ශ්‍රී ලංකාව මේ මොහොතේ මුහුණ දී සිටින ආර්ථික සහ දේශපාලන අර්බුදයට විසඳුම් සෙවීම සඳහා ජනාධිපති ගෝඨාභය රාජපක්‍ෂ වාහාම ඉවත්විය යුතු බවත් ජනාධිපතිවරයා ඉවත්වීමෙන් පසු හදිසි ක්‍රියාමාර්ගයක් ලෙස තාවකාලික සම්මුති ආණ්ඩුවක් පිහිටුවිය යුතු බවත් පෙරටුගාමී සමාජවාදී පක්‍ෂයේ ප්‍රධාන ලේකම් කුමාර් ගුණරත්නම් යෝජනා කරයි.
ඔහු මේ බව සඳහන් කර සිටියේ පෙරටුගාමී සමාජවාදී පක්ෂ මූලස්ථානයේ අද (11) පස්වරුවේ පැවති මාධ්‍ය හමුවකදී අදහස් දක්වමින් ය.
ජනාධිපතිවරයා ඉවත්වීමත් සමඟ තාවකාලික ජනාධිපතිවරයෙක් පත්කර මසකට පසුව නව ජනාධිපතිවරයෙක් පත්කළ යුතු බව කී කුමාර් ගුණරත්නම් ඉන් පසුව මාස හයක කාලයක් සඳහා පාර්ලිමේන්තුව නියෝජනය කරන සියලුම පක්‍ෂවල සහභාගීත්වයෙන් තාවකාලික අන්තර්වාර පාලනයක් ස්ථාපිත කළ යුතු බව ද සඳහන් කළේය.
රට මුහුණ දී සිටින ගැටලුකාරී තත්වයෙන් මිදීම සඳහා පෙරටුගාමී සමාජවාදී පක්‍ෂය යෝජනා හතක් ඉදිරිපත් කරන අතර තාවකාලික සම්මුති ආණ්ඩුව යටතේ හදිසියේ ගතයුතු ක්‍රියාමාර්ග ද ඉදිරිපත් කර තිබේ.