇති බව ද පැවසූ ඔහු තමන්ගේ ඇස්තමේන්තුව නම් ජූනි මාසය පමණ වන විට ඩොලරය රුපියල් 400 මට්ටමට යනු ඇති බව ද පැවසීය.

සර්ව පාක්ෂික සමුළුව, ජනාධිපති ගෝඨාභය රාජපක්ෂගේ සහ අග්‍රාමාත්‍ය මහින්ද රාජපක්ෂගේ ප්‍රධානත්වයෙන් අද (23) පෙරවරුවේ ජනාධිපති මන්දිරයේදී ආරම්භ කෙරිණ.

වත්මන් ආර්ථික ගැටලුවට විසඳුම් සාකච්ඡා කිරීම සහ අදහස් ලබා ගැනීම සඳහා සර්ව පාක්ෂික සමුළුව කැඳවනු ලැබී ය.

පාර්ලිමේන්තුව නියෝජනය කරන දේශපාලන පක්ෂ 15ටම ඒ සඳහා ආරාධනාකර තිබුණත් පක්ෂ හතක් ඒ සඳහා සහභාගී නොවන බව දැනුම්දී තිබේ.

සමුළුවේ දී කබ්රාල් ආර්ථික අර්බුදයට හේතු ඉදිරිපත් කරයි

ජනපතිගේ ප්‍රධානත්වයෙන් පැවැත්වුණු සාර්ව පාක්‍ෂික සමුළුවට මහ බැංකු අධිපති අජිත් නිවාඩ් කබ්රාල් ද සහභාගී වී සිටියේ ය.

සමුළුවේ ආරම්භක කතාව ඉදිරිපත් කරමින් ඔහු ප්‍රකාශ කළේ කොරෝනා වසංගතය හේතුවෙන් ලොව සෑම රටක්ම පාහේ ආර්ථික අර්බුදවලට මුහුණදුන් බව යි.

"කොවිඩ් වසංගතය ක්‍රමක්‍රමයෙන් ලෝකය වෙලාගන්නට පටන්ගන්නා විට සමහර රටවල් ශක්තිමත් ආර්ථික පදනමක හිටියා. ඒත් සමහර රටවල් විවිධ හේතූන් නිසා දුර්වල වී තිබුණා,"යි පැවසූ ඔහු 2015 - 2019 අතර කාල සමයේ දී ලංකාවේ ආර්ථික වර්ධන වේගය කඩා වැටී තිබූ බව ප්‍රකාශ කළේ ය.

මිළ ඉහළ ගිය භාණ්ඩ ලැයිස්තුව තවත් දිගුවෙයි

"බැසිල්ගේ වැරද්දක් නැහැ" - ආණ්ඩුවේ මැති ඇමතිවරු කියති

විදේශීය ණය ඇමරිකානු ඩොලර් බිලියන 15කින් වර්ධනය වුව ද විදේශ සංචිත ප්‍රමාණය ඇ. ඩො. බිලියන එකකින් පමණ පහළගොස් තිබුණුබව ද, පාස්කු ඉරිදා ප්‍රහාරය නිසා සංචාරක ක්ෂේත්‍රය අඩාල වූ බව ද ප්‍රකාශ කළ ඔහු, මේ ආකාරයෙන් වැටි තිබූ ශ්‍රී ලංකාවට කොවිඩ් වසංගතයට ඔරොත්තුදීමට ශක්තියක් නොතිබූබව ද පැවසීය.

මෙහිදී මහ බැංකු අධිපතිවරයා ප්‍රකාශ කළේ රජයටත්, මහ බැංකුවටත් පහත අභියෝගයන්ට මුහුණදීමට සිදුවූ බව යි:

එන්නත්කරණයට විශාල මුදලක් වැය කිරීමට සිදුවීම

රු. බි. 4100ක පමණ ණය කල්තැබීමක් ලබාදීම

ලොක්ඩවුන් හේතුවෙන් රු. බි. 1000කට වඩා ආර්ථික ක්‍රියාකාරකම් රටට අහිමිවීම

රජයේ ආදායම් බෙහෙවින් අඩුවීම නිසා රජයේ ගෙවීම් සඳහා මුදල් සපයාදීමට මහ බැංකුවට සිදුවීම

සංචාරක ක්ෂේත්‍රයෙන් සාමාන්‍යයෙන් ලැබෙන වාර්ෂික විදේශ ශුන්‍ය වීම

විවිධ හේතූන් නිසා විදේශ විනිමය ප්‍රේෂණ 2021 මැද කාලයේ සිට දැවැන්ත ලෙස අඩුවීම

රුසියානු යුක්රේන යුද්ධය නිසා බොරතෙල් බැරලයක මිළ සීඝ්‍රයෙන් වැඩිවීම

මුළු ලෝකයේම උද්ධමනය දශක හතරක කාලයක් තුළ ඉහළතම අගය වාර්තා කිරීම

"ශ්‍රී ලංකාවේ අද පවතින විදේශ ණය අර්බුදයට මූලික හේතුවක් ලෙස අප දකින්නේ රටේ විදේශීය ණයබරතාවය 2015 සිට 2019 දක්වා අවුරුදු පහ තුළ දී ඉතා සීඝ්‍ර ලෙස වැඩිවීම යි," මහ බැංකු අධිපතිවරයා ප්‍රකාශ කළේ ය.

කෙසේ නමුත්, එක්සත් ජාතික පක්ෂ නායක රනිල් වික්‍රමසිංහ මෙහිදී මහ බැංකු අධිපතිවරයාට පිළිතුරු දෙමින් පැවසුවේ තමා මෙහි පැමිණියේ පටු දේශපාලනය සඳහා නොවනබව යි.

"මේ සම්මන්ත්‍රණය පවත්වන්නේ ශ්‍රී ලංකා නිදහස් පක්ෂයේ ඉල්ලීම උඩ... මට විශේෂයෙන්ම නිමල් සිරිපාල ඇමතිතුමා මුණගැහිලා කිව්වා 'මේකට එන්න, පරණ යාළුකමටවත් එන්න' කියලා. ඉතින් අපි හිතුවා මේක වැදගත් කියලා, ඒ නිසා මෙතෙන්ට ආවා. ඉතින් අපි මෙතෙන්ට ඇවිල්ලා තියෙන්නේ ඇත්ත වශයෙන්ම රටේ තියෙන මේ උග්‍ර ප්‍රශ්නේ [නිසා]. මෙතෙන්ට අපි ආවේ නෑ ආපහු මේ පක්ෂ දේශපාලනේට, කවුද වගකියන්නේ කියලා මේවාකරන්න. අර පටු දේශපාලනේට, මහ බැංකුවේ අධිපතිතුමා කිව්ව හැටියට ආවේ නෑ. ඒත් මං කණගාටුවෙනවා, එතුමා පටන්ගත්තේම මේක ගිය ආණ්ඩුවේ වැරද්දක් කියල. මං ඒකට පිළිතුරු දුන්නොත්? එතකොට මොකද්ද, ඊළඟටත් පිළිතුරු දෙනවද? ඕක අන්තිමට ඉවර වෙන්නේ විජය රජ්ජුරුවන්ගෙන්නේ, එයා ලංකාවට ආවේ නැත්නම් මේ ප්‍රශ්නේ තියෙන්නෑ කියලා. ඕක යි වෙන්නේ," ඔහු ප්‍රකාශ කළේ ය.

"ඉතින් මං මේ ගැන කියන්නේ එක කාරණයක් විතර යි. ඒ දවස්වල වෙන ප්‍රතිපත්තියක් ගියේ. ඒ කාලේ මිනිස්සුන්ට කන්න තිබුණා, බොන්න තිබුණා, පෙට්‍රල් තිබුණා. ඊට වඩා කියන්න යන්නෑ."

"තව එකක් තියෙනවා ජනතිපති තුමා කිව්වා මේක අපේ ජයග්‍රණයක් කියලා. මම මෙතනට ආවේ විපක්ෂයේ කොටසක් ඇවිල්ලා නෑ. මම ආවේ ඒගොල්ලෝ පරාජය කරන්න නෙමෙයි. මෙතෙනට ඇවිත් අදහස් ප්‍රකාශ කරලා ඒවා ගිහින් කියලා ඒගොල්ලොත් සම්බන්ධකරගන්න. ඉතින් අපි මේවයින් තොරව මේ ප්‍රශ්න ගැන කතා කරමු."

අනතුරුව අදහස් දැක්වු ජනාධිපති ගෝඨාභය රාජපක්ෂ හිටපු අගමැති රනිල් වික්‍රමසිංහගෙන් සමාව ඉල්ලා සිටියේය. "ඔබ තුමාගේ හිත රිදිල්ලක් වුණා නම් එකට සමාව ඉල්ලා සිටින බවයි. කිසිම කෙනෙකුට චෝදනා නඟන්න නොවෙයි. අවංකවම සෑම කෙනෙකුගේම අදහස් ගන්න තමයි කථා කළේ කියන මම අවධාරණය කරනවා."

වත්මන් ආර්ථික ගැටලුවට විසඳුම් සෙවීමට පක්ෂ විපක්ෂ සියලු දෙනා එක්වන්න
➢ සමුළුව කැඳවීම අවංක ප්‍රයත්නයක්, දේශපාලන වාසි ගැනීමක් නොවේ ...
➢ යෝජනා හා අදහස් ලබාදීමට පැමිණි සියලු පක්ෂවලට ස්තූතියි ...
➢ සහභාගීනොවූ පක්ෂවලටත් පැමිණ සිය ස්ථාවරයත් කියන්නැයි ආරාධනා ...#PMD #PMDNewsGov pic.twitter.com/eab0u5mewB

— PMD News (@PMDNewsGov) March 23, 2022

IMF වාර්තාව ගැන රනිල් සහ බැසිල් ගැටුමක්

මේ අතර මෙම සමුළුවේදී මුදල් අමාත්‍ය බැසිල් රාජපක්ෂ සහ හිටපු අග්‍රාමාත්‍ය රනිල් වික්‍රමසිංහ අතර වචන හුවමාරුවක් සිදු විය.

හිටපු අග්‍රාමාත්‍යවරයා ජාත්‍යන්තර මුල්‍ය අරමුදලේ කෙටුම්පත් වාර්තාව පාර්ලිමේන්තුවට ඉදිරිපත් කරන ලෙස ඉල්ලා සිටීමත් සමඟ මෙම බහින්බස්වීම ඇතිවිය.

"මට ඔබට කෙටුම්පත ලබා දෙන්න බැහැ," මුදල් අමාත්‍යවරයා පැවසීය.

ශ්‍රී ලංකාව පිළිබඳ ජාත්‍යන්තර මූල්‍ය අරමුදලේ වාර්තාව සඳහා නැවත නැවතත් කළ ඉල්ලීම් රජය විසින් ප්‍රතික්ෂේප කළ බව පැවසූ රනිල් වික්‍රමසිංහ, බොහෝ දේශපාලන පක්ෂ සර්ව පාක්ෂික සමුළුව වර්ජනය කිරීමට හේතුව මෙය බව ද පැවසීය.

ජාත්‍යන්තර මූල්‍ය අරමුදලේ සම්පූර්ණ වාර්තාව ශ්‍රී ලංකාවට ලැබී නොමැති බව මුදල් අමාත්‍ය බැසිල් රාජපක්ෂ ප්‍රකාශ කළ අතර ඊට ප්‍රතිචාර දක්වමින් හිටපු අග්‍රාමාත්‍යවරයා ප්‍රකාශ කළේ එම වාර්තාව සම්පූර්ණයෙන් ශ්‍රී ලංකා රජයට ඉදිරිපත් කළ බව තමාට දැනුම් දුන් බවයි.

ශ්‍රී ලංකාවට ලැබුණේ කෙටුම්පතක් බවත්, ඊට රජය සිය අදහස් එක් කරන බවත් අවසන් වාර්තාව නිකුත් කරන්නේ IMF මණ්ඩල අනුමැතියෙන් පසුව බවත් අවශ්‍යනම් එම කෙටුම්පතේ පිටපතක් ලබාදිය හැකි බවට බැසිල් රාජපක්ෂ පවසා සිටියේය.

මෙහිදී රනිල් වික්‍රමසිංහ සඳහන් කළේ, "මට දෙන්න එපා වාර්තාව පාර්ලිමේන්තුවට ඉදිරිපත් කරන්න" යනුවෙනි.

අප්‍රේල් මාසයේ නව අයවැයක්

මුදල් අමාත්‍ය බැසිල් රාජපක්ෂ පැවසුවේ IMF යෑම ගැන නොයෙක් දේ කතාවුණත් එය අලුත් දෙයක් නොවන බවයි. "වාර්තාවේ ඩ්‍රාෆ්ට් එක විතරයි නිලවශයෙන් ආවේ. අපි ඒකේ යම් යම් සංශෝධනය කරලා යවලා තියෙනවා යනුවෙන් පවසා ඔහු පැවසුවේ එය ලබාදිය නොහැකි බවයි.

මුදල් අමාත්‍ය බැසිල් රාජපක්ෂ තවදුරත් පවසා සිටියේ, නව අයවැයක් නොදුරේදී ඉදිරිපත් කිරීමට නියමිත බවයි.

"අපි ඉදිරි කාලයේ සිංහල - දෙමළ අලුත් අවුරුද්දට ඉස්සෙල්ලා ජනතාවට විශාල සහයක් දෙන්න බලා පොරොත්තුවෙනවා. ඒ සහනයත් එක්ක නව අයවැයක් ඉදිරිපත් කිරීමට මුදල් අමාත්‍යවරයා ලෙස මම එකඟයි. මට මතක් වන්නේ "වනේ ගිජිදාය දුටුවොත් වනසාය, ළිඳේ පනිදාය වැටුණොත් ඌ කාය, අතකින් කර වැලකි, අතෙකින් දඬු බෑය, මරණ තුනක් ඇති මිනිහෙක් පැණි කෑය. මොකද මේ එයා කැලෙ යනකොට තනි අලියෙක් ආවා. තනි අලියා දන්නවනේ ටිකක් දරුණුයි නේ ඉතින් අද තනි අලියා...ඒ වගේ තමයි අද ජනතාවට අමාරුයි කියලා දන්නවා" ඔහු කියා සිටියේය.

වනේ ගිජිදාය දුටුවොත් වනසාය
ළිදේ පනිදාය වැටුනොත් ඌ කාය
අතකින් කරවැලකි අතකින් දඩු බෑය
මරණ තුනක් ඇති මිනිසෙක් පැණි කෑය pic.twitter.com/NPcbKotkuR

— Kamila Dias (@KamilaWDias) March 23, 2022

සර්වපාක්ෂික සමුළුවට ඩයනා ගමගේ ගේ යෝජනාව

අය පවසන්නේ කංසා වගාවෙන් විදේශ විනිමය ඉපයි හැකි බවයි. ඇය තවදුරටත් පැවසුවේ දැනටමත් රට ප්‍රමාද වී ඇති බවයි. කංසා නීතිගත කර එය අපනයනය නොකිරීමෙන් මේ වන විටත් රටට ඩොලර් බිලියන දෙකක් පමණ අහිමිවී ඇති බවයි."අපි දන්නවා ඉන්දියාවේ මේ ළඟදී ප්‍රාන්ත 3කට නීත්‍යානුකූලව කංසා වගාව කරන්නට දුන්නා, බලය දුන්නා පිටරට යවන්න. අපේ රට මේවගේ තත්ත්වයක තියෙද්දිත් අදත් අපිට ඩොලර් බිලියන 2ක් පමණ නැතිවුණා, මම යෝජනාව ගෙනාපු දවසේ ඉදලා. අපි මේ යෝජනාව හරියට ගෙනල්ලා නීත්‍යානුකූල කරා නම් අද වන විට ඩොලර් බිලියන 2ක් මේ රටට ලබා ගන්න තිබ්බ තැන අපි නැති කර ගත්තා."

සමුළුවට සහභාගී වූයේ කවුද?

ශ්‍රී ලංකා ප්‍රජාතාන්ත්‍රික සමාජවාදී ජනරජයේ නවවැනි පාර්ලිමේන්තුවේ සංයුතිය අනුව පාර්ලිමේන්තුව නියෝජනය කරන පක්ෂ ගණන 15කි.

විපක්ෂය නියෝජනය කරන එක්සත් ජාතික පක්ෂය වෙනුවෙන් එහි නායක රනිල් වික්‍රමසිංහ ඇතුළු නියෝජතියන් පිරිසක්, දෙමළ ජාතික සන්ධානය නියෝජන කරමින් එහි නායක ආර්.සම්පන්දන්, එම්.ඒ.සුමන්තිරන් ඇතුළු පිරිසක් සහ ආණ්ඩු පක්ෂයේ හවුල්කාර පක්ෂයක් වන ශ්‍රී ලංකා නිදහස් පක්ෂයේ නියෝජිතයින්ද සමුළුවට සහභාගි වුණි.

මේ අතර, ආණ්ඩුවේ හවුල්කාර පක්ෂ 11 ඇතිකරගත් එකඟතාවට අනුව එම කණ්ඩායම නියෝජනය කරමින් පූජ්‍ය අතුරලියේ රතන හිමියන් හා මහාචාර්ය තිස්ස විතාරණ සමුළුවට සහභාගි වි සිටි අතර පක්ෂ 11 නියෝජනය කරන මහජන පක්ෂයේ නායක පාර්ලිමේන්තු මන්ත්‍රි අසංක නවරත්න වෙනම සමුළුවට සහභාගි වුණි.

එහෙත් පාර්ලිමේන්තුව නියෝජනය කරන පක්ෂ අතරින් ප්‍රධාන විපක්ෂය වන සමගි ජන බලවේගය සර්වපාක්ෂික සමුළුව සඳහා සහභාගී නොවීය.

තම පක්ෂය මේ සඳහා සහභාගී නොවීමට මූලික හේතුව වන්නේ ආණ්ඩුව ජනතාවගේ ප්‍රශ්න විසඳීම සඳහා පසුගිය කාලය පුරාම සිය වගකීම නිසි ලෙස ඉටුකර නොමැතිවීම නිසා බව සමගි ජන බලවේගයේ පාර්ලිමේන්තු මන්ත්‍රී තිස්ස අත්තනායක ප්‍රකාශ කළේ ය.

"ඒ වගේම මේ වගේ සර්වපාක්ෂික සමුළුවක් කැඳවීම හරහා කරන්න උත්සාහ කරන්නේ මාධ්‍ය සංදර්ශනයක් පැවැත්වීමට සහ තවදුරටත් ජනතාව හා රට රැවටීමට කියන කාරණය ගැන තමා අපේ අවධානය යොමුවුණේ. ඒ අනුව අවසාන වශයෙන් පක්ෂ නායක රැස්වීමේ දී තීරණය කළා මේකට සහභාගී නොවීමට," ඔහු කියා සිටියේ ය.

ජාතික ජන බලවේගය ද ප්‍රකාශ කළේ තම පක්ෂය ද සර්ව පාක්ෂික සමුළුව සඳහා සහභාගී නොවීමට තීරණය කර ඇති බව යි.

එක්සත් ජාතික පක්ෂය නියෝජනය කරමින් නායක රනිල් වික්‍රමසිංහ සමුළුවට සහභාගී විය.

අකිල ඉලංකෙයි තමිල් කොංග්‍රසය, ශ්‍රී ලංකා මුස්ලිම් කොංග්‍රසය, අහිල ඉලංගෙයි මහජන කොංග්‍රසය, සහ සී. වී. විග්නේෂ්වරන්ගේ නායකත්වයෙන් යුත් තමිල් මක්කල් ‍තේසිය කුට්ටනි පක්ෂ ද මෙම සර්වපාක්ෂික සමුළුවට සහභාගී නොවනබව ප්‍රකාශකර තිබුණි.

ජාතික කොංග්‍රසයේ ඒ. එල්. එම්. අතාවුල්ලා සිය ස්ථාවරය මෙතෙක් ප්‍රකාශකර නොමැත.

සමුළුවට සහභාගී වන පක්ෂ අතර ශ්‍රී ලංකා පොදුජන පෙරමුණ, ඉලංගෙයි තමිල් අරුසු පක්ෂය, ඊලාම් ජනතා ප්‍රජාතන්ත්‍රවාදී පක්ෂය, ශ්‍රී ලංකා නිදහස් පක්ෂය, සහ අපේ ජනබල පක්ෂය සමුළුවට සහාභාගී වීමට නියමිතව තිබුණි.

ආණ්ඩුව නියෝජනය කරන හවුල්කාර පක්ෂ 11ක් නියෝජනය කරමින් පූජ්‍ය අතුරලියේ රතන හිමි සහ මහාචාර්ය තිස්ස විතාරණ ද මීට සහභාගී විය.

ශ්‍රී ලංකා කොමියුනිස්ට් පක්ෂ කාර්යාලයේ දී ඊයේ (මාර්තු 22) අදාළ පක්ෂවල නායකයෝ රැස්වී සාකච්ඡා කළහ.

එම හමුවෙන් අනතුරුව මාධ්‍ය අමතමින් ජාතික නිදහස් පෙරමුණු නායක පාර්ලිමේන්තු මන්ත්‍රී විමල් විරවංශ කියා සිටියේ රටේ තත්ත්වය ඉතාම කණගාටුදායක බව යි.

"මේ රට අද නායකත්වයක් නැති විදිහේ අස්ථාවරයක් කරා ඇදගෙන ගිහිල්ලා තියෙනවා. කවුරුහරි හිතන් ඉන්නවා නම් ඉන්දියාවෙන් හරි කොහෙන්හරි කීයක් හරි හිඟමනට අරන් ඇවිල්ලා ඒකෙන් මේ ප්‍රශ්නය විසඳගන්න පුළුවන් කියලා, ඒක වෙන්නේ නැහැ. ඊළඟ අවුරුද්ද වෙනකොට ප්‍රශ්නය තවත් බරපතල වෙනවා," ඔහු ප්‍රකාශ කළේ ය.

රට තුළ පවතින විවිධ අර්බුදවලට මුහුණදීමට සහ ඒවාට විසඳුම් වශයෙන් පිළියම් සෙවීමට මෙම සර්ව පාක්ෂික සමුළුව කැඳවා ඇත්තේ, පසුගිය දා ශ්‍රී ලංකා නිදහස් පක්‍ෂය විසින් ජනාධිපතිවරයාගෙන් කරන ලද ඉල්ලීමකට අනුව යි.

"අර්ධපාර්ශවික ප්‍රෝඩාවක්"

පිවිතුරු හෙළ උරුමයේ නායක හිටපු අමාත්‍ය උදය ගම්මන්පිල මෙය සර්වපාක්ෂික සමුළුවක් නොව, "අර්ධපාර්ෂික ප්‍රෝඩාවක්" බව කියා සිටියේ ය.

"ආණ්ඩුවට අවංක උවමනාවක් තියෙනවා නම් මුලින්ම පොහොට්ටුව ඇතුළේ ඒ අර්බුදයට විසඳුමක් හදාගන්න ඕනේ," ඔහු පැවසුවේ ය.

මේ අතර, සර්වපාක්ෂික සමුළුව පැවැත්වීමට දිනකට පෙර ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍යධුරයෙන් නිමල් ලාන්සා ඉල්ලා අස්විය.

"රටේ ජනතාව දැඩි ආර්ථික අර්බුදයකින් ඉතා පීඩනයක සිටින අවස්ථාවක දී ඒ පිළිබඳව කිසිදු තැකීමකින් තොරව බලාසිටීමට සිය හෘද සාක්ෂියට එකඟ නොවන බව" පවසමින් ඔහු ජනාධිපතිවරයාට ලිපියක් යොමුකර තිබුණි.

නිමල් ලාන්සාගේ ඉල්ලා අස්වීම සම්බන්ධයෙන් අදහස් දක්වමින් කැබිනට් අමාත්‍යධුරයෙන් නෙරපා හරින ලද උදය ගම්මන්පිල මන්ත්‍රීවරයා කියා සිටියේ: "නිමල් ලාන්සා මැතිතුමාගේ ඉවත්වීම තව එක් ඇමතිවරයෙක් ඉවත්වීමක් නෙමෙයි. ආණ්ඩුව ඇතුළේ ඉවත්වීමට බලාගෙන ඉන්න ඇමතිවරුන්ගෙන් ඇතිවුන පුංචි ආරම්භයක් විතරයි."

ඉදිරියේ දී තවත් මන්ත්‍රීවරුන් විශාල ගණනක් ආණ්ඩුවෙන් ඉවත්වීමට නියමිත බව ද ඔහු සඳහන් කළේ ය.

'ජනතා ප්‍රශ්න ගැන රජයේ අවධානය'

මේ අතර ආණ්ඩු පක්ෂයේ කණ්ඩායම් රැස්වීම ජනාධිපතිවරයාගේ ප්‍රධානත්වයෙන් ඊයේ (මාර්තු 22) රාත්‍රියේ පැවැත්විණි. පැය තුනකට අධික කාලයක් පැවති රැස්වීමෙන් අනතුරව රාජ්‍ය අමාත්‍ය ශෙහාන් සේමසිංහ පවසා සිටියේ ආණ්ඩු පක්ෂය ලෙස ජනතාවගේ ප්‍රශ්න විසඳීම සඳහා අත්වැල් බැඳ එකට ගමන්කළ යුතුයැ යි යන මතයට සියලුදෙනා පැමිණි බව යි.

"සමස්ත ආණ්ඩු පක්ෂ රැස්වීමේ දී සම්පූර්ණයෙන් කතා කළේ ජනතා ප්‍රශ්න සහ විසඳුම් පිළිබඳව යි," ඔහු සඳහන් කළේ ය.

ජනාධිපතිවරයාත්, මුදල් අමාත්‍යවරයාත් මේ ආර්ථික අර්බුදයෙන් අත්මිදීමේ අනාගත වැඩපිළිවෙල පිළිබඳ දීර්ඝ වශයෙන් පැහැදිලි කළ බව මන්ත්‍රී සංජීව එදිරිමාන්න ආණ්ඩු පක්ෂ කණ්ඩායම් රැස්වීමෙන් අනතුරුව ප්‍රකාශ කළේ ය.

"ජනතාවගේ ප්‍රශ්න ගැන අපි සමීප නැත්තේ නැහැ. අපි සමීප යි. ඒ නිසා තමා ආණ්ඩුව තුළ ඉඳලත් ආණ්ඩුව සමහර කියන කාරණවලට විරුද්ධ මත අපි දරන්නේ," ප්‍රේමනාත් සී. දොලේවත්ත මන්ත්‍රීවරයා මෙහිදී කියා සිටියේ ය.

මේ අතර ශ්‍රී ලංකා පොදුජන පෙරමුණ අද (මාර්තු 23) පැවත්වූ ප්‍රවෘත්ති සාකච්ඡාවට එක්වෙමින්, පාර්ලිමේන්තු මන්ත්‍රි වසන්ත යාපා බණ්ඩාර කියා සිටියේ, "රජය ප්‍රකාශයට පත් කළා සර්ව පාක්ෂික සමුළුවක් වෙත සියලුම පාර්ලිමේන්තුව නියෝජනය කරන ඒ පක්ෂවලට පැමිණිලා තමන්ගේ විසඳුම්, ආර්ථිකමය වශයෙන් තමන්ට තිබෙන විකල්ප විසඳුම් ඉදිරිපත් කරන්න කියන ඉල්ලීම. ඒ අනුව පක්ෂ රාශියක් අද තමන්ගේ විසඳුම් ඉදිරිපත් කිරීම සඳහා රැස්වෙලා තිබෙන බව අපිට දැනගන්න ලැබිලා තිබෙනවා. නමුත් වගකිය යුතු දේශපාලන පක්ෂ තමන්ගේ විසඳුම් ඉදිරිපත් කරන්න අවශ්‍ය මොහොතකදි සමහරු ඒවා කරඇරීමෙන් අපිට පෙන්නුම් කරනවා තමන්ට විසඳුමක් ඇත්ත වශයෙන්ම ශබ්ද නගන ප්‍රමාණයට නොමැති බව."

ඔහු කියා සිටියේ "රජයක් විදිහට අද මුහුණ දෙන එක කරුණක් තමයි රාජ්‍ය ණයබරිතතාවය."

"2005 මහින්ද රාජපක්ෂ මැතිතුමා ජනාධිපතිධුරය වගකීම භාරගන්න අවස්ථාවේදි එතුමා රුපියල් බිලියන 226.7 ක ණය බරක් භාර ගත්තා. යහපාලන ආණ්ඩුව 2019 වන විට ලංකාවේ ණය බරිතතාවය මධ්‍යම රජයේ රුපියල් බිලියන 13031.5 යි. ඒ විශාල ණය බරිතතාවයකට රට ලක් කරලා ඔවුන් රටට අත්පත් කරලා දුන්න වාසිය කුමක්ද?"

"පහුගිය ජනවාරි 18 වෙනිදා අප රජයට සිදු වුණා ඩොලර් මිලියන 500 ක ණයබරිතතාවයක් ස්වෛරි බැදුම්කර ගෙවා දැමීමට සිදු වුණා. මේ ඩෝලර් මිලියන 500 ක ප්‍රමාණය ගෝඨාභය රාජපක්ෂ ජනාධිපතිතුමාගේ කාලයේ ලබා ගත්ත ණය ප්‍රමාණයක් ද කියලා අපි විමසනවා. එතුමාගේ කාලයේ ස්වෛරි බැදුම්කර එක රුපියලයක්වත් නිකුත් කළේ නැති බව කියන්න ඕන. එම නිසා එතුමා මේ ණයබරිතාවය පිළිබඳව අරගලයේදි වගඋත්තර කරුවා කියන්න හදනවා නම් මෙය නොකළ වරදකට අපරාදමය වගකීමක් ඔහු වෙත පැවරීම සඳහා විපක්ෂය ගෙනන මේ හුදු අවලාදයකි. ඒ පිළිබඳව මේ ජාතිය දැනුවත් විය යුතුයි."

"මේ වන විට ගෝඨාභය රාජපක්ෂ මැතිතුමාට මේ ඩොලර් අර්බුදයකට මුහුණ දෙන්නට සිදු වන්නේ සහේතුවක වන බවයි. යුක්රේනය සහ රුසියාව අතර තිබෙන යුද්ධය නිසා අපට විදේශ වශයෙන් ලැබෙන ඩොලර් ප්‍රමාණය සීමා වනවා. මේ දරුණු තත්වයත් එකක් ලෝක තෙල් මිල අඩකින් ඉහළ යෑමේ අර්බුදයට ශ්‍රී ලංකාවට මුහුණ දෙන්න සිදු වුණා. ඒ වගේ සැපයුම්දාම කළමණාකරණය කිරීමට ලංකාවට සිදු වුණා. අද වන විට තෙල් සැපයීමේ, තිරිඟු පිටි සැපයීමේ, අහාර ද්‍රව්‍ය සැපයීමේ ගැටලුවක් තිබෙනවා. මේ සැපයුම්දාම බිඳවැටිමේ ක්‍රියාවලිය කෙටි කාලයකට මුහුණ දෙන්න සිදු වෙනවා. නමුත් අපි මේ ගැටලුවේදි පලා යන්නේ නෑ. මේ සඳහා විසඳුම් ගරු මුදල් අමාත්‍යතුමා රජයට යෝජනා කරනවා. "යනුවෙන් ඔහු සඳහන් කළේය.

මේ අතර ශ්‍රී ලංකාවේ කොමියුනිස්ට් පක්ෂය ප්‍රකාශ කළේ මෙම අර්බුදය 'හරියට කියවන ක්‍රමයක්' ඉක්මනින් නිර්මාණය විය යුතු බව යි. නැතහොත් අරාජිකත්වයෙන් රට අවසන් වනු ඇතැ යි ද එම පක්ෂය සඳහන් කළේ ය.

ශ්‍රී ලංකාවේ කොමියුනිස්ට් පක්ෂයේ සභාපති ඩිව් ගුණසේකර පවසා සිටියේ මෙම සර්ව පාක්ෂික සමුළුව මීට වසරකට පමණ පෙර කැඳවීමට තිබූ බව යි.

"ප්‍රශ්නය දෙස විද්‍යාත්මක ලෙස බැලීමේ අවශ්‍යතාවක් තිබුණා. ජනාධිපතිතුමාටවත් ඒ ගැන අවබෝධයක් තියෙනව ද කියන එක සැක යි. ඒ මොකද ජනාධිපති ජාතිය අමතන කතාවෙදිවත් ප්‍රශ්නයේ මූලයන් ගැන කතා කළේ නැහැ. පාර්ලිමේන්තුවේ විවාදයක් නැහැ. මුදල් අමාත්‍යවරයා ප්‍රකාශයක්වත් කරන්නේ නැහැ. අපේ රජයේ ආදායම බැහැගෙන යනවා. බණ්ඩාරනායක මැතිණිය පාලනය කරනකොට '77 රජයේ ආදායම දළ දේශීය නිශ්පාදනයෙන් 24% යි. අද 6%යි. අද භාණ්ඩාගාරයට ඩොලර් නැති එක නෙමේ ප්‍රශ්නය, රුපියල් නැහැ. භාණ්ඩාගාරේ සල්ලි නැහැ, බිංදුව යි," ඩිව් ගුණසේකර චෝදනා කළේ ය.

"මම විපක්ෂ මන්ත්‍රීවරයෙක් වෙලා ඉන්නකොට මට ජේ. ආර්. ජයවර්ධන ටෙලිෆෝන් කරනවා රාත්‍රියේ, මගේ අදහස් අහනවා. ප්‍රේමදාස ජනාධිපතිතුමා විපක්ෂ මන්ත්‍රිවරයෙකු වන මගේ අදහස අහලා තියෙනවා. හැබැයි අපිම තෝරා පත්කරගත් ජනාධිපතිතුමා ජනාධිපති වුණායින් පස්සේ තාම හම්බවෙලා නැහැ. අපේ පක්ෂය කැඳෙව්වා නම් අපි ගිහින් කියනවා. ආණ්ඩු පක්ෂයෙන් අහන්නෙත් නැහැ. විපක්ෂයෙන් අහන්නෙත් නැහැ. ඔක්කම වුණායින් පස්සේ කැඳවනවා. අපි ප්‍රතික්ෂේප කරන්නේ නැහැ. අපේ නියෝජිතයෝ තුන්දෙනෙක් යනවා. අපේ පැත්නෙන් අපේ යුතුකම ඉටු කරනවා ජනතාව වෙනුවෙන්," ඔහු ප්‍රකාශ කළේ ය.

BBC සිංහල සේවය

අවුරුදු දෙකකට පෙර ගෝටාබය රාජපක්ෂ මේ රටේ ජනාධිපති වශයෙන් වැඩිම ජනතා ඡන්දයකින් තේරී පත්වුවත් අවුරුදු දෙකක්වත් ගතවීමට පෙර වැඩිම ජනතාවක් ඒකරාශී කරගෙන ගෙදර යවන්න ලෑස්ති බවත් පරණ තට්ටු මාරු ක්‍රමයට යළ ඉඩ නැති බවත් ජවිපෙ ප්‍රධාන ලේකම් ටිල්වින් සිල්වා පවසයි.

ඔහු මේ බව සඳහන් කර සිටියේ අද (23) නුගේගොඩ "පන්නමු" මැයෙන් පැවති ජාතික ජන බලවේගයේ විරෝධතා රැලිය අමතමින් ය.

එහිදී ඔහු මෙසේද පැවසීය.

“තැන් තැන්වල ඉන්න ජනතාව විඳින දුක් වේදනා එකට කැටි කරලා ආණ්ඩුව ගෙදර යවන්න ලෑස්තියි. බුද්ධි අංශ වාර්තාවලින් ගෝටාබය රාජපක්ෂ මහත්තයාට ඒ බව දන්වයි. ගෝටාබය රාජපක්ෂ මහත්තයා සිංහාසනයෙන් බස්සවා ගෙදර යවන්න ලෑස්ති බව ඒ වාර්තාවලින් තහවුරු කරයි. ඒ වගේම ගෝටාබය සිංහානයෙන් බස්සවා කොහේවත් නැති පුතානෝ කෙනෙක් බලයට ගේන්නෙත් නැහැ. පරණ තට්ටුමාරු ක්‍රමයට දැන් ඉඩ නැහැ.”

අන්තවාදී චෝදනාවක් මත වැඩතහනම් වූ වෛද්‍ය ෂාෆි සහබ්දීන් ට වැඩතහනමට ලක්ව සිටි කාලයට හිමි හිඟ වැටුප් හා දීමනා ගෙවීමට පියවර ගන්නා බව නීතිපතිවරයා (23) අභියාචනාධිකරණය හමුවේ දැනුම් දුන්නේය.

ඒ රාජ්‍ය පරිපාලන අමාත්‍යාංශයේ ආයතන අධ්‍යක්ෂ ජනරාල්වරයාගේ තීරණය දැනුම් දෙමිනි.

නීතිපතිවරයා වෙනුවෙන් අභියාචනාධිකරණය හමුවේ පෙනී සිටි අතිරේක සොලිසිටර් ජනරාල් ජනාධිපති නීතිඥ සුමති ධර්මවර්ධන මෙම දැනුම් කරනු ලැබීය.

වෛද්‍ය ෂාෆි සහබ්ඩීන් මහතා අභියාචනාධිකරණය හමුවේ ගොනු කර තිබූ මූලික අයිතිවාසිකම් පෙත්සම සැලකිල්ලට ගත් අවස්ථාවේදී මෙම කරුණු ඉදිරිපත් විණි.

සෝභිත රාජකරුණා සහ ධම්මික ගනේපොල යන අභියාචනාධිකරණ විනිසුරු මඩුල්ලක් හමුවේ මෙම පෙත්සම කැඳවනු ලැබීය.

මෙම පෙත්සමේ වගඋත්තරකරුවන් ලෙස කුරුණෑගල ශික්ෂණ රෝහලේ අධ්‍යක්ෂ චන්දන කැන්දන්ගමුව සහ නීතිපතිවරයා ඇතුළු පිරිසක් නම් කොට ඇත.

පෙත්සම වැඩිදුර සලකා බැලීම මැයි 31 වනදා තෙක් කල් දැමුණි.

ඩයස්පෝරාව සමග සාකච්ඡා කිරීමට දැඩි කැමැත්තෙන් පසුවන බවත් උතුරු පළාතේ සංවර්ධනය වෙනුවෙන් ආයෝජනයට ඩයස්පෝරාවට ඇරයුම් කරන බවත් ජනාධිපති ගෝඨාභය රාජපක්‍ෂ  (23)පැවසීය.

ඇමරිකා එක්සත් ජනපද රාජ්‍ය දෙපාර්තමේන්තුවේ දේශපාලන කටයුතු පිළිබඳ සහකාර ලේකම් වික්ටෝරියා නූලන්ඩ් අද පස්වරුවේ ජනාධිපති කාර්යාලයේදී හමුවූ අවස්ථාවේදී ජනාධිපති ගෝඨාභය රාජපක්ෂ එසේ පැවසීය.

අද පෙරවරුවේ පැවති සර්ව පාක්ෂික සමුළුවේදී ඉදිරිපත් වූ කරුණු, එහි ප්‍රගතිය සහ දෙමළ ජාතික සන්ධානය සමග සිකුරාදා දින පැවැත්වීමට නියමිත සාකච්ඡාව පිළිබඳව ද ජනාධිපතිවරයා නූලන්ඩ් දැනුවත් කළේය.

කොවිඩ් වසංගතය සහ වෙනත් රටවල සිදුවීම් මගින් රටේ ආර්ථිකයට එල්ල වී ඇති බලපෑම මගහරවා ගැනීම සඳහා ජාත්‍යන්තර මූල්‍ය අරමුදලට යාමට තීරණය කළ බවත් එම තීරණය සම්බන්ධයෙන් මෙන්ම සත්‍ය සෙවීමේ යාන්ත්‍රණයට සහ ත්‍රස්ත විරෝධී පනත සංශෝධනයට ගෙන ඇති බවත් ජනාධිපතිවරයා කීය.

පුනර්ජනනීය බලශක්ති ප්‍රභවයන් මගින් විදුලි උත්පාදනයට ඇති අවස්ථා පුළුල් කිරීමට සහාය වන ලෙස ජනාධිපතිවරයා ඇතුළු පිරිස සහකාර ලේකම්වරියගෙන් ඉල්ලා සිටියේය.

කැනඩාව, ඇමරිකා එක්සත් ජනපදය සහ යුරෝපා රටවල සිටින ඩයස්පෝරාව සමග සාකච්ඡා පැවැත්වීමේ වැදගත්කම පෙන්වා දුන් සහකාර ලේකම්වරිය ඒ පිළිබඳව ජනාධිපතිවරයාට ප්‍රසංශා කළේය.

ඇමරිකාවේ හරිත තාක්ෂණය මෙරටට හඳුන්වා දීමටත් සයිබර් සහ තොරතුරු තාක්ෂණ අංශවල දියුණුවට සහාය ලබාදීමටත් පියවර ගන්නා බව නූලන්ඩ් ලේකම්වරිය සඳහන් කළාය. මෙරට අධ්‍යාපන පහසුකම් කෙරෙහි අවධානය යොමු කළ සහකාර ලේකම්වරිය පෞද්ගලික අංශයේ දායකත්වය ලබාගැනීමෙන් උසස් අධ්‍යාපන අවස්ථා පුළුල් කළ හැකි බව පෙන්වා දුන්නාය.

සහකාර ලේකම් ඩොන් ලු, ඇමරිකානු තානාපති ජූලි චන්ග්, ප්‍රධාන නියෝජ්‍ය සහකාර ආරක්ෂක ලේකම් ඇමන්ඩා ඩෝරි, දේශපාලන නිලධාරී ජෙෆ් චැනින් විදේශ අමාත්‍ය මහාචාර්ය ජී. එල්. පීරිස්, ජනාධිපති ලේකම් ගාමිණී සෙනරත්, ජනාධිපති ප්‍රධාන උපදේශක ලලිත් වීරතුංග සහ විදේශ ලේකම් අද්මිරාල් මහාචාර්ය ජයනාත් කොළඹගේ ඇතුළු පිරිසක් මෙම අවස්ථාවට එක්ව සිටියහ.

(මූලාශ්‍රය lankadeepa )

2022 වසර සඳහා අයවැය යෝජනා වහා ප්‍රතිසංශෝධනය කර ඉදිරි මුදල් වර්ෂය සඳහා නව පරිපූරක ඇස්තමේන්තුවක් මැයි මාසයට පෙර ඉදිරිපත් කළ යුතු බව ශ්‍රී ලංකා නිදහස් පක්ෂයේ සභාපති මෛත්‍රීපාල සිරිසේන (23) පැවති සර්ව පාක්ෂික සමුළුව අමතමින් යෝජනා කර ඇත.

මෙහිදී දැනට ඉදිරිපත් කර ඇති අනවශ්‍ය වැය ශීර්ෂ කපා දැමිය යුතු බවත් හිටපු ජනාධිපතිවරයා සඳහන් කළේය.

එක්සත් ජාතික පක්ෂ නායක, හිටපු අග්‍රාමාත්‍ය රනිල් වික්‍රමසිංහ ද මෙහිදී පැවසුවේ සංවර්ධන අයවැයක් වෙනුවට සහන අයවැයක් ගෙන ආ යුතු බවයි.

එම අදහස්වලට පිළිතුරු දෙමින් මුදල් අමාත්‍ය බැසිල් රාජපක්ෂ පැවසුවේ අමාත්‍ය මණ්ඩලයේ එකඟතාව අනුව එවැනි අයවැයක් ගෙනඒමට තමන් සූදානම් බවයි.

මෙරට මතුව ඇති ඉන්ධන පෝලිම් අසලට යුදහමුදාව යොදවා ඇති පසුබිමේ ගෑස් පෝලිම් අසල තත්ත්වයන් පාලනය කිරීමට පොලිසිය කැඳවා ඇති බව ආණ්ඩුව හිතවාදී වෙබ් අඩවි වාර්තා කර ඇත.

දැඩි ආණ්ඩුව හිතවාදී වෙබ් අඩවියක් වන සීනිව්ස් වාර්තා කර ඇති එවැනි පුවතකද මේ බව සඳහන් වෙයි.

එම පුවත මෙසේය.

ගෑස් අලෙවිසැල් අසල ත්ත්වය පාලනය සඳහා පොලිස් නිලධාරීන් යෙදවීමට කටයුතු කර තිබේ.

රටපුරා මේ වන විට ගැස් හිගයක් ඇති වී තිබෙන අතර ජනතාව ගෑස් අලවිසැල් ඉදිරියේ දීර්ඝ පෝලිම්වල රැඳී සිටිති.

නමුත් ගෑස් සිලින්ඩර සැපහුම සිදුවන්නේ ඉල්ලුමට වඩා අඩුවෙන් වීම මත ඇතැම් ස්ථානවල යම් ගැටුම්කාරී තත්ත්වයක් ද නිර්මාණය වී තිබිණි.

මෙම තත්වයන් පාලනයට හා ගැස් බෙදා හැරීම නිරීක්‍ෂණයට මෙසේ පොලිසිය යොදවා ඇත.