පුවත්

අද (05) පාර්ලිමේන්තුව රැස්වූ අවස්ථාවේ නියෝජ්‍ය කතානායක ධූරය සඳහා රහස් ජන්දයක් පැවැත්වීමට සිදුව ඇත.

ඒ අනුව මේ වන විට එකී ජන්ද විමසීම ඇරඹි තිබේ.

මේ ආකාරයට නියෝජ්‍ය කතානායක ධූරය සඳහා ජන්ද විමසීමක් සිදුවන්නේ , ඒ සඳහා පොදුජන පෙරමුණ ආණ්ඩුවේ සිට මේ වන විට ස්වාධීන ව සිටින රංජිත් සියඹලාපිටිය මන්ත්‍රීවරයාගේ සහ සමගි ජනබලවේගය පක්ෂයේ ඉම්ටියාස් බාකිර් මාකර් යන මන්ත්‍රීවරුන් ගේ නම් යෝජනා වූ නිසාය.

කතානායක නිවේදනය සමග නියෝජ්‍ය කතානායක ධූරය සඳහා පළමුව නිමල් සිරිපාල ද සිල්වා මන්ත්‍රීවරයා ගේ යෝජනාවක් අනුව රංජිත් සියඹලාපිටිය මන්ත්‍රීවරයා ගේ නම යෝජනා විය. එය ස්ථිර කළේ පාර්ලිමේන්තු මන්ත්‍රී සුසිල් ප්‍රේමජයන්ත විසිනි.

එහිදී ජී.එල්. පීරිස් අමාත්‍යවරයා රංජිත් සියඹලාපිටිය මන්ත්‍රීවරයාට ආණ්ඩුවේ සහය ලැබෙන බව පැවසීය.

ඒ සමග නැගීසිටි සමගි ජනබලවේගය පාර්ලිමේන්තු මන්ත්‍රී රංජිත් මද්දුමබංඩාර විසින් නියෝජ්‍ය කතානායක ලෙස ඉම්ටියාස් බාකිර් මාකර් මන්ත්‍රීවරයා ගේ නම යෝජනා කර සිටියේ ය. ඒ සියඹලාපිටිය මන්ත්‍රීවරයා ට ආණ්ඩුවේ සහය ප්‍රකාශ කළ නිසා බෙදුමක් ඉල්ලන බව පවසමිනි.

එම යෝජනාව පාර්ලිමේන්තු මන්ත්‍රී ලක්ෂ්මන් කිරිඇල්ල විසින් සම්මත කරනු ලැබිණ.

පොලිස් බලහත්කාරය යොදවා ඊයේ (04) පාර්ලිමේන්තු පිවිසුම් මාර්ගය අසලදී අත්අඩංගුවට ගනුලැබූ සාමකාමී උද්ඝෝෂකයන්ට ඇප ලබාදීමට කඩුවෙල අධිකරණය නියෝග කරනු ලැබිණ .

එසේම අන්තර් විශ්වවිද්‍යාල ශිෂ්‍ය බල මණ්ඩලය සහ ශිෂ්‍ය සංවිධාන ඒකබාද්ධව පාර්ලිමේන්තුව අසලදී අද (05) සහ අනිද්දා (06) පැවැත්වීමට නියමිත ආණ්ඩු විරෝධී උද්ඝෝෂණය වළක්වාලමින් නියෝගයක් නිකුත් කරන්නැයි තලංගම පොලීසිය කළ ඉල්ලීමක් කඩුවෙල මහේස්ත්‍රාත් චානිමා විජේබණ්ඩාර ඊයේ (04) ප්‍රතික්ෂේප කළාය.

අධිකරණය එම ඉල්ලීම ප්‍රතික්ෂේප කර සිටියේ අදාළ උද්ඝෝෂණය වැළැක්වීමට අදාළ හේතු වශයෙන් පොලීසිය ඉදිරිපත් කරන කරුණු ප්‍රමාණවත් නොවන බව පවසමින් ය.

ආණ්ඩුක්‍රම ව්‍යවස්ථාවේ 14 වන ව්‍යවස්ථාව ප්‍රකාරව උද්ඝෝෂණයේ අයිතිය මහජනතාව සතුව ඇති බවත් යමෙකු මහජන පීඩාවක් ඇතිවන අයුරින් හැසිරුණ හොත් නම් ඒ සදහා පොලිස් බලතල පාවිච්චි කළ යුතුව ඇති බවත් මෙහිදී අධිකරණය සදහන් කළ බවත් වාර්තා වෙයි .

මෙම උද්ඝෝෂකයින් විසින් පවත්වනු ලබන විරෝධතා හේතුවෙන් අද (05) සහ අනිද්දා (06) යන දෙදින තුළ පාර්ලිමේන්තු සැසිවාරයන්ට බාධා පැමිණවිය හැකි බැවින් එම විරෝධතා නවතා දමන නියෝගයක් නිකුත් කරන්නැයි තලංගම පොලිසිය අධිකරණයෙන් ඉල්ලා තිබිණී.

මෙම උද්ඝෝෂකයින් පාර්ලිමේන්තු මන්ත්‍රීවරුන් ගමන් ගන්නා මාර්ගවල රැදී සිටිමින් ඔවුන්ගේ වාහනවලට සහ ඔවුන්ට බාධා කිරීම හේතුවෙන් මන්ත්‍රී වරප්‍රසාද කඩවන බවද පොලීසිය අධිකරණයට දැනුම් දුන්නේය. මේ හේතුවෙන් අදාළ විරෝධතා නවතා දැමීමට නියෝගයක් නිකුත් කරන්නැයි පොලීසිය අධිකරණයෙන් ඉල්ලීය.

ඉදිරිපත් වූ කරුණු සැලකිල්ලට ගත් අධිකරණය, පොලීසිය කළ එම ඉල්ලීම් ප්‍රතික්ෂේප කළේය.

පෙරේදා (03) ජවිපෙ නායක අනුර කුමාර දිසානායක රාජ්‍ය දේපළ අවභාවිතා කළ දූෂණ චෝදනා ලාභීන්ගේ ලිපිගොනු ප්‍රමාණයක් අනාවරණය කළ අතර එහිදී අගමැති කාර්‍ය මණ්ඩල ප්‍රධානී යෝෂිත රාජපක්ෂ ගේ නමත් සඳහන් විය.

මේ සම්බන්ධයෙන් නීතිමය ක්‍රියාමාර්ග ගන්නා බව පවසමින් අගමැති කාර්‍යාලයේ ලිපි ශීර්ෂයක් හරහා නිවේදනයක් නිකුත්කර ඇත .

අදාළ නිවේදනය පහත දැක්වෙයි .

අගමැති මහින්ද රාජපක්ෂ සිය ධුරයෙන් ඉල්ලා අස් වන්නේ යයි පලවන වාර්තා අසත්‍ය බව සභානායක අමාත්‍ය දිනේෂ් ගුණවර්ධන සඳහන් කරයි.

ඔහු මේ බව කියා සිටියේ ආණ්ඩු පක්‍ෂ රැස්වීමෙන් පසු මාධ්‍ය වෙත අදහස් දක්වමින් ය.

‘අගමැතිවරයා රටේ තියෙන ගැටලු පිළිබඳ ප්‍රකාශයක් කිරීමට නියමිතයි. ආර්ථික, මහජනතාවගේ හා පාර්ලිමේන්තුවේ ගැටලු සම්බන්ධවත්. එය බොහෝවිට හෙට හෝ අනිද්දා දිනයේ සිදුකළ හැකියි’ එහිදී අමාත්‍යවරයා පවසා ඇත .

කෙසේ වුවත් ඊයේ (03) වන තුරු අගමැති ඉල්ලා අස්වීමේ සූදානමක් පැවති බව රහසක් නොවන බව දේශපාලන විචාරකයන් පවසයි .

ඔවුන් පෙන්වා දෙන්නේ අලුත් දේශපාලන ඩීල් එකක් හේතුවෙන් මේ ආකාරයට අගමැති වචන වෙනස් කර ජන අරගලය සමග සෙල්ලම් කිරීම අරඹා ඇති බව යි.

මේ වන විට අරගලය මර්දනය කිරීම ක්‍රමයෙන් තීව්‍ර කරමින් ඇති බවත් දේශපාලන විචාරකයන් පෙන්වා දෙයි.

අද (04) පාර්ලිමේන්තුව ඉදිරිපිට පිවිසුම් මාර්ගය අසල සාමකාමීව උද්ඝෝෂණයේ යෙදුණු සිවිල් පුරවැසියන් පිරිසක් පොලිස් බලහත්කාරය යොදවා අත්අඩංගුවට ගෙන ඇති බව වාර්තා වෙයි .

මේ විරෝධතාව පවත්වා ඇත්තේ ඉතාම සීමිත පිරිසක් වන බවත් එහිදී පොලිස් බස් රථයක පැමිණි කැරලි මර්දන භට පිරිසක් අමානුෂික ආකාරයට මේ සාමකාමී උද්ඝෝෂණයේ යෙදුණු පුරවැසියන් පැහැරගෙන ගිය බවත් එහි සිටි අප වාර්තාකරුවන් පවසයි .

එහිදී උද්ඝෝෂකයින් පැමිණ ඇත්තේ කතානායකට ලිපියක් බාරදීමට බවත් වාර්තා වන අතර එය පහත දැක්වෙයි .

එහිදී පොලිස් පැහැරගැනීමට ලක්වූ සාමකාමී උද්ඝෝෂකයන්ට පොලිස් පහරදීමක් සිදුව ඇති බවත් සඳහන් ය.

සාමකාමී විරෝධතා දැක්වීම පුරවැසි අයිතියක් බව පවසමින් අත්අඩංගුවට ගැනීමට එරෙහි වූවන්ට , එහි සිටි පොලිස් නිලධාරියෙකු තර්ජනය කර ඇත්තේ , මේ හරහා මන්ත්‍රී වරප්‍රසාද උල්ලංඝනය වන බවයි.

සිදුවීම සම්බන්ධයෙන් පාර්ලිමේන්තු මන්ත්‍රී මනූෂ නානායක්කාර කතානායක දැනුවත් කර ඇති බවත් වාර්තා වෙයි .

වැඩිදුරටත් වාර්තා වන ආකාරයට මෙසේ පොලිස් පැහැරගැනීමට ලක්වූ උද්ඝෝෂකයන් මහරගම පොලිසියේ රඳවාගෙන සිටින අතර ඔවුන් කඩුවෙල අධිකරණයට ඉදිරිපත් කිරීමට නියමිත බවත් වාර්තා වෙයි .

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ , මේ වන විට ඉතාම පැහැදිලිව පොදුජන අරගලය මර්දනය කිරීම ආරම්භ වී ඇති බවයි.

සාමකාමී විරෝධතාකරුවන්ව මේ ආකාරයට පොලිස් පැහැරගැනීම් සිදුවනවා නම් එය ප්‍රජාතන්ත්‍රවාදී රාජ්‍යක් නොව මිලිටිරි පොලිස් රාජ්‍යක ලක්ෂණයක් බවත් දේශපාලන විචාරකයන් පවසයි .

මේ අතර නිවේදනයක් නිකුත්කරමින් නිදහස් මාධ්‍ය ව්‍යාපාරය පවසන්නේ
ජනාධිපතිවරයාට, අගමැතිවරයාට හා වත්මන් ආණ්ඩුවට එරෙහි උද්ඝෝෂණවල නිරත ක්‍රියාකාරීන්ට විවිධ චෝදනා නගමින් ඔවුන් අත්අඩංගුවට ගැනීමට හා බියවැද්දීමට පොලිසිය ක්‍රියා කළ අවස්ථා දෙකක් පිළිබඳව තම අවධානය යොමුව ඇති බවයි.

අදාළ නිවේදනය නිකුත්කරමින් නිදහස් මාධ්‍ය ව්‍යාපාරය , අදහස් පළ කිරීමේ නිදහසට එරෙහි අනීතික ක්‍රියාකාරකම්වලින් වළකින ලෙස පොලිස්පතිවරයාටත් රජයටත් දැඩිව අවධාරණය තිබෙයි.

අදාළ නිවේදනය සඳහන් කරන ආකාරයට ත්‍රිකුණාමලය කන්තලේ ප්‍රදේශයේ ජන විරෝධතාව මෙහෙයවමින් සිටින ජාතික සමාජ සංවර්ධන පදනමේ සභාපති සුරංග රූපසිංහට පොලිසිය දැඩිව තර්ජනය කර තිබේ .

ඊළඟ සිදුවීම ගෝල්ෆේස් විරෝධතා ව්‍යාපාරයට සහභාගී වී ආණ්ඩුවට එරෙහිව ප්‍රසිද්ධියේ අදහස් පළ කළේ යැයි ගම්පහ යක්කල ප්‍රදේශයේ පදිංචිව සිටින තරුණයන් දෙදෙනෙකුට යක්කල පොලිසිය මගින් (02) අත්අඩංගුවට ගෙන පහර දී තිබීමයි.

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ , මේ ආකාරයට අනීතික සහ පුරවැසි අයිතීන් කෙළෙසන පොලිස් නිලධාරීන් සම්බන්ධයෙන් කඩිනමින් පෞද්ගලිකව නෛතික ක්‍රියාමාර්ග ගත යුතුව ඇති බවයි.

මේ වන විට ආණ්ඩුවේ සිට ස්වාධීන වී සිටින පාර්ලිමේන්තු මන්ත්‍රී කණ්ඩායම ජනාධිපති ගෝඨාභය රාජපක්ෂ හෝ අගමැති මහින්ද රාජපක්ෂ ට එරෙහිව ගෙනෙන විශ්වාසභංග සඳහා සහය නොදීමේ තීරණයක් ගෙන ඇති බව දේශපාලන ආරංචි මාර්ග පවසයි.

වාර්තා වන ආකාරයට මෙම ස්වාධින කණ්ඩායම නියෝජනය කරන මන්ත්‍රීවරුන් 40 දෙනාගේ සාකච්ජාවක් පැවැත්වී ඇති අතර එහිදී මෙම තීන්දුවට එළඹ ඇත.

මේ වනවිට ජනාධිපතිවරයා සමග යළිත් වතාවක් අන්තර්වාර ආණ්ඩුවක් නිර්මාණය කිරීම සම්බන්ධයෙන් සාකච්ජා වටයක් ආරම්භ වී ඇති බැවින් ඊට හානිකර කිසිවක් නොකිරීම මෙම තීන්දුව ගැනීමට හේතුව බවත් වාර්තා වෙයි .

එසේම ඊයේ (03) බැසිල් රාජපක්ෂ මන්ත්‍රීවරයා සහ ආණ්ඩුවේ ස්වාධීන කණ්ඩායමේ ප්‍රධානීන් අතර සාකච්ජාවක් පැවැති අතර එයද මෙම තීන්දුව ගැනීම සදහා බලපා ඇති බව දේශපාලන ආරංචි මාර්ග පවසයි .

වැඩිදුරටත් වාර්තා වන ආකාරයට ඊයේ දින වන විටත් අද (04) පාර්ලිමේන්තුවේදී විශේෂ ප්‍රකාශයක් කර අගමැති මහින්ද රාජපක්ෂ ඉල්ලා අස්වීමට සූදානමක් පැවති නමුත් ස්වාධීන මන්ත්‍රී කණ්ඩායමේ මේ තීන්දුව හේතුවෙන් ඉල්ලා අස්වීම සඳහා වෙනත් පාර්ශ්වයක් බහුතරය පෙන්විය යුතු බවට තර්කයක් ඉදිරිපත් කර තවදුරටත් අගමැති ධූරය දැරීමට තීරණය කර ඇත්තේ ද ඒ අනුව ය.

මේ අතර දේශපාලන විචාරකයන් පවසන්නේ මේ වන විට පාර්ලිමේන්තුව දේශපාලන ඩීල් ආකරයක් බවට පත්ව ඇති බවයි.

සම්ප්‍රදායික දේශපාලන නායකයන් පොදුජන අරගලයේ ජයග්‍රහණ සම්බන්ධයෙන් බියක් දක්වන බවත් පෙන්නුම් කරන බවත් ඔවුන් පවසයි .

කෙසේ වුවත් ගෝල්ෆේස් අරගල බිම ප්‍රමුඛ දිවයින පුරා රාජපක්ෂ විරෝධී උද්ඝෝෂණ අඛණ්ඩව සිදුවෙමින් පවතී.

වත්මන් ආණ්ඩුවේ වැරදි ආර්ථික ප්‍රතිපත්තිය සම්බන්ධයෙන් පාපෝච්චාරණයක් මුදල් ඇමති අලිසබ්‍රි විසින් අද (04) පාර්ලිමේන්තුවේදී සිදුකරනු ලැබීය.

පසුගිය කාලයේදී සිදුවූ බදු කපා හැරීම හේතුවෙන් බරපතළ වැරැද්දක් සිදුවූ බවත් එමෙන්ම නියමිත අවස්ථාවේ ජාත්‍යන්තර මූල්‍ය අරමුදලට නොයෑමද වැරැද්දක් බවත් එහිදී ඔහු පිළිගත්තේ ය.

මහතා රුපියල නියමිත අවස්ථාවේදී පා නොකර ඩොලරය අල්ලාගෙන සිටීමද සිදුකළ වැරැද්දක් බවත් මුදල් ඇමති අලිසබ්‍රි පැවසීය .

ආර්ථික අර්බුදයේ බරපතලකම ගැන එළියේ සිටින අයට හරි අවබෝධයක් තිබේ යැයි තමා නොසිතන බව කී මුදල් අමාත්‍යවරයා පක්ෂ පාට වලට බෙදී සටන් කරනවා වෙනුවට කඩා වැටෙමින් තිබෙන ආර්ථිකය නගා සිටුවීම සඳහා යම් ප්‍රමාණයකින් හෝ දායකත්වය දැක්වීමට සියලු පක්ෂවලට ජාතික වගකීමක් තිබෙන බවද කීය.

ජාත්‍යන්තර මූල්‍ය අරමුදලේ සාකච්ඡා වල ප්‍රගතිය පිළිබඳ වාර්තාව සියලු පාර්ලිමේන්තු මන්ත්‍රීවරුන්ට බෙදා දීමට කටයුතු කර තිබෙන බවද නිදහසින් පසු බරපතළම ආර්ථික අර්බුදයට රට මුහුණ දෙමින් සිටින බවද එහිදී ඔහු පැවසීය .

අද වන විට රට සතු භාවිතයට ගත හැකි විදේශ සංචිත ප්‍රමාණය ඇමරිකානු ඩොලර් මිලියන පනහක් බවක මුදල් ඇමති අලි සබ්රි පැවසූ අතර ඩොලර් මිලියන පනහක් යනු එක් දිනක සදහා අවශ්‍ය ආනයන වියදමට සමාන මුදලකි.

ඉන්දියාව විසින් තවත් ඩොලර් මිලියන දෙසීයක ඉන්ධන සදහා ණය මුදලක් ලබාදීමට එකඟතාව පළ කර තිබේ.

ඊට අමතරව ඉන්ධන ගෙන්වීම සදහා තවත් ඩොලර් මිලියන 500 ක ණය මුදලක් ඉල්ලා සිටීමට බලාපොරොත්තු වන බව බලශක්ති සහ විදුලි බල ඇමති කංචන විජේසේකර සඳහන් කළේය.

දැනට ඉන්දියාව ලබා දී ඇති ඉන්ධන ණය වන මේ වන විට අවසන් වෙමින් ඇත.

ඉන්දීය ණය යෝජනා ක්‍රමය යටතේ මෙරටට ලබා ගැනීමට නියමිත බලාපොරොත්තු වන ඉන්ධන වටිනාකම ඇමෙරිකානු ඩොලර් මිලියන 1200කි.

ලබා දෙන බවට එකග වූ ඩොලර් මිලියන දෙසියක ඉන්ධන නැව් හතරක් මේ මාසය තුළ මෙරටට ළඟාවීමට නියමිතව තිබේ.

මැයි 06 වනදා රට පුරා සියලූ අංශ එක්ව හර්තාල ව්‍යාපාරයක් පවත්වන බව වෘත්තීය සමිති සංවිධාන හා දේශපාලන පක්ෂ ඇතුළු කණ්ඩායම් කියා සිටියි.

ඒ සඳහා සියලු වෘත්තීය සමිති, සංවිධාන, පක්ෂවල සහයෝගය දෙන බව ජාතික වෘත්තීය සමිති මධ්‍යස්ථානයේ කැඳවුම්කරු වසන්ත සමරසිංහ පවසයි .

දූෂිත රාජපක්ෂ පාලනය මෙරට පාලනය අතහැරීම සඳහා කටයුතු කල යුතු බවත් එසේ නොකරන්නේ නම් මැයි 11 සිට අඛණ්ඩ හර්තාලයක් රාජපක්ෂ පාලනය ගෙදර යනතුරු ක්‍රියාත්මක කරන බවත් ඔහු පැවසීය .

06 වැනිදා පැවැත්වෙන මෙම හර්තාලය සදහා රාජ්‍ය සහ පෞද්ගලික අංශයේ සියලු සේවාවන් එක්වන බවද ඔහු තවදුරටත් කියා සිටියේය.

හම්බන්තොට මහ රෝහල ඉදිකිරීමේ දී සිදුව තිබෙන දැවැන්ත මූල්‍ය වංචාවක් පිළිබදව, ඕස්ට්‍රේලියාවේ ABC මාධ්‍ය ජාලය විසින් පසුගිය දා ආන්දෝලනාත්මක හෙළිදරව්වක් සිදු කර තිබු අතර ඊට පාර්ලිමේන්තු මන්ත්‍රී නාමල් රාජපක්ෂ ප්‍රතිචාර දක්වා ඇත .

ABC මාධ්‍ය ජාලයේ අනාවරණය මෙරට තුළ ආන්දෝලනයක් ඇති කළ අතර, නාමල් රාජපක්ෂ, ට්වීටර් පණිවිඩයක් නිකුත් කරමින් එම චෝදනා සියල්ල ප්‍රතික්ෂේප කරයි.

තමන් නොදන්නා සමාගමක් පිළිබදව සදහන් කරමින් නැවත වරක් තමාටත් තම පවුලටත් එරෙහිව චෝදනා කරමින් වාර්තා චිත්‍රපටයක් නිකුත් වී ඇති බව පවසන නාමල් රාජපක්ෂ, යහපාලන රජය සමයේ දී මෙවැනි චෝදනා තමන්ට එරෙහිව එල්ල වී ඇති බවත්, ඒ නඩු සදහා තමත් තවමත් මුහුණ දෙමින් සිටින බවත් පවසයි.

ABC මාධ්‍ය ජාලයේ හෙළිදරව්වට අනුව, රෝහලට සැපයුම් කොන්තරාත්තුවක් ලබාගෙන ඇති ඕස්ටේ්‍රලියානු සමාගමක්, ඒ වෙනුවෙන් ඇමරිකානු ඩොලර් මිලියන 2.1 මුදලක් බි්‍රතාන්‍යයේ ස්ථාපිත කර තිබෙන වෙනත් සමාගමකට ලබා දී තිබේ.

අදාල සමාගමේ අයිතිකරු නිමල් පෙරේරා නමැත්තා බවත්, ඔහු, නාමල් රාජපක්ෂ වෙනුවෙන් මුදල් එකතුකිරීමේ කාර්යයෙහි නිරතව සිටි බව පිළිගෙන ඇති බවත් ඕස්ටේ්‍රලියානු ගවේෂණාත්මක මාධ්‍යවේදින් පවසයි .

දැනට යෝජනා වී ඇති සර්ව පාක්ෂික ආණ්ඩුව සඳහා සම්බන්ධවීමට නොහැකි බව සමගි ජන බලවේගය සහ ජනතා විමුක්ති පෙරමුණ පවසා ඇති බව පාර්ලිමේන්තු මන්ත්‍රී වාසුදේව නානායක්කාර සඳහන් කරයි.

ඔවුන් ඉල්ලා සිටින්නේ මැතිවරණයක් වුවද මේ මොහොතේ මැතිවරණයක් කැඳවීමට ජනාධිපතිවරයාට බලයක් නැති බව ද මන්ත්‍රීවරයා පවසයි .

තවත් මාස හයකින් පාර්ලිමේන්තුව විසුරුවා හැරීමට ජනාධිපතිවරයාට බලය ඇති බවත් එසේ නැතිනම් පාර්ලිමේන්තුවේ යෝජනාවක් සම්මත කිරීමෙන් පාර්ලිමේන්තුව විසුරුවා හැරිය හැකි බවත් ඔහු පැවසීය.

නමුත් ඒ සඳහා අවශ්‍ය ඡන්ද සංඛ්‍යාව කිසිවෙකුට නැති බවද ඔහු සදහන් කරයි.

ජනතාව මේ මොහොතේ මැතිවරණයක් ඉල්ලා නොසිටින බවත් ඔවුන්ගේ ජීවන බර සැහැල්ලු කිරීම සඳහා සජිත්ට හෝ අනුරට උවමනාවක් නැති බවත් මන්ත්‍රීවරයා තවදුරටත් කියා සිටියේය.

ඔස්ට්‍රේලියාවේ වෛද්‍ය සමාගමක් සම්බන්ධයෙන් මුදල් විශුද්ධීකරණයට අදාළව සිදුකරන විමර්ශනයක් තුළදී ශ්‍රී ලංකාවේ හම්බන්තොට මහ රෝහල ඉදිකිරීමේදී සිදුවූ බව කියන දූෂිත ගණුදෙනු පිළිබඳවද තොරතුරු හෙළි වී තිබේ.

ඔස්ට්‍රේලියාවේ ABC මාධ්‍ය ජාලය මේ පිළිබඳව දිර්ඝ විස්තරයක් ඉදිරිපත් කර තිබේ.

එස්ට්‍රේලි ඇස්පෙන් මෙඩිකල් සමාගම සම්බන්ධයේ පෞද්ගලික ආරක්ෂක උපකරණ කොන්ත්‍රාත්තුවක් සම්බන්ධයෙන් වූ දූෂණයක් සම්බන්ධයෙන් මෙම විමර්ශන සිදුකර තිබේ.

මෙම සමාගම ශ්‍රී ලංකාවේ හම්බන්තොට දිස්ත්‍රික් මහ රෝහල ඉදිකිරිමේ ව්‍යාපෘතිය සම්බන්ධයෙන් මුදල් විශුද්ධීකරණට අදාළව විමර්ශනයකට භාජනය වී තිබේ.

මෙම සමාගම විසින් හම්බන්තොට දිස්ත්‍රික් මහ රෝහල සඳහා අවශ්‍ය උපකරණ, යටිතල පහසුකම් ඇතුළු සේවා වෙනුවෙන් ඩොලර් මිලියන 18.8ක ව්‍යාපෘතියක් වෙනුවෙන් ඔස්ට්‍රේලියානු රජයේ අනුමැතිය ලාබගෙන තිබේ.

මේ පිළිබඳව විමර්ශන ගවේෂනයක යෙදුණ මාධ්‍යවේදින් සමාගමෙන් අදාළ වෛද්‍ය සැපයීම් රෝහල වෙනුවෙන් සිදුකළාද යන්න විමසා ඇති විට එයට පිළිතුරු ලබාදිම ඔවුන් ප්‍රතික්ෂේප කර තිබේ.

කෙසේ වෙතත් එම කොන්ත්‍රාත් උප කොන්ත්‍රාත් සමාගමක් වෙත ලබාදුන් බව ඔවුන් නිවේදනයකින් සඳහන් කර තිබේ.

ඇස්පෙන් සමාගම ශ්‍රී ලංකාව සම්බන්ධයෙන් සිදුකළ පළමු මුදල් ගණුදෙනුව වන ඩොලර් මිලියන 2.1ක් බ්‍රිටිස් වර්ජින් දූපත්වල ලියාපදිංචි සබ්රේ විෂන් හෝල්ඩිංග්ස් වෙත සිදුකර තිබේ. මෙම ගනුදෙනුව ශ්‍රී ලංකා පොලීසියේ අවධානයට ලක්ව තිබේ.

මෙම සමාගම ශ්‍රී ලංකාවේ නිමල් පෙරේරා නම් පුද්ගලයෙකුට අයිති බවත් ඔහු ශ්‍රි ලංකාවේ රාජපක්ෂ පවුල හා සමීප සබඳතාවක් ඇති බවත් ඒ.බී.සී. මාධ්‍ය හෙළිකර තිබේ.

2016දි ඔහු නාමල් රාජපක්ෂ මහතා වෙනුවෙන් මුදල් එකතු කර ඇති බවට පාපොච්ඡාරණය කර ඇති අතරම ඒ හේතුවෙන් නාමල් රාජපක්ෂ මහතා අත්අඩංගුවටද පත්විය.

හම්බන්තොට රෝහල ඉදිකිරීමේදී සිදුවූ බව කියන දූෂිත ගණුදෙනු පිළිබඳව විමර්ශන වලට අදාළව නිමල් පෙරේරාගෙන් ඔහුගේ ගිණුම්වලට පැහැදිලිකළ නොහැකි මාර්ගවලින් මුදල් ලැබීම පිළිබඳව කළ ප්‍රශ්න කිරීම්වලදී ඔහු ප්‍රකාශ කර ඇත්තේ එම මුදල් ලබාදුන්නේ ඉතාලි ව්‍යාපාරිකයෙක් බවයි.

එම ඉතාලි ව්‍යාපාරිකයාගේ ලිපිනය හෝ දුරකතන අංක සහිතව අනන්‍යතාව තහවුරු කළ නොහැකි බවත් සඳහන් කර තිබේ.

මෙහිදී සබ්රේ විෂන් හොල්ඩිංග්ස් සමාගම පිළිබඳව විමසා ඇති විට නිමල් පෙරේරා ප්‍රකාශ කර ඇත්තේ තමන් එම සමාගම පිළිබඳව නොදන්නා බවත් ඇතැම්විට එම සමාගම තම ඉතාලි මිතුරාට අයිති එකක් විය හැකි බවත් ඔහු සඳහන් කර තිබේ.

කෙසේ වෙතත් මෙම සමාගම නිමල් පෙරේරාට අයිති බවට පොලීසිය විසින් තහවුරු කර තිබේ.

එසේම මෙම සමාගම දූෂිත එයා බස් ගණුදෙනුවට අදාළව ඩොලර් දස දහස් ගණනක් ලැබී ඇති බවට තහවුරු වී තිබේ.

මැයි (04) බදාදා දිනයේ අගමැති මහින්ද රාජපක්ෂ සිය ධූරයෙන් ඉල්ලා අස්වීමේ සූදානමක් සම්බන්ධයෙන් තොරතුරු වාර්තා වෙයි .

අනතුරුව මහින්ද රාජපක්ෂ ප්‍රමුඛ පොදුජන පෙරමුණේ මන්ත්‍රීවරුන් විපක්ෂයේ අසුන් ගැනීමට තීරණය කර ඇති බවත් වාර්තා වෙයි .

අද (02) ජනාධිපති ගෝඨාභය රාජපක්ෂ සමග පැවති සාකච්ඡාවකදී පාර්ලිමේන්තු මන්ත්‍රී බැසිල් රාජපක්ෂ දැක්වූ අදහස් අනුව මේ තොරතුරු හෙළිදරව් වී ඇත.

වැඩිදුරටත් වාර්තා වන ආකාරයට අන්තර්වාර පාලන ආණ්ඩුවල හෝ වෙනත් කිසිදු නමකින් පිහිටුවන ආණ්ඩුවල ඇමැතිකම් නොගැනීමටද පොදුජන පෙරමුණේ මන්ත්‍රී කණ්ඩායම තීන්දු කර ඇත.

මේ සම්බන්ධයෙන් පසුගිය දින කිහිපය පුරා අගමැති මහින්ද රාජපක්ෂ, බැසිල් රාජපක්ෂ සහ නාමල් රාජපක්ෂ අතර දීර්ඝ වශයෙන් සාකච්ජා පැවැත්වී තිබේ.

ඊට එක්ව ඇති ඇතැම් මන්ත්‍රීවරුන් මෙම තීරණයට විරෝධය පළ කර තිබුණද බොහෝ මන්ත්‍රීවරුන් එහිදී අගමැතිවරයාට පෙන්වා දී ඇත්තේ මේ අවස්ථාවේදී කළ යුතු හොදම දෙය විපක්ෂයේ අසුන් ගැනීමට කටයුතු කිරීම යැයි කියාය.

ඒ අනුව බදාදා දින ආණ්ඩු පක්ෂය විපක්ෂයේ අසුන් ගනු ඇති බවද දැනගන්නට ඇත.

අද (02) පෙරවරුවේ පැවති සමගි ජනබලවේගය මන්ත්‍රී කණ්ඩායමේ රැස්වීම කාලගෝට්ටියකින් අවසන් කර ඇත.

පක්ෂයේ සියළුම ක්‍රියාකාරකම් සහ වැඩසටහන් තීරණය කරනු ලබන්නේ ‘ලක්ෂමන් ෆොන්සේකා සහ ජලනි ප්‍රේමදාස’ ඇතුළු කණ්ඩායමක් විසින් බවත් පාර්ලිමේන්තු මන්ත්‍රීවරුන් පයින් යන්නත්, ඡන්ද රැස්කරන්නට ඉන්න රූකඩ පමණක් බවට පත්ව ඇතැයි පවසමින් රැස්වීම අතරතුර මන්ත්‍රීවරුන් කණ්ඩායමක් නැගිට ගොස් ඇත.

රැස්වීම් ආරම්භයේ දීම පක්ෂ නායක සජිත් ප්‍රේමදාස විසින් රැස්වීම පැමිණ නොසිටි සරත් ෆොන්සේකා දැඩි විවේචනයකට ලක් කළේය.

‘මම අද ඒයාගේ මූනටම කියන්න හිටියේ. එයා ඊයේ හැසිරුණු හැටි වැරදියි. එයා නිසයි මේ ඔක්කොම ප්‍රශ්න යැයි පවසා ඇත.

නුවරඑළිය මන්ත්‍රී දිගම්බරම් විසින් රැස්වීම ආරම්භයේ දී ම, හරීන් ප්‍රනාන්දු සහ සරත් ෆොන්සේකා අතර ඊයේ ඇති වූ ගැටුම පිළිබඳ ප්‍රශ්න කර සිටියේය.

ෆීල්ඩ් මාෂල් ෆොන්සේකාට විරුද්ධව දැඩි ප්‍රහාරයක් සජිත් විසින් එල්ල කළේ ඒ අනුවය .

පාර්ලිමේන්තු මන්ත්‍රී හේෂා විතානගේ පැවසූවේ ඉස්සර එජාපයේ කල්ලි තිබුණා කියලා නායකතුමාලා එකතුවෙලා මේ පක්ෂය හැදුවා. දැන් මේ පක්ෂය අපි පැත්තකට දාලා කල්ලියක් හදාගෙන ඉන්නවා.

තරුණ සංවිධානයේ කථිකයෙක් නෑ. කතා කරන්න කවුරුවත්ම නැතිනම් ඦන්දය ඉල්ලන්න බලාගෙන ඉන්න මහලේකම් තුමාගේ දුවට හරි ඒම අවස්ථාව දෙන්න තිබුණා යැයි කිව්වේ සැමගේ සිනා හඩ මැද්දේ ය.

පක්ෂයේ පාර්ලිමේන්තු මන්ත්‍රීවරියන් දෙන්නෙක් ඉන්නවා.

එක්කෙනෙකුට කතාවක් දෙන්න බැරිවුණා.

මොනාද අපි කියන ප්‍රජාතන්ත්‍රවාදය. මන්ත්‍රීවරියෝ ඉදිද්දී කාන්තා සංවිධානය මෙහෙයවන්නේ ‘මැඩම්ගේ ක්ලබ් ඒකේ සෙට් ඒකක්’

දැන් පක්ෂයේ තරුණ සංවිධානය නාකි සෙට් එකේ දරුවන්ගේ බූදලයක් කරලා. යැයි බදුල්ල මන්ත්‍රී චමින්ද විජේසිරි පවසා ඇත.

මාතලේ මන්ත්‍රී රෝහණී කවිරත්න පැවසූවේ මම විශ්වාස භංගයට අත්සන් කළේ නැති විදිහට ඩිජිටල් තිරයේ නම දැම්මා.

මිනිස්සු වටවෙලා මගෙන් අහනවා ඇයි මැඩම් අත්සන් කළේ නැත්තේ කියලා.

මේවා මොන විලිලැජ්ජා නැති වැඩද? මම විශ්වාස භංගය පෙන්නන්න කිව්වා. තවම ඒ්ක ලියාගන්න බැරිවෙලා තියෙනවා. අදටත් ඒකේ මොනවා තියෙනවාද කියලා දන්නේ නෑ.

මමයි -චමින්ද විජේසිරි යි දෙන්නා අකුරක් ලියපු නැති විශ්වාස භංග කොළයට අත්සන් කළේ.

පක්ෂය ඇතුලේ කල්ලි හදාගෙන ඊලඟ ඡන්ද කරන්න හදනවා.
රැස්වීමේ දි කතා ලබාදීමේදී රිෂාඩ් බදුර්දීන්, රවුෆ් හකීම්, මනෝ ගනේෂන්, දිගම්බරම්, ඇතුළු පක්ෂ නායකයින් කිසිවෙකුට කතා කිරීමට අවස්ථාවක් ලබා නොදීම පිළිබඳ දිගින් දිගටම පක්ෂ නායක්වයට චෝදනා එල්ල විය.

ගාලුමුවදොර රැස්වීමේ දී ත් පක්ෂ නායකයින්ට කතා දුන්නේ නෑ.

මන්ත්‍රීවරු ජයප්‍රිය වෙනවට බයේ දේශපාලනය කරන්න පුලුන්ද? පක්ෂ හදන්න පුලුවන්ද? චමින්ද විජේසිරි ප්‍රශ්ණ කර ඇත.

ඉතා කළකරීමෙන් කතාකල පුත්තලම මන්ත්‍රී හෙක්ටර් අප්පුහාමි පැවසූවේ ‘මම දවස් පහම පෙළපාලියේ ගියා. මම මේ පක්ෂයේ වැඩ කෙරෙන හැටි හොඳට අවබෝධ කර ගත්තා. තේරුම් ගත්තා. බොහොම ස්තුතියි! අපිට වැරදුණා. කියාය.

43 සේනාංකයේ නායක චම්පික රණවක, පක්ෂයේ වැඩපිළිවෙල විවේචනය කරමින් පාගමනට මෙන්ම අද රැස්වීමට ද සහභාගි වී නැත.

අද පක්ෂය මෙහෙයවන්නේ කණ්ඩායමක්. ඒ අය ආණ්ඩුව රකින්න කටයුතු කරනවා. මේවා ලැජ්ජා නැති වැඩ. යැයි කියමින් පක්ෂයේ මන්ත්‍රීවරුන් රැස්වීමෙන් පිටව ගොස් ඇත.
තත්වය පාලනය කිරීමට ජ්‍යෙෂ්ඨ සාමාජිකයින් උත්සහ දැරූ නමුත් එය ව්‍යර්ත විය.

ආණ්ඩුවෙන් ස්වාධීන වූ මන්ත්‍රීවරුන් කණ්ඩායමට එළිපිට චෝදනා කරමින් ඔවුන් විරසක කර ගත් බවත්, ආණ්ඩුව ගෙදර යවා අලුත් ආණ්ඩුවක් පත් කර රටේ ප්‍රශ්න විසඳීම වෙනුවට රාජපක්ෂවරුන් රැකීමට සජබ නායකයාත් ඔහුගේ හොඳම යාලුවා සහ මැඩම් උත්සහ කරන බවත් ඉවත්ව ගිය කණ්ඩායම පවසා ඇත.

පාර්ලිමේන්තුවේ කථික ලැයිස්තුව සකස් කිරීම සඳහා දැරූ උත්සාහයේ දී මන්ත්‍රීවරුන් පෙන්වා දි ඇත්තේ අපි කරන දේ ඉස්සර වෙලා තීරණය කරන්න ඔ්නී.

-Nextv

අද (02) සිට ක්‍රියාත්මක වන පරිදි දේශීය සහල් සඳහා උපරිම සිල්ලර මිලක් නියම කරමින් අති විශේෂ ගැසට් නිවේදනයක් නිකුත්කර ඇත .

ඊට අනුව අදාළ මිල ගණන් මෙසේය .

?සුදු /රතු නාඩු රුපියල් 220/=
?සුදු / රතු සම්බා රුපියල් 230/=
?කීරි සම්බා රුපියල් 260/=

නව ගැසට් නිවේදනයට අනුව එම දේශිය සහල් වර්ග උපරිම සිල්ලර මිලට වඩා වැඩියෙන් වෙළදාම් කිරීම , සැපයීම , වෙළදාම් කිරීම සඳහා ඉදිරිපත් කිරීම හෝ වෙළදාම් සඳහා ප්‍රදර්ශනය කිරීම තහනම් වනු ඇති.

අදාළ ගැසට් නිවේදනය පහත දැක්වෙයි .

පොදුජන පෙරමුණ ආණ්ඩුව වෙතින් ඉවත්ව පාර්ලිමේන්තුව තුළ ස්වාධීන වූ මන්ත්‍රී කණ්ඩායම විසින් නව දේශපාලන පක්ෂයක් සහ සන්ධානයක් බිහිකිරීමට තීන්දුවක් ගෙන ඇති බව වාර්තා වෙයි .

නව පක්ෂය වෙනුවෙන් පොදුජන පෙරමුණේ හිටපු ජ්‍යෙෂ්ඨයකු නායකත්වය දීමට සූදානමක් ඇති බවත් දේශපාලන ආරංචි මාර්ග පවසයි.

එසේම ආණ්ඩුවෙන් ඉවත්වූ පක්ෂ මේ යෝජිත නව සන්ධානයේ සාමාජිකත්වය ලැබීමේ සූදානමක් ගැනත් තොරතුරු වාර්තා වෙයි .

පොහොට්ටු ස්වාධීන එකඟතාවක් !

මේ අතර ජාතික එකගතා ආණ්ඩුවක් පිහිටුවීමට ශ්‍රී ලංකා පොදුජන පෙරමුණ හා ආණ්ඩුවෙන් ඉවත්ව ස්වාධීන වූ මන්ත්‍රී කණ්ඩායම අතර අද(02) පෙරවරුවේ පැවති සාකච්ඡාවේදී ප්‍රතිපත්ති ම ය එකඟතාවක් ඇති ව තිබේ.

ජනාධිපති ගෝඨාභය රාජපක්ෂගේ ප්‍රධානත්වයෙන් කොටුව ජනාධිපති මන්දිරයේ දී මෙම සාකච්ඡාව පැවැත්විණි .

ඒ අනුව ජාතික එකගතාආණ්ඩුවක් පිහිටුවීමේ කටයුතු ඉදිරියට ගෙන යාම සදහා ජනාධිපතිවරයාට අවශ්‍ය සහයෝගය ලබාදීමට ද එහිදී එකඟතාවකට පැමිණි බව වාර්තා වේ අඩුවෙන් ඉවත්ව ස්වාධීන වූ මන්ත්‍රී කණ්ඩායම ජනාධිපතිවරයාට හා ආණ්ඩුවට මීට පෙර ඉදිරිපත් කළ කරුණු 11ක යෝජනාවලිය ක්‍රියාත්මක කිරීම සම්බන්ධයෙන් එහිදී දීර්ඝ වශයෙන් සාකච්ඡා වූ බව වාර්තා වේ .

එම සාකච්ඡාව පැය එක හමාරක් පමණ තිස්සේ පැවැත්විණි .

ශ්‍රී ලංකා පොදුජන පෙරමුණේ සභාපති ඇමති මහාචාර්ය ජී එල් පීරිස්, ජාතික සංවිධායක බැසිල් රාජපක්ෂ ,ඇමති රමේෂ් පතිරණ ,මහලේකම් සාගර කාරියවසම් ,පාර්ලිමේන්තු මන්ත්‍රී සංජීව එදිරිමාන්න ද,සාකච්ඡා ඉදිරියට ගෙන යාම සඳහා පත්කරන ලද කමිටුවේ සාමාජිකයන් වන නිමල් සිරිපාල ද සිල්වා, අනුර ප්‍රියදර්ශන යාපා විමල් වීරවංශ ,උදය ගම්මන්පිල සහ ටිරාන් අලස් මෙම සාකච්ඡාවට සහභාගි වූහ.

ශ්‍රී ලංකා පොදුජන පෙරමුණ නායකත්වයට ජනාධිපති ගෝඨාභය රාජපක්ෂ පත්කර ගැනීමට එම පක්ෂය අභ්‍යන්තරයේ සාකච්ඡාවක් දියත්ව ඇති බව වාර්තා වෙයි .

ඒ පොදුජන පෙරමුණ නියෝජනය කරන පසුපෙළ මන්ත්‍රීවරුන් පිරිසකගේ මූලිකත්වයෙනි.

මේ යෝජනාව දැනටමත් පොදුජන පෙරමුණේ ඉහළ නායකත්වය වෙත යෝජනාවක් ලෙස ඉදිරිපත් කර ඇති බවත් දේශපාලන ආරංචි මාර්ග පවසයි.

මෙම මන්ත්‍රී කණ්ඩායමේ අදහස වී ඇත්තේ බැසිල් රාජපක්ෂ විසින් ජනාධිපති ගෝඨාභය රාජපක්ෂ දේශපාලන කටයුතුවලින් ඉවත්කර තැබීම ආණ්ඩුව තුල අභ්‍යන්තර ගැටුම් ඇතිවීමට ප්‍රධාන හේතුවක් වූ බවයි.

ආණ්ඩුවට සහය දැක්වූ පක්ෂ 11 මෙන්ම පොදුජන පෙරමුණේ ජ්‍යෙෂ්ඨයන් ආණ්ඩුවෙන් ඉවත්ව පාර්ලිමේන්තුව තුළ ස්වාධීන වූයේද ඒ නිසා බවත් මන්ත්‍රී කණ්ඩායමේ අදහස වී තිබේ.

ඒ අනුව යෝජනාව වී ඇත්තේ ,අගමැති මහින්ද රාජපක්ෂ අගමැති ධූරයෙන් ඉවත්වීමත් සමග පක්ෂයේ නායකත්වය ගෝඨාභය රාජපක්ෂ ජනාධිපති වෙත ලැබිය යුතු බවය.

කෙසේ වුවත් ආණ්ඩුවේ තවත් මන්ත්‍රී කණ්ඩායමක් නාමල් රාජපක්ෂ මන්ත්‍රීවරයා පොදුජන පෙරමුණේ නායකයා විය යුතු බවට ප්‍රචාරයක් ගෙන යමින් සිටින බවත් වාර්තා වෙයි .

ගෝඨාගෝගම අසලට අද (02) මේ වන විට පොලිස් කැරළි මර්දන ඒකකය යොදවා එය විසුරවීමේ උත්සාහයක් සම්බන්ධයෙන් වාර්තා වෙයි.

ඒ වෙනුවෙන් පළමුව පොලිස් කැරළි මර්දන නිලධාරීන් රැගත් ට්‍රක් රථයක් යොමුකළ අතර , එය පොදුජන අරගලයේ නිරත විරෝධතාකරුවන් ගේ මැදිහත්වීම හමුවේ ආපසු හැරවිණ.

නමුත් මේ වන විට ජනාධිපති කාර්‍යාලය අසල ගේට් සීරෝ ආසන්නයේ පොලිස් කැරලි මර්දන භට පිරිස් යොදවා ඇත.

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ මේ වන විට ආරක්ෂක අංශ ගෝල්ෆේස් අරගල බිම අධ්‍යයනය කර එය විසුරුවා හැරීමට අවශ්‍ය මිලිටිරි උපාය උපක්‍රම අත්හදා බැලීම් සිදුකිරීම ආරම්භ කර ඇති බවයි.

සති තුනකට අධික ගෝල්ෆේස් අරගල බිම බුද්ධි අංශ අධ්‍යයනය කර ඊට අදාළ බුද්ධි වාර්තා සැලකිල්ලට ගැන මේ මෙහෙයුම් දියත්කර ඇති බවත් දේශපාලන විචාරකයන් තක්සේරු කරයි.

ඊට අදාළ පළමු පියවර ඊයේ (01) හිමිදිරියේ අරලිය ගහ මන්දිරය අසල මයිනාගෝගම අට්ටාල කැඩීම හරහා දියත්වූ බවත් ඔවුන් පෙන්වා දෙයි.

එහිදී ලැබුණු ප්‍රතිචාර මත ඊළඟ ක්‍රියාමාර්ග මෙසේ ආරම්භ කර ඇත බව පුරෝකථනය කළ හැකි බවත් දේශපාලන විචාරකයන් පවසයි .