පුවත්

ශ‍්‍රී ලංකාවේ සිට උගන්ඩාවට ප‍්‍රවාහනය කරන ලද මුද්‍රිත ද්‍රව්‍ය සම්බන්ධව සාධාරණ පරීක්‍ෂණයක් සිදුකරන ලෙස ඉල්ලා අල්ලස් කොමිසමට පැමිණිල්ලක් ගොනු කර ඇත.

ඒ 2021 සැප්තැම්බර් 23 සිදුකළ ප්‍රවාහනයක් සම්බන්ධයෙනි.

නීතිඥවරුන් වන එරන්ද වැලිඅංගේ, තාරක නානායක්කර, ඉන්දික පේ‍්‍රමතිලක විසින් ගොනු කර ඇති අතර අදාළ පැමිණිල්ල පහත දැක්වෙයි.

වර්ෂ 2022 අපේ‍්‍රල් මස 19 වන දින දීය.

අධ්‍යක්‍ෂ ජනරාල්
අල්ලස් හෝ දුෂණ විමර්ශන කොමිෂන් සභාව,
බෞද්ධාලෝක මාවත,
කොළඹ 07.

වර්ෂ 2021 සැප්තැම්බර් මස 23 වන දින ශ‍්‍රී ලංකාවේ සිට උගන්ඩාව දක්වා ප‍්‍රවාහනය කරන ලද භාණ්ඩ සම්බන්ධව සාධාරණ පරීක්‍ෂණයක් සිදුකරන ලෙස ඉල්ලා සිටීම.

වර්තමාන ආණ්ඩුව විසින් සිදුකරන ලද සීනි බදු වංචාව ඇතුළු විවිධ දූෂණයන් හේතුවෙන් රටේ ආර්ථිකය බිඳවැටී රට ආර්ථිකමය වශයෙන් බංකොලොත්භාවයට පත්වෙමින් සිටී.

රටට අවශ්‍ය ඉන්ධන, ගෑස්, ඖෂධ ඇතුළු අත්‍යවශ්‍ය භාණ්ඩ වර්තමානයේ ලංකාවට ආනයනය කිරීමට නොහැකි වී ඇත්තේ රට තුළ ඩොලර් සංචිත ප‍්‍රමාණවත්ව නොමැති වීම හේතුවෙන් බව සියළුදෙනා දන්නා කරුණකි.

මෙරට තිබු ඩොලර් සංචිත ක්‍ෂය වීමට එක් හේතුවක් වී ඇත්තේ රට තුළට ඩොලර් නෝට්ටු ලෙස ලැබී තිබූ විශාල =ඩොලර් ප‍්‍රමාණයක් ලංකාවේ දේශපාලන බලවතුන් විසින් හෝ ඔවුන්ගේ සමීපතමයන් විසින් නීතිවිරෝධී ලෙස මෙරටින් රැගෙන යාමට කටයුතු කිරීම බව සමාජය තුළ විශාල කතිකාවතක් ගොඩනැගී ඇත.

මේ සම්බන්ධයෙන් අප විසින් කළ කරුණු සොයා බැලීමේදී පහත සඳහන් කරුණු අප හට අනාවරණය වී ඇත.

වර්ෂ 2021.09.23 වන දින ශ‍්‍රී ලංකා ගුවන් සේවයට අයත් ගුවන් යානා තුනක් ලංකාවේ සිට උගන්ඩාවේ එන්ටෙබේ ගුවන් තොටුපොලට භාණ්ඩ තොගයක් ප‍්‍රවාහනය කර ඇති බව.
ශ‍්‍රී ලංකාව සහ උගන්ඩාව අතර එකී දිනයට පෙර හෝ පසුව ශ‍්‍රී ලංකා ගුවන් සමාගම විසින් ඍජු ගුවන් ගමන් සේවා පවත්වා නොමැති බව.

ශ‍්‍රී ලංකාවේ සිට උගන්ඩාව දක්වා ශ‍්‍රී ලංකා ගුවන් සේවය විසින් ප‍්‍රවාහනය කර ඇති බහාළුම්වල ඇති ද්‍රව්‍යීමුද්‍රිත ද්‍රව්‍යයන් (Printing Materials) ලෙස ප‍්‍රකාශයට පත් කර තිබීම.
ආදී වශයෙන් වේ.

ඉහත සඳහන් කළ ආකාරයට ගුවනින් ප‍්‍රවාහනය කරන ලද බහාළුම් ඇමරිකානු ඩොලර් විය හැකි බවට අප හට බලවත් සැකයක් මතු වී ඇත. කෙසේ වෙතත් ශ‍්‍රී ලංකන් ගුවන් සමාගම විසින් මේ දක්වා අදාළ මුද්‍රිත ද්‍රව්‍යයන් මොනවාද යන්න හෙළිකිරීමක්ද සිදුකර නොමැත.

එපමණක් නොව එකී බහාළුම් ශ‍්‍රී ලංකාව විසින් උගන්ඩා රාජ්‍ය සඳහා පත්කර ඇති මහ කොමසාරිස්වරයා විසින් බාරගෙන ඇති බවටද සමාජ මාධ්‍ය විසින් කරුණු හෙළිදරව් කර ඇති අතර එකී පුද්ගලයා විවිධ අනීතික ගනුදෙනු සඳහා කුප‍්‍රකට පුද්ගලයකු බවටද සමාජ මාධ්‍ය විසින් කරුණු හෙළිදරව් වෙමින් පවතී.

ඉහත සඳහන් කරුණු අනුව ඉහත කී බහාළුම් ශ‍්‍රී ලංකාවේ උගන්ඩා මහ කොමසාරිස්වරයා ලෙස කටයුතු කරන වෙළුපිල්ලේ කනන්තන් යන අය විසින් බාරගෙන ඇත්තේද සහ එසේ නම් එකී බහාළුම්වල සත්‍ය වශයෙන්ම අඩංගු වූයේ මොනවාද සහ එලෙස යවන ලද බහාළුම්වල හිමිකරු කවරේද යන්න සොයා දැනගැනීම අත්‍යවශ්‍ය කරුණක් වී ඇත.

ඉහත සඳහන් බහාළුම් මගින් ලංකාව තුළ තිබූ ඩොලර් නෝට්ටු උගන්ඩාව වෙත යවා ඇත්නම් එය මහා පරිමාණ දූෂණයක් වන බැවින් ශ‍්‍රී ලංකාවේ අල්ලස් සහ දූෂණ විමර්ශන කොමිෂන් සභාවේ අධ්‍යක්‍ෂ ජනරාල්වරයා වන ඔබතුමන් හට ඒ සම්බන්ධයෙන් පුළුල් විමර්ශනයක් පවත්වා කරුණු හෙළිදරව් කර ගැනීම සම්බන්ධයෙන් සුවිශාල වගකීමක් පැවරී ඇත.

කරුණු එසේ හෙයින් ඉහත කී ගනුදෙනුව සම්බන්ධයෙන් කඩිනම් පරීක්‍ෂණයක් මගින් නිසි කරුණු හෙළිදරව් කර ගන්නා ලෙසත්, දූෂණයක් සිදුවී ඇත්නම් අදාළ පාර්ශවයන්ට දක්‍ෂුවම් කර ශ‍්‍රී ලාංකිකයන්ට සාධාරණයක් ඉටු කර දෙන ලෙස කාරුණිකව ඉල්ලා සිටිමු.

නීතිඥ එරන්ද වැලිඅංගේ
නීතිඥ තාරක නානායක්කර
නීතිඥ ඉන්දික පේ‍්‍රමතිලක

අගමැති මහින්ද රාජපක්ෂ හැර එම පවුලේ අනෙකුත් සියළුම හිටපු ඇමතිවරුන් අද ( 19) පාර්ලිමේන්තු සභා ගර්භයේ ආණ්ඩු පක්ෂ පසුපෙළ අසුන්වල සිටිනු දැකගත හැකිවිය.

චමල් රාජපක්ෂ, නාමල් රාජපක්ෂ සහ ශෂීන්ද්‍ර රාජපක්ෂ එම හිටපු ඇමතිවරුන් තිදෙනාය.

හිටපු අමාත්‍ය චමල් රාජපක්ෂ අසුන්ගෙන සිටියේ ආණ්ඩු පක්ෂයේ අවසාන පේළියේ ආසනයකය.

ශාන්තට නොනවතින හූවක් !

මේ අතර පක්ෂයේ මතයට පිටුපාමින් ආණ්ඩුවේ කෘෂිකර්ම රාජ්‍ය අමාත්‍යවරයා ලෙස දිවුරුම් දුන් ශාන්ත බණ්ඩාර අද පාර්ලිමේන්තුව ඇමතීමට යාමේදී විපක්ෂය වෙතින් දැඩි බාධා එල්ල කෙරිණ.

කතානායක මහින්ද යාපා අබේවර්ධන එහිදී සභාව සන්සුන් කිරීමට උත්සාහ කළත් එය අසාර්ථක වූ අතර අවසානයේදී සභාව මිනිත්තු 10කට කල්තැබීමට ඔහු කටයුතු කළේය.

ශ්‍රී ලංකා නිදහස් පක්ෂය වත්මන් පොදුජන පෙරමුණ ආණ්ඩුවට සහය දීම ප්‍රතිකේෂ්ප කර පාර්ලිමේන්තුව තුළ ස්වාධීන වීමට තීන්දු කල නමුත් ශාන්ත බණ්ඩාර රහසින් ගොස් රාජ්‍ය අමාත්‍යවරයකු ලෙස දිවුරුම් දීම හේතුවෙන් ඔහුගේ නිවස අසලට රැස්වූ පාක්ෂිකයින් ද පසුගියදා ඔහුට හූ කියා විරෝධය පළකර තිබිණ.

 ඉන්ධන මිල බරපතළ ලෙස ඉහළ දැමීමට ඛනිජ තෙල් සංස්ථාව කටයුතු කිරීම හේතුවෙන් ධීවර සහ ප්‍රවාහන සේවයේ නිරත කොටස් අතර දැඩි අසහනකාරීත්වයක් මතුව තිබේ.

ඒ අනුව රඹුක්කන , මාතර ඇතුළු රටේ ප්‍රදේශ කිහිපයකම ජනතාව අසංවිධානාත්මක  විරෝධතා උද්ඝෝෂණ දියත්කර ඇත. 

 ප්‍රධාන මාර්ග ගණනාවක් වාහන මගින් අවහිර කරමින් ජනතාව මෙසේ විරෝධතාවේ යෙදී සිටින බවත් වාර්තා වෙයි.

මීට පෙර පැනවූ  ඉන්ධන ලබා දීමේදී පනවා තිබූ  සීමා ඉවත් කිරීමට තෙල් සංස්ථාව කටයුතු කර ඇති නමුත් ඒ සමග ඊයේ  (18) රාත‍්‍රියේ සිට සිපෙට්කෝ  බෙදුම්හල්වල මිල වැඩි කිරීමත් සමග මේ තත්ත්වය මතුව ඇත.

මේ අතර එකී ප්‍රදේශ වල පොලිස් බලඇණි සීරුවෙන් තබා ඇති බවත් වාර්තා වෙයි.

ඊයේ සිදුකළ ඉන්ධන  මිල වැඩි කිරීමේදී සුදු ඩීසල් ලීටරයක් රුපියල් 113කින් ඉහල දමා ඇති අතර එය මෙතෙක් එක් වරකදී සිදු කරන ලද වැඩිම මිල නැංවීමයි.

මේ සම්බන්ධයෙන් ඛනිජ තෙල් සංස්ථාව නිකුත්කළ නිවේදනය පහත දැක්වෙයි.

නිර්දේශපාලනික ජන අරගලයට සහය පලකිරීමේ අරමුණින් යුතුව, අප්‍රේල් 21දා සංවිධානය කෙරෙන, 'අපේක්ෂාවේ සත්‍යක්‍රියාව'ට ආණ්ඩුව පාර්ශ්වයෙන්, දිගින් දිගටම බාධාකිරීම් සිදුවෙමින් තිබෙන බව, 'රැඩිකල් මැද සාමූහිකය' පවසයි.

මෙම සත්‍යක්‍රියාව, කොළඹ නිදහස් චතුරශ්‍රය අභියස පැවැත්වීමට සැලසුම්කර, ඒ පිළිබඳව අවසර ලබාගැනීමට කටයුතු කර තිබුණත්, අවසන් මොහොතේ එම ස්ථානය ලබාදිය නොහැකිබව, සංස්කෘතික අමාත්‍යංශ බලධාරීන් දැනුම් දී ඇති බවත් රැඩිකල් මැද සාමූහිකය පවසයි.

ඒ අනුව 'අපේක්ෂාවේ සත්‍යක්‍රියාව', අප්‍රේල් 21දා පස්වරු 5.00 සිට 7.00 දක්වා, විහාර මහා දේවි උද්‍යානයේ, නෙලුම් පොකුණ ඉදිරිපිට පැවැත්වීමටයි, 'රැඩිකල් මැද සාමූහිකය', තීන්දු කර ඇත.

වීදි බැස ඇති සුවහසක් පුරවැසියන්ගේ, සාධාරණ ඉල්ලීම් අනුව, රාජපක්ෂ ක්‍රමය අවසන් කිරීමත්, පුරවැසියාට වග කියන ගෞරවනීය රජයක් ඇති කරගැනීමත් , අභිලාෂය කරගත් දේශපාලන සහ සිවිල් සංවිධාන නියෝජිතයන් අතර සම්මුතියක් ගොඩනගා ගැනීමත්, මෙහි මුලික අරමුණ වන බව රැඩිකල් මැද සාමූහිකය සඳහන් කරයි.

රැඩිකල් සෙන්ටර් සාමූහිකය' මේ වෙනුවෙන් ඉදිරිපත් කරන සම්මුතියේ යෝජනා පෙළක් ද මේ වන විට ප්‍රසිද්ධ කර තිබේ.

සම්මුතියේ යෝජනා පෙළ මෙන්න !

1- රාජපක්ෂවාදය අවසන් කිරීම.

2- 20 වන ආණ්ඩු ක්‍රම ව්‍යවස්ථා සංශෝධනය අහෝසි කර සුදුසු සංශෝධන සහිතව 19වන සංශෝධනය යළි පැනවීම.

3- රාජපක්ෂ විරෝධී පක්ෂ එකමුතුවෙන් නිශ්චිත කාලයක් සඳහා අන්තර්වාර පාලනයක් ඇති කිරීම.

4- සියලු ජාතීන්ට, ආගම්වලට සහ ලිංගිකත්වයන්ට සම අයිතිය ලැබෙන ශ්‍රී ලාංකේය සමාජයක් පිලිගැනීම.

5- ආර්ථික අර්බුදයට සාමූහික එකඟතාවයෙන් කඩිනම් විසඳුම් සෙවීම

6- ඖෂධ, අත්‍යාවශ්‍ය ආහාර, විදුලිය, ගෑස් පොහොර සහ අනෙකුත් කෘෂිකාර්මික යෙදවුම් සහ කාර්මික යෙදවුම් ප්‍රමාණවත් ලෙස අඛණ්ඩව සැපයීම සහතික කිරීම.

7- අර්බුදය හමුවේ දිළිඳු ජනතාවගේ සමාජ සුරක්ෂිතභාවය සහතික කිරීම.

8- පාර්ලිමේන්තු නියෝජිතයන්ගේ සහ පක්ෂවල වත්කම් බැරකම් ජනතාවට දැනගැනීමේ අයිතිය ලබාදීම.

9- රාජ්‍ය ආයතනවල සියලු ගනුදෙනු විගණනයට යටත් කිරීම

10- මානව අයිතීන් සහ ප්‍රජාතන්ත්‍රවාදය ගරු කිරීම.

11-නීතියේ ආධිපත්‍යය තහවුරු කිරීම.

12-වංචා දූෂන සහ පාස්කු අපරාධ සම්බන්ධ චෝදනා නීත්‍යානුකූලව විමර්ශනය කොට දඬුවම් ලබාදීම.

13- දේශපාලන සිරකරුවන් නිදහස් කිරීම

14- ත්‍රස්තවාදය වැළක්වීමේ පනත අහෝසි කිරීම

15- පුරවැසියන්ගේ මතය ඉදිරිපත් කිරීමට සහ පුරවැසි සහභාගීත්වය තහවුරු කිරීම සඳහා පුරවැසි වේදිකාවක් පිහිටුවීම, එම යෝජනා පෙළයි.

සුදු වතින් සැරසී එන්න !

ඒ වෙනුවෙන් සුදු වතින් සැරසී, අප්‍රේල් 21දා පස්වරු 5.00 සිට 7.00 දක්වා, විහාර මහා දේවි උද්‍යානයේ, නෙලුම් පොකුණ ඉදිරිපිටට පැමිණෙන ලෙස රැඩිකල් සෙන්ටර් සාමුහිකය ඔබ සැමගෙන් ගෞරවයෙන් ඉල්ලා සිටියි.

'රැඩිකල් මැද සාමූහිකය' යනු, 'සැබෑ දේශප්‍රේමී' අරමුණු සාක්ෂාත් කරගැනීම සඳහා, මංගල සමරවීරයන් විසින් ආරම්භකළ දේශපාලන මෙහෙයුමකි.

ප්‍රීමා සමාගම තිරිඟු පිටි 1Kg මිල රුපියල් 40 කින් ඉහළ දමා තිබේ.

ඒ අනුව පාන් රාත්තලක මිල රුපියල් 30කින් වැඩි කිරීමට තීරණය කළ බව සමස්ත ලංකා බේකරි හිමියන්ගේ සංගමය පවසයි.

තවද, අනෙකුත් බේකරි නිෂ්පාදනවල මිල රුපියල් 10 කින් වැඩිවන බව සදහන් වේ.

එම මිල වැඩිවීම අද (19) මධ්‍යම රාත්‍රි යේ සිට ක්‍රියාත්මක වන බවද එම සංගමය වැඩිදුරටත් පවසා සිටී.

පාන් ගෙඩියක් රුපියල් 150 ක් !

තිරිගු පිටි මිල ඉහළ දැමීම හේතුවෙන් පාන් ගෙඩියක මිල අද(19) මධ්‍යම රාත්‍රියේ සිට රුපියල් 30 කින් සහ සෙසු බේකරි නිහ්පාදන මිල රුපියල් 10 කින් ඉහළ දැමීමට සිදුවන බව සමස්ථ ලංකා බේකරි හිමියන්ගේ සංගමයේ සභාපති එන්. කේ ජයවර්ධන ප්‍රකාශ කරයි.

ඒ අනුව පාත් රාත්තලක නව මිල රුපියල් 150ක් වන බව ඔහු පැවසීය.

තිරිගු පිටි මිල ඉහළ දැමීම හේතුවෙන් මෙම පියවර ගැනීමට සිදුවන බවත් ඔහු පවසයි.

බත් සහ කොත්තු මිලත් ඉහළට !

මේ අතර බත් පාර්සලයක සහ කොත්තුවක මිල 20% කින් පමණ ඉහළ දැමීමට සිදුවන බව ආපන ශාලා හිමියන්ගේ සංගමයේ සභාපති අසේල සම්පත් සඳහන් කර ඇත.

කෙටි ආහාර, ආප්ප සහ ප්ලේන්ටියක මිල ඉහළ දැමීමට තීරණයක් ගෙන නොමැති බවත් ඔහු වැඩිදුරටත් පවසා ඇත.

අද (අප්‍රේල් 19) මධ්‍යම රාත්‍රියේ සිට බස් ගාස්තු 35% කින් ඉහළ නැංවීමට අවසර දී තිබේ.

මේ වනවිට රු. 20 ක් ලෙස පවතින අවම බස් ගාස්තුව රු. 27 ක් දක්වා ඉහළ දැමීමටද අවසර ලැබී තිබේ.

අත්‍යවශ්‍ය භාණ්ඩ මිල දැරිය නොහැකි ආකාරයට ඉහළ යමින් ඇති පසුබිමක මෙසේ ප්‍රවාහන ගාස්තු ඉහළ දැමීම තමන්ව කබලෙන් ලිපට වැටුණු තත්ත්වයක් බව ජනතා අදහසවී තිබේ.

එහෙත් ප්‍රවාහන සේවා සපයන පාර්ශ්ව පවසන්නේ වාහන අමතර කොටස් ඇතුළු සියලු උපාංග මිල ඉහළ ගොස් ඇති පසුබිමේ ඉන්ධන මිලත් අසාධාරණ ලෙස ඉහළ දැමීම තමන්ට කොහෙත්ම දරාගත නොහැකි තත්ත්වයක් බවයි.

මේ අතර , පාසල් ප්‍රවාහන සේවා , ත්‍රීරෝද රථ ගාස්තු ද ඉහළ දැමීමක් අවශ්‍ය බව කර්මාන්තයේ නියුතු වූවන් පවසයි.

ඒ අනුව මේ වන විටත් පාසල් ප්‍රවාහන සේවා ගාස්තු රුපියල් 1000කින් ඉහළ දැමීමට තීරණය කර ඇති බවත් වාර්තා වෙයි.

මෙහිදී ආණ්ඩුව මැදිහත් වී දෙපාර්ශවයටම සාධාරණ විසඳුමක් ලබාදීමට කටයුතු කළ යුතු නමුත් බලධාරීන් ඊට අසමත්ව ඇති බවත් ඔවුන් පවසයි.

1. ඩයනා ගමගේ – ප‍්‍රවාහන
2. සීතා අරඹේපොල – අධ්‍යාපන හා තාක්‍ෂණ
3. විජිත බේරුගොඩ – වරාය හා නාවුක ලෙස දිවුරුම් දී ඇත.

ජනාධිපති ගෝඨාභය රාජපක්ෂ ඇතුළු රාජපක්ෂවාදය ප්‍රතිකේෂ්ප කරමින් දියත්කර ඇති පොදුජන අරගලය අද (18) තවත් නැවුම් අත්දැකීමක් එක්කර ඇති බව වාර්තාකරුවන් පවසයි.

ඒ අනුව ඊයේ (17) ජනාධිපති ලේකම් කාර්‍යාලය විරෝධතා සටන් පාඨ හරහා ආලෝකමත් කළ අරගලකරුවන් අද විරෝධතා සටන් පාඨ වලින් අහස ආලෝකමත් කර ඇත.

පහත දැක්වෙන්නේ ඒ සම්බන්ධයෙන් සමාජ මාධ්‍ය තුළ දැක්වුනු ප්‍රතිචාර කිහිපයකි.

කොවිඩ් වසංගතය සම්බන්ධයෙන් අපබ්‍රංස නිවේදනයක් නිකුත්කර ඇති අතර ,ඊට අනුව පොදු ස්ථානවල මුහුණු ආවරණ පැළඳිය යුතු නැත.

එනම් කොරෝනා වෛරසය පැතිරීම වැලැක්වීම සදහා පනවා තිබූ මුහුණු ආවරණ අනිවාර්ය කිරීමේ නීතිය ලිහිල් කර තිබේ.

චන්න ජයසුමන අමාත්‍යවරයා පවසන්නේ පොදු ප්‍රවාහන සහ ගෘහස්ථ උත්සව අවස්ථාවලදී මුහුණු ආවරණ පැළඳිය යුතු බවයි.

පරිසර අමාත්‍යධූරයේ දිවුරුම් දුන් නසීර් අහමඩ් පක්ෂ‍ විනය කඩකර ඇති බවත්, ඔහුට එරෙහිව විනය ක්‍රියාමාර්ග ගැනීමට බලාපොරොත්තු වන බවත් ශ්‍රී ලංකා මුස්ලිම් කොංග්‍රසයේ නායක රවුෆ් හකීම් පවසයි.

පක්ෂ නායකයන් ලබන සිකුරාදා (22) රැස්වී ඔහුට එරෙහිව නිසි ක්‍රියාමාර්ග ගන්නා බවද හකිම් සඳහන් කරයි.

ශ්‍රී ලංකා මුස්ලීම් කොන්ග්‍රසය සමගි ජනබලවේගය පක්ෂය යටතේ පාර්ලිමේන්තුව තුළ විපක්ෂය නියෝජනය කරයි.

ජනාධිපති ගෝඨාභය රාජපක්ෂ 20 වැනි ව්‍යවස්ථා සංශෝධනය සම්මත කරගනු ලැබීමට පාර්ලිමේන්තුවේදී තුනෙන් දෙකක බලය ගනු ලැබුවේද රවුෆ් හකීම් සහ රිෂාඩ් බදියුදීන් ගේ පක්ෂයේ මන්ත්‍රීවරුන් ගේ සහයෙනි.

පාර්ලිමේන්තුවේ ස්වාධීන මන්ත්‍රීවරයකු වී සිටි ශ්‍රී ලංකා නිදහස් පක්ෂ මන්ත්‍රී ආචාර්ය සුරේන් රාඝවන් ද රාජ්‍ය අමාත්‍යධූරයක දිවුරුම් දී ඇත.

ඒ අධ්‍යාපන සේවා සහ ප්‍රතිසංස්කරණ රාජ්‍ය අමාත්‍යවරයා ලෙසය.

සුරේන් රාඝවන් ශ්‍රී ලංකා නිදහස් පක්ෂය වෙනුවෙන් පත්වූ ජාතික ලැයිස්තු මන්ත්‍රීවරයෙකි.

මේ අතර ශ්‍රීලනිප ආරංචි මාර්ග සඳහන් කර සිටින්නේ , පසුගියදා රාජ්‍ය අමාත්‍යවරයකු ලෙස දිවුරුම් දුන් ශාන්ත බණ්ඩාර ට අත්වූ ඉරණම සුරේන් රාඝවන් සම්බන්ධයෙන් ද ක්‍රියාත්මක වන බවයි.

ඒ අනුව ඔහුද රාජ්‍ය අමාත්‍ය ධූරයෙන් ඉල්ලා අස්වීමක් සිදුනොකළහොත් පක්ෂයෙන් ඉවත් කිරීම අනිවාර්යයෙන් සිදුවන බව එම ආරංචි මාර්ග පවසයි.

මේ වන විට සියලු ශ්‍රීලනිප මන්ත්‍රීවරුන් ආණ්ඩුවෙන් ඉවත්ව ස්වාධීන ලෙස කටයුතු කිරීමට තීන්දුවක් ගෙන ඇති අතර නියෝජ්‍ය කතානායක ලෙස කටයුතු කළ රංජිත් සියඹලාපිටිය මන්ත්‍රීවරයා ද ධූරයෙන් ඉල්ලා අස්වීම ප්‍රකාශ කර ඇත.

අද (18) කැබිනට් මණ්ඩලය පත්කිරීම අවස්ථාවේ රාජපක්ෂ පවුල් කේන්ද්‍රය පොදුජන පෙරමුණේ තරුණ මන්ත්‍රීවරුන්ට අසාධාරණයක් සිදුකළ බවට, ආණ්ඩුව අභ්‍යන්තරයේ කතා බහක් මතුව ඇත.

ඊට ආසන්න සිදුවීමක් ලෙස වාර්තා වන්නේ පසුගිය සමයේ ආණ්ඩුව ආරක්ෂා කිරීම වෙනුවෙන් දැඩි කැපකිරීමක් සිදුකළ DV චානක මන්ත්‍රීවරයා වැන්නන්ට කැබිනට් අමාත්‍ය ධූරයක් ලබා නොදීමය.

ඒ සම්බන්ධයෙන් ආණ්ඩුව අභ්‍යන්තරයේ ආරංචි මාර්ග සඳහන් කරන්නේ , කුලය සහ නාමල් රාජපක්ෂ ගේ දේශපාලන අනාගතය සැලකිල්ලට ගෙන අමාත්‍ය තනතුරු බෙදා තෝරාගත් පිරිසකට අසාධාරණයක් සිදුකර ඇති බවයි.

DV උපුල් වන චානක මන්ත්‍රීවරයා ගේ පියාටත් පළාත් සභා හැර මහ මැතිවරණයක් වෙනුවෙන් රාජපක්ෂ පවුල අපේක්ෂකත්වය ලබා නොදුන් බවත් එම ආරංචි මාර්ග සිහිපත් කරයි.

පොහොට්ටුව පුපුරයි !

මේ අතර හෙට(19) ආණ්ඩුවේ දැනට ස්වාධිනව සිටින 41ක මන්ත්‍රීවරුන්ගේ කණ්ඩායමට අමතරව අද දිනයේදී ඇමැතිකම් නොලැබුණු තවත් ජ්‍යෙෂ්ඨ මන්ත්‍රීවරුන් රැසක් ස්වාධින වීමට තීරණය කොට ඇති බව දැනගන්නට ඇත.

මේ පිළිබද දැනටමත් හිටපු ඇමැතිවරුන් කිහිප දෙනකුම සාකච්ජා පවත්වා ඇති බව දැනගන්නට ඇත.

අද දිනයේදී කතානායකවරයා මුණගැසුණු වාසුදේව නානායක්කාර, සුසිල් ප්‍රේමජයන්ත ඇතුලු ශ්‍රීලනිප කණ්ඩායම ‌දැනුම් දී තිබුණේ විපක්ෂයේ අසුන් ගැනීමට තම කණ්ඩායම තීරණය කොට ඇති බවය.

ගොවීන්ට රසායනික පොහොර ලබා නොදීම වරදක් යැයි තමා දැන් සිතන හෙයින් ඒ පොහොර නැවත ලබාදීමට කටයුතු කරන බව ජනාධිපති ගෝඨාභය රාජපක්ෂ අද (18) පිළිගෙන ඇත.

ඒ අද සිදුකළ අමාත්‍ය මණ්ඩල සංශෝධනය අවස්ථාවේ ය.

ජාත්‍යන්තර මූල්‍ය අරමුදල සමග වැඩසටහනකට මීට පෙර යෑමට තිබූ බව තමා විශ්වාස කරන බවත් ජනාධිපති ගෝඨාභය රාජපක්ෂ එහිදී පවසා ඇත.

එසේම ජීවන වියදම දරා ගත නොහැකිව සිටින ජනතාවට අත්‍යවශ්‍ය භාණ්ඩ ලබා ගැනීම සඳහා පෝලිම්වල කාලය ගත කිරීමට සිදුවීමෙන් ඇතිවන වේදනාව අසහනය හා කෝපය ඉතාම සාධාරණ බවද ජනාධිපති පවසා තිබේ.

රජයෙන් අතපසුවීම් සිදුවූ බවත් එම අතපසුවීම් නිවැරදි කරගෙන ඉදිරියට ගමන් කිරීමට තමා සූදානම් බවත් වැඩිදුරටත් ජනාධිපති පවසා ඇත.

ආණ්ඩුක්‍රම ව්‍යවස්ථාව වෙනස් කිරිම සම්බන්ධයෙන් විවිධ දේශපාලන පක්ෂ ඉදිරිපත් කර ඇති අදහස් සාකච්ඡා කර සම්මත කර ගැනීම සඳහා පාර්ලිමේන්තුවට අවශ්‍ය සහය ඕනෑම අවස්ථාවක ලබාදීමට සූදානම් බවද ජනාධිපතිවරයා පවසා ඇත.

ඇමැති තනතුරු වරප්‍රසාද නොව විශාල වගකීමක්වන හෙයින් කිසිදු අමතර වරප්‍රසාදයක් භාවිත නොකර අවංක කාර්යක්ෂම පිරිසුදු පාලනයකට කැප වන ලෙස ජනාධිපතිවරයා සියලු අමාත්‍යවරුන්ගෙන් එහිදී ඉල්ලීමක් ද කළේය.

විපක්ෂයේ මන්ත්‍රීවරයෙක් ආණ්ඩුවට එක්කර ගැනීම සඳහා අවම ලන්සුව ඩොලර් මිලියන දෙකක් බව විපක්ෂයේ පාර්ලිමේන්තු මන්ත්‍රී මුජිබර් රහුමාන් සඳහන් කරයි.

මාධ්‍ය හමුවකදී අදහස් දක්වමින් මන්ත්‍රීවරයා මේ බව සඳහන් කළේය.

එහිදී ඔහු පවසා සිටියේ රුපියල්වල වටිනාකම දිනපතා අඩු වන නිසා එම මුදල් ලබාදෙන්නේ ඩොලර් වලින් බවත් ඒ සදහා ආණ්ඩුවේ නායකයන් සතුව ඩොලර් ඇති බවය.

ආණ්ඩුවේ බලය තහවුරු කරගැ සඳහා විපක්‍ෂ මන්ත‍්‍රීවරුනට ඩොලර් ගෙවමින් බිලිබා ගැනීමේ ක්‍රියාවලියක් දියත් ව ඇතැයි ද මන්ත්‍රීවරයා සදහන් කලේය.

කිසිදු දේශපාලන මැදිහත්වීමක් නොමැති පොදුජන අරගලය හමුවේ, ඉල්ලා අස්වූ පොදුජන පෙරමුණ ආණ්ඩුවේ කැබිනට් මණ්ඩලය වෙනුවට, අලුත් කැබිනට් මණ්ඩලයක් පත්කිරීම , අද (18) සිදුවිය.

මේ සම්බන්ධයෙන් අරගල බිමේ සිටින අප වාර්තාකරුවන් පවසන්නේ, ජනාධිපති ගේ මේ තීන්දුව පොදුජන අරගලකරුවන් ප්‍රතිකේෂ්ප කරන බවයි.

මේ ක්‍රියාව, ජනාධිපති සිය අත්තනෝමතික බව නැවත තහවුරු කිරීමක් බවත් අර්බුදය විසඳීමට අවම සංවේදී බවක් මෙහි නොමැති බවත් ඔවුන්ගේ ස්ථාවරය වී තිබේ.

අද සිදුකළ, කැබිනට් සංශෝධනයෙන් පසුව අදහස් දක්වමින් ජනාධිපති ගෝඨාභය රාජපක්ෂ පවසා සිටියේ , පවතින අර්බුදකාරී තත්වය, ජනතාව ඉල්ලූ සිස්ටම් චේන්ජ් එකට හොඳ අවස්ථාවක්, බවයි.

නව කැබිනට් ඇමතිවරුනට ඒ අවස්ථාව ලැබී ඇති බවත්, ඒ සදහා උපකාර කරන්නැයි, තරුණයින්ගෙන් ඉල්ලා සිටින බව ජනාධිපති පැවසීය.

එසේම ගොවීන්ට රසායනික පොහොර ලබා නොදීම වරදක් යැයි, තමා දැන් සිතන නිසා , ඒ පොහොර නැවත ලබාදීමට කටයුතු කරන බව මෙන්ම , ජාත්‍යන්තර මූල්‍ය අරමුදල සමග වැඩසටහනකට , මීට පෙර යෑමට තිබූ බව තමා විශ්වාස කරන්නේ යැයිද ජනාධිපතිවරයා සඳහන් කර සිටියේ ය.

ජීවන වියදම දරා ගත නොහැකිව සිටින ජනතාවට, අත්‍යවශ්‍ය භාණ්ඩ ලබා ගැනීම සඳහා, පෝලිම්වල කාලය ගත කිරීමට සිදුවීමෙන් ඇතිවන වේදනාව අසහනය හා කෝපය ඉතාම සාධාරණ බවද ජනාධිපති නව කැබිනට් මණ්ඩලය අමතමින් පවසා සිටියේ ය.

හිටපු මහ බැංකු අධිපති අජිත් නිවාඩ් කබ්රාල්ට පැනවූ විදෙස් ගමන් තහනම මැයි මස 02 වැනිදා දක්වා තවදුරටත් දීර්ඝ කිරීමට කොළඹ මහේස්ත්‍රාත් අධිකරණය අද නියෝග කළේ ය.

ඔහුට මැයි මස දෙවැනි දා අධිකරණය හමුවේ පෙනී සිටින ලෙස දන්වා අද (18) නැවත සිතාසි ද නිකුත් කෙරිණ.

ඒ ඔහු ඉකුත් හත්වැනිදා මහේස්ත්‍රාත් අධිකරණය මගින් නිකුත් කළ සිතාසි අනුව අධිකරණය හමුවේ පෙනී නොසිටීම හේතුවෙනි.

කොළඹ අතිරේක මහේස්ත්‍රාත් හර්ෂණ කැකුණවෙල හමුවේ පැමිණිල්ල අද කැඳවූ අවස්ථාවේ එසේ නැවත සිතාසි නිකුත් කෙරිණ.

අජිත් නිවාඩ් කබ්රාල්ට අධිකරණය මගින් සිතාසි නිකුත් කරනු ලැබුවේ මහ බැංකු අධිපතිවරයා ලෙස කටයුතු කළ වකවානුව තුළ භාණ්ඩාගාර බිල්පත් සිය සමීපතයන්ට අලෙවි කරමින් රජයට පාඩු සිදු කළ බවට වූ පැමිණිල්ලකට අදාළවයි.

චෝදනා 6 ක් මත හිටපු ආණ්ඩුකාර කීර්ති තෙන්නකෝන්  ඉදිරිපත් කළ මෙම පෞද්ගලික පැමිණිල්ල සලකා බැලූ කොළඹ අතිරේක මහේස්ත්‍රාත් හර්ෂණ කැකුණවල  අධිකරණය හමුවේ අද පෙනී සිටින ලෙස දන්වමින් හිටපු මහ බැංකු අධිපති අජිත් නිවාඩ් කබ්රාල්ට ඉකුත් 07 වැනිදා සිතාසි නිකුත් කෙරිණ.

තවද එදින පැමිණිල්ල ඉදිරිපත් කළ කරුණු සලකා බැලූ අතිරේක මහේස්ත්‍රාත්වරයා හිටපු මහ බැංකු අධිපති අජිත් නිවාඩ් කබ්රාල්ට විදේශගත වීම තහනම් කරමින් නියෝගයක් ද නිකුත් කළේ ය.

නව අමාත්‍ය මණ්ඩලය දිවුරුම්දීම ජනාධිපති මන්දිරයේදී අද පෙරවරුවේ සිදුවිය.

ජනාධිපති ගෝඨාභය රාජපක්ෂ ගේ රජයේ කැබිනට් මණ්ඩලය පූර්ණ වශයෙන් සංශෝධනය වන තුන්වන අවස්ථාව මෙය වෙයි.

නව අමාත්‍ය මණ්ඩලයට හිටපු කැබිනට් ඇමැතිවරුන් අට දෙනකු පමණ පත් කර ඇති අතර ඉතිරි පිරිස තරුණ මන්ත්‍රීවරුන්ගෙන් පත් කර තිබේ.

දැනට දිවුරුම් දී ඇති ඇමතිවරුන් මෙසේය.

1- දිනේෂ් ගුණවර්ධන – රාජ්‍ය පරිපාලන, ස්වදේශ කටයුතු, පළාත් පාලන හා පළාත් සභා
2- රමේෂ් පතිරණ – අධ්‍යාපන හා වැවිලි
3- චන්න ජයසුමන – සෞඛ්‍ය
4- ෂෙහාන් සේමසිංහ – කෘෂිකර්ම හා වෙළෙඳ
5- කාංචන විජේසේකර – බලශක්ති හා විදුලිබල
6- දිලුම් අමුණුගම – කර්මාන්ත හා ප්‍රවාහන
7- කනක හේරත් – මහා මාර්ග අමාත්‍ය
8-ඩග්ලස් දේවානන්ද – ධීවර
9-ප්‍රසන්න රණතුංග – මහජන ආරක්‍ෂක, සංචාරක
10- විදුර වික්‍රමනායක – කම්කරු
11-ජානක වක්කුඹුර – කෘෂිකර්ම, වාරිමාර්ග
12-මොහාන්ද සිල්වා – ජල සම්පාදන
13-විමලවීර දිසානියක – වනජීවී හා වන සම්පත්
14-තේනුක විදානගමගේ – ක්‍රීඩා හා තරුණ කටයුතු
15-නාලක ගොඩහේවා – ජනමාධ්‍ය
16-නසීර් අහමඩ් – පරිසර
17-ප්‍රමිත බණ්ඩාර තෙන්නකෝන් – වරාය හා නවුක

#GoHomeGota අරගලය අද (17) තවත් විචිත්‍රවත් කෙරෙමින් ඒ අනුව ජනාධිපති ලේකම් කාර්යාලය projecter mapping ආකාරයට ත්‍රිමාණ ආලෝක ධාරාවන්ගෙන් ආලෝකමත් කිරීමට අරගලයේ නිරත පිරිසක් කටයුතු කළහ.

මිනිත්තු කිහිපයකට පසුව විශේෂ ආවරණයක් යොදාගෙන ආරක්ෂක අංශ බාධා කිරීම හමුවේ නවත්වනු ලැබුවත් එය මෙරට අරගල ඉතිහාසයේ විචිත්‍රවත් විරෝධතාවක් ලෙස ඉතිහාසයට එක්වනු ඇත.

(ජායාරූප සමාජ මාධ්‍ය වෙතිනි)