පොළොන්නරුවේ ප්‍රධාන පෙළේ සහල් ව්‍යාපාරිකයන් නැවත වරක් සතිපතා සහල් මිල ගණන් ඉහළ දැමීමට පටන්ගෙන ඇතැයි තොග වෙළෙඳ ව්‍යාපාරිකයෝ පවසති.
මොවුන් පසුගිය දෙසතිය තුළ වාර දෙකක් පමණ සිය නිෂ්පාදනවල මිල ඉහළ දමා ඇතැයිද මෙම ව්‍යාපාරිකයෝ සඳහන් කළහ.
පොළොන්නරුවේ ප්‍රධානම සහල් ව්‍යාපාර සමාගමක් වන අරලිය සමාගම වෙළෙඳුන් වෙත නිකුත් කර ඇති මිල ගණන් ලේඛනයට අනුව පසුගිය මාර්තු 12දා රු. 180/- ට අලෙවි කළ සම්බා සහල් කිලෝව මාර්තු 22දා සිට රුපියල් 205/- දක්වා රුපියල් රු. 25/-කින් මිල වැඩි කර තිබේ. මාර්තු 12දා රු. 175/- ට අලෙවි කළ නාඩු සහල් කිලෝව මාර්තු 22දා රු. 200/- දක්වා මිල ඉහළ දමා ඇත. එසේම මාර්තු 12දා රු. 175/- ට අලෙවි කළ සුදු කැකුළු සහල් කිලෝව මාර්තු 22දා රු. 200/- දක්වා මිල ඉහළ දමා තිබේ. මාර්තු 12දා රු. 180/- ට අලෙවි කළ රෝස කැකුළු මිල මාර්තු 22දා වනවිට රු. 205/- කි.
වී මිලදී ගැනීමේ සහතික මිල රජය විසින් ඉහළ දැමීම නිසා සහල් නිෂ්පාදන මිල ඉහළ යාමෙන් මෙලෙස සහල් මිල වැඩි කරන්නට සිදුවූ බව එම සහල් ව්‍යාපාරිකයන් සඳහන් කළ වග දේශය සමඟ මේ ගැන කරුණු දැක්වූ තොග වෙළෙන්ඳෝ සඳහන් කළහ.
-දේශය