පුවත්

මිරිහානේ පිහිටි ජනාධිපති ගෝඨාභය රාජපක්ෂ ගේ නිවස ඉදිරිපිට (31) පැවති ජනතා උද්ඝෝෂණයේදී පොදු දේපලවලට හානි කරන ලද්දේ ආණ්ඩුව විසින්ම එයට ඇතුල් කරන ලද කණ්ඩායම් විසින්දැයි සැකයක් මතුවන බව ජනතා විමුක්ති පෙරමුණේ නායක, පාර්ලිමේන්තු මන්ත්‍රී අනුර කුමාර දිසානායක පවසයි.

මන්ත්‍රීවරයා මෙසේ සඳහන් කර සිටියේ බත්තරමුල්ලේ පිහිටි ජවිපෙ පක්‍ෂ මූලස්ථානයේ දී  (1) පැවති මාධ්‍ය හමුවක් අමතමිනි.

අත දරුවන් වඩාගත් මව්වරු, නිවෙසේ සිට පැමිණි වැඩිහිටියන්, දරුවන් බිරින්දෑවරුන් සමඟ පැමිණි ස්වාමිපුරුෂයන් උද්ඝෝෂණවලට පැමිණ ප්‍රචණ්ඩකාරී ක්‍රියාවල නොයෙදෙන බව ද පාර්ලිමේන්තු මන්ත්‍රී අනුර දිසානායක එහිදී අවධාරණය කර සිටියේ ය.

උද්ඝෝෂණවලදී මෙවන් තත්වයන් ඇතිවීම ආණ්ඩුවට හිතකර බැවින් ඔවුන් එවැනි තත්වයක් ඇතිකරගැනීමට බලා සිටින බවත් මන්ත්‍රීවරයා පැවසූ අතර ආණ්ඩුව හිතා මතා සැලසුම් කර මේ සඳහා කණ්ඩායමක් යෙදවූයේ ද යන්න පිළිබඳ සාධාරණ සැකයක් පැන නගින බවත් පැවසීය.

පොදු ජනතාවගේ සාධාරණ උද්ඝෝෂණයකට පහරදීමට හෝ බලහත්කාරී ලෙස අත්අඩංගුවට ගැනීමට ආණ්ඩුවට කිසිදු අයිතියක් නැති බැවින් අත්අඩංගුවට ගත් පිරිස නිදහස් කළ යුතු බවත් ඔහු පැවසීය.

මෙම අවස්ථාව ආවරණය කිරීමට ගිය මාධ්‍යවේදීන් සහ මාධ්‍ය උපකරණ අත්අඩංගුවට ගෙන ඇත්තේ ප්‍රචණ්ඩකාරී ලෙස ක්‍රියාකරන අය පිළිබඳව මාධ්‍යයෙන් ප්‍රචාරය වීම වැළැක්වීම සඳහාද යනුවෙන් ද ඔහු විමසීය.

ආණ්ඩුවට එරෙහිව උද්ඝෝෂණ කරන විට ආණ්ඩුවට වාසිසහගත හා ආණ්ඩුව විසින් ඇතිකරන ප්‍රචණ්ඩකාරී තත්වයන් වළක්වාගැනීමට ජනතාව ක්‍රියා කළ යුතු බවත් පැවසීය.

උද්ඝෝෂණ ප්‍රචණ්ඩකාරී තත්වයකට වර්ධනය කරගැනීම තුළ ආණ්ඩුවට තමන්ගේ කෝකටත් තෛලය වන හමුදා යාන්ත්‍රණය යොදාගැනීමට හැකියාව ලැබෙන බව ද අනුර දිසානායක මන්ත්‍රීවරයා සඳහන් කළේය .

මෙම උද්ඝෝෂණයට සහභාගී වූ අයට අත පය ඉදිරමන තරමට පහරදී ඇති බවත්, එක් තරුණයෙන් උණ්ඩ වැදී රෝහල්ගත කර තිබෙන බවත් කී අනුර දිසානායක මන්ත්‍රීවරයා මෙවැනි සාමාන්‍ය ජනතා උද්ඝෝෂණයකට පහරදීමකට අණ දුන්නේ ආරක්‍ෂක ඇමති ගෝඨාභය රාජපක්‍ෂද නැතිනම් පොලීසිය භාර ඇමති සරත් වීරසේකර , ද එසේත් නැතිනම් කවුද යන්න රටට කිව යුතු බව ද පැවසීය.

ඔවුන්ට තනතුරු ලැබී ඇත්තේ දුන්නේ පොදු පුරවැසියන් දකින දකින තැන පහරදෙන්නට නොවේ යැයි ද ජ.වි.පෙ නායක අනුර දිසානායක මන්ත්‍රීවරයා අවධාරණය කර සිටියේය.

මිරිහාන පැඟිරිවත්තේ වූ සිද්ධිය ජාතිවාදී හෝ ත්‍රස්තවාදී සිද්ධියක් නොවන හෙයින් එවැනි ප්‍රකාශ කිරීමෙන් පවතින තත්ත්වය තවත් උග්‍රවිය හැකි බව එක්සත් ජාතික පක්ෂ නායක සහ හිටපු අග්‍රාමාත්‍ය රනිල් වික්‍රමසිංහ අවධාරණය කරයි.

හිටපු අග්‍රාමාත්‍යවරයා මේ බව සඳහන් කර සිටියේ (01) මේ සම්බන්ධයෙන් විශේෂ ප්‍රකාශයක් කරමින්ය.

විශේෂ ප්‍රකාශයක් කරමින් හිටපු අග්‍රාමාත්‍ය රනිල් වික්‍රමසිංහ සිදුකළ අදහස් දැක්වීම පහත දැක්වෙයි.

පීඩාවට පත් ජනතාවගේ ගැටලු වලට විසඳුම් නොතිබුණු නිසා මිරිහාන පැඟිරි වත්තේ දී (31)රාත්‍රී සමාජ පිපිරුමක් ඇති වුණා.එයින් මෙතෙක් පැවති ආර්ථික අර්බුදය දේශපාලන අර්බුදයක් බවට පත්වුණා.මෙම පිපිරීම වර්තමාන දේශපාලන ක්‍රමයේ කඩාවැටීමක් ලෙස හැඳින්විය හැකියි.පීඩාවට පත් ජනතාවගේ ගැටළු විසඳීමට ආණ්ඩුව අසමත් වුණා.එලෙසම විපක්ෂයත් අසාර්ථක වී තිබෙනවා.

මේ සිද්ධිය සම්බන්ධයෙන් ආණ්ඩුව විවිධ කණ්ඩායම් ඉලක්ක කරගනිමින් චෝදනා කරන අතර එසේනම් ඒ සම්බන්ධව සාක්කි සහ තොරතුරු ඉදිරිපත් කර මීට සම්බන්ධ කවුදැයි හෙළි කළ යුතුයි.

මේ සිද්ධියේදී ජාතිවාදී ප්‍රකාශ කිරීමෙන් වැළකිය යුතුව තිබෙනවා.මෙි ජාතිවාදී සිද්ධියක් නොවේ.එමෙන්ම මෙය ත්‍රස්තවාදී සිද්ධියක් ද නොවේ.එවැනි ප්‍රකාශ කිරීමෙන් පවතින තත්ත්වය තවත් උග්‍රවිය හැකියි.

ජුබිලි කණුවෙි පැවති උද්ඝෝෂණය සාමකාමී ලෙස පැවැත්වුණා.නමුත් පැඟිරි වත්තේදී ඒ ස්වරූපය වෙනස් වුණා.එය අවාසනාවන්ත සිද්ධියක්.

මේ පිළිබඳව විවිධ මත ප්‍රකාශ කෙරෙමින් තිබෙනවා.අප එක කාරණයක් මතක තබා ගත යුතුයි.සාමකාමී උද්ඝෝෂණයකදී කිසිම පුද්ගලයෙකුට හානියක් සිදු නොවිය යුතුයි.එමෙන්ම ප්‍රචණ්ඩත්වයටත් ඉඩ නොදිය යුතුයි.ජනතාවට සාමකාමීව තමන්ගේ විරෝධය ප්‍රකාශ කිරීමට උද්ඝෝෂණය කිරීමට අයිතියක් තිබෙනවා.ජනතාවගේ එම උද්ඝෝෂණ වලට දේශපාලන පක්ෂ සහභාගී නොවිය යුතුයි.එමෙන්ම දේශපාලන පක්ෂ වලට තමන්ගේ රැස්වීම් සහ උද්ඝෝෂණ පැවැත්වීමේ අයිතිය ද තිබෙනවා.

ප්‍රමාද වුවත් පාර්ලිමේන්තුවටත් දැන් වගකීමක් තිබෙනවා.පීඩාවට පත් ජනතාවට පිළිගත හැකි විසඳුම් පාර්ලිමේන්තුවෙන් ඉදිරිපත් කළ යුතුයි.එය පක්ෂ භේදයෙන් තොරව ජාතික එකඟත්වයක් ඇතිව ක්‍රියාත්මක කළ යුතුව තිබෙනවා.ලබන සතියේ පාර්ලිමේන්තුව රැස්වූ විට අප මේ යුතුකම ඉටු කළ යුතුව තිබෙනවා.අපේ ප්‍රශ්න ප්‍රචණ්ඩ ප්‍රචණ්ඩකාරී නොවන ලෙස සාමකාමීව විසඳා ගන්නට හැකි වේවායි මා ප්‍රාර්ථනා කරනවා.

රාජ්‍ය අමාත්‍ය ශෂීන්ද්‍ර රාජපක්ෂගේ ප්‍රධානත්වයෙන් කිරිඉබ්බන්ආර මහවැලි ක්‍රිඩාංගනයේ අද (01) පැවැත්වීමට නියමිතව තිබූ උත්සවයක් සඳහා අමාත්‍යවරයාගේ සහභාගීත්වය අවලංගු කිරීමේ සිදුවීමක් වාර්තා වෙයි.

වාර්තා වන ආකාරයට අද තිබී ඇත්තේ ඔප්පු බෙදා දීමේ උත්සවයක් වන අතර එය ශෂීන්ද්‍ර රාජපක්ෂ රාජ්‍ය අමාත්‍යවරයා ගේ ප්‍රධානත්වයෙන් පැවැත්වෙන බව දැනගත් ජනතාව ඊට විරෝධය එල්ළකර ඇත.

ආර්ථික අර්බුධය හේතුවෙන් ඇමතිවරයාගේ පැමිණීමට විරෝධය පළ කරමින් ජනතාව ප්‍රදේශයේ කලුකොඩි ප්‍රදර්ශනය කර තිබු බවත් වාර්තා වන අතර ඒ අනුව අමාත්‍යවරයා අදාළ උත්සවය සඳහා සහභාගි නොවී සිටීමට කටයුතු කර ඇති බවත් වාර්තා වෙයි.

මුදල් අමාත්‍ය බැසිල් රාජපක්ෂ විසින් අද (01) සවස 6.00 ට ශ්‍රී ලංකා පොදුජන පෙරමුණේ මන්ත්‍රීවරුන්ට පමණක් සීමා වූ රැස්වීමක් කැඳවීමට පියවර ගෙන ඇති බව මාධ්‍ය වාර්තා පවසයි.

මෙම රැස්වීමේදී දැනට රට තුළ මතුව ඇති විරෝධතා රැල්ල සම්බන්ධයෙන් සාකච්ජා කිරීමට නියමිතව ඇති බව දැනගන්නට ඇති බවත් එහි දැක්වෙයි.

බැසිල් ඉවතට !

මේ අතර අද පුවත්පත් වාර්තාවක් උපුටා දක්වමින් ආණ්ඩුව හිතවාදී වෙබ් මාධ්‍ය මෙසේද වාර්තා කර ඇත.

මෙරට පවතින ආර්ථික අර්බුදය සම්බන්ධයෙන් රජයට රටපුරා මතුව ඇති මහජන විරෝධය හමුවේ මුදල් අමාත්‍ය බැසිල් රාජපක්ෂ මහතාව ඔහු දරමින් සිටින මුදල් ඇමතිධූරයෙන් ඉවත් කිරීමට බොහෝ පාර්ශවයන් රජයයට ඉල්ලීම් කර ඇතැයි වාර්තා වෙයි.

ඊයේ (31) රජයට හිතවත් භික්ෂූන්වහන්සේලා පිරිසක් ද ජනාධිපතිවරයාට දැඩි ඉල්ලීමක් සිදුකරමින් සඳහන් කර ඇත්තේ මුදල් ඇමතිවරයා ලෙස කටයුතු කරන බැසිල් රාජපක්ෂව සිය ධූරයෙන් ඉවත් කරන ලෙස බව රජයේ අභ්‍යන්තර ආරංචි මාර්ග සඳහන් කරයි.

එමෙන්ම දිනෙන් දින වර්ධනය වන ජනතා විරෝධය හමුවේ මෙන්ම ඊයේ රාත්‍රියේ ඇතිවූ සිද්ධිය සම්බන්ධයෙන් අවධානය යොමු කර ඇති ආණ්ඩුවේ පසුපෙල මන්ත්‍රීවරුන් පිරිසක් යලිත් වතාවක් මුදල් ඇමතිවරයාව ඉවත් කරන ලෙස ජනාධිපතිවරයාගෙන් ඉල්ලා ඇතැයිද සඳහන්.

විරෝධය ප්‍රබල වන්නේ එය සාමකාමී වුවහොත් පමණක් බව රැඩිකල් මැද සාමූහිකය (රැඩිකල් සෙන්ටර්) අවධාරණය කර සිටියි.

 හිටපු අමාත්‍ය මංගල සමරවීර විසින් ආරම්භකළ 'රැඩිකල් මැද සාමූහිකය' එබව සඳහන් කර ඇත්තේ, මාධ්‍ය නිවේදනයක් නිකුත් කරමිනි.

අප්‍රේල් 03 රට පුරා සංවිධානය කිරීමට නියමිත විරෝධතාවයට එක්වන මිනිසුන් වෙත ආයාචනයක් කර මින් එම සාමුහිකය පවසන්නේ, ප්‍රචණ්ඩ ක්‍රියා ඇතිකොට පුරවැසි විරෝධය කෙලසන කූට සැලසුම් පරදමු කියාය.

'රැඩිකල් සෙන්ටර්' වෙනුවෙන්, ජයනි අබේසේකර - හරේන්ද්‍රන් ක්‍රිෂ්ණසාමි - කෙෂාල් ජයසිංහ - සී. එස්. කොඩිතුවක්කු - ෆිරෝ ෆාරුක් යන අයගේ අත්සනින් යුතුව අද (අප්‍රේල් 01) නිකුත්කර ඇති නිවේදනයේ මෙසේ සඳහන් වේ.

 සාමයත් එක්ක විරෝධය සැරයි!

 අප්‍රේල් 03 රට පුරා විරෝධයට එක්වන ඔබේ අවධානයටයි.

කිසිසේත්ම මේ විරෝධතාවය ප්‍රචණ්ඩත්වය කරා රැගෙන නොයාම අපේ වගකීමයි. එවැන්නක් සිදුවුවහොත් ඉන් වාසි ලබන්නේද ජන පීඩක ආණ්ඩුවයි. එමනිසා පහත කරුණු ගැන සැලකිලිමත් වන්න.

1. විරෝධතාවයට පැමිණි පසු තමන් අවට සිටින අය සමග කතාබහ කොට ඔවුන් හඳුනාගන්න.

2. පිරිස අතරින් නායකත්වයට කීපදෙනෙක් පත්කරගන්න.

3. කිසිවිටෙකත් ආවේගශීලී නොවන්න. තමන් අසල කෙනෙක් ආවේගශීලීව ක්‍රියාකරන්නට පෙළඹේ නම් ඔහු/ඇය ඉන් වළක්වන්න.

4. කිසිවෙකුගේ දේපොලවලට හානි නොකරන්න. මෙවන් විරෝධතාවයක එවන් ක්‍රියාවන් කරන අය සැබවින්ම විරෝධතා ව්‍යාපාරය පාවාදෙන්නන්‍ ය.

5. ගැටුම් ඇති කරනොගන්න. තමන් ශිෂ්ට පුරවැසියෙක් බවත් ආණ්ඩුව අශිෂ්ටව හැසිරෙන බවත් ආදර්ශයෙන් පෙන්වන්න.

6. සෑම විටම තමන්ගේ අසල්වැසියා ගැන අවධානයෙන් පසුවන්න. සැක කටයුතු බවක් දැනුනොත් නායකත්ව පිරිසට දන්වන්න.

විරෝධය ප්‍රබල වන්නේ එය සාමකාමී වුවහොත් පමණි.

මෙය විරෝධයට සහභාගි වන ඔබේ මිතුරන් අතර ෂෙයාර් කරන්න.

පුරවැසි විරෝධයට ජය!

(රැඩිකල් මැද සාමූහිකය)
2022 අප්‍රේල් 01

මාර්තු මාසයේදී මෙරට ආහාර උද්ධමනය 30.2% දක්වා ඉහළ ගොස් ඇති අතර ආහාර නොවන කණ්ඩයේ උද්ධමනය 13.4% ලෙස වාර්තා වෙයි.

ජන හා සංඛ්‍යාලේඛන දෙපාර්තමේන්තුවේ නවතම වාර්තාවේ මේ බව සඳහන් කර ඇත.

මාර්තු මාසයේ දී උද්ධමනය අගය වාර්ෂික පදනම මත 18.7% ලෙස ඉහළ ගොස් ඇත.

පෙබරවාරි මාසයේදී මෙරට ආහාර උද්ධමනය 25.7%ක් හා ආහාර නොවන කණ්ඩයේ උද්ධමනය 10.1%ක් ලෙස පැවතිණි.

ආහාර උද්දමනය අනුව ශ‍්‍රී ලංකාව ලෝකයේ 12 වැනි තැන පසුවන අතර ආසියාවේ සිවුවන තැනත් දකුණු ආසියාවේ පලමු තැනත් පසුවෙයි.

මේ අවස්ථාවේ අත්‍යාවශ්‍ය සේවා පමණක් පවත්වාගෙන යමින් රට වසා දැමීමට කටයුතු කළ යුතු බව හිටපු අමාත්‍ය පාඨලී චම්පික රණවක පවසයි.

විශේෂ ප්‍රකාශයක් සිදු කරමින් ඔහු පවසන්නේ විදුලිබල මණ්ඩලය වහාම විශේෂඥ මණ්ඩලයකගේ පාලනයට භාර දිය යුතු බවය.

"රටේ හැත්තෑ පන් ලක්ෂයක් විදුලි පරිභෝගිකයන්ට දැන් අඳුරු යුගයක් උදාවෙලා තියෙනවා. දවසේ පැය විසි හතරෙන් පැය දහතුනක් විදුලිය නොමැති රටක අද අපිට ජීවත් වෙන්න වෙලා තියෙනවා.

ඉර මුදුන් වෙලා දැන් ලංකාවට උඩින්. ඒ නිසා අධික උෂ්ණත්වයකට මුහුණ දෙන්න තියෙන වෙලා තියෙනවා විතරක් පමණක් නෙමෙයි. ජල භාවිතාවත් ඒ අනුව වැඩි වෙලා තියෙනවා. මේ ඔක්කොටම ප්‍රධානම ප්‍රශ්නය බවට පත් වෙලා තියෙන්නේ විදුලිය. නිවාසවල විදුලිය නොමැති වීම නිසා විදුලි පංකා කරකැවෙන්නේ නැහැ. රස්නෙයි, කුඩා දරුවෝ ඉන්න තැන් වල රාත්‍රියට නිදාගන්න විදිහක් නැහැ. මැසි මදුරු උවදුරු වලට ගොදුරු වෙනවා. ගේ එක ම අපායක් වෙලා. කාර්යාල, රජයේ කාර්යාල, පුද්ගලික කාර්යාල කිසිම වැඩක් කෙරෙන්නේ නැති තැන් බවට පත් වෙලා. සේවකයෝ එනවා. ප්‍රධානීන් එනවා. අමාත්‍යාංශ නිලධාරීන් එනවා. වැඩක් කරන් නැතුව හැරිලා යනවා. කර්මාන්තශාලා වැහිලා ගිහිල්ලා. කුඩා හා මධ්‍ය පරිමාණ වෙළඳ ස්ථාන සම්පූර්ණයෙන්ම අනාථ භාවයට පත්වෙලා.

විශේෂයෙන්ම වායු සමීකරණ යන්ත්‍රවලට අමතරව ශීතකරණ භාවිතාවෙන් ආහාර හා ඖෂධ කල් තබා ගත්ත ස්ථාන අද ඉතාමත්ම භයානක අර්බුදයකට ගොදුරු වෙලා. ආහාරවල ප්‍රමිතිය පිළිබඳ, ඖෂධවල ප්‍රමිතිය පිළිබඳ බලගතු ප්‍රශ්න මතුවෙලා තියෙනවා. මේ නිසා ඉහළ ගණයේ සුපිරි වෙළඳසැල් හැරෙන්න, කුඩා පරිමාණයේ වෙළඳසැල් හාර ලක්ෂයකට අධික ප්‍රමාණයක් අද මේ භයානක ව්‍යසනයට ගොදුරු වෙලා. ඒ වගේම රටේ තිබුණු දස ලක්ෂ සංඛ්‍යාත කුඩා හා මධ්‍ය පරිමාණ කර්මාන්ත සියල්ලම අද වැනසී යන තත්වයකට පත්වෙලා. විදුලිබල පද්ධතියේ අභියෝගය නිසා.

අප ඉදිරියේ තියෙන අර්බුදය මේ ආණ්ඩුව තවදුරටත් තේරුම් අරගෙන නැහැ. අපි ඉතාම කණගාටුයි කියන්න මවිසින් මාස ගණනකට පෙර මේ අනතුරු ඇඟවීම කළා. සමස්ත විදුලිබල පද්ධතිය ඇද වැටීමේ අනතුර. අද විදුලිබල පද්ධතියේ මේ අර්බුදය පැන නැගිලා තියෙන්නේ තෙල් ලබා නොදීම නිසා ඉන්ධන වලින් දුවන බලාගාර අක්‍රිය වීම නිසා. ඒක ඇතැම් තෙල් ලබාදීමෙන් පස්සේ විසඳාගන්න පුළුවන් කියන හැඟීම මේ ආණ්ඩුවේ ඇතැම් නායකයින්ට තියෙනවා. නමුත් දැන් මේ ආණ්ඩුවේම ක්‍රියාකාරීත්වය හා නියෝග නිසා ලංකා විදුලිබල මණ්ඩලය බරපතල අර්බුදයකට මුහුණ දීලා තියෙනවා.

කොළඹ උතුර, කොළඹ දකුණ, කොළඹ මධ්‍යම, නුගේගොඩ, කැලණිය සහ ගල්කිස්ස පොලිස් කොට්ඨාසවලට පැනවූ පොලිස්= අද(01) අලුයම 5.00ට ඉවත් කළ පොලිස් මාධ්‍ය ප්‍රකාශකවරයා පවසයි.

ජනාධිපතිගේ නිවසට ඇතුළුවන ප්‍රවේශ මාර්ගය අවහිර කරමින් මිරිහාන, පැගිරිවත්ත පාර අසල ඊයේ රෑ දැඩි විරෝධතාවක් පැවැත්විය.
=
ඒ, රට තුළ පවතින විදුලිය, ගෑස් , ඩීසල් ඇතුළු ගැටලුවලට විසදුම් ඉල්ලමින් ය.

හෙට (01) පැය 12ක විදුලිය කප්පාදුවක් සිදු කිරීමට ලංකා විදුලිබල මණ්ඩලයට අවසර ලබා දුන් බව මහජන උපයෝගීතා කොමිෂන් සභාව පවසයි.

ඒ අනුව, A,B,C,D,E,F කාණ්ඩවලට පෙ.ව 4.00 සිට පෙ.ව 6.00 අතර පැය 2ක්, පෙ.ව 8 සිට දහවල් 12 දක්වා පැය 4ක් සහ සවස 4 සිට රාත්‍රී 10 දක්වා පැය 6ක් විදුලිය කප්පාදු කෙරේ.

මේ අතර, G,H,I,J,K,L කාණ්ඩයට පෙ.ව. 6.00 සිට පෙ.ව 8.00 දක්වා පැය 2ක්, දහවල් 12 සිට ප.ව 4 දක්වා පැය 4 ක් සහ සවස 6 සිට රාත්‍රී 12 දක්වා පැය 6ක් විදුලිය කප්පාදු කෙරෙනු ඇති.

P,Q,R,S කාණ්ඩවලට පෙ.ව 4 සිට පෙ.ව 6 අතර පැය 2ක්, පෙ.ව 8 සිට දහවල් 12 දක්වා පැය 4ක් සහ සවස 4 සිට රාත්‍රී 10 දක්වා පැය 6ක් විදුලිය කප්පාදු කෙරේ.හෙට (01) පැය 12ක විදුලිය කප්පාදුවක් සිදු කිරීමට ලංකා විදුලිබල මණ්ඩලයට අවසර ලබා දුන් බව මහජන උපයෝගීතා කොමිෂන් සභාව පවසයි.
ඒ අනුව, A,B,C,D,E,F කාණ්ඩවලට පෙ.ව 4.00 සිට පෙ.ව 6.00 අතර පැය 2ක්, පෙ.ව 8 සිට දහවල් 12 දක්වා පැය 4ක් සහ සවස 4 සිට රාත්‍රී 10 දක්වා පැය 6ක් විදුලිය කප්පාදු කෙරේ.

මේ අතර, G,H,I,J,K,L කාණ්ඩයට පෙ.ව. 6.00 සිට පෙ.ව 8.00 දක්වා පැය 2ක්, දහවල් 12 සිට ප.ව 4 දක්වා පැය 4 ක් සහ සවස 6 සිට රාත්‍රී 12 දක්වා පැය 6ක් විදුලිය කප්පාදු කෙරෙනු ඇති.

P,Q,R,S කාණ්ඩවලට පෙ.ව 4 සිට පෙ.ව 6 අතර පැය 2ක්, පෙ.ව 8 සිට දහවල් 12 දක්වා පැය 4ක් සහ සවස 4 සිට රාත්‍රී 10 දක්වා පැය 6ක් විදුලිය කප්පාදු කෙරේ.

අනිද්දා 02 දිනයේදී ඉන්දීය ණය ගිවිසුම හරහා ලැබෙන තවත් ඩීසල් නෞකාව පැමිණි පසු විදුලිය කප්පාදු කිරීමේ පැය ප්‍රමාණය අඩු කළ හැකි බව විදුලිබල අමාත්‍ය පවිත්‍රා වන්නිආරච්චි පවසා ඇත.

අද (31) ජනාධිපති මාධ්‍ය අංශයේ පැවති මාධ්‍ය හමුවකට එක්වෙමින් විදුලිබල අමාත්‍ය පවිත්‍රා වන්නිආරච්චි මේ බව සඳහන් කර ඇත.

මේ වන විට මෙරට ජල විදුලි නිෂ්පාදනය 20% දක්වා පහත වැටී ඇති බවත් අමාත්‍යවරිය පවසා ඇත.

එසේම සොබාදනවී LNG විදුලි බලාගාරයෙන් 2023 වසරේදී මෙගා වොට් 200 ක ප්‍රමාණයක් ජාතික පද්ධතියට එක් කර ගැනීමට බලාපොරොත්තු වන බවද අමාත්‍යවරිය සඳහන් කළාය.

අත්‍යවශ්‍ය සේවා සඳහා විදුලි කප්පාදුවෙන් නිදහස් කර ඇති ප්‍රදේශවල විදුලිය ලැබෙන රැහැන්වලට සම්බන්ධව ඇති නිවාස ඇතුළු අනෙකුත් ස්ථානවල විදුලිය, භූමියට ගොස් විසන්ධි කිරීමේ නව වැඩපිළිවෙළක්ද ආරම්භ කරන ලෙස අමාත්‍යවරිය බලධාරීන්ට උපදෙස් දී ඇති බවත් එහිදී සඳහන් විය.

සත්වෝද්‍යාන දෙපාර්තමේන්තුවේ අධ්‍යක්ෂක ජනරාල්වරිය ලෙස කටයුතු කළ ෂර්මිල් රාජපක්ෂ එම ධූරයෙන් ඉවත් කර ඇති බව වාර්තා වේ.

ඇයගෙන් පුරප්පාඩු වූ එම ධූරය සදහා තිලක් ප්‍රේමකාන්ත පත් කර තිබේ.

තිලක් ප්‍රේමකාන්ත , අතිරේක වනසංරක්ෂණ ජනරාල් වරයා ලෙස කටයුතු කර ඇති බවත් වාර්තා වෙයි.

අප්‍රේල් 03 වනදා සමාජ මාධ්‍ය ක්‍රියාකාරීන් ස්වාධීන ලෙස සූදානම් කර ඇති අසංවිධානාත්මක විරෝධතාවය ප්‍රවේසම් සහිතව සිදුකළ යුක්තක් බව අවධාරණය කරමින් ජවිපෙ නායක අනුර කුමාර දිසානායක සිය ෆේස්බුක් පිටුවේ සටහනක් තබා ඇත.

එය පහත දැක්වෙයි.

රට පත්ව ඇත්තේ දරුණු අර්බුදකාරී තත්වයකට බව අපි දනිමු. හැම මොහොතකම සමාජය වඩ වඩාත් අර්බුදය දෙසට ගමන් කරමින් ඇති අතර සමාජයේ සෑම ජන ස්ථරයක්ම ඒ හේතුවෙන් පීඩාවට පත් වී ඇත. එවැනි මොහොතක සවිඥානිකව හා සංවිධානාත්මකව දේශපාලන පක්ෂ, සිවිල් සංවිධාන ආදී කොටස් මෙම ජන පීඩනයට එරෙහිව සිය විරෝධය දක්වමින් සිටියි.

සංවිධානගත ව්‍යාපාරවලට මෙන්ම සාමාන්‍ය ජනතාවටත් මෙම අර්බුදයට එරෙහිව විරෝධය පෑමට අයිතියක් ඇති අතර එසේ විරෝධය පළ කළ යුතුවද තිබේ. එහෙත්, වගකිවයුත්තෙක් නොමැති, සංවිධානය කරන්නෙක් නොමැති අසංවිධානාත්මක විරෝධය පෑම්වලට එක්වන පිරිස්වලින් අවධානයෙන් සිටින ලෙස සහ පරෙස්සම් සහගත වන ලෙස අපි ඉල්ලා සිටිමු. මන්ද එවැනි වගකීමක් නොමැති අවංක මහජන විරෝධයන් පිටුපස පවා අනතුරක් තිබිය හැකි බැවිනි.

එසේම ස්වයංව පැන නඟින ඕනෑම ආකාරයක මහජන විරෝධයන්හි අයිතිය ලාබ ලෙස ලබාගැනීම වෙනුවෙන් රබර් මුද්‍රා තැබීමට ක්‍රියා නොකරන බවද අවධාරණය කරමු.
ජනතා විමුක්ති පෙරමුණ
2022 මාර්තු 31

වර්තමාන රජය කෙරෙහි දෙස් විදෙස් සියළු පාර්ශවයන්හි විශ්වාසය සම්පූර්ණයෙන්ම බිඳවැටී ති⁣බෙන නිසා වෙළෙඳපොළවල් හිරවී අගුලු වැටී තිබෙන බවත් මේ ආකාරයෙන් මේ ආණ්ඩුවට තවදුරටත් ඉදිරියට යා නොහැකි බවත් සමගි ජන බලවේගයේ පාර්ලිමේන්තු මන්ත්‍රී ආචාර්ය හර්ෂ ද සිල්වා අවධාරණය කරයි.

 ඊයේ (30) කොළඹදී මාධ්‍ය අමතමින් ආචාර්ය හර්ෂ ද සිල්වා මන්ත්‍රීවරයා පැවසුවේ රට වර්තමාන අගාධයට ඇද දැමීමට ශ්‍රී ලංකා මහ බැංකුවේ මුදල් මණ්ඩලයද වගකිව යුතු බැවින් මුදල් මණ්ඩලය සම්පූර්ණයෙන් අළුතින් පත්කරන තුරු මෙම විශ්වාසය යළි ගොඩනැගිය නොහැකි බවයි.

 "මුදල් මණ්ඩලය පසුගිය කාලයේ ගනිපු සියළු තීරණ වැරදියි. මේ විනාශයට ඔවුන්ද වගකිව යුතුයි. විශ්වාස බිඳවැටුණු විට වෙළෙඳපොළවල් හිරවෙනවා. නවතිනවා. මූල්‍ය වෙළෙඳපොළේ විශ්වාසය නැතිව කිසිම දෙයක් වෙන්නෙ නෑ. මේ නිසා, මේ ආණ්ඩුවට තවදුරටත් මේ ආර්ථිකය ගෙනියන්න බෑ. මේක විශ්වාසයේ අර්බුදයක්."

 මේසා විනාශයක් වී තිබියදීත් තවමත් ජාත්‍යන්තර මූල්‍ය අරමුදලට යාමේ සැබෑ වුවමනාවක් නොපෙ⁣නෙන බවත් එවැනි වුවමනාවක් තිබේ නම් ඒ වෙනුවෙන් සකස්කළ ලිපිය පෙන්වන ලෙසත් මෙහිදී මන්ත්‍රීවරයා අභියෝග කළේය.

 එසේම, ණය ප්‍රතිව්‍යුහගත කිරීමට අවශ්‍ය වැඩපිළිවෙළ වහාම සකස් කරන ලෙසත් එයින් ගසා නොකන ලෙසත් මෙහිදී ආචාර්ය හර්ෂ ද සිල්වා මහතා පැවසීය. තවදුරටත් අදහස් දැක්වූ මන්ත්‍රීවරයා සඳහන් කළේ ප්‍රතිපත්ති පොලී අනුපාත වැඩි නොකර මෙම ගැටලු වලට පිළිතුරු සෙවිය නොහැකි බවත් කිසිවෙකුත් සෘණ පොලියක් ලබාගැනීමට කැමති නොවන බවයි.

මනුෂ්‍ය ඝාතන චෝදනාවක් සම්බන්දයෙන් මහාධිකරණය මගින් මරණීය දණ්ඩනය නියම කර සිටි පොදුජන පෙරමුණේ පාර්ලිමේන්තු මන්ත්‍රී ප්‍රේමලාල් ජයසේකර සහ සෙසු තිදෙනා නිදොස් කොට නිදහස් කර ඇත.

මහාධිකරණ තීන්දුවට එරෙහිව ඔවුන් විසින් ගොනු කර තිබූ අභියාචනය සලකා බලමින් අද (31) අභියාචනාධිකරණය මෙම තීන්දුව ප‍්‍රකාශයට පත්කර ඇත.

2015 ජනාධිපතිවරණ කාල සීමාවේදී කහවත්තේ පැවති ප්‍රචාරක රැලියක් අතරතුර වෙඩිතබා ඝාතනය කලේ යයි මෙම පිරිසට මරණීය දණ්ඩනය නියම කර තිබිණ.

මාර්තු 31 එනම් හෙට දිනයේ පැය 13ක විදුලි කප්පාදුවක් සිදු කිරීමට නියමිත බව වාර්තා වෙයි.

මහජන උපයෝගිතා කොමිසම විසින් ඒ සඳහා අවසර ලබා දී තිබේ.

රට පුරා මෙම කප්පාදුව සිදු කරන්නේ අලුයම 3 සිට මධ්‍යම රාත්‍රි 12 දක්වා කාලය තුළ පැය 4 සිට උපරිම පැය 6 දක්වා කාලසීමාවකට යටත්ව අවස්ථා කිහිපයකදීය.

ABCDEF කලාප -

 අලුයම 3 සිට අලුයම 6 දක්වා කාලය තුළදී පැය තුනක්
මධ්‍යහන 12 සිට පස්වරු 4 දක්වා පැය 4ක්
පස්වරු 6 සිට මධ්‍යම රාත්‍රී 12 දක්වා පැය 6ක්

GHIJKL කලාප -

 මධ්‍යම රාත්‍රී 12 සිට අලුයම 3 දක්වා පැය 3 ක්
උදෑසන 8සිට මධ්‍යහන 12 දක්වා පැය 4ක්
පස්වරු 4 සිට රාත්‍රී 10 දක්වා පැය 6ක්

 PQRS කලාප -

 අලුයම 3 සිට අලුයම 6 දක්වා කාලය තුළදී පැය 3ක්
මධ්‍යහන 12 සිට පස්වරු 4 දක්වා පැය 4ක්
පස්වරු 6 සිට මධ්‍යම රාත්‍රී 12 දක්වා පැය 6ක්

TUVW කලාප -

මධ්‍යම රාත්‍රී 12 සිට අලුයම 3 දක්වා පැය 3 ක්
උදෑසන 8 සිට මධ්‍යහන 12 දක්වා පැය 4ක්
පස්වරු 4 සිට රාත්‍රී 10 දක්වා පැය 6ක්

MNOXYZ යන කලාප -

 අලුයම 5.30 සිට උදෑසන 9 දක්වා පැය 3යි මිනිත්තු 30ක්
පස්වරු 4 සිට 6 දක්වා කාලය තුළදී පැය 2ක්

යල කන්නයේ වගාව සඳහා ගොවීන්ට අවශ්‍ය යූරියා ඇතුළු රසායනික පොහොර හිඟයකින් තොරව සාධාරණ මිලකට ලබා දෙන්නැයි ආණ්ඩු පක්ෂයේ සහකාර සංවිධායක, පාර්ලිමේන්තු මන්ත්‍රී ප්‍රමිත බණ්ඩාර තෙන්නකෝන් කෘෂිකර්මය ඇමති මහින්දානන්ද අලුත්ගමගේ ගෙන් ලිඛිත ඉල්ලීමක් කර ඇත .

අදාළ ලිපියේ මන්ත්‍රීවරයා සඳහන් කර ඇත්තේ , සක්‍රීය ගොවි ජනතාවක් වෙසෙන දඹුල්ලේ ජනතා නියෝජිතයකු වශයෙන් තමා මෙම ඉල්ලීම වගකීමෙන් කරන බවය.

තමා පොහොර ගැටලුව කෘෂිකර්ම කාරක සභාවේ දී මෙන්ම අවස්ථා ගණනාවකදීම ද ඉදිරිපත් කර ඇතැයි ද , මෙම ඉල්ලීම සම්බන්ධයෙන් සාධනීය පිළිතුරක් ලැබෙනු ඇතැයි අපේක්ෂා කරන්නේ යැයි ද එහි සඳහන් කර ඇත.

බැසිල්ගේ ගෝලයාගෙන් ගෝඨාභය ගේ ගෝලයාට !

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ අදාළ ලිපිය බැසිල් රාජපක්ෂ ගේ ගෝලයන් වෙතින් ගෝඨාභය රාජපක්ෂ ජනාධිපති ගේ ගෝල අමාත්‍යවරයා වෙත යවනු ලැබුවක් බවයි.

ප්‍රමිත බණ්ඩාර තෙන්නකෝන් මන්ත්‍රීවරයා විසින් මහින්දානන්ද අමාත්‍යවරයා වෙත යොමුකළ ලිපිය පහත දැක්වෙයි.

පැය 10ක විදුලි කප්පාදුවක් අද (30) සිට ක්‍රියාත්මක තත්ත්වයක් පෙන්නුම් කරන නමුත් , ඊට ආවරණය නොවන ස්ථාන අතරට ජනාධිපති මන්දිරය, පාර්ලිමේන්තුව සහ මාදිවෙල පිහිටි මන්ත්‍රී නිවාස සංකීර්ණය ද ඇතුළත් වී තිබේ.

එම ස්ථාන ඇතුළුව දිවයිනේ විදුලිය විසන්ධි නොවන ප්‍රදේශ 191ක් මේ වන විට ප්‍රසිද්ධ කර ඇත.

මහජන උපයෝගිතා කොමිෂන් සභාව විසින් නිකුත් කරන ලද විදුලි කප්පාදුව නිදහස් කරන ප්‍රදේශ ලැයිස්තුවේ මේ බව සඳහන් වෙයි.

මේ අතර වැඩිදුරටත් වාර්තා වන්නේ අද සිට විදුලි බිල්පත් නොගෙවන ජනජනතාවට විදුලි විසන්ධිය ආරම්භ කර ඇති බවය.

කෙසේවෙතත් රුපියල් කෝටියකට අධික විදුලි බිල් පවා ගෙවීම් පැහැර හැර ඇති ඇමතිවරු, ලක්ෂ ගණනින් විදුලි බිල් නොගෙවූ මන්ත්‍රීවරු පිළිබඳ පසුගිය දිනවල විටින් විට වාර්තා විය.

හෙට දිනයේදී විදුලි කප්පාදුව නොකරන ස්ථාන ලැයිස්තුව පහත දැක්වේ.

ඉන්ධන පිරවුම්හල්වලට ඉන්ධන බෙදා හැරීම පිළිබඳ ගැටලු ඇත්නම් ඒ පිළිබඳ තමා දැනුවත් කරන ලෙස බලශක්ති අමාත්‍ය ගාමිණී ලොකුගේ පවසයි.

ඒ පිළිබඳ තමා ව පෞද්ගලිකව දැනුවත් කරන ලෙස කියමින් අමාත්‍යවරයා තම දුරකථන අංකය ද මාධ්‍යයට ඉදිරිපත් කර ඇත.

ලබන සතිය වන විට තෙල් ප්‍රශ්නයට විසදුම් ලැබෙන බවත් අමාත්‍යවරයා වැඩි දුරටත් කියා සිටියේය.

ඒ අනුව බලශක්ති අමාත්‍ය ගාමිණී ලොකුගේ ගේ දුරකථන අංකය පහත දැක්වෙයි.

මෙම අංකය ඇතුළත් පුවත මෙරට ප්‍රධාන ධාරාවේ පුවත්පතක් මෙන්ම දැඩි ආණ්ඩුව හිතවාදී මාධ්‍ය ජාලයක් වන දෙරණ හී උදෑසන පත්තර වැඩසටහන හරහා ද ප්‍රසිද්ධ කර ඇත.

☎️077-7414241