පුවත්

උද්ගත වී ඇති ආර්ථික අර්බුදයට පැවති සියලු ම රජයන් වග කිව යුතු අතර, ඒවාට තාවකාලික හා තිරසර විසඳුම් ලබා දීමට අප රජය මේ වන විට විධිමත් මාර්ගයකට අවතීර්ණ වී ඇති බව ජනාධිපති ගෝඨාභය රාජපක්ෂ පවසයි .

ඒ මහා නායක හිමිවරුන් වෙත ලිපියක් යවමිනි.

තමන් විසින් ගනු ලබන විධිමත් මාර්ගයකට අවතීර්ණවීමේ නිසි ප්‍රතිඵල නෙළා ගැනීමට යම් කාලයක් තමන් වෙත ලබා දෙන මෙන් ජනාධිපතිවරයා නායක හිමිවරුන්ගෙන් ‘දෙපා නැමැද ඉල්ලා සිටින’ බව එහි සඳහන් ය. ඒ අතර එම ආර්ථික අර්බුදයට නායක හිමිවරුන්ගේ අවවාද අනුශාසනා ඉතා ගෞරවයෙන් යුතුව ඉදිරියේදීත් අපේක්ෂා කරන බව ජනාධිපතිවරයා පවසයි.

 ජනාධිපතිවරයා යැවූ සම්පුර්ණ ලිපිය පහත පළවේ.

“අතිගෞරවාර්හ මහා නායක ස්වාමීන්ද්‍රයන් වහන්ස,

රට තුළ උද්ගත ව ඇති වත්මන් සමාජ, ආර්ථික හා දේශපාලනික අර්බුදය කඩිනමින් විසඳීමෙහි ලා ත්‍රෛනිකායික අතිපූජ්‍ය මහානායක මාහිමිපාණන් වහන්සේලා විසින් ඉදිරිපත් කරන ලද යෝජනා මාලාව පිළිබඳවයි.

වර්තමානයේ රට තුළ උද්ගත වී ඇති සමාජ, ආර්ථික හා දේශපාලනික අර්බුදය විසඳීමෙහි ලා ඔබ වහන්සේලා විසින් මා වෙත, අග්‍රාමාත්‍යතුමන් වෙත සහ විපක්ෂ නායකතුමන් ප්‍රමුඛ පාර්ලිමේන්තුව නියෝජනය කරන සියලු පක්ෂ නායකයින් වෙත 2022.04.20 වන දින යොමු කරන ලද ලිපිය හා බැඳේ.

ඔබවහන්සේලා විසින් මීට පෙර මා වෙත එවන ලද, එනම්: 2022 අප්‍රේල් මස 04 වන දින ඉදිරිපත් කරන ලද යෝජනාවලියේ අන්තර්ගත කරුණු කිසි සේත් මා විසින් නො සලකා හැර නොමැති බව ඉතා ගෞරවයෙන් යුතුව ඔබවහන්සේලා වෙත ප්‍රථමයෙන් ම කාරුණිකව ප්‍රකාශ කර සිටිමි.

මේ වන විටත් ඔබවහන්සේලා විසින් පෙන්වා දෙන ලද රටේ මතු වී ඇති ආර්ථික අර්බුදය වහා ම විසඳීමෙහි ලා අප විසින් ක්‍රියාමාර්ග රාශියක් ගෙන ඇත. ජනතාව මුහුණ දෙන ඉතා අසීරු ජීවන තත්ත්වය පිළිබඳව මා හට අවබෝධයක් ද නැතුවා නො වේ. දෛනික, සංඛ්‍යාලේඛන හා දත්ත මත පදනම්ව, විශේෂඥ සහාය ද ඇතිව මා අමාත්‍ය මණ්ඩලය සමඟ කටයුතු කරන බව කාරුණිකව දන්වා සිටිමි.

ඒ අනුව, මහජනතාවට අත්‍යවශ්‍ය වන ආහාර, ඖෂධ, ගෘහස්ථ ගෑස් මෙන් ම නොයෙකුත් ඉන්ධන සැපයීම් සම්බන්ධව සකස් කරන ලද සැලසුම් මේ වන විටත් දැඩි අධීක්ෂණයක් යටතේ ක්‍රියාත්මක කරමින් පවතී.

ඒ අනුව, නව මුදල් අමාත්‍යවරයා, නව මහ බැංකු අධිපති සහ නව භාණ්ඩාගාර ලේකම්, මවිසින් පත් කරන ලද ජාත්‍යන්තර මූල්‍ය විශේෂඥයින්ගේ මඟ පෙන්වීම මත, අදාළ ජාත්‍යන්තර මූල්‍ය ආයතන සහ මිත්‍ර රටවල් සමඟ දැනටමත් සාකච්ඡා කරමින් අවශ්‍ය පියවර ගනිමින් සිටිති.

එහි ප්‍රතිඵලයක් වශයෙන් “ජාත්‍යන්තර මූල්‍ය අරමුදල” හා ඉන්දීය රජය දැනටමත් යහපත් ප්‍රතිචාර දක්වා ඇති හෙයින්, පවතින ආර්ථික අර්බුදයට තිරසර විසඳුමක් ලබා ගන්නා තෙක් ඉදිරි සති කිහිපය තුළ තාවකාලික විසඳුමකට යා හැකි බවට තරයේ විශ්වාස කරමි.

මා ජනාධිපති ලෙස පත් වූ වහා ම නව ව්‍යවස්ථාවක් සම්පාදනය කිරීම සඳහා නීති විශාරදයන්ගෙන් හෙබි කමිටුවක් පත් කරන ලදි. එම කමිටුවේ සාමාජිකයන් වනුයේ:

ජනාධිපති නීතිඥ රොමේෂ් ද සිල්වා මහතා - සභාපති
විශ්‍රාමික මහාචාර්ය ජී. එච්. පීරිස් මහතා
විනිසුරු ඒ. ඩබ්. ඒ. සලාම් මහතා
ජනාධිපති නීතිඥ මනෝහාර ද සිල්වා මහතා
ජනාධිපති නීතිඥ සංජීව ජයවර්ධන මහතා
ජනාධිපති නීතිඥ සමන්ත රත්වත්තේ මහතා
මහාචාර්ය ඒ. සර්වේස්වරන් මහතා
මහාචාර්ය ඩබ්. සෙනෙවිරත්න මහතා
ජනාධිපති නීතිඥ නවීන් මාරපන මහතා
කෞෂල්‍ය මොල්ලිගොඩ මහත්මිය - ලේකම්

මෙම කමිටුව වසර දෙකක පමණ කාලයක් තුළ විවිධ දේශපාලන පක්‍ෂ, විවිධ කණ්ඩායම් සහ විශේෂඥ පුද්ගලයින් සමඟ දීර්ඝ ලෙස සාකච්ඡා පවත්වා නව ව්‍යවස්ථාවකට අදාළ කෙටුම්පත් සකස් කරමින් පවතී. එම කෙටුම්පත සකස් කොට අවසන් කිරීමට ආසන්න බව ද කමිටුව විසින් මට දන්වා ඇත. එසේ සකස් කරන ලද කෙටුම්පත ලැබුණු විගස අමාත්‍ය මණ්ඩලය වෙත ඉදිරිපත් කර අනුමැතිය ලද පසු පාර්ලිමේන්තුවට ඉදිරිපත් කිරීමට කටයුතු කරන බව ගෞරවයෙන් දන්වා සිටිමි. එසේ ම ඔබ වහන්සේලාට ද එම කෙටුම්පතෙහි පිටපතක් ලැබීමට සලස්වන බැව් කාරුණිකව දන්වමි.

රටේ ජනාධිපතිවරයා වශයෙන් රට තුළ ප්‍රජාතන්ත්‍රවාදය ස්ථාවර කිරීම උදෙසා මම කැප වී සිටිමි. ඔබවහන්සේලා විසින් සඳහන් කොට ඇති 20 වන ව්‍යවස්ථා සංශෝධනය අහෝසි කිරීම පිළිබඳව ද පාර්ලිමේන්තුව තුළින් යම් ක්‍රියාමාර්ගයක් ගන්නේ නම් ඒ පිළිබඳව මාගේ සහයෝගය දක්වන බව ද, එවැනි සංශෝධනයක් ජනාධිපතිවරයා සහ පාර්ලිමේන්තුව එක් ව සිදු කළ යුත්තක් බැව් ද කාරුණිකව සිහිපත් කරනු කැමැත්තෙමි.

තව ද, රටේ පවතින වර්තමාන තත්ත්වයට ස්ථීරසාර විසඳුමක් උදෙසා තම දායකත්වය අපේක්ෂාවෙන් සියලු ම දේශපාලන පක්ෂවලට සර්වපාක්ෂික සමුළුවට කරන ලද ආරාධනාවට ද, අමාත්‍ය ධුර භාර ගනිමින් රට පත් ව ඇති තත්ත්වයෙන් මුදවාලීම සඳහා සහාය ලබා දෙන ලෙසට පිරිසිදු චේතනාවෙන් යුතුව කළ ඉල්ලීමට ද මේ වන තෙක් කිසිදු යහපත් ප්‍රතිචාරයක් නො ලැබීම කනගාටුවට කරුණකි. එසේ වුවත්, මාගේ ආරාධනය සියලු දේශපාලන පක්ෂ සඳහා තවදුරටත් එලෙස ම පවතින බව ද දන්වනු කැමැත්තෙමි.

අප කුමන දේ කළත්, සියලු ක්‍රියාදාමයන් ව්‍යවස්ථානුකූල විය යුතු අතර ජනතා අභිලාෂයන් සාක්ෂාත් කර ගැනීම වත්මන් ව්‍යවස්ථාව තුළ සිදු විය යුතු ය. එ නිසා, මා හෝ අප රජය හෝ කිසිදු අවස්ථාවක වත් ඔබවහන්සේලා ඉදිරිපත් කරන යෝජනා හෝ ජනතා අභිලාෂයන් හෝ බැහැර කොට කටයුතු නො කරන බවට සිහිපත් කරමි.

අමාත්‍ය මණ්ඩලයක් නොමැතිව රටක පරිපාලන කටයුතු මෙහෙයවිය නො හැකි ය. එසේ ම අමාත්‍ය මණ්ඩලයක් නොමැති වීම ප්‍රායෝගික ද නො වේ. ඒ අනුව, ජ්‍යෙෂ්ඨ අමාත්‍යවරුන්ගේ සහාය ද ඇතිව, තරුණ මන්ත්‍රීවරුන් බහුතරයකින් සමන්විත අමාත්‍ය මණ්ඩලයක් පත් කිරීමට මා හට සිදු විය. දැවෙන ජනතා ප්‍රශ්නවලට කඩිනම් විසඳුම් සෙවීම සඳහා ම කෙටිකාලයකට මෙම පත්කිරීම් සිදු කළ බව ද ගෞරවයෙන් සඳහන් කරමි.

මෙතෙක් මාගේ ධුර කාලය වූ වසර දෙකහමාරක් තුළ නොයෙකුත් දේශපාලන පක්‍ෂ මෙන් ම නොයෙකුත් ජන කණ්ඩායම්, විශ්වවිද්‍යාල ශිෂ්‍යශිෂ්‍යාවන් සහ සමාජ ක්‍රියාකාරීන් විසින් පවත්වන ලද උද්ඝෝෂණ, පෙළපාලි, සාමාන්‍ය ජන ජීවිතයට බාධා වන අයුරින් මාර්ග අවහිර කිරීම් වැනි දෑවලදී කිසිදු ආකාරයක බැටන් පොලු ප්‍රහාර හෝ කඳුළු ගෑස් වැනි සාමාන්‍යයෙන් උද්ඝෝෂණ මර්දනය කරන කිසිදු ආකාරයක කටයුත්තක් අපගේ රජය විසින් නො කරන ලද බැව් සිහිපත් කරනු කැමැත්තෙමි. මාගේ කාර්යාලය ඉදිරිපස සිටිමින් කරන ලද කිසිදු විරෝධතාවයකට හෝ උද්ඝෝෂණයකට පොලිසිය / ත්‍රිවිධ හමුදාව යොදා ගනිමින් පහර දීම් වැනි මර්දනකාරී ක්‍රියා අනුගමනය නො කරන ලද බැව් ඔබ වහන්සේලාට ගෞරවයෙන් සිහිපත් කරමි.

2022.04.19 වන දින මහජන විරෝධතාවය අතරතුර සිදු වූ සිද්ධිය සම්බන්ධයෙන් මා දැඩි සේ කම්පාවට පත් වන අතර ඒ සම්බන්ධව විධිමත් පරීක්ෂණයක් පැවැත්වීම සඳහා කණ්ඩායම් කිහිපයකට ම උපදෙස් ලබා දී ඇත. එම පරීක්ෂණ අවසන් වූ වහා ම ඒ සම්බන්ධයෙන් ඔබ වහන්සේලා දැනුවත් කිරීමට බලාපොරොත්තු වෙමි.

ඔබවහන්සේලා ද සඳහන් කරන පරිදි දැනට උද්ගත වී ඇති ආර්ථික අර්බුදයට පැවති සියලු ම රජයන් වග කිව යුතු අතර, ඒවාට තාවකාලික හා තිරසර විසඳුම් ලබා දීමට අප රජය මේ වන විට විධිමත් මාර්ගයකට අවතීර්ණ වී ඇති බැවින්, එයින් නිසි ප්‍රතිඵල නෙළා ගැනීමට යම් කාලයක් අප වෙත ලබා දෙන මෙන් ඔබවහන්සේලාගෙන් දෙපා නැමැද ඉල්ලා සිටින අතර ම ඔබවහන්සේලාගේ අවවාද අනුශාසනා ඉතා ගෞරවයෙන් යුතුව ඉදිරියේදීත් අපේක්ෂා කරමි.

සියලු දේශපාලන පක්‍ෂ එකතු කර ගෙන වත්මන් අර්බුදකාරී දේශපාලන වාතාවරණය සමථයකට පත් කිරීමට හා අද අප රට පත් ව ඇති ආර්ථික අර්බුදයෙන් ගොඩ ඒමට ඔබවහන්සේලා මැදිහත් වී යම් කිසි ක්‍රියා මාර්ගයක් ගැනීමට යෝජනා කරන්නේ නම්, ඒ සඳහා මාගේ පූර්ණ දායකත්වය ලබා දෙන බැව් ද ඉතා ගෞරවයෙන් සිහිපත් කරමි.
මෙයට,
ශාසනස්ථිතිකාමී,
ගෝඨාභය රාජපක්ෂ
2022 අප්‍රේල් මස 21 වන දින”

කල් දුන්නොත් බුදු සරණයි !

මේ සම්බන්ධයෙන් අදහස් දක්වමින් දේශපාලන විචාරකයකු පවසා සිටියේ , තමන් වැඩිදුරටත් කිසිවක් නොකියන බවත් , කල් දුන්නොත් බුදු සරණයි කියා පමණක් කියන බවයි.

" ලොක්කව එලවීමෙන් මිසක් අපි පස්ස බලන්නේ නෑ " යැයි පාර්ලිමේන්තු මන්ත්‍රී හරීන් ප්‍රනාන්දු පවසයි.

මාධ්‍ය හමුවකදී අදහස් දක්වමින් ඔහු මේ බව පැවසූ අතර එහිදී ඔහු ලොක්කා යනුවෙන් අදහස් කර සිටියේ ජනාධිපති ගෝඨාභය රාජපක්ෂ බව දේශපාලන විචාරකයන් පවසයි.

අප්‍රේල් 26 මහ නුවර සිට කොළඹ දක්වා සමගි ජනබලවේගය පවත්වන විරෝධතා පාගමනක් සම්බන්ධයෙන් අදහස් දක්වමින් මන්ත්‍රීවරයා මේ බව පැවසීය.

මැයි 01 වනදා අතිවිශාල ජනකායක් සමග කොළඹ වැටලීමක් සමගි කඳවුර පක්ෂය සංවිධානය කර ඇත.

මේ අවස්ථාව සඳහා මනූෂ නානායක්කාර මන්ත්‍රීවරයා ද සහභාගි ව සිටියේය.

ලංකා ජන අරගලය සම්බන්ධයෙන් ජර්මන් තානාපති ධනාත්මක ප්‍රතිචාරයක් දක්වා ඇත.

විචාරකයන් පවසන්නේ මෙය සාමාන්‍යයෙන් අත්දැකීමට නොලැබෙන ප්‍රතිචාරයක් බවයි.

එය පහත දැක්වෙයි .

ශ්‍රී ලංකාවේ සාඩම්බර මිනිසුන් ප්‍රකාශනයේ නිදහස සඳහා ඇති අයිතිය කෙතරම් සාමකාමී ලෙස භාවිතා කරන්නේද යන්න ගැන මා තුළ ඇත්තේ පැහැදීමකි. එය මට, සාමකාමී විරෝධතා කොතරම් බලවත් වියහැකිද යන්න අප විසින් අත්විඳින ලද, 1989 දී සිදුවූ ජර්මනිය යළි එක්සත්වීමේ සිද්ධිය මතකයට නංවයි. මීට සම්බන්ධ සියලු පාර්ශ්වයන්ට සාමකාමීව සිටීමට ශක්තිය ලැබේවායි ප්‍රාර්ථනා කරන්නෙමු!

හොල්ගර් සොයිබර්ට්
ශ්‍රී ලංකාවේ ජර්මන් තානාපති

(පහත දක්වා ඇත්තේ තානාපතිවරයාගේ එම ට්විටර් පණිවිඩයයි.)

මෙරට වාණිජ බැංකුවල සහ රාජ්‍ය බැංකු වල ඇමෙරිකා එක්සත් ජනපද ඩොලරයට සාපේක්ෂව ශ්‍රී ලංකා රුපියල 345 අගයක් දක්වා අද (25) පහළ වැටි ඇති බව වාර්තා වෙයි.

ඇමෙරිකා එක්සත් ජනපද ඩොලරයට සාපේක්ෂව රුපියල මෙරට ඉතිහාසයේ මෙතරම් අගයකට පහළ වැටුණු පළමු අවස්ථාව මෙය බව මූල්‍ය විශ්ලේෂකයන් පවසයි.

ශ්‍රී ලංකා මහ බැංකුව අද (25) නිකුත් කළ දෛනික විදේශ විනිමය අනුපාතවලට අනුව ඇමෙරිකා එක්සත් ජනපද ඩොලරයක ගැනුම් අනුපාතය රුපියල් 330.0000 ක් වූ අතර විකුණුම් අනුපාතය රුපියල් 342.4979 ක් විය.

ශ්‍රී ලංකාවේ ක්‍රියාත්මක වන ජාත්‍යන්තර බැංකුවක අද දින යාවත්කාලීන කළ විදේශ විනිමය අනුපාතිකයේ ඇමෙරිකා එක්සත් ජනපද ඩොලරයක විකුණුම් මිල රුපියල් 355 ලෙස සටහන් විය.

වත්මන් ආණ්ඩුවට එරෙහි විපක්ෂය ඉදිරිපත් කිරීමට නියමිත විශ්වාස භංගයට පක්ෂව ඡන්දය දීමට තීරණය කළ බව ලංකා කම්කරු කොන්ග්‍රසයේ නායක ජීවන් තොණ්ඩමන් පවසයි.

රටේ ජනතාවගේ හා වතුකර ජනතාවගේ යහපත උදෙසා මෙම තීරණය ගත් බව ඔහු සිය ටිවිටර් ගිණුමේ පණිවිඩයක් තබමින් සඳහන් කර ඇත.

ලංකා කම්කරු කොන්ග්‍රසයේ විධායක සභාව රැස්වූ අවස්ථාවේ මෙම තිරණය ගත් බව මන්ත්‍රීවරයා සඳහන් කරයි.

ජීවන් තොණ්ඩමන් වත්මන් ආණ්ඩුවේ වතු නිවාස හා ප්‍රජා යටිතල පහසුකම් රාජ්‍ය අමාත්‍යවරයා ලෙස කටයුතු කළ නමුත් පසුව ස්වාධීන විය.

එසේම පසුගියදා ඔහුට නාමල් රාජපක්ෂ දැරූ කැබිනට් අමාත්‍ය ධූරය ලබාදීමට උත්සාහ කර ඔහුව ආණ්ඩුවට දිනා ගැනීමට උත්සාහයක් දියත්කර තිබුණත් එය ව්‍යර්ථව ගියේ, ජීජීවන් තොණ්ඩමන් එය ප්‍රතිකේෂ්ප කළ නිසාය.

අන්තර්කාලීන ආණ්ඩුවක් පිහිටුවීමට සහ ආර්ථික අර්බුදය විසඳීම සඳහා කඩිනම් පියවර ගැනීමට එකඟ වන බව ජනපතිවරයා ත්‍රෛනිකායික මහානාහිමිවරුන්ට ලිපියක් එවමින් දැනුම්දී ඇතැයි අස්ගිරි මහා නිකායේ ලේඛකාධිකාරී මැදගම ධම්මානන්ද හිමි පවසයි.

එසේම නව ව්‍යවස්ථාවක් පාර්ලිමේන්තුවේ අනුමැතිය ඇතිව රටට ඉදිරිපත් කිරීමටද ජනාධිපතිවරයා කැමැත්ත පළ කර ඇතැයි හිමිනම පවසයි.

කෙසේ වුවත් ගෝල්ෆේස් අරගල බිමේ ආරංචි මාර්ග සඳහන් කරන්නේ තම අරගලය මේ නොවන බවය.

තමන් අරගලය දියත්කර ඇති ප්‍රමුඛ සටන් පාඨය වන්නේ #GoHomeGota බවත් එය කොතරම් සාධාරණ ද යන්න ජනාධිපති පසුගියදා නව කැබිනට් මණ්ඩලය පත්කිරීම අවස්ථාවේ පිළිගත් බවත් ඔවුන් පවසයි.

එබැවින් රටම බංකොලොත් කර මිනිසුන් කුසගින්නේ යන එන මං නොමැති කළ ජනාධිපතිට තවදුරටත් ධූරයෙ රැඳී සිටීමට යුතුකමක් නැති බවත් ඔවුන් පවසයි.

ඒ අනුව තම අරගලය අඛණ්ඩව ඉදිරියට ගෙනයන බවත් ඔවුන් පවසයි.

ඉන්දියානු නිදහස් සටන තුළ ගාන්ධි ඇතුළු පිරිස රැගෙන ගිය අවිහිංසාවාදී ව්‍යාපාරය ඉන්දියාවෙන් නතර නොවිණි. එයින් පසු ඉන්දියානු ආදර්ශය ගත් ඇමරිකාවේ මාටින් ලුතර් කිං ජුනියර් විසින් නායකත්වය ලබා දුන් කළු ජාතික ව්‍යාපාරය තුළත් ප්‍රබලව දක්නට ලැබුණි. සාමකාමී පාද යාත්‍රා , උද්ඝෝෂණ වැඩවර්ජන, හර්තාල් තුළින් කළු ජාතිකයින්ගේ සිවිල් අයිතිවාසිකම් ඉල්ලා සිටීමයි. ඉන් අනතුරුව නෙල්සන් මැන්ඩෙලා විසින් නායකත්වය ලබා දුන් දකුණු අප්‍රිකාවේ නිදහස් සටන තුළ ද මෙම සංකල්පය ප්‍රායෝගිකව යෙදවීම දක්නට ලැබුණි. දැන් දැන් ලෝකයට අවිහිංසාවාදී ආදර්ශ ආකෘතිය පිළිබඳ පිබිදීම ඇති කරන්නේ ශ්‍රී ලංකාවේ රාජපක්ෂවරු සම්බන්ධයෙන් පවත්වාගෙන යන ගාලුමුවදොර පැවත්වෙන තරුණ විරෝධතා තුළින්ය.

එය යටත්විජිත වලින් නිදහස ලබා ගැනීම සඳහා ලොව පුරා සිදුකල පැරණි සමාජ ව්‍යාපාර වලට හාත්පසින්ම වෙනස් ස්වරූපයක් ගන්නා ආකාරය පහුගිය දිනවල අරගලය නිරීක්ෂණය කිරීමේ දී අරගල භූමියේ සැරීසැරීමේ දී දක්නට ලැබිණි. හුුදු විරෝධතා වෙනුවට විවිධ සංස්කෘතික අංග එකතුවීමත් දක්නට ලැබුණි. පාද යාත්‍ර , සත්‍යග්‍රහ , උද්ඝෝෂණ ද විවිධ කලා ශිල්ප ක්‍රම භාවිතා කරමින් සිදුකරන විරෝධතා ද දක්නට ලැබිණි. ජනතාව ආකර්ශණය සඳහා විරෝධතාවයන් සඳහා ද නව මෙවලම් යොදාගැනීම් දක්නට ලැබුණි.

ඒ අතර රාජපක්ෂවරුන්ට ගෙදර යන්නට කියන සටන් පාඨයට ඉතාමත් බර හදකම්පන කරවන අවි යොදාගැනීමත් වරින් වර දක්නට ලැබුණි. එය රාජපක්ෂවරුන් ගෙදර යන තැනට ඉල්ලා මිරිහානෙන් ඇරඹි උද්ඝෝෂණයේ බිළිදෙකු වඩාගත් තරුණ මවකගේ ආගමනය අරගල තුළ ප්‍රබල රූපකයක් එක්කරන්නට විය. තවත් බහින්නට තැනක් නැතුව පතුලටම වැටුණු අපිට සමාජ මාධ්‍ය භාවිතා කරන ජනතාවගේ වෝලය සකස් වුයේ මෙම තරුණ මවගේ පිංතූරයෙනි. එය විරෝධතාවය ප්‍රකාශ කරන තවත් ප්‍රබල මාදිලියක් විය. කාන්තාවක් වශයෙන් ඇයට විඳින්නට සිදුවන අනේකවිඳ දුක්කදොම්නස් ඇඟේ ප්‍රකාශයෙන් ද අපිට අසන්නට ලැබිණි. ඇයගේ නිරූපණය සමස්ත අම්මාවරුන්ගේ පීඩාවම සංකේතාත්මකව නිරූපණය විය.

ඒ අතර අන්තර් විශ්වවිද්‍යාල ශිෂ්‍ය බල මණ්ඩලයෙන් සංවිධානය කළ පාර්ලිමේන්තුව අසල තිබු විරෝධතාවයක ගැහැණු ළමයෙක් පොලිස් නිළධාරියෙකුට රෝස මලක් දෙන පිංතූරයක් ද සැරිසරන්නට විය. වියට්නාමය යුද්ධය වැනි ලෝක යුද්ධ වලදී සිදුකළ ආදරය සහ උණ්ඩය පිළිබඳ උපායිමාර්ගික සිතා බැලීමක් තරුණ අරගලය තුළට එක්කර තිබිණි. ඊට වඩා එය ප්‍රබල රූපකයක් වන්නේ මෙම නූතන විලාසිතාවෙන් සැරසී සිටින තරුණිය සමස්ත තරුණ ප්‍රජාව සහ පීඩාව නිරූපණය කරමින් රාජපක්ෂවරුන්ගේ නපුරට එරෙහිව අවිහිංසාවාදය පැතිරවීමත් අරගලයේ වාමවාදී මානය තවදුරටත් තීවුර කළේය.

අරගලයේ දවසින් දවස වෙනස්වන උපායමාර්ගික අතර නැවතත් ගාන්ධීයානු අවිහිංසාවාදී උපක්‍රම මෙහෙයවීම් දක්නට ලැබුණි. ඒ නිසා මෙම අරගලයේ හැඩය විටෙක නව සමාජ ව්‍යාපාරවල ලක්ෂණ නිරූපණය ද තවත් විටෙක යටත්විජිත නපුරට එරෙහිව සිදුකළ අරගල වල ලක්ෂණ නිරූපණය ද වරින් වර දක්නට ලැබිණි.

එය කන්‍ය සොයුරියන් විසින් අන්තරේ පෙළපාලී ආ තරුණයින් ඉදිරියට ඇවිත් ඔවුන්ව ආරක්ෂා වැටක් සේ සිට ගැනීමයි. යක්ෂයාට ඝණ ආදර තාප්පය බැඳීම බලා සිටින්නන්ට නෙත් කුදුළුන් තෙත් විය. මෙය මා දකින්නේ ශ්‍රී ලාංකේය ඩිජිටල් තාක්ෂණය භාවිතා කරන අරගලකරුවන්ගේ ඓතිහාසික ගාන්ධීයානු මොහොත බවයි. එය නැවතත් ඉන්දියානු නිදහස් ව්‍යාපාරයේ එකිනෙක සිදුවීම් අල්ලා සකස් වූ චිත්‍රපටියක් අප හමුවේ දිස්වෙන ආකාරයෙන් කම්පනයටත් අරගලය කෙරෙහි අනුරාගය තීවුර කිරීමටත් හේතුවක් විය. අරගලයට ආදරය කිරීමටත් නොකඩවා පෙළඹීමට හේතු වේ.

මෙමඟින් පෙන්නුම් කරන්නේ ගේඨාගෝගමේ පුරා සිටින සියලු ප්‍රජාවන් ඇතුළු සමාජ වෙනසක් අපේක්ෂා කරන පුද්ගලයින් සඳහා ප්‍රබල ආධ්‍යාත්මික සංකේතයක් බවට මෙම කන්‍ය සොයුරියන් පත් වී ඇති බවයි. අනෙක් අතට උණ්ඩය වෙනුවට දයාව වැපිරීම ද බලා සිටින අප තුළත් ඇහැට කදුළු කැට උනන්නට වීම මඟින් ද අරගලය තුළ සිටින තරුණයින් හා සියලු වැඩිහිටියන් සමෝධානික වීම ද මෙමඟින් පෙන්වන යටි අරුත වේ.

සාමාන්‍යයෙන් අන්තරේ අරගල කෙරෙහි වපර ඇසින් බලන බොහෝ දෙනෙකුගේ මුවින් ද යක්ෂයාගෙන් ආරක්ෂා කර දෙන මෙන් දේව කන්නලව් ද මේ ක්‍රියාව තුළ ඇතුළත් වේ. ඒ නිසා දෙවියන් ඉදිරියේ යක්ෂයා දණ නවන මොහොත ලෙසත් මෙය දැක්විය හැකිය.

අනෙක් අතට කාඩිනල් ඇතුළු පිරිසත් මෙම මොහොතේ පාස්කු ප්‍රහාරයේ වින්දිතයින්ට යුක්තිය ඉල්ලා ජාත්‍යන්තරය දැනුවත් කරමින් කිතුණුවන්ගේ ගෞරවාදරයට පත් වූ වතිකානුවේ ශුද්ධ වූ පාප් වහන්සේ ලඟ දණ නමා සිටින මොහාතක කන්‍ය සොයුරියන්ගේ නැඟී සිටීම භූ දේශපාලනික වැදගත් මොහොතක් ද නිරූපණය කෙරේ.

සැමුවෙල් හන්ටින්ටිං සඳහන් කරන බටහිර යටත්විජිතවාදයේ ඉලක්ක බවට පත්වන අපේ ඉතිහාසය බටහිර හා එක්ව හැඩ සකස් කරමින් සිටියි. ලංකාව වැනි රටක් උදාහරණයට ගත් විට බෙදුම්රේඛා විශාල වශයෙන් අලුතින් නිර්මාණය විමට බල දේශපාලනය ක්‍රියාත්මක වුවත් නව අන්තර් ආගමික ජනවාර්ගික සමාජ පර්යයායක් ද ගොඩනැඟීමට මෙම අරගලය අනෙක් අතට දායකත්වය සපයනු ලැබෙන බව අපිට අවබෝධ කරගත හැකියි.

මෙමඟින් ස්ත්‍රීමය ශරීරයේ සංස්කෘතික නිර්මිතය ද නිරූපණය ද අන්තර්ගත වේ. ගැටුම් නිර්මාණය කරන්නේ පුරුෂයින් මූලීක කරගත් පුරුෂාධිපත්‍ය සමාජය වන අතර ස්ත්‍රිය ඒවා නිවීමට දායක වීම වැනි ස්ත්‍රීපුරුෂ සමාජභාවීය නිර්මිත වලට වඩා ඇයගේ නිර්භීත ඉදිරිපත් වීමක් ද මෙහි අන්තර්ගත කරුණු අතර වේ. රට වෙනුවෙන් යුක්තිය වෙනුවෙන් සමාජය සමතුලිත කිරීමේ භූමිකාව ද සමස්ත ස්ත්‍රී නිරූපණයෙන් දිස් වේ.

පාස්කු ප්‍රහාරයට යුක්තිය ඉටුකරනවා යැයි ජනතාව මුලා වේ දමා බලයට ආ පාලක පංතියට සුදු ලෝගුවේ බලය පෙන්වීමේ රැඩිකල් අවිහිංසාවාදී ප්‍රතිරෝධය ද මෙහි අවධාරණය වේ. මෙය හුදු අවිහිංසාවදී ක්‍රියාවකට වඩා රැඩිකල් ලෙස මට හැඟෙන්නේ රාජපක්ෂ නපුර වෙනුවට යුක්තිය සහ සමානාත්මතාවය සඳහා සාමකාමී වෙඩි මුරය මෙම කන්‍ය සොයුරියන් විසින් තැබීමයි. එය තෙවැනි පාර්ශවයන්ගේ අවධානයට යොමු කිරීමට ද ඔවුන් කෙරෙහි යුක්තිය ඉටුවීමට ද රට වර්තමානයේ ඇද තබා තිබෙන අර්බුදය තවදුරටත් ජාත්‍යන්තරයේ අවධානනයටත් හේතු වේ.

දිනෙන් දින අලුත් වන අන්තර් ආගමික සහජීවනය දිස්වන පොදු ජන අරගලයට ජය !!

චන්දිමා ජයසේන ගේ ෆේස්බුක් ගිනුමෙනි

ආර්ථික වැඩපිළිවෙළ සම්බන්ධයෙන් බලධාරීන් සමග සමීපව කටයුතු කිරීමෙන් සහ අනෙකුත් සියලුම පාර්ශවකරුවන් සමග සම්බන්ධවෙමින්, වත්මන් ආර්ථික අර්බුදය ජය ගැනීම සඳහා ශ්‍රී ලංකාව දරණ ප්‍රයත්නයන්ට ඉදිරියේදී සහය වන බව ජාත්‍යන්තර මූල්‍ය අරමුදල සඳහන් කරයි.

මේ සම්බන්ධයෙන් නිවේදනයක් රජයේ ප්‍රවෘත්ති අධ්‍යක්ෂ ජනරාල් විසින් නිකුත්කර ඇති අතර එය පහත දැක්වෙයි.

 ශ‍්‍රී ලංකාව සම්බන්ධ ජාත්‍යන්තර මූල්‍ය අරමුදල් කණ්ඩායමේ ප‍්‍රකාශය
අප්‍රේල් 23, 2022.
වොෂිංටන් නුවර:

ජාත්‍යන්තර මූල්‍ය අරමුදලේ සහ ලෝක බැංකුවේ 2022 වසරේ වොෂිංටන් නුවර පැවති රැස්වීමේ දී ජාත්‍යන්තර මූල්‍ය අරමුදලේ කළමනාකාර අධ්‍යක්ෂ ක‍්‍රිස්ටලිනා ජෝජිවා සහ එහි අනෙකුත් ජ්‍යෙෂ්ඨ නිළධාරීන් මුදල් අමාත්‍ය අලි සබ්රි සහ ශ‍්‍රී ලංකා මහ බැංකුවේ අධිපති නන්දලාල් වීරසිංහ විසින් ප‍්‍රධානත්වය දරන ලද ශ‍්‍රී ලංකා දූත පිරිස හමුවී දැනට උද්ගතව ඇති ආර්ථික අභියෝග ජයගැනීම සඳහා වූ ප‍්‍රතිපත්තිමය ක‍්‍රියාකාරකම් පිලිබඳව සාකච්ඡා කරන ලදී.

ශ‍්‍රී ලංකාව සඳහා වූ ජාත්‍යන්තර මූල්‍ය අරමුදල් කණ්ඩායම එම අරමුදලේ උපකාරක වැඩසටහනක් යටතේ මූලික තාක්ෂණික සාකච්ඡා ශ‍්‍රී ලංකා දූත පිරිස සමඟ සිදු කරන ලදී. පසුව ශ‍්‍රී ලංකාව සඳහා වූ ජාත්‍යන්තර මූල්‍ය අරමුදල් කණ්ඩායමේ නායක මසාහිරෝ නොසාකි පහත සඳහන් ප‍්‍රකාශය අද දින නිකුත් කරන ලදී.

බලධාරීන්ගේ ඉල්ලීම පරිදි ශ‍්‍රී ලංකා දූත පිරිස සහ ජාත්‍යන්තර මූල්‍ය අරමුදල් කණ්ඩායම එම අරමුදලේ උපකාරක වැඩසටහනක් යටතේ මූලික තාක්ෂණික සාකච්ඡා පලදායී ලෙස පවත්වන ලදී. ශ‍්‍රී ලංකාවේ මෑතක ඇතිවූ ආර්ථික හා මූල්‍ය ප‍්‍රවණතා, සර්ව ආර්ථික ස්ථාවර භාවය යළි ඇති කිරීම සඳහා විශ්වසනීය හා පැහැදිලි උපායමාර්ග ක‍්‍රියාත්මක කිරීමට ඇති අවශ්‍යතාව සහ දිළිඳු හා දිළිඳු බවින් අගතියට පත්විය හැකි ජන කොටස් වලට පවතින ආර්ථික අර්බුද හේතුකොටගෙන සිදුවිය හැකි අහිතකර බලපෑම් අවම කිරීම පිණිස ශක්තිමත් සමාජ ආරක්ෂණ ජාලයක ඇති වැදගත්කම මෙම සාකච්ඡාවලට ඇතුලත් විය. ණය හිමියන් සමඟ සහයෝගීතාවයෙන් යුතුව සංවාදයක නියැලීමට බලධාරීන් ගේ ඇති සැලසුම ජාත්‍යන්තර මූල්‍ය අරමුදල් කණ්ඩායම පිළිගන්නා ලදී.

තවද බළධාරීන් සමඟ සහ ඔවුන්ගේ ආර්ථික වැඩසටහන් සමඟ සමීපව කටයුතු කරමින් අර්බුද වලට කාලීන විසඳුම් සෙවීමට උත්සාහ දරන සියලූ කොටස්කරුවන් සමඟ ද එක්වී දැනට පවතින ආර්ථික අර්බුද ජය ගැනිමට ශ‍්‍රී ලංකාව දරන ප‍්‍රයත්නයට ජාත්‍යන්තර මූල්‍ය අරමුදල් කණ්ඩායම උපකාර කිරීමට බලාපොරොත්තු වේ.

ටිං යෑං,
ජාත්‍යන්තර මූල්‍ය අරමුදලේ සන්නිවේදන දෙපාර්තමේන්තුවේ මාධ්‍ය සම්බන්ධතා හා ප‍්‍රවෘත්ති නිලධාරී

තමාගේ අගමැති ධූරය යටතේ ආණ්ඩුව ස්ථාව බව පෙන්වීමට මන්ත්‍රීවරුන් 113 දෙනෙකු ගේ අත්සන් නොලැබුණහොත් හෙට (25) දින තුළ ධුරයෙන් ඉල්ලා අස්වනබව අගමැති මහින්ද රාජපක්ෂ පවසා ඇති බව දේශපාලන ආරංචි මාර්ග පවසයි.

කෙසේවුවද අගමැති මහින්ද රාජපක්ෂ මිට පෙර පළමුව සඳහන් කර සිටියේ පාර්ලිමේන්තුවේ 113 ක බහුතරය විපක්ෂය විසින් පෙන්නුවහොත් පමණක් තමන් අගමැති ධුරයෙන් ඉල්ලා අස්වන බව වන බවයි.

දෙවනුව ඔහු සඳහන් කර සිටියේ අන්තර්වාර ආණ්ඩුවක් පිහිටුවීමට කටයුතු යෙදුනත් එහි අගමැති තමන් බවයි.

කෙසේ වුවත් මේ වන විට අගමැති මහින්ද සිය පුත්‍රයා වන හිටපු අමාත්‍ය , පාර්ලිමේන්තු මන්ත්‍රී නාමල් රාජපක්ෂ වෙත විපක්ෂ නායක ධූරය ලැබෙන ආකාරයක් ඉල්ලා අස්වීමේ සූදානමක් ඇති බව දේශපාලන ආරංචි මාර්ග පවසයි .

එහෙත් ඊට රාජපක්ෂ පවුලේ එකඟතාවක් නොමැති බවත් වාර්තා වෙයි.

අගමැති සඳහා පොහොට්ටු නම් 3ක් !

මේ අතර දේශය පුවත්පත වාර්තා කරන්නේ , යෝජිත අන්තර්වාර ආණ්ඩුවේ අග්‍රාමාත්‍ය ධුරය සඳහා නම් තුනක් යෝජනා වී ඇතැයි ඉහළ පෙළේ දේශපාලන අංශ ආරංචි මාර්ග සඳහන් කරන බවය.

දේශයට ලැබුණු විශ්වාස කටයුතු තොරතුරු මගින් සනාථ වූයේ එම නම් අතර කතානායක මහින්ද යාපා අබේවර්ධන, හිටපු අමාත්‍ය ඩලස් අලහප්පෙරුම සහ අමාත්‍ය දිනේෂ් ගුණවර්ධන යන මහත්වරැන්ගේ නම් ඇතුළත් බව යනුවෙන් ද එම පුවතේ සඳහන් වෙයි.

අදාළ පුවතේ වැඩිදුරටත් මෙසේද සඳහන් වෙයි.

මෙම ප්‍රධාන නම්වලට අමතරව වාසුදේව නානායක්කාර, රමේෂ් පතිරණ යන මහත්වරුන්ගේ නම්ද ඇතැම් පිරිස් අග්‍රාමාත්‍ය තනතුර සඳහා යෝජනා කර ඇතැයි වාර්තා වෙයි.

හිටපු අග්‍රාමාත්‍ය රනිල් වික්‍රමසිංහ මහතාද ජනාධිපති බලතල ඉවත් කරන පරිවාස ආණ්ඩුවක අග්‍රාමාත්‍ය ධුරය භාරගැනීමට සූදානම් වන බව එ.ජා.ප. නියෝජ්‍ය නායක රුවන් විජයවර්ධන මාධ්‍යයට ප්‍රකාශ කර තිබිණි.

මේ අතර සිකුරාදා සවස හිටපු ජනමාධ්‍ය අමාත්‍ය ඩලස් අලහප්පෙරුම ජනාධිපතිවරයා වෙත ලිපියක් යොමුකරමින් දන්වා ඇත්තේ ජනතාවගේ ඉල්ලීම් ඉටුකිරීම සඳහා අග්‍රාමාත්‍යවරයා වරයා පුමුඛ කැබිනට් මණ්ඩලය ඉවත් විය යුතු බවය.

එසේ ඉවත් වී පාර්ලිමේන්තුවේ සියලුම පක්ෂවල එකඟතාව අනුව වසරක කාලයක් සඳහ ප්‍රමාණයෙන් කුඩා කැබිනට් මණ්ඩලයක් සහිත සර්වපාක්ෂික ආණ්ඩුවක් සැකසිය යුතු බව ද ඔහු විසින් යෝජනා කර ඇත.

ඒ මේ උල්කටු සහිත මාර්ග බාධක ආවරණය කර තිබීම නිසා ජනතාවට හානි වීමේ අවධානම සැලකිල්ලට ගෙනය.

මේ සම්බන්ධයෙන් නිවේදනයක් නිකුත්කරමින් නීතීඥ සංගමය රජයට නැවතත් අවධාරණය කරන්නේ, පොලිස්පති පොලීසිය හා සන්නද්ධ හමුදා ඕනෑම තත්ත්වයකදී ක්‍රියා කළ යුත්තේ, විරෝධතාකරුවන්ගේ හා ජනතාවගේ ආරක්ෂාව සහතික කිරීමටත් සාමකාමී උද්ඝෝෂණ කිරීමේ අයිතිය මෙන්ම නිදහසේ ගමන් කිරීමේ පුරවැසි අයිතිය තහවුරු කළ යුතු බවයි .

යම් කිසි හේතුවකින් ප්‍රචණ්ඩකාරී වාතාවරණයක් ඇති වුවහොත් එය රටට දරුණු ප්‍රතිවිපාක අත් කර දීමට තුඩු දිය හැකි බව ද ශ්‍රී ලංකා නීතීඥ සංගමය නිකුත් කළ නිවේදනයේ සඳහන් ය.

#GoHomeGota අරගලය සම්බන්ධයෙන් ආන්දෝලනාත්මක සටහනක් තැබීමට තරුණ දේශපාලනඥයකු වන වරුණ දීප්ත රාජපක්ෂ කටයුතු කර ඇත.

එම සටහන පහත දැක්වෙයි.

රාජපක්ෂ ලා පැරදවීමට යනමග
රාජපක්ෂවාදයට යට නොවෙමු !

ගාලුමුවදොර අරගලය ඇරබීමට මුල්වූයේ රැඩිකල් ලිබරල්වාදීන් පිරිසකි.
එයට රැඩිකල් වාමාංශිකයන් පිරිසක් එකතුවිය.

මේ එකතුව දෙස මා ඉතා ආස්වාදයෙන් බලා සිටියේ මේ දෙපාර්ශවය අතර අරගලබිමේ බොහෝදේ හුවමාරුවේය යන විශ්වාසයෙනි.

අරගලය ජයගැනීමට බහුජනතාව එක්කර ගතයුතුය. එනිසා වඩාත්ම පුලුල් සාමුහික එකගතාවයක් සහිත සටන් පාටයක් අවශ්‍යය.
(Collective will) gota go home ඒ සදහා හොදින් ගැලපුනි.

සටන ජයගැනීමට බහුජනතාව කැදවිය යුතුය

රාජපක්ෂලා වෙනුවෙන් කහකඩයන් එනවිට අරගලකරුවන්ට තම සහයට භික්ෂූන් කැදවීමට සිදුවේ.

කොන්ඩම් පෙන්නා මඩගසන විට ,
අරක්කු සිගරැට් පෙන්නවිට,
පිලිතුරු බැදිමට සිදුවේ.
කුනුහරප කියන්න එපා කියන්න සිදුවේ

අද දේශප්‍රේමී ගී පමනක් කියන්න කියා පිරිසක් ඉල්ලා ඇත.

කෙතරම් සුදන්දර වුවද යුතෝපියාවකට ලේසියෙන් පවතින්නට නොහැක. ගාලුමුවදොර සුන්දර යුතෝපියාවට ඇති සැබෑ අභියෝගය එයයි. රාජපක්ෂලාට එය මර්ධනය ලෙයින් කුඩුපට්ටම් කිරීමට නොහැකිවීම අරගලය ලැබූ පොදුජන සහයෝගයේ ප්‍රතිපලයකි. එහෙත් රාජපක්ෂ වාදයෙන් ගැලවීම ලේසිනැත.

එය ආදරය ලෙසින්
ආදාර ලෙසින්
උපදෙස් ලෙසින්
ඉල්ලීම් ලෙසින්
පැමිනෙනු ඇත.

එය පරාජය කිරීමේ වගකීම අරගලකරුවන්ගේ පමනක් වගකීම නොවේ. එය දේශපාලන වාද ප්‍රවාද ඉදිරිපත් කරන්නන් සැමගේ වගකීමකි.

මම එන්න එපා කිව්වද එහි යමි.
හැකි අයුරින් දායක වෙමි.
එහෙත් එය විවේචනය කරමි.

මක්නිසාද එය අත්‍යාවශ්‍ය දායකත්වයක් වන බැවිනි.
දුශ්කර අරගලයක වෙහෙසෙන්නන්ට එය වේදනාවක් වියහැක.
දේශපාලන පක්ෂ වලට තමන්ගේ ගමනට එරෙහි ද්‍රෝහීකමක් වියහැක.
එහෙත් ආදරය ස්වරූපයෙන් එන රාජපක්ෂවාදයට වඩා අපේ ප්‍රවාද තුල ආදරය ඇත.
සටන් බිමේ විරාමයක කතාකරමු

Csk Thushara, Sanjaya Liyanage, Thusitha Pathiran,a Chanaka Hettiarachchi, Shanuka Karunaratne, Thushara Sewwandi Witharana, Thushara D Wanniarachchi, Sanjeewa Batuwatta, Vidarshana Kannangara, Nirmal Dewasiri

මේ ප්‍රසංගය ගැන මා දන්නාදේ නිවැරදි නොවිය හැක. එහෙත් ඒ පිලිබද අරගලයේ අප්පච්චිලා සහ අම්මලා ලෙස පෙනී සිටින්නන් කල, කීදෑ අසා සිටියෙමි.

වරුණ දීප්ත රාජපක්ෂ ගේ ෆේස්බුක් ගිනුමෙනි

රටත් ආණ්ඩුවත් පත්ව ඇති දේශපාලන අරාජිකත්වය ඇතුළු තීරණාත්මක දේශපාලන තීන්දු තීරණ කිහිපයක් සම්බන්ධයෙන් සාකච්ඡා කිරීමට ජනාධිපති ගෝඨාභය රාජපක්ෂ සහ අගමැති මහින්ද රාජපක්ෂ අතර අද (24) මුහුණට මුහුණ සාකච්ඡාවක් සිදුවනු ඇති බව දේශපාලන ආරංචි මාර්ග පවසයි.

මෙම තීන්දුව ගෙන ඇත්තේ හදිසියේ වන බවත් වාර්තා වෙයි.

ඊට පෙර අගමැති මහින්ද රාජපක්ෂ ට පාර්ලිමේන්තුවේ බහුතරය ඇති බව පෙන්වීමට පාර්ලිමේන්තු මන්ත්‍රීවරුන් ගේ සහය පළකිරීමේ ලියවිල්ලක් සකස් කිරීමට ගනුලැබූ උත්සාහය ද ව්‍යර්ථව ඇති බවත් වාර්තා වෙයි.

දේශපාලන ආරංචි මාර්ග සඳහන් කරන ආකාරයට බැසිල් රාජපක්ෂ ගේ මූලිකත්වයෙන් මේ උත්සාහය දියත්කර ඇත. ඒ සම්බන්ධයෙන් මැති ඇමතිවරුන් දැනුවත් කිරීම පොදුජන පෙරමුණේ ප්‍රධාන ලේකම් සාගර කාරියවසම් සිදුකර ඇත. එහෙත් ඒ ලියවිල්ල සඳහා අවශ්‍ය අත්සන් ප්‍රමාණය ලබා ගැනීම අසාර්ථක වී තිබේ.

ඒ අනුව අද රාත්‍රියෙහි මෙම සාකච්ජාව පැවැත්වීමට නියමිතව ඇති බව වාර්තා වේ.

මෙම සාකච්ඡාව තීරණාත්මක වන්නේ ඊළඟ කැබිනට් මණ්ඩල හමුවේදී ජනාධිපති බලතල කප්පාදු කර ඒවා අගමැති යටතට ගැනීමට යෝජනා ප්‍රමාණයක් අගමැති විසින් ඉදිරිපත් කිරීමට නියමිත නිසා බවත් දේශපාලන ආරංචි මාර්ග පවසයි.

එසේම ජනාධිපති ගෝඨාභය විසින් පසුගියදා පත්කළ නව කැබිනට් මණ්ඩලය සම්බන්ධයෙන් අගමැති මහින්ද ගේ ප්‍රසාදයක් නොමැති බවත් දේශපාලන ආරංචි මාර්ග පවසයි.

ඇතැම් මාධ්‍ය වාර්තා මේ බව පළකර තිබුණේ රාජපක්ෂ පවුලේ බල අරගලයක් ලෙසය. එහෙත් දේශපාලන ආරංචි මාර්ග සඳහන් කරන්නේ පවුල අභ්‍යන්තරයේ කුමන කාකොටා ගැනීම් තිබුණත් පවුලේ බලය අවධානමට යද්දී ඔවුන් එක්ව ක්‍රියාමාර්ග ගන්නා බවයි.

ඒ අනුව අද ජනාධිපති සහ අගමැති මුහුණට මුහුණ හමුවෙන් පසුව දේශපාලනයේ තීරණාත්මක වෙනස්කම් දකින්නට ලැබෙනු ඇති බවත් එම ආරංචි මාර්ග පවසයි.

අන්තර් විශ්වවිද්‍යාල ශිෂ්‍ය සංගමය අද (24) කොළඹ පැවැත්වූ විරෝධතා පාගමන වැලැක්වීමට ගොස් ආණ්ඩුව ඓතිහාසික නින්දාවක් හිමිකරගත් බව දේශපාලන විචාරකයන් පවසයි.

අන්තර් විශ්වවිද්‍යාල ශිෂ්‍ය බල මණ්ඩලයේ විරෝධතා පාගමන වැලැක්වීමට පොලිසිය ආරම්භයේ සිට අසාමාන්‍ය වෙහෙසක් ගත් අතර ඇතැම් අවස්ථාවල පමණ ඉක්මවා ක්‍රියාත්මක වූ බවත් ඔවුන් පෙන්වා දෙයි.

අන්තරයේ පාගමන වැලැක්වීමට පොලිසිය පළමුව අධිකරණ නියෝගයක් ගැනීමට උත්සාහ කළත් එය ව්‍යර්ථ වීමෙන් පසුව අන්තරේට යන්න තහනම් මාර්ග කිහිපයක් සඳහා නියෝගයක් ගත්තත් එයද ව්‍යර්ථ කිරීමට ශිෂ්‍ය ව්‍යාපාරය සමත් වූ බවත් දේශපාලන විචාරකයන් පෙන්වා දෙයි.

මේ සම්බන්ධයෙන් අදහස් දක්වමින් දේශපාලන විචාරකයකු පවසා සිටියේ , ආණ්ඩුව සහ එහි වුවමනාව අනුව කටයුතු කිරීමට ගොස් පොලිසිය ඉල්ලං කෑමක් සිදුකර ගත් බවයි.

" ඉල්ලගෙන කෑවෙ. මේ ජනතා අරගලයේ මූලික කොන්දේසියක් තමයි ප්‍රචණ්ඩ නොවීම. එය ඔවුන්ගේ උපක්‍රමයක්. ඒ නිසා ගෝල්ෆේස් යන්න දෙන්න තිබුණේ. නමුත් ආණ්ඩුව පසුගිය යුද සමයේ පවා නොතිබූ ආකාරයට GI පයිප්ප යොදා බැරියර් දැම්මා. බැරියර් වලට උල්කටු වෑල්ඩිං කරලා ඒවා ඉටිකොළ යොදා සඟවා තිබුණේ. හරිම මිලේච්ජ හැසිරීමක් ඒ. නමුත් ශිෂ්‍ය ප්‍රජාව උපක්‍රමික ලෙස සාර්ථක වුණා. ඔවුන් අගමැති මහින්ද ගේ නිල නිවස වටලා කියන්න තියන දේ කිව්වා. ඕනම ටික තාප්පවල ලියලා ආවා.

විරෝධතාකරුවන් ඉල්ලුවේ ජනාධිපති, අගමැති ඇතුළු පාර්ලිමේන්තුවේ සියලු දෙනා ඉවත් විය යුතු බව. ඒක තමයි මේ අරගලයේ මූලික සටන් පාඨය. අන්තිමේ අන්තරය ගෝල්ෆේස් අරගල බිමටත් ගියා."

"අයිඑම්එෆ් එකට යන එක හෝ නොයන එක රජයේ තීරණයක්. රජයේ එදා තීරණය වුණේ අයිඑම්එෆ් එකට යා යුතු නැහැ කියන එක. අයවැය අවස්ථාවේදීත් මුදල් ඇමැතිතුමා කැබිනට් එක දැනුවත් කරමින් ප්‍රකාශ කළා අපි අයිඑම්එෆ් එකට යා යුතු නැහැ කියලා." යයි හිටපු මහ බැංකු අධිපති අජිත් නිවාඩ් කබ්‍රාල් පවසයි.

ඔහු මේ බව සඳහන් කර ඇත්තේ , දැඩි ආණ්ඩුව හිතවාදී පෞද්ගලික මාධ්‍ය ජාලයක් වන දෙරණ හි "අරුණ පුවත්පත" සමග සම්මුඛ සාකච්ඡාවකදී අදහස් දක්වමින් ය.

එහිදී මාධ්‍යවේදියා නැගූ ප්‍රශ්න කිහිපයක් සහ හිටපු මහ බැංකු අධිපති අජිත් නිවාඩ් කබ්‍රාල් ඊට ලබාදුන් පිළිතුරු පහත දැක්වෙයි.

මෙතන තියෙන ප්‍රධානම ප්‍රශ්නය තමයි ඩොලර් හිඟය. මේ අර්බුදය විසඳන්න අන්ත්ර්ජාතික මූල්‍ය අරමුදලට යෑම වැළැක්වූවේ ඔබ කියන එක තමයි එල්ල කෙරෙන ප්‍රධානම චෝදනාව. මොකක්ද ඊට ඔබේ පිළිතුර ?ජනාධිපතිවරයා පවා දැන් කියනවා අපිට මීට කලින් අයිඑම්එෆ් එකට යන්න තිබුණ කියලා?

අයිඑම්එෆ් එකට යන එක හෝ නොයන එක රජයේ තීරණයක්. රජයේ එදා තීරණය වුණේ අයිඑම්එෆ් එකට යා යුතු නැහැ කියන එක. අයවැය අවස්ථාවේදීත් මුදල් ඇමැතිතුමා කැබිනට් එක දැනුවත් කරමින් ප්‍රකාශ කළා අපි අයිඑම්එෆ් එකට යා යුතු නැහැ කියලා.

ඔබ කියන්නේ ඒ අවස්ථාවේ ඔබ සම්පූර්ණයෙන්ම කටයුතු කළේ රජයේ උපදෙස් අනුවයි කියලා?

ඔව්. මොකද රජය කිව්වොත් අයිඑම්එෆ් එකට යන්න ඕනෙ කියලා, අපි එතකොට යා යුතුයි. දැනුත් කරල තියෙන්නෙ ඒකමනෙ. අපේ රජය කියල තියෙනවා අපි අයිඑම්එෆ් එකට ගිහින් යම් සහනයක් බලාපොරොත්තු වෙනවා කියල. එතකොට අපි ඒ දේ කළ යුතුයි. ඒ සියල්ල රජයේ තීරණ. රජය තීරණය කළා බදු වැඩි කරන්නෙ නැහැ කියලා. තෙල් මිල වැඩි කරන්නෙ නැහැ කියලා. ඒ රජයේ තීරණත් එක්ක මහබැංකුවට කටයුතු කරන්න සිදුවුණා.

අයිඑම්එෆ් එකට යෑම පිළිබඳව අපිට විවිධ මත තියෙන්න පුළුවන්. දැන් අයිඑම්එෆ් එකට යෑම නිසා ඉදිරියේදී ලොකු පීඩනයක් ඇති​ වෙන්න පුළුවන්. අයිඑම්එෆ් එකට ගිය ගමන්ම සියලුම ප්‍රශ්න විසඳෙයි කියලා කවුරුත් හිතන්න නරකයි. අයිඑම්එෆ් එකට ගිය නිසා දැනටමත් පොලී අනුපාත විශාල ලෙස වැඩිවෙලා තියෙනවා කියල අපිට පේන්න තියෙනවා. ඒ වගේ මේ හැම ප්‍රශ්නයකටම දෙපැත්තක් තියෙනවා. කොහොම වුණත් අවසාන තීරණය තියෙන්නේ රජය සතුව.

හැබැයි මීට පෙර ඔබ මහ බැංකු අධිපතිව සිටියදී දෙදාස් නවයේදී අයිඑම්එෆ් එකට ගියා. ගිහින් ඒ වෙලාවේ තිබුණු ආර්ථික අර්බුදය විසඳගත්තා. මේ මොහොතේ නැවත අයිඑම්එෆ් යෑම ගැන ඔබේ අදහස මොකක්ද?

දෙදාස් නවයේදී අයිඑම්එෆ් එකට ගිහින් ක්‍රියාත්මක කරපු වැඩසටහන තමයි මේ රටේ අයිඑම්එෆ් එකත් එක්ක කරපු සාර්ථකම වැඩසටහන. ඒක තමයි විශාලතම වැඩසටහන. ඒකෙන් රටට විශාල සෙතක් සිදුවුණා. ඒ නිසා අයිඑම්එෆ් එකත් එක්ක මට තරහක්වත් ප්‍රශ්නයක්වත් නැහැ. ඒ වුණාට මේ වෙලාවෙ අයිඑම්එෆ් එකට යෑමෙන් රටේ තියෙන පීඩනය තවදුරටත් වැඩි වෙන්න පුළුවන් කියන අදහස මට තියෙනවා. ඒකට විරුද්ධ මතයක් රජය දරනව නම් රජයට පුළුවන් දැන් කරනව වගේ කිසිම ගැටලුවක් නැතුව අයිඑම්එෆ් එකත් එක්ක කටයුතු කරන්න.

මම මහ බැංකු අධිපති ධුරයෙන් ඉවත් වෙලා යන්න පෙර මාර්තු මාසෙ පහළොස් වැනිදා ජනාධිපතිතුමා අයිඑම්එෆ් එකේ නියෝජිතයන් මුණ ගැසුණු අවස්ථාවේදි මමත් එතන හිටියා. ජනාධිපතිතුමාගේ ප්‍රකාශයෙත් ඒක තියෙනවා. මම මෙතන නියෝජනය කළේ මගේ පෞද්ගලික මතයක් නෙවෙයි. මම මහ බැංකු අධිපති විදිහට රජය වෙනුවෙන් මගේ වගකීම ඉෂ්ට කරල තියනවා. ඒ නිසා කාටවත් කියන්න බැහැ මේ මගේ තනි මතයට වුණ දෙයක් කියලා. මේකට රජය සාමුහිකව වගකිව යුතුයි. ඒක හැමෝම හොඳටම මතක තියාගන්න ඕනේ.

ඇයි බැසිල් විතරක් : හැමෝම වගකියන්න ඕන !

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ හිටපු මහ බැංකු අධිපති නිවාඩ් කබ්‍රාල් සියල්ල හිටපු මුදල් ඇමති බැසිල් රාජපක්ෂ වෙත පවරා ශුද්ධ වීමට උත්සාහ කළත් මහ බැංකු අධිපති ලෙස ඔහු පත්වීම ගත්තේ කැබිනට් බලතල සහිතව බව අමතක නොකළ යුතු බවයි.

එසේම මහ බැංකු අධිපති ස්වාධීන ලෙස කටයුතු කළ යුතු බවත් රාජ්‍ය අමාත්‍ය ධූරයෙන් ඉල්ලා අස්වී මහ බැංකු ධූරය ගනුලැබූ නිවාඩ් කබ්‍රාල් මුළුමනින්ම ආණ්ඩුවේ දේශපාලනය ක්‍රියාත්මක කිරීම වෙනුවට වගකීමෙන් කටයුතු කළ බවක් ඒ කාලය තුළ නිරීක්ෂණය නොවූ බවත් දේශපාලන විචාරකයන් පෙන්වා දෙයි.

ඇතැමුන් කියන පරිදි ජනාධිපතිවරයා තනතුරෙන් ඉවත් කළොත් මේ රට අස්ථාවර වෙන බව පොහොට්ටුවේ පාර්ලිමේන්තු මන්ත්‍රී විමල් වීරවංශ පවසයි.

එම නිසා ජනාධිපතිවරයා ඉවත් කිරීම නොකළ යුතු බවත් රටට අභිවෘද්ධිය සලසන වැඩපිළිවෙළකට සහ රට පිළිබඳ සාමූහික තීන්දු ගන්නා සියලු පක්ෂවලින් සැදුම්ලත් ජාතික සභාවකට එකඟ කරවාගෙන අගමැතිවරයා ඇතුළු පවතින ආණ්ඩුව පූර්ණ ලෙස ඉවත් කළ යුතු බවත් ඔහු පවසයි.

ඉන් පසුව අන්තර්කාලීන ආණ්ඩුවක් පිහිටුවීම අර්බුදයට මේ මොහොතේ විසඳුම” ලෙසත් මන්ත්‍රීවරයා සඳහන් කර ඇත.

එහිදී වැඩිදුරටත් ඔහු මෙසේද සඳහන් කර ඇත.

කෙසේ වුවත් දැන් අරගලය පිටින් ඒ කියපු කතා වචන වලට සීමාවන

“ඉන්ධන ලබා ගන්න ගියාම ඉන්ධන නැතිවෙනකොට, ආනයනික ඇතැම් භාණ්ඩ හිඟ වෙනකොට, ගෑස් මිල දී ගන්න ගියාම ගෑස් නැති වෙනකොට, විදුලිය කැපෙන කොට ආදී විවිධ කාරණා ඔස්සේ අපේ ඇඟපතට දැනෙනවා, ‘රටේ ආර්ථිකය දැඩි සත්කාර ඒකකයට ඇතුළු කර තිබෙනවා’ කියා. මේ ආරම්භය පමණයි. දැන් කියවෙනවා ‘කඩදාසි නැහැ’ කියා. ඉදිරියේදී සුපිරි වෙළඳසැල්වල බඩු හිඟයි, කියාවි. බරපතලකම කොයි තරම් අඩු වැඩි වශයෙන් දැක්කත් අපට පිළිගන්න වෙනවා අපි ඉදිරියේ අර්බුදයක් තිබෙනවා කියා. එය විසඳාගත හැක්කේ කෙසේද, කියන ප්‍රශ්නය ඒ සමඟ එනවා.සහරාන්ලාගේ ප්‍රහාරය නාවත්, කෝවිඩ් නාවත්, යුක්‍රේන යුද්ධය නාවත් ප්‍රමාදවී හෝ අපට මේ විදේශ විනිමය අර්බුදයට මුහුණදීමට සිදුවෙනවා. අර්බුදය ඉක්මනින් පැමිණීමයි ඉහත සාධක මගින් සිදු වූයේ.දැන් ‘යකා’ අවුස්සාගෙන ඉවරයි.

මේ මධ්‍යම පංතිය එක්තරා දුරකට යකෙක්. පුරුදු ජීවන රටාව දෙන්නම වෙනවා. නැතිනම් මරන් කන්න එනවා. පුද්ගලික ජෙට් එකෙන් ගිහිල්ලා හරි තමන්ගේ අවශ්‍යතා සපුරාගෙන, පිටරටකට හෝ ගිහින් ජීවත් විය හැකි උඩම පිරිස හැරුණාම, මධ්‍යම පන්තියේ ඉහළම කොටස, ඊට පහළ මට්ටමේ පිරිස, ඊටත් පහළ සියලු සමාජ ස්ථරයන් මේ අර්බුදය විසින් පීඩාවට පත් කර තිබෙනවා”

සුමන්දිරන් හිතනවා ‘ෆෙඩරල් දිනා ගන්න මේක හොඳම වෙලාව’ කියා. දෙමළ ඩයස්පෝරාව හිතනවා ‘මේක ඊළම ගන්න හොඳම වෙලාව’ කියා. ඒ වගේම බෞද්ධ විරෝධී, නිරාගමික රැවුල්කාර මහත්වරුන් හිතනවා, ‘ශාසනයට, භික්ෂූත්වයට පහර දෙන්න මේක නියම වෙලාව’ කියා.

මේ අවස්ථාව දෙස බලාගෙන ඉන්න එක එක අයට එක එක උවමනාවන් තිබෙනවා ඉටුකර ගැනීමට.සමහරු කියනවා, ‘ගෝඨාභය රාජපක්ෂත් යන්න ඕනේ’ කියලා.

ගෝඨාභය රාජපක්ෂ ගියාට පස්සේ මොකද වෙන්නේ? පාර්ලිමේන්තුවේ 113ක බලයක් පෙන්නන්න පුළුවන් කෙනෙක් ඉතිරි අවුරුදු දෙකහමාරට ජනාධිපති වෙනවා. දැන් හැංගිලා ඉන්න බැසිල් මහත්තයා ඇවිත් ‘මට 113 හදන්න පුළුවන්’ කියලා ඇවිත් 113 හදලා පෙන්නුවොත් ගෝඨාභය මහත්තයා ගිහින් තියෙන්නෙ බැසිල් මහත්තයාට ජනාධිපති වෙන්නනේ. ‘කපුටා කමිං ටු ප්‍රසිඩන්ට් හවුස්’. ඒකද කරගන්න ඕනේ. එහෙම නැතිව 113 පෙන්වන්න දෙන්නෙක් පොරකෑවොත් කිසිම කෙනෙකුට 113 නැති වුණොත් මොකද වෙන්නේ? කාටත් තක්කු මුක්කු වෙලා ඉන්නයි වෙන්නේ. මේක තක්කු මුක්කු වෙලා ඉන්න පුළුවන් වෙලාවක් ද? දැන් කරන්න ඕනේ ජනාධිපතිත් ඉවත් කරලා රට තවදුරටත් අස්ථාවර කරන එක නොවෙයි"

කෙසේ වුවත් ජනාධිපති විසින් විමල් වීරවංශ සහ උදය ගම්මන්පිල අමාත්‍ය මණ්ඩලයෙන් ඉවත්කළ අවස්ථාවේ වීරවංශ මන්ත්‍රීවරයා මාධ්‍ය හමුවකදී අවධාරණය කර සිටියේ වත්මන් ජනාධිපති සිටින අමාත්‍ය මණ්ඩලයක ධුරයක් භාර නොගන්නා බවය.

උද්ඝෝෂකයින් මර්දනය කිරීමට පොලිසිය අද (24) උල්කටු සහිත මාර්ග බාධක යෙදීම සම්බන්ධයෙන් සමාජ මාධ්‍ය තුළ දැඩි විවේචන එල්ලවෙමින් තිබේ.

බොහෝ දෙනෙකුගේ අවධානය යොමුව තිබෙන්නේ අදාළ උල්කටු සහිත මාර්ග බාධක ඉටිකොළ වැනි තුනී ඇතිරිලි වලින් ආවරණය කර තිබීමය.

ඒ අනුව එකවර මේ මාර්ග බාධා වල ඇත්තේ උල්කටු බව නොපෙනෙයි.

වඩාත් විශේෂ සිදුවීම වන්නේ සාමාන්‍ය නිරායුද උද්ඝෝෂණකරුවන් පාලනය සඳහා මෙවැනි මිලේච්ජ උපක්‍රමයක් යෙදීමයි.

අන්තර් විශ්ව විද්‍යාල ශිෂ්‍ය බලමණ්ඩලය ඇතුළු සිවිල් සහ වෘත්තීය සංවිධාන කිහිපයක් මේ වන විට ගෝල්ෆේස් ආශ්‍රිතව දියත්කර ඇති තරුණ පොදුජන අරගලයට සහය දීමට අද විරෝධතා පාගමන් සූදානම් කර තිබේ.

පොලිසිය අන්තරේ පිරිසට එරෙහිව වාරණ නියෝගයක් ගෙන කිසිවෙකුට යාමට නොහැකි ආකාරයට මාර්ග බාධක යොදාගෙන ගෝල්ෆේස් අරගල බිම ආශ්‍රිත ප්‍රදේශය වසාගෙන ඇත.

ජනාධිපතිවරයාගේ විධායක බලතල අඩු කර ඒවා අගමැති සතු කරගන්නා යෝජනාවක් කැබිනට් මණ්ඩලයට ඉදිරිපත් කිරීමේ සූදානමක් සම්බන්ධයෙන් තොරතුරු වාර්තා වෙයි.

දේශපාලන ආරංචි මාර්ග සඳහන් කරන ආකාරයට අගමැති මහින්ද රාජපක්ෂ විසින් මේ යෝජනා ගෙන එන්නේ 21 වන ව්‍යවස්ථා සංශෝධන කෙටුම්පත සකස් කිරීමට අදාල යෝජනා ලෙසය.

මෙම යෝජනා සමගි ජන බල‍වේගය, එක්සත් ජාතික පක්ෂය සහ ආණ්ඩුවෙන් ස්වාධින වූ මන්ත්‍රි කණ්ඩායම විසින් 21 වන සංශෝධනය සකස් කිරීමට පසුගියදා පාර්ලිමේන්තුවේදි කතානායකවරයා වෙත භාර දුන් යෝජනා බවත් වාර්තා වෙයි.

කෙසේ වෙතත් ජනාධිපති ගෝඨාභය රාජපක්ෂ හෝ ඔහුගේ නව කැබිනට් මණ්ඩලය මේ යෝජනා සම්බන්ධයෙන් කුමන ප්‍රතිචාරයක් දක්වනු ඇත්ද යන්නත් ආණ්ඩුව අභ්‍යන්තරයේ සාකච්ඡා වෙමින් පවතී.

පසුගියදා නව අමාත්‍ය මණ්ඩලය දිවුරුම් දුන් අවස්ථාවේ අගමැති මහින්ද රාජපක්ෂ ඊට සහභාගීවී නොතිබීම ගැනත් දේශපාලන ක්ශේත්‍රයේ විවිධ කතා පළවිය.

මේ වනවිට සාමාන්‍ය ජනතාවට ඇතුල්විය නොහැකි පරිදි ජනපති මැදුර දෙසින් ගෝල්ෆේ්ස් පිටියට ඇතුලු වන මාර්ගය සම්පූර්ණයෙන්ම වසා දමා ඇත.

ලෝටස් පාර සම්පූර්ණයෙන්ම වසා මාර්ග බාධාක ඉදිකිරීමෙන් වාහනවලට කොළඹට ඇතුළු වීමට වෙනත් මාර්ග භාවිතා කිරීමට සිදුව තිබේ.

අන්තර් විශ්වවිද්‍යාල ශිෂ්‍ය බලමණ්ඩලය සංවිධානය කරන විරෝධතාව ඇතුළු විරෝධතා කීපයක් අද (24) ගාලුමුවදොරට පැමිණීමට නියමිත නිසා පොලිසිය මෙසේ මාර්ග බාධයක යොදා ඇති බව වාර්තා වෙයි.