පුවත්

"මේ රට බේරගන්න ඉදිරිපත්වෙන්න අපි සූදානම්. හැබැයි, ඒකට අවංක උත්සාහයක් ඕන."යනුවෙන් පාර්ලිමේන්තු මන්ත්‍රී ආචාර්ය හර්ෂ ද සිල්වා පවසයි.

පසුගියදා පාර්ලිමේන්තු විවාදයට එක්වෙමින් මන්ත්‍රීවරයා මේ බව සඳහන් කර ඇත්තේ ජනාධිපති වගකීම අරගෙන අර්බුදය විසඳීමට වැඩ කරන්න කවුරුත් සූදානම් නැත්නම් ජනාධිපති ධූරය ට හර්ෂ මන්ත්‍රීවරයා පත්කර ගනිමු කියා, පාර්ලිමේන්තු මන්ත්‍රී හරීන් ප්‍රනාන්දු පාර්ලිමේන්තු විවාදයේදී සිදුකළ යෝජනාවට පසුවය.

මෙහිදී හර්ෂ ද සිල්වා මන්ත්‍රීවරයා මෙසේද පවසයි.

"මේ රට මෙතනට වැටෙනවා කියල මම අවුරුදු ගණනක ඉඳල කිව්වා. කිව්ව දේ හරි ගියා කියල මට සතුටක් නෑ. උගුර ලේ රහ වෙනකං කෑගහලත් අපි කිව්වදේ ඇහුවෙ නැති එක ගැනත් අද රටට අත්වෙලා තියන ඉරණම ගැනත් මම හදවතින්ම දුක් වෙනවා. මම හැමදාම කිව්ව වගේ මේ අර්බුදයෙන් අපි හැමෝම නැත්තටම නැති වෙනවා.

ඒකට පක්ෂ පාට භේදයක් නෑ. මේ රට බේරගන්න ඉදිරිපත් වෙන්න අපි සූදානම්. හැබැයි, ඒකට හැමෝගෙම අවංක උත්සාහයක් තියෙන්න ඕන. එවැනි අවංක උත්සාහයක් නොමැතිව මේ අභියෝගය ජයගන්න බෑ. මේ අවස්ථාවේ අවශ්‍ය පුද්ගලයින් පිම්බීම නෙවෙයි. සුපර් මෑන් කෙනෙකුට මේ අභියෝගය ජයගන්න බෑ.

අපි සියළුදෙනාටම අවංකව එකතුවීමෙන් පමණයි මේ අභියෝගය ජයගන්න පුළුවන්."

හර්ෂ ද සිල්වා මන්ත්‍රීවරයා ගේ අදහස් දැක්වීම ඇතුළත් වීඩියෝව පහත දැක්වෙයි.

තරුණ ජනතා අරගලය ඇතුළත් පොදුජනතාව පිළිකුලෙන් ප්‍රතිකේෂ්ප කර ඇති පිරිසටම යළිත් අමාත්‍ය ධූර ලබාදුන්නොත් ආණ්ඩුවේ තවත් මන්ත්‍රී කණ්ඩායමක් ස්වාධීන වීමේ සූදානමක් ඇති බව දේශපාලන ආරංචි මාර්ග පවසයි.

වාර්තා වන ආකාරයට ඩලස් අලහප්පෙරුම ඇතුළු ප්‍රබලයන් ගෙන් සැදුම්ලත් මේ මන්ත්‍රී කණ්ඩායම අවධානය යොමුකර ඇත්තේ ජනාධිපති ගෝඨාභය රාජපක්ෂ විසින් හෙට (11) පත්කිරීමට නියමිත කැබිනට් මණ්ඩලය කෙරෙහි ය.

ඒ අනුව එවැනි යමක් සිදුවුවහොත් ඒ, ආණ්ඩුවේ ස්වාධීන වන දෙවැනි මන්ත්‍රී කණ්ඩායම වෙයි.

ඒ සමග වත්මන් ආණ්ඩුවේ සරල බහුතරයද බරපතළ අවධානමක ඇති බවත් එම ආරංචි මාර්ග පවසයි.

තවද මේ වන විට පොදුජන පෙරමුණ හැර ආණ්ඩුවේ සෙසු පක්ෂ සහ ස්වාධීන වූ මන්ත්‍රී කණ්ඩායම විසින් අගමැති ධූරයෙන් මහින්ද රාජපක්ෂ ඉවත් කිරීමට යෝජනා කර තිබේ. ඊට අදාළ යෝජනා 11ක් ඇතුළත් ලිපියක් ජනාධිපති ගෝඨාභය රාජපක්ෂ වෙත යොමුකරන්න ද ඔවුන් කටයුතු කර ඇත.

පාකිස්තාන අගමැති ඉම්රාන් ඛාන්ට සිය ධුරය අහිමිවී තිබේ.

ඒ ඔහුට එරෙහිව පැවති විශ්වාසභංග යෝජනාව සම්බන්ධයෙන් පැවති පාර්ලිමේන්තු ඡන්ද විමසීමේදී ඔහු පරාජය වීම හේතුවෙනි.

පාකිස්තාන දේශපාලන ඉතිහාසයේ අගමැතිවරයකුට එරෙහිව ඉදිරිපත් වූ විශ්වාසභංග යෝජනාවක් සම්මත වූ පළමු අවස්ථාව ලෙසද මෙය සැලකේ.

විශ්වාසභංගයෙන් පරාජය වීමත් සමඟ පාකිස්තාන අග්‍රාමාත්‍ය ඉම්රාන් ඛාන් එම ධුරයෙන් නෙරපා දැමුණි.

විපක්ෂ සන්ධානය එක් වී ඉම්රාන්ට එරෙහිව විශ්වාසභංග යෝජනාවක් ගෙනැවිත් තිබුණේ රටේ පවතින ආර්ථික අර්බුදය උග්‍ර කිරීමට ඉම්රාන්ගේ ආර්ථික ප්‍රතිපත්ති හේතු වූ බවත් එම අර්බුදයට ඔහු වගකිවයුතු බවත් චෝදනා නගමිනි.

විවිධ බාධක සහ ප්‍රමාදවීම්වලින් පසු විශ්වාසභංගයට අදාල ඡන්ද විමසුම මධ්‍යම රාත්‍රියෙන් පසු පැවැත්වුණු අතර, එයින් පාර්ලිමේන්තුවේ බහුතරයද අහිමි වී සිටි ඉම්රාන් එයින් පරාජයට පත් විය.

ඉම්රාන් ඛාන් විශ්වාසභංගයෙන් පරාජය වූ බව සහ ඔහුට ධුරය අහිමි වන බව ශ්‍රේෂ්ඨාධිකරණය විසින්ද තහවුරු කරනු ලැබ තිබේ.

තමා ධුරයෙන් නෙරපා දැමීමට විපක්ෂ සන්ධානය කුමන්ත්‍රණය කළේ ඇමෙරිකාව සමග හවුලේ බව ඉම්රාන් තරයේ පවසයි. කෙසේ නමුත් ඒ බව ඔප්පු කිරීමට ඔහු කිසිදු ප්‍රබල සාක්ෂියක් ඉදිරිපත් කර නැත.

පාකිස්තාන අග්‍රාමාත්‍යවරයකුට සිය ධුර කාලය සම්පූර්ණ කිරීමට කිසිදු අවස්ථාවක ඉඩ ලැබී නැත. ඒ අවස්ථා ගණනාවකදී එරට ප්‍රබල හමුදාව බලය අත්පත් කර ගත් බැවිනි.

පාකිස්තාන පාර්ලිමේන්තුව හෙවත් ජාතික සභාව නව අගමැතිවරයෙකු පත් කර ගැනීමට නියමිත බව එරට මාධ්‍ය වාර්තා පෙන්වා දෙයි.

ශ්‍රී ලංකා ක්‍රිකට් කණ්ඩායමේ නව ප්‍රධාන පුහුණුකරු ලෙස එංගලන්ත හිටපු ප්‍රධාන පුහුණුකරු ක්‍රිස් සිල්වර්වුඩ් පත් කර තිබේ.

වසර දෙකක කාලයක් සඳහා ඔහු එම ධූරයෙහි කටයුතු කරන බව නිවේදනයක් නිකුත් කරමින් ශ්‍රී ලංකා ක්‍රිකට් ආයතනය සදහන් කළේය.

නව ප්‍රධාන පුහුණුකරු ක්‍රිස් සිල්වර්වුඩ්ගේ පුහුණුකාරීත්වය යටතේ ශ්‍රී ලංකා කණ්ඩායම සහභාගී වන පළමු තරගාවලිය බවට බංග්ලාදේශ ටෙස්ට් තරග සංචාරය පත්වනු ඇත.

ක්‍රිස් සිල්වර්වුඩ් එංගලන්තය වෙනුවෙන් ටෙස්ට් තරග 6 කට සහ එක්දින ජාත්‍යන්තර තරග 7 කට ක්‍රීඩා කර ඇත.

ජනාධිපතිවරයාට සහ රජයට ඉල්ලා අස්වන ලෙස බලකරමින් මේ වන විට දහස් සංඛ්‍යාත ජනතාවක් කොළඹ ගාලු මුවදොර ෂැන්ග්‍රිලා හෝටලය ඉදිරිපිට මාර්ගයේ විරෝධතාවයේ නිරත වෙමින් සිටී.

කොළඹ ගාලුමුවදොර පිටිය අසල මාර්ගය දෙපස අද (09) උදෑසන සිට එලෙස ජනතාව රැස්වී විරෝධතාවයේ නිරත වන අතර මෙම විරෝධතාවය නම්කර ඇත්තේ, නිර්පාක්ෂික ජනතා අරගලය යනුවෙනි.

විශ්වවිද්‍යාල සිසුන්,  විවිධ වෘත්තීන්ට අයත් පිරිස් මේවනවිට උද්ඝෝෂණයට එක්ව සිටින බවත් ලංකා ගුරු සංගමයේ ප්‍රධාන ලේකම් ජෝශප් ස්ටාලින් මහතා ඇතුළු පිරිසක් ද මේ වන විට විරෝධතාවයට එක්ක සිටින බවද වාර්තා වේ.

ඊට තරුණ තරුණියන් ඇතුළු විවිධ ක්ෂේත්‍ර නියෝජනය කරන පිරිස් එක් සිටී.

මෙහිදී විරෝධතාකරුවන්ට සහාය පළ කරමින් ඒ අසලින් මාර්ගයේ ගමන් ගත් රථවාහනවලින් ද නලා නාද කර සහාය පළ කිරීම විශේෂත්වයකි.

ඖෂධ මිල සියයට 20 කින් ඉහළ දැමීමට ජාතික ඖෂධ නියාමන අධිකාරියේ අවසරය හිමි වී ඇති බව වාර්තා වෙයි.

එහිදී මීට පෙර මිල වැඩි කෙරුණු ඖෂධ හැර අනෙකුත් ඖෂධ සඳහා මෙම මිල වැඩි කිරීම අදාළ වන බව ඖෂධ නියාමන අධිකාරිය සඳහන් කර සිටියි.

මේ අතර පසුගියදා රජයේ රෝහල් කාර්‍ය මණ්ඩල උද්ඝෝෂණය කරමින් පාලකයන්ට බලකර සිටියේ රෝහල් ආශ්‍රිත ඖෂධ හිඟයක් ඇතිවෙමින් තිබෙන බවත් එහෙයින් ඊට කඩිනම් විසඳුම් යොදන ලෙසය.

මුදල් අමාත්‍ය අලිසබ්‍රි විසින් ඖෂධ වෙනුවෙන් මුදල් නිකුත්කළ බවටත් රජය නිවේදනය කරනු ලැබිණ.

තමාට මහ බැංකු අධිපති ලෙස කටයුතු කිරීමට කැබිනට් බලතල අවශ්‍ය නැති බවත් අවශ්‍ය තීන්දු තීරණ ගෙන කටයුතු කිරීමට අවශ්‍ය බලතල මහ බැංකු අධිපති ට පවතින බවත් ශ්‍රී ලංකා මහ බැංකුවේ නව අධිපති ආචාර්ය නන්දලාල් වීරසිංහ පැවසීය.

රටේ ආර්ථිකය එක රැයකින් උඩට ගත නොහැකි බවත් ඒ සඳහා කාලයක් අවශ්‍ය බවත් ඔහු පැවසූ අතර ඒ මහ බැංකු අධිපති ලෙස වැඩ භාරගෙන මාධ්‍ය ඇමතූ අවස්ථාවේ ය.

'ශ්‍රී ලංකාවේ ආර්ථිකය පල්ලමට කඩාගෙන යන වාහනයක් වගෙයි.මුලින්ම කරන්න ඕන මොනම හරි ක්‍රමයක් දාලා පල්ලෙහාට යන එක නතර කරගන්න එකයි.ඊට පස්සේ පුළුවන් ඒක උඩට ගන්න " යැයි මහ බැංකු අධිපතිවරයා කීවේය.

මේ සියලු දේ කිරීමට රටේ දේශපාලන සහ සමාජ ස්ථාවරතාවය පැවතිය යුතු බව පැවසූ වීරසිංහ මහතා අස්ථාවර රටකට ණය හෝ වෙනත් ආධාර ලබාදීමට කිසිදු රටක් ඉදිරිපත් නොවන බවද සඳහන් කළේය.

රටේ ආර්ථිකය ඉහළ නැංවීමට දැනටමත් පියවර රැසක් ගෙන ඇතැයිද ඔහු පැවසුවේය.

පවතින දැඩි ආර්ථික සහ දේශපාලන අර්බුදය හමුවේ ජනාධිපතිවරයා ඉවත් වන්නේත් නැතිනම් ආණ්ඩුව ඉල්ලා අස්වන්නේ ද නැතිනම් මූල්‍ය කටයුතු පිළිබඳව සම්පූර්ණ බලය පාර්ලිමේන්තුව විසින් අත්පත් කරගනු ලැබිය යුතු බවත්, ඒ අනුව පාර්ලිමේන්තුව රටේ ආර්ථික අර්බුදය විසඳීමේ පූර්ණ වගකීම අත්පත් කර ගත යුතු බවත් එක්සත් ජාතික පක්ෂ නායක හිටපු අගමැති රනිල් වික්‍රමසිංහ අද (08) පාර්ලිමේන්තුවේ දී පැවසීය.

 ඔහු මේ සඳහා අනුගමනය කළ යුතු පියවර කිහිපයක් පිළිබඳව සභාවේදී යෝජනාවක් කළේ අද පැවැත්වෙන ජාත්‍යන්තර මූල්‍ය අරමුදල ශ්‍රි ලංකාව සම්බන්ධයෙන් නිකුත් කරන ලද වාර්තාව පිළිබඳව කල්තැබීමේ විවාදයේදීය.

අපේ අලුත් අවුරුදු ලිතේ නොනගත දෙකයි එකක් ආර්ථික නොනගතය. අනෙක දේශපාලන නොනගතය. මේ ලිතේ පුණ්‍ය කාලයක් නෑ. මේසේ තියෙන කැවුමටත් රුපියල් 75ක් ගෙවන්න තියනවා. උද්ධමනය සියයට 30ක්. සියයට 40ක් වෙයිද දන්නේ නෑ. මේ අවුරුදු කාලේ තුන් වේලක් කන්න බැරි වෙනවා. දේශපාලන නොනගතය මෙහෙමයි.

මේ උද්ඝෝෂණවල පළමුවෙන්ම තිබෙන්නේ ජනාධිපති ඉවන් වෙන්න කියල. ඒත් ජනාධිපති ප්‍රකාශ කළා, ඉවත් වෙන්නේ නෑ කියල. මෙතන ජනාධිපතිගේ තීරණය එකක්. අපෙ පාර්ලිමේන්තුවේ තීරණය වෙන එකක් වෙන්න පුළුවන්.

1- ජනපති අස්නොවෙයි නම් කරන දේ ගැන ජනතාවට කියන්න

උද්ඝෝෂණ වැඩි වුණොත් ජනාධිතිතුමා ජනතාවට කියන්න ඕන මොකක්ද තමන් ඊළඟට කරන්නේ කියල. ජනතාව සෑහීමකට පත් වුණොත් ප්‍රශ්නේ ඉවරයි. ඉස්සරලා කැබිනට් මණ්ඩලයක් පත් කරන්න. මේ කැබිනට් මණ්ඩලය පාර්ලිමේන්තුවේ විශ්වාසය දිනා ගන්න ඕන ඉස්සරලාම. මොකද එතනින් තමයි වැඩ කරන්න පුළුවන්. විශ්වාසය නැතිනම් ඊළග පියවරකට යමු ඉක්මනින්.

 2- හමුදාව සිවිල් කටයුතුවලට කැඳවන්න එපා !

තවත් කරුණක් මේ වෙලාවේ ජනතාව පාලනයට හමුදාව යොදවන්න එපා. අපේ සිවිල් බලය තවම රටේ තිබෙනවා එය බිද වැටී නෑ. එසේ නම් එතැනට හමුදාව ගෙන්වීම සුදුසු නෑ. හමුදාව කැඳවිය යුත්තේ සිවිල් බලය කැඩුණොත්. එහෙම වෙලා නෑ. මම දන්න හමුදාව නම් ව්‍යස්ථාවට විරද්ධව යන්නේ‍ නෑ. අපි ඒක දින 52 කාලයේදී දුටුවා.

 3- මුදල් බලය සම්පූර්ණයෙන් පාර්ලිමේන්තුවට ගනිමු.

ආර්ථිකය නෙනාගතය ගැන කතා කළොත් අද ආර්ථිකය ඉවරයි. මේ රටේ මුදල් පාලනයේ බලය පාර්ලිමේන්තුවට පවරා ගත යුතුයි.

විශේෂයෙන්ම ව්‍යවසථාවේ 148 යටතේ මුදල් පාලනය කරන්නේ අපි. මූලික වශයෙන් මේ වගකීම් යන්නේ කැබිනට් මණ්ඩලයට. ඔවුන්ට ඒක ප්‍රශ්නයක් නම් බලතල සභාවට ගන්න ඕන. ඒක අපිට කරන්න පුළුවන්.

148 යටතේ පාර්ලිමේන්තුවට පුළුවන් මේ රටේ මුදල් පාලනය කරන යෝජනා ගේන්න. විශේෂයෙන්ම අපට තියෙන්නේ මහජන මුදල් නීති හදල ඒක කැඩුවොත් ඒව ක්‍රියාත්මක කරන්න.

අද පවතින පුශ්නය ඇති වුණෙත් නිලධාරීන් දෙතුන් දෙනෙක් නිසානේ. මේ පාර්ලිමේන්තුවේ යෝජනාවකින් අපට මේ කටයුතු සම්බන්ධයෙන් ක්‍රියාකරන රාමුව සකස් කරන්න.

 4- පාර්ලිමේන්තුවෙන් දඬුවම් ලැබිය යුතු නිලධාරීන් කවුද?

 පාර්ලිමේන්තුවට මේ සම්බන්ධයෙන් ගත යුතු පියවර දෙකක් තිබෙනවා. එකක් මේ ප්‍රශ්න ඇතිවුණේ කොහාමද කියල බලන්ත තේරීම් කාරක සභාවක් පත් කිරීම. කවුද ඩොලරය පා කිරීමේ තීරණය මේ වෙලාවේ ගත්තේ. එය ඇත්තටම පා කිරීමක් නෙවෙයි අවප්‍රමාණය කිරීමක්. රුපියල ඩොලරට සාපේක්ෂව සියයට 50ක් විර අවප්‍රමාණය වෙලා. සාමාන්‍යෙයන් එය සියයට 5කට වඩා වෙනස් වෙනවා නම් කැබිනට් අනුමැතිය ගත යුතුයි. එහෙම අනුමැතියක් ගත්තද?

 ජාත්‍යන්තර මූල්‍ය අරමුදල කිව්වේ කාලයක් අරගෙන කරන්න කියල. මේ තීරණය ගැන මූල්‍ය මණ්ඩලය දන්නෙත් නෑ. මේ තීරණය ගැන මුදල් කාරක සබාවට කිව්වද ? ඔවුන්ට කියලත් නෑ. කවුද මේකට වගකියන්නේ? ? . මේ පියවරෙන් ආර්ථිකය නැතිම වුණා. මෙම තීරණ ගත්ත නිලධාරීන්ට පාර්ලිමේන්තුවෙන් දඬුවම් කරන්න ඕන.

 5- IMF යන්න එපා කියල කිව්වේ කවුද කියල හොයන්න

අයි.එම්. එෆ් එකට නොයන්න කියල කවුද තීරණය කළේ ? මේ සම්බන්ධ ගත් තීරණ පිළිබඳව සොයන්න තේරීම් කාරක සභාවක් පත් කළ යුතුයි. අපි මේව හෙයාන්න ඕන.

2021, 2022 වසරවල ලංකා බැංකුවෙන් මහජන බැංකුවෙන් ජාතික ඉකිරි කිරීමේ බැංකුවෙන් ආදායම් පෙන්වන්න රුපියල් ට්‍රිලියනයක් විතර අරන්. බංකොලොත් සමාගම් කරනවා වගේ. අද මොකක්ද වෙලා තියෙන්නේ අද ආර්ථිකය රිම් එකේ. තව මාසයක් විතර යනකොට රිම් එකෙන් යන්නත් බැරිවෙයි.

 6- ඉන්දියාවෙන් දුන්න මුදල් ඉවර වුණාම රට දුවන හැටි

 ඉන්දියාවෙන් එන එන මුදල් නැති වුණාම අපිට අමාරු වෙනවා. දැනට පවතින ඉන්දන හිගය නැති කරන්න නම් එකවර නැව් හතරක් ගන්න ඕන. ඉන්දියාව ලබා දුන්නු ඩොලර් මිලියන 500න් මිලියන 250ක් විතර දැනටත් ඉවරයි. තව අපිට තිනෙවා ජූලි මාසය ඩොලර් බිලියනයක් ආපසු ණය ගෙවන්න මැයි මාසෙන් පසුව ගෙවන්න මුදල් නෑ.

පුද්ගලික අංශයටත් වහන්න වෙනවා මුදල් සහ අමුද්‍රව්‍ය නැතිව. මේ නිසා කඩිනමින් මුදල් වගකීම පාර්ලිමේන්තුව භාර ගත යුතුයි. ජාත්‍යන්කර මූල්‍ය අරමුදල සමඟ සාකච්ඡා කළ යුතුයි. මේ සඳහා පත් කළ විශේෂඥයන් තුන් දෙනාට එම වගකීම පැවරිය යුතුයි. ඔවුන්ට මේ සම්බන්ධයෙන් අත්දැකීම් තිබෙනවා.

7. ශ්‍රි ලංකාව පාර්ශවයෙන් ජාත්‍යන්තර මූල්‍ය අරමුදල වෙත යවන කෙටුම්පත් වාර්තාව මාසයක් තුල දෙනන් කියන්න. අපට රට දුවන්න මුදල් නෑ. ලෝක බැංකුව එක්ක ආසියානු සංවර්ධන බැංකුව එක්ක අපි හොඳ හිතින් සාකච්ඡා කරන්න ඕන. මොකද අපි ජාත්‍යන්තර මූල්‍ය අරමුදලට යාමට අවශ්‍ය පියවර ගන්නා විට ඔවුන් තුළත් විශ්වාසයක් ගොඩ නැගේවි. ඔවුන් හරහා ඩොලර් මිලියන 500ක් 600ක් හොයා ගන්න අපට පුළුවන්.

 8- ආධාර සමුළුවක් ගැන යෝජනාවක්

අපිට පුළුවන් සමුළුවක් කැඳවල ඉන්දියාව, චීනය, ජපානය, දකුණු කොරියාව, යුරෝපා සංගමය වැනි අපට හිතවත් රටවලින් ආධාර ගන්න. ඒ සඳහා මුල පුරන ලෙස ලෝක බැංකුවෙන් ඉල්ලුවොත් ඔවුන් එය කරාවි. අපි ලෝක බැංකුව බැංකුවෙන් ඊට ඉල්ලිමක් කරමු.

9- ආහාර ඉල්ලාගෙන අසල්වැසි රටවලට යමු

ඊළඟට ප්‍රශ්නය ආහාර හිගය. කොහොමද අපි ආහාර හිගය නවත්වන්නේ? සාක් පාර්ලිමේන්තුවට ගිහින් ඉන්දියාව, පකිස්තානය, බංග්ලාදේශයෙන් ආහාර ඉල්ලන්න. එය පාර්ලිමේන්තු මන්ත්‍රීවරුන් ලෙස අපටත් කරන්න පුළුවන්. ඉන්දියාවේ චීනයේ ජනගහණය අපේ වගේ විශාල ගුණයක්. ඔවුන්ට මෙයට ආධාර කරන එක සුළු දෙයක්. ඔවුන් එය කරාවි.

 10- අනවශ්‍ය වියදම් කපා සහන දෙන අයවැයක්

රජය අලුත් සහන අයවැයක් ඉදිරිපත් කළ යුතුයි. අනවශ්‍ය සංවර්ධන වියදම් සියල්ල ඉවත් කළ යුතුයි. රාජ්‍ය මූල්‍ය කොමිටිය තව ශක්තිමත් කරන්න. ආදායම් වැඩි කිරීමේ වෙනම පාර්ලිමේන්තු කමිටුවක් දාන්න.

11- ණය කළමනාකරණයට වැඩසටහනක් අවශ්‍යයි

අපිට ණය කළමනාකරණය කිරීමේ වැඩසටහනක් ගේන්න.

 12- අලුත් මන්ත්‍රිවරුන්ට අවස්ථාවක් දෙන්න

මම කියන්නේ අධීක්ෂණ කොමිටි 20ක් පත් කරන්න. මන්ත්‍රිවරු ගණනාවක් අවස්ථාවක් ප්‍රශ්නයක් දෙන්න සභාපතිකම් බහුතරයක් ආණ්ඩුවට දෙන්න. පසුපස මන්ත්‍රිවරු ඇයි අවිශ්වාස කරන්නේ? අලුත් මන්ත්‍රීවරු 60ක් 70ක් ඉන්නවා. ඔවුන්ට කිසිදු වගකීමක් නෑ. දුක හිතෙනවා . ඔවුන්ට වගකීමක් දෙන්න.

(lankasara. com)

" අපට ඕන ගෝඨා - යුද්දේ දිනපු ගෝඨා" මැයෙන් උද්ඝෝෂණ පා ගමනක් අද (08) කොළඹ පැවැත්විණ.

එහි බැනරයේ සඳහන් කර තිබුණේ " ස්වයං රැකියා අයිතීන් සුරකිනු !" කියාය.

ඉතා සුළු පිරිසක් මේ උද්ඝෝෂණ පා ගමනේ සිටි අතර කොළඹ කොටුව ආසන්නයේ මාර්ග කිහිපයක ඇවිදීමෙන් පසු එය අවසන් විය.

සෙනඟ හිඟයක් !

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ ගෝඨාභය රාජපක්ෂ ජනාධිපති ට සහය දක්වන ප්‍රමාණය සීග්‍රයෙන් අඩුව ඇති බවයි.

මේ වන විට කිසිම වෘත්තීයවේදීන් හෝ මධ්‍යම පාංතික ප්‍රජාව ඖෂධයක් ලෙස හෝ එක්කර ගැනීමේ අර්බුදයක් ආණ්ඩුවට ඇති බවත් ඒ හේතුවෙන් ලුම්පන් පාංතික කොටස් ආණ්ඩුවේ ආරක්ෂාව වෙනුවෙන් කැඳවීමට සිදුව ඇති බවත් ඔවුන් පෙන්වා දෙයි.

තරුණ - ජනතා අරගලය #GoHomeGota2022 ලෙස පාර්ලිමේන්තුවෙන් පිටත ක්‍රියාත්මක පසුබිමේ පාර්ලිමේන්තුවේදී ස්වාධීන වූ මන්ත්‍රී කණ්ඩායම ජනාධිපති ධූරය වෙනුවට අගමැති ධූරය පමණක් වෙනස් කරන යෝජනා 11ක් ඇතුළත් යෝජනාවලියක් ජනාධිපති ගෝඨාභය රාජපක්ෂ වෙත බාරදී ඇත.

"සර්වපාක්ෂික අන්තර්කාලීන ආණ්ඩුවක් ස්ථාපිත කිරීම." යන ශීර්ෂයෙන් යුතු අදාළ යෝජනාවලිය වෙනුවෙන් පසුගිය 05වෙනිදා සිට පාර්ලිමේන්තුව ස්වාධින කණ්ඩායමක් ලෙස කටයුතු කරන මන්ත්‍රී කණ්ඩායම නියෝජනය කරමින් ශ්‍රී ලංකා නිදහස් පක්ෂයේ සභාපති - හිටපු ජනාධිපති මෛත්‍රීපාල සිරිසේන, පක්ෂ දහයේ එකතුව වෙනුවෙන් හිටපු අමාත්‍ය වාසුදේව නානායක්ක්කර, ශ්‍රී ලංකා පොදුජන පෙරමුණේ ස්වාධින මන්ත්‍රී කණ්ඩායම වෙනුවෙන් හිටපු අමාත්‍ය අනුර ප්‍රියදර්ශන යාපා සහ ශ්‍රී ලංකා පොදුජන පෙරමුණ වෙනුවෙන් හිටපු අමාත්‍ය විජේදාස රාජපක්ෂ ද ඊට අත්සන් කර ඇත.

අදාළ ලිපිය පහත පරිදි වේ.

 අතිගරු ජනාධිපතිතුමා
ජනාධිපති ලේකම් කාර්යාලය
කොළඹ 01

අතිගරු ජනාධිපතිතුමනි,

අතිගරු ජනාධිපතිතුමා
ජනාධිපති ලේකම් කාර්යාලය
කොළඹ 01

අතිගරු ජනාධිපතිතුමනි,

 සර්වපාක්ෂික අන්තර්කාලීන ආණ්ඩුවක් ස්ථාපිත කිරීම.

ශ්‍රී ලංකාව ඉතිහාසයේ නොවූ විරූ දැවැන්ත ආර්ථික අර්බුදයක සිර වී එය මේ වෙන විට දේශපාලන අර්බුදයක් බවට පෙරලෙමින් පවතියි. රට තුළ උද්ගත වී තිබෙන බරපතල අර්බුදකාරී තත්වය හමුවේ සියළු භේද පසෙකලා ජනතාව ඒකරාශී වෙමින් සිටිති.

එබැවින් පක්ෂ භේද පසෙක තබා පාර්ලිමේන්තුව නියෝජනය කරන සියළුම දේශපාලන පක්ෂ එකතු වී රට අරාජික සහ අස්ථාවර වීම වැලැක්වීමට මහජනතාවට පිළිගත හැකි විශ්වාසනීය වැඩපිළිවෙළක් ක්‍රියාත්මක කළ යුතු බව මෙම ලිපියට අත්සනක් තබන ආණ්ඩුව නියෝජනය කරමින් සිට ස්වාධීන වූ පාර්ලිමේන්තු මන්ත්‍රී කණ්ඩායම් වෙනුවෙන් අපි අවධාරණය කරමු.

ඒ සඳහා පහත සඳහන් පියවර වහාම ගත යුතු බව අපි යෝජනා කරමු. එකී පියවර මගින් මහජන අසහනය දුරු කර ජන ජීවිතය යථා තත්වයට පත් කර තමන් කැමති ආණ්ඩුවක් පත් කර ගැනීමේ අවස්ථාව ජනතාවට ලබා දීම සඳහා පරිසරය නිර්මාණය කළ යුතු බව අපි විශ්වාස කරමු. 

1). ආණ්ඩුවේ ප්‍රතිපත්තිමය තීරණ ගැනීම සඳහා පාර්ලිමේන්තුව නියෝජනය කරන දේශපාලන පක්ෂවල නායකයින්ගෙන් සමන්විත ජාතික විධායක සභාවක් පිහිටුවීම.

2). අන්තර්කාලීන ආණ්ඩුව පවත්වාගෙන යෑම සඳහා අවශ්‍ය තාර්කික පදනමක් මත සකස් වූ සීමිත අමාත්‍යංශ ගණනක් සහ ඒවායේ විෂය පඨය ජාතික විධායක සභාව විසින් තීරණය කිරීම.

3).ජාතික විධායක සභාවේ උපදෙස් මත ජනාධිපති විසින් නව අගමැතිවරයෙකු පත් කිරීම.

4. )ජාතික විධායක සභාවේ උපදෙස් මත ජනාධිපති විසින් සීමිත ඇමති මණ්ඩලයක් පත් කිරීම.

5). ජාතික විධායක සභාවේ උපදෙස් මත ජනාධිපති විසින් අමාත්‍යංශ ලේකම්වරු පත් කිරීම.

6. ඇමතිවරුන් වැටුප් නොලබා අනෙකුත් වරප්‍රසාද කප්පාදු කර කටයුතු කිරීම.

7. ජාතික විධායක සභාව විසින් සෑම අමාත්‍යංශයක් සඳහාම විශේෂඥයින්ගෙන් සමන්විත උපදේශක මණ්ඩලයක් පත් කිරීම.

8). ඖෂධ, අත්‍යාවශ්‍ය ආහාර, විදුලිය, ඛනිජතෙල්, ගෑස්, පොහොර හා අනෙක්තු කෘෂිකාර්මික යෙදුම් සහ කාර්මික යෙදවුම් ප්‍රමාණවත් ලෙස අඛණ්ඩව සැපයීම සහතික කිරීම.

9). පවතින ආර්ථික අර්බුදයට විසඳුම් සෙවීම සඳහා ජාතික විධායක සභාවේ නිර්දේශය මත ජනාධිපති විසින් ජාතික ආර්ථික සභාවක් පත් කිරීම.

10). විසිවන ආණ්ඩුක්‍රම ව්‍යවස්ථා සංශෝධනය ඉවත් කර සුදුසු සංශෝධන සහිතව 19 වන ආණ්ඩුක්‍රම ව්‍යවස්ථා සංශෝධනය යළි පැනවීම.

11). අධ්‍යාපනය, සෞඛ්‍ය, කෘෂිකර්මය, බලශක්ති වැනි විෂයන් සඳහා දශක ගණනාවක සිට රටට අවශ්‍යව තිබුණු ආණ්ඩු වෙනස් වීම සමඟ වෙනස් නොවන ජාතික ප්‍රතිපත්තීන් වෘත්තිකයින්ගේ සහ විද්වතුන්ගේ සහභාගිත්වයෙන් මාස හයක කාල සීමාව තුළ දී සකස් කිරීම.

අමෙරිකා එක්සත් ජනපදය තානාපති කාර්‍යාලය වෙත පෙත්සමක් බාර දීමට පාඨලී චම්පික රණවක මන්ත්‍රීවරයා ඇතුළු 43 සේනාංකය ඊයේ (07) කටයුතු කර ඇත.

 එම පෙත්සමෙන් ඉල්ලා ඇත්තේ ලෝක අවංකභාවය පිළිබඳ වාර්තාව (Global Financial Integrity Report) අනුව

2005 සිට 2013 දක්වා ලංකාවෙන් ඩොලර් බිලියන 19.9 ක් නීති විරෝධී ලෙස පිටතට ගොස් ඇති බවය.

 ඒ අනුව සෑම වසරකම ඩොලර් බිලියන 1.9 ක් ශ්‍රී ලංකාවෙන් පිටතට ඇදී ගොස් ඇති අතර, ඊට සම්පූර්ණයෙන්ම වගකිවයුත්තේ එවක පාලකයන් වූ මහින්ද රාජපක්ෂ ප්‍රමුඛ ආණ්ඩුව බවත්, රාජපක්ෂවරුන්ගේ පවුල්, ඥාතීන් අමෙරිකාවේ විශාල වත්කම් ප්‍රමාණයක් තබාගෙන සිටින බවත්, රාජපක්ෂවරු ශ්‍රී ලංකාව තුළ කිසිම ව්‍යාපාරයක යෙදුනු අය හෝ වෘත්තිකයන් ලෙස කටයුතු කළ අය නොවන බැවින් ඔවුන් මේ සා ධනයක් දේපළක් රැස්කර ගත්තේ කෙසේ ද යන්න පිළිබඳව පෙඩරල් පරීක්ෂණයක් සිදු කරන ලෙසත් පෙත්සම ඉල්ලා ඇත.

මෙම වත්කම් ශ්‍රී ලංකාවෙන් සොරාගත් ධන‍යෙන් උපයාගත් බවට තහවුරු වුවහොත් එම වත්කම් තහනම් කිරීමට කටයුතු කරන ලෙසත්, නැවත එම ධනය ශ්‍රී ලංකාව වෙත ලබාදීමට කටයුතු කරන ලෙසත් පෙත්සමෙන් වැඩිදුරටත් ඉල්ලා තිබේ.

මේ සමග ගෝඨා ගෙදර යනු, 20 අහෝසි කරනු, පාර්ලිමේන්තුවට බලය පවරනු' මැයෙන් 43 සේනාංකය විසින් ඊයේ කොල්ලුපිටිය ප්‍රදේශයේ දී විරෝධතාවයක් සංවිධානය කර තිබිණ.

කොල්ලුපිටිය දුම්රිය ස්ථානයේ සිට පා ගමනින් අමෙරිකානු තානාපති කාර්‍යාලය අසළට පිරිස පැමිණි අතර, 43 සේනාංකය නායක, පාඨලී චම්පික රණවක එහිදී රැස්ව සිටි පිරිස ඇමතීය.

"මේ රටේ අද තිබෙන ගැටළුව සතියකට දෙකකට ඩොලර් ටිකක් තෙල් ටිකක් ඉල්ලගෙන විසඳන්න පුළුවන් ගැටළුවක් නෙමෙයි. අපි එදා 2014 දි කිව්වා මේ පවුල රටේ දේපළ කොල්ල කාලා තියෙනව කියලා, නමුත් එතකොට අපිට නොයෙක් චෝදනා කළා දේශද්‍රෝහියො ජාතිද්‍රෝහියො කියලා. නමුත් අද රටේම ඉල්ලීම රාජපක්ෂලා කොල්ලකාපු දේපළ අපේ රටට දෙන්න කියන එකයි. රටේ ජනතාවගෙ දරුවන්ගෙ දේපළ කොල්ලකාලා ඇමරිකාවට පැනලා ගිහිල්ලා සුවසේ ජීවත්වෙන්න රාජපක්ෂලට ඉඩ දෙන්න බෑ. රටේ දේපළ කොල්ලකාපු එක එකා දැන් රටෙන් යනවා. ජනාධිපති අගමැති කියනවා අයින් වෙන්න බෑ කියලා. ඒත් ව්‍යවස්ථානුකූලව ඒ අයව අයින් කරන්න පාර්ලිමේන්තුවට පුළුවන්.

පාර්ලිමේන්තුවට පුළුවන් ජනාධිපතිව ගෙදර යවන්න. ජනාධිපතිගෙ බලතල කපන්න 19 වෙනි සංශෝධනය වගේ එකකින්. දෝෂාභියෝගයක් ගෙනල්ලා ඒක ශ්‍රේෂ්ඨාධිකරණයේ විභාග කරලා දඬුවම් දෙන්න. 113 ඉන්නවනම් ජනාධිපතිගෙ වැය ශීර්ෂය කපලා දාලා එතුමව එතුමගෙ මිරිහානෙ පුද්ගලික ගෙදරට සීමා කරලා තියන්න.

 මහින්ද රාජපක්ෂ මහත්තයා හිතාගෙන ඉන්නවනම් අර ඉස්සර සෙල්ලම් කරන්න දින 52 වගේ සැලුන් දොර ඇරලා ඒවට අපි ඉඩ දෙන්නෙ නෑ.

පවුල්වාදය නැතිව අධ්‍යාපනයෙන් ඉහළට ආපු මේ රටේ සියළුදෙනා ව්ෘත්තීයවේදීන්, පරිපාලන නිලධාරීන් ආදී කුසලතා පරපුරට අපි ආරාධනා කරනවා මේ රට බාරගන්න කියලා. පාර්ලිමේන්තුවට පුළුවන් ඇමැතිවරුන්ගේ බලතල ගන්න. පක්ෂ විපක්ෂ දෙපාර්ශවයෙන්ම අධීක්ෂණ කමිටු පිහිටුවලා අමාත්‍යාංශ කිහිපයකට එකතු කරලා රාජපක්ෂලව එළියෙ තියලා මේ රට කරගෙන යන්න එකතු වෙන්න කියලා අපි ආරාධනා කරනවා."

ජනතා හඬට ඇහුම්කන් දී ආණ්ඩුව ඉවත් වන්නේ නැතිනම් විශ්වාසභංග යෝජනාවක් ගෙන එන බව විපක්ෂ නායක සජිත් ප්‍රේමදාස පැවසීය.

ඒ පාර්ලිමේන්තුවේදී අද (8) අදහස් දක්වමින් ය.

සියලුම දෙනා නැවත ජනතාව ඉදිරියට යෑමට හැකි පරිදි තීන්දු ගත යුතුව ඇතැයි එහිදී පැවසූ විපක්ෂනායකවරයා රටේ ප්‍රජාතන්ත්‍රවාදය රැක ගත යුතු බවද සඳහන් කළේය.

පෙරවරුවේ විපක්ෂ නනායකවරයා ගේ මේ කතාවෙන් පසුව පස්වරුවේ ආණ්ඩුවට එරෙහි විශ්වාසභංග යෝජනාවක් සඳහා සමගි ජන බලවේගය පක්ෂය මන්ත්‍රීවරුන්ගෙන් අත්සන් ලබා ගැනීම ආරම්භ කර ඇතැයි පාර්ලිමේන්තු ආරංචි මාර්ගවලින් පැවසේ.

පාර්ලිමේන්තුවේ නව කැබිනට් මණ්ඩලය හෙට (08) දිවුරුම් දීමට නියමිතව ඇතැයි රජයේ ඉහළ පෙළේ ආරංචි මාර්ග සඳහන් කරයි.

පාර්ලිමේන්තුව නියෝජනය කරන සියලු පක්ෂවලට ඇමතිකම් බාර ගැනීම සඳහා ජනාධිපතිවරයා කළ ආරාධනය ප්‍රතික්ෂේප වීම නිසා නව කැබිනට් මණ්ඩලය ශ්‍රී ලංකා පොදුජන පෙරමුණේ මන්ත්‍රීවරුන්ගෙන් සමන්විත වනු ඇතැයිද එම ආරංචි මාර්ග සඳහන් කරයි.

ඒ අනුව නව කැබිනට් මණ්ඩලය හෙට පෙරවරුවේ කොළඹ ජනාධිපති ලේකම් කාර්යාලයේ දී දිවුරුම් දීමට නියමිත බව ද එම ආරංචි මාර්ග සඳහන් කරයි.

- news wave

"අපේ නායක තුමා ඉල්ලන් නැහැ. එතුමා බලාගෙන ඉන්නවා ඊගාව ඡන්දෙන් ආවට පස්සේ ගන්න. හැබැයි මේ රට කරන්න මොකෙක් හරි ඕනේ. මේ රට කරන්න නැත්නම් තව මාස 06ක් අපි කොහොමද මේකේ ඉන්නේ. ඉතින් මේක තේරෙන් නැති දේශපාලනය කරනවා නම්, අනුර මහත්තය හිතනවා නම් එයා දිනනවා කියලා. සජිත් මහත්තයා හිතනවා නම් එයා දිනවා කියලා. නාමල් බේබි හිතනවා නම් එයා දිනනවා කියලා. පට්ට ජරාවක් නෙමෙයිද මේ දේශපාලනය." යනුවෙන් සජබ පාර්ලිමේන්තු මන්ත්‍රී හරීන් ප්‍රනාන්දු අද (07) පාර්ලිමේන්තු විවාදයට එක්වෙමින් පැවසීය.

එහිදී ඔහු මෙසේද සඳහන් කළේය.

ජනතාව කොපමණ කාලයක් පාරේ රැඳී සිටියත් පවතින ප්‍රශ්නයට උත්තර නොලැබෙන බවත් ප්‍රශ්නයට උත්තරය පාර්ලිමේන්තුව තුළින් ලබාදිය යුතු බව තම අදහස යැයි ද හරීන් ප්‍රනාන්දු මන්ත්‍රීවරයා වැඩිදුරටත් සඳහන් කළේය.

"මං මුලින්ම කිව්වා ඒ කාලේ මේක සාපයක් කියලා.. මම මුල ඉදින් කිව්වා සර් ෆෙල් වෙනවා කියලා පළවෙනි අවුරුද්දේ කියලා. ඒත් අපි කුහක වුණේ නැහැ අපි එළියට ඇවිල්ලා කිව්වා සර්ට දෙවැනි අවුරුද්දේ පාස්වෙන්න පුළුවන්. සර්ගේ ළඟ ඉන්න මෙන්ටල් සෙට් එකක් ඒ පස්දෙනාගේ නම්ටිකත් කිව්වා අපි.

අවුරුදු දෙකක් ඇතුළත මේ රටේ ජනාධිපති කෙනෙක් මේ තරම් පරිහානියට පත්වෙච්ච තැනක් මේ ලෝක ඉතිහාසයේ නැහැ. ඒක සපායක් නෙමෙයිද? ඒක තමයි සාපයක් කියන්නේ. පෙර කරපු වැරැද්දක්. බලය ගන්න අර්බුදයක් නිර්මාණය කිරීම. ඒ මිනිහා අර්බුදයෙන්ම නැතිවී යාම මහා ලොකු සලකුණක් බවට පත්වෙලා තියෙනවා."

 ''මගේ පක්ෂයත් එහෙමයි, ලැජ්ජයි !

වැඩිදුරටත් අදහස් දක්වමින් හරීන් ප්‍රනාන්දු මන්ත්‍රීවරයා මෙසේද පැවසීය.

"ලංකාවේ මිනිස්සු මන්ත්‍රීවරුන් ඔක්කොම දෙස බලන්නෙ එක ඇහෙන්. ඔක්කම හොරු. ඔක්කම මොනවහරි බිස්නස් කරන එවුන්. ඔක්කොම මොනව හරි දූෂණ වංචා කරන මිනිස්සු. හැබැයි දෙපැත්තමෙ ඉන්නවා හොඳ මිනිස්සු. ඇයි අපිට මෙහෙම වෙලා තියෙන්නේ. අපි ට බැහැ සාමුහිකව එකතුවෙන්න. මෙච්චර ප්‍රශ්න වෙලා පාරේ මිනිස්සු මැරෙනවා. මේ රටේ මිනිස්සුන්ට බැහැ. මේ පක්ෂවලට බැහැ එකුතුවෙලා කරන්න. මංමේ කියන්නේ මගේ පක්ෂයත් එහෙමයි, ලැජ්ජයි කියන්න."

දැන් කියනවා ගෝඨභය රාජපක්ෂ මහතා ගියොත් මොකද කරන්නේ. කව්ද කරන්නේ. ව්‍යවස්ථාවේ තියෙනවා ප්‍රතිපාදන තියෙනවා. පාර්ලිමේන්තුවට පුළුවන් භාරකාර ජනාධිපතිවරයෙක් පත් කරන්න. හරීන් ප්‍රනාන්දු ප්‍රකාශ කළේය.

සජිත්‍ට වැදුනෙ : ඔහොම ගියොත් විපක්ෂ නායක ධූරයත් නෑ !

හරීන් ප්‍රනාන්දු මන්ත්‍රීවරයා ගේ මේ අදහස් දැක්වීම සම්බන්ධයෙන් මේ වන විට දේශපාලන විචාරකයන් ද අවධානය යොමුකර ඇත.

ඒ සම්බන්ධයෙන් විචාරකයකු මෙසේ අදහස් දැක්වීය.

" පසුගියදා සජබ විරෝධය අවස්ථාවේ සජබ නායක සජිත් ඉල්ලුවේ ජනාධිපතිවරණයක්. ඒක කොහොමටත් ප්‍රායෝගික නෑ. ඊට පස්සේ විධායකය අහෝසි කරන්න යෝජනා කරා. නමුත් කවුද මේකට මුල් වෙන්න ඕන. නිර්පාක්ෂිකවයි ජනතාව පාරට ආවේ. ඒ රාජපක්ෂ විරෝධයක් සමග. දූෂිත පවුලේ පාලනය අවසන් කරන්න තමයි විරෝධය ඉල්ලන්නේ. හැබැයි විපක්ෂ නායක මොකද කරන්නේ. මේ තමයි ඔහු ක්‍රියාත්මක වෙන්න ඕන අවස්ථාව. මේ මොහොතේ බලය අපිට එපා, අපි ගන්නේ ජනතා ආශීර්වාදය ඇතුව කිව්වාම අර එලියේ ඉන්න විරෝධතාකරුවන් අනාරක්ෂිත වෙනවා. ඒ අර්ථයෙන් හරීන් යෝජනා කරනවා මොකෙක්වත් නැත්නම් හර්ෂ ද සිල්වා ට ජනාධිපති ධූරය දෙන්න කියලා. ඇත්තටම ඒ ප්‍රකාශය සාධාරණයි. ඔහොම ගියොත්,, "ගෝඨා එපා, රාජපක්ෂලා එපා" සටන් පාඨ ඇතුලට විපක්ෂ නායකත් "එපා" " පලයන්" කියලා වෙනස් වෙන්න පුළුවන්"

අර්බුදයෙන් රට ගොඩනැගීම සඳහා 'අපි මේ අභියෝගය අපේ දෝතින් භාර ගනිමු' යැයි හිටපු අමාත්‍ය, පාර්ලිමේන්තු මන්ත්‍රී පාඨලී චම්පික පවසයි.

ඒ සඳහා පවුල්වාදයෙන් තොර, රජයේ නිලධාරීන්, වෘත්තීයවේදීන් ඇතුළු කුසලතාවාදී පරපුරට ආරාධනා කරන බවත් ඔහු පවසයි .

අද (7) පාර්ලිමේන්තුවේ දී විශේෂ ප්‍රකාශයක් සිදු කරමින් රණවක මන්ත්‍රීවරයා මේ බව ප්‍රකාශ කළ අතර වැඩිදුරටත් මෙසේද පැවසීය.

"වාමාංශික දේශපාලන ඉතිහාසයේ වැදගත් කියමනක් තියෙනවා. ඇතැම් දශක තිබෙනවා නිහඬ දශක. නමුත් ඇතැම් සති, දින තිබෙනවා මහා පරිමාණ විප්ලවීය පරිවර්තනයන් සිදුවෙන දශක ගණන සියවස් ගණන් තිස්සේ තිබුණු ප්‍රශ්න දින ගණනකින්, සති ගණනකින් වෙනස් වෙන සුළු යුගයන් ඇතිවෙන බව කියමනක් තිබෙනවා. අද අපේ රට මුහුණ දෙමින් තිබෙන්නේ එවැනි විප්ලවීය පරිවර්තනයන් සිදු වෙන අවස්ථාවකයි. අද මේ රටේ ජනතාව කිසිම භේදයකින් තොරව, ජාති, ආගම්, කුල භේදයකින් තොරව, පක්ෂ, පාට භේදයකින් තොරව, වයස් පරතර භේදයකින් තොරව තමන්ගේ ජීවන අයිතිය වෙනුවෙන් පෙරට ඇවිල්ලා තියෙනවා.

දේශපාලනය පිළිබඳ මෙතෙක් කතා නොකරපු පිරිස් පවා දේශපාලනය පිළිබඳ කතා කරන්න පෙළඹිලා තියෙනවා. විශේෂයෙන්ම මේ නව ඉසෙඩ් පරපුර අද ඔවුන්ගේ සමාජ මාධ්‍ය සුහුරු තාක්ෂණය භාවිත කරමින් ඉතාමත්ම විවෘත ආකාරයකට, අරගලයට පිවිසිලා තියෙනවා. 1953 හර්තාලයේ, 1976 සමගි පෙරමුණ මැතිනියට එරෙහිව පැමිණි ශිෂ්‍ය උද්ඝෝෂණත් සමග පැමිණි සමස්ත මහා වැඩ වර්ජනය, 1980 වැඩ වර්ජනය, 87 ඉන්දු ලංකා ගිවිසුමට එරෙහිව රටපුරා ඇතිවුණු කැරලිකාරිත්වය. මේ විවිධ අවස්ථාවල ඇති වුණු යම් යම් ජන වාර්ගික පදනමින්, ආගමික පදනමින් ඇතිවෙච්ච කලකෝලාහල, ඒ වගේම 2018 අග්‍රාමාත්‍ය ධූරය බහුතරයක් නැතුව උදුරාගත්තට පස්සේ මේ රටේ ජනතාව වීදි බැහැලා කරපු අරගලය. ඒ කිසිවකට වඩා මේ අරගලය වෙනස්. මේක අද්විතීය අවස්ථාවක්.

මේ අද්විතීය අවස්ථාව තමයි සෑම සමාජ කණ්ඩායමක්ම අද පාරට බැහැලා ඒකමිතියකින් යුතුව, එකම සටන් පාඨයක් ඔස්සේ සංවිධානය වෙලා, ළදරුවාගේ ඉඳන් මහල්ල දක්වා, ධනහිමි අයගේ ඉඳන්, ධනය නැති අය දක්වා, උගත්තු, නූගත්තු මේ සියලු දෙනාම අද වෙනසක් ඉල්ලලා තියෙනවා. මොකක්ද වෙනස?

සම්ප්‍රදායික ක්‍රමය පිපිරී ගොස් අවසන්. සම්ප්‍රදායික පක්ෂ වලට, සම්ප්‍රදායික මතවාද වලට, සම්ප්‍රදායික ක්‍රියාමාර්ගවලට ඇති ඉඩකඩත් ඒ සමඟම අද ඇහිරිලා ගිහින් තිබෙනවා. අපට නොයෙක් දේ කියන්න පුළුවන්. 74 වසරක ඉතිහාසය ගැන කතා කරන්න පුළුවන් ධනේශ්වර ක්‍රමය ගැන කතා කරන්න පුළුවන්. 77 න් පස්සේ ආපු විවෘත ආර්ථික ක්‍රමය ගැන කියන්න පුළුවන්. 2010 න් පස්සෙ ආපු 7%-8% විශ්මිත සංවර්ධනය ගැන කතා කරන්න පුළුවන්. යහපාලනය කාලේ ණය ගත්තා මොකද කළේ කියලා අහන්න පුළුවන්. හැබැයි මේවට අපි උත්තර දීලා තියෙනවා. අපි බොහොම පැහැදිලිව කියනවා අද මේ රට තියෙන්නේ රටක් හැටියට බංකොලොත් භාවයට පත්වෙලා ඒ බංකොලොත්භාවය විවිධ ආකාරයකින් කල් දමා ගනිමින් බංකොලොත්භාවයත් කර ගනිමින් යන ගමනක් තමයි තිබෙන්නේ. නොයෙක් සුබ ප්‍රාර්ථනා ප්‍රකාශ කරනවා. ඩීසල් පෝලිම් නවතිනවා. විදුලි බලය ඇති වෙනවා කියලා. කොහොමද? විවිධ ආකාරයේ ගිවිසුම් ගසමින් අපේ රටේ ආර්ථික ස්වෛරීත්වය, දේශපාලන ස්වෛරී බලශක්ති ස්වෛරීත්වය පාවා දෙමින් තවත් දවස් 5කට ඩීසල් ලබා දෙන්න. තවත් සතියකට විදුලි බලය ලබා දෙන්න, යනාදී ක්‍රියාමාර්ග තමයි ආණ්ඩුව පැත්තෙන් ගනිමින් තිබෙන්නේ. රටේ ජනතාව අද අවබෝධ කරගෙන තිබෙනවා මේක එවැනි තාවකාලික විසඳුම් වලින් විසඳිය නොහැකි මුළුමනින්ම රාජ්‍යය අසමත් වීමේ වැඩපිළිවෙලක කොටසක් බංකොලොත් වීමේ, බුන්වත් වීමේ ක්‍රියාවලියක් බව.

දැන් මොකද්ද විසදුම? 225 ම එපා කියලා පාර්ලිමේන්තුව විසුරුවලා මැතිවරණයකට යාමද? එහෙමත් නැත්නම් අර්බුදය කල් දමමින් බලයේම එල්ලී හිටිමින් ජනාධිපතිතුමත්, අගමැතිතුමත් රට අනුක්‍රමයෙන් ලේ වැගිරීමක් කරා ගමන් කරන තත්වයකට ගමන් කරවීමද? මේකද? අද අපි බලාපොරොත්තු වෙන තත්ත්වය? අපි එකක් මතක තබා ගන්න ඕනේ. අද මේ රටේ මහජනයා අවබෝධ කරගෙන තියෙනවා. මොන දේශප්‍රේමී සටන් පාඨ, මොන ජාතිකවාදී, මොන ආගමිකවාදී, ලේබල් අලවගෙන හිටියත් මේ රට ඇතුලේ ජාතික මංකොල්ලයක් සිද්ධවුණු බව. 2014 කාලෙ ඩොලර් බිලියන 19 ක් නීතිවිරෝධීව පිට වෙලා තිබෙන බව ඒ ජාතික මංකොල්ලයේ ඇතැම් සහකරුවන් දැන් තමන්ගේ පුද්ගලික අද මේ රටින් පලා යමින් තිබෙනවා. අද මේ රටේ ජනතාව ඉතාම පැහැදිලිව තීරණය කරලා තිබෙනවා. මේ ජාතික මංකොල්ලයේ වගඋත්තරකරුවන් හැටියට මේ රාජපක්ෂවරු. ඒ නිසා තමයි 'ගෝ හෝම් ගෝඨා' කියන එක ඇවිල්ලා තියෙන්නේ. 'ගෝ හෝම් රාජපක්ෂ' කියන එක ඇවිල්ලා තියෙන්නේ. මේ තත්ත්වය යටතේ මැතිවරණ පවත්වන්න ගියොත්? ඡන්ද කොලේ අච්චු ගහන්න කොළ නැති රටක්, ඡන්දය ගණන් කරන්න නැති රටක්. ඡන්ද පෙට්ටි ගෙනියන්න, ප්‍රවාහනය කරන්න ඩීසල් නැති රටක්. ඒ වගේම ජනතාව කෝපයෙන් දැවෙන, කුසගින්නෙන් දැවෙන මොහොතක ඔවුන් ගන්නා තීරණ පිළිබඳවත් අපි බලන්න ඕන. මොකද එවැනි කෝපාග්නි අවුලවලා තමයි, මේ ජනාධිපතිවරයා පාස්කු ප්‍රහාරයට මුවා වෙලා ආවේ. අද ඒකේ හානිය අපි සියලු දෙනාටම පේන්න තියෙනවා. ඒ නිසා මැතිවරණයකට යනවනම් රට අපි සාමකාමී කරන්න ඕන. රට කිසියම් දුරකට නිදහසේ හිතන්න පුළුවන් තැනකට පත් කරන්න ඕන.

මේ අභියෝගය අපි භාර ගන්නවද? ඔව් අපි මේ අභියෝගය භාරගත යුතුයි. මම මේ රටේ පවුල්වාදයෙන් තොරව, කුසලතාවාදී පරපුර, රජයේ නිලධාරීන්, වෘත්තීයවේදීන් ඒ සියලු දෙනාටම ආරාධනා කරනවා, අපි මේ අභියෝගය අපේ දෝතින් අපි භාර ගනිමු. ව්‍යවස්ථාවට අනුකූලව, ජනාධිපතිතුමා ඉල්ලා අස්වෙන්නේ නැත්නම්, එතුමා ඉවත් කිරීමේ ප්‍රතිපාදනය ව්‍යවාස්ථාව තුළ තිබෙනවා. පාර්ලිමේන්තුවේ 148 වැනි වගන්තිය යටතේ එතුමාගේ මූල්‍ය ප්‍රතිපාදනය අහෝසි කිරීමේ අයිතිය මේ පාර්ලිමේන්තුවට තියෙනවා එතුමා ජන හඬට කන් දෙන්නෙ නැත්නම්. අගමැතිතුමා, ඔබතුමාගේ කාලය අවසන්. ඔබතුමා ඉවත් කිරීමේ ව්‍යවස්ථානුකූල ක්‍රියාමාර්ගයත් මේ තුළ තිබෙනවා.

අපි එකමුතු වෙලා ජනතාවගේ හඬට කන්දීලා, 225 ම අසමත් කියන මතය ඇවිල්ලා, අරාජිකවාදයකට රට ගොඩවෙනවා වෙනුවට, රටේ කුසලතා පරපුර එකට එකතු වෙලා මේ අභියෝගය භාර ගමු. එදා අපි දැක්කා අර යුද්ධය තියෙන අවස්ථාවේදීත් නොයෙක් අභියෝග වලට අපි අතීතයේ මුහුණ දීලා තියෙනවා. ඒ අභියෝග වලට මුහුණ දෙමින් ඉදිරියට යන්න අපි සූදානම්. මේ රටේ ජනතාව වෙනුවෙන් ඒ කැපකිරීම කරන්න. මේ මාතෘ භූමිය මේ කොල්ලකාරීන්ගෙන් මුදා ගැනීම සඳහා අවශ්‍ය කැපවීම, ධෛර්යය ලබා දෙන්න අපි සූදානම්. අර්බුදය ජය ගැනීම සඳහා සියලුම ආකාරයේ මේ රටේ ඉන්න පරිපාලන සේවයේ වෘත්තීයවේදීන්ට අපි ආරාධනා කරනවා. ඒ වගේම පාර්ලිමේන්තුවේ අධීක්ෂණ කමිටු මාර්ගයෙන් මේ ඇමතිධූර වෙනුවට අධීක්ෂණ කමිටු 16 ක් තිබෙනවා. ඒ අධීක්ෂණ කමිටු මාර්ගයෙන්. වෘත්තීයවේදීන් ලවා මේ රාජ්‍යය කරගෙන යා යුතුයි. ඒ කරගෙන ගිහිල්ලා මේ රට සාමකාමී වූ දවසක අපට පුළුවන් පාර්ලිමේන්තුව විසුරුවලා මහ මැතිවරණයක් තියන්න."

පොදුජන පෙරමුණ පාලනයේ වසර තුනක් තුළ තෙවැනි මහ බැංකු අධිපති හෙට (08) ධූරයෙ වැඩ භාරගන්න නියමිත බව වාර්තා වෙයි.

ඒ අනුව ලංකා මහ බැංකුවේ නව අධිපතිවරයා ලෙස නම් කර ඇති ආචාර්ය පී.නන්දලාල් වීරසිංහ මහතා නව තනතුරේ වැඩ භාර ගැනීම සදහා අද (7) දින පස්වරුවේ කටුනායක ගුවන් තොටුපළ ඔස්සේ ශ්‍රී ලංකාවට පැමිණියේය .

ඔහු ඩුබායි සිට එමිරේට්ස් ගුවන් සේවයේ ඊ.කේ.- 654 දදරන ගුවන් යානයෙන් 04/07 දින පස්වරු 03.45 ට කටුනායක ගුවන් තොටුපළ වෙත පැමිණ තිබුණි .

ඔහු මීට පෙර ශ්‍රී ලංකා මහ බැංකුවේ නියෝජ්‍ය අධිපතිවරයා ලෙස කටයුතු කර තිබුණි .

"ජනතාව අරගලය පාරට ගෙන ආවේ නිර්පාක්ෂිකවයි. ඒ ඔවුන්ගේ ගැටළු නිර්පාක්ෂික නිසයි. එබැවින් එයට විසඳුම් සෙවිය යුත්තේ ද නිර්පාක්ෂිකවය." යනුවෙන් හිටපු අමාත්‍ය ඩලස් අලහප්පෙරුම පවසයි.

අමාත්‍යවරයා මේ බව සඳහන් කර සිටියේ අද (07) පාර්ලිමේන්තුවේදී මන්ත්‍රීවරුන් 225 වෙත ලිපියක් යොමුකරමිනි.

අදාළ ලිපිය පහත දැක්වෙයි.

225 වෙතටයි,

ලෝක ප්‍රජාව 13 නපුරු අංකයක් ලෙස සලකයි. එමෙන්ම ශ්‍රී ලාංකික තරුණ ප්‍රජාව 225 නපුරු අංකයක් ලෙස පිළිගන්නා පසුබිමක් මේ මොහොතේ නිර්මාණය වෙමින් පවතී. එයට ප්‍රධානතම හේතුවක් ලෙස මා දකින්නේ පාර්ලිමේන්තු වරප්‍රසාද තුළ ආරක්ෂිතව සිටිමින් අපි, අපගේ සහෝදර පුරවැසියාගේ අනාරක්ෂිතභාවය දෙස නොබැලීමයි. එම නිසා ඔහු හෝ ඇය අත්විඳින අනාරක්ෂිතභාවය හෝ පීඩිතභාවය අපට නොදැනෙයි.

30 වසරක යුද්ධය, සුනාමිය සහ කොරෝනා වසංගතය ගෙන ආ අභියෝග තුනටම වඩා බරපතල ආර්ථික අභියෝගයක් මැද අරගල කරන මහජනයා වෙනුවෙන් පෙනී සිටිය යුතුම මොහොතේ අපට අපගේ කාර්යභාරය ගැන හෝ නියෝජනය ගැන තෘප්තිමත් විය හැකිද? විවිධ ප්‍රභේද හරහා වීදි පුරා ගලා යන්නේ ජනතාව පෙළන ඒ පීඩනයේ ප්‍රකාශනයි. තවමත් සාමකාමී ස්වරූපයෙන් විහිදෙන එම පීඩනයේ ප්‍රකාශන, ප්‍රචණ්ඩකාරී ප්‍රකාශනයක් ලෙස පරිවර්ථනය වීමට ඉඩ නොදීම මහජන නියෝජිතයන් ලෙස අපගේ ප්‍රමුඛතම වගකීමයි.

ජනතාව අරගලය පාරට ගෙන ආවේ නිර්පාක්ෂිකවයි. ඒ ඔවුන්ගේ ගැටළු නිර්පාක්ෂික නිසයි. එබැවින් එයට විසඳුම් සෙවිය යුත්තේ ද නිර්පාක්ෂිකවය.

එනමුදු මේ ඉතාමත්ම තීරණාත්මක මොහො‍තේදීත් සිදුවන්නේ උත්තරීතර පාර්ලිමේන්තුවට ද නිගාදෙමින් ද්වේශ සහගතව බෙදෙමින් කෙරෙන වදන් හරඹය යි.

අප රටට දරුණු ආර්ථික අවපාතයකට මුහුණ දීමට සිදුවන පෙර ලකුණු දකිමින්, එහි ප්‍රතිඵලයක් ලෙස ජනතා පීඩනය පුපුරා යන විභවයක් නිර්මාණය විය හැකි නුදුරු අනාගතයක් පුරෝකථනය කරමින්, මා පසුගිය අයවැයේ දී, එනම් මීට මාස හතර හමාරකට පෙර එම අවදානම ගැන සඳහන් කරමින් සහෝදර මහජන නියෝජිතයන්ගෙන් බැගෑපත් ඉල්ලීමක් කළා.

"ඇයි අපි මෙතෙන්ට වැටුනේ? කවුද මේකට වගකියන්න ඕනේ? ඉතිහාසයේ තිබුණු කොළ පාට ආණ්ඩු ද? නිල් පාට ආණ්ඩු ද? නිල් රතු ආණ්ඩු ද? වර්තමාන ආණ්ඩුව ද? නැහැ. අපි සියලු දෙනාම සම සමව මෙහි විත්තිකරුවන් බවට පත්වෙලා තිබෙනවා. ජනතාව ඉදිරිපිට අපි 225 දෙනාම විත්තිකරුවෝ. අපි අපි අපි විසින්ම මෙහි වගකීම භාරගත යුතුයි. අපි වෙනුවෙන් අපි වගේම තමයි, මේ වගකීමත් භාරගන්න ඕනේ. ඉතින් අපි නිහතමානීව එහි වගකීම භාරගමු. අපි තවමත් පරක්කු නැහැ කියලා මම විශ්වාස කරනවා. අඩුගානේ අපේ අනාගතයේ නාමයෙන්, අද ඉන්න දරුවන්, මතු උපදින්න ඉන්න දරුවන් වෙනුවෙන් එතැනදි අපි 225 ම රටත් සමඟ හිටගමු. හැම පක්ෂයම විපක්ෂයේ ඉන්නකොට බෝසතුන් බවට පත්වෙනවා. ආණ්ඩුවට එනකොට දේවදත්තලා බවට පත්වෙනවා. අපි සියලුදෙනාම සාධාරණය කරන්න උත්සහ ගන්නේ එකිනෙකාට අඟිල්ල දික්කිරීමේ අප්‍රසන්න වගකීම් විරහිත ඉතිහාසයට විනා මේ ර‍ටේ අනාගතයට නොවේ. නමුත් ඉතිහාසයට හැරෙමින් ඇඟිලි දිගු කරමින් තවදුරටත් සිටීමේ වරප්‍රසාදයක් අප කිසිම කෙනෙකුට නැහැ. අඩුපාඩු සකස් කරගෙන, වැරදි හදාගෙන ඉදිරියට යෑම මිස අපට වෙන විකල්පයක් නැහැ. අප එක්ව ඉදිරියට නොයතොත් සිදුවන්නේ වෙන් වෙන්ව වැළලී යාමටයි.”

(උපුටා ගැනීම – හැන්සාඩ් වාර්තාව – 2021 නොවැම්බර් 19)

අද මෙරට තරුණ පරපුර 225 ම එපා කියමින් මොර නගමින් අපව ප්‍රතික්‍ෂේප කරන්නේ මේ කියමන සැබෑ කරමින්.

අපේ පුරවැසියන්, ශ්‍රී ලාංකිකයන්, ඔවුන් තම රටට අසීමිතව ආදරය කරන උදාර ජන කොට්ඨාසයක්. එම නිසා මා දැඩිව විශ්වාස කරනවා මහජන නියෝජිතයන් ලෙසට අප එක්ව ජනතා විශ්වාසනීයත්වය දිනාගත හැකි හරවුම් ලක්ෂයකට පියවර තැබුවොත් ඔවුන් අප තේරුම් ගන්නා බව. තවමත් එයට ප්‍රමාද නැහැ. ජනතාවට සවන් දෙන්න, ජනතාවට ප්‍රතිචාර දක්වන්න, ජනතාවට සංවේදී වන්න, ජනතාවට උපකාරී වන්න, ජනතාවට සුභවාදී වන්න, ජනතාව දෙස විත්තිකරුවන් ලෙස නොව පැමිණිලිකරුවන් ලෙස බලන්න.

මෙම දේශපාලන ඛේදවාචකයේ විත්තිකරුවන් කවරෙක් ද යන්න පිළිබඳව කාට හෝ සැකයක් මතවාදයක් තිබේනම් ඔවුන් හඳුනාගත හැකි පහසුම ක්‍රියාමාර්ගය වනුයේ මෙරට සියලු විධායක ජනාධිපතිවරුන් විධායක ජනාධිපති ක්‍රමය ආරම්භයේ සිට අද දක්වා සිටින සියලු පාර්ලිමේන්තු මන්ත්‍රීවරුන් කණ්නාඩියක් ඉදිරිපිටට යෑම පමණි.

මාගේ පාසැල් මැණියන්ගෙන් මා හට දායාද වූ උදෘත පාඨය උතුම් බුදු වදනක්. “අප්පමාදෝ අමතපදං” එනම්, අප්‍රමාදව කටයුතු කරමු යන්නයි.

නමුත් වැදගත් වන්නේ 225 වන අප එය අවබෝධ කරගන්නට තවත් ප්‍රමාද වනවා ද යන ප්‍රශ්නය පමණි.

ගෞරවය, ආදරය නොමැති බලය විසින් ඉතිහාසය පුරාම ලොවට දී ඇති අමිහිරි, අප්‍රසන්න පණිවිඩ කියවා ගන්නට අප තවත් ප්‍රමාද විය යුතු නැත.

ඩලස් අලහප්පෙරුම,

මාතර දිස්ත්‍රික් පාර්ලිමේන්තු මන්ත්‍රී,

2022 අප්‍රේල් මස 07 දින දීය.

ජනාධිපතිවරයාගේ ඉල්ලා අස්වීම යන කොන්දේසියට යටත්ව ඕනෑම යෝජනාවක් පිළිබඳ සාකච්ඡා කිරීමට සුදානම් බව ජවිපෙ , ජාජබ නායක පාර්ලිමේන්තු මන්ත්‍රී අනුර කුමාර දිසානායක පවසයි.

අද (07) පාර්ලිමේන්තුවේ දී විවාදයට එක්වෙමින් ඒ මහතා මේ බව කියා සිටියේය.

එහිදී වැඩිදුරටත් අදහස් දක්වමින් අනුර කුමාර මන්ත්‍රීවරයා පවසා සිටියේ, ජනාධිපතිවරයා සිය ධූරයේ සිට කරන කිසිදු යෝජනාවකින් රටේ ඇතිව තිබෙන කැලඹිලිකාරී තත්ත්වය සමනය කිරීමට සමත් නොවන බවය.

මේ වනවිට මෙම දේශපාලන හා ආර්ථික අර්බුදය නිශ්චිත කේන්ද්‍ර දෙකකට කේන්ද්‍රගත වී ඇතැයි ද පැවසු අනුර කුමාර මන්ත්‍රීවරයා , ජනාධිපතිවරයා තවදුරටත් ධූරයේ සිටිය යුතු නැති බවට ජනතාව තීරණය කර ඇති බවත්, දෙවැනි කේන්ද්‍රය වන්නේ ජනතාවට සමාන්‍ය ජන ජීවිතය පවත්වාගෙන යෑමට අවශ්‍ය පසුබිම සකස් කර ගැනීම බව ද පැවසීය.

"තමුන්නාන්සේලා යෝජනා කරන කිසිවක් අද ජනතාව භාරගන්නේ නෑ. භාර ගන්නවා නම් ජනතාව මේ වනවිට පාරේ ඉන්න විදියක් නෑ. පාරේ ඉන්න එකෙන් පේන්නේ යෝජනා යථාර්ථයක් නොවූ බවය. ඒ නිසා ඉදිරිපත් කරන ඕනෑම කාරණාවකට කොන්දේසියක් තියෙනවා. අන්න ඒ කොන්දේසියට යටත්ව යෝජනා ගැන කථා කරමු. අනිවාර්ය කොන්දේසිය තමා ජනතාවගේ මේ ප්‍රශ්නයේ කේන්ද්‍රය වී තිබෙන ජනාධිපතිවරයා ඉවත්විය යුතුයි කියන යෝජනාව. ජනාධිපතිවරයා මේ පුටුවේ වාඩි වෙමින් ඊට යටින් අටවන සභාග හෝ අන්තර් පාලන හෝ මේ ව්‍යවස්ථාව ඇතුළෙන් හෝ මේ ව්‍යවස්ථාව පිටතින් හෝ ගෙන එන කිසිදු යෝජනාවක් මේ රටේ පුරවැසියන් භාරගැනීමට සුදානම් නෑ. ඒ නිසා තමුන්නාන්සේලාගේ පාර්ශවයෙන් ඉදිරිපත් කරන ඕනෑම යෝජනාවකට අපිට සැලකිල්ලට භාජනය කරන්න පුළුවන් වෙයි. අපිට යෝජනාවක් ඉදිරිපත් කළ හැකි වන්නේ එක සාධාරණ කොන්දේසියකට යටත්. ඒ තමා මේ ප්‍රශ්නයේ කේන්ද්‍රය ජනාධිපතිවරයා ඉවත් වෙන්න ඕනේ. එකට යටත්ව කෙරෙන ඕනෑම යෝජනාවක් අපි සාකච්ඡා කරන්න සුදානම්. ඉන් අනතුරුව හැදෙන යාන්ත්‍රණය සභාග ද අන්තර්පාලනය ද ව්‍යවස්ථාවෙන් පිටත ද? ඒක අපි එළියේ ඉඳන් නිරීක්ෂණ මට්ටමේ ඉඳන් කටයුතු කරනවා ද ඕනේ එකක්. අපිට යාන්ත්‍රණයක් හදාගන්න අපි ට එළියේ නිරීක්ෂණ මට්ටමේ ඉන්න වෙයි. ඒ යාන්ත්‍රණයේ තියෙන එකඟතාවයන් ඉස්සරහට යන්න අපි සහාය ලබාදෙන්නම්. මෙවැනි ආකෘති ගණනාවක් තියෙනවා. ඕන දෙයක් සාකච්ඡාවට භාජනය කරන්න පුළුවන් කේන්ද්‍රය වෙලා තියෙන ජනාධිපතිවරයා ඉවත්වීම. ඊට පස්සේ අපි කතා කරමු."